16-تەتقىق ماقالىسى
«قېرىندىشىڭىز تىرىلىدۇ!»
«ئەيسا [مارتاغا]: ‹قېرىندىشىڭىز تىرىلىدۇ›،— دېدى».—يۇھاننا 11:23.
12-ناخشا ۋەدە قىلىنغان مەڭگۈ ھاياتلىق
بۇ ماقالىدە a
1. بىر ئوغۇل بالا تىرىلىشكە بولغان ئۈمىدىنى قانداق ئىپادىلىگەن؟
مەتيۇ ئىسىملىك ئوغۇل بالا ئېغىر كېسەل بولغاچ، ئۇنىڭغا كۆپ قېتىم ئوپېراتسىيە قىلىش كېرەك ئىدى. ئۇ 7 ياش ۋاقتىدا ئائىلىسىدىكىلەر بىلەن بىرلىكتە ھەر ئايلىق JW ئىنتېرنېت تېلېۋىزىيىسىنى كۆرۈۋاتاتتى. پروگرامما ئاخىرىدا، يېقىن كىشىلىرى قايتا تىرىلگەندە، ئۇلارنى قارشى ئېلىش توغرۇلۇق مۇزىكىلىق فىلىمنى كۆردى b. پروگراممىدىن كېيىن، مەتيۇ ئاتا-ئانىسىنىڭ يېنىغا كېلىپ، ئۇلارنىڭ قوللىرىنى تۇتۇپ تۇرۇپ: «ئاپا، دادا كۆردىڭلارمۇ، مەن ئۆلۈپ كەتسەممۇ، قايتا تىرىلىپ تۇرىمەن، سىلەر مېنى ساقلاڭلار. ھەممىسى ياخشى بولىدۇ»،— دېگەن. ئاتا-ئانىلىرى ئوغلىنىڭ قايتا تىرىلىش ئۈمىدىگە بولغان ئىشەنچىسىنىڭ شۇنچە كۈچلۈك ئىكەنلىكىنى بىلگەندە، قانداق ھېس-تۇيغۇدا بولغانلىقىنى تەسەۋۋۇر قىلالامسىز؟
2، 3. نېمە ئۈچۈن تىرىلىش ئۈمىدى ھەققىدە چوڭقۇر ئويلىنىش بىز ئۈچۈن پايدىلىق؟
2 بەزى چاغلاردا، مۇقەددەس كىتابنىڭ كېلەچەكتىكى تىرىلىش توغرىسىدىكى ۋەدىلىرى ھەققىدە چوڭقۇر ئويلىنىش بىز ئۈچۈن پايدىلىق (يۇھاننا 5:28، 29). نېمە ئۈچۈن؟ چۈنكى، ھاياتىمىزدا قاچان ئېغىر كېسەلگە گىرىپتار بولىدىغانلىقىمىزنى ياكى تۇيۇقسىزلا يېقىن كىشىلىرىمىزدىن ئايرىلىپ قالىدىغانلىقىمىزنى بىلمەيمىز (ۋەز 9:11؛ ياقۇپ 4:13، 14). تىرىلىش ئۈمىدىمىز شۇنداق قىيىن ۋەزىيەتلەرگە بەرداشلىق بېرىشىمىزگە ياردەم بېرەلەيدۇ (1-سالونىكا. 4:13). مۇقەددەس يازمىلار بىزنى شۇنىڭغا ئىشەندۈرىدۇ: ئاسماندىكى ئاتىمىز بىزنى ياخشى بىلىدۇ ۋە سۆيىدۇ (لۇقا 12:7). يەھۋا خۇدا بىزنى ئىلگىرىكى مىجەز-خۇلق ۋە ئەسلىمىلىرىمىز بىلەن تىرىلدۈرىدۇ. دېمەك، ئۇنىڭ بىزنى قانچىلىك ياخشى تونۇيدىغانلىقىنى ئويلاپ كۆرۈڭ. سۆيگۈ-مۇھەببەتلىك يەھۋا خۇدا بىزنى مەڭگۈ ياشاش ئىمكانىيىتىگە ئىگە قىلىدۇ، ھەتتا ئۆلۈپ كەتسەكمۇ، ئۇ بىزنى ئۆلۈمدىن تىرىلدۈرىدۇ.
3 بۇ ماقالىدە، ئاۋۋال نېمىشقا تىرىلىش ۋەدىسىگە ئىشىنەلەيدىغانلىقىمىزنى مۇلاھىزە قىلىمىز. ئاندىن كېيىن، ئاساسىي ئايەتتىكى «قېرىندىشىڭىز تىرىلىدۇ» دېگەن سۆزلەرنى ئۆز ئىچىگە ئالغان ئىمان-ئېتىقادنى كۈچەيتىدىغان مۇقەددەس كىتابتىكى ئۈزۈندىلەرنى مۇھاكىمە قىلىمىز (يۇھاننا 11:23). ئاخىرىدا، تىرىلىش ئۈمىدىگە بولغان ئىشەنچىمىزنى قانداق قىلىپ تېخىمۇ كۈچەيتەلەيدىغانلىقىمىزنى ئۆگىنىمىز.
نېمە ئۈچۈن تىرىلىش ھەققىدىكى ۋەدىگە ئىشىنەلەيمىز؟
4. بىر ۋەدىگە ئىشىنىش ئۈچۈن چوقۇم نېمىگە ئىشىنىشىمىز كېرەك؟ مىسال ئارقىلىق چۈشەندۈرۈڭ.
4 بىر ۋەدىگە ئىشىنىش ئۈچۈن، چوقۇم ئاشۇ ۋەدىنى بەرگەن كىشىنىڭ ئۇنى ئورۇنلاش ئارزۇ-ئىستىكى ۋە كۈچ-قۇدرىتى ياكى ئىقتىدارى بارلىقىغا ئىشىنىشىمىز كېرەك. مۇنداق بىر مىسال قىلايلى: ئۆيىڭىز كۈچلۈك بوران-چاپقۇندا ۋەيران بولغانلىقىنى تەسەۋۋۇر قىلىپ بېقىڭ. بىر دوستىڭىز قېشىڭىزغا كېلىپ: «مەن ئۆيۈڭنى قايتا سېلىشىڭغا ياردەم قىلىمەن»،— دەپ ۋەدە بېرىدۇ. ئۇ سەمىمىي ۋە ئۇنىڭ سىزگە ياردەم قىلىش ئارزۇ-ئىستىكى بارلىقىغا ئىشىنىسىز. ئەگەر ئۇ ماھارەتلىك قۇرۇلۇشچى ۋە كېرەكلىك قورال-سايمانلىرى بولسا، ئۇنىڭ سىزگە ياردەم بېرىش ئىقتىدارى بارلىقىنى بىلىسىز. شۇنىڭ بىلەن، ئۇنىڭ ۋەدىسىگە ئىشىنىسىز. ئۇنداقتا، خۇدانىڭ تىرىلدۈرۈش ۋەدىسى ھەققىدە نېمە دېسەك بولىدۇ؟ ئۇنىڭ راستىنلا شۇ ۋەدىسىنى ئەمەلگە ئاشۇرۇش ئارزۇ-ئىستىكى ۋە كۈچ-قۇدرىتى بارمۇ؟
5، 6. نېمە ئۈچۈن يەھۋانىڭ ئۆلۈكلەرنى تىرىلدۈرۈش ئارزۇ-ئىستىكىنىڭ بارلىقىغا ئىشىنەلەيمىز؟
5 يەھۋانىڭ ئۆلۈكلەرنى تىرىلدۈرۈش ئارزۇ-ئىستىكى بارمۇ؟ ئەلۋەتتە، بۇنىڭغا گەپ كەتمەيدۇ. ئۇ بەزى كىشىلەرنى ئىلھاملاندۇرۇپ، ئۇنىڭ كېلەچەكتىكى تىرىلدۈرۈش ۋەدىسىنى قەلەمگە ئالدۇرغان (يەشايا 26:19؛ ھوشىيا 13:14؛ ۋەھىي. 20:11–13). يەھۋا ۋەدە بەرسە، ئۇ دائىم ۋەدىسىنى ئورۇنلايدۇ (يەشۇئا 23:14). ئەمەلىيەتتە، ئۇ ئۆلۈكلەرنى تىرىلدۈرۈشكە تەشنا. نېمە ئۈچۈن بۇنداق دېيەلەيمىز؟
6 ئايۇپ پەيغەمبەرنىڭ نېمە دېگەنلىكى ھەققىدە ئويلاپ كۆرۈڭ. ئۇ ھەتتا ئۆلۈپ كەتكەن تەغدىردىمۇ، يەھۋانىڭ ئۇنىڭ تىرىلگەنلىكىنى كۆرۈشكە تەشنا ئىكەنلىكىگە ئىشەنگەن (ئايۇپ 14:14، 15). يەھۋا ئۆلۈپ كەتكەن بارلىق خىزمەتچىلىرىنىمۇ كۆرۈشنى تەشنالىق بىلەن كۈتىدۇ. ئۇ ئۇلارنى ساغلام خۇشال-خۇرام ھاياتقا ئېرىشتۈرۈشكە تەقەززا. ئۇنداقتا، يەھۋا ھەققىدىكى ھەقىقەتلەرنى بىلىش پۇرسىتى بولماي ئۆلۈپ كەتكەن مىلياردلىغان ئىنسانلارچۇ؟ رەھىم-شەپقەتلىك ياراتقۇچىمىز ئۇلارنىمۇ تىرىلدۈرۈشنى ئارزۇ قىلىدۇ (ئەلچى. 24:15). ئۇ ئۇلارغا ئۆزى بىلەن دوست بولۇش ۋە يەر يۈزىدە مەڭگۈ ياشاش پۇرسىتىنى بېرىشنى خالايدۇ (يۇھاننا 3:16). ناھايىتى ئېنىقكى، يەھۋانىڭ ئۆلۈكلەرنى تىرىلدۈرۈش ئارزۇ-ئىستىكى بار.
7، 8. نېمە ئۈچۈن يەھۋانىڭ ئۆلۈكلەرنى تىرىلدۈرۈشكە قادىر ئىكەنلىكىگە ئىشىنىمىز؟
7 يەھۋانىڭ ئۆلۈكلەرنى تىرىلدۈرۈش كۈچ-قۇدرىتى بارمۇ؟ ئەلۋەتتە! ئۇ «ھەممىگە قادىر» (ۋەھىي. 1:8). شۇڭا، ئۇ ھەرقانداق دۈشمەننى، ھەتتا ئۆلۈمنى مەغلۇپ قىلىدىغان كۈچ-قۇدرەتكە ئىگە (1-كورىنت. 15:26). بۇنى بىلىش ئىمان-ئېتىقادىمىزنى كۈچەيتىدۇ ۋە بىزگە تەسەللى بېرىدۇ. ئېمما ئارنولد ئىسىملىك قېرىنداشنىڭ كەچۈرمىشلىرىنى كۆرۈپ باقايلى. ئۇ ۋە ئۇنىڭ ئائىلىسىدىكىلىرى ئىككىنچى دۇنيا ئۇرۇش مەزگىلىدە ئېغىر سىناققا دۇچ كەلگەن. دەھشەتلىك جازالاش لاگېرلىرىدا ئۇنىڭ يېقىنلىرى ئۆلۈپ كەتكەن ئىدى. ئېمما قىزىغا تەسەللى بېرىش ئۈچۈن: «ئەگەر ئۆلۈپ كەتكەن كىشىلەر قايتا ياشىمىسا، دېمەك دۈشمىنىمىز ئۆلۈم ياراتقۇچى خۇدادىن كۈچلۈكرەك. بىراق، بۇنداق بولۇشى مۇمكىن ئەمەس»،— دېگەن. شەك-شۈبھىسىزكى، يەھۋادىن كۈچلۈك ھېچقانداق نەرسە يوق! ھاياتلىقنى بارلىققا كەلتۈرگەن، ھەممىگە قادىر خۇدا ئۆلگەنلەرگە قايتا ھاياتلىق بېرىشكە ھەم قادىر.
8 خۇدا ئۆلۈكلەرنى تىرىلدۈرىدۇ. بۇنى قانداق بىلىمىز؟ سەۋەبى، ئۇنىڭ ئەستە ساقلاش ئىقتىدارى چەكسىز. ئۇ ھەر بىر ئاسماندىكى يۇلتۇزنى ئۆز ئىسىمى بىلەن چاقىرىدۇ (يەشايا 40:26). بارلىق ئۆلۈپ كەتكەنلەرمۇ ئۇنىڭ ئېسىدە (ئايۇپ 14:13؛ لۇقا 20:37، 38). ئۇ قايتا تىرىلدۈرىدىغان كىشىلەرنىڭ ئېرسىيىتى، تاشقى قىياپەتلىرى، مىجەز-خۇلقلىرى، كەچۈرمىشلىرى ۋە ئەسلىمىلىرىنى ئۆز ئىچىگە ئالغان بارلىق كىچىك تەپسىلاتلارنى ئاسانلا ئېسىگە ئالالايدۇ.
9. نېمە ئۈچۈن يەھۋانىڭ كېلەچەكتىكى تىرىلدۈرۈش توغرىسىدىكى ۋەدىسىگە ئىشىنىسىز؟
9 ناھـايىتى ئېنىقـكى، يەھـۋانىڭ كېلەچـەكتىكى تىرىلدۈرۈش توغرىسىدىكى ۋەدىسىگە ئىشىنەلەيمىز. چۈنكى، ئۇنىڭ ئۆز ۋەدىلىرىنى ئەمەلگە ئاشۇرۇش ئارزۇ ئىستىكى ۋە كۈچ-قۇدرىتى بارلىقىنى بىلىمىز. خۇدانىڭ تىرىلدۈرۈش ۋەدىسىگە ئىشىنەلىشىمىزنىڭ يەنە بىر سەۋەبىنى مۇھاكىمە قىلىپ باقايلى. يەھۋا ئاللىقاچان كىشىلەرنى تىرىلدۈرگەن. قەدىمقى زاماندا، ئۇ بىرقانچە ساداقەتمەن خىزمەتچىلىرىگە ئۆلۈكلەرنى تىرىلدۈرۈش كۈچ-قۇدرىتىنى بەرگەن. ئۇلارنىڭ ئارىسىدا ئەيسامۇ بار. ھازىر يۇھاننا كىتابىنىڭ 11-بابىدا يېزىلغان ئەيسانىڭ ئۆلۈكلەرنى تىرىلدۈرگەنلىكى توغرىسىدىكى بىر ۋەقەنى كۆرۈپ باقايلى.
ئەيسانىڭ يېقىن دوستى ئۆلۈپ كەتتى
10. ئەيسا ئىئوردان دەرياسىدىن ئۆتۈپ، بەيتانىيانىڭ قارشى تەرىپىدىكى رايونلاردا ۋەز قىلىپ يۈرگەندە، نېمە ئىش يۈز بەرگەن ۋە ئۇ نېمە قىلدى؟ (يۇھاننا 11:1–3)
10 يۇھاننا 11:1–3-نى ئوقۇڭ. مىلادى 32-يىلىنىڭ ئاخىرلىرىدا، بەيتانىيادا نېمە ئىش يۈز بەرگىنىنى تەسەۋۋۇر قىلىپ كۆرۈڭ. مۇشۇ يېزىدا ئەيسانىڭ يېقىن دوستلىرى لازار ۋە ئۇنىڭ قېرىنداشلىرى مەريەم ۋە مارتا ياشايتتى (لۇقا 10:38–42). كېيىن، لازار كېسەل بولۇپ قېلىپ، ئۇنىڭ قېرىنداشلىرى كۆپ غەم-ئەندىشە قىلغان. ئۇلار بەيتانىيادىن ئىككى كۈن پىيادە يول يۈرۈپ، يېتىپ بېرىشقا بولىدىغان ئىئوردان دەرياسىنىڭ قارشى تەرىپىدە بولغان ئەيسا مەسىھكە بىر خەۋەرچى ئەۋەتكەن (يۇھاننا 10:40). ئەپسۇسلىنارلىقى، خەۋەرچى ئەيسانىڭ قېشىغا يېتىپ بارغاندا، لازار ئۆلۈپ كەتكەن ئىدى. گەرچە ئەيسا دوستىنىڭ ئەمدىلا جان ئۈزگەنلىكىنى بىلسىمۇ، ئۇ يەنە ئاشۇ يەردە ئىككى كۈن تۇرۇپ، ئاندىن بەيتانىياغا بارغان. ھەزرىتى ئەيسا بەيتانىياغا يېتىپ كەلگەندە، لازارنىڭ ئۆلگىنىگە تۆت كۈن بولغان ئىدى. ئەيسا دوستلىرى ئۈچۈن پايدىلىق ۋە خۇدانى ئۇلۇغلايدىغان ئىشنى قىلماقچى بولغان.—يۇھاننا 11:4، 6، 11، 17.
11. بۇ ئۈزۈندىدىن دوستلۇق ھەققىدە نېمىنى ئۆگىنەلەيمىز؟
11 بۇ ئۈزۈندىلەردىن دوستلۇق ھەققىدە بىر نەرسىنى ئۆگىنەلەيمىز. ئويلاپ كۆرۈڭ، مەريەم بىلەن مارتا، ئەيساغا خەۋەرچى ئەۋەتكەن. ئۇلار ئۇنىڭدىن بەيتانىياغا كېلىشنى ئۆتۈنمىگەن، ئۇلار پەقەت ئۇنىڭ قەدىردان دوستىنىڭ كېسەل بولۇپ قالغانلىقىنى ئېيتقان (يۇھاننا 11:3). لازار ئۆلگەندە، ئەيسا ھەتتا يىراق جايدا تۇرۇپمۇ ئۇنى تىرىلدۈرەلەيتتى. ئەمما ئەيسا بەيتانىياغا بېرىپ، دوستلىرى مەريەم ۋە مارتا بىلەن بىللە بولۇشنى قارار قىلغان. سىز سورىمىسىڭىزمۇ، ياردەم قولىنى سىزگە سۇنۇشقا تەييار تۇرىدىغان دوستىڭىز بارمۇ؟ ئۇنداقتا، بېشىڭىزغا ئېغىر كۈنلەر كەلگەندە، ئۇنىڭ ياردىمىگە تايىنالايسىز (پەند. نە 17:17). ئەيساغا ئوخشاش، بىزمۇ باشقىلار بىلەن شۇنداق دوستلۇق ئورنىتايلى! ھازىر، يەنە داۋاملىق نېمە ئىش بولغانلىقىنى كۆرۈپ باقايلى.
12. ئەيسا مارتاغا نېمىنى ۋەدە قىلغان ۋە نېمە ئۈچۈن ئۇنىڭ ۋەدىسى قۇرۇق گەپ ئەمەس؟ (يۇھاننا 11:23–26)
12 يۇھاننا 11:23–26-نى ئوقۇڭ. مارتا ھەزرىتى ئەيسانىڭ بەيتانىياغا يېقىنلاپ قالغانلىقىنى بىلىپ، دەرھال ئۇنىڭ بىلەن كۆرۈشۈشكە يۈگۈرگەن ۋە كۆرۈشكەندە مۇنداق دېگەن: «بۇ يەردە بولغان بولسىڭىز، قېرىندىشىم ئۆلمەس ئىدى» (يۇھاننا 11:21). شۇنداق، ئۇ لازارنى ساقايتقان بولاتتى. ئەمما، ئەيسا مەسىھ تېخىمۇ مۇھىم ئىشنى قىلىشنى ئويلىغان. ئۇ مارتاغا ۋەدە بېرىپ: «قېرىندىشىڭىز تىرىلىدۇ»،— دېگەن. ئۇ يەنە مارتاغا بەرگەن ۋەدىسىگە ئىشىنىشكە بولىدىغانلىقىنىڭ يەنە بىر سەۋەبىنى ئېيتىپ، مۇنداق دېگەن: «تىرىلىش ۋە ھايات مەن ئۆزۈمدۇرمەن». ئەيساغا ئۆلۈكلەرنى تىرىلدۈرۈش كۈچىنى خۇدانىڭ ئۆزى بەرگەن. ئىلگىرى ئۇ بىر كىچىك قىز ئۆلۈپ ئۇزۇن ئۆتمەي، ئۇنى تىرىلدۈرگەن، يەنە بىر ياش يىگىتنى شۇ ئۆلۈپ كەتكەن كۈنى تىرىلدۈرگەن (لۇقا 7:11–15؛ 8:49–55). ئەمما، ھازىر ئۆلۈپ كەتكىنىگە تۆت كۈن بولۇپ، تېنى چىرىشكە باشلىغان لازارنى تىرىلدۈرەلەمدۇ؟
«لازار، تاشقىرىغا چىق!»
ئەيسا مەسىھ قايغۇرۇۋاتقان دوستلىرىغا ئىچ ئاغرىتىپ ھېسداشلىق قىلغان (13، 14-ئابزاسلارغا قاراڭ)
13. يۇھاننا 11:32–35-ئايەتلەردىكى ئۈزۈندىلەرگە ئاساسلانغاندا، مەريەم ۋە باشقىلارنىڭ يىغا-زارلىرىنى كۆرگەندە، ئەيسا مەسىھ قانداق ئىنكاس قايتۇرغان؟ (رەسىمگە ھەم قاراڭ)
13 يۇھاننا 11:32–35-نى ئوقۇڭ. ئۇنىڭدىن كېيىن نېمە ئىش بولغانلىقىنى تەسەۋۋۇر قىلىڭ. لازارنىڭ يەنە بىر قېرىندىشى مەريەم ئەيسا بىلەن كۆرۈشكىلى چىققان. ئۇ ھەدىسى ئېيتقان سۆزلەرنى قايتا تەكرارلىغان: «ھەزرىتىم، ئەگەر بۇ يەردە بولغان بولسىڭىز، قېرىندىشىم ئۆلمەس ئىدى». مەريەم ۋە باشقىلار قايغۇ-ھەسرەت چېكىۋاتاتتى. ئۇلارنىڭ يىغا-زارلىرىنى كۆرگەن ۋە ئاڭلىغان ئەيسانىڭ كۆڭلى بەك يېرىم بولغان. دوستلىرىغا چىن كۆڭلىدىن ھېسداشلىق بىلدۈرۈپ، كۆز-يېشى قىلغان. ئۇ يېقىن كىشىدىن ئايرىلىشنىڭ قانچىلىك ئازابلىق ئىكەنلىكىنى چۈشىنىدۇ. شەك-شۈبھىسىزكى، ئەيسانىڭ ئۇلارنىڭ كۆز-يېشى قىلىشىغا سەۋەب بولغان بارلىق نەرسىلەرنى يوق قىلىش ئارزۇ-ئىستىكى كۈچلۈك ئىدى.
14. ئەيسانىڭ مەريەمنىڭ يىغىسىغا قايتۇرغان ئىنكاسىدىن يەھۋا ھەققىدە نېمىنى ئۆگىنەلەيمىز؟
14 ئەيسانىڭ مەريەمنىڭ يىغىسىغا قايتۇرغان ئىنكاسى، بىزگە يەھۋانىڭ كۆيۈمچان خۇدا ئىكەنلىكىنى ئۆگىتىدۇ. نېمە ئۈچۈن شۇنداق دېيەلەيمىز؟ ئالدىنقى ماقالىدە ئۆگىنىپ ئۆتكىنىمىزدەك، ئەيسا مەسىھ ئۆز ئاتىسىنىڭ ئوي-پىكىرى، ھېس-تۇيغۇلىرىنى مۇكەممەل ئەكس ئەتتۈرگەن (يۇھاننا 12:45). شۇڭا، ئەيسانىڭ قايغۇ-ھەسرەت چەككەن دوستلىرىغا شۇنداق ھېسداشلىق كۆرسەتكەنلىكىنى ئوقۇغىنىمىزدا، يەھۋانىڭمۇ بىزنىڭ قايغۇ-ھەسرەت ياشلىرىمىزنى كۆرگەندە، بىزگە ئىچ ئاغرىتىدىغانلىقىنى بىلىمىز (زەبۇر 56:8). ناھايىتى ئېنىقكى، بۇ سىزنى رەھىم-شەپقەتلىك خۇدايىمىزغا يېقىنلىشىشقا دەۋەت قىلىدۇ!
ئەيسا مەسىھ ئۆزىنىڭ ئۆلۈمدىن تىرىلدۈرۈش قۇدرىتى بارلىقىنى كۆرسەتكەن (15، 16-ئابزاسلارغا قاراڭ)
15. يۇھاننا 11:41–44-ئايەتلەرگە ئاساسلانغاندا، قەبرىدە لازارغا نېمە ئىش بولغان؟ (رەسىمگە ھەم قاراڭ)
15 يۇھاننا 11:41–44-نى ئوقۇڭ. ئەيسا لازارنىڭ قەبرىسىگە يېتىپ كېلىپ، قەبرىنىڭ ئېغىزىنى يېپىپ قويغان تاشنى ئېلىۋېتىشنى بۇيرىغان. مارتا ئۇنىڭغا قارشى تۇرۇپ جەسەتنىڭ چىرىپ، سېسىپ كەتكەنلىكىنى ئېيتقان. ئەيسا ئۇنىڭغا جاۋاب بېرىپ، مۇنداق دېگەنىدى: «ئەگەر ماڭا ئىشەنسىڭىز، خۇدانىڭ ئۇلۇغلىقىنى كۆرىسىڭىز، دېمىگەنمىدىم؟» (يۇھاننا 11:39، 40). ئاندىن ئەيسا كۆپچىلىكنىڭ ئالدىدا ئاسمانغا قاراپ، دۇئا قىلىپ، ھازىر يۈز بېرىدىغان مۆجىزە ئۈچۈن بارچە شان-شەرەپنى يەھۋاغا بەرمەكچى بولغان. ئاندىن ئۇ: «لازار، تاشقىرىغا چىق!»— دەپ توۋلىغانىدى. شۇنىڭ بىلەن، لازار قەبرىدىن چىققان. ئەيسا كىشىلەر ھەرگىزمۇ مۇمكىن بولمايدۇ دەپ ئويلىغان ئىشنى قىلغان.—يۇھاننا 11:17.
16. يۇھاننا 11-بابتىكى ئۈزۈندىلەر، تىرىلىش ئۈمىدىگە بولغان ئىشەنچىمىزنى قانداق كۈچەيتىدۇ؟
16 يۇھاننا 11-بابتىكى ئاشۇ ئۈزۈندە، تىرىلىش ئۈمىدىگە بولغان ئىشەنچىمىزنى كۈچەيتىدۇ. قانداق؟ ئەيسانىڭ مارتاغا بەرگەن ۋەدىسىنى ئەسلەپ كۆرۈڭ: « قېرىندىشىڭىز تىرىلىدۇ» (يۇھاننا 11:23). ئاتىسىغا ئوخشاش، ئەيسانىڭمۇ بۇ ۋەدىسىنى ئەمەلگە ئاشۇرۇش ئارزۇ-ئىستىكى ۋە كۈچ-قۇدرىتى بار. ئۇ تۆككەن كۆز-ياشلار، ئۇنىڭ ئۆلۈمنى ۋە ئۆلۈم كەلتۈرۈپ چىقىرىدىغان قايغۇ-ھەسرەتلەرنى يوق قىلىشقا چىن قەلبىدىن تەشنا ئىكەنلىكىنى ئاشكارىلىغان. لازار قەبرىدىن مېڭىپ چىققان پەيتتە، ھەزرىتى ئەيسا ئۆزىنىڭ ئۆلۈكلەرنى تىرىلدۈرۈش كۈچ-قۇدرىتىنىڭ بارلىقىنى يەنە بىر قېتىم ئىسپاتلىغان. ئۇنىڭ يەنە مارتانى ئەسكەرتىپ، مۇنداق دېگەنلىكىنى ئويلاپ كۆرۈڭ: «ئەگەر ماڭا ئىشەنسىڭىز، خۇدانىڭ ئۇلۇغلىقىنى كۆرىسىڭىز، دېمىگەنمىدىم؟» (يۇھاننا 11:40). شۇڭا، بىزنىڭ خۇدانىڭ تىرىلدۈرۈلۈش توغرىسىدىكى ۋەدىسىنى ئەمەلگە ئاشۇرىدىغانلىقىغا ئىشىنىشكە يېتەرلىك سەۋەبلىرىمىز بار. بۇ ئۈمىدكە بولغان ئىشەنچىمىزنى تېخىمۇ كۈچەيتىش ئۈچۈن نېمىلەرنى قىلالايمىز؟
تىرىلىش ئۈمىدىگە بولغان ئىشەنچىمىزنى قانداق قىلىپ تېخىمۇ كۈچەيتەلەيمىز؟
17. تىرىلدۈرۈلۈش ھەققىدىكى ئۈزۈندىلەرنى ئوقۇغاندا، نېمىنى ئەستە ساقلىشىمىز كېرەك؟
17 ئىلگىرى يۈز بەرگەن تىرىلدۈرۈلۈشلەر ھەققىدىكى ئۈزۈندىلەرنى ئوقۇڭ ۋە ئۇلار ئۈستىدە چوڭقۇر ئويلىنىڭ. مۇقەددەس يازمىلاردا يەر يۈزىدە قايتا ھاياتلىققا تىرىلدۈرۈلگەن كىشىلەر ھەققىدە سەككىز ئۈزۈندە يېزىلغان c. شۇ ئۈزۈندىلەرنى بىر-بىرلەپ ئەستايىدىل تەتقىق قىلىپ ئۆگىنىڭ. شۇنداق قىلغىنىڭىزدا، تىرىلدۈرۈلگەن كىشىلەرنىڭ ئەرلەر، ئاياللار ۋە بالىلار ئىكەنلىكىنى ئېسىڭىزدە تۇتۇڭ. نېمىلەرنى ئۆگىنەلەيدىغانلىقىڭىز ھەققىدە ئىزدىنىڭ. ھەر بىر مىسال خۇدانىڭ تىرىلدۈرۈش ئارزۇ-ئىستىكى ۋە كۈچ-قۇدرىتىنىڭ بارلىقىنى كۆرسىتىدۇ. ھەممىدىن مۇھىمى، ئەيسانىڭ ئۆزى تىرىلدۈرۈلگەنلىكى ھەققىدىكى ئەڭ مۇھىم تىرىلدۈرۈش ئۈستىدە چوڭقۇر ئويلىنىڭ. ئېسىڭىزدە بولسۇنكى، ئۇنىڭ تىرىلدۈرۈلگەنلىكىگە شاھىت بولغان يۈزلىگەن گۇۋاھچىلار بولغان ۋە بۇ ئىمان-ئېتىقادىمىزنىڭ كۈچلۈك ئۇل ئاساسىدۇر.—1-كورىنت. 15:3–6، 20–22.
18. تىرىلىش ئۈمىدى ھەققىدىكى مەدھىيە ناخشىلىرىدىن قانداق ياخشى پايدىلىنالايمىز؟ (ئىزاھاتقا ھەم قاراڭ)
18 تىرىلىش ئۈمىدى تىلغا ئېلىنغان مەدھىيە ناخشىلىرىدىن ياخشىراق پايدىلىنىڭ d (ئەفەس. 5:19). بۇ ناخشىلار ئاشۇ قىممەتلىك ئۈمىدىمىزنىڭ خام-خىيال ئەمەسلىكىنى ئېسىمىزگە سالىدۇ ۋە شۇ ئۈمىدكە بولغان ئىشەنچىمىزنى كۈچەيتىدۇ. ئائىلىڭىزدىكىلەر بىلەن ئائىلىۋى ئىبادەت قىلغاندا، ئاشۇ ناخشىلارنى تىڭشاڭ. ئېيتىشنى مەشىق قىلىڭ ۋە ناخشا لىرىكىلىرىنىڭ مەنىسى ئۈستىدە مۇلاھىزە قىلىڭ. ناخشىنىڭ مەزمۇنىنى مېڭىڭىزگە ۋە قەلبىڭىزگە مەھكەم خاتىرىلىۋېلىڭ. ئەگەر ھاياتىڭىزغا خەۋپ-خەتەر يەتكۈزىدىغان سىناقلارغا دۇچ كەلسىڭىز ياكى يېقىن كىشىلىرىڭىز ئۆلۈپ كەتسە، يەھۋانىڭ مۇقەددەس روھى سىزنىڭ ئاشۇ ناخشىلارنى ئەسلەپ، ئۇلاردىن تەسەللى ۋە كۈچ-مەدەتكە ئېرىشىشىڭىزگە ياردەم بېرىدۇ.
19. تىرىلىش ھەققىدە نېمىلەرنى تەسەۋۋۇر قىلساق بولىدۇ؟ (« سىز ئۇلاردىن قانداق سوئاللارنى سورىماقچى؟» دېگەن رامكىغا قاراڭ)
19 تەسەۋۋۇر قىلىش ئىقتىدارىڭىزنى ئىشلىتىڭ. يەھۋا بىزگە ئۆزىمىزنى يېڭى دۇنيادا تەسەۋۋۇر قىلىش ئىقتىدارىنى بەرگەن. بىر قېرىنداش چۈشەندۈرۈپ مۇنداق دەيدۇ: «مەن ئۆزۈمنى يېڭى دۇنيادا تەسەۋۋۇر قىلىشقا شۇنچە كۆپ ۋاقىت سەرپ قىلدىمكى، ھەتتا جەننەتتە ئېچىلغان ئەتىر گۈللەرنى پۇرىيالايدىغان بولدۇم». مۇقەددەس كىتابتا تىلغا ئېلىنغان ساداقەتمەن ئەر-ئاياللار بىلەن كۆرۈشكەنلىكىڭىزنى تەسەۋۋۇر قىلىپ كۆرۈڭ. كىم بىلەن كۆرۈشۈشكە تەقەززا بولۇۋاتىسىز؟ ئۇ كىشىدىن قانداق سوئاللارنى سورىماقچى؟ ئۆلۈپ كەتكەن يېقىنلىرىڭىز بىلەن قايتا جەم بولغانلىقىڭىزنى تەسەۋۋۇر قىلىڭ. ئۇلار بىلەن جەم بولغاندىكى ھەر بىر تەپسىلاتلارنى، مەسىلەن، تۇنجى قىلىدىغان سۆزلەرنى، قۇچاقلىشىپ كۆز ياشلارنى قىلىدىغان چاغلارنى كۆز ئالدىڭىزغا كەلتۈرۈڭ.
20. بىز نېمىنى قەتئىي قارار قىلىشىمىز كېرەك؟
20 بىز يەھۋانىڭ تىرىلدۈرۈش ۋەدىسىگە ئىنتايىن مىننەتدارمىز! بۇ ۋەدىنىڭ ئەمەلگە ئاشىدىغانلىقىغا ئىشىنىمىز، چۈنكى يەھۋانىڭ ئۆز ۋەدىسىنى ئەمەلگە ئاشۇرۇش ئارزۇ-ئىستىكى ۋە كۈچ-قۇدرىتى بار. بۇ قىممەتلىك ئۈمىدكە بولغان ئىشەنچىمىزنى داۋاملىق كۈچەيتىشنى قەتئىي قارار قىلايلى. شۇنداق قىلىش ئارقىلىق ھەممىمىز يېقىنلىرىمىزنى تىرىلدۈرىدىغانلىقىنى ۋەدە قىلغان خۇدايىمىزغا تېخىمۇ يېقىنلىشالايمىز.
24-ناخشا كۆزۈڭ بولسۇن مۇكاپاتتا!
a ئەگەر يېقىن كىشىڭىز ئۆلۈپ كەتكەن بولسا، ناھايىتى ئېنىقكى، قايتا تىرىلىش ۋەدىسى سىزگە كۆپ تەسەللى بېرىدۇ. ئەمما، بۇ ۋەدىگە ئىشىنىدىغانلىقىڭىزنى باشقىلارغا قانداق چۈشەندۈرەلەيسىز؟ تىرىلىش ئۈمىدىگە بولغان ئىمان-ئېتىقادىڭىزنى قانداق قىلىپ تېخىمۇ كۈچلەندۈرەلەيسىز؟ بۇ ماقالىنىڭ مەقسىتى ھەممىمىزنىڭ تىرىلىش ئۈمىدىگە بولغان ئىشەنچىمىزنى كۈچەيتىشكە ياردەم بېرىش.
b 2016-يىل، نويابىر ئېيىنىڭ تېلېۋىزىيە پروگراممىسىدا، «ئۇچقاندەك كېلەر چاپسان» ناملىق مۇزىكىلىق فىلىم كۆرسىتىلگەن.
c بۇ ۋەقەلەر مۇنۇ ئايەتلەردە يېزىلغان: 1-پادىشاھلار 17:17–24؛ 2-پادىشاھلار 4:32–37؛ 13:20، 21؛ لۇقا 7:11–15؛ 8:41–56؛ يۇھاننا 11:38–44؛ ئەلچىلەر 9:36–42 ۋە 20:7–12.
d «يەھۋانى ناخشا ئېيتايلى!» كىتابىدىن مۇنۇ ناخشىلارنى كۆرۈڭ: «سادىقلار كۆرەر مەڭگۈ ھاياتنى» (55-ناخشا)، «كۆزۈڭ بولسۇن مۇكاپاتتا!» (24-ناخشا)، ۋە «ۋەدە قىلىنغان مەڭگۈ ھاياتلىق» (12-ناخشا). ئۇنىڭدىن باشقا، jw.org تور بېكىتىدىن «ئۇچقاندەك كېلەر چاپسان» ناملىق ناخشىغا قاراڭ.
