17-تەتقىق ماقالىسى
كۈتۈلمىگەن قىيىنچىلىقلارغا دۇچ كەلگەندە، يەھۋا سىزگە يار-يۆلەك بولىدۇ
«ئادىل كىشى دۇچ كېلىدىغان قىيىنچىلىقلار كۆپ بولار، بىراق يەھۋا ئۇلارنىڭ ھەممىسىدىن ئۇنى قۇتقۇزار».—زەبۇر 34:19.
38-ناخشا يۈكۈڭنى يەھۋاغا تاشلا!
بۇ ماقالىدە a
1. بىز نېمىگە ئىشىنىمىز؟
يەھۋانىڭ خەلقى سۈپىتىدە، ئۇ بىزنى سۆيىدىغانلىقىنى ۋە ئەڭ ياخشى تۇرمۇشتىن بەھرىمەن بولۇشىمىزنى خالايدىغانلىقىنى بىلىمىز (رىملىقلار 8:35–39). شۇنىڭغا ئىشىنىمىزكى، مۇقەددەس كىتاب پرىنسىپلىرىنى ئەمەلىي قوللانساق، بۇ ھەر دائىم بىز ئۈچۈن پايدىلىق (يەشايا 48:17، 18). ئۇنداقتا، كۈتۈلمىگەن قىيىنچىلىقلارغا دۇچ كەلگەندە، قانداق ئىنكاس قايتۇرۇشىمىز كېرەك؟
2. قانداق قىيىنچىلىقلارغا دۇچ كېلىشىمىز مۇمكىن ۋە شۇ قىيىنچىلىقلار سەۋەبلىك، قانداق سوئاللار ئوي-خىيالىمىزغا كېلىدۇ؟
2 يەھۋانىڭ ھەر بىر خىزمەتچىلىرى قىيىنچىلىقلارغا دۇچ كېلىدۇ. مەسىلەن، ئائىلىمىزدىكى بىرى مەلۇم ئىشتا بىزنى ئۈمىدسىزلەندۈرىدۇ. يەھۋاغا خىزمەت قىلىشىمىزغا توسقۇنلۇق قىلىدىغان ئېغىر كېسىلىمىز بار. تەبىئىي ئاپەت تۈپەيلى زىيانغا ئۇچرايمىز ياكى ئىمان-ئېتىقادىمىز سەۋەبلىك، زىيانكەشلىككە دۇچ كېلىمىز. شۇنداق سىناقلارغا دۇچ كەلگىنىمىزدە، بەلكىم مۇنداق سوئاللارنى سورايمىز: «نېمە ئۈچۈن بۇ ئىش مېنىڭ بېشىمغا كېلىدۇ؟ بىرەر ئىشنى خاتا قىلدىممۇ؟ بۇ يەھۋانىڭ مېنى بەرىكەتلىمەيدىغانلىقىنى بىلدۈرەمدۇ؟» ئەگەر ئوي-خىيالىڭىزدا شۇنداق سوئاللار پەيدا بولسا، ئۇنىڭدىن ئۈمىدسىزلەنمەڭ. يەھۋانىڭ نۇرغۇن سادىق خىزمەتچىلىرىمۇ مۇشۇنىڭغا ئوخشاش قىيىنچىلىقلارغا دۇچ كەلگەن.—زەبۇر 22:1، 2؛ ھاباق. 1:2، 3.
3. زەبۇر 34:19-ئايەتتىن نېمىنى ئۆگىنەلەيمىز؟
3 زەبۇر 34:19-نى ئوقۇڭ. بۇ ئايەتتىكى ئىككى مۇھىم نۇقتىغا دىققەت قىلىڭ: (1) ئادىل كىشى قىيىنچىلىقلارغا دۇچ كېلىدۇ. (2) يەھۋا بىزنى سىناقلاردىن قۇتقۇزىدۇ. قانداق؟ بۇنىڭ بىر يولى، يەھۋا بۇ دۇنيادىكى ھاياتىمىزدا يۈز بېرىۋاتقان ئىشلارغا توغرا كۆز قاراشتا بولۇشىمىزغا ياردەم بېرىدۇ. ياراتقۇچىمىز ئۇنىڭغا خىزمەت قىلىپ، خۇشاللىققا ئېرىشىدىغانلىقىمىز ھەققىدە ۋەدە بەرگەن. شۇنداقتىمۇ، ئۇ ھازىر قىيىنچىلىقلاردىن خالى تۇرمۇش كەچۈرۈشىمىزگە كاپالەت بەرمەيدۇ (يەشايا 66:14). ئۇ بىزنىڭ دىققىتىمىزنى كېلەچەككە، يەنى مەڭگۈ شاد-خۇرام ھايات كەچۈرىدىغان ۋاقىتقا قارىتىشقا دەۋەت قىلىدۇ (2-كورىنت. 4:16–18). ھازىرنىڭ ئۆزىدە بولسا، ھەر كۈنى دىققىتىمىزنى ئۇنىڭغا خىزمەت قىلىشقا قارىتىشىمىزغا ياردەم بېرىدۇ.—يەرەم. يىغ 3:22–24.
4. بۇ ماقالىدە، نېمىلەرنى مۇھاكىمە بىلىمىز؟
4 مۇقەددەس كىتاب زامانىدىكى ۋە بۈگۈنكى كۈندىكى يەھۋاغا سادىق خىزمەت قىلغۇچىلارنىڭ ئۈلگىسىدىن نېمىلەرنى ئۆگىنەلەيدىغانلىقىمىزنى مۇھاكىمە قىلىپ باقايلى. ھازىر كۆرۈدىغىنىمىزدەك، كۈتمىگەن قىيىنچىلىقلارغا دۇچ كېلىشىمىز مۇمكىن. ئەمما، يەھۋاغا تايانساق، ئۇ ھەمىشە بىزنى قوغدايدۇ (زەبۇر 55:22). مۇشۇ ئۈلگىلەر ھەققىدە مۇھاكىمە قىلغاندا، ئۆز-ئۆزىڭىزدىن شۇنداق سوراپ بېقىڭ: «مەن مۇشۇنداق ئەھۋالدا قانداق ئىنكاس قايتۇرغان بولاتتىم؟ ئۇلارنىڭ ئۈلگىسى يەھۋاغا بولغان ئىشەنچىمنى قانداق كۈچەيتىدۇ؟ ئۆز ھاياتىمدا ئۆگەنگەنلىرىمنى قانداق ئەمەلىي ئىشلىتەلەيمەن؟».
قەدىمقى زاماندا
يەھۋا خۇدا 20 يىل يالغانچى تۇققىنى لابانغا ئىشلەپ بەرگەن ياقۇپنى بەرىكەتلىگەن (5-ئابزاسىغا قاراڭ)
5. ياقۇپ لابان سەۋەبلىك قانداق قىيىنچىلىقلارغا دۇچ كەلگەن؟ (مۇقاۋىدىكى رەسىمگە قاراڭ)
5 مۇقەددەس كىتابتا يەھۋانىڭ قەدىمقى زاماندىكى خىزمەتچىلىرىنىڭ كۈتمىگەن سىناقلارغا دۇچ كەلگەنلىكى يېزىلغان. ياقۇپ پەيغەمبەرنىڭ مىسالىنى كۆرۈپ باقايلى. دادىسى ئۇنى ئىشەنچىلىك دەپ قارىغان لاباننىڭ قىزلىرىدىن بىرى بىلەن توي قىلىشقا بۇيرىغان ۋە يەھۋانىڭ ئۇنىڭغا مول بەرىكەتلەرنى ياغدۇرىدىغانلىقىغا ئىشەندۈرگەن (يارىت. 28:1–4). شۇنىڭ بىلەن، ياقۇپ توغرا ئىش قىلغان. ئۇ قانان زېمىنىدىن ئايرىلىپ، لاباننىڭ ئۆيىگە بارغان. لاباننىڭ لېياھ ۋە راھىلە ئىسىملىك قىزلىرى بار ئىدى. ياقۇپ لاباننىڭ كىچىك قىزى راھىلەنى ياخشى كۆرۈپ قالغان ۋە ئۇنىڭ بىلەن توي قىلىشتىن بۇرۇن دادىسى لابانغا يەتتە يىل ئىشلەپ بېرىشكە قوشۇلغان (يارىت. 29:18). بىراق، ئىشلار ياقۇپ ئۈمىد قىلغاندەك بولمىغان. لابان ئۇنى ئالداپ، چوڭ قىزى لېياھ بىلەن تويىنى قىلىپ قويغان. لابان ياقۇپنىڭ بىر ھەپتىدىن كېيىن راھىلە بىلەن توي قىلىشىغا رۇخسەت قىلغان. ئەمما، بۇنىڭ ئۈچۈن ياقۇپ يەنە يەتتە يىل ئۇنىڭغا ئىشلەپ بېرىشى كېرەك ئىدى (يارىت. 29:25–27). لابان يەنە ياقۇپ بىلەن تۈزگەن سودا كېلىشىملىرىدە ئادىل بولمىغان. شۇنداق قىلىپ، ياقۇپ جەمئىي 20 يىل لابانغا ئىشلەپ بەرگەن!—يارىت. 31:41، 42.
6. ياقۇپ يەنە قانداق قىيىنچىلىقلارغا بەرداشلىق بەرگەن؟
6 ياقۇپ باشقا قىيىنچىلىقلارغىمۇ بەرداشلىق بەرگەن. ئۇنىڭ چوڭ ئائىلىسى بولغان. ئەمما، ئوغۇللىرى بىر-بىرى بىلەن ئىناق ئۆتمىگەن. ئۇلار ھەتتا ئۆز ئىنىسى يۈسۈپنى قۇللۇققا سېتىۋەتكەن. ياقۇپنىڭ ئىككى ئوغلى شىمون بىلەن لاۋىي بۇ ئائىلىنىڭ نامىغا ۋە يەھۋانىڭ ئىسىمىغا داغ كەلتۈرگەن. ياقۇپنىڭ ياخشى كۆرگەن ئايالى راھىلە ئىككىنچى بالىسىنى تۇغقاندا ئۆلۈپ كەتكەن. قاتتىق ئاچارچىلىق سەۋەبىدىن، ياقۇپ قېرىغان ۋاقتىدا مىسىر زېمىنىغا كۆچۈشكە مەجبۇر بولغان.—يارىت. 34:30؛ 35:16–19؛ 37:28؛ 45:9–11، 28.
7. يەھۋا ياقۇپقا ئۆزىنىڭ رەھىم-شەپقىتىنى قانداق كۆرسەتكەن؟
7 مۇشۇ ھەر تۈرلۈك قىيىنچىلىقلارغا قارىماي، ياقۇپ يەھۋاغا ۋە ئۇنىڭ ۋەدىسىگە بولغان ئىشەنچىسىنى يوقاتمىغان. ۋاقتى كەلگەندە، يەھۋا ياقۇپقا ئۆز رەھىم-شەپقىتىنى كۆرسەتكەن. مەسىلەن، لاباننىڭ ئالدامچىلىقىغا قارىماي، يەھۋا ياقۇپنى بەرىكەتلىگەن. ياقۇپ يۈسۈپ بىلەن قايتا كۆرۈشكەندە، خۇداغا قانچىلىك مىننەتدار بولغانلىقى ھەققىدە ئويلاپ كۆرۈڭ. ياقۇپنىڭ يەھۋا بىلەن بولغان يېقىن دوستلىقى ئۇنىڭ سىناقلارغا ئوڭۇشلۇق تاقابىل تۇرۇشىغا ياردەم بەرگەن (يارىت. 30:43؛ 32:9، 10؛ 46:28–30). ئەگەر بىزمۇ يەھۋا بىلەن يېقىن دوستلىقىمىزنى ساقلىساق، كۈتۈلمىگەن سىناقلارغا دۇچ كەلگەندە، ئاشۇ قىيىنچىلىقلارغا ئوڭۇشلۇق تاقابىل تۇرالايمىز.
8. داۋۇت پادىشاھنىڭ نېمە قىلىش ئارزۇ-ئىستىكى بولغان؟
8 داۋۇت پادىشاھ ئۆزى ئۈمىد قىلغاندەك يەھۋاغا خىزمەت قىلالمىغان. مەسىلەن، داۋۇت خۇدا ئۈچۈن ئىبادەتخانا سېلىشنى بەكمۇ ئارزۇ قىلغان. ئۇ بۇ ئارزۇ-ئىستىكىنى ناتان پەيغەمبەرگە ئېيتقان. ناتان پەيغەمبەر ئۇنىڭغا جاۋابەن مۇنداق دېگەن: «كۆڭلىڭىزدە نېمە ئويلىغان بولسىڭىز، ئۇنى قىلىڭ. چۈنكى، ھەق خۇدا سىز بىلەن بىللە» (1-تارىخ. 17:1، 2). مۇشۇ سۆزلەرنىڭ داۋۇتقا قانچىلىك ئىلھام بەرگەنلىكىنى تەسەۋۋۇر قىلىش قىيىن ئەمەس. بەلكىم، ئۇ دەرھال شۇ قۇرۇلۇش ئىشىنى پىلانلاشقا باشلىغان.
9. داۋۇت كىشىنى ئۈمىدسىزلەندۈرىدىغان خەۋەرگە قانداق ئىنكاس قايتۇرغان؟
9 لېكىن ئۇزۇن ئۆتمەيلا، يەھۋانىڭ پەيغەمبىرى كىشىنى ئۈمىدسىزلەندۈرىدىغان خەۋەر بىلەن قايتىپ كەلگەن. ئاشۇ كۈنى كېچىسى، يەھۋا ناتانغا بۇ ئىبادەتخانىنى داۋۇت ئەمەس، بەلكى ئۇنىڭ ئوغۇللىرىدىن بىرى سالىدىغانلىقىنى ئېيتقان (1-تارىخ. 17:3، 4، 11، 12). داۋۇت مۇشۇ خەۋەرنى ئاڭلىغاندا، قانداق ئىنكاس قايتۇرغان؟ ئۇ ئۆز مەقسەتلىرىنى ئۆزگەرتكەن. ئۇ دىققىتىنى ئۆز ئوغلى سۇلايماننىڭ شۇ قۇرۇلۇشنى قىلىشىغا كېرەكلىك پۇللار ۋە قۇرۇلۇش ماتېرىياللىرىنى توپلاشقا قاراتقان.—1-تارىخ. 29:1–5.
10. يەھۋا داۋۇتنى قانداق بەرىكەتلىگەن؟
10 يەھۋا داۋۇتنىڭ ئىبادەتخانىنى سالىدىغان كىشى ئەمەسلىكىنى ئېيتقاندىن كېيىن، دەرھال ئۇنىڭ بىلەن ئەھدە تۈزگەن. يەھۋا پادىشاھ داۋۇتقا ئۇنىڭ ئەۋلادلىرى ئارىسىدىن بىرى مەڭگۈ ھۆكۈمرانلىق قىلىدىغانلىقىنى ۋەدە بەرگەن (2-سام. 7:16). يېڭى دۇنيادا 1000 يىللىق ھۆكۈمرانلىق مەزگىلىدە، داۋۇت پادىشاھلىق قىلىدىغان ئەيسا مەسىھنىڭ ئۆزىنىڭ بىر ئەۋلادى بولغانلىقىنى بىلگەندە، چوقۇم بەك خۇشال بولىدۇ. مۇشۇ ئۈزۈندە، يەھۋا ئۈچۈن قىلىشنى ئارزۇ قىلغان بارلىق ئىشلارنى قىلالمىساقمۇ، خۇدايىمىزنىڭ بىزگە ئۆزىمىز خىيالىمىزغا كەلتۈرۈپ باقمىغان باشقا ئاجايىپ بەرىكەتلەرنى بېرىدىغانلىقىنى كۆرەلىشىمىزگە ياردەم بېرىدۇ.
11. بىرىنچى ئەسىردىكى مەسىھ ئەگەشكۈچىلىرى ئۆزلىرى كۈتكەن پادىشاھلىق كەلمىگەن بولسىمۇ، قانداق بەرىكەتلەرگە ئېرىشكەن؟ (ئەلچىلەر 6:7)
11 بىرىنـچى ئەسىردىكى مەسىھ ئەگەشكۈچىلىرى كۈتۈلمىگەن بەزى قىيىنچىلىقلارغا دۇچ كەلگەن. مەسىلەن، ئۇلار خۇدا پادىشاھلىقىنىڭ كېلىشىنى ئىنتايىن ئارزۇ قىلغان، ئەمما قاچان كېلىدىغانلىقىنى بىلمىگەن (ئەلچى. 1:6، 7). ئۇلار نېمە ئىش قىلغان؟ مەسىھ ئەگەشكۈچىلىرى ۋەز ئېيتىش خىزمىتى بىلەن ئالدىراش يۈرگەن. خۇش خەۋەرنىڭ تارقىلىشىغا ئەگىشىپ، ئۇلار ئۆزلىرىنىڭ كۆرسەتكەن تىرىشچانلىقىنى يەھۋانىڭ قانداق بەرىكەتلىگەنلىكىنى كۆرگەن.—ئەلچىلەر 6:7-نى ئوقۇڭ.
12. ئاچارچىلىق ئاپىتى مەزگىلىدە، بىرىنچى ئەسىردىكى مەسىھ ئەگەشكۈچىلىرى نېمە قىلغان؟
12 بىر ۋاقىتقا كەلگەندە، يەر يۈزىدە ئاچارچىلىق كەڭ تارقالغان (ئەلچى. 11:28). بىرىنچى ئەسىردىكى مەسىھ ئەگەشكۈچىلىرىمۇ شۇ ئاچارچىلىقنىڭ تەسىرىگە ئۇچرىغان. ئاچارچىلىق سەۋەبلىك، ئۇلار قانداق قىيىنچىلىقلارنى باشتىن ئۆتكۈزگەنلىكىنى تەسەۋۋۇر قىلالامسىز؟ شەك-شۈبھىسىزكى، ئائىلىنىڭ بېشى بولغان ئەرلەر ئۆز ئائىلىسىنى قانداق تەمىنلەش توغرۇلۇق غەم-ئەندىشە قىلغان. كۆپرەك ۋەز ئېيتىشنى پىلانلىغان ياشلار قانداق قىلغاندۇ؟ ۋەز ئېيتقۇچىلارغا ئېھتىياجلىق جايلارغا بېرىپ، ۋەز قىلىشنى پىلانلاۋاتقان ياشلار ئاچارچىلىق ئاپىتىنىڭ تەسىرىگە تېخىمۇ ئۇچراپ، پىلانلىرىنى كېچىكتۈرۈپ ئاچارچىلىق تۈگىگەندىن كېيىن بېرىشنى ئويلاشقان بولۇشى مۇمكىن. ۋەزىيىتىنىڭ قانداق بولۇشىدىن قەتئىينەزەر، مەسىھ ئەگەشكۈچىلىرى شۇ ۋەزىيەتكە ئۆگەنگەن. ئۇلار قولدىن كېلىشىچە ۋەز قىلىشنى داۋاملاشتۇرغان ۋە خۇشاللىق بىلەن ئۆز مال-مۈلۈكلىرىنى يەھۇدىيەدىكى قېرىنداشلىرى بىلەن ئورتاق ئىشلەتكەن.—ئەلچى. 11:29، 30.
13. ئاچارچىلىق مەزگىلىدە، مەسىھ ئەگەشكۈچىلىرى قانداق بەرىكەتلەرگە ئېرىشكەن؟
13 شۇ ئاچارچىلىق مەزگىلدە، مەسىھ ئەگەشكۈچىلىرى قانداق بەرىكەتلەرگە ئېرىشكەن؟ ئۇلار يەھۋانىڭ ئۆزلىرىگە ياردەم بەرگەنلىكىنى كۆرگەن (مەتتا 6:31–33). ئۇلار چوقۇم ياردەمگە كەلگەن قېرىنداشلىرىنىڭ ئۆزلىرىگە ئىنتايىن كۆڭۈل بۆلىدىغانلىقىنى ھېس قىلغان. ئىئانە بەرگەنلەر ياكى ياردەم بېرىش خىزمىتىگە باشقىچە يوللار بىلەن قاتناشقانلار بېرىشتىن زور خۇشاللىق تاپقان (ئەلچى. 20:35). ئۇلار ئاشۇ ئۆزگەرگەن ۋەزىيەتكە ئۆگەنگەن ۋە يەھۋا ئۇلارنىڭ ھەممىسىنى بەرىكەتلىگەن.
14. بارنابا بىلەن ئەلچى پاۋلۇسقا نېمە ئىش بولغان ۋە نەتىجىدە نېمە بولدى؟ (ئەلچىلەر 14:21، 22)
14 بىرىنچى ئەسىردىكى ئېتىقادچىلار دائىم زىيانكەشلىككە ئۇچرىغان. بارنابا ۋە ئەلچى پاۋلۇس لىسترا رايونىدا ۋەز قىلىۋاتقاندا، نېمە ئىش يۈز بەرگەنلىكىنى كۆرۈپ باقايلى. دەسلەپتە، ئۇلارنىڭ سۆزلىرىنى ئاڭلىغانلار ئۇلارنى قىزغىن قارشى ئالغان. ئەمما، كېيىنرەك قارشى چىققۇچىلار كۆپچىلىكنى قايىل قىلغاچ، بەزىلەر پاۋلۇسنى چالما-كېسەك قىلىپ ئۆلتۈرمەكچى بولۇشقان (ئەلچى. 14:19). لېكىن، بارنابا بىلەن پاۋلۇس باشقا جايلاردا ۋەز قىلىشنى داۋاملاشتۇرغان. بۇنىڭ نەتىجىسى قانداق بولغان؟ ئۇلار «كۆپلىگەن شاگىرتلارنى تەييارلىغان». ئۇنىڭدىن باشقا، ئۇلارنىڭ سۆزلىرى ۋە ئۈلگىلىرى باشقا ئېتىقادچى قېرىنداشلىرىنىڭ ئىمان-ئېتىقادىنى كۈچەيتكەن (ئەلچىلەر 14:21، 22-نى ئوقۇڭ). بارنابا بىلەن پاۋلۇس زىيانكەشلىككە ئۇچرىغان بولسىمۇ، بەل قويۇۋەتمەي ۋەز خىزمىتىنى داۋاملاشتۇرغاچ، نۇرغۇن كىشىلەر بەرىكەتكە ئېرىشكەن. ئەگەر يەھۋا بىزگە تاپشۇرغان خىزمەتنى قىلىشتىن ۋاز كەچمىسەك، ئۇ بىزنى بەرىكەتلەيدۇ.
بۈگۈنكى كۈندە
15. بۇرادەر ماكمىللاننىڭ ئۈلگىسىدىن نېمىنى ئۆگىنەلەيمىز؟
15 1914-يىلدىن بۇرۇن، يەھۋانىڭ خەلقى بەزى ئىشلار يۈز بېرىدىغانلىقىنى كۈتكەن. مەسىلەن، شۇ ۋاقىتتا كۆپلىگەن باشقا كىشىلەرگە ئوخشاش، بۇرادەر ماكمىللان پات يېقىندا ئاسمانغا چىقىپ كېتىمەن دەپ ئويلىغان. 1914-يىل سېنتەبىردە، ئۇ سۆزلىگەن نۇتۇقىدا: «بۇ بەلكىم مەن ئېيتقان ئەڭ ئاخىرقى نۇتۇق»،— دېگەن. ئەلۋەتتە، بۇ ئۇنىڭ ئەڭ ئاخىرقى نۇتىقى بولمىغان. كېيىنرەك، بۇرادەر ماكمىللان مۇنداق يازغان: «بەلكىم، بەزىلىرىمىز دەرھاللا ئاسمانغا چىقىپ كېتىمىز دەپ ئويلاپ، بەك ئالدىراپ كەتكەن بولۇشىمىز مۇمكىن. ئەسلىدە قىلىشقا تېگىشلىك ئىشىمىز — خۇداغا خىزمەت قىلىش بىلەن ئالدىراش بولۇش». بۇرادەر ماكمىللان ۋەز خىزمىتى بىلەن ئالدىراش ئۆتكەن. ئۇ خىزمەتتە ئىنتايىن قىزغىن بولغان. بىتەرەپلىكنى ساقلىغىنى ئۈچۈن تۈرمىگە تاشلانغان نۇرغۇن قېرىنداشلارنى ئىلھاملاندۇرۇش ئىمتىيازىغا ئىگە بولغان. ئۇ ياشىنىپ قالغان چاغلاردىمۇ، سادىقلىق بىلەن جامائەت يىغىلىشلىرىغا قاتناشقان. بۇرادەر ماكمىللان ئۈمىد قىلغان مۇكاپاتنى كۈتۈۋاتقاندا، ۋاقتىنى ئۈنۈملۈك ئىشلەتكەن. ئۇ بۇنىڭ قانداق پايدىسىنى كۆرگەن؟ 1966-يىلى، ۋاپات بولۇشتىن ئىلگىرى ئۇ مۇنداق يازغان: «مېنىڭ ئىمان-ئېتىقادىم ھېچقاچان ئاجىزلاپ قالمىغان». ئۇ ھەقىقەتەن بىز ئۈچۈن ياخشى ئۈلگە! بولۇپمۇ، كۈتمىگەن سىناقلارغا بەرداشلىق بەرگىنىمىزدە، ئۇنى ئۈلگە قىلالايمىز.—ئىبرانىي. 13:7.
16. بۇرادەر خېربېرت جېننېڭىس ۋە ئۇنىڭ ئايالى كۈتمىگەن قانداق قىيىنچىلىققا دۇچ كەلگەن؟ (ياقۇپ 4:14)
16 يەھۋانىڭ نۇرغۇن خىزمەتچىلىرى تەن-سالامەتلىكى تەرەپتىن كۈتۈلمىگەن قىيىنچىلىقلار بىلەن كۈرەش قىلىپ كېلىۋاتىدۇ. مەسىلەن، بۇرادەر خېربېرت جېننېڭىس b تەرجىمىھالىدا، ئايالى ئىككىسىنىڭ گانادىكى مىسسىئونېرلىق خىزمىتىنى قانداق قىلغانلىقى تەسۋىرلەنگەن. شۇ چاغدا، ئۇنىڭغا ئېغىر دەرىجىدە كەيپىياتى تۇراقسىز بولۇش دەپ دىئاگنوز قويۇلغان. بۇرادەر جېننېڭىس ياقۇپ 4:14-ئايەتتىكى سۆزلەرنى تىلغا ئېلىپ: «ئەتە نېمە ئىش بولىدىغانلىقىنى بىلمەيسىلەر، شۇنداق ئەمەسمۇ؟»— دېگەن (ئوقۇڭ). ئۇ يەنە مۇنداق يازغان: «بىز رېئاللىققا يۈزلىنىپ، داۋالىنىش ئۈچۈن گانادىكى نۇرغۇن دوستلىرىمىزدىن ئايرىلىپ، يۇرتىمىزغا قايتىشنى قارار قىلدۇق». يەھۋا بۇرادەر جېننېڭىس ۋە ئايالىنىڭ دۇچ كەلگەن قىيىنچىلىقلىرىغا باش ئەگمەي، داۋاملىق ساداقەتمەنلىك بىلەن ئۇنىڭغا خىزمەت قىلىشىغا ياردەم بەرگەن.
17. بۇرادەر جېننېڭىسنىڭ ئۈلگىسى باشقىلارغا قانداق ياردەم بەرگەن؟
17 بۇرادەر جېننېڭىسنىڭ تەرجىمىھالىدا يېزىلغان سەمىمىي سۆزلەر باشقىلارغا كۈچلۈك تەسىر قىلغان. بىر قېرىنداش مۇنداق دەپ يازغان: «مەن بۇ ماقالىنى ئوقۇغىنىمدا، چوڭقۇر تەسىرلەندىم. بۇرادەر جېننېڭىسنىڭ ئۆز كېسىلىنى داۋالىتىش ئۈچۈن تاپشۇرۇلغان ۋەزىپىدىن قانداق ۋاز كەچكەنلىكىنى ئوقۇش، مېنىڭ ئۆز ۋەزىيىتىمگە قانداق تەڭپۇڭ كۆز قاراشتا بولۇشىمغا ياردەم بەردى». شۇنىڭغا ئوخشاش، يەنە بىر بۇرادەر مۇنداق يازغان: «مەن جامائەتتە ئاقساقال سۈپىتىدە ئون يىل خىزمەت قىلغاندىن كېيىن، نېرۋا كېسەللىكى سەۋەبىدىن شان-شەرەپلىك خىزمەتتىن ۋاز كېچىشكە مەجبۇر بولدۇم. ئۆزۈمنى مەغلۇپ بولغاندەك ھېس قىلىپ، باشقىلارنىڭ تەرجىمىھاللىرىنى ئوقۇش مېنى ھەمىشە چۈشكۈنلەشتۈرەتتى. بىراق، بۇرادەر جېننېڭىسنىڭ جاسارىتى ماڭا ئىلھام بەردى». بۇ كۈتۈلمىگەن قىيىنچىلىقلارغا بەرداشلىق بەرگەندە، باشقىلارغىمۇ ئىلھام بېرەلەيدىغانلىقىمىزنى ئېسىمىزگە سالىدۇ. ھەتتا ھاياتىمىزدا، خىيال قىلىپ باقمىغان ئىشلار يۈز بەرگەن ھالەتتىمۇ، بىز يەنىلا ئىشەنچ ۋە سەۋر-تاقەت بىلەن باشقىلارغا ئۈلگە بولالايمىز.—1-پېتر. 5:9.
ئەگەر يەھۋاغا تايانساق، ھاياتىمىزدىكى كۈتۈلمىگەن قىيىنچىلىقلار ئەمەلىيەتتە بىزنى ئۇنىڭغا يېقىنلاشتۇرالايدۇ (18-ئابزاسقا قاراڭ)
18. رەسىمدە تەسۋىرلەنگەندەك، نىگېرىيىدىكى تۇل ئايالنىڭ مىسالىدىن نېمىنى ئۆگىنەلەيمىز؟
18 19-COVID ۋىرۇسىغا ئوخشاش يۇقۇملۇق كېسەللەر نۇرغۇنلىغان يەھۋا گۇۋاھچىلىرىنىڭ تۇرمۇشىغا تەسىر قىلغان. مەسىلەن، نىگېرىيىدە ياشايدىغان بىر تۇل ئايالنىڭ ئىنتايىن ئازغىنە يېمەك-ئىچمىكى ۋە پۇلى بار ئىدى. بىر كۈنى ئەتىگەندە، قىزى ئۇنىڭدىن ئەڭ ئاخىرقى بىر ئىستاكان گۈرۈچنى پىشۇرۇپ يەپ بولغاندىن كېيىن، ئەمدى نېمە يەيدىغانلىقىنى سورىغان. ئۇ قېرىنداش قىزىغا ئۆزلىرىنىڭ پۇلى ياكى يېمەك-ئىچمىكى قالمىغانلىقىنى، ئەمما ئۆزلىرىنىڭ سەرەفاتلىق تۇل ئايالنى ئۈلگە قىلىپ، ئەڭ ئاخىرقى تامىقىنى تەييارلاپ، يەھۋاغا پۈتۈنلەي ئىشەنچ قىلىشى كېرەكلىكىنى ئېيتقان (1-پادىشاھ. 17:8–16). ئۇلار چۈشلۈك تاماققا نېمە يېيىش ھەققىدە ئويلىنىشتىن بۇرۇن، قېرىنداشلار ئۇلارغا كېرەكلىك نەرسىلەرنى ئېلىپ كەلگەن. ئۇلارنىڭ ئارىسىدا يېمەك-ئىچمەكلەر بولۇپ، ئىككى ھەپتىدىن كۆپرەك جان ساقلاشقا يېتەتتى. قېرىنداش قىزىغا قىلغان سۆزلىرىنى يەھۋانىڭ ئاڭلاپ تۇرغانلىقىنى تونۇپ يەتكەن. دەرۋەقە، يەھۋاغا تايانغىنىمىزدا، ھاياتىمىزدىكى كۈتۈلمىگەن قىيىنچىلىقلار بىزنى ئۇنىڭغا تېخىمۇ يېقىنلاشتۇرالايدۇ.—1-پېتر. 5:6، 7.
19. ئالېكسېي يېرشوۋ قانداق زىيانكەشلىككە ئۇچرىغان؟
19 يېقىنقى يىللاردا، نۇرغۇنلىغان قېرىنداشلىرىمىز كۈتمىگەن زىيانكەشلىكلەرگە دۇچ كەلدى. مەسىلەن، روسىيىدە ياشايدىغان ئالېكسېي يېرشوۋ بۇرادەرنىڭ مىسالىنى كۆرۈپ باقايلى. ئۇ 1994-يىلى يەھۋانىڭ خەلقى روسىيىدە خېلى ئەركىن خىزمەت قىلىۋاتقان چاغلاردا سۇغا چۆمۈلدۈرۈلۈشتىن ئۆتكەن. يېقىنقى يىللاردا روسىيىدە ۋەزىيەت ئۆزگەردى. 2020-يىلى بۇرادەر يېرشوۋنىڭ ئۆيىگە ساقچىلار كىرىپ، ئۆيىنى ئاختۇردى ۋە نۇرغۇن مال-مۈلۈكلىرىنى مۇسادىرە قىلدى. بىرقانچە ئايدىن كېيىن، ھۆكۈمەت ئۇنى جىنايەتچى دەپ قاراپ، سوتقا چاقىردى. ئىشلارنى قىيىنلاشتۇرغىنى، ئەيىبلەشلەر سۈرەتكە ئېلىۋېلىنغان كۆرۈنۈشلەرگە ئىدى. ئۆزىنى مۇقەددەس كىتابنى تەتقىق قىلىشقا قىزىقىدىغاندەك كۆرسەتكەن بىر كىشى بىر يىلدىن كۆپرەك ۋاقىت يۇشۇرۇن فىلىملەر ئېلىۋالغان. بۇ ھەقىقەتەن بەك رەزىل قىلمىش!
20. بۇرادەر يېرشوۋ يەھۋا بىلەن بولغان مۇناسىۋىتىنى قانداق كۈچەيتكەن؟
20 بۇرادەر يېرشوۋ چەككەن جاپا-مۇشەققەتلەردىن بىرەر ياخشى نەتىجە چىققانمۇ؟ ھەئە! ئۇنىڭ يەھۋا بىلەن بولغان دوستلۇق رىشتىسى تېخىمۇ كۈچەيگەن. ئۇ مۇنداق دەيدۇ: «ئايالىم بىلەن بىرگە دائىم دۇئا قىلىمىز. بۇ ۋەزىيەتتە يەھۋانىڭ ياردىمىسىز بەرداشلىق بېرەلمەيدىغانلىقىمنى تونۇپ يەتتىم. شەخسىي تەتقىق ئۆگىنىشى ئۈمىدسىزلىكنى يېڭىشىمغا ياردەم بېرىدۇ. مەن ئۆتمۈشتىكى سادىق خىزمەتچىلەرنىڭ ئۈلگىسى ئۈستىدە چوڭقۇر ئويلىنىمەن. مۇقەددەس كىتابتا تىنچ-خاتىرجەملىكنى ساقلاپ، يەھۋاغا ئىشەنچ باغلاشنىڭ نەقەدەر مۇھىم ئىكەنلىكىنى تەكىتلەيدىغان نۇرغۇن ۋەقەلەر بار».
21. بۇ ماقالىدە، بىز نېمىلەرنى ئۆگەندۇق؟
21 بۇ ماقالىدە، بىز نېمىلەرنى ئۆگەندۇق؟ بىز بۇ دۇنيادا كۈتمىگەن قىيىنچىلىقلارنى باشتىن ئۆتكۈزىمىز. شۇنداقتىمۇ، يەھۋا ئۆزىگە تايانغان خىزمەتچىلىرىگە ھەر دائىم ياردەم بېرىدۇ. ماقالىنىڭ ئاساسىي ئايىتىدە دېيىلگەندەك: «ئادىل كىشى دۇچ كېلىدىغان قىيىنچىلىقلار كۆپ بولار، بىراق يەھۋا ئۇلارنىڭ ھەممىسىدىن ئۇنى قۇتقۇزار» (زەبۇر 34:19). ئۇنداقتا، دىققىتىمىزنى داۋاملىق چېكىۋاتقان جاپا-مۇشەققەتلەرگە ئەمەس، بەلكى يەھۋانىڭ بىزنى قوغدايدىغان كۈچىگە قارىتايلى. شۇندىلا، ئەلچى پاۋلۇسقا ئوخشاش، بىزمۇ: «ماڭا كۈچ-قۇۋۋەت بەرگۈچىنىڭ ياردىمى بىلەن ھەرقانداق ئىشنى قىلالايمەن»،— دەپ ئېيتالايمىز.—فىلىپى. 4:13.
23-ناخشا يەھۋا بىزنىڭ كۈچىمىز
a گەرچە ھازىر كۈتۈلمىگەن قىيىنچىلىقلارغا دۇچ كەلسەكمۇ، يەھۋانىڭ ئۆزىنىڭ سادىق خىزمەتچىلىرىنى قوللاپ-قۇۋۋەتلەيدىغانلىقىغا قەتئىي ئىشىنەلەيمىز. يەھۋا قەدىمدە ئۆز خىزمەتچىلىرىگە قانداق ياردەم قىلغان؟ ئۇ بۈگۈن بىزگە قانداق ياردەم قىلىۋاتىدۇ؟ قەدىمقى زاماندىكى ۋە ھازىرقى مىساللار توغرۇلۇق چوڭقۇر ئويلانغاندا، ئەگەر ئۇنىڭغا تايانساق، يەھۋا بىزنىڭمۇ مەھكەم تۇرۇشىمىزغا ياردەم بېرىدىغانلىقىغا بولغان ئىشەنچىمىزنى كۈچەيتىمىز.
