16-تەتقىق ماقالىسى
44-ناخشا خۇشاللىق بىلەن ھوسۇل يىغىش
ۋەز خىزمەتتە خۇشاللىق تېپىڭ
«خۇشاللىق بىلەن يەھۋاغا خىزمەت قىلىڭلار».—زەبۇر 100:2.
مەركىزى ئىدىيە
بۇ ماقالىدە، ۋەز خىزمىتىمىزدە كۆپرەك خۇشاللىق تېپىشىمىزنىڭ بىرقانچە يوللىرى ھەققىدە مۇھاكىمە قىلىمىز.
1. بەزىلەر ۋەز ئېيتىش خىزمىتىگە قانداق ھېس-تۇيغۇدا بولىدۇ؟ (رەسىمگە ھەم قاراڭ)
خۇدانىڭ خەلقى سۈپىتىدە، بىز ئاسماندىكى ئاتىمىز يەھۋانى سۆيىمىز ۋە باشقىلارنىڭ ئۇ توغرۇلۇق بىلىم ئېلىپ، ئۇنى تونۇشىغا ياردەم بېرىشنى خالايمىز. نۇرغۇن قېرىنداشلىرىمىز ۋەز ئېيتىش خىزمىتىدىن ھەقىقىي خۇشاللىق تاپىدۇ. ئەمما، بەزىلەر ۋەز قىلىشتا قىينىلىدۇ. نېمە ئۈچۈن؟ چۈنكى، بەزى قېرىنداشلار ئىنتايىن تارتىنچاق ياكى قايىل قىلارلىق سۆزلىيەلمەيمەن دەپ ئەنسىرەيدۇ. ناتونۇش كىشىلەرنىڭ ئىشىكىنى چېكىشتىن قورقىدۇ. يەنە بەزىلىرى باشقىلارنىڭ ئاچچىقلىنىشىدىن قورقۇشى مۇمكىن. باشقىلىرى بولسا ئادەملەر بىلەن تالاش-تارتىش قېلىشتىن ساقلىنىشنى ئۆگەنگەن. شۇڭلاشقا، ئۇلار يەھۋانى سۆيسىمۇ، ناتونۇش كىشىلەرگە خۇش خەۋەرنى ئېيتىشتىن راھەتسىز ھېس قىلىدۇ. مەيلى قانداقلا بولسۇن، ئۇلار ۋەز ئېيتىش خىزمىتىنىڭ ئىنتايىن مۇھىملىقىنى بىلىدۇ. شۇڭا، ئۇلار دائىم ۋەز خىزمىتىگە قاتنىشىدۇ. يەھۋا ئۇلارنىڭ بۇ تىرىشچانلىقىنى كۆرگەندە، چوقۇم بەك خۇشال بولىدۇ!
ۋەز قىلىش ئىشىدىن قانداق خۇشاللىق تاپىسىز؟ (1-ئابزاسقا قاراڭ)
2. ئەگەر ۋەز قىلىشتىن خۇشاللىق تاپالمىسىڭىز، نېمە ئۈچۈن ئۈمىدسىزلەنمەسلىك كېرەك؟
2 بەزىدە سىزمۇ ۋەز خىزمىتىدىن خۇشاللىق تېپىشنى قىيىن ھېس قىلامسىز؟ ئەگەر شۇنداق بولسا، ھەرگىز ئۈمىدسىزلەنمەڭ. بەلكىم سىز ئۆزىڭىزگە ئانچە ئىشىنەلمەيدىغانسىز. بۇ سىزنىڭ باشقىلارنىڭ دىققىتىنى ئۆزىڭىزگە تارتىشنى ۋە تالاش-تارتىش قىلىشنى خالىمايدىغان كەمتەر ئادەملىكىڭىزنى كۆرسىتىپ بېرىدۇ. ھەقىقەتەن ھېچكىم باشقىلارنىڭ ئاچچىقىنى كەلتۈرۈشنى خالىمايدۇ. بولۇپمۇ، باشقىلارغا ياخشىلىق قىلماقچى بولغاندا، تېخىمۇ شۇنداق. ئاسماندىكى ئاتىڭىز سىز دۇچ كەلگەن قىيىنچىلىقلارنى ناھايىتى ياخشى بىلىدۇ ۋە سىزگە ياردەم بېرىشنى خالايدۇ (يەشايا 41:13). بۇ ماقالىدە، شۇنداق سەلبىي ھېس-تۇيغۇلارنى يېڭىشىڭىزغا ھەمدە ۋەز خىزمەتتە كۆپرەك خۇشاللىق تېپىشىڭىزغا ياردەم بېرىدىغان بەش تەۋسىيىنى كۆرۈپ چىقىمىز.
خۇدانىڭ سۆزى سىزگە كۈچ بەرسۇن
3. يەرەمىيا پەيغەمبەرنىڭ باشقىلارغا ۋەز قىلىشىغا نېمە ياردەم بەرگەن؟
3 قەدىمقى زامانلاردىن بۇيان، خۇدانىڭ سۆزلىرىدىن كەلگەن كۈچ-قۇۋۋەتكە تايىنىپ، ئۇنىڭ خىزمەتچىلىرى كۆپلىگەن مۈشكۈل ۋەزىپىلەرنى ئورۇنلىغان. مەسىلەن، يەرەمىيا پەيغەمبەرنى ئالساق، يەھۋا ئۇنىڭغا ۋەز قىلىش ۋەزىپىسىنى تاپشۇرغاندا، ئۇ ئىككىلىنىپ قالغان. يەرەمىيا شۇنداق دېگەن: «ئەي ئالىي ھۆكۈمران يەھۋا! مەن، تېخى ياش. قانداق سۆزلەشنى بىلمەيمەن» (يەرەم. 1:6). ئۇنىڭ جاسارەتلىك بولۇشىغا نېمە ياردەم بەرگەن؟ خۇدانىڭ ئېيقتان سۆزلىرى ئۇنىڭغا جاسارەت بەرگەن. يەرەمىيا مۇنداق دېگەن: «ئۇنىڭ سۆزى خۇددى ئوتتەك قەلبىمدە يالقۇنلاپ كۆيۈۋاتىدۇ، سۆڭەكلىرىمنىڭ ئىچىگە قاپسىلىپ قالدى، ئۇنى سۆزلىمەي ئىچىمدە ساقلاپ چارچاپ كەتتىم» (يەرەم. 20:8، 9). گەرچە يەرەمىيا ۋەز قىلىدىغان كىشىلەر بوينى قاتتىق، جاھىل بولسىمۇ، ئەمما خۇدانىڭ يەرەمىياغا ۋەز قىلىش ئۈچۈن بەرگەن خەۋىرى ئۇنىڭغا ئاشۇ ۋەزىپىنى تاماملاش ئۈچۈن كۈچ بەرگەن.
4. خۇدانىڭ سۆزىنى ئوقۇش ۋە ئۇنىڭ ئۈستىدە چوڭقۇر ئويلىنىش بىزگە قانداق تەسىر قىلىدۇ؟ (كولوسىلىقلار 1:9، 10)
4 ئەيسانىڭ شاگىرتلىرىمۇ خۇدانىڭ سۆزلىرىدىن ئۆزىگە كۈچ-قۇۋۋەت ئالغان. ئەلچى پاۋلۇس كولوسى شەھىرىدىكى جامائەتكە خەت يازغاندا، توغرا بىلىمگە ئېرىشىش قېرىنداشلارنى داۋاملىق «ھەر ياخشى ئىشتا مېۋە» بېرىشكە، يەنى «يەھۋاغا لايىق» ياشاشقا دەۋەت قىلىدىغانلىقىنى ئېيتقان (كولوسىلىقلار 1:9، 10-نى ئوقۇڭ). ئاشۇ ياخشى ئىش خۇش خەۋەرنى ۋەز قىلىشنى ئۆز ئىچىگە ئالىدۇ. شۇڭلاشقا، بىز خۇدانىڭ سۆزىنى ئوقۇغاندا ۋە ئۇنىڭ ئۈستىدە چوڭقۇر ئويلانغىنىمىزدا، يەھۋاغا بولغان ئىشەنچىمىز تېخىمۇ كۈچىيىدۇ ۋە پادىشاھلىق خۇش خەۋىرىنى ۋەز قىلىشنىڭ مۇھىملىقىنى تېخىمۇ چوڭقۇر چۈشىنىپ يېتىمىز.
5. مۇقەددەس كىتابنى ئوقۇش ۋە ئۇنىڭ ئۈستىدە چوڭقۇر ئويلىنىشنىڭ قانداق پايدىسى بار؟
5 خۇدانىڭ سۆزىدىن ئەڭ ياخشى پايدىلىنىش ئۈچۈن، ئۇنى ئالدىراپ-تېنەپ ئوقۇپلا قويماي، ئوقۇغانلىرىمىز ئۈستىدە چوڭقۇر ئويلىنىپ، تەتقىق قىلىشقا ۋاقىت چىقىرىشىمىز كېرەك. ئەگەر چۈشىنىش قىيىن مەزمۇنغا كەلسىڭىز، ئۇنى ئاتلاپ ئۆتۈپ كەتمەڭ. ئۇنىڭ ئورنىغا، «كۈزىتىش مۇنارى ماتېرىياللار كۆرسەتكۈچى» ياكى «يەھۋا گۇۋاھچىلىرىنىڭ يول كۆرسەتكۈچى» دېگەن ئىزدىنىش قوراللىرىنى ئىشلىتىپ، ئاشۇ ئايەت ھەققىدە چوڭقۇرراق ئىزدىنىپ كۆرۈڭ. ئەگەر كۆپرەك ۋاقىت چىقىرىپ، تەتقىق قىلىپ ئۆگەنسىڭىز، خۇدا سۆزىنىڭ ھەقىقەت ئىكەنلىكىگە بولغان ئىشەنچىڭىز تېخىمۇ كۈچىيىدۇ (1-سالونىكا. 5:21). ئىمانىڭىز قانچە كۈچەيگەنسېرى، ئۆگەنگەن ھەقىقەتنى باشقىلارغا ئېيتىشتىن تاپىدىغان خۇشاللىقىڭىز شۇنچە كۆپ بولىدۇ.
ۋەز خىزمىتىگە ياخشى تەييارلىق قىلىڭ
6. نېمە ئۈچۈن ۋەز خىزمىتىگە تەييارلىق قىلىشىمىز كېرەك؟
6 ۋەز خىزمىتىگە ياخشى تەييارلىق قىلسىڭىز، خۇش خەۋەرنى باشقىلارغا ئېيتقاندا، ئۆزىڭىزنى تېخىمۇ ئەركىن-ئازادە ھېس قىلالايسىز. ئەيسا شاگىرتلىرىنى ۋەز خىزمەتكە ئەۋەتىشتىن بۇرۇن، ئۇلارنىڭ تەييارلىق قىلىشىغا ياردەم بەرگەن (لۇقا 10:1–11). شاگىرتلار ھەزرىتى ئەيسانىڭ كۆرسەتمىسى بويىچە ئىش قىلغاچقا، ئۇلار ئۆز خىزمىتىنى تاماملىغاندىن كېيىن، ئىنتايىن خۇشال-خۇرام بولغان.—لۇقا 10:17.
7. ۋەز خىزمىتىگە قانداق تەييارلىق قىلالايمىز؟ (رەسىمگە ھەم قاراڭ)
7 بىز ۋەز خىزمىتىگە قانداق تەييارلىق قىلالايمىز؟ بىز قانداق قىلىپ ھەقىقەتنى ئۆز سۆزىمىز بىلەن ئېنىق ئىپادىلەپ بېرەلەيدىغانلىقىمىزنى ئويلاپ كۆرۈشىمىز كېرەك. يەنە بىز ياشاۋاتقان رايوندىكى كىشىلەرنىڭ سۆزىمىزگە قانداق ئىنكاسلارنى قايتۇرۇشى مۇمكىنلىكى ۋە ئۇلارغا قانداق جاۋاب قايتۇرساق بولىدىغانلىقى ھەققىدە ئويلاپ كۆرسەك بولىدۇ. ئاندىن بىز باشقىلار بىلەن پاراڭلاشقاندا، ئۆزىمىزنى ئەركىن-ئازادە تۇتۇش، كۈلۈمسىرەش ۋە دوستانە بولۇشنى ئۇنتۇپ قالماسلىقىمىز لازىم.
تەييارلىق قىلىشقا ۋاقىت چىقىرىش (7-ئابزاسقا قاراڭ)
8. ئەلچى پاۋلۇس نېمە ئۈچۈن مەسىھ ئەگەشكۈچىلىرىنى لايدىن ياسالغان ساپال قاچىلارغا ئوخشاتقان؟
8 ئەلچى پاۋلۇس: «بىز ئۇشبۇ خەزىنىنى لايدىن ياسالغان ساپال قاچىلاردا ساقلاپ يۈرىمىز»،— دېگىنىدە، ئۇ بىر ئوخشىتىش ئارقىلىق ۋەز خىزمەتتىكى رولىمىزنى تەسۋىرلىگەن (2-كورىنت. 4:7). بۇ خەزىنە نېمە؟ خەزىنە بولسا ھاياتنى قۇتقۇزىدىغان پادىشاھلىق خۇش خەۋىرىنى يەتكۈزۈش ئىشى (2-كورىنت. 4:1). ئۇنداقتا، لايدىن ياسالغان ساپال قاچا نېمە؟ ساپال قاچا خۇش خەۋەرنى يەتكۈزگەن خۇدا خىزمەتچىلىرى. پاۋلۇسنىڭ زامانىدا سودىگەرلەر يېمەكلىك، ھاراق-شاراب ۋە پۇللار قاتارلىق قىممەتلىك نەرسىلەرنى ساپال قاچىلارغا سېلىپ توشۇغانىدى. خۇددى شۇنىڭغا ئوخشاش، يەھۋا خۇش خەۋەرنى ۋەز قىلىشتەك قىممەتلىك بىر ۋەزىپىنى بىزگە تاپشۇرغان. ئۇنىڭ ياردىمىدە، بىز بۇ خەۋەرنى ساداقەتمەنلىك بىلەن جاكارلاشتا مۇھتاج بولىدىغان كۈچ-قۇۋۋەتكە ئېرىشەلەيمىز.
جاسارەت بىلەن دۇئا قىلىڭ
9. ئىنساندىن قورقۇش ھېس-تۇيغۇسىنى قانداق يېڭەلەيمىز؟ (رەسىمگە ھەم قاراڭ)
9 بەزى ۋاقىتلاردا، بىز ئىنسانلارنىڭ قارشىلىقىغا ئۇچراشتىن قورقۇشىمىز مۇمكىن. بۇنداق قورقۇنچنى قانداق يېڭەلەيمىز؟ ئەلچىلەرگە ۋەز ئېيتماسلىقنى بۇيرىغاندا، ئۇلارنىڭ خۇداغا قانداق دۇئا قىلغانلىقىنى ئويلاپ كۆرۈڭ. ئۇلار قورقۇپ ۋەز ئېيتىشنى توختىتىشنىڭ ئورنىغا، يەھۋاغا دۇئا قىلىپ، «سۆزلىرىڭنى يۈرەكلىك يەتكۈزۈش ئۈچۈن خىزمەتچىلىرىڭگە جاسارەت بەرگىن» دەپ ئۆتۈنگەن. يەھۋا دەرھال ئۇلارنىڭ دۇئاسىغا جاۋاب بەرگەن (ئەلچى. 4:18، 29، 31). ئەگەر بەزىدە ئىنساندىن قورقۇپ، ۋەز قىلىشتىن ئەنسىرىسەك، بىزمۇ يەھۋادىن ياردەم سوراپ دۇئا قىلىشىمىز كېرەك. سىزمۇ يەھۋادىن ئىنسانلارغا بولغان سۆيگۈ-مۇھەببىتىڭىزنى كۈچەيتىشنى ئۆتۈنۈپ سوراڭ. شۇنداق بولغاندا، ئىنساندىن قورقۇش ھېس-تۇيغۇسىنى يېڭىپ، جاسارەت بىلەن ئادەملەرگە خۇش خەۋەرنى ئېيتالايسىز.
جاسارەت تىلەپ دۇئا قىلىش (9-ئابزاسقا قاراڭ)
10. يەھۋا بىزگە ئۆزى ھەققىدە گۇۋاھلىق بېرىشكە قانداق ياردەم بېرىدۇ؟ (يەشايا 43:10–12)
10 يەھۋا بىزنى ئۆزىنىڭ گۇۋاھچىلىرى بولۇشقا تەيىنلىگەن ۋە بىزگە جاسارەت بېرىدىغانلىقىنى ۋەدە قىلغان (يەشايا 43:10–12-نى ئوقۇڭ). يەھۋا بىزگە قايسى تۆت ئۇسۇل بىلەن ياردەم بېرىدىغانلىقىنى كۆرۈپ باقايلى. بىرىنچى، بىز خۇش خەۋەرنى يەتكۈزگەندە، ئەيسا مەسىھ بىز بىلەن بىللە بولىدۇ (مەتتا 28:18–20). ئىككىنچى، يەھۋا پەرىشتىلەرنى ئىشلىتىپ بىزگە ياردەم بېرىدۇ (ۋەھىي. 14:6). ئۈچىنچى، يەھۋا بىز ئۆگەنگەن ھەقىقەتنى ئېسىمىزگە ئېلىشقا ياردەم بېرىدىغان مۇقەددەس روھىنى بېرىدۇ (يۇھاننا 14:25، 26). تۆتىنچى، يەھۋا بىز بىلەن بىرلىكتە مۈرىنى-مۈرىگە تىرەپ خىزمەت قىلىدىغان ئىمانداشلارنى بەرگەن. يەھۋا ۋە ئەزىز قېرىنداشلىرىمىزنىڭ قوللاپ-قۇۋۋەتلىشى بىلەن، بىز جۈرئەتلىك ھالدا ۋەز خىزمىتىمىزنى داۋاملاشتۇرالايمىز.
باشقىلارنىڭ ئەھۋالىنى نەزەرگە ئېلىڭ ۋە ئىجابىي كۆز قاراشنى ساقلاڭ
11. ۋەز قىلغاندا، تېخىمۇ كۆپ ئادەملەرنى قانداق ئۇچرىتالايسىز؟ (رەسىمگە ھەم قاراڭ)
11 كىشىلەر ئاندا-ساندا ئىشىكىنى ئاچقاندا، روھىڭىز چۈشۈپ ئۈمىدسىزلىنەمسىز؟ ئۆزىڭىزدىن شۇنداق سوراپ كۆرۈڭ: مۇشۇ ۋاقىتتا بۇ مەھەللىدىكى كىشىلەر قەيەردە بولىدۇ؟ (ئەلچى. 16:13) ئۇلار ئىشقا ياكى بازارغا كەتكەن بولسا، تېخىمۇ كۆپ ئادەملەر بىلەن ئۇچرىشىش ئۈچۈن كوچىدا ۋەز قىلالامسىز؟ جوشۇئا ئىسىملىك بىر بۇرادەر مۇنداق دەيدۇ: «مەن سودا سارايلاردا ياكى ماشىنا توختىتىش مەيدانلىرىدا ۋەز ئېيتىشنىڭ ماڭا كۆپ كىشىلەر بىلەن پاراڭلىشىش پۇرسىتى يارىتىپ بېرىدىغانلىقىنى بايقىدىم». ئۇ ۋە ئايالى برىدگېيت، يەنە تاڭ سەھەردە ۋە كەچقۇرۇن، شۇنىڭدەك يەكشەنبە چۈشتىن كېيىن ۋەز قىلغاندا ئادەملەرنىڭ كۆپرەك ئۆيدە بولىدىغانلىقىنى بايقىغان.—ئەفەس. 5:15، 16.
ۋەز قىلىش ۋاقتىڭىزنى ۋە جاينى ئۆزگەرتىڭ (11-ئابزاسقا قاراڭ)
12. ئادەملەرنىڭ نېمىگە ئىشىنىدىغانلىقى ياكى نېمىگە كۆڭۈل بۆلىدىغانلىقىنى قانداق چۈشىنەلەيسىز؟
12 ئەگەر ئادەملەر بىز يەتكۈزگەن خۇش خەۋەرگە ئانچە قىزىقىش كۆرسەتمىسە، ئۇلارنىڭ نېمىگە ئىشىنىدىغانلىقى ياكى نېمىگە كۆڭۈل بۆلىدىغانلىقىنى چۈشىنىشكە تىرىشىڭ. جوشۇئا ۋە برىدگېيت كىشىلەر بىلەن پاراڭلاشقاندا، ۋاراقچىنىڭ ماۋزۇسىدىكى سوئالنى ئىشلىتىدۇ. مەسىلەن، ئۇلار «مۇقەددەس كىتابقا بولغان كۆزقارىشىڭىز قانداق؟» دېگەن ۋاراقچىنى ئىشلىتىپ مۇنداق دەپ سورايدۇ: «بەزى ئادەملەر مۇقەددەس كىتابنى خۇدادىن كەلگەن كىتاب دەپ قارىسا، يەنە بەزىلىرى ئۇنداق ئەمەس، دەپ قارايدۇ. سىز قانداق قارايسىز؟» ئۇلار شۇنداق قىلغاندا، ھەمىشە سۆھبەت داۋام قىلغان.
13. ئادەملەر بىز ئېيتىۋاتقان خۇش خەۋەرگە قۇلاق سالمىسا، نېمە ئۈچۈن بەرىبىر مەقسىتىمىزگە يېتەلەيمىز دەپ ئېيتىشقا بولىدۇ؟ (پەندى-نەسىھەت 27:11)
13 ئادەملەر بىز ئېيتىۋاتقان خۇش خەۋەرگە قۇلاق سالمىغان ھالەتتىمۇ، بىز بەرىبىر مەقسىتىمىزگە يېتىمىز. نېمە ئۈچۈن؟ سەۋەبى، بىز يەھۋا خۇدا ۋە ئۇنىڭ ئوغلى بۇيرىغان ئىشنى قىلىۋاتىمىز، يەنى گۇۋاھلىق بېرىۋاتىمىز (ئەلچى. 10:42). ئەگەر بىز ۋەز قىلغاندا، سۆزلىشىدىغان ئادەمنى تاپالمىساق ياكى بىرلىرى سۆزلىرىمىزنى ئاڭلاشنى رەت قىلسا، بىز يەنىلا خۇشال بولالايمىز. چۈنكى، بىز ئاسماندىكى ئاتىمىزنى خۇشال قىلىدىغان ئىشنى قىلىۋاتقانلىقىمىزنى بىلىمىز.—پەندى-نەسىھەت 27:11-نى ئوقۇڭ.
14. ئەگەر قېرىنداشلار ھەقىقەتكە قىزىقىش كۆرسەتكەن بىرىنى تاپسا، نېمە ئۈچۈن بىزمۇ خۇشال بولالايمىز؟
14 ئەگەر قېرىنداشلار ھەقىقەتكە قىزىقىش كۆرسەتكەن بىرىنى تاپسا، بىزمۇ خۇشال بولالايمىز. «كۈزىتىش مۇنارى» ژۇرنىلىدا يۈتۈپ كەتكەن بالىنى ئىزدەش ھەققىدە بىر مىسال كەلتۈرۈلگەن. بىز ۋەز ئېيتىشقا چىققاندا، بىر يوقاپ كەتكەن بالىنى ئىزدەۋاتقان بىر توپ كىشىلەرگە ئوخشاش بولىمىز. كۆپلىگەن كىشىلەر بالىنى ئىزدەيدۇ، ئۇلار بىر جايدىن كېيىن يەنە بىر جاينى ئىزدەپ چىقىدۇ. بالا تېپىلغاندا، بالىنى تاپقان ئادەملا ئەمەس، ھەممىسى خۇشال بولىدۇ. خۇددى شۇنىڭغا ئوخشاش، گۇۋاھلىق بېرىپ شاگىرت يېتىشتۈرۈش ئىشى بىر توپ كىشىلەرنىڭ تىرىشچانلىقى بىلەن بولىدۇ. بۇنىڭغا ھەممە ئادەم قاتنىشىشى كېرەك. شۇڭا، جامائەتتىكى ھەربىر كىشى بىز ۋەز قىلىدىغان رايوندا ئادەملەرگە خۇش خەۋەر يەتكۈزۈشكە ياردەم بېرىشى كېرەك. ئەگەر يېڭى بىر كىشى جامائەت يىغىلىشىغا قاتنىشىشنى باشلىسا، ھەممىسى تەڭ خۇشال بولىدۇ.
دىققىتىڭىزنى يەھۋانى ۋە ئىنسانلارنى سۆيۈشكە قارىتىڭ
15. مەتتا 22:37–39-ئايەتلەرنى ئەمەلىي قوللىنىش ۋەز خىزمىتىدە قىزغىنلىقىمىزنى تېخىمۇ ئاشۇرۇشقا قانداق ياردەم بېرەلەيدۇ؟ ( ھەم قاراڭ)
15 ئەگەر دىققىتىمىزنى يەھۋانى ۋە ئىنسانلارنى سۆيۈشكە قاراتساق، ۋەز خىزمىتىدە قىزغىنلىقىمىزنى تېخىمۇ ئاشۇرالايمىز (مەتتا 22:37–39-نى ئوقۇڭ). يەھۋا ئۇنىڭغا چىن قەلبىمىزدىن خىزمەت قىلغىنىمىزنى ۋە كىشىلەرنىڭ مۇقەددەس كىتاب ئۆگىنىشكە باشلىغانلىقىنى كۆرگەندە، ئۇنىڭ قانچىلىك خۇشال بولىدىغانلىقىنى تەسەۋۋۇر قىلىپ بېقىڭ. يەنە بىر ئادەم ھەقىقەتنى قوبۇل قىلسا، ئۇنىڭ مەڭگۈلۈك ھاياتقا ئېرىشىش پۇرسىتى بولىدىغانلىقى ھەققىدە ئويلاپ كۆرۈڭ.—يۇھاننا 6:40؛ 1-تىموت. 4:16.
دىققىتىڭىزنى يەھۋا ۋە ئىنسانلارغا بولغان مۇھەببەتكە قارىتىش ۋەز خىزمىتىدە خۇشاللىقىڭىزنى تېخىمۇ ئاشۇرىدۇ (15-ئابزاسقا قاراڭ)
16. ئۆيدىن چىقالماي قالساق، قانداق قىلىپ ۋەز خىزمىتىدىن خۇشاللىق تاپالايمىز؟ مىساللارنى كەلتۈرۈڭ.
16 مەلۇم سەۋەبلەر تۈپەيلى، سىز ئۆيدىن چىقالماي قالامسىز؟ ئەگەر شۇنداق ۋەزىيەتتە بولسىڭىز، يەھۋاغا ۋە ئىنسانلارغا بولغان مۇھەببىتىڭىزنى كۆرسىتىش ئۈچۈن نېمىلەرنى قىلالىشىڭىز مۇمكىنلىكى ھەققىدە ئويلىنىپ كۆرۈڭ. سامۇئىل بىلەن دانىئا ئىسىملىك قېرىنداشلار تاجىسىمان 19 تارقىلىشچان ۋىرۇسى مەزگىلىدە ئۆيىگە سولىنىپ قالغان. ئاشۇ قىيىن ۋاقىتلاردا، ئۇلار دائىم تېلېفون قىلىش ۋە خەت يېزىش ئارقىلىق ۋەز خىزمىتىگە قاتناشقان. ھەمدە Zoom ئارقىلىق مۇقەددەس كىتاب تەتقىق ئۆگىنىشىنى ئۆتكۈزگەن. سامۇئىل راك كېسىلى سەۋەبلىك دوختۇرخانىغا داۋالىنىشقا بارغاندا، ئۇ ئۆزى ئۇچراتقان كىشىلەرگە گۇۋاھلىق بەرگەن. ئۇ مۇنداق دەيدۇ: «قىيىنچىلىقلار بىزنى ھېسسىي ۋە جىسمانىي جەھەتلەردىن چارچىتىپ، ئىمان-ئېتىقادىمىزنى تەۋرىتىپ قويۇشى مۇمكىن. شۇڭا، بىز يەھۋاغا خىزمەت قىلىشتىن خۇشاللىق تېپىشىمىز كېرەك». بۇ قىيىن مەزگىلدە، دانىئا يىقىلىپ چۈشۈپ، ئۈچ ئاي كارىۋاتتا ئورۇن تۇتۇپ يېتىپ قالغان. ئاندىن ئالتە ئاي چاقلىق ئورۇندۇقتا ئولتۇرغان. ئۇ مۇنداق دەيدۇ: «مەن كۈچۈمنىڭ يېتىشىچە قىلالايدىغان ئىشلارنى قىلىشقا تىرىشتىم. مېنى يوقلاپ كەلگەن تىببىي خادىملارغا گۇۋاھلىق بەردىم. ئۆيۈمىزگە نەرسە-كېرەكلەرنى ئەكېلىدىغان توشۇغۇچىلار بىلەن پاراڭلاشتىم. مەن يەنە بىر داۋالاش ئۈسكۈنلىرىنى ساتىدىغان شىركەتنىڭ ۋەكىلى بىلەن تېلېفوندا مۇقەددەس كىتاب ھەققىدە سۆھبەتلەرنى ئۆتكۈزدۈم». گەرچە سامۇئىل بىلەن دانىئانىڭ ئەھۋالى ئاسان بولمىسىمۇ، ئۇلار پۈتۈن كۈچى بىلەن قولىدىن كېلىشىچە تىرىشچانلىق كۆرسەتكەن ۋە ئۇنىڭدىن خۇشاللىق تاپقان.
17. بۇ ماقالىدە كۆرۈپ چىققان تەۋسىيەلەردىن ئەڭ ياخشى ئۈنۈمگە ئېرىشىش ئۈچۈن نېمە قىلالايمىز؟
17 بىز مۇشۇ ماقالىدە ئوتتۇرىغا قويۇلغان تەۋسىيەلەرنى بىرلىكتە ئىشلەتسەك، شۇندىلا ئەڭ ياخشى ئۈنۈمگە ئېرىشەلەيمىز. مەسىلەن، بىز بىر تاماقنى ئەتكەندە، كېرەكلىك كۆكتاتلار ۋە تېتىتقۇلارنى تەييارلاپ قويساق، ئۇلارنى بىرلەشتۈرۈپ ئىشلەتكەندە، مەززىلىك بىر تاماقنى ئېتەلەيمىز. خۇددى شۇنىڭدەك، بۇ ماقالىدە ئۆگىنىپ ئۆتكەن بەش تەۋسىيىنى ئەمەلىي قوللانساق، سەلبىي ھېس-تۇيغۇلارنى يېڭىپ، ۋەز خىزمەتتە تېخىمۇ كۆپ خۇشاللىق تاپالايمىز.
تۆۋەندىكى تەۋسىيەلەرنى ئەمەلىي ئىشلىتىش ۋەز خىزمەتتە كۆپرەك خۇشاللىق تېپىشىڭىزغا قانداق ياردەم بېرەلەيدۇ؟
-
تەييارلىق قىلىشقا ۋاقىت چىقىرىش
-
جاسارەت تىلەپ دۇئا قىلىش
-
دىققىتىڭىزنى يەھۋا ۋە ئىنسانلارغا بولغان مۇھەببەتكە قارىتىش
1-ناخشا يەھۋانىڭ ئېسىل پەزىلەتلىرى
