31-تەتقىق ماقالىسى
سىز يەھۋانى كۈتۈشكە تەييارمۇ؟
«سەۋرچانلىق بىلەن كۈتىمەن».—مىكاھ 7:7.
24-ناخشا كۆزۈڭ بولسۇن مۇكاپاتتا!
بۇ ماقالىدە a
1، 2. بۇ ماقالىدە، نېمىلەرنى مۇھاكىمە قىلىمىز؟
سىز بىر پوسۇلكىنى كۈتۈۋاتىسىز، دەيلى. ئۇنىڭدا سىز ئېھتىياجلىق نەرسە بار. ئەمما، ئۇ سىز كۈتكەن ۋاقىتتا كەلمىسە، قانداق ھېس-تۇيغۇدا بولىسىز؟ پەندى-نەسىھەت 13:12-ئايەتتە مۇنداق يېزىلغان: «ئەمەلگە ئېشىشى كېچىپ كەتكەن ئۈمىد يۈرەكنى ئېزەر». پوسۇلكىنىڭ سىز كۈتكەن ۋاقىتتا كەلمىگەنلىكىنىڭ مۇھىم سەۋەبلىرىنى بىلگىنىڭىزدە، ئۆزىڭىزنى قانداق ھېس قىلىسىز؟ سىز شۇنداق ئەھۋالدا، سەۋر-تاقەت كۆرسىتىپ كۈتۈشكە تەييار بولىسىز.
2 بۇ ماقالىدە، سەۋر-تاقەت بىلەن كۈتۈشىمىزگە ياردەم بېرىدىغان بەزى مۇقەددەس كىتاب پرىنسىپلىرىنى كۆرۈپ چىقىمىز (مىكاھ 7:7). كېيىن، قايسى ئىككى ساھەدە يەھۋانى چوقۇم سەۋر-تاقەت بىلەن كۈتۈشىمىز كېرەكلىكىنى مۇھاكىمە قىلىمىز. ئاخىرىدا، يەھۋانى كۈتۈشكە تەييار بولغانلار قانداق بەرىكەتلەرگە ئېرىشىدىغانلىقىنى كۆرىمىز.
مۇقەددەس كىتاب پرىنسىپلىرى سەۋرچان بولۇشنى ئۆگىتىدۇ
3. ياقۇپ 5:7-ئايەتتە، قانداق پرىنسىپ كۆرسىتىلگەن؟
3 مۇقەددەس كىتابتا بىزنى سەۋرچانلىققا ئۈندەيدىغان بىر مىسال كەلتۈرۈلگەن: دېھقانلار مول ھوسۇل ئېلىش ئۈچۈن باھار ۋە كۈز يامغۇرلىرىنى سەۋر-تاقەت بىلەن كۈتىدۇ (ياقۇپ 5:7). بۇ مىسالدىن قانداق پرىنسىپنى بايقىدىڭىز؟ دانا كىشى ئىشلىرىدا ياخشى نەتىجىگە ئېرىشىش ئۈچۈن، تىرىشچان ۋە سەۋر-تاقەتلىك بولۇشى كېرەك.
4. پەندى-نەسىھەت 4:18-ئايەتتە، قانداق پرىنسىپ بار؟
4 پەندى-نەسىھەت 4:18-ئايەتتە مۇنداق دەپ يېزىلغان: «ھەققانىيلارنىڭ يولى تاڭ نۇرىغا ئوخشار، كۈن چۈش بولغىچە بارغانسېرى تولۇق نۇرلىنار». بۇ ئايەت، خۇدا ئۆز خەلقىنىڭ ئۇنىڭ ئىرادىسىنى ئاستا-ئاستا چۈشىنىشىگە ياردەم بېرىدىغانلىقىنى ئېنىق كۆرسىتىدۇ. بۇ پرىنسىپ، يەنە بىر ئېتىقادچىنىڭ ھاياتىدا ئۆزگۈرۈشلەرنى قىلىپ، يەھۋاغا تېخىمۇ يېقىنلىشالايدىغانلىقىمىزنى چۈشىنىشكە ياردەم بېرىدۇ. يەھۋاغا يېقىنلىشىش ئۈچۈن ۋاقىت كېتىدۇ. ئەگەر بىز خۇدا سۆزى ۋە ئۇنىڭ تەشكىلاتىدىن كەلگەن نەسىھەتلەرنى ئەستايىدىل تەتقىق قىلىپ ھاياتىمىزدا قوللانساق، ئاستا-ئاستا ئەيساغا ئوخشاش پەزىلەتلەرنى يېتىلدۈرەلەيمىز. بىزنىڭ خۇدا ھەققىدىكى بىلىملىرىمىزمۇ ئاشىدۇ. بۇنى ئەيسانىڭ قانداق مىسال بىلەن چۈشەندۈرگەنلىكىگە قاراپ باقايلى.
خۇددى ئۆسۈملۈكنىڭ ئاستا-ئاستا ئۆسكىنىدەك، بىر كىشىنىڭ پادىشاھلىق خۇش خەۋىرىنى ئاڭلاپ ۋە ئۇنى قوبۇل قىلىپ، روھىي جەھەتتىن ئۆسۈشىمۇ ئاستا-ئاستا بولىدۇ (5-ئابزاسقا قاراڭ)
5. ئاستا ئۆسۈش جەريانىنى ئەيسا قانداق تەمسىل ئارقىلىق كۆرسەتكەن؟
5 بىز يەتكۈزگەن پادىشاھلىق خۇش خەۋىرىنىڭ، سەمىمىي ئىنسانلارنىڭ قەلبىدە خۇددى كىچىك بىر ئۇرۇققا ئوخشاش ئاستا-ئاستا ئۆسۈشىنى، ئەيسا بىر تەمسىل ئارقىلىق چۈشەندۈرگەن: «ئۇرۇق بىخلاپ، ئېگىز ئۆسىدۇ. ئۇ كىشى ئۇنىڭ قانداق ئۆسۈۋاتقانلىقىنى ئۆزى بىلمەيدۇ. يەر ئاستا-ئاستا ئۆز ھوسۇلىنى بېرىشكە باشلايدۇ، ئاۋۋال مايسا ئۆسىدۇ، كېيىن باشاق چىقىدۇ، ئاخىرىدا باشاق تولۇق دان تۇتۇپ پىشىدۇ» (ماركۇس 4:27، 28). بۇ تەمسىل ئارقىلىق ئەيسا نېمە دېمەكچى بولغانىدى؟ خۇددى ئۇرۇق ئاستا-ئاستا ئۆسۈپ يېتىلگەندەك، كىشىنىڭمۇ پادىشاھلىق توغرۇلۇق خۇش خەۋەرنىمۇ قوبۇل قىلىپ، روھىي جەھەتتىن ئۆسۈشىنىڭ ئاستا-ئاستا بولىدىغانلىقىنى چۈشەندۈرگەن. مەسىلەن، بىز بىلەن مۇقەددەس كىتابنى ئۆگىنىۋاتقان كىشى يەھۋاغا تېخىمۇ يېقىنراق بولغانسېرى، ئۇنىڭدا نۇرغۇنلىغان ياخشى ئۆزگۈرۈشلەرنى كۆرۈشكە باشلايمىز (ئەفەس. 4:22—24). بىراق، كىچىككىنە ئۇرۇقنى ئۆستۈرگۈچى يەھۋا خۇدانىڭ ئۆزى ئىكەنلىكىنى ئەستىن چىقارمايلى.—1-كورىنت. 3:7.
6، 7. يەھۋانىڭ يەر شارىنى يارىتىشىدىن نېمىلەرنى ئۆگىنەلەيمىز؟
6 يەھۋا مەيلى قانداق ئىش قىلسۇن، ئىشىنى تاماملاشقا قانچىلىك ۋاقىت كەتسۇن، ئۇنى سەۋرچانلىق بىلەن تۈگىتىدۇ. بۇنداق قىلىشىنىڭ سەۋەبى، ئۇ ئۆز ئىسىمىنى ئۇلۇغلاش ۋە باشقىلارنىڭ پايدىسى ئۈچۈندۇر. مەسىلەن، يەھۋانىڭ يەر شارىنى ئىنسانلار ئۈچۈن قەدەممۇ-قەدەم ياراتقانلىقىنى كۆرۈپ چىقايلى.
7 مۇقەددەس كىتابتا يەر شارىنى ياراتقاندا، يەھۋا «يەرنىڭ ئۆلچەملىرىنى» بەلگىلەپ، «ئۇل ئاساسىنى» ۋە «بۈرجەك تېشىنى» قويغانلىقى تەسۋىرلەنگەن (ئايۇپ 38:5، 6). ئۇ ھەتتا ئۆزىنىڭ ئىشلىرىنى تەكشۈرۈشكە ۋاقىت چىقارغان (يارىت. 1:10، 12). يەھۋانىڭ قەدەممۇ-قەدەم يېڭى بىر نەرسىنى ياراتقانلىقىنى كۆرگەن پەرىشتىلەرنىڭ قانداق ھېس-تۇيغۇدا بولغانلىقىنى تەسەۋۋۇر قىلالامسىز؟ ئۇلار چوقۇم بەكمۇ ھاياجانغا تولغان. شۇ سەۋەب، ئۇلار ۋاقتى كەلگەندە، «خۇشاللىققا چۆمۈپ» توۋلاشقا باشلىغان ئىدى (ئايۇپ 38:7). بۇنىڭدىن نېمىنى ئۆگىنەلەيمىز؟ يەھۋا يارىتىش ئىشىنى تاماملاش ئۈچۈن نۇرغۇن يىللارنى سەرپ قىلغان. بىراق، يەھۋا ياراتقان بارلىق مەۋجۇداتلارنى كۆرۈپ چىققاندا، ئۇ ھەممىسىنىڭ «ناھايىتى ياخشى بولغانلىقىنى» كۆرگەنىدى.—يارىت. 1:31.
8. ھازىر نېمىنى كۆرۈپ چىقىمىز؟
8 يۇقىرىدىكى مىساللاردىن كۆرگىنىمىزدەك، خۇدا سۆزى سەۋر-تاقەتلىك بولۇشنىڭ قانچىلىك مۇھىم ئىكەنلىكىنى تەكىتلەيدۇ. ھازىر بىز ئىككى ساھەدە يەھۋانى كۈتۈشىمىز كېرەكلىكىنى كۆرۈپ چىقىمىز.
يەھۋانى كۈتۈش
9. قايسى ۋەزىيەتتە يەھۋانى كۈتىشىمىز كېرەك بولىدۇ؟
9 دۇئالىرىمىزنىڭ جاۋابىنى كۈتىشىمىز كېرەك. بىز سىناققا قارشى تۇرغاندا ياكى ئاجىزلىقىمىزنى يېڭىش ئۈچۈن ياردەم سوراپ دۇئا قىلغاندا، يەھۋا بىز ئۈمىد قىلغان ياردەمنى بەرمەيۋاتقاندەك كۆرۈنۈشى مۇمكىن. نېمە ئۈچۈن يەھۋا بارلىق دۇئالىرىمىزغا دەرھاللا جاۋاب بەرمەيدۇ؟
10. يەھۋانىڭ دۇئالىرىمىزغا جاۋاب بېرىشىنى نېمە ئۈچۈن سەۋرچانلىق بىلەن كۈتىشىمىز كېرەك؟
10 يەھۋا دۇئالىرىمىزغا دىققەت بىلەن قۇلاق سالىدۇ (زەبۇر65:2). ئۇ چىن قەلبىمىزدىن چىققان دۇئالىرىمىزنى ئىمان-ئېتىقادىمىزنىڭ دەلىلى سۈپىتىدە كۆرىدۇ (ئىبرانىي. 11:6). دۇئالىرىمىزغا ماس، خۇدانىڭ ئىرادىسىنى ئورۇنلاشنى قەتئىي قارار قىلساق، ئۇنىڭ كۆڭلى خۇرسەن بولىدۇ (1-يۇھاننا 3:22). دېمەك، بىز يامان ئادەتلىرىمىزنى تاشلاپ، ئاجىزلىقلىرىمىزنى ئۆزگەرتىش ئۈچۈن دۇئالىرىمىزغا ماس ھەرىكەت قىلىشىمىز ۋە سەۋرچانلىق كۆرسىتىشىمىز كېرەك. بەزى دۇئالىرىمىزغا دەرھاللا جاۋاب ئالالمايدىغانلىقىمىزنى، ھەزرىتى ئەيسا كۆرسىتىپ مۇنداق دېگەن: «داۋاملىق تىلەڭلار ۋە سىلەرگە بېرىلىدۇ، داۋاملىق ئىزدەڭلار ۋە تاپىسىلەر، داۋاملىق ئىشىكنى قېقىڭلار ۋە سىلەر ئېچىلىدۇ. چۈنكى، تىلىگەن كىشى ئالىدۇ، ئىزدىگەن كىشى تاپىدۇ ۋە ئىشىكنى قاققان كىشىگە ئىشىك ئېچىلىدۇ» (مەتتا 7:7، 8). بىز ئۇنىڭ بۇ نەسىھىتىگە قۇلاق سېلىپ، دۇئا قىلىشنى داۋاملاشتۇرساق، ئاسماندىكى ئاتىمىزنىڭ بىزنى تىڭشايدىغانلىقىغا ۋە دۇئالىرىمىزغا جاۋاب بېرىدىغانلىقىغا ئىشەنچ قىلالايمىز.—كولوسى. 4:2.
بىز يەھۋانى سەۋر-تاقەت بىلەن كۈتكىنىمىزدە، ئىشەنچ بىلەن دۇئا قىلىشنى داۋاملاشتۇرىمىز (11-ئابزاسقا قاراڭ) b
11. قارىماققا دۇئالىرىمىز جاۋابسىز قالغاندەك كۆرۈنسە، ئىبرانىيلار 4:16-ئايەت قانداق ياردەم بېرىدۇ؟
11 قارىماققا دۇئالىرىمىزغا جاۋاب كەلمىگەندەك كۆرۈنسىمۇ، يەھۋا دۇئالىرىمىزغا ۋاقىت-سائىتى كەلگەندە جاۋاب بېرىدىغانلىقىنى ۋەدە قىلىدۇ (ئىبرانىيلار 4:16-نى ئوقۇڭ). شۇڭا، دۇئالىرىمىزغا جاۋابنى بىز ئۈمىد قىلغاندەك دەرھاللا ئالالمىساق، ھەرگىزمۇ يەھۋانى ئەيىبلىمەسلىكىمىز كېرەك. مەسىلەن، نۇرغۇن قېرىنداشلار خۇدا پادىشاھلىقىنىڭ مۇشۇ رەزىل دۇنيانى يوق قىلىشىنى كۆرۈش ئۈچۈن، ئۇزۇن يىللار دۇئا قىلىپ كېلىۋاتىدۇ. ئەيسا ھەتتا بىزگىمۇ شۇنداق دۇئا قىلىشنى ئېيتقان (مەتتا 6:10). بۇ رەزىل زاماننىڭ ئاخىرلىشىش ۋاقتى ئىنسانلار كۈتكەن ۋاقىتتا كەلمىگەچ، بەزىلەر خۇداغا بولغان ئىمان-ئېتىقادىنىڭ ئاجىزلىشىشىغا يول قويغان. بۇ نېمە دېگەن ئەخمەقلىق، ھە! (ھاب. 2:3؛ مەتتا 24:44) ئىمان-ئېتىقاد بىلەن دۇئا قىلىپ، يەھۋانى كۈتكىنىمىزدە، ئۇ دۇئالىرىمىزغا جاۋاب بېرىدۇ. يەھۋا ئاللىقاچان زاماننىڭ ئاخىرلىشىدىغان كۈنى ۋە سائىتىنى بەلگۈلەپ قويغان. شۇ كۈن ئۆز ۋاقىت-سائىتىدە يېتىپ كېلىدۇ. بۇ دەل ھەممىسى كۈتكەن كۈن!—مەتتا 24:36؛ 2-پېتر. 3:15.
يۈسۈپنىڭ مىسالىدىن سەۋرچان بولۇش ھەققىدە نېمىنى ئۆگىنەلەيمىز؟ (12—14-ئابزاسلارغا قاراڭ)
12. بىز ئۈچۈن بولۇپمۇ قانداق ۋەزىيەتتە سەۋرچانلىق بىلەن كۈتۈش قىيىن بولۇشى مۇمكىن؟
12 ئادالەتنىڭ ئورنىتىلىشىنى سەۋر-تاقەت بىلەن كۈتىشىمىز كېرەك. بۇ دۇنيادا ئادەملەر باشقىلارنى پەرقلىق جىنس، ئىرق، مىللەت ياكى قەبىلىلەرگە بۆلۈپ، ناچار مۇئامىلە قىلىدۇ. يەھۋانىڭ نۇرغۇن خىزمەتچىلىرى مۇقەددەس كىتاب پرىنسىپلىرىغا ماس ھايات كەچۈرگەچ، ئادالەتسىزلىككە ئۇچراۋاتىدۇ. بىز شۇنداق ناھەقچىلىككە ئۇچرىغاندا، ئەيسانىڭ مۇنۇ سۆزىنى چوقۇم ئەستە ساقلىشىمىز كېرەك: «ئاخىرغىچە بەرداشلىق بەرگەنلەر قۇتقۇزۇلىدۇ» (مەتتا 24:13). جامائەتتە بىرسىنىڭ ئېغىر خاتالىق ئۆتكۈزگەنلىكىنى بىلسىڭىز، نېمە قىلىشىڭىز لازىم؟ شۇ ئىشنى ئاقساقاللارغا ئېيتقاندىن كېيىن، شۇ مەسىلىنى ئۇلارنىڭ خۇدانىڭ قانۇن-پرىنسىپلىرىغا ئاساسەن بىتەرەپ قىلىشىغا تاپشۇرۇپ، سەۋرچانلىق بىلەن كۈتەمسىز؟ بىرسى ئېغىر گۇناھ قىلسا، ئاقساقاللار نېمە قىلىدۇ؟
13. جامائەتتە بىرسى ئېغىر گۇناھ قىلغاندا، يەھۋا ئاقساقاللارنىڭ نېمە قىلىشىنى كۈتىدۇ؟
13 ئاقساقاللار جامائەتتە بىرىنىڭ ئېغىر گۇناھ قىلغانلىقىدىن خەۋەردار بولغاندا، ئۇلار يەھۋانىڭ ئاشۇ ۋەزىيەتكە قانداق كۆزقاراشتا ئىكەنلىكىنى بىلىش ئۈچۈن، ئۇنىڭدىن ئەقىل-پاراسەت سوراپ دۇئا قىلىدۇ (ياقۇپ 3:17). ئۇلارنىڭ مەقسىتى، مۇمكىن بولسا گۇناھ ئۆتكۈزگەن كىشىنىڭ شۇ خاتا يولدىن قايتىشىغا ياردەم بېرىش (ياقۇپ 5:19، 20). ئۇلار يەنە جامائەتنى قوغداش ۋە ئازاب-ئوقۇبەت چېكىۋاتقانلارغا تەسەللى بېرىش ئۈچۈن قولىدىن كەلگەننىڭ ھەممىسىنى قىلىشنى خالايدۇ (2-كورىنت. 1:3، 4). ئاقساقاللار بىرىنىڭ ئېغىر گۇناھ قىلغانلىقىنى بىلسە، ئاۋۋال بىر ئاز ۋاقىت چىقىرىپ، ھەممە مەلۇماتلارنى يىغىدۇ. كېيىن، گۇناھكارنىڭ ئۆزىنى مۇۋاپىق دەرىجىدە تۈزىتىشىگە ياردەم بېرىش ئۈچۈن، ئاقساقاللار دۇئا قىلىپ، مېھرىبانلىق بىلەن خۇدا سۆزىدىن نەسىھەتلەرنى بېرىدۇ (يەرەم. 30:11). گەرچە ئاقساقاللار ئىشنى بىرتەرەپ قىلىشنى كېچىكتۈرمىسىمۇ، ئۇلار دەرھال قارار چىقىرىشقا ئالدىرىمايدۇ. ئاقساقاللار يەھۋانىڭ كۆرسەتمىلىرىگە ئاساسەن ئىش قىلغاندا، جامائەتتىكىلەر بۇنىڭ پايدىسىنى كۆرىدۇ. ئەمما، شۇنداق يول بىلەن مەسىلە بىرتەرەپ قىلىنسىمۇ، بىگۇناھ كىشى بىراز ۋاقىت قىينىلىشى مۇمكىن. سىزمۇ شۇنداق ۋەزىيەتتە بولسىڭىز، ئازاب-ئوقۇبەتلەرنى يىنىكلىتىش ئۈچۈن نېمە قىلسىڭىز بولىدۇ؟
14. ئېتىقادچىلار كۆڭلىڭىزگە قاتتىق ئازار بەرسە، مۇقەددەس كىتابتىكى قايسى مىسال تەسەللى تېپىشىمىزغا ياردەم بېرىدۇ؟
14 بىر كىشى، ھەتتا ئېتىقادچى قېرىنداش كۆڭلىڭىزگە قاتتىق ئازار بەرگەنمۇ؟ شۇنداق مەسىلىنى يەھۋانىڭ قولىغا تاپشۇرۇپ، ئۇنى سەۋرچانلىق بىلەن كۈتۈشكە نېمە ياردەم بېرىدۇ؟ مۇقەددەس كىتابتا، بىزگە ياردەم بېرىدىغان ئاجايىپ مىساللار بار. مەسىلەن، يۈسۈپ ئاكىلىرىنىڭ ئۆزىگە قىلغان گۇناھلىرى سەۋەبلىك، قەھرى-غەزەبلىك ئادەم بولۇپ كەتمىگەن. ئەكسىنچە، ئۇ سەۋر-تاقەت بىلەن پۈتۈن دىققىتىنى يەھۋاغا خىزمەت قىلىشقا قاراتقان ۋە يەھۋانىڭ مۇكاپاتىغا ئېرىشكەن (يارىت. 39:21). ئاخىرىدا، يۈسۈپ ئۆزىنىڭ كۆڭلىگە ئازار بەرگەنلەرنى كەچۈرەلىگەن ۋە يەھۋانىڭ بەرىكەتلىرىگە ئېرىشكەن (يارىت. 45:5). يۈسۈپكە ئوخشاش، بىز يەھۋاغا يېقىنلىشىپ، ناھەقچىلىكنى تۈزىتىشنى يەھۋانىڭ قولىغا تاپشۇرساق، تەسەللى تاپالايمىز.—زەبۇر7:17؛ 73:28.
15. بىر قېرىندىشىمىزنىڭ ناھەقچىلىككە سەۋرچانلىق كۆرسىتىپ، كۆڭۈل خاتىرجەملىكىگە ئېرىشىشىگە نېمە ياردەم بەرگەن؟
15 ئەلۋەتتە، بىز يۈسۈپكە ئوخشاش ناھەقچىلىككە دۇچ كەلمىسەكمۇ، ئەمما بەزىدە باشقىلارنىڭ يامان مۇئامىلىسى قەلبىمىزگە پىچاقتەك سانجىلىشى مۇمكىن. ئەگەر بىر قېرىنداش ياكى يەھۋاغا خىزمەت قىلمايدىغان بىرى بىلەن ئارىمىزدا كېلىشمەسلىك يۈز بەرسە، مۇقەددەس كىتاب پرىنسىپلىرىنى ئەمەلىي قوللانساق، بۇنىڭ پايدىسىنى كۆرىمىز (فىلىپى. 2:3، 4). بىر قېرىنداشنى مىسالنى كۆرۈپ باقايلى: ئىش ئورنىدىكى خىزمەتدىشى قېرىندىشىمىز توغرۇلۇق سۆز-چۆچەكلەرنى تارقاتقانلىقىنى بايقىغاندا، كۆڭلى قاتتىق ئاغرىغان. ئەمما، قېرىندىشىمىز بۇنىڭغا دەرھاللا ئاچچىقلىنىشنىڭ ئورنىغا، ئۇ ئەيسانىڭ ئۈلگىسى توغرۇلۇق چوڭقۇر ئويلانغان. ئەيسا ھاقارەتكە ئۇچرىغاندا تىل قايتۇرمىغان (1-پېتر. 2:21، 23). شۇنى ئەستە تۇتۇپ، قېرىندىشىمىز بۇ مەسىلىگە ئانچە پەرۋا قىلماسلىقنى قارار قىلغان. كېيىنرەك، ئۇ خىزمەتدىشىنىڭ ئېغىر كېسەل بىلەن كۈرەش قىلىپ يۈرگەنلىكىنى ۋە شۇ چاغدا نۇرغۇن غەم-ئەندىشىلىرى بولغانلىقىنى بىلگەن. شۇڭا، قېرىندىشىمىز خىزمەتدىشىنىڭ ئەتەي شۇنداق سۆزلەرنى قىلمىغانلىقىنى چۈشەنگەن. ئۇ يامان مۇئامىلىگە ئۇچرىغاندا، سەۋرچانلىق كۆرسەتكەنلىكىدىن بەك خۇشال بولغان ۋە كۆڭلى خاتىرجەملىك تاپقان.
16. سىز ناھەقچىلىككە بەرداشلىق بېرىۋاتقان بولسىڭىز، سىزگە نېمە تەسەللى بېرەلەيدۇ؟ (1-ېترۇس 3:12)
16 ناھەقچىلىك ياكى باشقا سەۋەبلەر تۈپەيلى، ئازاب-ئوقۇبەتلەرگە سەۋر-تاقەت قىلىۋاتقان بولسىڭىز، يەھۋانىڭ كۆڭلى سۇنۇقلارغا يېقىن ئىكەنلىكىنى ئۇنتۇماڭ (زەبۇر34:18). يەھۋا سەۋرچانلىق كۆرسەتكىنىڭىز ۋە يۈكۈڭىزنى ئۇنىڭغا تاشلىغانلىقىڭىز ئۈچۈن، سىزنى ياخشى كۆرىدۇ (زەبۇر55:22). يەھۋا پۈتكۈل جاھاننىڭ سوتچىسىدۇر. ھېچنەرسە ئۇنىڭ نەزىرىدىن چەتتە قالمايدۇ ( 1-پېترۇس 3:12-نى ئوقۇڭ). شۇڭا، ئۆزىڭىز ھەل قىلالمايدىغان ئېغىر قىيىنچىلىقلارغا دۇچ كەلگەندە، يەھۋانىڭ ھەرىكەت قىلىشىنى كۈتۈشنىڭ مۇھىملىقىنى ئۇنتۇماڭ!
كۈتۈشكە تەييار بولغانلار ئۈچۈن چەكسىز بەرىكەتلەر
17. يەشايا 30:18-ئايەتتە، يەھۋا بىزگە نېمىنى ۋەدە قىلىدۇ؟
17 پات-يېقىندا ئاسماندىكى ئاتىمىز بىزنى ئۆز پادىشاھلىقى ئارقىلىق مول بەرىكەتلەرگە ئېرىشتۈرىدۇ. يەشايا مۇنداق بېشارەت قىلغان: «يەھۋا سىلەرگە ئىلتىپات كۆرسىتىشنى سەۋر-تاقەت بىلەن كۈتۈۋاتىدۇ، ئۇ سىلەرگە رەھىم-شەپقەت كۆرسىتىش ئۈچۈن ئورنىدىن تۇرىدۇ. چۈنكى يەھۋا ئادالەتلىك خۇدادۇر. ئۇنى ئىنتىزارلىق بىلەن كۈتۈۋاتقانلارنىڭ ھەممىسى بەختلىكتۇر» (يەشايا 30:18). يەھۋانى ئۈمىد بىلەن كۈتۈۋاتقانلار ھازىر ۋە كېلەچەكتىمۇ چەكسىز بەرىكەتلەرگە ئېرىشىدۇ.
18. بىزنى قانداق بەرىكەتلەر كۈتۈۋاتىدۇ؟
18 خۇدا خەلقى يېڭى دۇنياغا قەدەم باسقاندا، ئۇلار يەنە بۈگۈنكى كۈندە دۇچ كېلىۋاتقان غەم-ئەندىشىلەر ۋە قىيىنچىلىقلارغا قايتا دۇچ كەلمەيدۇ. ناھەقچىلىك ئەمدى باشقا بولمايدۇ (ۋەھىي. 21:4). يەر يۈزىدە مولچىلىق بولغانلىقتىن، نېمە يەيمىز دەپ ئەندىشە قىلمايمىز (زەبۇر72:16؛ يەشايا 54:13). بىزنى ئاجايىپ بەرىكەتلەر كۈتمەكتە!
19. يەھۋا ھازىر بىزنى نېمىگە تەييارلاۋاتىدۇ؟
19 يەھۋا ھازىر بىزنىڭ ھەرتۈرلۈك يامان ئادەتلەرنى تاشلاپ، ئۇنى خۇرسەن قىلىدىغان پەزىلەتلەرنى يېتىلدۈرۈشىمىزگە ياردەم بېرىش ئارقىلىق، بىزنى يېڭى دۇنيادا ياشاشقا تەييارلاۋاتىدۇ. سىز ھەرگىزمۇ ئۈمىدسىزلىنىپ، بەل قويۇۋەتمەڭ، چۈنكى ئالدىمىزدا ئەڭ گۈزەل كېلەچەك كۈتۈۋاتىدۇ! شۇڭا، يەھۋا ئۆز ئىرادىسىنى پۈتۈنلەي ئەمەلگە ئاشۇرغىچە، سەۋر-تاقەت بىلەن داۋاملىق ئۇنى كۈتەيلى!
54-ناخشا ئىماندا چىڭ تۇرايلى!
a يەھۋاغا ئۇزۇن ۋاقىت خىزمەت قىلىۋاتقان بىرىنىڭ: «بۇ رەزىل دۇنيانىڭ شۇنچە ئۇزۇن داۋام قېلىشىنى ھېچقاچان كۈتمىگەن ئىدىم»،— دېگەنلىكىنى ئاڭلىغانمۇ؟ ئەلۋەتتە، ھەممىمىز يەھۋانىڭ تېزراق بۇ رەزىل دۇنيانى يوق قىلىشىنى كۆرۈشكە بەك تەشنا. ئەمما، بىز چوقۇم سەۋر-تاقەتلىك بولۇشنى ئۆگىنىشىمىز كېرەك. ھازىر يەھۋانىڭ ھەرىكەت قىلىدىغان كۈنىنى كۈتۈشنى ئۆگىنىشكە ياردەم بېرىدىغان مۇقەددەس كىتاب پرىنسىپلىرىنى كۆرۈپ چىقىمىز. بىز يەنە قايسى ئىككى ساھەدە يەھۋانى سەۋرچانلىق بىلەن كۈتىشىمىز كېرەكلىكىنى مۇھاكىمە قىلىمىز. ئاخىرىدا، كۈتۈشكە تەييار بولغانلار قانداق بەرىكەتلەرگە ئېرىشىدىغانلىقىنى كۆرىمىز.
b سۈرەتتە: بالىلىق چېغىدىن تارتىپ، بىر قېرىنداش يەھۋاغا داۋاملىق دۇئا قىلىپ كېلىۋاتىدۇ. ئۇ كىچىك چېغىدا، ئاتا-ئانىسى ئۇنىڭغا قانداق دۇئا قىلىش كېرەكلىكىنى ئۆگەتكەن. ئۇ ئۆسمۈرلۈك چېغىدا، پىدائىي ۋەز ئېيتقۇچى بولۇپ خىزمەت قىلىشنى باشلىغان ۋە يەھۋادىن دائىم ئۆز خىزمىتىنى بەرىكەتلىشىنى سورىغان. نۇرغۇن يىللاردىن كېيىن، ئۇنىڭ يولدىشى ئاغرىپ قالغاندا، بۇ سىناققا بەرداشلىق بېرىش ئۈچۈن يەھۋادىن كۈچ سوراۋاتىدۇ. ئۇ بۈگۈنكى كۈندە بىر تۇل ئايال ۋە دۇئا قىلىشنى داۋاملاشتۇرىۋاتىدۇ. ھازىرغىچە ئاسماندىكى ئاتىسى ئۇنىڭ دۇئالىرىغا جاۋاب بېرىپ كەلگەچ، ئۇ دۇئالىرىنىڭ جاۋابسىز قالمايدىغانلىقىغا ئىشىنىدۇ.
