33-تەتقىق ماقالىسى
يەھۋا ئۆز خەلقىگە نەزەر سالىدۇ
«مانا، يەھۋانىڭ كۆزى ئۆزىدىن قورققانلارغا... تىكىلگەندۇر».—زەبۇر 33:18.
22-ناخشا يەھۋا مېنىڭ پادىچىمدۇر
بۇ ماقالىدە a
1. نېمە ئۈچۈن ئەيسا يەھۋادىن ئۆز ئەگەشكۈچىلىرىگە غەمخورلۇق قىلىشنى سورىغان؟
ئۆلۈپ كېتىشتىن ئاۋۋالقى كېچىسى، ئەيسا ئاسماندىكى ئاتىسىغا دۇئا قىلىپ، ئۆز ئەگەشكۈچىلىرىنى قوغداشنى تىلىگەن (يۇھاننا 17:15، 20). ئەلۋەتتە، يەھۋا ھەردائىم ئۆز خەلقىگە نەزەر سېلىپ، ئۇلارغا غەمخورلۇق قىلغان ۋە قوغدىغان. بىراق، ئەيسا ئۆز ئەگەشكۈچىلىرىنىڭ شەيتاننىڭ دەھشەتلىك قارشىلىقىغا دۇچ كېلىدىغانلىقىنى بىلەتتى. ئۇ ئۇلارنىڭ ئىبلىسنىڭ ۋەھشىي ھۇجۇملىرىغا قارشى تۇرۇش ئۈچۈن، يەھۋانىڭ ياردىمىگە مۇھتاج بولغانلىقىنىمۇ بىلەتتى.
2. زەبۇر 33:18–20-ئايەتلەرگە ئاساسلانغاندا، نېمە ئۈچۈن قارشىلىقلاردىن قورقماسلىقىمىز كېرەك؟
2 شەيتاننىڭ قول ئاستىدىكى بۇ دۇنيا بۈگۈنكى كۈندە ھەقىقىي مەسىھ ئەگەشكۈچىلىرىگە كۈچلۈك بېسىم قىلىۋاتىدۇ. بىز كىشىنى ئۈمىدسىزلەندۈرىدىغان، ھەتتا يەھۋاغا بولغان ساداقەتمەنلىكىمىزنى سىنايدىغان قىيىنچىلىقلارغا دۇچ كېلىۋاتىمىز. بىراق، بۇ ماقالىدە قورقۇشىمىزنىڭ ھاجىتى يوقلىقى ھەققىدە مۇھاكىمە قىلىمىز. يەھۋا بىزگە نەزەر سېلىۋاتىدۇ. ئۇ بىز دۇچ كېلىۋاتقان قارشىلىقلارنى كۆرىدۇ ۋە ئۇلارغا تاقابىل تۇرۇشىمىز ئۈچۈن ياردەم بېرىشكە ھەر ۋاقىت تەييار. يەھۋا خۇدانىڭ كۆزى ئۇنىڭدىن قورقىدىغانلارغا تىكىلگەنلىكىنى كۆرسىتىپ بېرىدىغان مۇقەددەس كىتابتىكى ئىككى مىسالنى كۆرۈپ چىقايلى.—زەبۇر 33:18–20-نى ئوقۇڭ.
ئۆزىڭىزنى يالغۇز ھېس قىلغاندا
3. قاچان ئۆزىمىزنى يالغۇز ھېس قىلىشىمىز مۇمكىن؟
3 گەرچە جامائەتتە نۇرغۇنلىغان ئېتىقادچى قېرىنداشلىرىمىز بولسىمۇ، بەزىدە ئۆزىمىزنى يالغۇز ھېس قىلىشىمىز مۇمكىن. مەسىلەن، ياشلار مەكتەپتىكى ساۋاقداشلىرى ئالدىدا ئۆز ئىمان-ئېتىقادىنى چۈشەندۈرگەندە ياكى يېڭى جامائەتكە كۆچۈپ بارغاندا، شۇنداق يالغۇزلۇق ھېس قىلىدۇ. ئارىمىزدىكى بەزىلىرىمىزنىڭ كۆڭلى يېرىم بولۇپ، سەلبىي ھېس-تۇيغۇلار بىلەن بىزلا كۈرەش قىلىۋاتىمىز دەپ ئويلىشىمىز مۇمكىن. باشقىلارنىڭ بىزنى چۈشەنمەسلىكىدىن ئەنسىرەپ، ئۇلارغا ئۆز ھېس-تۇيغۇلىرىمىز ھەققىدە ئېيتىپ بەرمەسلىكىمىز مۇمكىن. بەزى چاغلاردا، ئۇلار ماڭا كۆڭۈل بۆلىدىغان ھېچكىم يوق دەپ ئويلىشى مۇمكىن. يالغۇزلۇق ھېس قىلىشنىڭ سەۋەبى قانداق بولۇشتىن قەتئىينەزەر، بۇ بىزنى ياردەمسىز ھېس قىلدۇرۇپ، غەم-تەشۋىشكە چۈشۈرىدۇ. يەھۋا بىزنىڭ ئۆزىمىزنى يالغۇز ھېس قىلىشىمىزنى ھەرگىز خالىمايدۇ. بۇنى نەدىن بىلىمىز؟
4. نېمە ئۈچۈن ئىلياس پەيغەمبەر «مەنلا يالغۇز قالدىم» دېگەن؟
4 ساداقەتمەن كىشى ئىلياسنىڭ مىسالىنى كۆرۈپ باقايلى. ئىزابېل ئۇنى ئۆلتۈرىدىغانلىقىنى قەسەم قىلغاچ، ئىلياس ئۆز جېنىنى ساقلاپ قېلىش ئۈچۈن قىرىق كۈن قېچىپ يۈرگەن ئىدى (1-پادىشاھ. 19:1–9). ئاخىرىدا، ئۇ بىر تاغ ئۆڭكۈرىدە يەھۋاغا شۇنداق دېگەن: «يالغۇز مەنلا قالدىم» (1-پادىشاھ. 19:10). ئۇ يەردە باشقا پەيغەمبەرلەرمۇ بار ئىدى. ئوبادىيا يۈز پەيغەمبەرنى قانخور ئىزابېلنىڭ قولىدىن قۇتقۇزغان (1-پادىشاھ. 18:7، 13). ئۇنداقتا، ئىلياس ئۆزىنى نېمە ئۈچۈن يالغۇز ھېس قىلغان؟ ئاشۇ قۇتقۇزۇلغان پەيغەمبەرلەرنىڭ ھەممىسىنى ئۆلدى دەپ ئويلىغانمۇ؟ كارمىل تېغىدا يەھۋا ئۆزىنىڭ ھەق خۇدا ئىكەنلىكىنى ئىسپاتلىغاندىن كېيىن، ئۇ ھېچكىم ئۆزى بىلەن بىرلىكتە يەھۋاغا ئىبادەت قىلمايدۇ دەپ ئويلىغانمۇ؟ ھېچكىم دۈشمەنلىرىمنىڭ مېنى ئۆلتۈرۈشكە ھەرىكەت قىلىۋاتقانلىقىنى بىلمەيدۇ ۋە ماڭا كۆڭۈل بۆلىدىغان ئادەم يوق دەپ ئويلىغانمۇ؟ مۇقەددەس كىتابتىكى ئۈزۈندىلەر ئىلياسنىڭ ھېس-تۇيغۇلىرى ھەققىدە تولۇق چۈشەندۈرمىگەن. ئەمما، شۇنى ئېنىق بىلىمىزكى، يەھۋا ئىلياسنىڭ نېمە ئۈچۈن يالغۇزلۇق ھېس قىلغانلىقىنى ۋە ئۇنىڭغا قانداق ياردەم بېرىشنى ئېنىق بىلگەن.
يالغۇزلۇق ھېس قىلغىنىمىزدا، يەھۋانىڭ ئىلياسقا قىلغان ياردىمىدىن قانداق تەسەللىگە ئىگە بولالايمىز؟ (5، 6-ئابزاسلارغا قاراڭ)
5. يەھۋا ئىلياسنىڭ ئۆزىنىڭ يالغۇز ئەمەسلىكىگە قانداق ئىشەندۈرگەن؟
5 يەھۋا ئىلياسقا بىرقانچە قېتىم ياردەم قىلغان. ئۇ ئۇنى ئۆز ھېس-تۇيغۇلىرىنى ئىپادىلەشكە دەۋەت قىلىپ، ئۇنىڭدىن ئىككى قېتىم مۇنداق سورىغان: «ئەي ئىلياس، بۇ يەردە نېمە قىلىپ يۈرۈيسەن؟» (1-پادىشاھ. 19:9، 13). ھەر قېتىم ئىلياس ئىچ باغرىنى تۆككەندە، يەھۋا ئۇنىڭ سۆزلىرىگە قۇلاق سالغان. ئۇ ئىلياسنىڭ يېنىدا تۇرۇپ، ئۆز كۈچ-قۇدرىتىنى ئاشكارىلاپ، ئۇنىڭغا جاۋاب قايتۇرغان. ئۇ يەنە ئىلياسنى ئۇنىڭغا ئوخشاش ئىبادەت قىلغۇچىلارنىڭ بارلىقىغا ئىشەندۈرگەن (1-پادىشاھ. 19:11، 12، 18). شەك-شۈبھىسىزكى، ئىلياس ئىچ باغرىنى يەھۋاغا تۆكۈپ، ئۇنىڭدىن جاۋاب ئالغاندىن كېيىن ئۆزىنى يېنىك ھېس قىلغان. يەھۋا ئىلياسقا بىرقانچە مۇھىم ۋەزىپىنى تاپشۇرغان. ئۇنىڭغا ھازائېلنى سۈرىيە پادىشاھى، يەھۇنى ئىسرائىل پادىشاھى، ئېلىشانى پەيغەمبەر سۈپىتىدە مەسىھ قىلىشنى ئېيتقان (1-پادىشاھ. 19:15، 16). ئىلياسقا بۇ ۋەزىپىلەرنى تاپشۇرۇش ئارقىلىق، يەھۋا ئۇنىڭ ئىجابىي ئىشلارغا دىققەت ئاغدۇرۇشىغا ياردەم بەرگەن. خۇدا ئۇنىڭغا يەنە ئېلىشا پەيغەمبەرنى ياردەمچى قىلىپ بەرگەن. سىز ئۆزىڭىزنى يالغۇز ھېس قىلغاندا، يەھۋانىڭ ياردىمىگە قانداق ئېرىشەلەيسىز؟
6. يالغۇزلۇق ھېس قىلغان چاغدا نېمىلەر توغرىسىدا دۇئا قىلسىڭىز بولىدۇ؟ (زەبۇر 62:8)
6 يەھۋا سىزنى ئۆزىگە دۇئا قىلىشقا دەۋەت قىلىدۇ. ئۇ سىزنىڭ نېمە قىلىۋاتقانلىقىڭىزنى كۆرۈپ تۇرىدۇ ۋە ھەرقاچان دۇئالىرىڭىزغا قۇلاق سالىدىغانلىقىغا كاپالەت بېرىدۇ (1-سالونىكا. 5:17). ئۇ خۇشاللىق بىلەن ئۆز خىزمەتچىلىرىنىڭ دۇئالىرىغا قۇلاق سالىدۇ (پەند. نە 15:8). يالغۇزلۇق ھېس قىلغان چاغلىرىڭىزدا، ئىلياس پەيغەمبەرگە ئوخشاش ئىچ باغرىڭىزنى يەھۋاغا تۆكۈپ بېرىڭ (زەبۇر 62:8-نى ئوقۇڭ). ئۇنىڭغا غەم-ئەندىشىلىرىڭىزنى ۋە ھېس-تۇيغۇلىرىڭىزنى ئېيتىپ بېرىڭ. ئۆزىڭىزنى يالغۇز ياكى بىئارام ھېس قىلغاندا، نېمە قىلىشىڭىزنى بىلىش ئۈچۈن يەھۋادىن ياردەم سوراڭ. مەسىلەن، مەكتەپتە گۇۋاھلىق بەرگەندە يالغۇز ياكى قورقۇنچ ھېس قىلسىڭىز، يەھۋادىن كۆزقاراشلىرىڭىزنى ئىپادىلەش ئۈچۈن جاسارەت بېرىشنى ئۆتۈنۈڭ. ھەتتا ئۇنىڭدىن ئىمان-ئېتىقادىڭىزنى پەم-پاراسەت بىلەن چۈشەندۈرۈش ئۈچۈن دانالىق سورىسىڭىز بولىدۇ (لۇقا 21:14، 15). ئەگەر ئۆزىڭىزنى چۈشكۈنلۈككە چۈشكەندەك ھېس قىلسىڭىز، يەھۋادىن ئېتىقادتا پىشىپ يېتىلگەن قېرىنداشلارغا ئۆز ھېس-تۇيغۇلىرىڭىزنى ئېيتىپ بېرىشىڭىزگە ياردەم قىلىشنى ئۆتۈنۈڭ. سىز بىلەن مۇڭداشقان قېرىنداشنىڭ سىزنى چۈشىنىشىگە ياردەم قىلىشنى سورىسىڭىز بولىدۇ. يەنە يەھۋاغا يۈرەك سۆزلىرىڭىزنى ئېيتىپ، ئۇنىڭ سىزگە قانداق جاۋاب قايتۇرغانلىقىغا دىققەت قىلىڭ ۋە باشقىلارنىڭ ياردىمىنى قوبۇل قىلىڭ. شۇنداق بولغاندا، ئۆزىڭىزنى ئۇنچە بەك يالغۇز ھېس قىلمايسىز.
كۆپرەك ۋەز قىلىشنىڭ يوللىرىنى ئىزدەپ، ئۇلارنى باشقىلارغا ئېيتىپ بېرىۋاتامسىز؟ (7-ئابزاسقا قاراڭ)
7. مارېسىئونىڭ مىسالىدىن نېمىلەرنى ئۆگەندىڭىز؟
7 يەھۋا ھەممىمىزگە ئىنتايىن ئەھمىيەتلىك خىزمەتنى تاپشۇرغان. شۇنىڭغا ئىشىنىڭكى، ئۇ جامائەتتە تاپشۇرۇلغان بارلىق ئىشلارنى ئورۇنلاش ئۈچۈن كۆرسەتكەن تىرىشچانلىقىڭىزغا نەزەر سالىدۇ ۋە ئۇنى قەدىرلەيدۇ (زەبۇر 110:3). ئۆزىڭىزنى يالغۇز ھېس قىلغاندا، سىزگە تاپشۇرۇلغان خىزمەت بىلەن ئالدىراش بولۇش سىزگە قانداق ياردەم بېرەلەيدۇ؟ مارېسىئو b ئىسىملىك بىر بۇرادەرنىڭ مىسالىنى كۆرۈپ باقايلى. مارېسىئو چۆمۈلدۈرۈلۈپ كۆپ ۋاقىت ئۆتمەي، يېقىن دوستلىرىنىڭ بىرى ئاستا-ئاستا ھەقىقەتتىن يىراقلىشىپ كەتكەن. ئۇ مۇنداق دەيدۇ:«مەن دوستىمنىڭ يەھۋانى تاشلاپ كەتكەنلىكىنى كۆرگەندە، ئۆزۈمگە بولغان ئىشەنچىمنى يوقاتتىم. مەن ئۆزۈمنى بېغىشلىغاندا بەرگەن ۋەدەمگە سادىق بولۇپ، يەھۋانىڭ ئائىلىسىدىن ئايرىلماي قالالايمەنمۇ دەپ ئەنسىرىدىم. مەن ئۆزۈمنى يالغۇز ھېس قىلدىم ۋە مېنىڭ ھېس-تۇيغۇلىرىمنى ھېچكىم چۈشەنمەيدۇ دەپ ئويلىدىم». مارېسىئوغا نېمە ياردەم بەرگەن؟ ئۇ شۇنداق دەيدۇ: «كۆپرەك ۋەز خىزمەتكە قاتناشتىم. بۇ ئۆزۈم ھەققىدە ئويلاشنى توختىتىپ، سەلبىي ئوي-پىكىرلەر ۋە ھېس-تۇيغۇلارنى يېڭىشىمغا ياردەم بەردى. ۋەز خىزمەتتە باشقىلار بىلەن خىزمەت قىلغاندا، خۇشاللىق تاپىمەن ۋە ئۆزۈمنى ئىلگىرىكىدەك يالغۇز ھېس قىلمايمەن. ئەلۋەتتە، ھازىر قېرىنداشلار بىلەن بىرلىكتە ئۆيمۇ-ئۆي ۋەز قىلالمايمىز. ئەمما، ئۇلار بىلەن بىللە خەت يېزىش ۋە تېلېفون قىلىش ئارقىلىق گۇۋاھلىق بېرىپ، بىر-بىرىمىزگە ئىلھام-مەدەت بېرەلەيمىز». مارېسىئوغا يەنە نېمە ياردەم قىلغان؟ ئۇ يەنە مۇنداق دەيدۇ: «جامائەتتە بېرىلگەن تاپشۇرۇقلارغا پۈتۈن كۈچۈم بىلەن تەييارلىق قىلىشقا تىرىشتىم. بۇ تاپشۇرۇقلار يەھۋا ۋە قېرىنداشلارنىڭ مېنى قەدىرلەيدىغانلىقىنى ھېس قىلدۇردى».
ئېغىر سىناقلارغا دۇچ كېلىپ ئۈمىدسىزلەنگەندە
8. ئېغىر سىناقلارغا دۇچ كەلگەندە، ئۆزىمىزنى قانداق ھېس قىلىمىز؟
8 بىز بۇ ئاخىرقى كۈنلەردە سىناقلارغا دۇچ كېلىدىغانلىقىمىزنى بىلىمىز (2-تىموت. 3:1). شۇنداقتىمۇ، بەزى سىناقلارغا دۇچ كەلگەن چاغدا ھەيران قېلىشىمىز مۇمكىن. بەلكىم، تۇيۇقسىز تۈرلۈك سىناقلارغا دۇچ كېلىمىز. مەسىلەن، ئىقتىسادىي قىيىنچىلىققا ياكى ئېغىر كېسەلگە دۇچار بولۇشىمىز، يېقىنلىرىمىزدىن ئايرىلىپ قېلىشىمىز مۇمكىن. ئۇنداق چاغلاردا، يەنى ئارقا-ئارقىدىن بىرقانچە سىناقلارغا دۇچ كەلسەك، ھەتتا بىرنەچچە سىناقلارغا بىرلا ۋاقىتتا دۇچ كەلسەك، ئۆزىمىزنى ئۈمىدسىز ۋە چۈشكۈن ھېس قىلىشىمىز مۇمكىن. ئېسىڭىزدە بولسۇنكى، يەھۋا بېشىمىزدىن ئۆتكۈزىۋاتقان ئىشلارنى كۆرۈپ تۇرىدۇ ۋە ئۇنىڭ ياردىمىدە ھەرقانداق سىناقلارغا ئىشەنچ بىلەن تاقابىل تۇرالايمىز.
9. ئايۇپ دۇچ كەلگەن بەزى سىناقلارنى تەسۋىرلەپ بېرىڭ.
9 يەھۋانىڭ ساداقەتمەن كىشى ئايۇپقا قانداق ياردەم بەرگەنلىكىنى كۆرۈپ باقايلى. ئۇ قىسقا ۋاقىتنىڭ ئىچىدە بىرقانچە ئازابلىق سىناقلارنى بېشىدىن ئۆتكۈزگەن. بىر كۈننىڭ ئىچىدە، ئايۇپ بارلىق مال-چارۋىلىرى، خىزمەتكارلىرى ۋە تېخىمۇ قايغۇلۇق يېرى، ھەممىلا سۆيۈملۈك بالىلىرىدىن ئايرىلىپ قالغانىدى (ئايۇپ 1:13–19). ئايۇپ قايغۇ-ئەلەم چېكىۋاتقان شۇ پەيتلەردە، يەنە ئېغىر كېسەلگە دۇچار بولغان (ئايۇپ 2:7). ئۇنىڭ ئەھۋالى ئىنتايىن يامان بولغاچ، ئايۇپ شۇنداق دېگەن: «مەن بۇ جاندىن تويدۇم، داۋاملىق ياشاشنى خالىمايمەن».—ئايۇپ 7:16.
يەھۋا ئۆزى ياراتقان مەۋجۇداتلاردىن قانداق خەۋەر ئالىدىغانلىقىنى ئېيتىپ، ئايۇپنى ئۇنى ياخشى كۆرىدىغانلىقىغا ۋە ئۇنىڭغا غەمخورلۇق قىلىدىغانلىقىغا ئىشەندۈرمەكچى بولغان (10-ئابزاسىغا قاراڭ)
10. يەھۋا ئايۇپنىڭ سىناقلارغا بەرداشلىق بېرىشىگە قانداق ياردەم بەرگەن؟ (رەسىمگە قاراڭ.)
10 يەھۋا ئايۇپنىڭ قانداق ئىشلارنى باشتىن كەچۈرۈۋاتقانلىقىغا نەزەر سالغان. ئۇ ئايۇپنى ياخشى كۆرگەچ، سىناقلاردا ساداقەتمەنلىكىنى ساقلىشىغا ياردەم بەرگەن ئىدى. يەھۋا ئايۇپقا سۆز قىلىپ، ئۇنىڭغا چەكسىز دانالىقى ۋە ياراتقان مەۋجۇداتلىرىغا بولغان غەمخورلۇقىنى ئەسلىتىپ ئۆتكەن. ئۇ نۇرغۇنلىغان ھايۋاناتلارنىڭ كىشىنى ھەيران قالدۇرىدىغان قابىلىيەتلىرىنى تىلغا ئالغان (ئايۇپ 38:1، 2؛ 39:9، 13، 19، 27؛ 40:15؛ 41:1، 2). يەھۋا يەنە ساداقەتمەن كىشى ئېلىخۇنى ئىشلىتىپ، ئايۇپقا كۈچ-مەدەت ۋە تەسەللى بەرگەن. ئېلىخۇ ئايۇپنى، يەھۋانىڭ ھەرقاچان ئۆزىگە ساداقەتمەنلىك بىلەن ئىبادەت قىلغان خىزمەتچىلەرنى مۇكاپاتلايدىغانلىقىغا ئىشەندۈردى. ئۇنىڭدىن باشقا، يەھۋا يەنە ئېلىخۇ ئارقىلىق مېھىر-مۇھەببەت بىلەن ئايۇپقا نەسىھەت بەرگەن. پۈتكۈل كائىناتنىڭ ياراتقۇچىسى يەھۋانىڭ نەقەدەر ئۇلۇغلۇقىنى ئايۇپقا ئەسلىتىش ئارقىلىق، ئۇنىڭ دىققىتىنى ئۆزىگە قارىتىشنى توختىتىشىغا ياردەم بەرگەن (ئايۇپ 37:14). يەھۋا يەنە ئايۇپقا، گۇناھ ئۆتكۈزگەن ئۈچ دوستى ئۈچۈن دۇئا قىلىش ۋەزىپىسىنى تاپشۇرغان. (ئايۇپ 42:8–10). بۈگۈنكى كۈندە ئېغىر سىناقلارغا دۇچ كەلگەندە، يەھۋا بىزنى قانداق قوللاپ قۇۋۋەتلەيدۇ؟
11. سىناقلارنى باشتىن كەچۈرگىنىمىزدە، مۇقەددەس كىتاب بىزگە قانداق ياردەم بېرىدۇ؟
11 يەھۋا بىزگە ئايۇپقا ئوخشاش بىۋاسىتە سۆزلىمەيدۇ. ئەمما، ئۇ مۇقەددەس كىتاب ئارقىلىق بىزگە سۆز قىلىدۇ (رىملىقلار 15:4). ئۇ بىزگە كەلگۈسى ئۈمىدنى بېرىپ، كۆڭلىمىزنى تەسەللى تاپقۇزىدۇ. سىناقلارنى باشتىن ئۆتكۈزگەندە، بىزگە تەسەللى بېرەلەيدىغان مۇقەددەس كىتابتىكى بىرقانچە ئوي-پىكىرلەرنى مۇھاكىمە قىلايلى. مۇقەددەس يازمىلاردا يەھۋا بىزگە شۇنداق كاپالەت بەرگەنكى، ھېچنەرسە، ھەتتا ئېغىر سىناقلارمۇ، بىزنى ئۇنىڭ سۆيگۈ-مۇھەببىتىدىن ئايرىيالمايدۇ (رىملىقلار 8:38، 39). ئۇ يەنە بىزنى دۇئادا چىن دىلىدىن ئۇنىڭغا يالۋۇرغانلارغا يېقىن ئىكەنلىكىگە ئىشەندۈرىدۇ (زەبۇر 145:18). يەھۋا ئۇنىڭغا تايانساق، ھەرقانداق سىناقلارغا بەرداشلىق بېرەلەيدىغانلىقىمىزنى، ھەتتا خۇشاللىق تاپىدىغانلىقىمىزنى ئېيتىدۇ (1-كورىنت. 10:13؛ ياقۇپ 1:2، 12). خۇدا سۆزى بىزگە، كېلەچەكتە ئۇنىڭ ئاتا قىلىدىغان بەرىكەتلىرى بىلەن سېلىشتۇرغاندا، ھازىرقى سىناقلىرىمىزنىڭ ۋاقىتلىق ئىكەنلىكىنى ئەسكەرتىدۇ (2-كورىنت. 4:16–18). يەھۋا بىزگە بارلىق سىناقلىرىمىزنىڭ يىلتىزى بولغان ئىبلىس شەيتان ۋە ئۇنىڭغا ئەگەشكەن رەزىل كىشىلەرنى چوقۇم يوق قىلىدىغىنى ۋەدە قىلغان (زەبۇر 37:10). بۈگۈنكى سىناقلارغا بەرداشلىق بېرىشكە ياردەم بېرىدىغان مۇقەددەس كىتابتىكى ئۈزۈندىلەرنى يادقا ئېلىۋالدىڭىزمۇ؟
12. يەھۋا بىزنى نېمە ئىش قىلىشقا دەۋەت قىلىدۇ ۋە شۇنداق قىلساق، ئۇنىڭ بىز ئۈچۈن قانداق پايدىسى بار؟
12 يەھۋا بىزنى مۇقەددەس يازمىلارنى تەتقىق قىلىپ ئۆگىنىشكە ۋە ئوقۇغانلىرىمىز ئۈستىدە چوڭقۇر ئويلىنىش ئۈچۈن ۋاقىت ئاجرىتىشقا دەۋەت قىلىدۇ. ئۆگەنگەنلىرىمىزنى ھاياتىمىزدا ئەمەلىي قوللانساق، ئىمان-ئېتىقادىمىز تېخىمۇ كۈچىيىدۇ ۋە ئاسماندىكى ئاتىمىزغا تېخىمۇ يېقىنلىشىمىز. نەتىجىدە، سىناقلارغا بەرداشلىق بېرەلىگۈدەك كۈچىمىز بولىدۇ. يەھۋا يەنە ئۆز سۆزىگە تايانغانلارغا مۇقەددەس روھىنى بېرىدۇ. بۇ روھ بىزنىڭ ھەرقانداق سىناقلارغا بەرداشلىق بېرىشىمىز ئۈچۈن ئادەتتىن تاشقىرى كۈچىنى ئاتا قىلىدۇ.—2-كورىنت. 4:7–10.
13. سادىق ۋە ئەقىل-پاراسەتلىك قۇل تەمىنلىگەن ئوزۇقلۇقلار سىناقلاردا بەرداشلىق بېرىشىمىزگە قانداق ياردەم بېرىدۇ؟
13 يەھۋانىڭ قولى بىلەن پاراسەتلىك قۇل تەييارلىغان كۆپلىگەن ماقالىلەر، فىلىملەر، مۇزىكىلار ئىمان-ئېتىقادىمىزنى كۈچەيتىشكە ۋە روھىي جەھەتتىن سەگەك تۇرۇشىمىزغا ياردەم بېرىدۇ (مەتتا 24:45). يەھۋا دەل ۋاقتىدا تەمىنلەپ بېرىۋاتقان روھىي ئوزۇقلۇقلاردىن ياخشى پايدىلىنىشىمىز كېرەك. ئامېرىكىدىكى بىر قېرىنداش روھىي ئوزۇقلۇق ئۈچۈن ئۆز مىننەتدارلىقىنى بىلدۈرۈپ مۇنداق دېگەن: «مەن يەھۋاغا خىزمەت قىلغان قىرىق يىل جەريانىدا، يەھۋاغا بولغان ساداقەتمەنلىكىم قايتا-قايتا سىناقلارغا دۇچ كەلدى». ئۇ ئېغىر سىناقلارغا دۇچ كەلگەن ئىدى. ھاراق ئىچىۋالغان شوپۇر قاتناش ۋەقەسى تۇغدۇرۇپ، بوۋىسى ئۆلۈپ كەتكەن، ئاتا-ئانىسى ئېغىر كېسەل بولغان. ئۇ ئۆزى ئىككى قېتىم راك كېسىلى بىلەن كۈرەش قىلغان. ئۇنىڭ شۇنداق ئېغىر سىناقلارغا بەرداشلىق بېرىشىگە نېمە ياردەم بەرگەن؟ ئۇ مۇنداق دەيدۇ: «يەھۋا ماڭا ھەردائىم كۆڭۈل بۆلۈپ كەلدى. ئۇ سادىق ۋە ئەقىل-پاراسەتلىك قۇل ئارقىلىق تەمىنلىگەن روھىي ئوزۇقلۇقلار، مېنىڭ سىناقلارغا بەرداشلىق بېرىشىمگە ياردەم بەردى. شۇ سەۋەبتىن، مەنمۇ ئۆزۈمنى ئايۇپقا ئوخشاش ھېس قىلىمەن».—ئايۇپ 27:5.
جامائەتتە باشقىلارغا قانداق ياردەم بېرەلەيمىز؟ (14-ئابزاسقا قاراڭ)
14. سىناقلارغا دۇچ كەلگىنىمىزدە، يەھۋا ئېتىقادچى قېرىنداشلىرىمىزنى ئىشلىتىپ، بىزنى قانداق قوللاپ-قۇۋۋەتلەيدۇ؟ (1-سالونىكالىقلار 4:9)
14 يەھۋا ئۆز خەلقىنى قىيىن كۈنلەردە بىر-بىرىگە سۆيگۈ-مۇھەببەت كۆرسىتىش ۋە تەسەللى بېرىشكە ئۆگىتىپ كېلىۋاتىدۇ (2-كورىنت. 1:3، 4؛ 1-سالونىكالىقلار 4:9-نى ئوقۇڭ). قېرىنداشلىرىمىز ئېلىخۇنى ئۈلگە قىلىپ، قىيىنچىلىقلارنى باشتىن ئۆتكۈزگىنىمىزدە، ساداقەتمەنلىكىمىزنى ساقلاپ قېلىشىمىزغا ياردەم بېرىشكە ھەرقاچان تەييار تۇرىدۇ (ئەلچى. 14:22). مەسىلەن، دىئاننىڭ يولدىشى ئېغىر كېسەلگە دۇچار بولغاندىن كېيىن، ئۇنىڭ جامائىتىدىكىلەر ئۇنى قانداق ئىلھاملاندۇرغانلىقى ۋە داۋاملىق يەھۋاغا يېقىن ياشىشىغا قانداق ياردەم بەرگەنلىكىنى ئويلاپ كۆرۈڭ. ئۇ مۇنداق دەيدۇ: «بېشىمىزغا ھەقىقەتەن ئېغىر كۈن كەلگەن ئىدى. ئەمما، ئاشۇ قىيىن ئايلاردا، يەھۋانىڭ كۈچلۈك ۋە مېھىر-شەپقەتلىك قولىنى ھېس قىلدۇق. جامائىتىمىز بىزنى قوللاپ-قۇۋۋەتلەش ئۈچۈن نۇرغۇن ئىشلارنى قىلدى. قېرىنداشلار بىزنى يوقلاپ تۇردى، تېلېفون قىلدى، قۇچاقلاپ تەسەللى بەردى. مەن ماشىنا ھەيدىمىگەچ، ئۇلار مېنىڭ يىغىلىشلارغا بارالىشىمغا ۋە ئىمكانىيىتىم بولغاندا ۋەز خىزمەتكە چىقالىشىمغا كاپالەتلىك قىلدى. قېرىنداشلارنىڭ كۆرسەتكەن سۆيگۈ-مۇھەببىتى شۇ ئېغىر كۈنلەردە بەرداشلىق بېرىشىمىزگە ياردەم بەردى». بۇنداق مېھىر-مۇھەببەتكە تولغان روھىي ئائىلىنىڭ ئەزاسى بولۇش ھەقىقەتەن كىشىنى ئىنتايىن خۇشال قىلىدۇ!
يەھۋانىڭ غەمخورلۇقى ئۈچۈن مىننەتدار بولۇڭ
15. نېمە ئۈچۈن قىيىنچىلىققا تاقابىل تۇرالايدىغانلىقىمىزغا ئىشىنىمىز؟
15 ھەممىمىز مۇنداق ياكى ئۇنداق سىناققا دۇچ كېلىمىز. بىراق، ئۆگىنىپ ئۆتكەندەك، بىز سىناققا دۇچ كەلگەندە، ھەرگىزمۇ يالغۇز ئەمەس. خۇددى كۆيۈمچان ئاتىغا ئوخشاش، يەھۋا ھەردائىم بىزگە نەزەر سالىدۇ ۋە يېنىمىزدا تۇرۇپ، ياردەم سوراپ قىلغان دۇئالىرىمىزغا قۇلاق سېلىشقا ۋە بىزنى قوللاپ-قۇۋۋەتلەشكە ھەرقاچان تەييار تۇرىدۇ (يەشايا 43:2). قىيىنچىلىققا تاقابىل تۇرالايدىغانلىقىمىزغا ئىشىنىمىز. چۈنكى، ئۇ بەرداشلىق بېرەلىشىمىز ئۈچۈن، بىز مۇھتاج بولىدىغان بارلىق نەرسىلەرنى سېخىيلىق بىلەن تەمىنلەپ بېرىۋاتىدۇ. ئۇ بىزگە دۇئا قىلىش سوۋغىسىنى، مۇقەددەس كىتابنى، مول روھىي ئوزۇقلۇقلارنى ۋە مۇھتاجلىقتا قالغان چاغلاردا ياردەم قولىنى سۇنىدىغان سۆيگۈ-مۇھەببەتكە تولغان قېرىنداشلارنى بەرگەن.
16. مېھىر-شەپقەتلىك خۇدايىمىزنىڭ قانىتى ئاستىدا ياشاش ئۈچۈن، نېمە قىلىشىمىز كېرەك؟
16 بىزگە نەزەر سېلىپ، غەمخورلۇق قىلىدىغان ئاسماندىكى ئاتىمىز ئۈچۈن ئىنتايىن مىننەتدارمىز! «يۈرىكىمىز شادلىققا تولار!» (زەبۇر 33:21). يەھۋا تەمىنلەپ بېرىۋاتقان بارلىق نەرسىلەردىن پايدىلىنىش ئارقىلىق، ئۇنىڭ مېھىر-شەپقەت بىلەن كۆرسەتكەن غەمخورلۇقىغا مىننەتدار ئىكەنلىكىمىزنى كۆرسىتەلەيمىز. بىز يەنە خۇدانىڭ قانىتى ئاستىدا ياشاش ئۈچۈن ئۆز مەسئۇلىيىتىمىزنى ئادا قىلىشىمىز كېرەك. باشقىچە ئېيتقاندا، پۈتۈن كۈچىمىز بىلەن يەھۋاغا ئىتائەت قىلىپ، ئۇنىڭ كۆزىدە توغرا بولغان ئىشلارنى قىلىشىمىز لازىم. شۇنداق قىلساق، ياراتقۇچىمىزنىڭ كۆزلىرى مەڭگۈ بىزدە بولىدۇ.—1-پېترۇس 3:12.
51-ناخشا يېپىش چىڭ يەھۋاغا!
a بۈگۈنكى كۈندە دۇچ كېلىۋاتقان قىيىنچىلىقلارغا تاقابىل تۇرۇش ئۈچۈن، بىز يەھۋانىڭ ياردىمىگە مۇھتاج. بۇ ماقالە يەھۋانىڭ ئۆز خەلقىگە نەزەر سېلىپ، ئۇلارغا غەمخورلۇق قىلىدىغانلىقىغا ئىشىنىشكە بىزنى دەۋەت قىلىدۇ. ئۇ ھەربىرىمىز دۇچ كەلگەن قىيىنچىلىقلارغا نەزەر سېلىپ، ئاشۇ قىيىنچىلىقلارنى يېڭىش ئۈچۈن كېرەكلىك ياردەم بىلەن تەمىنلەيدۇ.
b بەزى ئىسىملار ئۆزگەرتىلگەن.
