34-تەتقىق ماقالىسى
«ھەقىقەت يولىدا» مېڭىڭلار
«ھەقىقەت يولىدا مېڭى[ڭلار]».—3-يۇھاننا 4.
28-ناخشا يېڭى ناخشا
بۇ ماقالىدە a
1. نېمە ئۈچۈن يەھۋا گۇۋاھچىسى بولغانلىقىمىز ھەققىدە پاراڭلىشىشنىڭ بىز ئۈچۈن قانداق پايدىسى بار؟
شەك-شۈبھىسىزكى، «سىز ھەقىقەتنى قانداق تونۇدىڭىز؟» دېگەن سوئالغا نۇرغۇن قېتىم جاۋاب بەردىڭىز. چۈنكى، بۇ قېرىنداشلار تونۇشقان ۋاقىتتا بىرىنچى بولۇپ سورايدىغان سوئاللاردىن بىرى. بىز قېرىنداشلىرىمىزنىڭ نېمە ئۈچۈن يەھۋا گۇۋاھچىسى بولۇشنى تاللىغانلىقىنى ئاڭلاشنى ۋە ئۆزىمىزنىڭ ھەقىقەتنى نېمە ئۈچۈن ياخشى كۆرگەنلىكىمىزنى ئېيتىپ بېرىشنى ياخشى كۆرۈمىز (رىملىقلار 1:11). شۇنداق سۆھبەتلەر ھەقىقەتنىڭ نەقەدەر مۇھىملىقىنى ئېسىمىزگە سالىدۇ. بىزنىڭ يەنە «ھەقىقەت يولىدا» مېڭىش ئىرادىمىز تېخىمۇ كۈچىيىدۇ، يەنى يەھۋانى خۇرسەن قىلىپ، خۇشال-خۇرام تۇرمۇش كەچۈرۈش ئۈچۈن داۋاملىق تىرىشىمىز.—3-يۇھاننا 4.
2. بۇ ماقالىدە نېمىلەرنى كۆرۈپ چىقىمىز؟
2 بۇ ماقالىدە، نېمە ئۈچۈن ھەقىقەتنى سۆيىدىغانلىقىمىزنىڭ بەزى سەۋەبلەرنى كۆرۈپ چىقىمىز. ئاندىن كېيىن، بۇ قىممەتلىك سوۋغاتنى ياخشى كۆرىدىغانلىقىمىزنى داۋاملىق كۆرسىتىش ئۈچۈن نېمە قىلالايدىغانلىقىمىزنى كۆرۈمىز. شەك-شۈبھىسىزكى، بۇلارنى كۆرۈپ چىقىش يەھۋانىڭ بىزنى ھەقىقەتكە جەلپ قىلغانلىقىغا بولغان مىننەتدارلىقىمىزنى تېخىمۇ ئاشۇرىدۇ (يۇھاننا 6:44). شۇنداقلا، باشقىلارغا ھەقىقەت توغرىسىدا ئېيتىش ئارزۇ-ئىستىكىمىزنىمۇ كۈچەيتىدۇ.
ھەقىقەتنى نېمە ئۈچۈن سۆيىمىز؟
3. ھەقىقەتنى ياخشى كۆرۈشىمىزدىكى ئەڭ مۇھىم سەۋەب نېمە؟
3 ھەقىقەتنى سۆيۈشىمىز ئۈچۈن نۇرغۇن سەۋەبلەر بار. ئەڭ مۇھىمى، ھەقىقەتنىڭ مەنبەسى بولغان يەھۋا خۇدانى سۆيىمىز. ئۇنىڭ سۆزى بولغان مۇقەددەس كىتاب ئارقىلىق، بىز ئۇنىڭ ئاسمان-زېمىننىڭ ھەممىگە قادىر ياراتقۇچىسى ئىكەنلىكىنىلا ئەمەس، بەلكى مېھىر-شەپقەتلىك ئاسماندىكى ئاتىمىز ئىكەنلىكىنى ۋە بىزگە غەمخورلۇق قىلىدىغانلىقىنى بىلدۇق (1-پېتر. 5:7). بىز بىلىمىزكى، خۇدايىمىز «مېھرىبان ۋە رەھىمدىل، ئاسانلىقچە غەزەپلەنمەيدىغان، سادىق مېھىر-مۇھەببىتى ۋە ھەقىقىتى مول خۇدادۇر» (چىق. 34:6). يەھۋا ئادالەتنى سۆيىدۇ (يەشايا 61:8). ئازاب-ئوقۇبەت چېكىۋاتقانلىقىمىزنى كۆرگەندە، ئۇنىڭ كۆڭلى ئىنتايىن يېرىم بولىدۇ، شۇڭلاشقا ئۇ بارلىق ئازاب-ئوقۇبەتلەرنى يوق قىلىدىغان ۋاقىت-سائەتنى تاقەتسىزلىك بىلەن كۈتىۋاتىدۇ (يەرەم. 29:11). بىزمۇ ئاشۇ ۋاقىتنى تۆت كۆزۈمىز بىلەن كۈتىۋاتىمىز! بۇ يەھۋانى شۇنچە ياخشى كۆرۈشىمىزنىڭ يەنە بىر سەۋەبى!
مۇقەددەس كىتاب ھەقىقىتى نېمىگە ئوخشاش؟ لەڭگەر
لەڭگەر كېمىنى مۇقىم قىلغاندەك، مۇقەددەس كىتابقا ئاساسلانغان ئۈمىدىمىز سىناقلارغا دۇچ كەلگىنىمىزدە بىزنى كۈچلەندۈرەلەيدۇ. ھەقىقەت بىزنى كەلگۈسىگە بولغان ئۈمىدىمىز توغرۇلۇق باشقىلارغا ئېيتىشقا ئۈندەيدۇ (4–7-ئابزاسلارغا قاراڭ)
4، 5. نېمە ئۈچۈن ئەلچى پاۋلۇس ئۈمىدىمىزنى لەڭگەر بىلەن سېلىشتۇرغان؟
4 ھەقىقەتنى سۆيىشىمىزنىڭ يەنە باشقا بىر سەۋەبى نېمە؟ ھەقىقەتنىڭ بىز ئۈچۈن پايدىسى كۆپ. بىر مىسالنى كۆرۈپ باقايلى. ھەقىقەت كەلگۈسىگە بولغان ئۈمىدىمىزنى ئۆز ئىچىگە ئالىدۇ. بۇ ئۈمىدنىڭ قانچىلىك مۇھىملىقىنى چۈشەندۈرۈش ئۈچۈن ئەلچى پاۋلۇس مۇنداق دەپ يازغان: «بۇ ئۈمىد ھاياتىمىز ئۈچۈن خۇددى كېمە لەڭگىرىدەك ئىشەنچىلىك ۋە مۇستەھكەمدۇر» (ئىبرانىي. 6:19). لەڭگەر كېمىنى دېڭىز دولقۇنلىرىدا مۇقىم تۇتقانغا ئوخشاش، مۇقەددەس كىتابقا ئاساسلانغان ئۈمىدىمىز ھاياتتىكى تۈرلۈك سىناقلاردا بىزنىڭ مەھكەم تۇرۇشىمىزغا ياردەم بېرىدۇ.
5 بۇ ئايەتتە پاۋلۇس مەسىھ قىلىنغان ئېتىقادچىلارنىڭ ئۈمىدى ھەققىدە سۆز قىلغان ئىدى. ئەمما، ئۇنىڭ سۆزى يەر يۈزى جەننەتتە مەڭگۈ ياشاش ئۈمىدى بار مەسىھ ئەگەشكۈچىلىرىگىمۇ ماس كېلىدۇ (يۇھاننا 3:16). ناھايىتى ئېنىقكى، مەڭگۈلۈك ھاياتلىق ئۈمىدى ھەققىدە ئۆگىنىش ھاياتىمىزنى تېخىمۇ ئەھمىيەتكە ئىگە قىلىدۇ.
6، 7. ئېۋون كەلگۈسى توغرىسىدىكى ھەقىقەتنى ئۆگىنىشنىڭ قانداق پايدىسىنى كۆرگەن؟
6 ئېۋون ئىسىملىك بىر قېرىنداشنىڭ كەچۈرمىشىنى كۆرۈپ باقايلى. ئۇ يەھۋا گۇۋاھچىلىرىنىڭ ئائىلىسىدە چوڭ بولمىغاچ، كىچىك ۋاقتىدا ئۆلۈمدىن بەك قورققان. ئۇ ئوقۇغان بىر جۈملە، يەنى «ھامان بىر كۈنى ھەممىمىز ئۆلۈپ كېتىمىز» دېگەن سۆزلەر، ئۇنىڭ ئوي-خىيالىدىن كەتمەيتتى. ئۇ مۇنداق دەيدۇ: «ئاشۇ سۆزلەر كېچە-كۈندۈز ئوي-خىيالىمدىن كەتمەيتتى. كېچىلىرى ئويغىنىپ، كېلەچىكىم ھەققىدە ئويلىناتتىم. نېمە ئۈچۈن بىز قىسقىلا ۋاقىت ياشاپ، ئۆلۈپ كېتىدىغانلىقىمىز ھەققىدە ئويلايتتىم. مەن نېمە ئۈچۈن دۇنياغا كەلگەنلىكىمىزنى چۈشەنمەيتتىم، بىراق ئۆلۈپ كېتىشنى خالىمايتتىم».
7 ئېۋون كېيىنرەك يەھۋا گۇۋاھچىلىرى بىلەن كۆرۈشكەن. ئۇ شۇ چاغدا تېخى ئۆسمۈر ئىدى. ئۇ ھەقىقەتنى ئۆگىنىشنىڭ پايدىسى ھەققىدە مۇنداق دېگەن: «مەن يەر-يۈزىدىكى جەننەتتە مەڭگۈ ياشاش ئۈمىدى بارلىقىغا ئىشىنىشكە باشلىدىم. يەنە كېلەچىكىم ۋە ئۆلۈمدىن قورقۇپ، كېچىدە ئويغىنىپ كەتمەيمەن». تەسەۋۋۇر قىلىپ كۆرسىڭىز، ھەقىقەت ئېۋون ئۈچۈن ئىنتايىن قىممەتلىك بولغان. ئۇ ئۆزىنىڭ كەلگۈسىگە بولغان ئۈمىدى ھەققىدە باشقىلارغا ئېيتىپ بېرىشتىن تولىمۇ خۇشاللىق تاپىدۇ.—1-تىموت. 4:16.
مۇقەددەس كىتاب ھەقىقىتى نېمىگە ئوخشاش؟ خەزىنە
ھازىر ۋە كەلگۈسىدە، خۇدا پادىشاھلىقىنىڭ ھۆكۈمرانلىقى ئاستىدا، يەھۋاغا مەڭگۈ خىزمەت قىلىش شان-شەرىپىگە ئېرىشىش بىر خەزىنىگە ئوخشايدۇ. ئۇنىڭ ئۈچۈن ھەرقانداق قۇربانلىقلارنى بېرىشكە ئەرزىيدۇ (8–11-ئابزاسلارغا قاراڭ)
8، 9. (1) ئەيسانىڭ تەمسىلىدە بىر كىشى قىممەتلىك خەزىنىنى تاپقاندا، نېمە ئىشلارنى قىلغان؟ (2) ھەقىقەت سىز ئۈچۈن قانچىلىك قىممەتلىك؟
8 مۇقەددەس كىتابتىكى ھەقىقەت يەنە خۇدا پادىشاھلىقى توغرىسىدىكى خۇش خەۋەرنى ئۆز ئىچىگە ئالىدۇ. ئەيسا شۇ پادىشاھلىق توغرىسىدىكى ھەقىقەتنى يوشۇرۇن بىر خەزىنىگە سېلىشتۇرغان. مەتتا 13:44-ئايەتتە ئەيسا مۇنداق دېگەن: «ئاسمان پادىشاھلىقى ئېتىزدا يوشۇرۇلغان بىر خەزىنىگە ئوخشايدۇ. بىر ئادەم ئۇنى تېپىۋالدى ۋە قايتا كۆمۈپ قويدى؛ خۇشال-خۇرام قايتىپ، بارچە مال-مۈلۈكىنى ساتتى ۋە ئاشۇ ئېتىزنى سېتىۋالدى.» دىققەت قىلسىڭىز، شۇ كىشى خەزىنىنى ئىزدىمىگەن. بىراق، ئۇ ئۇنى تاپقاندا، شۇنىڭغا ئېرىشىش ئۈچۈن كۆپ قۇربانلىقلارنى بەرگەن، يەنى ئۆزىنىڭ بارچە مال-مۈلكىنى ساتقان. نېمە ئۈچۈن؟ ئۇ بۇ خەزىنىنىڭ نەقەدەر قىممەتلىك ئىكەنلىكىنى بىلگەن.
9 ھەقىقەت ھەرقانداق نەرسىدىن ۋاز كېچىشكە ئەرزىيدۇ دەپ قارىغان ئىدى. ئۇ سىز ئۈچۈنمۇ شۇنداق قەدىر-قىممەتلىكمۇ؟ ئەلۋەتتە! بىلىمىزكى، بۇ دۇنيا بىزگە بېرىدىغان ھەرقانداق نەرسە، ھازىر يەھۋاغا خىزمەت قىلىپ ئېرىشكەن خۇشاللىقىمىزنىڭ ئالدىدا ھېچنېمىگە ئەرزىمەيدۇ. چۈنكى، بىزنىڭ خۇدا پادىشاھلىقنىڭ باشقۇرۇشى ئاستىدىكى كەلگۈسى يېڭى دۇنيادا مەڭگۈلۈك ھايات كەچۈرۈش ئۈمىدىمىز بار. يەھۋا بىلەن دوستلۇق مۇناسىۋەتتە بولۇش شان-شەرىپىگە ئېرىشىش ئۈچۈن ھەرقانداق قۇربانلىقلارنى بېرىشىمىزگە ئەرزىيدۇ. بىزنىڭ ئەڭ زور خۇشاللىقىمىز ياراتقۇچىمىزنى تولۇق رازى قىلىشتۇر.—كولوسى. 1:10.
10، 11. مايكىلنى ھاياتىدا شۇنچە چوڭ ئۆزگۈرۈشلەرنى قىلىشقا نېمە دەۋەت قىلغان؟
10 نۇرغۇنلىرىمىز يەھۋانىڭ قوبۇل قىلىشىغا ئېرىشىش ئۈچۈن كۆپ قۇربانلىقلارنى بەردۇق. بەزىلەر بۇ دۇنيادىكى ھەممە ئادەم ھەۋەس قىلىدىغان كەسىپلەردىن ۋاز كەچتى. يەنە بەزىلەر كۆپرەك پۇل تېپىپ، بايلىق توپلاشنى رەت قىلدى. باشقىلار يەھۋا توغرۇلۇق ئۆگەنگەندىن كېيىن ھاياتىنى پۈتۈنلەي ئۆزگەرتتى. مايكىل ئىسىملىك بىر بۇرادەرمۇ شۇنداق قىلغان. ئۇ ھەقىقەتتە چوڭ بولمىغان. ياش ۋاقتىدا ئۇرۇشۇش ماھارىتىنى ئۆگەنگەنىدى. ئۇ مۇنداق دەيدۇ: «مەن ئۆزۈمنى جىسمانىي جەھەتتىن كۈچلەندۈرۈشنى ئىنتايىن مۇھىم دەپ ئويلىغان. بەزىدە ئۆزۈمنى ھېچكىمگە يېڭىلمەيدىغاندەك ھېس قىلاتتىم». ئەمما، ئۇ مۇقەددەس كىتابنى ئۆگىنىشنى باشلىغاندا، يەھۋانىڭ زوراۋانلىققا قانداق كۆزقاراشتا ئىكەنلىكىنى بىلدى (زەبۇر 11:5). ئۇ مۇنداق دەيدۇ: «مەن بىلەن مۇقەددەس كىتابنى ئۆگەنگەن ئەر-ئايال ھېچقاچان ماڭا ئۇرۇشۇش ماھارىتىدىن ۋاز كېچىشىم كېرەكلىكىنى ئېيتمىدى، ئەكسىچە داۋاملىق مۇقەددەس كىتابتىكى ھەقىقەتنى ئۆگەتتى».
11 مايكىل يەھۋا توغرىسىدا قانچە كۆپ ئۆگەنگەنسېرى، ئۇنىڭغا بولغان سۆيگۈ-مۇھەببىتى شۇنچە كۈچەيگەن. يەھۋانىڭ ئۆز خىزمەتچىلىرىگە ئىنتايىن كۆڭۈل بۆلىدىغانلىقىدىن بەكمۇ تەسىرلەنگەن. ۋاقتى كەلگەندە مايكىل ئۆزىنىڭ ھاياتىنى ئۆزگەرتىش ئۈچۈن قارار چىقىرىشى كېرەكلىكىنى تونۇپ يەتكەن. «مەن ئەركىن مۇشتلىشىش كەسىپىدىن ۋاز كېچىشىم كېرەكلىكىنى بىلدىم، بۇ مەن ئۈچۈن ئىنتايىن قىيىن بىر ئىش بولدى. ئەمما، مەن شۇنداق قىلسام، يەھۋانى خۇرسەن قىلىدىغانلىقىمنى بىلەتتىم. يەھۋاغا خىزمەت قىلىش ئۈچۈن ھەرقانداق قۇربانلىقلارنى بېرىشكە ئەرزىيدىغانلىقىغا ئىشىنەتتىم». مايكىل ئۆزى تاپقان ھەقىقەتنىڭ نەقەدەر قىممەتلىك ئىكەنلىكىنى چۈشەنگەن. شۇڭا، ئۇ ھەقىقەتنى قەدىرلەپ، ئۇنىڭغا بولغان مىننەتدارلىقىنى بىلدۈرۈش ئۈچۈن ھاياتىدا زور ئۆزگۈرۈشلەرنى قىلغان.—ياقۇپ 1:25.
مۇقەددەس كىتاب ھەقىقىتى نېمىگە ئوخشاش؟ چىراق
كۈچلۈك چىراق نۇرى بىزنىڭ قاراڭغۇلۇقتا يول تېپىشىمىزغا ياردەم بېرىدۇ. ئوخشاشلا، شەيتاننىڭ بۇ قاراڭغۇ دۇنياسىدا، خۇدانىڭ سۆزى بىزگە قانداق يول تېپىشنى كۆرسىتىپ بېرىدۇ (12، 13-ئابزاسلارغا قاراڭ)
12، 13. مۇقەددەس كىتاب ھەقىقىتى مايلىغا قانداق ياردەم بەرگەن؟
12 ھەقىقەتنىڭ قەدىر-قىممىتىنى تەكىتلەش ئۈچۈن، مۇقەددەس كىتاب ھەقىقەتنى قاراڭغۇلۇقنى يورۇتىدىغان چىراق بىلەن سېلىشتۇرغان (زەبۇر 119:105؛ ئەفەس. 5:8). ئەزەربەيجاندا پەرقلىق دىندىكى ئائىلىدە چوڭ بولغان مايلى خۇدا سۆزىدىن ئۆگەنگەن ھەقىقەتكە چوڭقۇر مىننەتدارلىقىنى بىلدۈرگەن. ئۇنىڭ دادىسى مۇسۇلمان، ئانىسى يەھۇدىي بولغان. ئۇ مۇنداق دەيدۇ: «مەن ھېچقاچان خۇدانىڭ مەۋجۇتلىقىدىن گۇمانلانمىغان، شۇنداقتىمۇ مېنى قايمۇقتۇرىدىغان نۇرغۇن سوئاللار بار ئىدى. مەن ئۆز-ئۆزۈمدىن شۇنداق سورايتتىم: خۇدا ئىنسانلارنى نېمە ئۈچۈن ياراتتى؟ نېمە ئۈچۈن بىر ئادەم پۈتۈن ھاياتىدا ئازاب-ئوقۇبەت چېكىپ، ئۆلگەندىن كېيىن يەنە دوزاخ ئوتىدا قىينىلىدۇ؟ يەنە ئادەملەر يۈز بەرگەن ئىشلارنىڭ ھەممىسىنى خۇدا ئالدىن پېشانىسىگە يېزىپ قويغان دېگەچكە، مەن خۇدا ئىنسانلارنى كونترول قىلىپ، كېيىن ئۆزى ئۇلارنىڭ ئازاب-ئوقۇبەت چەككىنىنى كۆرۈپ ھۇزۇرلىنامدۇ؟— دەپ ئويلايتتىم».
13 مايلى ئۆزىنىڭ سوئاللىرىغا جاۋاب تېپىشنى داۋاملاشتۇرغان. ئۇ ۋاقتى كەلگەندە مۇقەددەس كىتابنى تەتقىق قىلىشنى باشلاپ، ھەقىقەتنى قوبۇل قىلغان. ئۇ مۇنداق دەيدۇ: «مۇقەددەس كىتابنىڭ قايىل قىلارلىق ھەقىقىتى ھاياتقا بولغان كۆزقارىشىمنى پۈتۈنلەي ئۆزگەرتتى. خۇدا سۆزى ئارقىلىق تاپقان ئىشەنچىلىك جاۋابلار كۆڭلۈمنى تىنچ-خاتىرجەملىككە ئېرىشتۈردى». مايلىغا ئوخشاش، ھەممىمىز قاراڭغۇلۇقتىن بىزنى ئۆز پارلاق يورۇقلۇقىغا چىقارغان ياراتقۇچىمىز يەھۋانى مەدھىيىلەيمىز.—1-پېترۇس 2:9.
14. ھەقىقەتكە بولغان سۆيگۈ-مۇھەببىتىمىزنى قانداق كۈچەيتەلەيمىز؟ (« قوشۇمچە سېلىشتۇرۇش» دېگەن رامكىغا قاراڭ.)
14 بۇ ھەقىقەتنى قەدىرلىگەنلەرنىڭ پەقەت بىرقانچە مىسالى. شەك-شۈبھىسىزكى، سىزمۇ نۇرغۇن شۇنداق كىشىلەرنى بىلىسىز. ھەقىقەتنى سۆيۈشنىڭ يەنە باشقا سەۋەبلىرىنى تېپىش ئۈچۈن شەخسىي ئىزدىنىپ كۆرۈڭ. ھەقىقەتكە بولغان سۆيگۈمىزنى كۆرسىتىشنىڭ باشقىمۇ يوللىرىنىمۇ تاپالايمىز.
ھەقىقەتنى سۆيىدىغانلىقىمىزنى كۆرسىتىمىز
15. ھەقىقەتنى سۆيىدىغانلىقىمىزنى كۆرسىتىشنىڭ بىر يولى قايسى؟
15 بىز مۇقەددەس كىتاب ۋە ئۇنىڭغا ئاساسلانغان نەشرىي ماتېرىياللارنى دائىم تەتقىق قىلىپ ئۆگىنىش ئارقىلىق ھەقىقەتنى ياخشى كۆرىدىغانلىقىمىزنى كۆرسىتەلەيمىز. مەيلى قانچە ئۇزاق ۋاقىتتىن بېرى ھەقىقەت يولىدا مېڭىۋاتقان بولۇشىمىزدىن قەتئىينەزەر، بىز دائىم ئۆگىنىشىمىز كېرەك. «كۈزىتىش مۇنارى» ژۇرنىلىنىڭ ئەڭ بىرىنچى سانىدا مۇنداق دېيىلگەن: «ھەقىقەت خۇددى دالادا ياۋايى ئوت-چۆپلەر ئارىسىدا ئۆسكەن ئاددىي بىر گۈلگە ئوخشاش، ياۋايى ئوت-چۆپلەر بۈك-باراقسان ئۆسۈپ، گۈلنى قورشىۋالغان ۋە پۈتۈنلەي دېگىدەك بوغۇپ قويغان. . . . بۇ گۈلنى تېپىشنى خالىسىڭىز، توختىماي تىرىشىپ ئىزدىنىڭ. پەقەت بىر تال ھەقىقەت گۈلىنى تېپىپ، قانائەت قىلماڭ. ... داۋاملىق تېخىمۇ كۆپ مۇقەددەس كىتاب ھەقىقىتىنى تېپىشقا تىرىشىڭ». تەتقىق قىلىپ ئۆگىنىش جاپالىق ئىش، ئەمما تىرىشىشقا ئەرزىيدۇ.
16. سىز قايسى ئۇسۇلدا ئۆگىنىشنىڭ پايدىسىنى كۆردىڭىز؟ (پەندى-نەسىھەت 2:4–6)
16 ھەممىمىزلا ئوقۇشنى ۋە ئۆگىنىشنى ياخشى كۆرمەيمىز. ئەمما، يەھۋا ھەقىقەتنى تېخىمۇ چوڭقۇر چۈشىنىش ئۈچۈن بىزنى توختىماي ئىزدەشكە ياكى داۋاملىق ئىزدىنىشكە دەۋەت قىلغان (پەندى-نەسىھەت 2:4–6-نى ئوقۇڭ). بىز بۇنداق تىرىشچانلىق كۆرسەتسەك، ھەردائىم پايدىسىنى كۆرىمىز. مۇقەددەس كىتاب ئوقۇش ھەققىدە، كورىي بىر قېتىمدا پەقەت بىر ئايەتكە دىققەت ئاغدۇرىدىغانلىقىنى ئېيتقان. ئۇ چۈشەندۈرۈپ مۇنداق دېگەن: «مەن ھەربىر ئىزاھاتنى ئوقۇيمەن، ھەربىر باغلىنىشلىق ئايەتلەرگە قارايمەن ۋە قوشۇمچە ئىزدىنىمەن. ... بۇ ئۇسۇل نۇرغۇن نەرسىلەرنى ئۆگىنىشىمگە ياردەم بەردى!» مەيلى شۇ ئۇسۇلنى ياكى باشقا ئۇسۇلنى قوللىنايلى، خۇدا سۆزىنى تەتقىق قىلىش ئۈچۈن ۋاقىت ۋە كۈچ سەرپ قىلساق، ئۆزىمىزنىڭ ھەقىقەتكە بولغان مىننەتدارلىقىمىزنى كۆرسىتىمىز.—زەبۇر 1:1–3.
17. ھەقىقەتكە ماس ياشاش نېمىنى بىلدۈرىدۇ؟ (ياقۇپ 1:25)
17 ئەلۋەتتە، ھەقىقەتنى ئۆگىنىپ قويساقلا كۇپايە قىلمايدىغانلىقىنى بىلىمىز. تولۇق پايدىسىنى كۆرۈش ئۈچۈن چوقۇم ھەقىقەتكە ماس ياشىشىمىز، يەنى ئۆگەنگەنلىرىمىزنى ھاياتىمىزدا ئەمەلىي قوللىنىشىمىز كېرەك. شۇنداق قىلغاندىلا، ھەقىقەت بىزگە ھەقىقىي خۇشاللىق ئېلىپ كېلىدۇ (ياقۇپ 1:25-نى ئوقۇڭ). ھەقىقەتكە ماس ياشاۋاتقانلىقىمىزنى قانداق جەزملەشتۈرەلەيمىز؟ بىر بۇرادەر ئۆگەنگەنلىرىمىزنى ھاياتىمىزدا ئەمەلىي قوللىنىۋاتقانلىقىمىزنى ۋە يەنە قايسى جەھەتتىن تېخىمۇ ياخشىراق قىلالايدىغانلىقىمىزنى ئېنىقلاش ئۈچۈن ئۆز-ئۆزىمىزنى تەكشۈرۈپ كۆرۈشنى تەۋسىيە قىلىدۇ. ئەلچى پاۋلۇس مۇنداق دېگەن: «قايسى دەرىجىدە ئىلگىرىلىگەن بولۇشىمىزدىن قەتئىينەزەر، ئەينى تەرتىپ بويىچە داۋاملىق ئىلگىرىلەيلى».—فىلىپى. 3:16.
18. نېمە ئۈچۈن ھەقىقەت يولىدا مېڭىش ئۈچۈن پۈتۈن كۈچىمىز بىلەن تىرىشىمىز؟
18 «ھەقىقەت يولىدا» مېڭىش ئۈچۈن پۈتۈن كۈچىمىز بىلەن تىرىشىشنىڭ پايدىسى ھەققىدە ئويلىنىپ كۆرۈڭ. بىز ئۆز تۇرمۇشىمىزنى ياخشىلاپلا قالماي، يەھۋا ۋە ئېتىقادچى قېرىنداشلىرىمىزنىڭ كۆڭلىنى خۇرسەن قىلىمىز (پەند. نە 27:11؛ 3-يۇھاننا 4). بۇ ھەقىقەتنى سۆيۈپ، ھەقىقەتكە ماس ياشىشىمىزنىڭ ئەڭ مۇھىم سەۋەبلىرىدۇر!
24-ناخشا كۆزۈڭ بولسۇن مۇكاپاتتا!
a بىز دائىم ئىمان-ئېتىقادىمىزنى ۋە ھايات كەچۈرۈش تەرزىمىزنى «ھەقىقەت» دەپ ئاتايمىز. مەيلى يېڭىلا ھەقىقەتنى تونۇغان بولايلى ياكى ئۆمۈر بويى ھەقىقەتتە ياشاۋاتقان بولايلى، نېمە ئۈچۈن ھەقىقەتنى سۆيىدىغانلىقىمىز ھەققىدە چوڭقۇر ئويلىنىشنىڭ بىز ئۈچۈن پايدىسى كۆپ. چوڭقۇر تەپەككۈر قىلساق، يەھۋانى خۇرسەن قىلىش ئىرادىمىز تېخىمۇ كۈچىيىدۇ.
