41-تەتقىق ماقالىسى
ھەقىقىي بەختلىك بولالايسىلەر
«يەھۋادىن قورققان، ئۇنىڭ يولىدا يۈرگەن كىشى بەختلىكتۇر».—زەبۇر 128:1.
14-ناخشا خۇدا ھەممىنى يېڭىلار
بۇ ماقالىدە a
1. روھىي ئېھتىياجىمىز نېمە ۋە بۇنىڭ بەختلىك بولۇش بىلەن قانداق مۇناسىۋىتى بار؟
ھەقىقىي بەخت پەقەت مۇنداقلا پەيدا بولۇپ، تېزلا يوق بۇلۇپ كېتىدىغان ھېس-تۇيغۇ ئەمەس. ئۇ بىر ئۆمۈر داۋام قىلىدۇ. ئەيسا بۇنى تاغدىكى ۋەز-نەسىھىتىدە مۇنداق چۈشەندۈرگەن: «روھىي جەھەتتە ئۆزىنىڭ خۇداغا مۇھتاجلىقىنى تونۇپ يەتكەنلەر نەقەدەر بەختلىك!» (مەتتا 5:3). ئەيسا مەسىھ ئىنسانلارنىڭ ياراتقۇچى يەھۋا خۇدانى تونۇش ۋە ئۇنىڭغا ئىبادەت قىلىش ئارزۇ-ئىستىكى بىلەن يارىتىلغانلىقىنى بىلگەن. دېمەك، بىزنىڭ روھىي ئېھتىياجىمىز بار. يەھۋا «شاد-خۇرام خۇدا» بولغاچقا، ئۇنىڭغا ئىبادەت قىلىدىغانلارمۇ ئوخشاشلا شاد-خۇرام ياشىيالايدۇ.—1-تىموت. 1:11.
«ھەققانىيلىقنى ئىزدىگىنى ئۈچۈن زىيانكەشلىككە ئۇچرىغانلار بەختلىكتۇر».—مەتتا 5:10. (2، 3-ئابزاسلارغا قاراڭ) d
2، 3. (1) ئەيسانىڭ سۆزىگە ئاساسلانغاندا، يەنە كىملەر بەختلىك بولالايدۇ؟ (2) بۇ ماقالىدە نېمىلەرنى مۇھاكىمە قىلىمىز؟
2 بەختلىك بولۇشىمىز ئۈچۈن ھەممە نەرسىمىز تەلتۆكۈس، ھېچقانداق قىيىنچىلىقىمىز يوق بولۇشى شەرتمۇ؟ ياق. تاغدىكى ۋەز-نەسىھىتىدە ئەيسا ھەيران قالارلىق بەزى نەرسىلەرنى ئېيتقان. «غەم-قايغۇغا پاتقانلار»، يەنى ئۆز گۇناھلىرى ياكى ھاياتىدىكى قىيىنچىلىقلىرى سەۋەبلىك ئېزىلگەنلەر خۇشال بولالايدۇ. ئەيسا مەسىھ ھەققانىيلىقنى ئىزدىگىنى ئۈچۈن زىيانكەشلىككە ئۇچرىغانلار ياكى مەسىھنىڭ ئەگەشكۈچىسى بولغىنى ئۈچۈن ھاقارەت قىلىنغانلار ھەققىدە مۇشۇ گەپلەرنى قىلغان (مەتتا 5:4، 10، 11). بىراق، شۇنداق ۋەزىيەتلەردە قانداقمۇ ھەقىقىي خۇشاللىق تېپىش مۇمكىن بولسۇن؟
3 ئەيسا بىزگە بەخت-سائادەتنىڭ ھاياتىمىزدا ھەممە نەرسە تەل بولۇشتىن ئەمەس، بەلكى روھىي ئېھتىياجىمىزنى قاندۇرۇش بىلەن خۇداغا يېقىنلىشىشتىن كېلىدىغانلىقىنى ئۆگەتكەن ئىدى. ئۇنىڭ نەسىھەت سۆزىگە قانداق قۇلاق سالالايمىز؟ بۇ ماقالىدە، ھەقىقىي بەخت-سائادەتكە يېتەكلەيدىغان ئۈچ مۇھىم قەدەم ھەققىدە مۇھاكىمە قىلىمىز.
روھىي ئوزۇقلۇقلار بىلەن ئوزۇقلىنىڭ
4. ھەقىقىي شاد-خۇراملىققا ئېرىشىشنىڭ بىرىنچى قەدىمى نېمە؟
4 1-قەدەم. ھەقىقىي شاد-خۇراملىققا ئېرىشىش ئۈچۈن چوقۇم روھىي ئوزۇقلۇقلار بىلەن ئوزۇقلىنىشىمىز كېرەك. ئىنسانلار ۋە ھايۋاناتلار ھايات قېلىشى ئۈچۈن جىسمانىي ئوزۇقلۇقلارغا مۇھتاج. بىراق، پەقەت ئىنسانلار روھىي ئوزۇقلۇق بىلەن ئوزۇقلىنالايدۇ ۋە بىز بۇنىڭغا ئېھتىياجلىق. شۇ سەۋەب، ئەيسا مەسىھ مۇنداق دېگەن: «ئىنسان يالغۇز نان بىلەنلا ئەمەس، بەلكى يەھۋانىڭ ئېغىزىدىن چىققان ھەر بىر سۆز بىلەن ياشايدۇ» (مەتتا 4:4). شۇڭلاشقا، بىز چوقۇم ھەر كۈنى خۇدانىڭ قىممەتلىك سۆزى بولغان مۇقەددەس كىتابتىن بەزى روھىي ئوزۇقلۇقلارنى ئېلىشىمىز كېرەك. زەبۇر يازغۇچىسى شۇنداق يازغان: «يەھۋانىڭ قانۇنلىرىدىن سۆيىنىپ، كېچە-كۈندۈز ئۇنى ئوقۇغانلار بەختلىكتۇر».—زەبۇر 1:1–3-نى ئوقۇڭ.
5، 6. (1) مۇقەددەس كىتابتىن نېمىلەرنى ئۆگىنەلەيمىز؟ (2) مۇقەددەس كىتابنى ئوقۇش بىزگە قانداق ياردەم بېرەلەيدۇ؟
5 يەھۋا مېھرىبانلىق بىلەن، مۇقەددەس كىتاب ئارقىلىق بىزگە بەختلىك ھايات كەچۈرۈش توغرىسىدا مۇھىم مەلۇماتلارنى بەرگەن. بىز ئۇنىڭ ھاياتىمىز ئۈچۈن نېمىنى مەقسەت قىلغانلىقىنى ئۆگىنىمىز. ئۇنىڭغا قانداق يېقىنلىشالايدىغانلىقىمىز ۋە ئۇ گۇناھلىرىمىزنى كەچۈرۈم قىلىشى ئۈچۈن نېمە قىلىشىمىز كېرەكلىكىنى ئۆگىنىمىز. ھەمدە ئۇنىڭ كەلگۈسىمىز ئۈچۈن قىلغان ۋەدىسى، يەنى ئاجايىپ ئۈمىدىمىز ھەققىدە ئۆگىنىمىز (يەرەم. 29:11). مۇقەددەس كىتابنى تەتقىق قىلىش ئارقىلىق ئۆگەنگەن بۇ ھەقىقەتلەر قەلبىمىزنى شاد-خۇراملىققا چۆمدۈرىدۇ.
6 بىلگىنىمىزدەك، مۇقەددەس كىتاب كۈندىلىك تۇرمۇشىمىزغا مۇناسىۋەتلىك ئەمەلىي نەسىھەتلەر بىلەنمۇ تولغان. ئاشۇ نەسىھەت سۆزلىرىگە ئەمەل قىلساق، بەختلىك تۇرمۇش كەچۈرەلەيمىز. تۇرمۇشىڭىزدا تۈرلۈك قىيىنچىلىقلارغا دۇچ كېلىپ، ئۈمىدسىزلەنگەن ۋاقىتلاردا كۆپرەك يەھۋانىڭ سۆزلىرىنى ئوقۇشقا ۋە ئوقۇغانلىرىڭىز ئۈستىدىن چوڭقۇر ئويلىنىشقا ۋاقىت چىقىرىڭ. «خۇدانىڭ سۆزىنى ئاڭلاپ، ئۇنىڭغا ئەمەل قىلغانلار بەختلىكتۇر».—لۇقا 11:28.
7. خۇدانىڭ سۆزىنى ئوقۇشقا ۋاقىت سەرپ قىلغان ۋاقتىڭىزدىن قانداق قىلغاندا ئەڭ ئۈنۈملۈك پايدىلىنالايسىز؟
7 خۇدانىڭ سۆزىنى ئوقۇغىنىڭىزدا، ئوقۇغانلىرىڭىزدىن ھۇزۇر ئېلىشقا ۋاقىت چىقىرىڭ. مىسال قىلايلى. مۇنداق بىر ئىشنى باشتىن كەچۈرگەنمۇسىز؟ بىرى سىزگە ئەڭ ياخشى كۆرىدىغان تاماقىڭىزنى ئېتىپ بەردى. سىز بەك ئالدىراش ياكى ئوي-پىكىرىڭىز بىر يەردە بولمىغاچ، تاماقنىڭ تەمىنى ھەقىقىي تېتىماستىن، ئالدىراپلا يەۋەتتىڭىز. تاماقىڭىزنى يەپ بولغاندىن كېيىن، ئۆزىڭىزنىڭ قانچىلىك تېز تاماقنى يېۋەتكەنلىكىڭىزنى ھېس قىلدىڭىز ھەمدە ئاستا-ئاستا چايناپ، تاماقتىن ھۇزۇر ئالسام بوپتىكەن دەپ ئويلاپ قالدىڭىز. خۇددى شۇنىڭدەك، سىز مۇقەددەس كىتابنى ئوقۇغاندا، بەزىدە تېزلا ئوقۇپ، ئوقۇغانلىرىڭىزنى چۈشەنمەيسىز ۋە ئۇنىڭدىن ھۇزۇر ئالالمايسىز. خۇدا سۆزىنى ئوقۇپ، ئۇنىڭدىن ھۇزۇر ئېلىش ئۈچۈن ۋاقىت چىقىرىڭ، يەنى ئىش-ۋەقەلەرنى كۆز ئالدىڭىزغا كەلتۈرۈپ، بولۇنغان گەپ-سۆزلەرنى تەسەۋۋۇر قىلىڭ ۋە ئوقۇغانلىرىڭىز ھەققىدە چوڭقۇر ئويلىنىڭ. مۇشۇلارنى قىلغىنىڭىزدا، خۇشاللىقىڭىزغا خۇشاللىق قوشۇلىدۇ.
8. «سادىق ۋە ئەقىل-پاراسەتلىك قۇل» ئۆز ۋەزىپىسىنى قانداق ئورۇنلاۋاتىدۇ؟ (ئىزاھاتقا قاراڭ.)
8 ئەيسا ئۆز ۋاقتىدا روھىي ئوزۇقلۇقلارنى تەمىنلەشكە «سادىق ۋە ئەقىل-پاراسەتلىك قۇل»نى تەيىنلىگەن. بىز روھىي جەھەتتىن ناھايىتى ياخشى ئۇزۇقلىنىپ كېلىۋاتىمىز b (مەتتا 24:45). سادىق قۇل تەمىنلىگەن بارلىق روھىي ئوزۇقلۇقلار مۇقەددەس يازمىلارغا ئاساسلانغان (1-سالونىكا. 2:13). ئاشۇ روھىي ئوزۇقلۇقلار مۇقەددەس كىتابتىكى خۇدانىڭ كۆزقارىشىنى چۈشىنىشىمىزگە ياردەم بېرىدۇ. شۇڭا، «كۈزىتىش مۇنارى» ۋە «ئويغىنىش!» ژۇرناللىرى ھەمدە jw.org تور بېكىتىدىكى ماقالىلەرنى ئوقۇيمىز. ھەپتە ئارىلىقىدىكى ۋە ھەپتە ئاخىرىدىكى جامائەت يىغىلىشلىرىغا تەييارلىق قىلىمىز. ئۇنىڭدىن باشقا، ئەگەر JW ئىنتېرنېت تېلېۋىزىيە پروگراممىسى بولسا، شۇ ئايلىق پروگراممىنى كۆرىمىز. يېتەرلىك روھىي ئوزۇقلۇقلارنى ئېلىش بىزنىڭ ھەقىقىي بەختكە ئېرىشىشىمىزنىڭ ئىككىنچى قەدىمىنى بىلىشىمىزگە ياردەم بېرىدۇ.
يەھۋانىڭ ئۆلچەملىرىگە ماس ياشاڭ
9. بىزنى ھەقىقىي خۇشال-خۇراملىققا يېتەكلەيدىغان ئىككىنچى قەدەم نېمە؟
9 2-قـەدەم. ھەقىـقىي شـاد-خۇراملىقـقا ئېرىشىش ئۈچۈن، يەھۋانىڭ ئۆلچەملىرىگە ماس ياشىشىمىز كېرەك. زەبۇر يازغۇچىسى شۇنداق يازغان: «يەھۋادىن قورققان، ئۇنىڭ يولىدا يۈرگەن كىشى بەختلىكتۇر» (زەبۇر 128:1). يەھۋادىن قورقۇش دېگەنلىك، ئۇنى ئىنتايىن ھۆرمەتلەش ۋە ئۇ ئۆچ كۆرىدىغان ھەرقانداق ئىشنى قىلىشتىن خالى بولۇش دېمەكتۇر (پەند. نە 16:6). شۇڭا، بىز مۇقەددەس يازمىلاردا چۈشەندۈرۈلگەندەك، خۇدا توغرا-خاتا ئۈچۈن بەلگىلىگەن ئۆلچەملەرگە بويسۇنۇپ ياشاش ئۈچۈن داۋاملىق تىرىشىمىز (2-كورىنت. 7:1). ئەگەر يەھۋا ياخشى كۆرگەن ئىشلارنى قىلىپ، ئۆچ كۆرگەن ئىشلارنى رەت قىلساق، تېخىمۇ خۇشال-خۇرام ھايات كەچۈرىمىز.—زەبۇر 37:27؛ 97:10؛ رىملىقلار 12:9.
10. رىملىقلار 12:2-ئايەتكە ئاساسلانغاندا، بىزنىڭ قانداق مەسئۇلىيىتىمىز بار؟
10 رىملىقلار 12:2-نى ئوقۇڭ. بىر كىشى يەھۋانىڭ نېمە توغرا ۋە نېمە خاتا ئىكەنلىكىنى قارار قىلىش ھوقۇقى بارلىقىنى بىلىشى مۇمكىن. شۇنداقتىمۇ، ئۇ چوقۇم خۇدانىڭ ئۆزى ئۈچۈن بەلگۈلىگەن ئۆلچەملىرىنى قوبۇل قىلىشى كېرەك. مەسىلەن، بىر ئادەم ھۆكۈمەتنىڭ تاش يولدا مېڭىش سۈرەت چەكلىمىسىنى بەلگىلەش ھوقۇقىنى بىلىشى مۇمكىن. شۇنداقتىمۇ، ئۇ بۇ چەكلىمىنى قوبۇل قىلىشنى خالىشى ناتايىن. نەتىجىدە، ئۇ بەلگىلەنگەن سۈرەتتىن تېز ھەيدىشى مۇمكىن. ئەمما، بىز ئىش-ھەرىكىتىمىز ئارقىلىق يەھۋانىڭ ئۆلچەملىرىگە ئەمەل قىلىشنىڭ ئەڭ ياخشى ھايات كەچۈرۈش يولى ئىكەنلىكىگە ھەقىقىي ئىشىنىدىغانلىقىمىزنى كۆرسىتىمىز (پەندى-نەسىھەت 12:28). داۋۇت شۇنداق ھېس-تۇيغۇدا بولۇپ، يەھۋا ھەققىدە مۇنداق دېگەن: «سەن ماڭا ھاياتلىق يولىنى كۆرسىتىسەن، شاد-خۇراملىققا تولۇپ تاشقان ھۇزۇرۇڭ؛ ئوڭ قول تەرىپىڭدە مەڭگۈلۈك بەخت-سائادەت باردۇر».—زەبۇر 16:11.
11، 12. (1) بىز ئاۋارىچىلىقلارغا ئۇچرىغاندا ياكى ئۈمىدسىزلەنگەندە چوقۇم نېمىدىن پەخەس بولۇشىمىز كېرەك؟ (2) فىلىپىلىكلەر 4:8-ئايەتتىكى سۆزلەر ئويۇن-تاماشىلارنى تاللىغاندا قانداق ياردەم بېرەلەيدۇ؟
11 بىز ئاۋارىچىلىقلارغا دۇچ كەلگەندە ياكى ئۈمىدسىزلەنگەندە قىيىنچىلىقلىرىمىز ىن قۇتۇلۇشقا ياردەم بېرىدىغان بەزى ئىشلارنى قىلىشنىڭ زۆرۈرلىكىنى ھېس قىلىمىز. ئەلۋەتتە، بۇنى چۈشىنىشكە بولىدۇ. ئەمما، بىز يەھۋا ئۆچ كۆرىدىغان ئىشنى قىلىپ قويۇشتىن قەتئىي پەخەس بولۇشىمىز كېرەك.—ئەفەس. 5:10–12، 15–17.
12 فىلىپىلىكلەر يازغان خېتىدە ئەلچى پاۋلۇس ئېتىقادچى قېرىنداشلارنى داۋاملىق ھەققانىي، پاك، سۆيۈندۈرىدىغان، ئەخلاق-پەزىلەتلىك ئىشلار توغرىسىدا داۋاملىق ئويلىنىشقا دەۋەت قىلغان (فىلىپىلىكلەر 4:8-نى ئوقۇڭ). گەرچە پاۋلۇس كۆڭۈل ئاچىدىغان ئويۇن-تاماشىلار ھەققىدە ئېنىق بىر نەرسىلەرنى يازمىغان بولسىمۇ، ئەمما ئۇنىڭ يازغانلىرى ئويۇن-تاماشىلارنى تاللىشىمىزغا تەسىر قىلىشى كېرەك. مۇنداق سىناپ بېقىڭ. ئەگەر ئايەتتە نەرسىلەر ياكى ئىش دېگەن سۆز ئۇچرىسا، ئورنىغا ناخشىلار، فىلىملەر، رومانلار ياكى ئېلېكترونلۇق ئويۇنلار دېگەن سۆزنى قويۇڭ. مۇنداق قىلىش خۇدانىڭ نەزەرىدە قايسىنىڭ قوبۇل قىلىنىدىغانلىقى ياكى قوبۇل قىلىنمايدىغانلىقىنى پەرقلەندۈرۈشىڭىزگە ياردەم بېرەلەيدۇ. بىز ھاياتىمىزنى يەھۋانىڭ يۇقىرى ئەخلاقىي ئۆلچەملىرىگە ماسلاشتۇرۇشنى خالايمىز. (زەبۇر 119:1–3). شۇنداق قىلغىنىمىزدا، پاك ۋىجدان بىلەن ھەقىقىي شاد-خۇراملىققا يېتەكلەيدىغان كېيىنكى قەدەمنى باسالايمىز.—ئەلچى. 23:1.
يەھۋاغا ئىبادەت قىلىشنى بىرىنچى ئورۇنغا قويۇڭ
13. ھەقىقىي شاد-خۇراملىققا ئېرىشىشنىڭ ئۈچىنچى قەدىمى نېمە؟ (يۇھاننا 4:23، 24)
13 3-قەدەم. ھاياتىڭىزدا يەھۋاغا ئىبادەت قىلىشنى بىرىنچى ئورۇنغا قويغانلىقىڭىزغا كاپالەتلىك قىلىڭ. يەھۋا بىزنى ياراتقاچقا، چوقۇم ئۇنىڭغا ئىبادەت قىلىشىمىز لازىم (ۋەھىيلەر 4:11؛ 14:6، 7). شۇڭا، «روھ ۋە ھەقىقەت بىلەن»، خۇدا قوبۇل قىلىدىغان ئۇسۇلدا ئۇنىڭغا ئىبادەت قىلىشنى بىرىنچى ئورۇنغا قويۇشىمىز زۆرۈر (يۇھاننا 4:23، 24). بىز ئىبادىتىمىزگە خۇدانىڭ مۇقەددەس روھىنىڭ يېتەكچىلىك قىلىشىنى خالايمىز. شۇنداق بولغاندا، ئىبادىتىمىز ئۇنىڭ سۆزىدىكى ھەقىقەتلەر بىلەن ماسلىشىدۇ. ھەتتا ئىش-پائالىيەتلىرىمىز چەكلەنگەن ياكى مەنئىي قىلىنغان دۆلەتلەردە ياشىساقمۇ، ئىبادىتىمىز چوقۇم بىرىنچى ئورۇندا بولۇشى كېرەك. ھازىر، 100دىن ئارتۇق قېرىنداشلىرىمىز پەقەت يەھۋا گۇۋاھچىلىرى بولغانلىقى ئۈچۈن تۈرمىدە يېتىۋاتىدۇ c. شۇنداق ئەھۋالدىمۇ، ئۇلار خۇشاللىق بىلەن دۇئا قىلىش، تەتقىق قىلىش ۋە باشقىلارغا خۇدايىمىز ۋە ئۇنىڭ پادىشاھلىقى ھەققىدە سۆزلەش ئۈچۈن قولدىن كېلىشىچە تىرىشىۋاتىدۇ. بىز ھاقارەتلەنگەن ياكى زىيانكەشلىككە ئۇچرىغان ئەھۋالدىمۇ، يەھۋانىڭ بىز بىلەن بىللە ئىكەنلىكىنى ۋە بىزنى مۇكاپاتلايدىغانلىقىنى بىلىپ، خۇشال بولالايمىز.—ياقۇپ 1:12؛ 1-پېترۇس 4:14.
ھەقىقىي بولغان ۋەقە
14. تاجىكىستاندىكى بىر ياش بۇرادەرگە نېمە بولغان ۋە نېمە ئۈچۈن؟
14 بەزى قېرىنداشلىرىمىز ئىنتايىن قىيىن ۋەزىيەتلەرنى باشتىن كەچۈرگەن بولسىمۇ، ئۇلار ھەقىقىي شاد-خۇراملىققا ئېرىشىپ كېلىۋاتىدۇ. سەۋەبى، ئۇلار بىز يۇقىرىدا مۇھاكىمە قىلغان ئۈچ قەدەمنى باسقان. تاجىكىستان دىكى 19 ياشلىق جوۋىدون باباجونوۋ ھەربىي مەجبۇرىيەت ئۆتەشنى رەت قىلغاندا، نېمە ئىش بولغانلىقىنى كۆرۈپ باقايلى. 2019-يىلى 10-ئاينىڭ 4-كۈنى، ئۇ ئۆيىدىن تۇتۇپ كېتىلگەن ۋە بىر نەچچە ئاي تۈرمىگە تاشلىنىپ، جىنايەتچىگە ئوخشاش مۇئامىلىگە ئۇچرىغان. بۇ ئادالەتسىزلىك بىرقانچە دۆلەتلەردە خەۋەر قىلىنغان. خەۋەردە ئېيتىلىشىچە، ئۇنى ھەربىي مەجبۇرىيەت قەسىمى قىلىشقا ۋە فورما كىيىشكە قىستىغان ۋە ئۇرغان. كېيىن، ئۇ سوت تەرىپىدىن گۇناھكار دەپ ئەيىبلىنىپ، ئەمگەك بىلەن ئۆزگەرتىش لاگېرىغا ئەۋەتىلگەن. ئاخىرىدا، دۆلەت باشلىقى ئۇنى كەچۈرۈم قىلىپ، قويۇپ بېرىشكە بۇيرۇغان. ئاشۇ جاپالىق كۈنلەردە، جوۋىدون باشتىن-ئاخىر ساداقەتمەنلىكىنى ۋە خۇشاللىقىنى ساقلاپ قالغان ئىدى. ئۇ نېمە قىلغان؟ ئۇ ھەمىشە ئۆزىنىڭ روھىي مۇھتاجلىقىغا كۆڭۈل بۆلۈشكە تىرىشقان.
جوۋىدون روھىي ئوزۇقلانغان، خۇدانىڭ ئۆلچەملىرى بويىچە ياشىغان ۋە يەھۋاغا ئىبادەت قىلىشنى بىرىنچى ئورۇنغا قويغان (15–17 ئابزاسلارغا قاراڭ)
15. جوۋىدون تۈرمىدىكى ۋاقتىدا، روھىي ئوزۇقلۇقلارغا قانداق ئېرىشكەن؟
15 تۈرمىدىكى ۋاقتىدا، جوۋىدون ھەتتا مۇقەددەس كىتاب ياكى ھېچقانداق نەشىرى ماتېرىياللىرىمىز بولمىغان ئەھۋالدىمۇ، يەھۋا توغرۇلۇق ئۆگىنىشنى داۋاملاشتۇرغان. ئۇ بۇنى قانداق قىلالىغان؟ شۇ يەردىكى ئېتىقادچى قېرىنداشلار ئۇنىڭغا جىسمانىي يېمەكلىكلەرنى يەتكۈزۈپ بەرگەن، ھەمدە يېمەكلىك سالغان خالتىلارغا ھەر كۈنلۈك ئايەتنىڭ مەزمۇنىنى يېزىپ قويغان. شۇنداق قىلىپ، ئۇ ھەر كۈنى مۇقەددەس كىتابنى ئوقۇپ، ئۇنىڭ ئۈستىدە چوڭقۇر تەپەككۈر يۈرگۈزەلىگەن. تۈرمىدىن چىققاندىن كېيىن، ئۇ تېخى ئېغىر سىناقلارغا دۇچ كەلمىگەنلەرگە مۇنداق تەكلىپ پىكىرنى بەرگەن: «ئەركىنلىكىڭىزنى پۈتۈن كۈچىڭىز بىلەن ئىشلىتىپ، ئۇنىڭ سۆزى ۋە نەشىرى ماتېرىياللىرىمىزنى ئوقۇش ئارقىلىق يەھۋا ھەققىدىكى بىلىمىڭىزنى چوڭقۇرلاشتۇرۇڭ، بۇنداق قىلىش تولىمۇ زۆرۈر!»
16. جوۋىدون ئوي-پىكىرلىرىنى نېمىگە قاراتقان؟
16 قېرىندىشىمىز يەھۋانىڭ ئۆلچەملىرىگە ماس ياشىغان. ئۇ خاتا ئارزۇ-ھەۋەسلەر توغرۇلۇق ئويلىماي ۋە يامان ئىشلارنى قىلماي، ئەكسىچە ئۆز ئوي-پىكىرىنى يەھۋاغا ۋە ئۇ قەدىرلىگەن نەرسىلەرگە قاراتقان. جوۋىدون تەڭرىنىڭ ياراتقانلىرىنىڭ گۈزەللىكىگە ھەيران بولغان. ھەر كۈنى ئەتىگەندە قۇشلار سايراپ، ناخشىلارنى ئېيتقاندا، ئۇيقۇسىدىن ئويغانغان ئىدى. كېچىدە بولسا، ئاي ۋە يۇلتۇزلارغا قارىغان. ئۇ شۇنداق دەيدۇ: «يەھۋانىڭ بۇ سوۋغىلىرى مېنى خۇشال قىلدى ۋە ئىلھاملاندۇردى». بىز يەھۋا تەمىنلىگەن روھىي ۋە جىسمانىي ئوزۇقلۇق ئۈچۈن مىننەتدار بولساق، كۆڭلىمىز شاد-خۇراملىققا تولىدۇ ۋە بۇ خۇشاللىق بىلەن بەرداشلىق بېرىشىمىزگە ياردەم بېرەلەيدۇ.
17. جوۋىدونغا ئوخشاش ئەھۋالغا چۈشكەن كىشىگە، 1-پېترۇس 1:6، 7-ئايەتلەردىكى سۆزلەر قانداق ياردەم بېرىدۇ؟
17 جوۋىدون يەنە يەھۋاغا ئىبادەت قىلىشنى بىرىنچى ئورۇنغا قويغان. ئۇ ھەق خۇداغا ئۆز سادىقلىقىنى ساقلاپ قېلىشنىڭ مۇھىملىقىنى بىلگەن. ھەزرىتى ئەيسا مۇنداق دېگەن: «خۇدايىڭ يەھۋاغا سەجدە قىلغىن ۋە يالغۇز ئۇنىڭغىلا مۇقەددەس خىزمەت قىلغىن» (لۇقا 4:8). ھەربىي باشلىقلار ۋە ئەسكەرلەر جوۋىدوننى يەھۋا گۇۋاھچىسى بولۇشتىن ۋاز كەچتۈرمەكچى بولغان. ئەكسىچە، ئۇ ھەر كۈنى كېچە-كۈندۈز داۋاملىق يەھۋاغا دۇئا قىلىپ، ئۇنىڭغا سادىق قېلىشى ئۈچۈن ياردەم سورىغان. ئادالەتسىز مۇئامىلىگە ئۇچرىشىغا قارىماي، جوۋىدون ساداقەتمەنلىكىنى ساقلاپ قالغان. نەتىجىدە، ھازىر ئۇنىڭدا تۇتقۇن قىلىنىش، تاياق يېيىش ۋە تۈرمىگە تاشلىنىشتىن ئىلگىرى ئۆزىدە بولمىغان نەرسە بار، يەنى سىناقتىن ئۆتكەن كۈچلۈك ئىمان-ئېتىقادى بار. شۇڭا، ھازىر ئۆزىنى ئىنتايىن بەختلىك ھېس قىلالايدۇ.—1-پېترۇس 1:6، 7-نى ئوقۇڭ.
18. خۇشال-خۇراملىقىمىزنى قانداق ساقلاپ قالالايمىز؟
18 يەھۋا بىزنىڭ ھەقىقىي شاد-خۇراملىققا ئېرىشىش ئۈچۈن نېمە قىلىشىمىز كېرەكلىكىنى بىلىدۇ. ئەگەر سىز ھەقىقىي بەخت-سائادەتكە ئېرىشتۈرىدىغان ئۈچ قەدەمنى باسسىڭىز، قىيىن سىناقلارغا قارىماي، خۇشاللىقىڭىزنى ساقلاپ قالالايسىز. شۇنىڭ بىلەن، سىزمۇ مۇنداق دېيەلەيسىز: «خۇداسى يەھۋا بولغان خەلق نەقەدەر بەختلىكتۇر!».—زەبۇر 144:15.
6-ناخشا خۇدا خىزمەتچىسىنىڭ دۇئاسى
a نۇرغۇن كىشىلەرنىڭ ھەقىقىي بەختنى تېپىشى قىيىن. سەۋەبى، ئۇلار بايلىق، نام-شۆھرەت ۋە ھوقۇق قوغلىشىش ئارقىلىق، خاتا ئۇسۇلدا بەخت-سائادەتكە ئېرىشمەكچى بولىدۇ. بىراق، ئەيسا يەر يۈزىدە بولغاندا، كىشىلەرگە قانداق قىلىپ ھەقىقىي بەختنى تېپىشنىڭ يولىنى ئېيتىپ بەرگەن. بىز بۇ ماقالىدە ھەقىقىي بەختنى تېپىشىمىزغا ياردەم بېرىدىغان ئۈچ قەدەم-باسقۇچنى مۇھاكىمە قىلىمىز.
b كۈزىتىش مۇنارى، 2014-يىل، 15-ئاۋغۇست سانىدىكى «ئۆز ۋاقتىدا روھىي ئوزۇقلۇققا ئېرىشىۋاتامسىز؟» ناملىق ماقالىنى ئوقۇڭ.
c كۆپرەك بىلىش ئۈچۈن، jw.org تور بېكىتىدىن «ئۇلار ئېتىقادى ئۈچۈن تۈرمىگە تاشلانغان» دېگەن سەھىپىنى كۆرۈڭ.
d سۈرەتتە: بۇ كۆرۈنۈشتە، قولغا ئېلىنىپ سوتقا ئېلىپ كېتىلىۋاتقان بۇرادەرنى گۇۋاھچىلار قوللاپ-قۇۋۋەتلەۋاتىدۇ.
