50-تەتقىق ماقالىسى
«سەن مەن بىلەن بىللە جەننەتتە بولىسەن»
«بەرھەق بۈگۈن ساڭا ئېيتىمەنكى، سەن مەن بىلەن بىللە جەننەتتە بولىسەن».—لۇقا 23:43.
19-ناخشا خۇدا ۋەدە قىلغان جەننەت
بۇ ماقالىدە a
1. ئەيسا ئۆلۈشتىن سەل ئاۋۋال ئۆز يېنىدىكى جىنايەتچىگە نېمە دېگەن؟ (لۇقا 23:39–43)
ئەيسا ۋە ئۇنىڭ يېنىدىكى ئىككى جىنايەتچى قىينىلىپ، ئاستا-ئاستا جان بېرىۋاتاتتى (لۇقا 23:32، 33). جىنايەتچىلەرنىڭ ھەر ئىككىسى ئەيسانى زاڭلىق قىلغان. شۇڭا ناھايىتى ئېنىقكى، ئۇلار ئۇنىڭ شاگىرتى ئەمەس (مەتتا 27:44؛ ماركۇس 15:32). ئەمما، ئۇلاردىن بىرىنىڭ يۈرىكى يۇمشاپ ئۆزگەرگەن. ئۇ: «ئەي ئەيسا، پادىشاھ بولغىنىڭدا مېنى ئەسلىگەيسەن»،— دېگەن. ئەيسا شۇنداق جاۋاب بەرگەن: «بەرھەق بۈگۈن ساڭا ئېيتىمەنكى، سەن مەن بىلەن بىللە جەننەتتە بولىسەن» (لۇقا 23:39–43-نى ئوقۇڭ). ھەرزىتى ئەيسا ۋەز قىلغان چاغلاردا، بۇ جىنايەتچىنىڭ «ئاسماندىكى پادىشاھلىق» ھەققىدىكى خەۋەرنى قوبۇل قىلغانلىقى ھەققىدە ھېچقانداق بىر مەلۇمات يوق. بۇنىڭدىن باشقا، ئەيسا ھەرگىزمۇ ئۇنى ئاسمان پادىشاھلىقىغا كىرىدۇ دېمىگەن (مەتتا 4:17). ئەكسىنچە، ئەيسا كەلگۈسى يەر يۈزىدىكى جەننەت ھەققىدە سۆز قىلغان ئىدى. نېمە ئۈچۈن شۇنداق دېيەلەيمىز؟
ئەيسا بىلەن سۆزلەشكەن جىنايەتچى ۋە ئۇنىڭ نېمە بىلىدىغانلىقى ھەققىدە قانداق خۇلاسە قىلالايمىز؟ (2، 3-ئابزاسلارغا قاراڭ)
2. توۋا قىلغان جىنايەتچىنىڭ يەھۇدىي ئىكەنلىكىنى قانداق بىلىمىز؟
2 ئاشۇ توۋا قىلغان جىنايەتچى بىر يەھۇدىي بولۇشى مۇمكىن. ئۇ جىنايەتچى يەنە بىرىگە: «سەن خۇدادىن قورقمامسەن؟ ئۆزۈڭمۇ بۇ ھۆكۈمگە ئۇچراۋاتسەنغۇ؟!»— دېگەن ئىدى (لۇقا 23:40). يەھۇدىيلار پەقەت بىرلا خۇداغا ئىبادەت قىلغان. ئەمما، يات مىللەتلەر كۆپ ئىلاھلارغا چوقۇنۇشقان ئىدى (چىق. 20:2، 3؛ 1-كورىنت. 8:5، 6). ئەگەر ئاشۇ جىنايەتچىلەر يەھۇدىيلار بولمىغان بولسا، شۇ جىنايەتچى: «سەن ئىلاھلاردىن قورقمامسەن؟»— دەپ سورىشى مۇمكىن ئىدى. ئۇنىڭدىن باشقا، ھەزرىتى ئەيسا باشقا مىللەتلەرگە ئەمەس، بەلكى «ئىسرائىل جەمەتىنىڭ ئادىشىپ قالغان قويلىرىغا» ئەۋەتىلگەن ئىدى (مەتتا 15:24). خۇدا ئىسرائىللارغا ئۆلۈكلەرنى تىرىلدۈرگەنلىكىنى بىلدۈرگەن. بەلكىم، پۇشايمان قىلغان جىنايەتچى بۇنى بىلگەن. ئېنىقكى، شۇ كىشى ئۆزىنىمۇ خۇدانىڭ تىرىلدۈرۈشىنى ئۈمىد قىلغان.
3. ئەيسا جەننەتنى تىلغا ئالغاندا، توۋا قىلغان جىنايەتچى نېمە ھەققىدە ئويلىغان بولۇشى مۇمكىن؟ چۈشەندۈرۈپ بېرىڭ (يارىتىلىش 2:15).
3 توۋا قىلغان جىنايەتچى بىر يەھۇدىي بولغاچقا، ئادەم-ئاتا بىلەن ھاۋا-ئانا ۋە ئۇلارنى يەھۋانىڭ جەننەتكە ئورۇنلاشتۇرغانلىقى ھەققىدە بىلگەن. شۇڭلاشقا، شۇ جىنايەتچى بەلكىم ئەيسا مەسىھ تىلغا ئالغان جەننەتنىڭ يەر يۈزىدىكى گۈزەل باغ بولۇشىغا ئىشەنگەن.—يارىتىلىش 2:15-نى ئوقۇڭ.
4. ئەيسانىڭ جىنايەتچىلەردىن بىرىگە قىلغان سۆزى بىزنى نېمە ھەققىدە ئويلىنىشقا ئۈندىشى كېرەك؟
4 ئەيسانىڭ جىنايەتچىگە قىلغان سۆزى بىزنى جەننەتتىكى ھاياتنىڭ قانداق بولىدىغانلىقى ھەققىدە ئويلىنىشقا ئۈندەيدۇ. ئەمەلىيەتتە، بىز سۇلايمان پادىشاھ ھۆكۈمرانلىق يۈرگۈزگەن مەزگىلدىكى تىنچ-ئامانلىقتىن، جەننەت ھەققىدە بەزى نەرسىلەرنى ئۆگىنىۋالالايمىز. بىز سۇلايماندىنمۇ ئۇلۇغ ئەيسانىڭ ۋە ئۇنىڭ بىلەن بىرلىكتە ھۆكۈمرانلىق قىلغۇچىلارنىڭ يەر يۈزىنى ئاجايىپ جەننەت ماكانغا ئايلاندۇرىدىغانلىقىنى ئۈمىد بىلەن كۈتەلەيمىز (مەتتا 12:42). ناھايىتى ئېنىقكى، «باشقا قويلار» جەننەتتە مەڭگۈ ياشاشقا لايىق بولالىشى ئۈچۈن ئۆزلىرىنىڭ نېمىلەرنى قىلىشى كېرەكلىكىگە قىزىقىشىدۇ.—يۇھاننا 10:16.
جەننەتتە ھايات قانداق بولىدۇ؟
5. سىزنىڭچە جەننەتتە ھايات قانداق بولىدۇ؟
5 جەننەتتىكى ھاياتنى ئويلىغىنىڭىزدا، نېمىلەرنى خىيال قىلىسىز؟ بەلكىم، سىز ئېرەم باغقا ئوخشاش گۈزەل باغچىنى تەسەۋۋۇر قىلىدىغانسىز (يارىت. 2:7–9). مىكاھ پەيغەمبەر يازغان مۇنۇ بېشارەتنى ئەسكە ئېلىشىڭىز مۇمكىن. خۇدا خەلقى «ھەر بىرى ئۆز ئۈزۈم تېلى ۋە ئۆز ئەنجۈر دەرىخىنىڭ ئاستىدا ئولتۇرىدۇ» (مىكاھھ 4:3، 4). مۇقەددەس يازمىلاردىكى يېمەك-ئىچمەكلەرنىڭ مول بولىدىغانلىقى توغرىسىدىكى ئايەتلەر ئېسىڭىزگە كېلىشى مۇمكىن (زەبۇر 72:16؛ يەشايا 65:21، 22). شۇڭا، ئۆزىڭىزنى چىرايلىق باغدا مەززىلىك يېمەكلىكلەر بىلەن تولغان داستىخاندا ئولتۇرغانلىقىڭىزنى كۆز ئالدىڭىزغا كەلتۈرەلەيسىز. بەلكىم، گۈل-گىياھلار ۋە دەل-دەرەخلەرنىڭ خۇش پۇراقلىرىغا تولغان ساپ ھاۋانى ھەمدە ئائىلىڭىزدىكىلەر، دوستلىرىڭىز ۋە ئۆلۈمدىن تىرىلدۈرۈلگەنلەر بىرگە جەم بولۇپ، خۇشاللىقتىن كۆتىرىلگەن شادلىق كۈلكە ئاۋازلىرىنى ئاڭلاۋاتقان شۇ پەيتلەرنى تەسەۋۋۇر قىلىشىڭىز مۇمكىن. ئەسلىدە بۇلارنىڭ ھەممىسى ھەرگىزمۇ خام-خىيال ئەمەس. شەك-شۈبھىسىزكى، بۇنداق كۆرۈنۈشلەر يەر يۈزىدە چوقۇم يۈز بېرىدۇ. بىراق، جەننەتتىكى ھايات شاد-خۇراملىق ئىچىدە ئىش-ئەمگەك قىلىشنىمۇ ئۆز ئىچىگە ئالىدۇ.
مۇھىم ۋەزىپىمىز — تىرىلگەنلەرگە تەلىم-تەربىيە بېرىش (6-ئابزاسقا قاراڭ)
6. بىز جەننەتتە نېمە قىلىمىز؟ (رەسىمگە قاراڭ)
6 يەھۋا خۇدا بىزنى ئىش-ئەمگىكىمىزدىن ھۇزۇرلىنىش ئۈچۈن ياراتقان (ۋەز 2:24). بولۇپمۇ، بىز مەسىھنىڭ مىڭيىللىق ھۆكۈمرانلىق مەزگىلىدە ئالدىراش بولۇپ كېتىمىز. دەھشەتلىك چوڭ بالايئاپەتتىن ئامان قالغانلار، شۇنداقلا مىليونلىغان تىرىلگەن كىشىلەر، كىيىم-كېچەك، يېمەك-ئىچمەك ۋە تۇرىدىغان جايغا مۇھتاج بولىدۇ. مۇشۇ موھتاجلىقلارنى قاندۇرۇش ئۈچۈن كۆپ ئىش-ئەمگەكلەرنى قىلىشقا توغرا كېلىدۇ. بۇ ئىش-ئەمگەك بىزگە خۇشاللىق بېغىشلايدۇ. خۇددى ئادەم-ئاتا بىلەن ھاۋا-ئانا ئۆتمۈشتە يەر يۈزىنى پەرۋىش قىلىشقا بۇيرۇلغاندەك، بىزمۇ يەر يۈزىنى جەننەتكە ئايلاندۇرۇش خىزمىتىدىن شاد-خۇراملىق تاپىمىز. يەھۋا ۋە ئۇنىڭ مەقسىتى ھەققىدە ئاز-تولا بىلىدىغان مىليونلىغان تىرىلگەن ئىنسانلارغا تەلىم بېرىش ۋە ھەزرىتى ئەيسادىن ئىلگىرىكى زامانلاردا ياشىغان ساداقەتمەن كىشىلەرنىڭ تېخىمۇ كۆپرەك نەرسىلەرنى ئۆگىنىشىگە ياردەم بېرىش نەقەدەر خۇشاللىنارلىق ئىش ئىكەنلىكىنى تەسەۋۋۇر قىلىپ بېقىڭ!
7. بىز نېمىگە ئىشەنچ قىلالايمىز ۋە نېمە ئۈچۈن؟
7 بىز كەلگۈسى جەننەتتىكى ھاياتنىڭ تىنچ-خاتىرجەم، باياشات، تەرتىپلىك تەشكىللىنىدىغانلىقىغا ئىشەنچ قىلالايمىز. نېمە ئۈچۈن؟ چۈنكى، يەھۋا ئاللىقاچان بىزگە ئۆز ئوغلىنىڭ ھۆكۈمرانلىقى ئاستىدىكى ھاياتنىڭ قانداق بولىدىغانلىقى ھەققىدە بىر ئۈلگىنى كۆرسىتىپ بەرگەن. بىز بۇنى سۇلايمان پادىشاھنىڭ ھۆكۈمرانلىق دەۋرى ھەققىدە خاتىرىلەنگەن يازمىلاردىن كۆرەلەيمىز.
سۇلايمان پادىشاھنىڭ ھۆكۈمرانلىقى جەننەتتىكى ھاياتتىن خەۋەر بېرىدۇ
8. زەبۇر 37:10، 11، 29-ئايەتتىكى داۋۇت يازغان بېشارەتلىك سۆزلەر قەدىمدە قانداق ئەمەلگە ئاشقان؟ (بۇ ژۇرنالدىكى «ئوقۇرمەنلەرنىڭ سوئاللىرى»غا قاراڭ)
8 پادىشاھ داۋۇت خۇدانىڭ ئىلھاملاندۇرۇشى بىلەن، كەلگۈسىدە بىر دانا ۋە سادىق پادىشاھ تەختكە ئولتارغاندا، ھاياتنىڭ قانداق بولىدىغانلىقى ھەققىدە يازغانىدى (زەبۇر 37:10، 11، 29-نى ئوقۇڭ). ئادەتتە كېلەچەك جەننەت ھەققىدە سۆھبەتلەشكەندە، بىز دائىم باشقىلارغا زەبۇر 37:11-ئايەتنى ئوقۇپ بېرىمىز. شۇنداق قىلىشىمىز ئۈچۈن يېتەرلىك سەۋەبلىرىمىز بار، چۈنكى ئەيسا تاغدىكى ۋەز-نەسىھەت نۇتۇقىدا مۇشۇ ئايەتنى نەقىل كەلتۈرۈپ، ئۇنىڭ كېلەچەكتە ئەمەلگە ئاشىدىغانلىقىنى كۆرسەتكەن (مەتتا 5:5). داۋۇتنىڭ سۆزلىرى يەنە پادىشاھ سۇلايماننىڭ كۈنلىرىدە ھاياتنىڭ قانداق بولىدىغانلىقىنى كۆرسەتكەن. سۇلايمان ئىسرائىلغا ھۆكۈمرانلىق قىلغاندا، خۇدا خەلقى «سۈت بىلەن ھەسەل ئاقىدىغان» زېمىندا تىنچ-خاتىرجەملىك ۋە باياشاتچىلىق ئىچىدە خۇشال-خۇرام ھايات كەچۈرگەن. خۇدا مۇنداق دېگەن ئىدى: «ئەگەر سىلەر يول-يورۇقلىرىم بويىچە مېڭىپ، ئەمرلىرىمنى تۇتۇپ، ئۇلارغا ئەمەل قىلساڭلار، . . . زېمنىڭلارغا تىنچ-ئامانلىق بېرىمەن، قورقۇنچ ئىچىدە ياتمايسىلەر» (لاۋى. 20:24؛ 26:3، 6). بۇ ۋەدىلەر سۇلايمان پادىشاھلىق قىلغان مەزگىلدە ئەمەلگە ئاشۇرۇلغان (1-تارىخ. 22:9؛ 29:26–28). ئۇنىڭدىن باشقا، رەزىللەر «يوق بولار» دېگەن ۋەدىمۇ بولغان (زەبۇر 37:10). شۇڭلاشقا، زەبۇر 37:10، 11، 29-ئايەتلەردىكى بېشارەتلەر قەدىمدە ئەمەلگە ئاشقان بولۇپ، كەلگۈسىدە يەنە ئەمەلگە ئاشىدۇ.
9. شىبانىڭ خانىشى سۇلايمان پادىشاھنىڭ ھۆكۈمرانلىقى ھەققىدە نېمە دېگەن؟
9 سۇلايماننىڭ ھۆكۈمرانلىقى ئاستىدا ئىسرائىللار بەھرىمەن بولغان تىنچلىق ۋە باياشاتچىلىق خەۋەرلىرى شىبانىڭ خانىشىنىڭ قۇلىقىغا يەتكەن. بۇ ئايال پادىشاھ ئاڭلىغانلىرىنى ئۆز كۆزى بىلەن كۆرۈش ئۈچۈن يىراق يۇرتتىن يېرۇسالىمغا كەلگەن (1-پادىشاھ. 10:1). سۇلايماننىڭ پادىشاھلىقىنى كۆزدىن كەچۈرگەندىن كېيىن، ئۇ شۇنداق دېگەن: «مېنىڭ ئاڭلىغانلىرىم ئەسلىدە كۆرگەنلىرىمنىڭ يېرىمىغىمۇ يەتمەيدىكەن! . . . سىلىنىڭ پۇقرالىرى نەقەدەر بەختلىك! دائىم ئالدىلىرىدا تۇرۇپ، ھېكمەتلىرىنى ئاڭلاۋاتقان خىزمەتچىلىرى نەقەدەر بەختلىكتۇر!» (1-پادىشاھ. 10:6–8). ئەمما، سۇلايمان ھۆكۈمرانلىق قىلغان مەزگىلدىكى تۇرمۇش شارائىتلىرى يەھۋا خۇدانىڭ ئوغلى ئەيسا ھۆكۈمرانلىق قىلغاندا، ئىنسانىيەت ئۈچۈن نېمىلەرنى قىلىدىغانلىقىنى ئالدىن خەۋەر بەرگەن.
10. ئەيسا قايسى جەھەتلەردە سۇلايماندىن ئۈستۈن تۇرىدۇ؟
10 ئەيسا ھەر جەھەتتىن سۇلايماندىن ئۈستۈن تۇرغان. سۇلايمان نامۇكەممەل ئىنسان بولغان ۋە ئېغىر خاتالىقلارنى ئۆتكۈزۈپ، ئاخىرىدا خۇدانىڭ خەلقىنى جاپا-مۇشەققەتكە دۇچار قىلغان. ئەكسىنچە، ئەيسا مەسىھ بولسا مۇكەممەل ھۆكۈمران ۋە ھېچقانداق خاتالىق ئۆتكۈزمەيدۇ (لۇقا 1:32؛ ئىبرانىي. 4:14، 15). شەيتاننىڭ قىيىن سىناقلىرىغا قارىماي، ئەيسا مەسىھ خۇداغا سادىق قالغان. مەسىھ ئۆزىنىڭ ھەرگىزمۇ گۇناھ ئۆتكۈزمەيدىغانلىقى ياكى ئۆز پۇقرالىرىغا زىيان يەتكۈزمەيدىغانلىقىنى ئىسپاتلىغان. ئۇ بىز ئۈچۈن ھەقىقەتەن ئەڭ ياخشى پادىشاھ بولالايدۇ.
11. ئەيسانىڭ ھۆكۈمرانلىق قىلىشىغا كىملەر ياردەم بېرىدۇ؟
11 ئەيسا ئىنسانىيەتكە كۆڭۈل بۆلۈش ۋە يەھۋانىڭ يەر يۈزىدىكى مەقسىتىنى ئەمەلگە ئاشۇرۇشتا 144000 باشقۇرغۇچىلار بىلەن ھەمكارلىشىدۇ (ۋەھىي. 14:1–3). ئۇلار سادىق ئەرلەر ۋە ئاياللار بولۇپ، يەر يۈزىدە ياشىغاندا بېشىدىن نۇرغۇن سىناقلار ۋە ئازاب-ئوقۇبەتلەرنى ئۆتكۈزگەن. شۇڭا، ئۇلار ئىنسانىيەتكە ھېسداشلىق قىلالايدىغان باشقۇرغۇچىلار بولىدۇ. ئېنىقراق ئېيتقاندا، بۇ باشقۇرغۇچىلار نېمە ئىش قىلىدۇ؟
مەسىھ قىلىنغانلار نېمە ئىش قىلىدۇ؟
12. يەھۋا 144000 تاللانغانلارغا قانداق ۋەزىپىنى تاپشۇرىدۇ؟
12 ئەيسا ۋە ئۇنىڭ بىلەن بىللە باشقۇرىدىغانلارغا تاپشۇرۇلغان ۋەزىپە سۇلايمانغا بېرىلگەن ۋەزىپىدىنمۇ كۆپرەك ئىشلارنى ئۆز ئىچىگە ئالىدۇ. ئىسرائىلنىڭ پادىشاھى پەقەت بىر دۆلەتتە نەچچە مىليون كىشىگە غەمخورلۇق قىلىشى كېرەك ئىدى. بىراق، خۇدا پادىشاھلىقىدا ھۆكۈمرانلىق قىلىدىغانلار پۈتكۈل يەر يۈزىدە ياشايدىغان مىلياردلارچە ئىنسانلارغا غەمخورلۇق قىلىدۇ. يەھۋا ئاشۇ 144000 تاللانغانلارغا ئاجايىپ ئىمتىيازنى بەرگەن.
13. ئەيسا بىلەن بىللە ھۆكۈمرانلىق قىلىدىغانلارغا قانداق ئۆزگىچە خىزمەت تاپشۇرۇلغان؟
13 ئەيساغا ئوخشاش، ئاشۇ 144000 تاللانغانلار پادىشاھلار ۋە روھانىيلار بولۇپ خىزمەت قىلىدۇ (ۋەھىي. 5:10). مۇسا پەيغەمبەرگە چۈشۈرۈلگەن قانۇنغا ئاساسلانغاندا، روھانىيلار ئاساسلىقى خەلقنىڭ جىسمانىي ساغلاملىقىنى قوغداش بىلەن بىرگە روھىي جەھەتتىن ساغلام بولۇشىغا مەسئۇل كىشىلەر ئىدى. بۇ قانۇن كېلەچەكتە بولىدىغان ئىشلارنىڭ كۆلەڭگىسى بولغان. شۇڭا، مۇنداق خۇلاسە چىقىرىش ناھايىتى ئورۇنلۇق، ئەيسا بىلەن بىللە ھۆكۈمرانلىق قىلىدىغانلار خۇدا خەلقنىڭ جىسمانىي ۋە روھىي ئېھتىياجلىرىنى تەمىنلەش ئۈچۈن ياردەم بېرىدۇ (ئىبرانىي. 10:1). بىز بۇ پادىشاھلار ۋە روھانىيلارنىڭ يەر يۈزىدىكى پۇقرالىرى بىلەن قانداق ئالاقە قىلىدىغانلىقىنى ھازىرچە بىلمەيمىز. يەھۋانىڭ قانداق ئورۇنلاشتۇرۇشىدىن قەتئىينەزەر، بىز كەلگۈسى يەر يۈزى جەننەتتە ياشايدىغانلار مۇھتاج بولىدىغان يول-يورۇقلارغا ئېرىشەلەيدىغانلىقىغا ئىشىنەلەيمىز.—ۋەھىي. 21:3، 4.
«باشقا قويلار» جەننەتتە ياشاشقا لايىق بولالىشى ئۈچۈن چوقۇم نېمە ئىش قىلىشى كېرەك؟
14. «باشقا قويلار» بىلەن مەسىھنىڭ قېرىنداشلىرى ئارىسىدا قانداق مۇناسىۋەت بار؟
14 ئەيسا ئۆزى بىلەن بىرلىكتە ھۆكۈمرانلىق قىلىدىغانلارنى «كىچىك پادا» دەپ ئاتىغان ئىدى (لۇقا 12:32). ئۇ يەنە «باشقا قويلار» دەپ ئاتىلىدىغان ئىككىنچى توپ كىشىلەر ھەققىدە سۆز قىلغان. بۇ ئىككى توپ كىشىلەر بىر توپ پادىنى تەشكىل قىلىدۇ (يۇھاننا 10:16). بۇ ئىككى توپ ئاللىقاچان ھەمكارلىشىپ خىزمەت قىلىۋاتىدۇ. يەر يۈزى جەننەتكە ئايلانغاندىمۇ بىرلىكتە خىزمەت قىلىشنى داۋاملاشتۇرىدۇ. ئەلۋەتتە، شۇ ۋاقىتتا «كىچىك پادا» ئاسماندا بولىدۇ. «باشقا قويلارنىڭ» يەر يۈزىدە مەڭگۈ شاد-خۇرام ياشاش ئۈمىدى بولىدۇ. ئەمما، «باشقا قويلار» جەننەتتە ياشاشقا لايىق بولۇش ئۈچۈن ھازىرنىڭ ئۆزىدە قىلىشقا تېگىشلىك ئىشلار بار.
ھەتتا ھازىر بىز كەلگۈسى جەننەتتە ياشاشقا تەييارلىنىۋاتقانلىقىمىزنى كۆرسىتەلەيمىز (15-ئابزاسقا قاراڭ) b
15. (1) «باشقا قويلار» مەسىھنىڭ قېرىنداشلىرى بىلەن قانداق ھەمكارلىشىدۇ؟ (2) دۇكاندىكى بۇرادەرنى قانداق ئۈلگە قىلالايسىز؟ (رەسىمگە قاراڭ)
15 پۇشايمان قىلغان جىنايەتچى مەسىھكە بولغان مىننەتدارلىقىنى تولۇق ئىپادىلەش پۇرسىتىگە ئېرىشىشتىن بۇرۇن ئۆلۈپ كەتتى. ئۇنىڭ بىلەن سېلىشتۇرغاندا، «باشقا قويلارنىڭ» ھازىر ئەيساغا مىننەتدارلىقىنى بىلدۈرىدىغان نۇرغۇن پۇرسەتلىرى بار. مەسىلەن، بىز ھەزرىتى ئەيسانىڭ مۇقەددەس روھ بىلەن مەسىھ قىلىنغان قېرىنداشلىرىغا ياخشى مۇئامىلە قىلىش ئارقىلىق، ئۇنىڭغا بولغان سۆيگۈ-مۇھەببىتىمىزنى ئىپادىلەيمىز. ئەيسا بۇنىڭغا ئاساسەن قويلارنى ھۆكۈم قىلىدىغانلىقىنى ئېيتقان (مەتتا 25:31–40). ۋەز ئېيتىش ۋە شاگىرت يېتىشتۈرۈش خىزمىتىدە، ئەيسانىڭ قېرىنداشلىرىغا قىزغىنلىق بىلەن ياردەم بېرىش ئارقىلىق ئۇلارنى قوللاپ-قۇۋۋەتلىيەلەيمىز (مەتتا 28:18–20). بۇنىڭ ئۈچۈن، بىز ئۇلار تەمىنلىگەن مۇقەددەس كىتابنى تەتقىق قىلىش قوراللىرىدىن، مەسىلەن «مەڭگۈ شاد-خۇرام ياشاڭ!» ناملىق كىتابتىن ياخشى پايدىلىنىشىمىز كېرەك. ئەگەر سىز تېخى بىرەر كىشى بىلەن مۇقەددەس كىتاب تەتقىق ئۆگىنىشىنى ئۆتكۈزمىگەن بولسىڭىز، ئىمكانقەدەر كۆپرەك كىشىلەرنى مۇقەددەس كىتابنى ئۆگىنىشكە تەكلىپ قىلىش ئۈچۈن مەقسەت قويۇڭ.
16. خۇدا پادىشاھلىقىنىڭ پۇقراسى بولۇش ئۈچۈن ھازىر نېمە قىلالايمىز؟
16 ياراتقۇچى يەھۋا جەننەتتە بولۇشىنى خالايدىغان ئادەم بولۇشىمىز ئۈچۈن، جەننەتنىڭ كېلىشىنى ساقلاشنىڭ ھاجىتى يوق. ھازىر گەپ-سۆزلىرىمىز ۋە ئىش-ھەرىكەتلىرىمىزدە سەمىمىي بولۇپ، ھاياتىمىزدا تەڭپۇڭلۇقنى ساقلىيالاايمىز. ئۇنىڭدىن باشقا، بىز يەھۋاغا، نىكاھتا باغلانغان جۈپتىمىزگە ۋە باشقا ئېتىقادچى قېرىنداشلارغا سادىق بولالايمىز. بىز بۇ رەزىل دۇنيادا ياشاۋاتقىنىمىزدا، خۇدانىڭ ئۆلچەم-قائىدىلىرىگە بويسۇنۇپ ياشىساق، كەلگۈسى جەننەتتە ئۇنىڭغا بويسۇنۇپ ياشاش تېخىمۇ ئاسانراق بولىدۇ. بىز يەنە تۈرلۈك ماھارەتلەرنى ۋە پەزىلەتلەرنى يېتىلدۈرۈش ئارقىلىق ئۆزىمىزنىڭ جەننەتتە ياشاشقا تەييارلىق قىلىۋاتقانلىقىمىزنى كۆرسىتەلەيمىز. بۇ سان ژۇرنالدىكى «يەرنى مىراس ئېلىشقا تەييارمۇسىز؟» ناملىق ماقالىنى ئوقۇڭ.
17. ئىلگىرى ئۆتكۈزگەن گۇناھلىرىمىز تۈپەيلى چۈشكۈنلىشىپ كېتىشىمىز كېرەكمۇ؟ چۈشەندۈرۈپ بېرىڭ.
17 ئۆتمۈشتە ئۆتكۈزگەن ئېغىر گۇناھلىرىمىز تۈپەيلى، ئۆزىمىزنى گۇناھكار ھېس قىلىشىمىز مۇمكىن، ئەمما شۇنداق ھېس-تۇيغۇدىن يىراق بولۇشقا تىرىشىمىز لازىم. ئەلۋەتتە، بىز ھەرگىزمۇ «تۆلەم قۇربانلىقىنى» باھانە قىلىپ، قەستەن گۇناھ قىلمايمىز (ئىبرانىي. 10:26–31). ئەگەر بىز چىن قەلبىمىزدىن ئېغىر گۇناھىمىز ئۈچۈن ھەقىقىي توۋا قىلغان، يەھۋادىن ۋە ئاقساقاللاردىن ياردەم سورىغان، شۇنىڭ بىلەن بىرگە يۈرۈش-تۇرۇشىمىزنى ئۆزگەرتكەن بولساق، ياراتقۇچىمىزنىڭ بىزنى پۈتۈنلەي كەچۈرگەنلىكىگە ئىشەنچ قىلالايمىز (يەشايا 55:7؛ ئەلچى. 3:19). ئەيسانىڭ پەرىسىيلەرگە ئېيتقان مۇنۇ سۆزىنى ئېسىڭىزدە ساقلاڭ: «مەن ھەققانىي ئادەملەرنى ئەمەس، بەلكى گۇناھكارلارنى چاقىرىشقا كەلدىم» (مەتتا 9:13). تۆلەم قۇربانلىقى بىزنىڭ بارلىق گۇناھلىرىمىزنى يېپىش كۈچىگە ئىگە.
جەننەتتە مەڭگۈ ياشىيالايسىز
18. ئەيسانىڭ يېنىدا ئۆلتۈرۈلگەن جىنايەتچى بىلەن نېمىلەرنى سۆزلەشنى خالايسىز؟
18 ئۆزىڭىزنىڭ جەننەتتە بولۇپ، ئەيسا بىلەن سۆزلەشكەن جىنايەتچى بىلەن پاراڭلىشىۋاتقانلىقىنى تەسەۋۋۇر قىلالامسىز؟ شەك-شۈبھىسىزكى، ھەر ئىككىڭلار ئەيسانىڭ تۆلەم قۇربانلىقىغا مىننەتدارلىق بىلدۈرىسىلەر. سىز بەلكىم ئۇ كىشىدىن ئەيسانىڭ يەر يۈزىدىكى ھاياتىنىڭ ئاخىرقى بىر قانچە سائىتىدە يۈز بەرگەن ئىشلار ۋە ئۇنىڭ تەلىپىگە ئەيسا جاۋاب قايتۇرغاندىكى ھېس-تۇيغۇسى ھەققىدە تېخىمۇ كۆپرەك سۆزلەپ بېرىشنى ئۆتۈنۈشىڭىز مۇمكىن. ئەكسىنچە، ئۇ سىزدىن شەيتاننىڭ دۇنياسىدا ئاخىرقى كۈنلەردە ياشاشنىڭ قانداق بولغانلىقىنى سورىشى مۇمكىن. ئۇ كىشىگە ئوخشاش كىشىلەر بىلەن خۇدا سۆزىنى تەتقىق قىلىپ ئۆگىنىش نەقەدەر شان-شەرەپلىك ئىش-ھە!—ئەفەس. 4:22–24.
مىڭ يىللىق پادىشاھلىق ۋاقتىدا بىر بۇرادەر ئۆزى راۋاجلاندۇرۇشنى ئۈمىد قىلغان تالانت ئۈستىدىن ئىشلەشتىن خۇشاللىق تېپىۋاتىدۇ (19-ئابزاسىغا قاراڭ)
19. نېمە ئۈچۈن جەننەتتىكى ھايات زېرىكىشلىك بولمايدۇ؟ (مۇقاۋىدىكى رەسىمگە قاراڭ)
19 جەننەتتىكى ھايات ھەرگىزمۇ زېرىكىشلىك بولمايدۇ. بىز دائىم قىزىقارلىق ئىشلارنى باشتىن كەچۈرگەن كىشىلەر بىلەن كۆرۈشىمىز ۋە ئەھمىيەتلىك ئىشلارنى قىلىمىز. ئەڭ مۇھىمى، بىز ھەر كۈنى ئەرشتىكى ئاتىمىزنى تېخىمۇ ياخشى تونۇپ، ئۇ تەمىنلىگەن نەرسىلەردىن ھۇزۇرلىنالايمىز. ئۇ توغرىسىدا ئۆگىنىدىغان بىلىم ھەرگىز تۈگەپ قالمايدۇ. ئۇنىڭ ياراتقانلىرى توغرىسىدا ئۆگىنىدىغان يەنە نۇرغۇن نەرسىلەر بار. قانچە ئۇزۇن ياشىساق، خۇداغا بولغان مۇھەببىتىمىز شۇنچە چوڭقۇر بولىدۇ. ياراتقۇچى يەھۋا ۋە مەسىھ ئەيسا بىزنىڭ جەننەتتە مەڭگۈ ياشىيالىشىمىز ئۈچۈن ۋەدە بەرگەن. بۇنىڭ ئۈچۈن بىز ئىنتايىن مىننەتدارمىز!
136-ناخشا پادىشاھلىق ئورنىتىلدى. ئۇ كەلگەي!
a جەننەتتىكى ھاياتنىڭ قانداق بولىدىغانلىقى ھەققىدە دائىم ئويلىنامسىز؟ بۇنداق قىلىش بىزگە ئىلھام-مەدەت بېرىدۇ. يەھۋانىڭ بىز ئۈچۈن نېمىلەرنى تەييارلاپ قويغانلىقى توغرىسىدا قانچە كۆپ ئويلانساق، باشقىلارغا يېڭى دۇنيا ھەققىدە ئۆگىتىش قىزغىنلىقىمىز تېخىمۇ كۈچىيىدۇ. بۇ ماقالە ئەيسانىڭ كېلەچەك جەننەت توغرۇلۇق بەرگەن ۋەدىسىگە بولغان ئىشەنچىمىزنى كۈچەيتىشكە ياردەم بېرىدۇ.
b سۈرەتتە: تىرىلگەنلەرگە تەلىم-تەربىيە بېرىش ئىشىغا قاتنىشىشنى ئۈمىد قىلىدىغان بۇرادەر ئاللىقاچان باشقىلارغا تەلىم بېرىۋاتىدۇ.
