50-تەتقىق ماقالىسى
ئىمان ۋە ئەمەل ھەققانىيلىققا باشلايدۇ
«ئۇنىڭ [ئىبراھىمنىڭ] ئىمانىنى ئۈلگە قىلىپ، ئىزىدىن ماڭغانلارنىڭمۇ ئاتىسى».—رىملىقلار 4:12.
54-ناخشا ئىماندا چىڭ تۇرايلى!
بۇ ماقالىدە a
1. بىز ئىبراھىمنىڭ ئىمان-ئېتىقادى توغرىسىدا ئوقۇغاندا، بەلكىم قانداق سوئال پەيدا بولغان؟
نۇرغۇن كىشىلەر ئىبراھىم پەيغەمبەر توغرۇلۇق ئاڭلىغان بولسىمۇ، ئۇ ھەققىدە ئىنتايىن ئاز نەرسىلەرنى بىلىدۇ. بىراق، سىز ئىبراھىم ھەققىدە كۆپ نەرسىلەرنى بىلىسىز. مەسىلەن، ئىبراھىم «ئىمان بىلەن ياشىغان بارلىق كىشىلەرنىڭ ئاتىسى» دەپ ئاتالغانلىقىنى بىلىسىز (رىملىقلار 4:11). بەلكىم، ئىلگىرى شۇنداق ئويلىغانسىز: ‹مەن ئىبراھىم پەيغەمبەردىن ئۈلگە ئېلىپ، ئىمان-ئېتىقادىم كۈچلۈك كىشى بولالايمەنمۇ؟›. ئەمەلىيەتتە، سىزمۇ بولالايسىز.
2. نېمە ئۈچۈن ئىبراھىمنىڭ مىسالىنى تەتقىق قىلىش مۇھىم؟ (ياقۇپ 2:22، 23)
2 ئىبراھىمغا ئوخشاش ئىمان-ئېتىقادى كۈچلۈك بولۇشنىڭ بىر يولى — ئۇنىڭ ئۈلگىسىنى تەتقىق قىلىپ ئۆگىنىش. خۇدانىڭ بۇيرۇقى بىلەن، ئىبراھىم يىراق بىر يەرگە كۆچۈپ باردى. ئۇزۇن يىللار چېدىردا ياشىدى ۋە ئەڭ ياخشى كۆرگەن سۆيۈملۈك ئوغلى ئىسھاقنى قۇربان قىلىشقا تەييار بولدى. چۈنكى، ئىبراھىمنىڭ يەھۋاغا بولغان ئېتىقادى كۈچلۈك بولغان. ئىمان-ئېتىقادى ۋە كۆپ ياخىشى ئەمەللىرى ئارقىلىق خۇدانىڭ ماقۇللىشىغا ۋە دوستلۇقىغا ئېرىشكەن (ياقۇپ 2:22، 23-نى ئوقۇڭ). يەھۋا ھەممىمىزنىڭ، سىزنىڭمۇ، شۇنداق بەرىكەتلەرگە ئېرىشىشىڭىزنى خالايدۇ. شۇڭا، خۇدا خىزمەتچىلىرى پاۋلۇس ۋە ياقۇپنى ئۆز خەتلىرىدە ئىبراھىمنىڭ ئۈلگىسىگە دىققەت ئاغدۇرۇشقا ئىلھاملاندۇرغان. ھازىر رىملىقلار 4-باب ۋە ياقۇپ 2-بابىنى مۇھاكىمە قىلىپ چىقىمىز. ھەر ئىككى بابلاردا ئىبراھىم ھەققىدە ئىنتايىن مۇھىم بايانلار يېزىپ قالدۇرۇلغان.
3. پاۋلۇس بىلەن ياقۇپ مۇقەددەس يازمىلاردىن قايسى ئايەتلەرنى نەقىل كەلتۈرگەن؟
3 پاۋلۇس ۋە ياقۇپ ھەر ئىككىلىسى يارىتىلىش 15:6-ئايەتتىن نەقىل كەلتۈرگەن: «[ئىبراھىم] يەھۋاغا ئىشەندى ۋە خۇدا ئۇنى ھەققانىي ئادەم، دەپ ھېسابلىدى». بىر كىشى يەھۋانى خۇرسەن قىلىدىغان ئىشلارنى قىلسا، يەھۋا ئۇنى ئەيىبسىز دەپ قارايدۇ. نامۇكەممەل گۇناھكار ئىنساننىڭ خۇدا تەرىپىدىن ئەيىبسىز دەپ قارىشى ئاجايىپ ئىش ئەمەسمۇ؟ سىزمۇ چوقۇم خۇدانىڭ نەزەرىدە ھەققانىي كىشى بولالايسىز. بۇنىڭ قانداق مۇمكىن بولىدىغانلىقىنى بىلىش ئىبراھىم ھەققانىي ئادەم دەپ ھېسابلانغانلىقىنىڭ سەۋەبىنى كۆرۈپ باقايلى.
ھەققانىي ئادەم بولۇش ئۈچۈن ئىمان-ئېتىقاد كېرەك
4. ئىنسانلارنىڭ ھەققانىي ھېسابلىنىشىغا نېمە توسالغۇ بولىدۇ؟
4 پاۋلۇس رىملىقلارغا يازغان خېتىدە، پۈتۈن ئىنسانلارنىڭ گۇناھكارلىقىنى تىلغا ئالغان (رىملىقلار 3:23). ئۇنداقتا، بىرى خۇدانىڭ قوبۇل قىلىشىغا ئېرىشىپ، ھەققانىي ياكى ئەيىبسىز ئادەم دەپ ھېسابلىنىشى ئۈچۈن نېمە قىلالايدۇ؟ سەمىمىي ئېتىقادداشلىرىنىڭ بۇ سوئالنىڭ جاۋابىنى تېپىشىغا ياردەم بېرىش ئۈچۈن، ئەلچى پاۋلۇس ئىبراھىمنىڭ مىسالىنى قوللانغان.
5. يەھۋا نېمە ئۈچۈن ئىبراھىمنى ھەققانىي دەپ جاكارلىغان؟ (رىملىقلار 4:2–4)
5 ئىبراھىم قانان زېمىنىدا ياشىغاندا، يەھۋا ئۇنى ھەققانىي ئادەم دەپ جاكارلىغان. نېمە ئۈچۈن يەھۋا خۇدا شۇنداق ئېيتالىغان؟ ئىبراھىم تەۋرات قانۇنىنى پۈتۈنلەي ئورۇنلىغانلىقى ئۈچۈنمۇ؟ ئەلۋەتتە، ياق (رىملىقلار 4:13). چۈنكى، بۇ ۋەقەدىن 400 يىل ئۆتكەندىن كېيىن، تەۋرات قانۇنى چۈشۈرۈلگەن. ئۇنداقتا، نېمىگە ئاساسەن يەھۋا ئىبراھىمنى ھەققانىي ئادەم دەپ جاكارلىغان؟ يەھۋا مول رەھىم-شەپقىتىنى كۆرسىتىپ، ئىبراھىمنى ئىمان-ئېتىقادى سەۋەبلىك ھەققانىي كىشى دەپ جاكارلىغان.—رىملىقلار 4:2–4-نى ئوقۇڭ.
6. يەھۋا گۇناھكار كىشىنى قانداقلارچە ھەققانىي دەپ جاكارلايدۇ؟
6 ئەلچى پاۋلۇس شۇنداق دېگەن: خۇداغا ئىشەنگەن كىشى، «ئىمان-ئېتىقادى بىلەن ھەققانىي ئادەم ھېسابلىنىدۇ» (رىملىقلار 4:5). كېيىن، ئۇ مۇنداق دەپ قوشۇپ قويغان: «داۋۇت پادىشاھ ھەم، خۇدا ئەمەللىرىگە قارىماستىن، ھەققانىي ئادەم دەپ ھېسابلايدىغان كىشى بەختلىك بولىدىغانلىقى توغرىسىدا مۇنداق دېگەن: ‹خاتا قىلمىشلىرى كەچۈرۈلگەن ۋە گۇناھلىرى ئەپۇ قىلىنغانلار بەختلىكتۇر. يەھۋا گۇناھىنى ھېسابقا ئالمايدىغان كىشى بەختلىكتۇر!›» (رىملىقلار 4:6–8؛ زەبۇر 32:1، 2). خۇدا ئۆزىگە ئىشەنگەن كىشىلەرنىڭ گۇناھلىرىنى ئەپۇ قىلىدۇ. ئۇ ئۇلارنى پۈتۈنلەي كەچۈرىدۇ. خۇدا شۇنداق كىشىلەرنى ئىمان-ئېتىقادى سەۋەبلىك ئەيىبسىز ۋە ھەققانىي دەپ قارايدۇ.
7. ئۆتمۈشتىكى سادىق خىزمەتچىلەرنى قايسى مەنىدە ھەققانىي بولغان؟
7 خۇدا گەرچە ئىبراھىم، داۋۇت ۋە باشقا سادىق خىزمەتچىلىرىنى ھەققانىي ئادەم دەپ ھېسابلىغان بولسىمۇ، ئۇلار نامۇكەممەل گۇناھكارلار ئىدى. ئەمما، بولۇپمۇ ھەق خۇداغا ئىبادەت قىلمىغانلارغا سېلىشتۇرغاندا، ئۇلارنى ئەيىبسىز كىشىلەر دەپ قارىغان (ئەفەس. 2:12). پاۋلۇس رىملىقلارغا يازغان خېتىدە چۈشەندۈرگەندەك، بىز خۇدانىڭ دوستى بولۇشىمىز ئۈچۈن چوقۇم ئىمانىمىز بولۇشى شەرت. ئىبراھىم ۋە داۋۇتلار خۇدانىڭ دوستى بولالىغان. بىزمۇ ئۇلاردىن ئۈلگە ئېلىپ، خۇدانىڭ دوستلىرى بولالايمىز.
ئىمان-ئېتىقاد ئەمەلىي ئىش-ھەرىكەتتە ئىپادىلىنىدۇ
8، 9. بەزى كىشىلەر پاۋلۇس ۋە ياقۇپنىڭ يازغانلىرىدىن قانداق خاتا خۇلاسە چىقاردى ۋە نېمە ئۈچۈن؟
8 ئەسىرلەر بويى، خرىستىئان دىنى رەھبەرلىرى ئىمان-ئېتىقاد بىلەن ئەمەلىي ئىش-ھەرىكەت ئارىسىدىكى باغلىنىش توغرىسىدا قىزغىن بەس-مۇنازىرە قىلىپ كېلىۋاتىدۇ. بەزى دىنىي رەھبەرلەر قۇتقۇزۇلۇش ئۈچۈن پەقەتلا ئەيسا مەسىھكە ئىشىنىش كېرەك دەپ ئۆگىتىدۇ. بەلكىم، ئۇلارنىڭ مۇنداق دېگىنىنى ئاڭلىغانسىز: «قۇتۇلۇش ئۈچۈن ئەيساغا ئىشىنىش يېتەرلىك». ئۇلار ھەتتا پاۋلۇسنىڭ سۆزلىرىنى نەقىل كەلتۈرىدۇ: «خۇدا ئەمەللىرىگە قارىماستىن، ھەققانىي دەپ ھېسابلايدىغان كىشى بەختلىك» (رىملىقلار 4:6). بىراق، باشقىلار قۇتقۇزۇلۇش ئۈچۈن چېركاۋلار مۇقەددەس دەپ ھېسابلايدىغان يەرلەرنى زىيارەت قىلىپ، ياخشى ئىشلارنى قىلىش كېرەك دەيدۇ. ئۇلار دەلىل-ئىسپات سۈپىتىدە، ياقۇپ 2:24-ئايەتنى ئىشلىتىشى مۇمكىن: «بىر ئىنسان ئەمەللىرى بىلەن ھەققانىي ئادەم دەپ جاكارلىنىدۇ، پەقەت ئىمان-ئېتىقادى بىلەنلا ئەمەس».
9 ئەلچى پاۋلۇس بىلەن ياقۇپ يازغان تەلىملەر پەرقلىق بولغاچ، دىنىي رەھبەرلەر ئۇلار بۇ مەسىلىدە كېلىشمەي قالغان دەپ خۇلاسە قىلىدۇ. بەزى دىنىي ئۇستازلارنىڭ كۆز قارىشى بويىچە، ئەلچى پاۋلۇس خۇدانىڭ قوبۇل قىلىشىغا ئېرىشىش ئۈچۈن پەقەت ئىمان-ئېتىقادى بولسا يېتەرلىك دەپ ئىشەنگەن؛ بىراق ياقۇپ چوقۇم ياخشى ئىش-ھەرىكەتلەرنى قىلىش كېرەك دېگەن. بىر ئىلاھشۇناسلىق پروفېسسورى مۇنداق دېگەن: «ياقۇپ، پاۋلۇسنىڭ نېمىشقا ھەققانىي دەپ جاكارلىنىش ئۈچۈن پەقەت ئىمان بولسىلا يېتەرلىك بولىدىغانلىقىنى تەكىتلىگەنلىكىنى چۈشەنمىگەن ۋە پاۋلۇسنىڭ چۈشەندۈرۈشىگە قوشۇلمىغان». بىراق، بىز بىلىمىزكى، مەيلى پاۋلۇس ياكى ياقۇپ بولسۇن، بۇ سۆزلەرنى خۇدانىڭ ئىلھامى بويىچە يازغان (2-تىموت. 3:16). شۇڭا، ئۇلارنىڭ يازغانلىرى بىر-بىرىگە ماس كېلىدىغانلىقىنى چۈشىنىش ئۈچۈن ئالدى-كەينىدىكى ئايەتلەرگە قاراپ باقايلى.
پاۋلۇس رىمدىكى يەھۇدىي مەسىھ ئەگەشكۈچىلىرىگە تەۋرات قانۇنىغا ئەمەل قىلىش ئەمەس، ئىمان بولۇشىنىڭ مۇھىملىقىنى تەكىتلىگەن (10-ئابزاسقا قاراڭ) b
10. پاۋلۇس قايسى «ئىشلار» ھەققىدە يازغان؟ (رىملىقلار 3:21، 28) (رەسىمگە ھەم قاراڭ)
10 پاۋلۇس رىملىقلار 3 ۋە 4-بابلاردا قايسى «ئىشلار» ھەققىدە يازغان؟ ئۇ ئاساسلىقى، «قانۇندا تەلەپ قىلغان ئىشلار»، يەنى سىناي تېغىدا مۇساغا بېرىلگەن قانۇن توغرۇلۇق ئېيتقان (رىملىقلار 3:21، 28-نى ئوقۇڭ). قارىماققا، پاۋلۇسنىڭ كۈنلىرىدە بەزى يەھۇدىي مەسىھ ئەگەشكۈچىلىرى تەۋرات قانۇنى كۈچىنى يوقاتمىدى ۋە ئۇنىڭدا يېزىلغان تەلەپلەرنى ئورۇنلاش شەرت دەپ ئويلىغان. شۇ سەۋەب، پاۋلۇس ئىبراھىمنىڭ مىسالىنى كەلتۈرۈپ، خۇدانىڭ كۆز ئالدىدا ھەققانىي ھېسابلىنىش ئۈچۈن، «قانۇندا تەلەپ قىلغان ئىشلارغا» ئەمەل قىلىش ئەمەس، ئىمان بولۇشى كېرەكلىكىنى چۈشەندۈرگەن. بۇنى بىلىش بىزگە ئىلھام-مەدەت بېرىدۇ، چۈنكى خۇداغا ۋە ئەيساغا بولغان ئىشەنچىمىزنى كۈچەيتسەك، خۇدانىڭ كۆز ئالدىدا ھەققانىي بولالايمىز.
ياقۇپ ئېتىقادچىلارنى «ئەمەللىرى» ئارقىلىق ئىمانىنى كۆرسىتىشكە، يەنى ھەممىسىگە ئوخشاش مۇئامىلە قىلىپ، باشقىلارغا ياخشىلىقلارنى دەۋەت قىلغان (11، 12-ئابزاسلارغا قاراڭ) c
11. ياقۇپ قانداق «ئىشلار» ھەققىدە يازغان؟
11 ياقۇپنىڭ خېتى 2-بابتا تىلغا ئېلىنغان «ئىشلار» ئەلچى پاۋلۇس يازغان «قانۇندا تەلەپ قىلغان ئىشلارغا» ئوخشىمايدۇ. ياقۇپ تىلغا ئالغان ئىشلار مەسىھ ئەگەشكۈچىلىرى كۈندىلىك ھاياتىدا قىلىدىغان ئىشلارنى كۆرسىتىدۇ. بۇ كۈندىلىك ئىشلار خۇداغا ھەقىقىي ئىشىنىدىغان ياكى ئىشەنمەيدىغانلىقىمىزنى ئاشكارا قىلىدۇ. ھازىر ياقۇپ قوللانغان ئىككى مىسالنى كۆرۈپ باقايلى.
12. ياقۇپ ئىمان بىلەن ئەمەل ئارىسىدىكى باغلىنىشنى قانداق تەكىتلىگەن؟ (رەسىمگە ھەم قاراڭ)
12 بىرىنچى مىسالىدا، ياقۇپ بارلىق مەسىھ ئەگەشكۈچىلىرى باشقىلارغا ئوخشاش مۇئامىلە قىلىشى كېرەكلىكىنى چۈشەندۈرگەن. ئۇ بۇ نۇقتىنى چۈشەندۈرۈش ئۈچۈن، بايغا ياخشى مۇئامىلە قىلىپ، ئەمما كەمبەغەلنى پەس كۆرگەن بىر كىشىنىڭ مىسالىنى كەلتۈرگەن. شۇ كىشى خۇداغا ئىشىنىمەن دېيىشى مۇمكىن، بىراق ئەمەللىرى چىن قەلبىدىن ئىشەنمەيدىغانلىقىنى كۆرسىتىدۇ (ياقۇپ 2:1–5، 9). ئىككىنچى مىسالىدا، ياقۇپ كىيىم-كېچەك ۋە يېمەك-ئىچمەككە مۇھتاج قېرىندىشىنى كۆرۈپ، ئەمما ئۇنىڭغا ئەمەلىي ياردەم قىلمىغان كىشى توغرۇلۇق ئېيتقان. شۇ كىشى سۆزىدە ئىمانى بارلىقىنى ئېيتسىمۇ، ئۇنىڭ ئەمەلىي ئىش-ھەرىكىتى بۇنى ئىنكار قىلغان؛ شۇڭا، بۇنداق ئىماننىڭ پايدىسىز ئىكەنلىكىنى كۆرسىتىپ، ياقۇپ مۇنداق دەپ يازغان: «ئىماننىڭ ئەمەللىرى بولمىسا، ئۇ ئۆز يالغۇز ئۆلۈكتۇر».—ياقۇپ 2:14–17.
13. ياقۇپ ئىمان بىلەن ئەمەلنىڭ مۇھىملىقىنى قانداق تەكىتلىگەن؟ (ياقۇپ 2:25، 26)
13 ياقۇپ ئۆز ئىمانىنى ئەمەللىرى بىلەن كۆرسەتكەن راھابنىڭ ئۈلگىسىنى تىلغا ئالغان (ياقۇپ 2:25، 26-نى ئوقۇڭ). راھاب يەھۋا توغرۇلۇق ئاڭلىغان ۋە ئۇنىڭ ئىسرائىللارنى قوللاپ-قۇۋۋەتلىگەنلىكىنى چۈشەنگەن (يەشۇئا 2:9–11). ئۇ ئىككى ئىسرائىل پايلاقچىنى خەتەرلىك ۋەزىيەتتە قوغداپ، ئۆزىنىڭ ئىمانىنى ئەمەلىي ئىش-ھەرىكەتلىرى بىلەن كۆرسەتكەن. نەتىجىدە، بۇ نامۇكەممەل، ئىسرائىل خەلقىدىن بولمىغان ئايال خۇددى ئىبراھىم پەيغەمبەرگە ئوخشاش ھەققانىي دەپ جاكارلانغان. راھابنىڭ مىسالىدىن كۆرگىنىمىزدەك، ئىمانىمىزنى ئىش-ھەرىكەتلىرىمىز ئارقىلىق كۆرسىتىشىمىز ئىنتايىن مۇھىم.
14. نېمە ئۈچۈن پاۋلۇس بىلەن ياقۇپنىڭ يازغانلىرىنى بىر-بىرىگە ئۇيغۇن دەپ ئېيتالايمىز؟
14 ئەلچى پاۋلۇس ۋە ياقۇپ ئىمان بىلەن ئىش-ھەرىكەت ئارىسىدىكى باغلىنىشنى پەرقلىق يوللار بىلەن ئاددىي چۈشەندۈرگەن. پاۋلۇس يەھۇدىي ئېتىقادچىلارغا تەۋرات قانۇنىدا تەلەپ قىلىنغان ئىشلارغا ئەمەل قىلىش بىلەنلا يەھۋانىڭ قوبۇل قىلىشىغا ئېرىشەلمەيدىغانلىقىنى ئېيتقان. ياقۇپ بولسا، بارلىق مەسىھ ئەگەشكۈچىلىرى ئىمان-ئېتىقادىنى باشقىلارغا ياخشىلىق قىلىش ئارقىلىق كۆرسىتەلەيدىغانلىقىمىزنى تەكىتلىگەن.
ئىمانىڭىز سىزنى يەھۋا خۇرسەن بولىدىغان ئىشلارنى قىلىشقا ئۈندەمدۇ؟ (15-ئابزاسقا قاراڭ)
15. ئەمەلىي ئىش-ھەرىكەتلىرىمىز ئارقىلىق ئىمانىمىزنى نامايان قىلىشىنىڭ قايسى بەزى يوللىرى بار؟ (رەسىملەرگىمۇ قاراڭ)
15 ھەققانىي دەپ جاكارلىنىش ئۈچۈن، يەھۋا بىزدىن ئىبراھىم قىلغان ئىشلارنى قىلىشىمىزنى تەلەپ قىلمايدۇ. ئەمەلىيەتتە، ئىش-ھەرىكەتلىرىمىز ئارقىلىق ئىمانىمىزنى نامايان قىلىشنىڭ نۇرغۇن يوللىرى بار. بىز جامائەتكە يېڭىدىن كەلگەنلەرنى ئىللىق قارشى ئالالايمىز، ياردەمگە مۇھتاج قېرىنداشلىرىمىزغا ياردەم قولىمىزنى سۇنالايمىز، ئائىلە ئەزالىرىمىزغا ياخشىلىق قىلالايمىز. بۇ ئىشلارنىڭ ھەممىسى خۇدانى خۇرسەن قىلىدۇ ۋە ئۇنىڭ بەرىكىتىگە ئېرىشتۈرىدۇ (رىملىقلار 15:7؛ 1-تىموت. 5:4، 8؛ 1-يۇھاننا 3:18). ئىمان-ئېتىقادىمىزنى ئەمەلىي ئىش-ھەرىكەتلىرىمىز بىلەن كۆرسىتىشنىڭ مۇھىم يولى — خۇش خەۋەرنى قىزغىنلىق بىلەن ۋەز قىلىش (1-تىموت. 4:16). ھەممىمىز ئىش-ھەرىكىتىمىز ئارقىلىق يەھۋانىڭ ۋەدىلىرىنىڭ ئەمەلگە ئاشىدىغانلىقىغا ۋە ئۇنىڭ يوللىرىنى ئەڭ ياخشى دەپ ئىشىنىدىغانلىقىمىزنى ئېنىق نامايان قىلالايمىز. ئەگەر شۇنداق قىلساق، خۇدا بىزنى ھەققانىي ئادەم ھېسابلاپ، ئۇنىڭ دوستى بولىدىغانلىقىمىزغا قەتئىي ئىشىنەلەيمىز.
ئۈمىد ئىمان-ئېتىقادىمىزنى كۈچلەندۈرىدۇ
16. ئىبراھىمنىڭ ئېتىقادى بىلەن ئۈمىدىنىڭ قانداق باغلىنىشى بار؟
16 ئىبراھىمدىن ئۆگىنەلەيدىغان يەنە بىر مۇھىم نەرسە — ئۈمىدنىڭ مۇھىملىقى، رىملىقلار 4-بابتا تەكىتلەنگەن. يەھۋا ئىبراھىمغا نۇرغۇن مىللەتلەرنىڭ ئاتىسى بولىدىغانلىقى ۋە يەر-يۈزىدىكى پۈتكۈل مىللەتلەرنىڭ ئۇ ئارقىلىق بەرىكەتكە ئېرىشىدىغانلىقى ھەققىدە ۋەدە قىلغان. تەسەۋۋۇر قىلىپ كۆرۈڭ، بۇ ئىبراھىم ئۈچۈن نەقەدەر گۈزەل بىر ئۈمىد،- ھە؟ (يارىت. 12:3؛ 15:5؛ 17:4؛ رىملىقلار 4:17) بىراق، ئىبراھىم 100 ياشقا، سارە 90 ياشقا كەلگەندىمۇ، ئۇلارغا ۋەدە قىلىنغان ئوغۇل تېخى تۇغۇلمىغان ئىدى. ئىنساننىڭ كۆز قارىشى بويىچە، ئىبراھىم بىلەن سارەنىڭ پەرزەنتلىك بولۇشى مۇمكىن ئەمەس ئىدى. بۇ ئىبراھىم ئۈچۈن ھەقىقەتەن بىر سىناق بولغان. لېكىن، «يەنىلا ئۈمىدكە تايىنىپ، ئۇ ئۆزىنىڭ نۇرغۇن خەلقلەرنىڭ ئاتىسى بولىدىغانلىقىغا ئىشەنگەن» (رىملىقلار 4:18، 19). ئاخىرىدا، ئۇ ئۇزۇن يىللار ئۈمىد بىلەن كۈتكەن ئوغلى تۇغۇلۇپ، ئاتا بولغان.—رىملىقلار 4:20–22.
17. بىز ھەققانىي ئادەم ھېسابلىنىپ، خۇدانىڭ دوستى بولالايدىغانلىقىمىزنى قانداق بىلىمىز؟
17 بىز خۇدانىڭ قوبۇل قىلىشىغا ئېرىشەلەيمىز ۋە ھەققانىي ئادەم ھېسابلىنىپ، ئىبراھىمغا ئوخشاش خۇدانىڭ دوستى بولالايمىز. پاۋلۇس بۇ ھەققىدە مۇنۇ سۆزلەرنى يازغان: «‹بۇ ھەققانىي ھېسابلاندى› دېگەن سۆزلەر، پەقەت ئۇ ئۈچۈن يېزىلمىغان. بەلكى بىز ئۈچۈن ھەم يېزىلغان. چۈنكى، بىز ھەزرىتىمىز ئەيسانى ئۆلۈمدىن تىرىلدۈرگەن خۇداغا ئىشىنىمىز» (رىملىقلار 4:23، 24). خۇددى ئىبراھىمغا ئوخشاش، بىزمۇ يەھۋاغا ئىشىنىپ، ياخشى ئىشلارنى قىلىشىمىز ۋە يەھۋانىڭ ئۆز ۋەدىلىرىنى ئەمەلگە ئاشۇرىدىغانلىقىغا قەتئىي ئىشەنچ قىلىشىمىز كېرەك. پاۋلۇس رىملىقلارغا يېزىلغان خەت 5-بابتا ئۈمىدىمىز ھەققىدە تېخىمۇ كۆپرەك نەرسىلەرنى يازغان. كېيىنكى ماقالىدە، شۇلارنى مۇھاكىمە قىلىمىز.
27-ناخشا يەھۋا تەرەپتە تۇرۇڭلار
a بىز خۇدانىڭ قوبۇل قىلىشىغا ئېرىشىپ، ئۇنىڭ ئالدىدا ھەققانىي ئادەم ھېسابلىنىشنى خالايمىز. بۇ ماقالىدە، پاۋلۇس ۋە ياقۇپ يازغان خەتلەردىن پايدىلىنىپ، ئىمانىمىز ۋە ئەمەللىرىمىز يەھۋانىڭ قوبۇل قىلىشىغا قانداق ئېرىشەلەيدىغانلىقىنى مۇھاكىمە قىلىمىز.
b سۈرەتتە:. پاۋلۇس يەھۇدىي مەسىھ ئەگەشكۈچىلىرىنى «قانۇندا تەلەپ قىلغان ئىشلارغا»، يەنى پېشىگە كۆپ يىپ بىلەن تىكىلگەن كىيىم كىيىش، ئۆتۈپ كېتىش ھېيتى ئۆتكۈزۈش ۋە قولنى يۇيۇش قائىدىلىرىگە ئوخشاش ئىشلارغا ئەمەل قىلىشقا ئەمەس، ئىمانغا دىققەت قارىتىشقا چاقىرغان.
c سۈرەتتە: ياقۇپ كەمبەغەل ئېتىقادچىلارغا ياردەم بېرىشكە ئوخشاش ياخشىلىقلارنى قىلىپ، ئىمانىنى نامايان قىلىشقا ئىلھاملاندۇرغان.
