51-تەتقىق ماقالىسى
ئۈمىدىمىز چوقۇم ئەمەلگە ئاشىدۇ
«بۇ ئۈمىد كىشىنى ئۈمىدسىزلىككە باشلىمايدۇ».—رىملىقلار 5:5.
54-ناخشا ئىماندا چىڭ تۇرايلى!
بۇ ماقالىدە a
1. نېمە ئۈچۈن ئىبراھىم پەيغەمبەر پەرزەنتلىك بولۇشتىن ئۈمىدىنى ئۈزمىگەن؟
يەھۋا ئۆز دوستى ئىبراھىمغا پۈتۈن مىللەتلەر ئۇنىڭ ئەۋلادى ئارقىلىق بەرىكەتكە ئېرىشىدىغانلىقىنى ۋەدە قىلغان (يارىت. 15:5؛ 22:18). ئىبراھىمنىڭ خۇداغا بولغان ئىشەنچىسى كۈچلۈك بولغاچ، ئۇ خۇدانىڭ ۋەدىسى ئەمەلگە ئاشىدىغانلىقىغا ئىشەنگەن. شۇنداقتىمۇ، ئىبراھىم 100 ياش، ئايالى سارە 90 ياشقا كەلگەندە، بۇ سادىق جۈپنىڭ تېخى ئوغلى يوق ئىدى (يارىت. 21:1–7). ئەمما، مۇقەددەس كىتاب مۇنداق دەيدۇ: «ئۈمىدكە تايىنىپ، ئۇ [ئىبراھىم] ئۆزىنىڭ نۇرغۇن خەلقلەرنىڭ ئاتىسى بولىدىغانلىقىغا ئىشەنگەن. سەۋەبى، خۇدا ئۇنىڭغا شۇنداق دېگەن» (رىملىقلار 4:18). سىز ئىبراھىمنىڭ ئۈمىدىنىڭ ئەمەلگە ئاشقانلىقىنى بىلىسىز. ئۇ ئۇزۇندىن بۇيان ئۈمىد قىلغان ئوغلى ئىسھاق تۇغۇلۇپ، ئاتا بولغان. نېمە ئۈچۈن ئىبراھىم يەھۋانىڭ ئۆز ۋەدىلىرىنى چوقۇم ئەمەلگە ئاشىدىغانلىقىغا ئىشەنگەن؟
2. نېمە ئۈچۈن ئىبراھىم يەھۋانىڭ ۋەدىسى چوقۇم ئەمەلگە ئاشىدىغانلىقىغا ئىشەنگەن؟
2 ئىبراھىمنىڭ ياراتقۇچى يەھۋا بىلەن ئىنتايىن يېقىن بولغاچ، «خۇدا بەرگەن ۋەدىسىنى ئەمەلگە ئاشۇرۇشقا قادىر، دەپ پۈتۈنلەي ئىشەندى» (رىملىقلار 4:21). كۈچلۈك ئىمانى تۈپەيلى، يەھۋا ئىبراھىمنى قوبۇل قىلغان ۋە ئۇنى ھەققانىي ئادەم دەپ جاكارلىغان (ياقۇپ 2:23). رىملىقلار 4:18-ئايەتتە كۆرسىتىلگەندەك، ئىبراھىمنىڭ ئىمانى بىلەن ئۈمىدى بىر-بىرىگە زىچ باغلىنىشلىق. ھازىر رىملىقلارغا يېزىلغان خەت 5-بابتا، ئەلچى پاۋلۇسنىڭ ئۈمىد ھەققىدە نېمىلەرنى يازغانلىقىنى كۆرۈپ باقايلى.
3. ئەلچى پاۋلۇس ئۈمىد ھەققىدە نېمە ئېيتقان؟
3 پاۋلۇس «ئۈمىد كىشىنى ئۈمىدسىزلىككە باشلىمايدۇ» دەپ يازغان ۋە نېمە ئۈچۈن بۇنىڭغا ئىشەنچ قىلالايدىغانلىقىمىزنى چۈشەندۈرگەن (رىملىقلار 5:5). ئۇنىڭدىن باشقا، ئۈمىدىمىز قانداق كۈچىيىدىغانلىقىنى چۈشىنىشىمىزگە ياردەم بەرگەن. پاۋلۇسنىڭ رىملىقلار 5:1–5-ئايەتلەردە قىلغان سۆزلىرىنى مۇھاكىمە قىلغىنىمىزدا، ئۆزىڭىزنىڭ باشتىن ئۆتكۈزگەن كەچۈرمىشلىرى توغرۇلۇق ئويلاپ كۆرۈڭ. شۇ چاغدا، ۋاقىتنىڭ ئۆتۈشىگە ئەگىشىپ، كېلەچەككە بولغان ئۈمىدىڭىز تېخىمۇ كۈچىيىدۇ. بۇ ماقالىدە، ئۈمىدىمىزنى تېخىمۇ كۈچلەندۈرۈش ئۈچۈن نېمىلەرنى قىلالايدىغانلىقىمىزنى كۆرۈپ چىقىمىز. ئالدى بىلەن، پاۋلۇسنىڭ ئۈمىدسىزلىككە باشلىمايدىغان ئاجايىپ ئۈمىد ھەققىدە ئېيتقانلىرىنى كۆرۈپ چىقايلى.
ئاجايىپ ئۈمىدىمىز
4. رىملىقلار 5:1، 2-ئايەتلەردە، نېمە توغرۇلۇق مۇلاھىزە قىلىنىدۇ؟
4 رىملىقلار 5:1، 2-نى ئوقۇڭ. پاۋلۇس بۇ سۆزلەرنى رىم شەھىرىدىكى جامائەتكە يازغان. ئۇلار ئاللىقاچان يەھۋا خۇدا ۋە ئەيسا مەسىھ ھەققىدە تەلىم ئالغان، ئۆز ئەمەللىرىدە ئىمانىنى نامايان قىلغان ۋە مەسىھنىڭ شاگىرتلىرى بولغان قېرىنداشلار ئىدى. شۇڭا، خۇدانىڭ ئالدىدا، «ئىمان ئارقىلىق [ئۇلار] ھەققانىي ئادەم دەپ جاكارلانغان» ۋە مۇقەددەس روھ بىلەن مەسىھ قىلىنغان. ئاخىرىدا، ئۇلار چوقۇم ئەمەلگە ئاشىدىغان ئاجايىپ بىر ئۈمىدكە ئىگە بولغان.
5. مەسىھ قىلىنغان ئېتىقادچىلارنىڭ قانداق ئۈمىدى بار؟
5 پاۋلۇس ئەفەسلىكلەرگە يازغان خېتىدە، مەسىھ قىلىنغان ئېتىقادچىلارنىڭ ئۈمىدنى تىلغان ئالغان. بۇ ئۈمىد «مۇقەددەسلەر ئۈچۈن مىراس» (ئەفەس. 1:18). ئۇنىڭدىن باشقا، پاۋلۇس كولوسىلىقلارغىمۇ ئۈمىدىنىڭ چوقۇم ئەمەلگە ئاشىدىغانلىقىنى تەكىتلەپ، شۇنداق دېگەن: «سىلەر ئۈچۈن ئاسماندا تەييارلاپ قويۇلغان بەرىكەتكە ئېرىشىش ئۈمىدىڭلار» (كولوسى. 1:4، 5). شۇڭلاشقا، مەسىھ قىلىنغان ئېتىقادچىلار ئاسماندا مەڭگۈ ياشاش ئۈچۈن تىرىلىدۇ ۋە ئەيسا مەسىھ بىلەن بىرلىكتە ھۆكۈمرانلىق قىلىدۇ.—1-سالونىكا. 4:13–17؛ ۋەھىي. 20:6.
فرېدېرىك فرېنتىس بۇرادەر مايلانغان قېرىنداشلار ئۆز ئۈمىدىگە پۈتۈنلەي ئىشىنىدىغانلىقىنى ئېيتتى (6-ئابزاسقا قاراڭ)
6. بىر مەسىھ قىلىنغان بۇرادەر ئۆز ئۈمىدى ھەققىدە نېمە دېگەن؟
6 مەسىھ قىلىنغان ئېتىقادچىلار ئۈمىدىنى ئىنتايىن قەدىرلەيدۇ. شۇلارنىڭ بىرى فرېدېرىك فرېنتىس بۇرادەر. ئۇ ئۇزۇن يىللار خۇداغا خىزمەت قىلغاندىن كېيىن، 1991-يىلى مۇنۇ سۆزلەرنى ئېيتقان: «ئۈمىدىمىز چوقۇم ئەمەلگە ئاشىدۇ. 000 144 كىشىنىڭ ھەربىرى خۇدانىڭ ۋەدە قىلغان مۇكاپاتىغا ئېرىشىپ، ھەتتا ئۆزلىرى تەسەۋۋۇر قىلغاندىنمۇ ئارتۇق بەرىكەتلەرگە ئېرىشىدۇ… . ئۈمىدىمىز ئۆز قىممىتىنى ھەرگىز يوقاتمايدۇ. ئۈمىدىمىزنىڭ ئەمەلگە ئېشىشىنى قانچە ئۇزۇن كۈتسەك، شۇنچە كۆپ مىننەتدار بولىمىز. ھەتتا مىليون يىل كۈتۈشكە توغرا كەلسىمۇ، بۇ كۈتۈشىمىزگە ئەرزىيدۇ. ھازىر ئېرىشكەن ئۈمىدىمنى تېخىمۇ قەدىرلەيمەن».
7، 8. خۇدا خىزمەتچىلىرىنىڭ كۆپىنچىسىدە قانداق ئۈمىد بار؟ (رىملىقلار 8:20، 21)
7 بۈگۈنكى كۈندە يەھۋاغا ئىبادەت قىلىدىغانلارنىڭ كۆپىنچىسىنىڭ باشقىچە بىر ئۈمىدى بار. خۇددى ئىبراھىمغا ئوخشاش، ئۇلارنىڭمۇ خۇدانىڭ پادىشاھلىقى ئاستىدا يەر يۈزىدە مەڭگۈ ياشاش ئۈمىدى بار (ئىبرانىي. 11:8–10، 13). پاۋلۇس مۇنداق ئۈمىدى بارلارنى ئاجايىپ بىر كېلەچەك كۈتۈۋاتقانلىقىنى تىلغا ئالغان (رىملىقلار 8:20، 21-نى ئوقۇڭ). مۇقەددەس كىتابتىكى كېلەچەك توغرىسىدىكى ۋەدىنى تۇنجى قېتىم ئۆگەنگىنىڭىزدە، سىزنى نېمە بەكرەك جەلپ قىلغان؟ بىر كۈنى مۇكەممەل بولۇپ، ئارتۇق گۇناھكار بولماسلىقمۇ؟ ياكى ئۆلۈپ كەتكەن يېقىن كىشىلىرىڭىزنىڭ جەننەتتە قايتا ياشايدىغانلىقىنى ئاڭلاپ خۇشال بولغانلىقىڭىزمۇ؟ بىز يەھۋا «بەرگەن ئۈمىدكە» ئاساسەن، تەقەززالىق بىلەن كۈتىدىغان نۇرغۇن نەرسىلەر بار.
8 مەيلى ئاسماندا ياكى يەر يۈزىدە بولسۇن، مەڭگۈ ياشاش ئۈمىدى بىز ئۈچۈن خۇشاللىق ئاتا قىلىدىغان ئاجايىپ ئۈمىد! بىزنىڭ خۇشاللىقىمىز ئۈمىدىمىزنى تېخىمۇ كۈچەيتىدۇ. پاۋلۇسنىڭ كېيىن يازغانلىرى بۇنى چۈشەندۈرىدۇ. ھازىر ئۇنىڭ ئۈمىد ھەققىدە يازغانلىرىنى كۆرۈپ باقايلى. بۇ بىزگە ئۈمىدىمىزنىڭ چوقۇم ئەمەلگە ئاشىدىغانلىقىغا ئىشەنچىمىزنى كۈچەيتىدۇ.
ئۈمىد قانداق كۈچىيىدۇ؟
ھەممە خۇدانىڭ خىزمەتچىلىرى سىناقلارغا دۇچ كېلىدىغانلىقىنى چۈشىنىشى كېرەك (9، 10-ئابزاسلارغا قاراڭ)
9، 10. ئەلچى پاۋلۇسنىڭ مىسالىدىن، مەسىھ ئەگەشكۈچىلىرى قانداق قىيىنچىلىقلارغا دۇچ كېلىشى مۇمكىن؟ (رىملىقلار 5:3) (رەسىمگە ھەم قاراڭ)
9 رىملىقلار 5:3-نى ئوقۇڭ. ئەلچى پاۋلۇس ئېيتقاندەك، بىز ئازاب چەككەندە، ئۈمىدىمىز تېخىمۇ كۈچلۈك بولىدۇ. بەلكىم، بۇ غەلىتە ئاڭلىنىشى مۇمكىن. ئەمەلىيەتتە، بارلىق مەسىھ ئەگەشكۈچىلىرى قىيىنچىلىققا دۇچ كېلىدۇ. پاۋلۇسنىڭ مىسالىنى كۆرۈپ باقايلى. ئۇ سالونىكىدىكى ئېتىقادچىلارغا مۇنداق دېگەن: «بىز سىلەر بىلەن بىللە بولغىنىمىزدا، ھەممىمىزنىڭ قىيىنچىلىقلارغا ئۇچرايدىغانلىقىمىزنى سىلەرگە ئالدىنئالا ئېيتقانىدۇق. سىلەر بىلگەندەك، ئەمەلىيەتتىمۇ دېگىنىمىزدەك بولدى» (1-سالونىكا. 3:4). ئۇ يەنە كورىنتتىكى قېرىنداشلارغا مۇنداق دېگەن: «قېرىنداشلار، بىز ئاسىيا ئۆلكىسىدە چەككەن ئازاب-ئوقۇبەتلەردىن سىلەرنىڭ خەۋەرسىز قېلىشىڭلارنى خالىمىدۇق. شۇ چاغلاردا، چىدىغۇسىز بېسىم ئاستىدا قالغاچ، ھەتتا ھايات قېلىشتىن ئۈمىد ئۈزگەنىدۇق».—2-كورىنتلىقلار 1:8؛ 11:23–27.
10 بىزمۇ بۈگۈنكى كۈندە بەزى قىيىنچىلىقلارغا دۇچ كېلىمىز (2-تىموت. 3:12). سىزمۇ مەسىھنىڭ ئەگەشكۈچىسى بولغىنىڭىز ئۈچۈن قىيىنچىلىقلارغا دۇچ كېلىۋاتامسىز؟ مەسىلەن، دوستلىرىڭىز ۋە ئۇرۇق-تۇغقانلىرىڭىز سىزنى مەسخىرە قىلىشى، ھەتتا سىزگە قوپال بىلەن مۇئامىلە قىلىشى مۇمكىن. ئىش ئورنىڭىزدا يالغان ئېيتمىغاچقا، قىيىنچىلىققا دۇچ كېلىۋاتامسىز؟ (ئىبرانىي. 13:18). ئۆز ئۈمىدىڭىز ھەققىدە باشقىلار بىلەن ئورتاقلاشقاندا، ھۆكۈمەتنىڭ قارشىلىقىغا دۇچ كەلدىڭىزمۇ؟ بىز مەيلى قانداق قىيىنچىلىقلارغا يولۇقۇشىمىزدىن قەتئىينەزەر، پاۋلۇس چوقۇم خۇشال بولۇشىمىز كېرەكلىكىنى ئېيتقان. نېمە ئۈچۈن؟
11. نېمە ئۈچۈن سىناقلارغا دۇچ كەلگەندە بەرداشلىق بېرىشىمىز كېرەك؟
11 بىز ئازاب-ئوقۇبەتكە دۇچار بولغاندا، خۇشال-خۇرام بولالايمىز. چۈنكى، بۇ بىزنىڭ مۇھىم بىر پەزىلەتنى يېتىلدۈرۈشىمىزگە ياردەم بېرەلەيدۇ. رىملىقلار 5:3-ئايەتتە مۇنداق دەيدۇ: «قىيىنچىلىق سەۋرچان بولۇشنى ئۆگىتىدۇ». بارلىق مەسىھ ئەگەشكۈچىلىرى ئازاب-ئوقۇبەتكە دۇچ كەلگەچ، بارلىق مەسىھ ئەگەشكۈچىلىرى چوقۇم بەرداشلىق بېرىشى كېرەك. ھەرقانداق سىناققا دۇچ كەلگەندە قەتئىي بەرداشلىق بېرىشىمىز بەك مۇھىم. شۇندىلا ئۈمىدىمىزنىڭ ئەمەلگە ئاشقانلىقىنى كۆرەلەيمىز. بىز ھەرگىزمۇ ئەيسا تەمسىلىدە تىلغا ئالغان تاشلىق تۇپراققا چۈشكەن ئۇرۇقلارغا ئوخشاش بولۇشنى خالىمايمىز. ئاشۇ كىشىلەر دەسلەپتە ھەقىقەت سۆزىنى خۇشاللىق بىلەن قوبۇل قىلغان، ئەمما «قىيىنچىلىق ياكى زىيانكەشلىككە ئۇچرىسا»، ئۇلار ھەقىقەتتىن ۋاز كەچكەن (مەتتا 13:5، 6، 20، 21). ئەلۋەتتە، قارشىلىقلار ياكى سىناقلار يۈزلىنىش ئاسان ئەمەس ۋە كىشىنى خۇشال قىلمايدۇ، ئەمما ئۇلارغا بەرداشلىق بەرسەك، ئۇنىڭ قانداق پايدىسىنى كۆرىمىز. قانداق پايدىسى بار؟
12. سىناقلارغا سەۋرچانلىق بىلەن بەرداشلىق بېرىشنىڭ قانداق پايدىسى بار؟
12 ياقۇپ سىناقلارغا بەرداشلىق بېرىشنىڭ پايدىسىنى تەكىتلەپ ئۆتكەن. ئۇ مۇنداق يازغان: «سەۋر-تاقەتنى تولۇق نامايان قىلىڭلار. شۇنداق قىلغاندىلا، ھەرجەھەتتىن كامىل ۋە ئەيىبسىز، ھېچبىر كەمچىلىكى بولمىغان كىشىلەر بولىسىلەر» (ياقۇپ 1:2–4). ياقۇپ سەۋر-تاقەت بىلەن بەرداشلىق بېرىشنى ئورۇنلاش زۆرۈر بىر ۋەزىپە بىلەن سېلىشتۇرغان. ئۇ سەۋرچانلىقنىڭ بىر مەقسىتى بارلىقىنى ئېيتقان. سەۋرچان بولساق، تېخىمۇ چىدامچان بولۇپ، ئىشەنچىمىز مەھكەم بولىدۇ ۋە خۇداغا كۆپرەك تايىنىمىز. سىناقلارغا سەۋچانلىق بىلەن بەرداشلىق بېرىشىمىزنىڭ يەنە بىر مۇھىم پايدىسى بار.
13، 14. سەۋرچانلىق بىزنى نېمە ئېرىشتۈرىدۇ ۋە بۇ ئۈمىدىمىزگە قانداق تەسىر قىلىدۇ؟ (رىملىقلار 5:4)
13 رىملىقلار 5:4-نى ئوقۇڭ. پاۋلۇس: «سەۋرچانلىق خۇدانىڭ قوبۇل قىلىشىغا ئېرىشتۈرىدۇ»،— دېگەن. سىز سەۋرچان بولسىڭىز، يەھۋانىڭ قوبۇل قىلىشىغا ئېرىشىسىز. بۇ ھەرگىزمۇ سىناقلار ياكى قىيىنچىلىقلارغا يولۇقسىڭىز، يەھۋانىڭ بۇنىڭدىن خۇشال بولىدىغانلىقىنى بىلدۈرمەيدۇ. ئەكسىچە، سىز سەۋرچانلىقنى ساقلىسىڭىز، ئۇنىڭ قوبۇل قىلىشىغا ئېرىشىسىز. سەۋر-تاقەتلىك بولساق، يەھۋانىڭ كۆڭلىنى خۇرسەن قىلىدىغانلىقىمىزنى بىلىش بىزگە كۈچ-مەدەت بېرىدۇ!—زەبۇر 5:12.
14 بىلـگىـنىمىـزدەك، ئىبراھىـم سىنـاقلارغـا ساداقەتمەنلىك بىلەن بەرداشلىق بەرگەندە، يەھۋا ئۇنىڭدىن مەمنۇن بولغان. خۇدا ئۇنى ئۆزىنىڭ دوستى دەپ قاراپ، ئۇنى ھەققانىي ئادەم دەپ ھېسابلىغان (يارىت. 15:6؛ رىملىقلار 4:13، 22). بىز ھەم ئىبراھىمغا ئوخشاش بولالايمىز. يەھۋانىڭ قوبۇل قىلىشىغا ئېرىشىش ھەرگىزمۇ ئۇنىڭغا قانچىلىك ۋاقىت خىزمەت قىلغىنىمىز ياكى قەيەردە خىزمەت قىلغىنىمىزغا باغلىق ئەمەس. سىناقلارغا سەۋرچانلىق بىلەن بەرداشلىق بېرىپ، سادىق قېلىشىمىزغا باغلىق. يېشىمىز، ۋەزىيىتىمىز ۋە قابىلىيىتىمىز قانداق بولۇشىدىن قەتئىينەزەر، ھەممىمىز سەۋرچانلىق بىلەن بەرداشلىق بېرەلەيمىز. ھازىر سىز بىر سىناققا بەرداشلىق بېرىپ، يەھۋاغا سادىق قېلىشقا تىرىشىۋاتامسىز؟ ئەگەر شۇنداق بولسا، خۇدانىڭ قوبۇل قىلىشىغا ئېرىشكەنلىكىڭىزنى بىلىپ تەسەللى تېپىڭ. يەھۋانىڭ بىزنى قوبۇل قىلغانلىقىنى بىلسەك، ئۈمىدىمىزنىڭ ئەمەلگە ئېشىشىغا بولغان ئىشەنچىمىز تېخىمۇ كۈچىيىدۇ.
تېخىمۇ كۈچلۈك ئۈمىد
15. ئەلچى پاۋلۇس داۋاملىق نېمىنى چۈشەندۈرگەن ۋە نېمە ئۈچۈن ئۇنىڭ سۆزلىرى كىشنى قايمۇقتۇرۇپ قويۇشى مۇمكىن؟
15 پاۋلۇس چۈشەندۈرگەندەك، سىناقلارغا سەۋرچانلىق بىلەن بەرداشلىق بېرىش ئارقىلىق، يەھۋانىڭ قوبۇل قىلىشىغا ئېرىشىمىز. پاۋلۇسنىڭ چۈشەندۈرۈشىگە داۋاملىق دىققەت قىلىپ باقايلى: «قوبۇل قىلىشقا ئېرىشىش ئۈمىد بېرىدۇ. بۇ ئۈمىد كىشىنى ئۈمىدسىزلىككە باشلىمايدۇ» (رىملىقلار 5:4، 5). بەلكىم، بۇ بەزىلەرنى قايمۇقتۇرۇپ قويۇشى مۇمكىن. نېمە ئۈچۈن؟ چۈنكى، سەل ئىلگىرى رىملىقلار 5:2-ئايەتتە، پاۋلۇس رىمدىكى مەسىھ ئەگەشكۈچىلىرىنىڭ ئاللىقاچان خۇدانىڭ شان-شەرىپىدىن بەھرىمەن بولۇش ئۈمىدىگە ئېرىشكەنلىكىنى تىلغا ئېلىپ ئۆتكەن. ئۇنداقتا، نېمە ئۈچۈن ئەلچى پاۋلۇس يەنە ئۈمىد ھەققىدە سۆز قىلغان؟
ۋاقىت ئۆتۈپ يەھۋانىڭ ۋەدىلىرىگە بولغان ئىشەنچىڭىز تېخىمۇ كۈچىيىدۇ ۋە ئۈمىدىڭىزنى تەقەززالىق بىلەن كۈتۈپ، ئۇنىڭغا مىننەتدار بولىسىز (16، 17-ئابزاسلارغا قاراڭ)
16. بىر كىشىنىڭ ئۈمىدى قانداق كۈچىيىدۇ؟ (رەسىمگە ھەم قاراڭ)
16 پاۋلۇس نېمە ئۈچۈن يەنە ئۈمىد ھەققىدە سۆزلىگەنلىكىنى چۈشىنىش ئۈچۈن ئۈمىد داۋاملىق كۈچىيىدىغانلىقىنى ئېسىمىزدە ساقلايلى. مەسىلەن، خۇدانىڭ سۆزىدىكى ئاجايىپ ئۈمىدنى تۇنجى قېتىم ئاڭلىغان ۋاقتىڭىز ئېسىڭىزدىمۇ؟ شۇ ۋاقىتتا، بەلكىم يەر-يۈزى جەننەتتە مەڭگۈ ياشاش ئۈمىدى سىزگە خام خىيالدەك بىلىنگەن. بىراق، سىز يەھۋا ۋە ئۇنىڭ ۋەدىلىرى ھەققىدە كۆپرەك نەرسىلەرنى بىلگەنسېرى، بۇ ئۈمىدنىڭ ئەمەلگە ئېشىشىغا بولغان ئىشەنچىڭىز تېخىمۇ كۈچەيدى.
17. ھاياتىڭىزنى خۇداغا بېغىشلاپ، چۆمۈلدۈرۈلۈشتىن ئۆتكەندىن كېيىن ئۈمىدىڭىز قانداق كۈچىيىدۇ؟
17 ھاياتىڭىزنى يەھۋاغا بېغىشلاپ، سۇغا چۆمۈلدۈرۈلگەندىن كېيىنمۇ، بىلىمىڭىز ئېشىپ، روھىي جەھەتتىن پىشىپ يېتىلگەنسېرى، ئۈمىدىڭىز تېخىمۇ كۈچەيدى (ئىبرانىي. 5:13–6:1). بەلكىم، رىملىقلار 5:2–4-ئايەتلەردىكى سۆزلەرنى ئۆز بېشىڭىزدىن ئۆتكۈزگەنسىز. سىز ھەرخىل قىيىنچىلىقلارنى باشتىن كەچۈردىڭىز. بىراق، ئۇلارغا سەۋرچانلىق بىلەن بەرداشلىق بېرىپ، خۇدانىڭ سىزدىن خۇرسەن بولغانلىقىنى ھېس قىلدىڭىز. يەھۋانىڭ سىزدىن خۇرسەن بولغانلىقىنى ھېس قىلغاچقا، سىز ئۇنىڭ ۋەدىلىرى ئەمەلگە ئاشىدىغانلىقىغا تېخىمۇ كۈچلۈك ئىشەنچ باغلىدىڭىز. بۇ ئۈمىد قەلبىڭىزدە تېخىمۇ چوڭقۇر يىلتىز تارتىپ، شەخسەن سىز ئۈچۈن تېخىمۇ مۇھىم ئەھمىيەتكە ئىگە بولدى. بۇ ئۈمىد ئاللىقاچان سىزگە كۈچلۈك تەسىر قىلىپ، ھاياتىڭىزنىڭ ھەرقايسى ساھەسىدە، يەنى ئائىلىڭىزدىكىلەرگە قانداق مۇئامىلە قىلىش، قانداق قارار چىقىرىش ۋە ۋاقتىڭىزنى قانداق ئىشلىتىشتە زور ئۆزگۈرۈشلەر بولدى.
18. يەھۋا خۇدا قانداق كاپالەت بېرىدۇ؟
18 خۇدانىڭ قوبۇل قىلىشىغا ئېرىشكەندىن كېيىن ئىگە بولىدىغان ئۈمىد ھەققىدە ئېيتقاندىن كېيىن، ئەلچى پاۋلۇس يەنە بۇ ئۈمىدنىڭ چوقۇم ئەمەلگە ئاشىدىغانلىقىنى تەكىتلىگەن. نېمە ئۈچۈن بۇنىڭغا ئىشەنسىڭىز بولىدۇ؟ خۇدا پاۋلۇس ئارقىلىق پۈتكۈل مەسىھ ئەگەشكۈچىلىرىگە شۇنداق كاپالەت بەرگەن: «بۇ ئۈمىد كىشىنى ئۈمىدسىزلىككە باشلىمايدۇ؛ چۈنكى، بىزگە بېرىلگەن مۇقەددەس روھ ئارقىلىق خۇدانىڭ سۆيگۈ-مۇھەببىتى قەلبىمىزگە سىڭدۈرۈلگەن» (رىملىقلار 5:5). شۇنداق ئىكەن، يەھۋا بەرگەن ئۈمىدىڭىزنىڭ چوقۇم ئەمەلگە ئېشىشىغا ئىشىنىشىڭىزگە يېتەرلىك سەۋەبلىرىڭىز بار.
19. ئۈمىدىڭىزگە توغرۇلۇق نېمىگە ئىشنەلەيسىز؟
19 يەھۋا خۇدانىڭ ئىبراھىمغا بەرگەن ۋەدىسى، ئۇنى قوبۇل قىلىشى ۋە دوستى دەپ قارشى توغرۇلۇق چوڭقۇر ئويلىنىپ كۆرۈڭ. ئىبراھىم ئۈمىدىنىڭ ئەمەلگە ئاشقانلىقىنى ئۆز كۆزى بىلەن كۆردى. مۇقەددەس كىتاب مۇنداق دەيدۇ: «ئىبراھىم سەۋرچانلىق كۆرسەتكەندىن كېيىن، بۇ ۋەدىگە ئېرىشتى» (ئىبرانىي. 6:15؛ 11:9، 18؛ رىملىقلار 4:20–22). ئۇنىڭ ئۈمىدى يەردە قالمىدى. شۇنىڭغا ئىشىنىڭكى، يەھۋاغا سادىق قالسىڭىز، سىزنىڭ ئۈمىدىڭىزمۇ چوقۇم ئەمەلگە ئاشىدۇ. يەھۋا بەرگەن ئۈمىد ھەقىقىي ئۈمىدتۇر. بۇ ئۈمىد سىزنى ئۈمىدسىزلەندۈرمەيدۇ، بەلكى خۇشاللىققا ئېرىشتۈرىدۇ (رىملىقلار 12:12). پاۋلۇس مۇنداق دەپ يازغان: «ئۈمىد بەرگۈچى خۇدا، ئۇنىڭغا ئىشەنچ باغلىغىنىڭلار ئۈچۈن، قەلبىڭلارنى بارچە خۇشال-خۇراملىق ۋە تىنچ-ئامانلىق بىلەن تولدۇرغاي! بۇنىڭ بىلەن، سىلەر مۇقەددەس روھنىڭ كۈچ-قۇدرىتى بىلەن ئۈمىدكە تولۇپ تاشقايسىلەر».—رىملىقلار 15:13.
55-ناخشا سادىقلار كۆرەر مەڭگۈلۈك ھاياتنى
a بۇ ماقالىدە، يەھۋانىڭ بىزگە قانداق بىر ئۈمىدنى بەرگەنلىكى ۋە بۇ ئۈمىدنىڭ ئەمەلگە ئاشىدىغانلىقىغا نېمە ئۈچۈن ئىشىنەلەيدىغانلىقىمىزنى مۇھاكىمە قىلىمىز. رىملىقلار 5-بابتا، ھازىر بىزدە بار ئۈمىد بىلەن ھەقىقەتنى دەسلەپتە ئاڭلىغاندىكى ئۈمىد ئارىسىدا قانداق پەرق بارلىقىنى بىلىشىمىزگە ياردەم بېرىدۇ.
