52-تەتقىق ماقالىسى
ياش قىزلار، پىشىپ يېتىلگەن خۇدا خىزمەتچىلىرى بولۇڭلار!
«شۇنىڭدەك، ئاياللارمۇ … تۇرمۇش ئادەتلىرىدە تەڭپۇڭلۇقنى ساقلىشى ۋە ھەممە ئىشتا ساداقەتمەن بولۇشى كېرەك».—1-تىموت. 3:11.
41-ناخشا يەھۋاغا ياش ۋاقتىڭدا ئىبادەت قىل!
بۇ ماقالىدە a
1. بىز پىشىپ يېتىلگەن مەسىھ ئەگەشكۈچىسى بولۇش ئۈچۈن نېمە قىلىش كېرەك؟
بىز بىر بالىنىڭ ئىنتايىن تېز چوڭ بولۇپ يېتىلگىنىگە ھەيران قالىمىز. بۇنداق ئۆسۈپ يېتىلىش قارىماققا ئىنتايىن تەبىئىي. بىراق، بىرىنىڭ پىشىپ يېتىلگەن مەسىھ ئەگەشكۈچىسى بولۇشى ئۈچۈن كۆپ كۈچ چىقىرىش كېرەك b (1-كورىنت. 13:11؛ ئىبرانىي. 6:1). بۇنىڭ ئۈچۈن، يەھۋا بىلەن يېقىن مۇناسىۋەت ئورنىتىش لازىم. بىز خۇداغا خاس پەزىلەتلەرنى يېتىلدۈرگەندە، ئەمەلىي قوللىنىدىغان قابىلىيەتلەرنى ئۆگەنگىنىمىزدە ۋە كەلگۈسىدىكى مەسئۇلىيەتكە تەييارلانغىنىمىزدا مۇقەددەس روھقا مۇھتاج بولىمىز.—پەند. نە 1:5.
2. يارىتىلىش 1:27-ئايەتتىن نېمىلەرنى ئۆگىنىمىز؟ بۇ ماقالىدە نېمىلەرنى مۇلاھىزە قىلىپ چىقىمىز؟
2 ياراتقۇچى يەھۋا ئىنسانلارنى ئەر ۋە ئايال قىلىپ ياراتقان (يارىتىلىش 1:27-نى ئوقۇڭ). ئېنىقكى، ئەرلەر بىلەن ئاياللار جىسمانىي جەھەتتىن پەرقلىق، بىراق ئۇلار يەنە باشقا تەرەپلەردىنمۇ پەرقلىنىدۇ. مەسىلەن، يەھۋا ئەر-ئاياللارنى ئالاھىدە پەرقلىق ۋەزىپىلەرنى ئورۇنلاش ئۈچۈن ياراتقان، شۇڭا ئۇلار ئۆزلىرىنىڭ ۋەزىپىلىرىنى ئورۇنلاشقا ياردەم بېرىدىغان پەزىلەتلەرگە ۋە ماھارەتلەرگە مۇھتاج (يارىت. 2:18). بۇ ماقالىدە، ياش قىزلارنىڭ ئىماندا پىشىپ يېتىلگەن خۇدا خىزمەتچىلىرىگە ئايلىنىشى ئۈچۈن نېمىلەرنى قىلالايدىغانلىقىمىزنى كۆرۈپ چىقىمىز. كېيىنكى ماقالىدە، ياش يىگىتلەرنىڭ نېمىلەرنى قىلالايدىغانلىقىنى كۆرىمىز.
خۇدانى خۇرسەن قىلىدىغان پەزىلەتلەرنى يېتىلدۈرۈڭ
رىبەقا، ئەستىر ۋە ئابىگائىلنىڭ پەزىلەتلىرىنى ئۈلگە قىلسىڭىز، بۇ سىزگە پىشىپ يېتىلگەن مەسىھ ئەگەشكۈچىسى بولۇشقا ياردەم بېرىدۇ (3، 4-ئابزاسلارغا قاراڭ)
3، 4. ياش قېرىنداشلار ئۈلگە قىلىدىغان ياخشى مىساللارنى نەدىن تاپالايدۇ؟ (رەسىمگە ھەم قاراڭ)
3 مۇقەددەس كىتابتا يەھۋانى سۆيگەن ۋە ئۇنىڭغا خىزمەت قىلغان نۇرغۇن ئىمانلىق ئاياللارنىڭ ئۈلگىلىرى بار. (jw.org تور بېكىتىدىكى «مۇقەددەس كىتابتىكى ئايال كىشىلەردىن نېمىنى ئۆگىنەلەيمىز؟» ناملىق ماقالىنى ئوقۇڭ). ئۇ ئاياللار، خۇددى ماقالىنىڭ تېما ئايىتىدىكى «تۇرمۇش ئادەتلىرىدە تەڭپۇڭلۇقنى ساقلىشى» ۋە «ھەممە ئىشتا ساداقەتمەن بولۇشى» كېرەك دېگەن نەسىھەتكە قۇلاق سالغان. ئۇنىڭدىن باشقا، قىزلار ئۆز جامائىتىدە ئىمان-ئېتىقادتا پىشىپ يېتىلگەن ۋە ئۈلگە قىلىشقا لايىق خۇدا خىزمەتچىلىرىدىن ئۈلگىلەرنى ئالالايدۇ.
4 ياش قىزلار، جامائىتىڭلاردا ئېتىقادتا پىشىپ يېتىلگەن، سىلەرگە ئۈلگە بولىدىغان قېرىنداشلارنى تونۇمسىلەر؟ ئۇلارنىڭ گۈزەل پەزىلەتلىرىگە دىققەت قىلىڭلار. كېيىن، شۇ پەزىلەتلەرنى قانداق نامايان قىلالايدىغانلىقى توغرۇلۇق ئويلاڭلار. كېيىنكى ئابزاسلاردا پىشىپ يېتىلگەن ئايال بولۇش ئۈچۈن زۆرۈر بولىدىغان ئۈچ مۇھىم پەزىلەتلەرنى كۆرۈپ چىقىمىز.
5. بىر ئايالنىڭ پىشىپ يېتىلگەن مەسىھ ئەگەشكۈچىسى بولۇشىدا كەمتەرلىك نېمە ئۈچۈن مۇھىم؟
5 كەمتەرلىك — پىشىپ يېتىلگەن خۇدا خىزمەتچىسى ئۈچۈن مۇھىم بولغان بىر پەزىلەت. كەمتەر ئايال يەھۋا خۇدا ھەم باشقىلار بىلەن يېقىن مۇناسىۋەتتە بولىدۇ (ياقۇپ 4:6). مەسىلەن، يەھۋانى سۆيىدىغان ئايال ئائىلىدىكى باشچىلىق قىلىش پرىنسىپىغا كەمتەرلىك بىلەن بويسۇنىدۇ (1-كورىنت. 11:3). بۇ پرىنسىپ ئائىلىدە ۋە جامائەتتە پەرقلىق ئۇسۇلدا قوللىنىلىدۇ c.
6. ياش قېرىنداشلار رىبەقادىن كەمتەرلىك ھەققىدە نېمىلەرنى ئۆگىنەلەيدۇ؟
6 رىبەقانىڭ مىسالىنى كۆرۈپ باقايلى. ئۇ ئەقىللىق ۋە جەسۇر ئايال ئىدى. ئۇ ھاياتىدا قاچان ۋە قانداق ئىش قىلىشنى قارار قىلىشنى بىلگەن (يارىت. 24:58؛ 27:5–17). شۇنداقتىمۇ، ئۇ ھۆرمەت كۆرسەتكەن ۋە كۆرسەتمىلەرگە بويسۇنۇشقا تەييار بولغان (يارىت. 24:17، 18، 65). ئەگەر سىزمۇ رىبەقاغا ئوخشاش يەھۋانىڭ ئورۇنلاشتۇرۇشىنى كەمتەرلىك بىلەن قوللاپ-قۇۋۋەتلىسىڭىز، ئائىلىڭىزگە ۋە جامائەتتىكى قېرىنداشلارغا ياخشى تەسىر قىلالايسىز.
7. كىچىك پېئىللىق كۆرسىتىشتە ياش قېرىنداشلار ئەستىردىن قانداق ئۈلگە ئالالايدۇ؟
7 كىچىك پېئىللىق — پىشىپ يېتىلگەن خۇدا خىزمەتچىلىرى ئۈچۈن يەنە بىر مۇھىم پەزىلەت. مۇقەددەس كىتاب: «كەمتەر كىشىلەرگە دانالىق ھەمراھ بولار»،— دەيدۇ (پەند. نە 11:2). ئەستىر خۇدادىن ئەيمىنىدىغان ئىنتايىن كىچىك پېئىل ئايال بولغان. شۇڭلاشقا، ئەستىر خانىش بولغاندىن كېيىنمۇ ئۆز بېشىمچىلىق قىلمىغان. ئۇ ئاكىسى موردىكاينىڭ مەسلىھىتىگە قۇلاق سېلىپ، ئۇنىڭ سۆزلىرى بويىچە ئىش قىلغان (ئەست. 2:10، 20، 22). سىزمۇ باشقىلارنىڭ مەسلىھىتىگە قۇلاق سېلىپ، ئۇنى ھاياتىڭىزدا ئەمەلىي ئىشلىتىش ئارقىلىق ئەستىرگە ئوخشاش كىچىك پېئىللىقنى نامايان قىلالايسىز.—تىتۇس 2:3–5.
8. 1-تىموتىي 2:9، 10-ئايەتلەر ئاساسلانغاندا، كىچىك پېئىللىق ياش قېرىنداشنىڭ كىيىنىش ۋە ياسىنىشتا ئاقىلانە تاللىشىغا قانداق ياردەم بېرىدۇ؟
8 ئەستىر يەنە باشقا بىر تەرەپتىن كىچىك پېئىللىقنى كۆرسەتكەن. ئۇ «بەدەن شەكلى گۈزەل، چىرايى جەلپكار» بولسىمۇ، بىراق باشقىلارنىڭ دىققىتىنى ئۆزىگە تارتىشقا ھەرىكەت قىلمىغان (ئەست. 2:7، 15). ئايال قېرىنداشلار ئەستىردىن قانداق ئۈلگە ئالالايدۇ؟ شۇنداق قىلىشنىڭ بىر يولى 1-تىموتىي 2:9، 10-نى (ئوقۇڭ) ئايەتتە كۆرسىتىلگەن. ئەلچى پاۋلۇس مەسىھ ئەگەشكۈچىسى بولغان ئاياللارنى لايىقىدا كىيىنىپ، ساغلام ئوي-پىكىرلىك بولۇشقا بۇيرىغان. پاۋلۇس بۇ يەردە ئىشلەتكەن گرېكچە سۆز ئايالنىڭ كىيىنىشى ۋە ياسىنىشى باشقىلارغا بولغان ھۆرمىتىنى نامايان قىلىشى كېرەكلىكىنى بىلدۈرىدۇ. كىيىنىشى ۋە ياسىنىشىدا شۇنداق كىچىك پېئىللىقنى كۆرسەتكەن ئايال قېرىنداشلاردىن پەخىرلىنىمىز.
9. ئابىگائىلنىڭ مىسالىدىن نېمىگە ئۆگىنەلەيمىز؟
9 پەم-پاراسەتلىك — بارلىق پىشىپ يېتىلگەن خۇدا خىزمەتچىلىرى نامايان قىلىدىغان يەنە بىر مۇھىم پەزىلەت. پەم-پاراسەتلىك دېگەن نېمە؟ بۇ ياخشى ھۆكۈم قىلىش، يەنى توغرا بىلەن خاتانى پەرقلەندۈرۈپ، ئاندىن توغرا يولنى تاللاش ئىقتىدارىنى كۆرسىتىدۇ. ئابىگائىلنىڭ مىسالىنى كۆرۈپ باقايلى. ئۇنىڭ ئېرى خاتا قارار چىقىرىپ، پۈتۈن ئائىلىنىڭ خەتەرلىك ۋەزىيەتكە چۈشىشىگە سەۋەبچى بولغان. ئابىگائىل بۇنى بىلىپ، دەرھال پەم-پاراسەتلىك بىلەن ئىش قىلغان. ئۇنىڭ پەم-پاراسەتلىك بولۇشى كۆپلىگەن كىشىلەرنىڭ ھاياتىنى ساقلاپ قالغان (1-سام. 25:14–23، 32–35). پەم-پاراسەت يەنە قاچان سۆزلەش ۋە قاچان سۈكۈت قىلىشنى بىلىشىمىزگە ياردەم بېرىدۇ. يەنە باشقىلار بىلەن سۆھبەتلەشكەندە، ئۇلارنى تېرىكتۈرىدىغان سوئاللارنى سوراشتىن يىراق تۇرۇشىمىزغا ۋە باشقىلارغا كۆڭۈل بۆلگەندە، تەڭپۇڭلۇقنى ساقلىشىمىزغا ياردەم بېرىدۇ.—1-سالونىكا. 4:11.
تۇرمۇشىڭىزدا ئەمەلىي قوللىنىدىغان ماھارەتلەرنى يېتىلدۈرۈڭ
ئوقۇش ۋە يېزىشنى ئۆگىنىشتىن قانداق پايدا ئالدىڭىز؟ (11-ئابزاسقا قاراڭ)
10، 11. ياخشى ئوقۇش ۋە يېزىش ئارقىلىق ئۆزىڭىزگە ۋە باشقىلار ئۈچۈن پايدىسى بار؟ (رەسىمگە ھەم قاراڭ)
10 ئايال قېرىنداش تۇرمۇشتا كېرەك بولىدىغان ماھارەتلەرنى يېتىلدۈرۈشى لازىم. بالىلىق چېغىدا ئۆگەنگەن بەزى ماھارەتلەر قىزغا كېلەچەكتىكى ھاياتىغا پايدىلىق بولۇشى مۇمكىن. بىر قانچە مىسالنى كۆرۈپ باقايلى.
11 ئوقۇش ۋە يېزىشنى ئۆگىنىڭ. بەزى مەدەنىيەتلەردە ئوقۇش ۋە يېزىش ئاياللارنىڭ ئۆگىنىشى زۆرۈر ماھارەت دەپ قارالمايدۇ. بىراق، ھەربىر مەسىھ ئەگەشكۈچىسى ئۈچۈن ئوقۇش ۋە يېزىش ئىنتايىن مۇھىم d (1-تىموت. 4:13). شۇڭا، ئوقۇش ۋە يېزىشنى ئۆگىنىشىڭىزگە بىر نەرسىنىڭ توسالغۇ بولۇشىغا يول قويماڭ. بۇنىڭ سىز ئۈچۈن قانداق پايدىسى بار؟ بۇ ماھارەتلەر ئىش تېپىشىڭىزغا ۋە شۇ ئىشنى داۋاملىق قىلالىشىڭىزغا ياردەم بېرەلەيدۇ. شۇنداقلا، خۇدانىڭ سۆزىنى ياخشىراق ئۆگىنىپ، ياخشى تەلىم بەرگۈچى بولۇشىڭىزغا ياردەم بېرىدۇ. ھەممىدىن مۇھىمى، سىز خۇدانىڭ سۆزىنى ئوقۇپ، ئوقۇغانلىرىڭىز ئۈستىدە چوڭقۇر ئويلانغىنىڭىزدا ياراتقۇچى يەھۋاغا تېخىمۇ يېقىن بولالايسىز.—يەشۇئا 1:8؛ 1-تىموت. 4:15.
12. پەندى-نەسىھەت 31:26-ئايەت، سىزگە ئالاقە قىلىشقا ماھىر بولۇشىڭىزغا قانداق ياردەم بېرەلەيدۇ؟
12 باشقىلار بىلەن ئالاقە قىلىش قابىلىيىتىنى يېتىلدۈرۈڭ. ئۇ بارلىق مەسىھ ئەگەشكۈچىلىرى ئۈچۈن ئىنتايىن مۇھىم بىر ماھارەت. بۇ توغرىسىدا ياقۇپ بىزگە ئەمەلىي مەسلىھەتلەرنى بەرگەن: «ھەر بىر كىشى چوقۇم ئاڭلاشقا ئالدىرىسۇن، سۆزلەشكە ئالدىرىمىسۇن» (ياقۇپ 1:19). باشقىلارنىڭ سۆزلىرىنى دىققەت بىلەن ئاڭلىسىڭىز، ئۇلارغا ھېسداشلىق ياكى «ھەمدەرتلىك» كۆرسىتەلەيسىز (1-پېتر. 3:8). ئەگەر بىرىنىڭ نېمە دېگەنلىكىنى ياكى ئۇنىڭ قانداق ھېس-تۇيغۇدا بولۇۋاتقانلىقىنى جەزملەشتۈرەلمىسىڭىز، مۇۋاپىق سوئاللارنى سوراڭ. ئاندىن بىراز ئويلىنىۋالغاندىن كېيىن سۆزلەڭ (پەند. نە 15:28). ئۆز-ئۆزىڭىزدىن سوراپ كۆرۈڭ: «مەن ئېيتماقچى بولغان سۆزلەر كىشىگە ئىلھام-مەدەت بېرەمدۇ؟ ھۆرمەت ۋە مېھرىبانلىق كۆرسىتەمدۇ؟» باشقىلار بىلەن ياخشى ئالاقە ئورنىتالايدىغان پىشىپ يېتىلگەن قېرىنداشلاردىن ئۆگىنىڭ (پەندى-نەسىھەت 31:26-نى ئوقۇڭ). ئۇلارنىڭ سۆزلەش ئۇسۇلىغا دىققەت قىلىڭ. ئالاقە قىلىش ماھارىتىنى قانچە ياخشى يېتىلدۈرسىڭىز، باشقىلار بىلەن بولغان مۇناسىۋىتىڭىز تېخىمۇ ياخشىراق بولىدۇ.
ئائىلىدىكى ئىشلارنى ئۆگىنىۋالغان قېرىنداشلار ئائىلىسى ۋە جامائەت ئۈچۈن چوڭ بەرىكەت (13-ئابزاسقا قاراڭ)
13. ئۆي ئىشلىرىنى قانداق ئۆگىنىشكە بولىدۇ؟ (رەسىمگە ھەم قاراڭ)
13 تۇرمۇشتا پىششىق بولۇشنى ئۆگىنىڭ. نۇرغۇن جايلاردا ئاياللار ئائىلىدىكى ئۆي-ئىشلىرىنى قىلىش مەسئۇلىيىتىنى كۆپرەك ئۈستىگە ئالغان. بەلكىم، سىز ئانىڭىز ياكى باشقا قېرىنداشلاردىن چوقۇم ئۆگىنىشكە تېگىشلىك ماھارەتلەرنى ئۆگىنەلىشىڭىز مۇمكىن. سىندى ئىسىملىك قېرىنداش مۇنداق دەيدۇ: «ئاپام ماڭا ئۆگەتكەن ئەڭ قىممەتلىك دەرس، جاپالىق ئىشلەشتىن كېلىدىغان خۇشاللىقتىن بەھرىمەن بولۇش. تاماق ئېتىش، تازىلاش، تىككۈچىلىك ئىشلىرى ۋە مال سېتىۋېلىش قاتارلىق ماھارەتلەرنى ئۆگىنىش تۇرمۇشىمنى ئاسانلاشتۇردى ۋە يەھۋاغا كۆپرەك خىزمەت قىلىشىمغا يول ئېچىپ بەردى. ئاپام ماڭا يەنە مېھماندوست بولۇشنى ئۆگەتتى. ئۇ ماڭا ئۈلگە بولالايدىغان ئېسىل قېرىنداشلار بىلەن كۆرۈشۈشنىڭ پۇرسىتىنى يارىتىپ بەردى» (پەند. نە 31:15، 21، 22). تۇرمۇش ئىشلىرىغا پىشقان، تىرىشچان، مېھماندوست ئايال ئائىلىدە ۋە جامائەتتە باشقىلار ئۈچۈن خۇشاللىق ۋە بەرىكەت.—پەند. نە 31:13، 17، 27؛ ئەلچى. 16:15.
14. كرىستالنىڭ تەجرىبىسىدىن نېمىلەرنى ئۆگىنىسىز؟ دىققىتىڭىز نېمىدە بولۇشى كېرەك؟
14 ئۆزىڭىزنى بېقىشنى ئۆگىنىڭ. ھەممە مەسىھ ئەگەشكۈچىلىرى ئۆزىنى تەمىنلەشنى ئۆگىنىشى مۇھىم (فىلىپى. 4:11). كرىستال ئىسىملىك قېرىنداش مۇنداق دەيدۇ: «ئوتتۇرا مەكتەپتە ئوقۇۋاتقان چېغىمدا ئاتا-ئانام كېلەچەكتە تۇرمۇشۇمدا ئەمەلىي قوللىنىشقا بولىدىغان دەرسلەرنى تاللىشىمغا ياردەم بەردى. دادام مېنى بۇغالتىرلىقنى ئۆگىنىشكە ئۈندىدى، كېيىن بۇ تۇرمۇشۇمدا كۆپ ياردەم بەردى». پەقەت قانداق پۇل تېپىشىنى ئەمەس، دانالىق بىلەن شۇ پۇلنى پىلانلىق خەجلەشنى ئۆگىنىڭ (پەند. نە 31:16، 18). بارىغا شۈكۈر قىلىپ، ئاددى-ساددا تۇرمۇش كەچۈرۈشتىن قانائەت ھاسىل قىلىشنى ئۆگەنسىڭىز، زۆرۈر بولمىغان قەرزگە كىرىپ قېلىشتىن ساقلىنىپ، زېھنىڭىزنى خۇداغا خىزمەت قىلىشقا قارىتالايسىز.—1-تىموت. 6:8.
كېلەچەك ئۈچۈن ئۆزىڭىزنى تەييارلاڭ
15، 16. يالغۇز قېرىنداشلار باشقىلارغا قانداق پايدا ئەكېلىدۇ؟ (ماركۇس 10:29، 30)
15 يەھۋانى خۇرسەن قىلىدىغان پەزىلەتلەرنى يېتىلدۈرۈڭ ۋە تۇرمۇشىڭىزدا ئەمەلىي قوللىنىدىغان ماھارەتلەرنى ئۆگىنىڭ. ئۇلار كېيىنكى ھاياتىڭىزدا ياخشى قارارلارنى چىقىرىشىڭىزغا ياردەم بېرىدۇ.
16 بىر مەزگىل توي قىلماي يالغۇز ئۆتۈشنى قارار قىلىشىڭىز مۇمكىن. گەرچە بەزى مەدەنىيەتتە، توي قىلمىغانلار باشقىلارنىڭ بېسىمىغا ئۇچرىسىمۇ، بەزى ئاياللار ئەيسا مەسىھ ئېيتقاندەك، توي قىلماي ئۆتۈشنى تاللايدۇ (مەتتا 19:10–12). باشقىلىرى بولسا، ھەرتۈرلۈك سەۋەبلەر تۈپەيلى توي قىلمايدۇ. يەھۋا خۇدا ۋە ئەيسا مەسىھ يالغۇز ياشاۋاتقان قېرىنداشلارنى ئىنتايىن قەدىرلەيدۇ. دۇنيانىڭ ھەرقايسى جايلىرىدا توي قىلمىغان قېرىنداشلار جامائەت ئۈچۈن چوڭ بەرىكەت. ئۇلار باشقىلارغا مېھىر-مۇھەببەت ۋە سەمىمىي غەمخورلۇق كۆرسەتكەچ، نۇرغۇنلىرىمىز ئۈچۈن ئۇلار خۇددى روھىي ئاچا-سىڭىللار ۋە ئانىلارغا ئوخشاشتۇر.—ماركۇس 10:29، 30-نى ئوقۇڭ؛ 1-تىموت. 5:2.
17. ياش قېرىنداش تولۇق ۋاقىت خىزمەتكە ھازىردىن باشلاپ قانداق تەييار بولالايدۇ؟
17 سىز تولۇق ۋاقىت خىزمەتكە قاتنىشالايسىز. دۇنيانىڭ ھەرقايسى جايلىرىدىكى ۋەز ئېيتىش خىزمىتىدە ئايال قېرىنداشلار ئۆز ھەسسىسىنى قوشالايدۇ (زەبۇر 68:11). تولۇق ۋاقىت خىزمەت قىلىشنى ئويلىنىۋاتامسىز؟ سىز پىدائىي ۋەز ئېيتقۇچى، قۇرۇلۇش ئىشلىرىدا پىدائىي ياردەم بەرگۈچى ياكى بەيتەل ئائىلىسىدە خىزمەتچى بولۇش ئۈچۈن مەقسەت قويسىڭىز بولىدۇ. شۇ مەقسىتىڭىز توغرۇلۇق يەھۋاغا چىن قەلبىڭىزدىن دۇئا قىلىڭ. شۇنداق مەقسەتكە يەتكەن قېرىنداشلار بىلەن پاراڭلىشىڭ. ئۆزىڭىزنىڭمۇ شۇنىڭغا لاياقەتلىك بولۇشى ئۈچۈن نېمىلەرنى قىلىشىڭىز كېرەكلىكىنى بىلىۋېلىڭ. شۇ مەقسەتلەرگە يېتەلىگۈدەك تۈزۈڭ. ئەگەر تولۇق ۋاقىتلىق خىزمەتچى بولسىڭىز، يەھۋا ئۈچۈن كۆپرەك خىزمەت قىلالايسىز.
ئەگەر توي قىلىشنى ئويلاۋاتقان بولسىڭىز، ھەمراھىڭىزنى ناھايىتى ئەستايىدىللىق بىلەن تاللىشىڭىز كېرەك (18-ئابزاسقا قاراڭ)
18. نېمە ئۈچۈن قېرىنداش ئەر تاللىغاندا، ناھايىتى ئەستايىدىل تاللىشى كېرەك؟ (رەسىمگە ھەم قاراڭ)
18 توي قىلىشقا قارار قىلىشىڭىز مۇمكىن. بۇ ماقالىدە، ئۆگىنىپ ئۆتكەن پەزىلەتلەر ۋە ماھارەتلەرنى يېتىلدۈرۈش سىزنىڭ ئىقتىدارلىق ئايال بولۇشىڭىزغا ياردەم بېرەلەيدۇ. ئەگەر سىز توي قىلىشنى ئويلاشقان بولسىڭىز، ھەمراھ تاللاشتا ئېھتىياتچان بولۇڭ. چۈنكى، توي قىلىش ھاياتىڭىزدا چىقىرىدىغان مۇھىم قارارلاردىن بىرى. ئېسىڭىزدە بولسۇنكى، سىز توي قىلغاندىن كېيىن، چوقۇم ئېرىڭىزنىڭ باشچىلىقىغا بويسۇنۇشىڭىز كېرەك (رىملىقلار 7:2؛ ئەفەس. 5:23، 33). شۇڭا، ئۆزىڭىزدىن سوراپ كۆرۈڭ: «مەن تاللىغان يىگىت پىشىپ يېتىلگەن مەسىھ ئەگەشكۈچىسىمۇ؟ ئۇ ھاياتىدا يەھۋانى بىرىنچى ئورۇنغا قويامدۇ؟ ئۇ دانا قارار چىقىرامدۇ؟ ئۇ خاتالىقىنى ئېتىراپ قىلامدۇ؟ ئۇ ئاياللارنى ھۆرمەتلەمدۇ؟ ئۇ ئائىلىۋى ئىبادەتكە باشچىلىق قىلالامدۇ؟ ئائىلىسىنى روھىي، ماددىي ۋە ھېس-تۇيغۇ جەھەتتىن قامداش ئۈچۈن كېرەكلىك ماھارەتلەرنى يېتىلدۈرگەنمۇ؟ ئۇ ئۆز مەسئۇلىيىتىنى ياخشى ئادا قىلامدۇ؟ ئۇنىڭ جامائەتتە قانداق مەسئۇلىيىتى بار ۋە ئۇ مەسئۇلىيىتىنى قانداق ئورۇنلايدۇ؟» (لۇقا 16:10؛ 1-تىموت. 5:8). ئەلۋەتتە، ئەگەر ياخشى ئەر بولىدىغان يىگىتنى تاپماقچى بولسىڭىز، ئۆزىڭىزمۇ ياخشى ئايال بولۇشنى ئۆگىنىشىڭىز كېرەك.
19. نېمە ئۈچۈن «ياردەمچى» بولۇش، بۇ ھەرگىز ئايال كىشىنى تۆۋەن كۆرگەنلىك بولمايدۇ؟
19 مۇقەددەس كىتابتا ياخشى ئايالنى ئېرى ئۈچۈن «لايىق بىر ياردەمچى ھەمراھ» دەيدۇ (يارىت. 2:18). بۇ ئايالنى تۆۋەن كۆرۈپ، چۈشۈرگەنلىك بولامدۇ؟ ئەلۋەتتە، ياق. ياردەمچى بولۇش شان-شەرەپلىك ۋەزىپە! ئەمەلىيەتتە، مۇقەددەس كىتاب يەھۋا خۇدانى «ياردەمچى» دەپ تەسۋىرلەيدۇ (زەبۇر 54:4؛ ئىبرانىي. 13:6). بۇنىڭدىن شۇنداق خۇلاسە قىلالايمىزكى، خۇدا ئايالغا بۇ رولنى ئۇنى تۆۋەن كۆرۈش ئۈچۈن ئەمەس، بەلكى ئۇنى شان-شەرەپكە ئېرىشتۈرۈش ئۈچۈن بەرگەن. ئايالى ئېرىنى قوللاپ-قۇۋۋەتلەپ، چىقارغان قارارىنى ئەمەلگە ئاشۇرۇشىغا ياردەم بەرسە، ئۇنىڭ ياخشى ياردەمچىسى بولالايدۇ. ئۇ يەھۋانى چىن قەلبىدىن سۆيگەچ، ئېرىنىڭ ئىززەت-ھۆرمەت قازىنىشىغا كۈچ چىقىرىدۇ (پەند. نە 31:11، 12؛ 1-تىموت. 3:11). يەھۋاغا بولغان سۆيگۈ-مۇھەببىتىڭىزنى چوڭقۇرلاشتۇرۇپ، ئۆي ئىچىدە ھەم جامائەتتە باشقىلارغا ياردەم بېرىش ئارقىلىق كەلگۈسىدە ياخشى ئايال بولۇشقا تەييارلىق قىلالايسىز.
20. ئانا قانداق تەسىر ئېلىپ كېلىدۇ؟
20 كەلگۈسىدە ئانا بولۇشىڭىز مۇمكىن. توي قىلغاندىن كېيىن، سىلەر پەرزەنتلىك بولۇشۇڭلار مۇمكىن (زەبۇر 127:3). شۇڭا، بۇنى ئالدىنئالا ئويلاپ كۆرۈش دانالىق بولىدۇ. بۇ ماقالىدە مۇھاكىمە قىلىپ چىققان پەزىلەتلەر ۋە ماھارەتلەر توي قىلسىڭىز ياكى ئانا بولسىڭىز، سىزگە ياردەم بېرىدۇ. سىزنىڭ سۆيگۈ-مۇھەببىتىڭىز، ئاق-كۆڭۈللۈكىڭىز ۋە سەۋرچانلىقىڭىز بالىلىرىڭىزغا بىخەتەرلىك ھېس-تۇيغۇسىنى بېرىپ، ئۇلارنىڭ ساغلام ئائىلە مۇھىتىغا ئېرىشىشىگە ھەسسە قوشىدۇ.—پەند. نە 24:3.
نۇرغۇن ئەرلەر ۋە ئاياللار مۇقەددەس كىتابتىن تەلىم ئالماقتا ۋە ئۆگەنگەنلىرىنى ھاياتىدا قوللىنىپ، روھىي جەھەتتىن يېتىلگەن خۇدانىڭ خىزمەتچىلىرى بولماقتا (21-ئابزاسقا قاراڭ)
21. بىز قېرىنداشلىرىمىزغا قانداق قارايمىز؟ نېمىشكە؟ (مۇقاۋىدىكى رەسىم)
21 ياش قېرىنداشلار، سىلەرنى بەكمۇ ياخشى كۆرىمىز، چۈنكى سىلەر يەھۋا خۇدا ۋە جامائەت ئۈچۈن كۆپ ئىشلارنى قىلىۋاتىسىلەر (ئىبرانىي. 6:10). ئۆزىڭىزنىڭ ۋە باشقىلارنىڭ ھاياتىنى تېخىمۇ گۈزەل قىلىش ئۈچۈن ئېسىل پەزىلەتلەرنى راۋاجلاندۇرۇش ۋە كېرەكلىك ماھارەتلەرنى ئۆگىنىش ئۈچۈن كۆپ كۈچ چىقىرىڭلار ۋە كەلگۈسىدە ئۆز ئۈستۈڭلارغا ئالىدىغان مەسئۇلىيەتلەر ئۈچۈن ھازىردىن باشلاپ تەييارلىق قىلىڭلار. سىلەر يەھۋانىڭ تەشكىلاتى ئۈچۈن ئىنتايىن قىممەتلىك مەرۋايىتلارغا ئوخشايسىلەر.
3-ناخشا «خۇدا ئۆزى مېھىر-مۇھەببەتتۇر»
a قەدىرلىك ياش ئاچا-سىڭىللار، سىلەرنى جامائەتتە قەدىرلەيدۇ. سىلەر خۇداغا خاس پەزىلەتلەرنى يېتىلدۈرۈش، تۇرمۇشتا ئەمەلىي قوللىنىشچان ماھارەتلەرنى ئۆگىنىش ۋە كەلگۈسىدە ئۆز رولىڭلارنى ئورۇنداشقا تەييارلىق قىلىش ئارقىلىق ئىماندا پىشىپ يېتىلگەن مەسىھ ئەگەشكۈچىسى بولالايسىلەر. نەتىجىدە، يەھۋانىڭ خىزمىتىدە نۇرغۇن بەرىكەتلەردىن بەھرىمەن بولىسىلەر.
b سۆز-ئىبارە مەنىسى: پىشىپ يېتىلگەن مەسىھ ئەگەشكۈچىسى بۇ دۇنيانىڭ دانالىقىدىن ئەمەس، بەلكى خۇدادىن ئۆگىنىدۇ. ئۇ ئەيسانى ئۈلگە قىلىپ، يەھۋا بىلەن مەھكەم مۇناسىۋەتنى ساقلاپ قېلىش ئۈچۈن جاپالىق ئىشلەيدۇ ۋە باشقىلارغا سۆيگۈ-مۇھەببىتىنى كۆرسىتىدۇ.
d ئوقۇشنىڭ مۇھىملىقى توغرىسىدا jw.org تور بېكىتىدىن «نېمە ئۈچۈن كىتاب ئوقۇش بالىلار ئۈچۈن مۇھىم؟ 1-قىسىم. ئوقۇش ياكى كۆرۈش» دېگەن ماقالىنى كۆرۈڭ.
