53-تەتقىق ماقالىسى
ياش يىگىتلەر، پىشىپ يېتىلگەن خۇدا خىزمەتچىلىرى بولۇڭلار!
«سەن كۈچلۈك بول ۋە ئەركەكتەك ياشىغىن».—1-پادىشاھ. 2:2.
11-ناخشا يەھۋانىڭ كۆڭلىنى خۇش قىلىش
بۇ ماقالىدە a
1. مۇۋەپپەقىيەت قازىنىش ئۈچۈن مەسىھ ئەگەشكۈچىسى نېمە قىلىشى كېرەك؟
پادىشاھ داۋۇت سۇلايمانغا شۇنداق نەسىھەت بەرگەن: «سەن كۈچلۈك بول ۋە ئەركەكتەك ياشىغىن» (1-پادىشاھ. 2:1–3). بۈگۈنكى كۈندىمۇ بارلىق مەسىھ ئەگەشكۈچىسى بولغان ئەرلەر بۇ نەسىھەتكە قۇلاق سېلىپ، ئەيسا مەسىھنى ئۈلگە قىلىشى بەك مۇھىم. ئىشلىرىدا مۇۋەپپەقىيەت قازىنىش ئۈچۈن، چوقۇم خۇدانىڭ قانۇنلىرىغا بويسۇنۇشنى ئۆگىنىشى ۋە مۇقەددەس كىتاب پرىنسىپلىرىنى ھاياتىنىڭ ھەرقايسى ساھەسىدە ئەمەلىي قوللىنىشى كېرەك (لۇقا 2:52). ياش بۇرادەرلەرنىڭ ئىماندا پىشىپ يېتىلگەن ئەرلەرگە ئايلىنىشى نېمە ئۈچۈن شۇنچە مۇھىم؟
2، 3. نېمە ئۈچۈن ياش بۇرادەرنىڭ پىشىپ يېتىلگەن مەسىھ ئەگەشكۈچىسى بولۇشى مۇھىم؟
2 بۇرادەرنىڭ ھەم ئائىلىدە، ھەم جامائەتتە ئىنتايىن مۇھىم مەسئۇلىيىتى بار. ياش بۇرادەرلەر، شەك-شۈبھىسىزكى، سىلەر كەلگۈسىدىكى مەسئۇلىيىتىڭلار ھەققىدە ئويلىنىپ كۆردۈڭلار. سىلەر يەھۋاغا تولۇق ۋاقىت خىزمەت قىلالايسىلەر. ياردەمچى خىزمەتچى، كېيىن جامائەت ئاقساقىلى بولالايسىلەر. ئۇنىڭدىن باشقا، توي قىلىپ بالىلىق بولۇشۇڭلار مۇمكىن (ئەفەس. 6:4؛ 1-تىموت. 3:1). بۇ مەقسەتلەرگە يېتىش ۋە خىزمىتىڭلارنىڭ مۇۋەپپەقىيەتلىك بولۇشى ئۈچۈن، ئىماندا پىشىپ يېتىلگەن ئېتىقادچى بولۇشۇڭلار كېرەك b.
3 ئىماندا پىشىپ يېتىلگەن مەسىھ ئەگەشكۈچىسى بولۇشقا نېمە ياردەم بېرەلەيدۇ؟ بۇنىڭ ئۈچۈن يېتىلدۈرۈشكە تېگىشلىك مۇھىم ماھارەتلەر بار. ئۇنداقتا، كېلەچەكتە ھەرقانداق مەسئۇلىيەتنى ئۈستۈڭلارغا ئېلىشقا تەييار بولۇش ئۈچۈن ھازىرنىڭ ئۆزىدە نېمە قىلالايسىلەر؟
پىشىپ يېتىلىش ئۈچۈن باسىدىغان قەدەملەر
ئەيسانىڭ پەزىلەتلىرىنى ئۈلگە قىلىش، پىشىپ يېتىلگەن مەسىھ ئەگەشكۈچىسى بولۇشقا ياردەم بېرىدۇ (4-ئابزاسقا قاراڭ)
4. ئۈلگە قىلىش ئۈچۈن ياخشى مىساللارنى قەيەردىن تېپىشقا بولىدۇ؟ (رەسىمگە ھەم قاراڭ)
4 ئۈلگە قىلىش ئۈچۈن ياخشى مىساللارنى تاللاڭ. مۇقەددەس كىتابتا ئۈلگە ئالالايدىغان ياش يىگىتلەرنىڭ ياخشى مىساللىرى بار. ئۆتمۈشتە ياشىغان ئاشۇ كىشىلەر خۇدانى چىن قەلبىدىن سۆيگەن ۋە ئۇنىڭ خەلقىگە غەمخورلۇق قىلىش ئۈچۈن ھەرتۈرلۈك مەسئۇلىيەتلەرنى ئۆز ئۈستىگە ئالغان. ئائىلىڭىزدە ۋە جامائىتىڭىزدە ئىماندا پىشىپ يېتىلگەن ئەرلەر ئارىسىدىن ياخشى ئۈلگىلەرنى تاپالايسىز (ئىبرانىي. 13:7). ئەلۋەتتە، ئەڭ مۇكەممەل ئۈلگىمىز — ئەيسا مەسىھتۇر (1-پېتر. 2:21). سىز شۇنداق كىشىلەرنىڭ ئۈلگىلىرىنى ئەستايىدىل تەتقىق قىلغاندا، ئۇلارنىڭ ئاجايىپ پەزىلەتلىرىگە دىققەت قارىتىڭ (ئىبرانىي. 12:1، 2). ئۇلاردىن ئۈلگە ئېلىش ئۈچۈن نېمە قىلسىڭىز بولىدىغانلىقى ھەققىدە ئويلىنىڭ.
5. تەپەككۈر قىلىش ئىقتىدارىنى قانداق يېتىلدۈرەلەيسىز ۋە بۇ نېمە ئۈچۈن مۇھىم؟ (زەبۇر 119:9)
5 تەپەككۈر قىلىش ئىقتىدارىنى يېتىلدۈرۈڭ ۋە ئۇنى ساقلاڭ (پەند. نە 3:21). تەپەككۈر قىلىش ئىقتىدارىغا ئىگە كىشى مەلۇم ئىشنى قىلىشتىن ئىلگىرى ئەستايىدىل ئويلىنىدۇ. شۇنىڭ ئۈچۈن، بۇ ئىقتىدارنى يېتىشتۈرۈش ۋە ئۇنى ساقلاشقا تىرىشىڭ. نېمە ئۈچۈن؟ چۈنكى، بۇ دۇنيادىكى كۆپلىگەن ياشلار پەقەت ئۆزىگە تايىنىدۇ ياكى ھېس-تۇيغۇلىرىغا ئەگىشىپ ھەرىكەت قىلىدۇ (پەند. نە 7:7؛ 29:11). ئۇنىڭدىن باشقا، تېلېۋىزور پروگراممىلىرى، فىلىملەر، ئىنتېرنېت ۋە تاراتقۇلار سىزگە قاتتىق تەسىر قىلىشى مۇمكىن. بىراق، سىز تەپەككۈر قىلىش ئىقتىدارىنى قانداق يېتىلدۈرەلەيسىز؟ ئاۋۋال، مۇقەددەس كىتاب پرىنسىپلىرىنى ئۆگىنىپ، ئۇلارنىڭ پايدىسى توغرۇلۇق ئويلىنىڭ. ئاندىن بۇ پرىنسىپلارنى ھاياتىڭىزدا قوللىنىپ، يەھۋانىڭ كۆڭلىنى خۇرسەن قىلىدىغان قارارلارنى چىقىرىڭ (زەبۇر 119:9-نى ئوقۇڭ). بۇ مۇھىم ماھارەتنى يېتىلدۈرسىڭىز، ئىماندا پىشىپ يېتىلگەن بۇرادەر بولۇش ئۈچۈن چوڭ قەدەمنى تاشلايسىز (پەند. نە 2:11، 12؛ ئىبرانىي. 5:14). تەپەككۈر قىلىش ئىقتىدارى ئىككى ئەھۋالدا، بىرىنچى، ئېتىقادچى ئايال قېرىنداشلار بىلەن ئالاقە قىلغاندا ۋە ئىككىنچى، تاشقى كۆرۈنىشىمىزدە قانداق ياردەم بېرىدىغانلىقىنى كۆرۈپ باقايلى.
6. ياش بۇرادەرنىڭ ئاياللارنى ھۆرمەتلىشىگە تەپەككۈر قىلىش ئىقتىدارى قانداق ياردەم بېرىدۇ؟
6 تەپەككۈر قىلىش ئىقتىدارى سىزگە ئاياللارنى ھۆرمەتلەشكە ياردەم بېرىدۇ. ياش بۇرادەرنىڭ بىر قېرىنداشقا قىزىقىشى ۋە ئۇنىڭ بىلەن يېقىن تونۇشۇشنى خالىشى نورمال ئەھۋال. بىراق، ئۇنىڭ توي قىلىش نىيىتى بولمىسا، ئۇ قىز قېرىنداشنى خاتا ھېس-تۇيغۇغا كەلتۈرىدىغان گەپ-سۆزلەرنى ئېيتمايدۇ ياكى يازمايدۇ ۋە ئىش-ھەرىكەتلەرنى قىلمايدۇ (1-تىموت. 5:1، 2). ئەگەر ئۇ بىر قېرىنداش بىلەن مۇھەببەتلىشىپ يۈرۈۋاتقان بولسا، قىزنىڭ نامىغا داغ كەلتۈرمەسلىك ئۈچۈن، ھېچكىم يوق ئەھۋالدا، ئۇنىڭ بىلەن يالغۇز قالماسلىقى كېرەك.—1-كورىنت. 6:18.
7. ياش بۇرادەرنىڭ كىيىم كېچەك تاللىشىغا تەپەككۈر قىلىش ئىقتىدارى قانداق ياردەم بېرىدۇ؟
7 تەپەككۈر قىلىش ئىقتىدارىنى يېتىلدۈرگەن ياشلار كىيىم-كېچەك ۋە چاچ پاسونلىرىنى تاللاشتا ياخشى قارارلارنى چىقىرىدۇ. دائىم يېڭىلىنىۋاتقان مودا ئېقىمى كۆپىنچە يەھۋا خۇدانى ھۆرمەتلىمەيدىغان ياكى ئەخلاقسىز تۇرمۇش كەچۈرىدىغان كىشىلەر ئۈچۈن لايىھىلەنگەن ۋە تەشۋىق قىلىنغان. شۇنداق ئەخلاقسىز كۆز قارىشى بار كىشىلەر تار، بەدەنگە يېپىشىپ تۇرىدىغان ياكى ئاياللارنىڭ كىيىمىگە ئوخشاش كىيىملەرنى كىيىشىدۇ. شۇڭا، ياش بۇرادەرلەر ئىمان-ئېتىقادتا پىشىپ يېتىلىشىنى خالىسا، چوقۇم مۇقەددەس كىتابتىكى پرىنسىپلار بويىچە كىيىنىشى ۋە جامائەتتىكى ئۈلگىلىك قېرىنداشلاردىن ئۆگىنىشى لازىم. ئۇ ئۆزىگە مۇنداق سوئال قويسا بولىدۇ: «تاشقى كۆرۈنۈشۈم ساغلام ئوي-پىكىرلىك ۋە باشقىلارنى ھۆرمەتلەيدىغان كىشى ئىكەنىمنى كۆرسىتەمدۇ؟ كىيىم-كېچىكىم باشقىلارغا مېنىڭ خۇداغا سادىق خىزمەتچىسى ئىكەنىمنى كۆرسىتەمدۇ؟» (1-كورىنت. 10:31–33؛ تىتۇس 2:6) تەپەككۈر قىلىش ئىقتىدارغا ئىگە كىشى پەقەت ئېتىقادچى قېرىنداشلارنىڭ ئەمەس، ھەم ئاسماندىكى ئاتىسىنىڭ ئىززەت-ھۆرمىتىگە ئېرىشىدۇ.
8. ياش بۇرادەر قانداق قىلىپ ئىشەنچىلىك كىشى بولۇشنى ئۆگىنەلەيدۇ؟
8 ئىشەنچىلىك كىشى بولۇڭ. ئىشەنچىلىك بۇرادەر ئۈستىگە ئالغان بارلىق مەسئۇلىيەتنى ئەستايىدىللىق بىلەن ئورۇنلايدۇ (لۇقا 16:10). مۇكەممەل ئۈلگىمىز ئەيسا مەسىھنىڭ مىسالىنى كۆرۈپ باقايلى. بۇ ئەزەلدىن بىپەرۋالىق ياكى مەسئۇلىيەتسىزلىك قىلمىغان ئىدى. ئەكسىنچە، يەھۋا ئۇنىڭغا تاپشۇرغان ۋەزىپىلەرنى ھەتتا ئورۇنلاش قىيىن ئەھۋالدىمۇ ئورۇنلىغان. ئۇ ئىنسانلارنى سۆيگەن ۋە ئۇلار ئۈچۈن، بولۇپمۇ ئۆز شاگىرتلىرى ئۈچۈن ھاياتىنى پىدا قىلغان (يۇھاننا 13:1). ئەيسانى ئۈلگە قىلىپ، سىزگە تاپشۇرۇلغان ھەرقانداق ۋەزىپىنى ئورۇنلاش ئۈچۈن بار كۈچىڭىزنى چىقىرىڭ. ئەگەر تاپشۇرۇلغان ۋەزىپىنى قانداق ئورۇنلاشنى بىلمىسىڭىز، ئىماندا پىشىپ يېتىلگەن بۇرادەرلەردىن كەمتەرلىك بىلەن ياردەم سوراڭ. ھېچنېمىنى قىلمىغاندىن ياخشىراق دەپ قولنىڭ ئۇچىدىلا ئىش قىلىپ قويماڭ (رىملىقلار 12:11). ئەكسىنچە، ۋەزىپىڭىزنى ياخشى ئورۇنلاڭ، يەنى ئۇنى «ئادەملەر ئۈچۈن ئەمەس، يەھۋا ئۈچۈن قىلغاندەك» قىلىشقا تىرىشىڭ (كولوسى. 3:23). ئەلۋەتتە، سىز مۇكەممەل ئەمەس، شۇڭا كىچىك پېئىل بولۇپ، ئۆتكۈزگەن ھەرقانداق خاتالىقىڭىزنى بوينىڭىزغا ئېلىپ، ئېتىراپ قىلىڭ.—پەند. نە 11:2.
تۇرمۇشىڭىزدا كېرەك بولىدىغان ماھارەتلەرنى يېتىلدۈرۈڭ
9. نېمە ئۈچۈن ياش بۇرادەر ئەمەلىي قوللىنىشچان ماھارەتلەرنى يېتىلدۈرۈشى كېرەك؟
9 روھىي جەھەتتىن يېتىلىش ئۈچۈن تۇرمۇشتا كېرەكلىك ماھارەتلەرنى يېتىلدۈرۈشىڭىز كېرەك. ئۇلار جامائەتتە مەسئۇلىيەتنى ئۈستىڭىزگە ئېلىشىڭىزغا، ئۆزىڭىزنى ياكى ئائىلىڭىزنى بېقىش ئۈچۈن ئىش تېپىشىڭىزغا ۋە باشقىلار بىلەن ياخشى مۇناسىۋەت ئورنىتىشىڭىزغا ياردەم بېرىدۇ. بۇ پايدىلىق ماھارەتلەردىن بىر نەچچىسىنى كۆرۈپ باقايلى.
ياخشى ئوقۇش ۋە يېزىشنى بىلىش ئۆزىڭىز ۋە جامائەت ئۈچۈن پايدىلىق (10، 11-ئابزاسلارغا قاراڭ)
10، 11. ياش بۇرادەرنىڭ ئوقۇش ۋە يېزىشنى ياخشى بىلىشىنىڭ ئۆزى ۋە جامائەت ئۈچۈن قانداق پايدىسى بار؟ (زەبۇر 1:1–3) (رەسىمگە ھەم قاراڭ)
10 ئوقۇش ۋە يېزىشنى ئۆگىنىڭ. مۇقەددەس كىتاب تۇرمۇشى بەختلىك ۋە ئىشلىرى ئوڭۇشلۇق ئادەم ھەر كۈنى ۋاقىت چىقىرىپ، خۇدانىڭ سۆزىنى ئوقۇيدىغانلىقى ۋە چوڭقۇر ئويلىنىدىغانلىقىنى ئېيتىدۇ (زەبۇر 1:1–3-نى ئوقۇڭ). ھەر كۈنى مۇقەددەس كىتابنى ئوقۇش ئارقىلىق، ئۇ ئادەم يەھۋانىڭ تەپەككۈر قىلىش ئۇسۇلىنى بىلىدۇ. بۇ ئۇنىڭ ئوچۇق ئوي-پىكىر يۈرگۈزۈپ، ياخشى خۇلاسە چىقىرىشىغا ياردەم بېرىدۇ (پەند. نە 1:3، 4). نېمە ئۈچۈن جامائەت شۇنداق بۇرادەرلەرگە مۇھتاج؟
11 ئېتىقادچى قېرىنداشلار مۇقەددەس كىتابقا ئاساسلىنىپ، تەلىم-تەربىيە ۋە مەسلىھەت بېرەلەيدىغان بۇرادەرلەرگە مۇھتاج (تىتۇس 1:9). ياخشى ئوقۇش ۋە يېزىشنى بىلسىڭىز، قېرىنداشلارنىڭ ئىمان-ئېتىقادىنى كۈچەيتىشىگە ياردەم بېرەلەيدىغان نۇتۇقلارنى ۋە جاۋابلارنى تەييارلىيالايسىز. ئۇنىڭدىن باشقا، سىز شەخسىي تەتقىق قىلغاندا ۋە جامائەت يىغىلىشى ۋە چوڭ يىغىلىشلاردا نۇتۇق ئاڭلىغاندا، خاتىرىلەرنى يازالايسىز. يېزىپ قالدۇرغان ئوي-پىكىرلەر ئۆز ئىمان-ئېتىقادىڭىزنى كۈچەيتىشكە ۋە باشقىلارنى ئىلھاملاندۇرۇشىڭىزغا ياردەم بېرىدۇ.
12. ياخشى ئالاقە قىلىش ئىقتىدارىنى يېتىلدۈرۈشكە نېمە ياردەم بېرىدۇ؟
12 باشقىلار بىلەن ئالاقە قىلىش ئىقتىدارىنى يېتىلدۈرۈڭ. بۇرادەر باشقىلار بىلەن ياخشى ئالاقىدە بولۇشنى ئۆگىنىشى كېرەك. شۇنداق كىشى باشقىلارنىڭ ئوي-پىكىرلىرىگە قۇلاق سالىدۇ ۋە ھېس-تۇيغۇلىرىنى چۈشىنىدۇ (پەند. نە 20:5). ئۇ باشقىلارنىڭ ئاۋازى، چىراي ئىپادىسى ۋە ئىما-ئىشارىتىگە قاراپ، ئۇلارنى پەرقلەندۈرۈشنى بىلىدۇ. بۇنى ئۆگىنىش ئۈچۈن ئادەملەر بىلەن كۆپرەك ئارىلىشىش مۇھىم. دائىم ئېلېكترونلۇق خەت ۋە قىسقا ئۇچۇر ئەۋەتىش ئارقىلىق ئالاقە قىلسىڭىز، كىشىلەر بىلەن يۈزمۇ-يۈز ئالاقە قىلىش ئىقتىدارىڭىز ئاجىزلاپ كېتىشى مۇمكىن. شۇڭا، باشقىلار بىلەن يۈزمۇ-يۈز پاراڭلىشىش ئۈچۈن پۇرسەت يارىتىڭ.—2-يۇھاننا 12.
ئىش تېپىشقا ياردەم بېرىدىغان ماھارەتنى ئۆگىنىش ياخىشى (13-ئابزاسقا قاراڭ)
13. ياش بۇرادەرلەر يەنە نېمىلەرنى ئۆگىنىشى كېرەك؟ (1-تىموتىي 5:8) (رەسىمگە ھەم قاراڭ)
13 ئۆز-ئۆزىڭىزنى قامداشنى ئۆگىنىڭ. ئىماندا پىشقان مەسىھ ئەگەشكۈچىسى بولغان ئەركەك چوقۇم ئۆزىنى ۋە ئائىلىسىنى باقالايدىغان بولۇشى كېرەك (1-تىموتىي 5:8-نى ئوقۇڭ). بەزى دۆلەتلەردە ياش بۇرادەرلەر دادىسى ياكى باشقا ئۇرۇق-تۇغقانلىرىدىن مەلۇم بىر ھۈنەرنى ئۆگىنىدۇ. يەنە باشقا دۆلەتلەردە ئوتتۇرا مەكتەپتە ئوقۇغاندا، سودا-تىجارەت قىلىش ياكى باشقا تۈرلۈك كەسپىي ماھارەتلەرنى ئۆگىنىشى مۇمكىن. مەيلى قانداق بولۇشىدىن قەتئىينەزەر، سىزنىڭ ئىش تېپىشىڭىزغا ياردەم بېرىدىغان ماھارەتنى ئۆگىنىڭ (ئەلچى. 18:2، 3؛ 20:34؛ ئەفەس. 4:28). جاپالىق ئىشلەيدىغان ۋە ۋەزىپىنى ئاخىرغىچە ئورۇنلايدىغان ئىشچى دېگەن نام-ئاتاقنى قازىنىڭ. شۇنداق بولغاندا، ئىش تاپالايسىز ۋە ئىش-ئورنىڭىزنى ساقلاپ قالالىشىڭىز مۇمكىن. بىز مۇلاھىزە قىلىپ چىققان پەزىلەتلەر ۋە ماھارەتلەر مەسىھ ئەگەشكۈچىسى بولغان ئەركەك ئۈچۈن ئىنتايىن مۇھىم. ھازىر بەزى مەسئۇلىيەتلەرنى كۆرۈپ چىقايلى.
كېلەچەكتىكى مەسئۇلىيەتلەرگە ئۆزىڭىزنى تەييارلاڭ
14. ياش بۇرادەر تولۇق ۋاقىتلىق خىزمەتكە قانداق تەييار بولالايدۇ؟
14 تولۇق ۋاقىتلىق خىزمەت. نۇرغۇنلىغان ئىماندا پىشىپ يېتىلگەن ئەرلەر تولۇق ۋاقىت خىزمەت قىلىشنى ياش چېغىدىن باشلىغان. پىدائىي ۋەز ئېيتقۇچى بولۇش بىر ياشنىڭ ھەرخىل مىجەزلىك كىشىلەر بىلەن ھەمكارلىشىپ ئىشلەشنى ئۆگىنىشىگە ياردەم بېرىدۇ. بۇ خىزمەت ئۇنىڭغا پۇلنى دانالىق بىلەن خەجلەشنى ئۆگىنىشىگە ياردەم بېرىدۇ (فىلىپى. 4:11–13). تولۇق ۋاقىتلىق خىزمەتكە قەدەم تاشلاشنىڭ ياخشى يولى — ياردەمچى پىدائىي ۋەز ئېيتقۇچى بولۇشنى باشلاش. نۇرغۇن قېرىنداشلار بىر مەزگىل ياردەمچى پىدائىي ۋەز ئېيتقۇچى بولىدۇ. بۇ ئۇلارنىڭ پىدائىي ۋەز ئېيتقۇچى بولۇشى ئۈچۈن تەييارلىق قىلىشىغا ياردەم بېرىدۇ. پىدائىي ۋەز ئېيتقۇچى بولۇش قۇرۇلۇش خىزمەتچىسى بولۇش ياكى بەيتەلدە خىزمەت قىلىش قاتارلىق تولۇق ۋاقىتلىق خىزمەتكە ئىشىك ئېچىشى مۇمكىن.
15، 16. بىر ياش بۇرادەر جامائەتكە خىزمەت قىلىشقا لاياقەتلىك بولۇش ئۈچۈن نېمە قىلسا بولىدۇ؟
15 ياردەمچى خىزمەتچى ياكى ئاقساقال بولۇش. بارلىق ئېتىقادچى ئەرلەر جامائىتىدىكى قېرىنداشلارغا خىزمەت قىلىش ئۈچۈن ئاقساقال بولۇشنى مەقسەت قويسا بولىدۇ. ئۇنىڭ ئۈچۈن بەزى تەلەپلەرگە لايىق بولۇش كېرەك. مۇقەددەس كىتاب مۇنداق دەيدۇ: «كىمكى يېتەكچى بولۇش ئۈچۈن لاياقەتلىك بولۇشقا ئىنتىلسە، ئۇ ياخشى بىر ئىشنى ئارزۇ قىلغان بولىدۇ» (1-تىموت. 3:1). بىر بۇرادەر ئاقساقال بولۇشتىن ئىلگىرى چوقۇم ياردەمچى خىزمەتچى بولۇشقا لايەقەتلىك بولۇشى كېرەك. ياردەمچى خىزمەتچىلەر ئاقساقاللارغا كۆپ تەرەپلەردىن ئەمەلىي ياردەملەرنى بېرىدۇ. ئاقساقاللار ۋە ياردەمچى خىزمەتچىلەر كەمتەرلىك بىلەن ئېتىقادچى قېرىنداشلارغا خىزمەت قىلىدۇ ۋە ۋەز خىزمەتكە قىزغىن قاتنىشىدۇ. ياش يىگىتلەر ئون نەچچە يېشىدىلا ياردەمچى خىزمەتچى بولۇش لاياقىتىگە ئېرىشەلەيدۇ. مەسئۇلىيىتىنى ياخشى ئادا قىلغان ياردەمچى خىزمەتچى يىگىرمە ياشتىن ئاشقاندا ئاقساقال بولۇپ تەيىنلىنەلەيدۇ.
16 ياردەمچى خىزمەتچى ۋە ئاقساقاللار بولۇشقا لاياقەتلىك بولۇش ئۈچۈن مۇقەددەس كىتابتا قانداق پەزىلەتلەرنى يېتىلدۈرۈش كېرەكلىكى يېزىلغان. بۇ تەلەپلەر يەھۋاغا، ئائىلىگە ۋە جامائەتكە بولغان سۆيگۈ-مۇھەببەتكە ئاساسلانغان (1-تىموت. 3:1–13؛ تىتۇس 1:6–9؛ 1-پېتر. 5:2، 3). ھەربىر تەلەپنى چۈشىنىشكە تىرىشىپ، ئۇنىڭغا لايىق بولۇش ئۈچۈن يەھۋادىن ياردەم سوراپ دۇئا قىلىڭ c.
يەھۋا خۇدا ئەر كىشىدىن ئايالىنى ۋە بالىلىرىنى سۆيۈشنى ۋە ئۇلارنىڭ جىسمانىي، ھېسسىي ۋە ھەممىدىن مۇھىم روھىي ئېھتىياجلىرىنى تەمىنلەشنى تەلەپ قىلىدۇ (17-ئابزاسقا قاراڭ)
17. ياش بۇرادەر ياخشى ئەر ۋە ئائىلە بېشى بولۇش ئۈچۈن قانداق تەييارلىق قىلالايدۇ؟ (رەسىمگە ھەم قاراڭ)
17 توي قىلىش ۋە ئائىلە بېشى بولۇش. ئەيسا ئېيتقاندەك، ئىماندا پىشىپ يېتىلگەن بەزى بۇرادەرلەر بويتاق ياشاشنى قارار قىلىدۇ (مەتتا 19:12). ئەمما، سىز توي قىلىشنى خالىسىڭىز، ئەر ۋە ئائىلە بېشى بولۇشتەك قوشۇمچە مەسئۇلىيەتلەرنى ھەم ئۈستىڭىزگە ئالىسىز (1-كورىنت. 11:3). يەھۋا ئەر كىشىدىن ئۆز ئايالىنى سۆيۈشنى ۋە ئۇنى جىسمانىي، ھېسسىي ۋە روھىي جەھەتتىن تەمىنلەشنى تەلەپ قىلىدۇ (ئەفەس. 5:28، 29). بۇ ماقالىدە مۇھاكىمە قىلىنغان تەپەككۈر قىلىش ئىقتىدارى، ئاياللارنى ھۆرمەتلەش ۋە ئىشەنچىلىك بولۇش قاتارلىق پەزىلەتلەر ۋە كېرەكلىك ماھارەتلەر سىزنىڭ ياخشى ئەر بولۇشىڭىزغا ياردەم بېرىدۇ. سىز ئەر ۋە ئائىلە بېشى بولۇش مەسئۇلىيىتىڭىزنى ئادا قىلىش ئۈچۈن ياخشى تەييارلىنالايسىز.
18. ياش بۇرادەر دادا بولۇش ئۈچۈن قانداق تەييارلىق قىلالايدۇ؟
18 ئاتا بولۇش. توي قىلغاندىن كېيىن، دادا بولۇشىڭىز مۇمكىن. ياخشى دادا بولۇش ئۈچۈن، ياراتقۇچى يەھۋادىن كۆپ نەرسىلەرنى ئۆگىنەلەيسىز (ئەفەس. 6:4). يەھۋا ئوغلى ئەيسانى قانچىلىك سۆيىدىغانلىقىنى ۋە ئۇنىڭدىن رازى ئىكەنلىكىنى ئوچۇق ئاشكارا ئېيتقان (مەتتا 3:17). ئەگەر كېلەچەكتە دادا بولسىڭىز، بالىلىرىڭىزغا دائىم ئۇلارنى سۆيىدىغانلىقىڭىزنى ئېيتىڭ. قىلغان ياخشى ئىشلىرى ئۈچۈن ماختاپ تۇرۇڭ. يەھۋانى ئۈلگە قىلىدىغان ئاتىلار پەرزەنتلىرىنىڭ ئىماندا پىشىپ يېتىلگەن مەسىھ ئەگەشكۈچىسى بولۇشىغا ياردەم بېرەلەيدۇ. ئائىلىڭىزدىكىلەرگە ۋە جامائەتتىكى قېرىنداشلارغا مېھرىبانلىق بىلەن غەمخورلۇق قىلىپ، سۆيگۈ-مۇھەببىتىڭىزنى ۋە مىننەتدارلىقىڭىزنى ئىپادىلەش ئارقىلىق ھازىرنىڭ ئۆزىدە ياخشى دادا بولۇشنى ئۆگىنەلەيسىز (يۇھاننا 15:9). بۇ سىزنىڭ كەلگۈسىدە ياخشى ئەر ۋە دادا بولۇش مەسئۇلىيىتىڭىزنى ئادا قىلىشىڭىزغا ياردەم بېرىدۇ. شۇنىڭ بىلەن بىرگە، يەھۋا سىزنى قەدىرلەيدۇ؛ سىز ھەم ئائىلىڭىزگە، ھەم جامائەتتىكى قېرىنداشلارغا كۆپ ياردەم بېرىسىز.
ھازىر نېمە قىلالايسىز؟
مۇقەددەس كىتابتىن تەلىم ئالغان ۋە ئۆگەنگەنلىرىنى ئەمەلىي قوللانغان نۇرغۇن ياشلار ئىماندا پىشىپ يېتىلگەن مەسىھ ئەگەشكۈچىلىرى بولۇپ يېتىلىۋاتىدۇ (19، 20-ئابزاسلارغا قاراڭ)
19، 20. ياش بۇرادەرلەرنىڭ پىشىپ يېتىلگەن مەسىھ ئەگەشكۈچىلىرى بولۇشىغا نېمە ياردەم بېرىدۇ؟ (مۇقاۋىدىكى رەسىم)
19 قەدىرلىك ياش بۇرادەرلەر، ئەيسادىن ئۈلگە ئېلىش ئۈچۈن تىرىشچانلىق كۆرسىتىشىڭلار مۇھىم. سىلەر ياخشى ئۈلگىلەرنى تاللاش، تەپەككۈر قىلىش ئىقتىدارىنى يېتىلدۈرۈش، ئىشەنچىلىك بولۇش، تۇرمۇشتا كېرەكلىك ماھارەتلەرنى ئۆگىنىش ۋە كېلەچەكتىكى مەسئۇلىيەتلەرنى ئۈستۈڭلارغا ئېلىش ئۈچۈن تەييارلىق قىلىشىڭلار كېرەك.
20 بۇ يېتىلدۈرۈش كېرەك ماھارەتلەر توغرۇلۇق ئويلىغاندا، بۇ مەن ئۈچۈن ئىنتايىن قىيىن دەپ ئويلىشىڭلار مۇمكىن. ئەمما، بۇ سىلەرنىڭ قولۇڭلاردىن كېلىدۇ. ئېسىڭلاردا بولسۇنكى، ياراتقۇچى يەھۋا سىلەرگە ياردەم بېرىشنى خالايدۇ (يەشايا 41:10، 13). ئەلۋەتتە، جامائەتتىكى قېرىنداشلارمۇ سىلەرگە ياردەم بېرىدۇ. سىلەر ئىماندا پىشىپ يېتىلگەن بۇرادەر بولغاندىن كېيىن، ئىنتايىن مەنىلىك ۋە قانائەتلىنەرلىك ھايات كەچۈرىسىلەر. قەدىرلىك ياش بۇرادەرلەر، بىز سىلەرنى ئىنتايىن ياخشى كۆرىمىز! يەھۋا سىلەرنىڭ ئىماندا پىشىپ يېتىلگەن ئېتىقادچى بولۇش ئۈچۈن كۆرسىتىۋاتقان تىرىشچانلىقىڭلارنى مول بەرىكەتلىگەي.—پەند. نە 22:4.
45-ناخشا ئالغا باس!
a جامائەتلىرىمىز ئىماندا پىشىپ يېتىلگەن بۇرادەرلەرگە ئىنتايىن مۇھتاج. بۇ ماقالىدە بىز ياش يىگىتلەرنىڭ ئىماندا پىشىپ يېتىلگەن ئېتىقادچى بولۇشى ئۈچۈن نېمىلەرنى قىلىشى كېرەكلىكى توغرۇلۇق مۇھاكىمە قىلىمىز.
b ئالدىنقى ماقالىدىكى «سۆز-ئىبارە مەنىسىنى» كۆرۈڭ.
c «يەھۋانىڭ ئىرادىسىنى ئورۇنلاشنى تەشكىللەش» ناملىق كىتابىنىڭ 5، 6-بابلىرىغا قاراڭ.
