39-تەتقىق ماقالىسى
ئىسىمىڭىز ھاياتلىق كىتابىغا يېزىلغانمۇ؟
«يەھۋانىڭ ئالدىدا ئۇنىڭدىن [قورققانلار] ... توغرىسىدا خاتىرە كىتابى يېزىلدى».—مالاك. 3:16.
17-ناخشا ئالغا باس، يەھۋا گۇۋاھچىلىرى!
بۇ ماقالىدە a
قەدىمدىن تاكى بۈگۈنگىچە، يەھۋا ھاياتلىق كىتابىغا ئىسىملارنى قوشۇپ كېلىۋاتىدۇ (1، 2-ئابزاسلارغا قاراڭ)
1. مالاكى 3:16-ئايەتكە ئاساسلانغاندا، يەھۋا قايسى كىتابنى يېزىۋاتىدۇ ۋە ئۇ نېمىلەرنى ئۆز ئىچىگە ئالغان؟
نەچچە مىڭ يىلدىن بۇيان، يەھۋا ئالاھىدە بىر كىتابنى يېزىۋاتىدۇ. بۇ كىتاب ئىسىملار تىزىملىكىنى ئۆز ئىچىگە ئالغان بولۇپ، بىرىنچى سادىق گۇۋاھچى ھابىلنىڭ ئىسىمى بىلەن باشلانغان b (لۇقا 11:50، 51). شۇنىڭدىن بۇيان، يەھۋا ئۇ كىتابقا ئىسىملارنى قوشۇپ كېلىۋاتىدۇ ۋە بۈگۈنكى كۈندە مىليونلىغان ئىسىملار شۇ كىتابتا بار. ئۇ كىتاب مۇقەددەس كىتابتا، «خاتىرە كىتابى»، «ھاياتلىق كىتابى» ۋە «ھاياتلىق دەپتىرى» دەپ تىلغا ئېلىنغان. بىز بۇ ماقالىدە، ئۇنى «ھاياتلىق كىتابى» دەپ ئاتايمىز.—مالاكى 3:16-نى ئوقۇڭ؛ ۋەھىي. 3:5؛ 17:8.
2. كىمنىڭ ئىسىملىرى ھاياتلىق كىتابىغا يېزىلغان ۋە ئىسىملىرىمىزنى ئۇ كىتابقا قانداق يازدۇرالايمىز؟
2 بۇ ئالاھىدە كىتابتا يەھۋادىن ئەيمىنىپ، ھۆرمەت بىلەن ئۇنىڭغا ئىبادەت قىلىدىغان ۋە ئۇنىڭ ئىسىمىنى سۆيىدىغان كىشىلەرنىڭ ئىسىملىرى يېزىلغان. ئۇلارنىڭ مەڭگۈلۈك ھاياتقا ئېرىشىش پۇرسىتى بار. بۈگۈنكى كۈندە ئەگەر بىز يەھۋانىڭ ئوغلى، ئەيسا مەسىھنىڭ تۆلەم قۇربانلىقى ئاساسىدا ياراتقۇچىمىز بىلەن يېقىن دوستلۇق مۇناسىۋەتنى راۋاجلاندۇرساق، ئىسىملىرىمىزنى ئۇ كىتابقا يازدۇرالايمىز (يۇھاننا 3:16، 36). مەيلى ئاسماندا ياكى يەر يۈزىدە ياشاش ئۈمىدىمىز بولسۇن، ھەممىمىز ئۆز ئىسىمىمىزنىڭ ھاياتلىق كىتابىغا يېزىلىشىنى بەك خالايمىز.
3، 4. (1) ئەگەر ئىسىمىمىز ھازىر ھاياتلىق كىتابىغا يېزىلغان بولسا، مەڭگۈ ياشايمىزمۇ؟ چۈشەندۈرۈڭ. (2) بۇ ۋە كېيىنكى ماقالىدە، قايسى سوئاللارغا جاۋاب تاپىمىز؟
3 بۇ كىتابتا ئىسىمى يېزىلغانلارنىڭ ھەممىسى سۆزسىز مەڭگۈلۈك ھاياتقا ئېرىشەلەمدۇ؟ بۇ سوئالغا جاۋابنى چىقىش 32:33-ئايەتتە يەھۋانىڭ مۇساغا قىلغان سۆزىدىن تاپىمىز. يەھۋا: «كىم ماڭا قارشى گۇناھ قىلغان بولسا، ئۇنىڭ ئىسىمىنى كىتابىمدىن ئۆچۈرۈپ تاشلايمەن»، دېگەن. دېمەك، يەھۋا دەسلەپتە خۇددى قېرىنداش قەلەم بىلەن يازغانغا ئوخشايدىغان، ھازىر ئۇ كىتابتا بار بولغان ئىسىملارنى ئۆچۈرۈپ ياكى چىقىرىپ تاشلىغىلى بولىدۇ (ۋەھىي. 3:5). شۇڭا، ئىسىمىمىز چوقۇم ئاشۇ كىتابتا مەڭگۈ قېلىشى ئۈچۈن، ئۇنىڭ ئۆچمەس سىياھ قەلەم بىلەن يېزىلىشىغا كاپالەتلىك قىلىشىمىز لازىم.
4 تەبىئىيلا، بىز بەزى سوئاللارنى قويۇشىمىز مۇمكىن. مەسىلەن، ھاياتلىق كىتابىغا ئىسمى يېزىلغانلار ۋە ئۇ يەردە ئىسىمى يېزىلمىغانلار ھەققىدە مۇقەددەس يازمىلاردا نېمە دېيىلگەن؟ ئىسمى شۇ كىتابتا ساقلانغانلار قاچان مەڭگۈلۈك ھاياتقا ئېرىشىدۇ؟ يەھۋانى تونۇش پۇرسىتى بولماي ئۆلۈپ كەتكەنلەرچۇ؟ ئۇلارنىڭ ئىسىملىرىنىڭ شۇ كىتابقا يېزىلىپ قېلىشى مۇمكىنمۇ؟ بۇ ۋە كېيىنكى ماقالىدىن مۇشۇ سوئاللارغا جاۋاب تاپىمىز.
ھاياتلىق كىتابىدا كىملەرنىڭ ئىسىمى بار؟
5، 6. (1) فىلىپىلىكلەر 4:3-ئايەتتە كۆرسىتىلگەندەك، ھاياتلىق كىتابىدا كىملەرنىڭ ئىسىمى بار؟ (2) قاچان ئۇلارنىڭ ئىسىملىرى ھاياتلىق كىتابىغا مەڭگۈلۈك يېزىلىدۇ؟
5 بۇ ھاياتلىق كىتابىغا كىملەرنىڭ ئىسىمى يېزىلغان؟ بۇ سوئالغا جاۋاب بېرىش ئۈچۈن، بىز ئوخشىمىغان بەش تۈرلۈك كىشىلەر ھەققىدە مۇھاكىمە قىلىمىز. بۇلارنىڭ ئىچىدە بەزىلىرىنىڭ ئىسىمى ھاياتلىق كىتابىغا يېزىلغان، بەزىلىرىنىڭ يېزىلمىغان.
6 بىرىنچى بىر توپ، ئەيسا بىلەن بىللە ئاسماندا ھۆكۈمرانلىق قىلىشقا تاللانغان كىشىلەردىن تەركىپ تاپقان. ئۇلارنىڭ ئىسىملىرى ھازىر ھاياتلىق كىتابىغا يېزىلغانمۇ؟ ھەئە. ئەلچى پاۋلۇسنىڭ فىلىپىدىكى قېرىنداشلارنى «خىزمەتداشلىرىم» دېگىنىگە قارىغاندا، ئەيسا بىلەن بىللە ھۆكۈمرانلىق قىلىشقا تاللانغان مەسىھ قىلىنغانلارنىڭ ئىسىملىرى ھازىر ھاياتلىق كىتابىدا يېزىلغان (فىلىپىلىكلەر 4:3-نى ئوقۇڭ). ئەمما، ئۇلار ئۆز ئىسىملىرىنى بۇ ئوبرازلىق مەنىدىكى كىتابتا ساقلاپ قېلىش ئۈچۈن، چوقۇم ساداقەتمەنلىكىنى ساقلىشى كېرەك. ئۇلارغا ئاخىرقى مۆھۈر بېسىلغاندىن كېيىن، مەيلى ئۇلار ئۆلۈشتىن ئىلگىرى بولسۇن ياكى دەھشەتلىك چوڭ بالايىئاپەت باشلىنىشتىن ئىلگىرى بولسۇن، ئۇلارنىڭ ئىسىملىرى بۇ كىتابقا مەڭگۈلۈك يېزىلىدۇ.—ۋەھىي. 7:3.
7. ۋەھىيلەر 7:16، 17-ئايەتلەردىن باشقا قويلار توپىنىڭ ئىسىملىرى قاچان ھاياتلىق كىتابىغا مەڭگۈلۈك يېزىلىدىغانلىقى ھەققىدە نېمىنى چۈشىنىمىز؟
7 ئىككىنچى بىر توپ، باشقا قويلارغا مەنسۇپ بولغان زور بىر توپ خالايىقتىن تەركىپ تاپقان. ئۇلارنىڭ ئىسىملىرى ھازىر ھاياتلىق كىتابىغا يېزىلغانمۇ؟ ھەئە. ئۇلارنىڭ ئىسىمى ئارماگېدوندىن ئامان-ئېسەن ئۆتكەندىن كېيىنمۇ ھاياتلىق كىتابىدا بولامدۇ؟ ھەئە. (ۋەھىي. 7:14). ئەيسا بۇ قويلارغا ئوخشاش كىشىلەرنىڭ «مەڭگۈلۈك ھاياتقا» ئېرىشىدىغانلىقىنى ئېيتقان (مەتتا 25:46). ئەمما، ئۇ ئارماگېدوندىن ئامان-ئېسەن ئۆتكەنلەر شۇ زامان مەڭگۈلۈك ھاياتقا ئېرىشمەيدۇ. ئۇلارنىڭ ئىسىملىرى ھاياتلىق كىتابىغا قېرىنداش قەلەم بىلەن يېزىلغان. مىڭ يىل ھۆكۈمرانلىق مەزگىلىدە، ئەيسا «ئۇلارغا پادىچى بولىدۇ ۋە ئۇلارنى ھاياتلىق سۈيىنىڭ بۇلاقلىرىغا باشلاپ بارىدۇ». مەسىھنىڭ يول-يورۇقىغا ئەگەشكەن ۋە ئاخىرىدا يەھۋاغا سادىق دەپ ھۆكۈم قىلىنغانلارنىڭ ئىسىملىرى ھاياتلىق كىتابىغا مەڭگۈلۈك يېزىلىدۇ.—ۋەھىيلەر 7:16، 17-نى ئوقۇڭ.
8. كىملەرنىڭ ئىسىملىرى ھاياتلىق كىتابىغا يېزىلمىغان ۋە كەلگۈسىدە ئۇلارغا نېمە بولىدۇ؟
8 ئۈچىنچى بىر توپ، ئارماگېدوندا يوق قىلىنىدىغان ئۆچكە كەبى كىشىلەردىن تەركىپ تاپقان. ئۇلارنىڭ ئىسىمى ھاياتلىق كىتابىدا يوق. ئەيسا: «ئۇلار مەڭگۈگە يوق قىلىنىدۇ»،— دېگەن (مەتتا 25:46). خۇدانىڭ ئىلھامى بىلەن، پاۋلۇس بىزگە ‹بۇنداق كىشىلەرنىڭ ئەبەدىي ھالاكەتكە ھۆكۈم قىلىنىدۇ› دېگەن (2-سالونىكا. 1:9؛ 2-پېتر. 2:9). قەدىمدىن بۇيان، قەستەن مۇقەددەس روھقا قارشى گۇناھ قىلغانلارنىڭ ھەممىسى مەڭگۈلۈك ھاياتقا ئېرىشەلمەيدۇ، بەلكى مەڭگۈلۈك ھالاكەتكە دۇچار بولىدۇ. ئېنىقكى، ئۇلار قايتا تىرىلمەيدۇ (مەتتا 12:32؛ ماركۇس 3:28، 29؛ ئىبرانىي. 6:4–6). ئەمدى يەر يۈزىدە تىرىلىدىغان ئىككى توپ كىشىلەر ھەققىدە تەپسىلىيرەك مۇھاكىمە قىلىپ باقايلى.
ئۆلۈمدىن تىرىلىدىغانلار
9. ئەلچىلەر 24:15-ئايەتتە كۆرسىتىلگەندەك، يەر يۈزىدە قايسى ئىككى توپ كىشى تىرىلىدۇ ۋە بۇ ئىككى توپنىڭ قانداق پەرقى بار؟
9 مۇقەددەس كىتابتا يەر يۈزىدە مەڭگۈ ياشاشقا تىرىلدۈرۈلىدىغان ئىككى توپ كىشىلەر، «ھەققانىيلار» ۋە «ھەققانىي ئەمەسلەر» ھەققىدە سۆزلەنگەن (ئەلچىلەر 24:15-نى ئوقۇڭ). «ھەققانىيلار» ھايات ۋاقتىدا يەھۋاغا سادىقلىق بىلەن خىزمەت قىلغانلار؛ «ھەققانىي ئەمەسلەر» يەھۋاغا سادىقلىق بىلەن خىزمەت قىلمىغانلار. ئەمەلىيەتتە، كۆپىنچە ئەھۋاللاردا ئۇلارنىڭ قىلغان ئىشلىرى ھەققانىيلىقتىن يىراق. ھەر ئىككى توپ تىرىلدۈرۈلگىنى ئۈچۈن، ئۇلارنىڭ ئىسىملىرى ھاياتلىق كىتابىغا يېزىلغان دېيەلەمدۇق؟ بۇ سوئالغا جاۋاب بېرىش ئۈچۈن، ھەر بىر توپ كىشى ھەققىدە ئايرىم-ئايرىم كۆرۈپ چىقايلى.
10. نېمە ئۈچۈن «ھەققانىيلار» تىرىلىدۇ ۋە ئۇلارنىڭ بەزىلىرى قانداق ئىمتىيازغا ئېرىشىدۇ؟ (يەر يۈزىدىكى تىرىلىش ھەققىدە، بۇ سان ژۇرنالنىڭ «ئوقۇرمەنلەرنىڭ سوئاللىرى» دېگەن سەھىپىگە قاراڭ)
10 «ھەققانىيلار» بولسا تۆتىنچى توپ كىشىلەر. ئۇلار ئۆلۈشتىن ئىلگىرى ئىسىملىرى ھاياتلىق كىتابىغا يېزىلغان. ئۇلار ئۆلگەندە، ئىسىملىرى شۇ كىتابتىن چىقىرىۋېتىلگەنمۇ؟ ياق، چۈنكى ئۇلار يەھۋانىڭ خاتىرىسىدە يەنىلا «تىرىك». يەھۋا «ئۆلۈكلەرنىڭ ئەمەس، بەلكى تىرىكلەرنىڭ خۇداسىدۇر. چۈنكى ئۇ ئۈچۈن ئۇلارنىڭ ھەممىسى تىرىكتۇر» (لۇقا 20:38). دېمەك، ھەققانىيلار يەر يۈزىدە ھاياتلىققا ئېرىشىش ئۈچۈن تىرىلدۈرۈلگەندە، ئۇلارنىڭ ئىسىمى دەسلەپتە «[قېرىنداش] قەلەم بىلەن» يېزىلغان بولسىمۇ، ھاياتلىق كىتابىغا يېزىلغان (لۇقا 14:14). شەك-شۈبھىسىزكى، تىرىلگەنلەرنىڭ بەزىلىرى يەر يۈزىدە ئەمىرلەر بولۇش ئىمتىيازىغا ئېرىشىدۇ.—زەبۇر 45:16.
11. ھاياتلىق كىتابىغا ئىسىملىرى يېزىلىشتىن بۇرۇن، «ھەققانىي ئەمەسلەر» نېمىلەرنى ئۆگىنىشى كېرەك؟
11 ئاخىرىدا، بەشىنچى توپ «ھەققانىي ئەمەسلەر» ھەققىدە كۆرۈپ چىقايلى. بەلكىم، ئۇلار يەھۋانىڭ قانۇنلىرىنى بىلمىگەچكە، ئۇلار ئۆلۈشتىن ئىلگىرى ھەققانىي تۇرمۇش كەچۈرمىگەن بولۇشى مۇمكىن. شۇڭا، ئۇلارنىڭ ئىسىمى ھاياتلىق كىتابىغا يېزىلمىغان. ئەمما، ئۇلارنى تىرىلدۈرۈش ئارقىلىق، خۇدا ئاخىرىدا ئۇلارنىڭ ئىسىملىرىنىڭ شۇ كىتابقا يېزىلىشىغا پۇرسەت بېرىدۇ. بۇ «ھەققانىي ئەمەسلەر» كۆپ ياردەمگە مۇھتاج. ئۇلار ئۆلۈپ كېتىشتىن ئىلگىرى، بەزىلىرى قورقۇنچلۇق، ئىنتايىن يامان ئىشلارنى قىلغان. شۇڭلاشقا، ئۇلارغا يەھۋانىڭ ھەققانىي ئۆلچەملىرىگە ماس ھايات كەچۈرۈش ئۈچۈن نېمىلەرنى قىلىشى كېرەكلىكىنى ئۆگىتىش كېرەك. بۇ مەقسەتكە يېتىش ئۈچۈن، خۇدا پادىشاھلىقى يەر يۈزىدە ھېچقاچان بولۇپ باقمىغان كەڭ كۆلەملىك تەلىم-تەربىيە بېرىش ئىشىغا يېتەكچىلىك قىلىدۇ.
12. (1) كىملەر ھەققانىي ئەمەسلەرنى ئۆگىتىدۇ؟ (2) ئۆگەنگەن بىلىملەرنى رەت قىلغانلارغا نېمە بولىدۇ؟
12 كىملەر ھەققانىي ئەمەسلەرنى ئۆگىتىدۇ؟ زور بىر توپ خالايىق ۋە تىرىلدۈرۈلگەن ھەققانىي كىشىلەر. ھەققانىي ئەمەس كىشىلەرنىڭ ئىسىملىرى ھاياتلىق كىتابىغا يېزىلىشى ئۈچۈن، ئۇلار يەھۋا بىلەن بولغان مۇناسىۋەتنى ياخشىلاپ، ئۆزلىرىنى ئۇنىڭغا بېغىشلىشى كېرەك. مەسىھ ئەيسا ۋە مەسىھ قىلىنغانلار ئاسماندا تۇرۇپ، ھەققانىي ئەمەسلەرنىڭ ئۆگىتىلگەن بىلىملەرگە قانداق ئىنكاس قايتۇرىدىغانلىقىنى دىققەت بىلەن كۈزىتىدۇ (ۋەھىي. 20:4). ئاشۇ بىلىملەرنى رەت قىلغان ھەرقانداق بىر ئىنسان، ھەتتا 100 ياشقا كىرگەن بولسىمۇ، ئۇ يوق قىلىنىدۇ (يەشايا 65:20). يەھۋا بىلەن ئەيسا ئىنساننىڭ قەلبىدىكى نىيەتلىرىنى بىلەلەيدۇ ۋە ھېچكىمنىڭ يېڭى دۇنيادا يامانلىق قىلىشىغا يول قويمايدۇ.—يەشايا 11:9؛ 60:18؛ 65:25؛ يۇھاننا 2:25.
ھاياتلىق ۋە ھۆكۈم ئۈچۈن تىرىلىدۇ
13، 14. (1) ئۆتمۈشتە، ئەيسانىڭ يۇھاننا 5:28، 29-ئايەتلەردىكى سۆزلىرىنى قانداق چۈشەنگەن ئىدۇق؟ (2) بۇ سۆزلەر ھەققىدە نېمىلەرگە دىققەت قىلىشىمىز كېرەك؟
13 ئەيسا يەنە يەر يۈزىدە تىرىلىدىغانلار ھەققىدە سۆز قىلغان. مەسىلەن، ئۇ مۇنداق دېگەن: «قەبرىلەردە بولغانلارنىڭ ھەممىسى ئۇنىڭ ئاۋازىنى ئاڭلاپ چىقىدىغان ۋاقىت كېلىۋاتىدۇ. ئۇ ۋاقىتتا، ياخشىلىق قىلغانلار ھاياتلىق ئۈچۈن تىرىلىدۇ، يامانلىق قىلغانلار ھۆكۈم ئۈچۈن تىرىلىدۇ» (يۇھاننا 5:28، 29). ئۇنداقتا، ئەيسا نېمە دېمەكچى بولغان؟
14 بىز ئۆتمۈشتە، ئەيسانىڭ سۆزى تىرىلدۈرۈلگەن كىشىلەر تىرىلگەندىن كېيىن قىلىدىغان ئەمەللىرىنى كۆرسىتىدۇ دەپ چۈشەنگەن ئىدۇق. يەنى، بەزىلەر تىرىلدۈرۈلگەندىن كېيىن ياخشى ئىشلارنى قىلىدۇ، يەنە بەزىلەر تىرىلدۈرۈلگەندىن كېيىن يامان ئىشلارنى قىلىدۇ. بىراق، شۇنىڭغا دىققەت قىلىڭكى، ئەيسا خاتىرە قەبرىلەردىن ئەمدىلا چىققانلارنى ياخشى ئىشلارنى قىلىدۇ ياكى يامان ئىشلارنى قىلىدۇ دەپ ئېيتمىغان. ئەيسا بۇ ئايەتتە ئۆتكەن زاماننى قوللانغان. ئۇ «ياخشىلىق قىلغانلار» ۋە «يامانلىق قىلغانلار» ھەققىدە سۆزلەيدۇ. بۇ ئۇلارنىڭ ئۆلۈشتىن ئىلگىرى قىلغان ئىشلىرىنى كۆرسىتىدۇ. بۇ مەنتىقىگە ئۇيغۇن، شۇنداق ئەمەسمۇ؟ چۈنكى، خۇدا ھېچكىمنىڭ يېڭى دۇنيادا يامان ئىشلارنى قىلىشىغا يول قويمايدۇ. شۇڭا، ھەققانىي ئەمەسلەر ئۆلۈشتىن ئىلگىرى بۇ يامان ئىشلارنى قىلغان بولۇشى كېرەك. ئۇنداقتا، ئەيسانىڭ «ھاياتلىق ئۈچۈن تىرىلىدۇ» ۋە «ھۆكۈم ئۈچۈن تىرىلىدۇ» دېگەن سۆزلىرىنى قانداق چۈشىنىشىمىز كېرەك؟
15. كىملەر ھاياتلىق ئۈچۈن تىرىلىدۇ ۋە نېمە ئۈچۈن؟
15 ئۆلۈشتىن ئىلگىرى ياخشى ئىشلارنى قىلغان ھەققانىي كىشىلەر «ھاياتلىق ئۈچۈن تىرىلىدۇ»، چۈنكى ئۇلارنىڭ ئىسىمى ھاياتلىق كىتابىغا يېزىلغان. دېمەك، يۇھاننا 5:29-ئايەتتە تەسۋىرلەنگەن «ياخشىلىق قىلغانلار»نىڭ تىرىلىشى، ئەلچىلەر 24:15-ئايەتتە تىلغا ئېلىنغان «ھەققانىيلار»نىڭ تىرىلىشى بىلەن ئوخشاش. بۇ چۈشەندۈرۈش، رىملىقلار 6:7-ئايەتتىكى «ئۆلگەن كىشى گۇناھىدىن ئازاد بولغان بولىدۇ» دېگەن سۆزلەرگە ماس كېلىدۇ. دېمەك، ھەققانىيلار ئۆلگەندە، يەھۋا ئۇلارنىڭ ئۆتكۈزگەن گۇناھلىرىنى كەچۈرىدۇ. بىراق، ئۇلارنىڭ ھايات ۋاقتىدا خۇداغا سادىق قېلىش ئۈچۈن قىلغان ئىشلىرىنى ئۇنتۇپ قالمايدۇ (ئىبرانىي. 6:10). ئەلۋەتتە، تىرىلدۈرۈلگەن ھەققانىيلار ئۆز ئىسىملىرىنىڭ ھاياتلىق كىتابىدا مەڭگۈ قېلىشى ئۈچۈن، ئۇلار ساداقەتمەنلىكىنى ساقلاپ قېلىشى كېرەك.
16. «ھۆكۈم ئۈچۈن تىرىلىدۇ»، بۇ نېمىنى بىلدۈرىدۇ؟
16 ئۆلۈشتىن ئىلگىرى يامان ئىشلارنى قىلغانلارغا نېمە بولىدۇ؟ گەرچە ئۇلار ئۆلگەندە گۇناھلىرىدىن ئازاد بولغان بولسىمۇ، ئەمما ئۇلار ھايات ۋاقتىدا يەھۋاغا سادىق خىزمەت قىلمىغان. ئۇلارنىڭ ئىسىملىرى ھاياتلىق كىتابىغا يېزىلمىغان. شۇڭلاشقا، «يامانلىق قىلغۇچىلار»نىڭ تىرىلىشى، ئەلچىلەر 24:15-ئايەتتە تىلغا ئېلىنغان «ھەققانىي ئەمەسلەر»نىڭ تىرىلىشى بىلەن ئوخشاش. ئۇلار «ھۆكۈم ئۈچۈن تىرىلىدۇ» c. بۇ دېگەنلىك، ئەيسا ھەققانىي ئەمەسلەرنى كۈزىتىپ باھالايدۇ ۋە ئۇلارنىڭ ئىشلىرىنى تەكشۈرىدۇ (لۇقا 22:30). ئۇلارنىڭ ئىسىملىرى ھاياتلىق كىتابىغا يېزىلىشقا لايىق ياكى لايىق ئەمەسلىكىنى ھۆكۈم قىلىشقا بىر مەزگىل ۋاقىت كېتىدۇ. بۇ ھەققانىي ئەمەس كىشىلەر ئىلگىرىكى رەزىل تۇرمۇش يولىنى ئۆزگەرتىپ، ئۆزلىرىنى يەھۋاغا بېغىشلىغاندىلا، ئۇلارنىڭ ئىسىملىرى ھاياتلىق كىتابىغا يېزىلىدۇ.
17، 18. يەر يۈزىدە تىرىلگەنلەرنىڭ ھەممىسى نېمە قىلىشى كېرەك؟ ئۇلار قايسى «قىلغان ئىشلىرىغا» ئاساسەن ھۆكۈم قىلىنىدۇ؟ (ۋەھىيلەر 20:12، 13)
17 مەيلى ئۇلار ئىلگىرى ھەققانىيلار ياكى ھەققانىي ئەمەسلەر بولسۇن، تىرىلگەنلەر 1000 يىللىق ھۆكۈمرانلىق مەزگىلىدە ئېچىلىدىغان يېڭى كىتابلاردىكى قانۇنلارغا بويسۇنۇشى كېرەك. ئەلچى يۇھاننا ئۆزىنىڭ كۆرگەنلىرىنى تەسۋىرلەپ مۇنداق دېگەن: «مەن ئۆلۈكلەرنى كۆردۈم، بۈيۈك ياكى كىچىك بولسۇن، ھەممىسى تەختنىڭ ئالدىدا تۇرغىنىنى كۆردۈم ۋە كىتابلار ئېچىلدى. بىراق، باشقا بىر كىتابمۇ ئېچىلدى؛ ئۇ ھاياتلىق كىتابى ئىدى. ئۆلۈكلەر كىتابلاردا يېزىلغىنى بويىچە، ئۆزىنىڭ قىلغان ئىشلىرىغا قاراپ ھۆكۈم قىلىندى. دېڭىز ئۆزىدىكى ئۆلۈكلەرنى تاپشۇردى، ئۆلۈم ۋە ئۆلۈكلەر دىيارىمۇ ئۆزلىرىدىكى ئۆلۈكلەرنى تاپشۇردى. ئۇلار قىلغان ئىشلىرىغا قاراپ، بىر-بىرلەپ ھۆكۈم قىلىندى»،—ۋەھىيلەر 20:12، 13.
18 تىرىلگەنلەر قايسى «قىلغان ئىشلىرىغا» ئاساسەن ھۆكۈم قىلىنىدۇ؟ ئۇلار ئۆلۈشتىن ئىلگىرى قىلغان ئىشلىرىغا ئاساسەنمۇ؟ ياق! ئېسىڭىزدە بولسۇنكى، ئۇلار ئۆلگەندە، قىلغان ئىلگىرىكى گۇناھلىرىدىن ئازاد بولىدۇ. بۇ يەردە ئېيتىلغان «قىلغان ئىشلىرى»، ھەرگىزمۇ ئىلگىرىكى ھاياتىدا قىلغان ئىشلارنى كۆرسەتمەيدۇ. ئەكسىچە، ئۇلارنىڭ يېڭى دۇنيادا ئالغان تەلىم-تەربىيىسىدىن كېيىن قىلغان ئىشلىرىنى كۆرسىتىدۇ. ھەتتا ئىلگىرى خۇداغا سادىق ياشىغان نۇھ، سامۇئىل، داۋۇت ۋە دانىيالغا ئوخشاش كىشىلەرمۇ ئەيسا مەسىھ ھەققىدە ئۆگىنىپ، ئۇنىڭ تۆلەم قۇربانلىقىغا بولغان ئىشەنچىسىنى كۆرسىتىشى كېرەك. ئۇنداق ئىكەن، تىرىلگەن ھەققانىي ئەمەسلەر تېخىمۇ شۇنداق قىلىشى كېرەك!
19. بۇ ئاجايىپ پۇرسەتنى رەت قىلغانلارنىڭ ئاقىۋىتى قانداق بولىدۇ؟
19 بۇ ئاجايىپ پۇرسەتنى رەت قىلغانلارنىڭ ئاقىۋىتى قانداق بولىدۇ؟ ۋەھىيلەر 20:15-ئايەت مۇنداق دەيدۇ: «ئىسىملىرى ھاياتلىق كىتابىدا يېزىلمىغانلارنىڭ ھەممىسى ئوت كۆلىگە تاشلاندى». شۇنداق، ئۇلار مەڭگۈگە ھالاك قىلىنىدۇ. دېمەك، ئىسىمىمىزنىڭ ھاياتلىق كىتابىغا يېزىلىشى ۋە داۋاملىق ئۇ يەردە قېلىشى ئۈچۈن قولىمىزدىن كېلىشىچە تىرىشچانلىق كۆرسىتىش ئىنتايىن مۇھىم!
بىر بۇرادەر مىڭ يىللىق ھۆكۈمرانلىق ۋاقتىدا كەڭ كۆلەملىك تەلىم-تەربىيە بېرىش پائالىيىتىگە قاتناشماقتا (20-ئابزاسىغا قاراڭ)
20. مىڭ يىللىق ھۆكۈمرانلىق مەزگىلىدە قانداق ھاياجانلىق ئىش ئەمەلگە ئاشۇرۇلىدۇ؟ (مۇقاۋىدىكى رەسىمگە قاراڭ)
20 ئەيسانىڭ مىڭ يىللىق ھۆكۈمرانلىقى كىشىنى ھاياجانغا سالىدىغان ئاجايىپ بىر زامان بولىدۇ! شۇ ۋاقىتتا، خۇدانىڭ خەلقى پۈتكۈل يەر يۈزىدە كەڭ كۆلەملىك تەلىم-تەربىيە خىزمىتىنى ئېلىپ بارىدۇ. ئۇنىڭدىن باشقا، شۇ چاغدا ھەققانىيلار ۋە ھەققانىي ئەمەسلەرنىڭ ئىشلىرى تەكشۈرۈلىدۇ (يەشايا 26:9؛ ئەلچى. 17:31). بۇ تەلىم-تەربىيە خىزمىتى قانداق ئېلىپ بېرىلىدۇ؟ كېيىنكى ماقالە بۇ سوئالغا جاۋاب تېپىشىمىزغا ۋە شۇ ئاجايىپ خىزمەتنى قەدىرلىشىمىزگە ياردەم بېرىدۇ.
12-ناخشا ۋەدە قىلىنغان مەڭگۈ ھاياتلىق
a ئەيسا مەسىھنىڭ يۇھاننا 5:29،28-ئايەتلەردىكى «ھاياتلىق ئۈچۈن تىرىلىدۇ» ۋە «ھۆكۈم ئۈچۈن تىرىلىدۇ»،— دېگەن سۆزلىرىگە بولغان يېڭى چۈشەنچىلىرىمىز ۋە ئۆزگەرتىشلەر مۇھاكىمە قىلىنىدۇ. بۇ ئىككى تىرىلىشنىڭ نېمىنى بىلدۈرىدىغانلىقى ۋە كىملەر بۇ ئىككى تىرىلىشنى باشتىن ئۆتكۈزىدىغانلىقىنى ئۆگىنىمىز.
b بۇ كىتابنىڭ يېزىلىشى «دۇنيانىڭ ئۇلى سېلىنغاندىن بېرى»، يەنى ئەيسانىڭ تۆلەم قۇربانلىقى ئارقىلىق گۇناھتىن قۇتۇلۇش پۇرسىتىگە ئىگە بولغان كىشىلەر دۇنياسىدىن باشلانغان (مەتتا 25:34؛ ۋەھىي. 17:8). شۇڭا، ئېنىقكى ھاياتلىق كىتابىغا تۇنجى بولۇپ، ھەققانىي كىشى ھابىلنىڭ ئىسىمى يېزىلغان.
c بىز ئىلگىرى بۇ يەردە ئىشلىتىلگەن «ھۆكۈم» سۆزىنى سەلبىي ھۆكۈم، يەنى جازا ھۆكۈمىنى بىلدۈرىدۇ دەپ چۈشەنگەن ئىدۇق. ئەمەلىيەتتە، «ھۆكۈم» سۆزىنىڭ شۇنداق مەنىسى بولۇشى مۇمكىن. ئەمما، ئەيسا «ھۆكۈم» سۆزىنى تېخىمۇ كەڭ مەنىدە قوللانغان. بۇ سۆزنىڭ ئالدى-كەينىدىكى ئايەتلەر، ئەيسانىڭ بىرىنى دىققەت بىلەن كۈزىتىپ، ئۇنىڭغا باھا بېرىش ياكى تەكشۈرۈشنى نەزەردە تۇتقانلىقىنى كۆرسىتىدۇ. بىر گرېك تىلى مۇقەددەس كىتاب لۇغىتىدە، بۇ سۆز «بىر كىشىنىڭ ئىش-ھەرىكەتلىرىنى تەكشۈرۈش»نى بىلدۈرىدىغانلىقى ئىزاھلانغان.
