25-تەتقىق ماقالىسى
ئاقساقاللار، گىدېئوندىن ئۈلگە ئېلىڭلار
«گىدېئون … توغرىسىدا سۆزلەشنى داۋام قىلسام، ۋاقىت يەتمەيدۇ». —ئىبرانىي. 11:32.
18-ناخشا خۇدانىڭ چىن مۇھەببىتى
بۇ ماقالىدە a
1. 1-پېترۇس 5:2-ئايەتكە ئاساسلانغاندا، ئاقساقاللار قانداق مۇھىم خىزمەتنى قىلىدۇ؟
جامائەتتىكى ئاقساقاللار يەھۋانىڭ قىممەتلىك قويلىرىدىن خەۋەر ئېلىشى كېرەك. بۇ ساداقەتمەن ئەر كىشىلەر يەھۋا خۇدا ئۇلارغا ئىشەنگەنلىكى ئۈچۈن مىننەتدارلىق بىلدۈرىدۇ. ئۇلار پادىچىلار سۈپىتىدە پادىلاردىن خەۋەر ئېلىش ئۈچۈن تەر تۆكۈپ خىزمەت قىلىدۇ (يەرەم. 23:4؛ 1-پېترۇس 5:2-نى ئوقۇڭ). جامائىتىمىزدە شۇنداق كىشىلەرنىڭ بولغىنى ئۈچۈن ھەقىقەتەن مىننەتدارمىز!
2. بەزى ئاقساقاللار قانداق سىناقلارغا دۇچ كېلىشى مۇمكىن؟
2 ئۆز مەسئۇلىيىتىنى ئادا قىلىشتا ئاقساقاللار كۆپلىگەن قىيىنچىلىقلارغا دۇچ كېلىدۇ. ئۇلارنىڭ بىرى، جامائەتكە غەمخورلۇق قىلىش ئۈچۈن جاپالىق خىزمەت قىلىش كېرەك. ئامېرىكىدىكى تونى ئىسىملىك بىر ئاقساقال ۋەزىپىنى قوبۇل قىلىشقا توغرا كەلگەندە، كەمتەر بولۇشنى ئۆگىنىشى كېرەك بولغان. ئۇ مۇنداق دەيدۇ: «19-COVID ۋىرۇسى تارقىلىشقا باشلىغاندا، يىغىلىشلارنى ۋە ۋەز خىزمىتىنى تەشكىللەش ئۈچۈن تىرىشىپ، كۆپ خىزمەت قىلدىم. لېكىن، مەن كۆپ ئىش قىلساممۇ، قىلىشقا تېگىشلىك يەنە نۇرغۇنلىغان ئىشلار بار ئىدى. ئاخىرىدا مۇقەددەس كىتاب ئوقۇش، شەخسىي تەتقىق ئۆتكۈزۈش ۋە دۇئا قىلىشقا ۋاقىت چىقىرالماي قالدىم». كوسوۋودا ياشايدىغان ئەلېر ئىسىملىك ئاقساقال باشقا بىر قىيىنچىلىققا دۇچ كەلگەن. ئۇنىڭغا ئۇرۇش بولۇۋاتقان رايوندا تەشكىلاتنىڭ كۆرسەتمىلىرىگە بويسۇنۇش قىيىن بولغان. ئۇ مۇنداق دەيدۇ: «يەرلىك بەيتەل مېنى خەتەرلىك رايونلاردىكى قېرىنداشلارغا ياردەم بېرىشكە تەيىنلىگەندە جاسارىتىم سىنالدى. مەن قورقتۇم. بېرىلگەن يول-يورۇق ئەمەلىيەتكە ئۇيغۇن ئەمەستەك كۆرۈنگەن». ئاسىيادىكى تىم ئىسىملىك بىر مىسسىئونېر ھەر كۈنى ھەممە ئىشلارغا ئۈلگۈرۈش قىيىن ئىكەنلىكىنى ھېس قىلغان. ئۇ مۇنداق دەيدۇ: «بەزى چاغلاردا، مەن روھىي ۋە ھېس-تۇيغۇ جەھەتتىن ھارغىنلىق ھېس قىلاتتىم». مۇشۇلارغا ئوخشاش قىيىنچىلىقلارغا دۇچ كەلگەن ئاقساقاللارغا نېمە ياردەم بېرەلەيدۇ؟
3. ھاكىم گىدېئوننىڭ مىسالىنى مۇھاكىمە قىلغاندا، قانداق پايدىسىنى كۆرەلەيمىز؟
3 ئاقساقاللار ئىسرائىلدا ھاكىم بولغان گىدېئوننىڭ مىسالىدىن ئۆگىنەلەيدۇ (ئىبرانىي. 6:12؛ 11:32). ئۇ خۇدا خەلقىنىڭ قوغدىغۇچىسى ۋە پادىچىسى ئىدى (ھاكىم. 2:16؛ 1-تارىخ. 17:6). گىدېئونغا ئوخشاش، ئاقساقاللار مۇشۇ ئاخىرقى زامان كۈنلىرىدە خۇدا خەلقىگە غەمخورلۇق قىلىشقا تەيىنلەنگەن (ئەلچى. 20:28؛ 2-تىموت. 3:1). بىز گىدېئوننىڭ كەمتەر، كىچىك پېئىل ۋە ئىتائەتچانلىقىدىن ئۆگىنەلەيمىز. ئۇ ۋەزىپىلىرىنى ئورۇنلىغاندا، ئۇنىڭ چىدامچانلىقى سىنالغان. مەيلى ئاقساقال سۈپىتىدە خىزمەت قىلايلى ياكى قىلمايلى، ئاقساقاللارغا تېخىمۇ كۆپرەك مىننەتدارلىق بىلدۈرۈشنى ئۆگىنەلەيمىز. بۇ تىرىشچان خىزمەتچىلەرنى قوللاپ-قۇۋۋەتلەلەيمىز.—ئىبرانىي. 13:17.
كەمتەرلىك ۋە كىچىك پېئىللىقىڭىز سىنالغاندا
4. گىدېئـون كەمتـەرلىكنى ۋە كىـچىك پېئىلـلىقنى قـانداق كۆرسەتكەن؟
4 گىدېئون كىچىك پېئىل ۋە كەمتەر ئادەم ئىدى b. يەھۋانىڭ پەرىشتىسى گىدېئونغا ئىسرائىللارنى كۈچلۈك مىدىيانلىقلارنىڭ قولىدىن قۇتۇلدۇرۇش ئۈچۈن ئۇنى تاللىغانلىقىنى ئېيتقاندا، ئۇ كەمتەرلىك بىلەن مۇنداق جاۋاب بەرگەن: «مېنىڭ جەمەتىم ماناسسە قەبىلىسى ئارىسىدا ئەڭ كىچىك جەمەت، مەن ئۆزۈممۇ ئاتامنىڭ ئۆيىدە ئەڭ كىچىكىمەن» (ھاكىم. 6:15). ئۇ ئۆزىنى بۇ ۋەزىپىگە لايىق ئەمەستەك كۆرگەن. بىراق، يەھۋا ئۇنى لايىق كۆرگەن. يەھۋانىڭ ياردىمى بىلەن گىدېئون ۋەزىپىسىنى ئوڭۇشلۇق تاماملىغان.
5. ئاقساقاللارنىڭ كىچىك پېئىللىقى ۋە كەمتەرلىكى قانداق سىنىلىشى مۇمكىن؟
5 ئاقساقاللار بارلىق ئىشلاردا كىچىك پېئىللىق ۋە كەمتەرلىكنى كۆرسىتىدۇ (مىكاھ 6:8؛ ئەلچى. 20:18، 19). ئۇلار ئۆزلىرىنىڭ قابىلىيەتلىرىنى ياكى قازانغان ئۇتۇقلىرىنى مۇبالىغە قىلمايدۇ. ئۆز كەمچىلىكى ياكى مەغلۇبىيىتى ئۈچۈن ئۆزىدىن ئاغرىنمايدۇ. بىراق، بەزىدە ئاقساقاللارنىڭ كەمتەر ۋە كىچىك پېئىل بولۇشى ئاسان ئەمەس. مەسىلەن، ئۇ كۆپلىگەن ۋەزىپىلەرنى قوبۇل قىلالىشى، كېيىن ئۇلارنىڭ ھەممىسىنى ئورۇنلاشنىڭ قىيىنلىقىنى بايقىشى مۇمكىن. ياكى بولمىسا، بىر ۋەزىپىنى ئورۇندىغانلىقى ئۈچۈن باشقىلار ماختىغاندا ياكى تەنقىد قىلغاندا، كىچىك پېئىل ۋە كەمتەر بولۇش قىيىنغا توختىشى مۇمكىن. ئاقساقاللار بۇنداق ۋەزىيەتلەردە گىدېئوننىڭ ئۈلگىسىدىن نېمىلەرنى ئۆگىنەلەيدۇ؟
كىچىك پېئىل ئاقساقال، گىدېئوننى ئۈلگە قىلىپ، قول ھارۋۇسى بىلەن ۋەز قىلىش خىزمىتىنى ئۇيۇشتۇرۇش ئۈچۈن ياردەم سوراشقا تەييار بولىۋاتىدۇ (6-ئابزاسقا قاراڭ)
6. ئاقساقاللار گىدېئوننىڭ كىچىك پېئىللىقىدىن نېمىلەرنى ئۆگىنەلەيدۇ؟ (رەسىمگە ھەم قاراڭ)
6 باشقىلاردىن ياردەم سوراڭ. كىچىك پېئىل كىشى ئۆزىنىڭ قىلالمايدىغان ئىشلىرىنى بىلىدۇ. گىدېئون كىچىك پېئىل بولۇپ، باشقىلاردىن ياردەم سورىغان (ھاكىم. 6:27، 35؛ 7:24). دانا ئاقساقاللار ھەم شۇنداق قىلىدۇ. ئىلگىرى تىلغا ئالغان تونى چۈشەندۈرۈپ مۇنداق دەيدۇ: «بالىلىق چاغلىرىمدىن باشلاپ، ئۆزۈم قىلالايدىغان كۆپرەك ئىشلارنى قىلىشقا ئۆگەنگەچ، قولۇمدىن كېلىدىغاندىنمۇ كۆپرەك ئىشلارنى قىلىشنى ئۆز ئۈستۈمگە ئالدىم. شۇڭا ئائىلىۋى ئىبادىتىمىزدە كىچىك پېئىللىق توغرۇلۇق مۇھاكىمە قىلىشنى قارار قىلدىم ۋە ئايالىمنىڭ ئۇنىڭغا قانداق قارايدىغانلىقىنى سورىدىم. jw.org تور بېكىتىدىن ‹ئەيساغا ئوخشاش باشقىلارنى ئۆگىتىڭ، ئۇلارغا ئىشىنىڭ ۋە ھوقۇق بېرىڭ› ناملىق فىلىمنى كۆرۈپ چىقتىم». تونى باشقىلارنى جامائەتتىكى ئىشلارنى قىلىشقا ياردەمگە چاقىرغان. تونى يەنە شۇنداق دەيدۇ: «جامائەتتىن خەۋەر ئېلىش ئىشلىرىمۇ ئۆز يولىدا داۋاملاشتى ۋە ئۆزۈمنىڭ يەھۋا بىلەن بولغان دوستلۇق مۇناسىۋىتىمنى كۈچەيتىشكە كۆپرەك ۋاقىت چىقاردىم».
7. ئەگەر ئاقساقاللار تەنقىد قىلىنسا، ئۇلار گىدېئوننى قانداق ئۈلگە قىلالايدۇ؟ (ياقۇپ 3:13)
7 تەنقىد قىلىنسىڭىز مۇلايىملىق بىلەن جاۋاب قايتۇرۇڭ. ئاقساقاللار تەنقىدكە ئۇچرىغاندا، يەنە بىر سىناققا دۇچ كېلىدۇ. بۇنداق ۋەزىيەتتە گىدېئوننىڭ ئۈلگىسى ياردەم بېرەلەيدۇ. شەك-شۈبھىسىزكى، گىدېئون ئۆز كەمچىلىكىنى تونۇپ يەتكەن. ئەفرائىملىقلار ئۇنى تەنقىد قىلغاندا، گىدېئون ئاچچىقلانماي، مۇلايىملىق بىلەن جاۋاب قايتۇرغان (ھاكىم. 8:1–3). ئۇ ئۇلارنىڭ ئاغرىنىشلىرىغا قۇلاق سېلىش ۋە مېھرىبانلىق بىلەن سۆزلەش ئارقىلىق ئۆزىنىڭ كەمتەرلىكىنى كۆرسەتكەن. شۇنىڭ بىلەن، ئەفرائىملىقلار ئاچچىقلىرىنى بېسىۋالغان. دانا ئاقساقاللار ئەستايىدىللىق بىلەن ئاڭلاش ۋە تەنقىد قىلىنغاندا، مۇلايىملىق بىلەن جاۋاب بېرىش ئارقىلىق گىدېئوننى ئۈلگە قىلىدۇ (ياقۇپ 3:13-نى ئوقۇڭ). ئۇلار شۇنداق قىلىپ، جامائەتنىڭ ئىناق-ئىتتىپاقلىقىغا ئۆز ھەسسىسىنى قوشىدۇ.
8. ئاقساقاللار ماختاش سۆزلىرىگە قانداق ئىنكاس قايتۇرۇشى كېرەك؟ مىسال كەلتۈرۈڭ.
8 يەھۋانى مەدھىيىلەڭ. گىدېئون مىدىياننى مەغلۇپ قىلغاندا، باشقىلار ئۇنى ماختىغان. ئەمما، ئۇ بارچە شان-شەرەپنى يەھۋاغا بەرگەن (ھاكىم. 8:22، 23). ۋەزىپىگە تەيىنلەنگەن كىشىلەر گىدېئوننى قانداق ئۈلگە قىلالايدۇ؟ ئۇلار ئۆزلىرىنىڭ قىلغان ئىشلىرى ئۈچۈن شان-شەرەپنى يەھۋاغا بېرەلەيدۇ (1-كورىنت. 4:6، 7). مەسىلەن، بىر ئاقساقال ئۆزىنىڭ تەلىم بېرىش قابىلىيىتى ئۈچۈن ماختاشلارغا ئېرىشكەن بولسا، ئۇ تەلىملەرنىڭ مەنبەسى بولغان خۇدانىڭ سۆزى ياكى يەھۋانىڭ تەشكىلاتى تەمىنلىگەن تەربىيىلەشلەر ئۈچۈن مىننەتدار ئىكەنلىكىنى بىلدۈرەلەيدۇ. ئاقساقاللار ئۆزىنىڭ تەلىم بېرىش ئۇسۇلى بىلەن يەھۋاغا شان-شەرەپ كەلتۈرەمدۇ ياكى پەقەتلا كىشىلەرگە چوڭقۇر تەسىر قالدۇرامدۇ؟ مۇشۇ سوئاللار ھەققىدە ئويلاپ باقسا بولىدۇ. تىموتىي ئىسىملىك بىر ئاقساقالنىڭ كەچۈرمىشلىرىنى كۆرۈپ باقايلى. ئۇ يېڭىلا ئاقساقال بولغاندا، ئاممىۋىي نۇتۇق ئېيتىشنى ئىنتايىن ياخشى كۆرگەن. ئۇ مۇنداق دەيدۇ: «مەن نۇتۇقلارنى ئۇزۇن ۋە مۇرەككەپ كىرىش سۆزلىرى بىلەن تەييارلايتتىم. ئۇلار دائىم باشقىلارنىڭ ماختىشىغا سازاۋەر بولدى. بەكمۇ ئەپسۇس، باشقىلارنىڭ دىققىتى مۇقەددەس كىتاب ياكى يەھۋاغا ئەمەس، ئەكسىچە ماڭا قارىتىلغان ئىدى». ۋاقىتنىڭ ئۆتۈشىگە ئەگىشىپ، تىموتىي باشقىلارنىڭ دىققىتىنى ئۆزىگە تارتماسلىق ئۈچۈن تەلىم بېرىش ئۇسۇلىنى ئۆزگەرتىشى كېرەكلىكىنى كۆرۈپ يەتكەن (پەند. نە 27:21). نەتىجىسى قانداق بولغان؟ ئۇ مۇنداق دەپ چۈشەندۈرگەن: «ھازىر قېرىنداشلار ماڭا نۇتۇقىمنىڭ ئۇلارنىڭ قىيىنچىلىقلارغا بەرداشلىق بېرىشىگە ياكى يەھۋاغا تېخىمۇ يېقىنلىشىشىغا ياردەم بەرگەنلىكىنى ئېيتىدۇ. ئۇلارنىڭ شۇ سۆزلىرىدىن ئىنتايىن خۇرسەن بولدۇم. بىرنەچچە يىل ئىلگىرى ئۇلارنىڭ مېنى ماختىغان سۆزلىرىگە قارىغاندا، ھازىر ئۇلارنىڭ ئېيتقان سۆزلىرىدىن تېخىمۇ كۆپرەك خۇشال بولىمەن».
ئىتائەتچان ياكى جاسارەتلىك بولۇشقا توغرا كەلگەندە
گىدېئون ھوشىيار بولغان 300 كىشىنى تاللاپ، ئەسكەرلەرىنىڭ سانىنى ئازايتتى (9-ئابزاسىغا قاراڭ)
9. گىدېئوننىڭ ئىتائەتچانلىقى ۋە جاسارىتى قانداق سىنالغان؟ (مۇقاۋىدىكى رەسىمگە قاراڭ)
9 گىدېئون ئىسرائىللارغا ھاكىم بولۇپ تەيىنلەنگەندىن كېيىن، ئۇنىڭ ئىتائەتچانلىقى ۋە جاسارىتى سىنالغان. ئۇنىڭغا دادىسى بائال بۇتىغا ئاتاپ ياسىغان قۇربانلىق سۇپىسىنى ۋەيران قىلىشتەك خەتەرلىك بىر ۋەزىپە تاپشۇرۇلغان (ھاكىم. 6:25، 26). كېيىنرەك، گىدېئون بىر قوشۇننى توپلىغاندىن كېيىن، ئۇنىڭ سانىنى ئىككى قېتىم ئازايتىشقا بۇيرۇلغان (ھاكىم. 7:2–7). ئاخىرىدا، ئۇ يېرىم كېچىدە دۈشمەن قوشۇنىنىڭ لەشكەرگاھىغا ھۇجۇم قىلىشقا بۇيرۇلغان.—ھاكىم. 7:9–11.
10. بىر ئاقساقالنىڭ ئىتائەتچانلىقى قانداق سىنىلىشى مۇمكىن؟
10 ئاقساقاللار «ئىتائەت قىلىشقا تەييار» بولۇشى كېرەك (ياقۇپ 3:17). ئىتائەتچان ئاقساقال مۇقەددەس يازمىلاردا دېيىلگەن سۆزلەرگە ۋە خۇدا تەشكىلاتىنىڭ يول-يورۇقلىرىغا ئاسانلا بويسۇنىدۇ. شۇ ئارقىلىق ئۇ باشقىلارغا ياخشى ئۈلگە تىكلەپ بېرىدۇ. ئەمما، ئۇنىڭ ئىتائەتچانلىقى يەنىلا سىنىلىشى مۇمكىن. مەسىلەن، ئۇ قوبۇل قىلغان كۆرسەتمىلەرگە دائىم بويسۇنۇش قىيىنغا توختىتىشى مۇمكىن. بەزى ۋەزىيەتلەردە، ئۇ بەلكىم مەلۇم يول-يورۇقنىڭ راستىنلا ئەمەلىيەتچان ياكى ئەقىلگە مۇۋاپىق ئىكەنلىكىدىن گۇمان قىلىدۇ. ياكى ئۇنىڭدىن ھەتتا قولغا ئېلىنىش خەۋپ-خەتىرىگە تەۋەككۈل قىلىدىغان ۋەزىپىنى ئورۇنلاش تەلەپ قىلىنىدۇ. بۇنداق ۋەزىيەتلەردە ئاقساقاللار گىدېئوننىڭ ئىتائەتچانلىقىدىن نېمىنى ئۆگىنەلەيدۇ؟
11. ئاقساقاللارنىڭ ئىتائەتچان بولۇشىغا نېمە ياردەم بېرەلەيدۇ؟
11 يول-يورۇققا قۇلاق سېلىڭ ۋە ئۇنى ئەمەلىي ئىشلىتىڭ. خۇدا گىدېئونغا دادىسىنىڭ قۇربانلىق سۇپىسىنى قانداق ۋەيران قىلىشنى ۋە يەھۋاغا قەيەردە يېڭى قۇربانلىق سۇپىسىنى ياساشنى ۋە قايسى ھايۋاننى قۇربانلىق قىلىشنى ئېيتقان. گىدېئون ئاشۇ كۆرسەتمىلەردىن گۇمان قىلمىغان. ئەكسىچە، ئۇ يەھۋانىڭ ئېيتقانلىرى بويىچە ئىش قىلغان. بۈگۈنكى كۈندە ئاقساقاللار خەتلەر، ئېلانلار ۋە كۆرسەتمىلەر ئارقىلىق يەھۋانىڭ تەشكىلاتىدىن كەلگەن روھىي ۋە جىسمانىي ساغلاملىقىمىز بىلەن مۇناسىۋەتلىك يول-يورۇقلارنى قوبۇل قىلىدۇ. بىز ئاقساقاللىرىمىزنىڭ ساداقەتمەنلىك بىلەن يەھۋانىڭ تەشكىلاتىدىن كەلگەن يول-يورۇقلارغا بويسۇنغانلىقىدىن ئىنتايىن مىننەتدارمىز. بۇ پۈتكۈل جامائەت ئۈچۈن پايدىلىق!—زەبۇر 119:112.
12. يەھۋانىڭ تەشكىلاتى ئۆزگەرتىشلەرنى قىلىش كېرەكلىكىنى ئېيتسا، ئاقساقاللار ئىبرانىيلار 13:17-ئايەتنى قانداق ئەمەلىي قوللىنالايدۇ؟
12 ئۆزگەرتىشلەرنى قوبۇل قىلىشقا تەييار تۇرۇڭ. يەھۋانىڭ تەلىپى بويىچە، گىدېئون قوشۇننىڭ 99 پىرسەنتىدىن كۆپرەك قىسىمىنى ئۆيگە ئەۋەتىۋەتكەن (ھاكىم. 7:8). ئۇ بەلكىم شۇنداق ئويلىغان: «بۇنداق ئۆزگەرتىشلەرنى قىلىش ھەقىقەتەن زۆرۈرمۇ؟ ئۇنداق قىلسام، غەلىبە قازىنىمىزمۇ؟» شۇنداقتىمۇ، گىدېئون كۆرسەتمىگە بويسۇنغان. بۈگۈنكى كۈندە تەشكىلات ئاقساقاللارغا بەزى ئۆزگەرتىشلەرنى قىلىش ھەققىدە كۆرسەتمىلەرنى بەرگەندە، ئىتائەتچان بولۇش ئارقىلىق گىدېئوننى ئۈلگە قىلىدۇ (ئىبرانىيلار 13:17-نى ئوقۇڭ). مەسىلەن، 2014-يىلى يېتەكچى كېڭەش ئىبادەت يىغىلىش زالى ۋە چوڭ يىغىلىش زالى قۇرۇلۇش ئىشلىرىنى ئىقتىساد بىلەن تەمىنلەش ئۇسۇلىنى ئۆزگەرتتى (2-كورىنت. 8:12–14). جامائەتلەر ئەمدى قەرز قايتۇرمايدىغان، ئەكسىچە دۇنيانىڭ ھەرقايسى جايلىرىدىكى جامائەتلەر ئىقتىسادىي ئەھۋالى قانداق بولۇشىدىن قەتئىينەزەر، قەيەردە ئېھتىياج بولسا، شۇ يەردە قۇرۇلۇش قىلىش توغرۇلۇق قارارنى ماقۇللىغان ئىدى. بۇ ئۆزگەرتىش توغرىسىدا ئاڭلىغاندا، جوسى بۇ قارارنىڭ ئوڭۇشلۇق بولىدىغانلىقىدىن گۇمانلىنىپ، مۇنداق ئويلىغان: ‹ھەتتا بىرمۇ يىغىلىش زالى سېلىنمايدۇ. بۇ بىز ياشاۋاتقان جايدا ھېچكىم، ھېچقاچان بۇنداق ئىش قىلىپ باققان ئەمەس›. جوسىنىڭ كۆرسەتمىلەرنى قوللاپ-قۇۋۋەتلىشىگە نېمە ياردەم بەرگەن. ئۇ مۇنداق دەيدۇ: «پەندى-نەسىھەت 3:5، 6-ئايەتتىكى سۆزلەر، يەھۋاغا ئىشەنچ قىلىشىم كېرەكلىكىنى ئەسكەرتتى. كۆرسەتمىلەر ھەقىقەتەن ئاجايىپ نەتىجىلەرگە ئېرىشتۈردى! بىز تېخىمۇ كۆپ يىغىلىش زاللىرىنى سېلىپلا قالماي، پەرقلىق ئۇسۇللار بىلەن ئۆز ھەسسىمىزنى قوشۇشنى ئۆگەندۇق. شۇنداق بولغاندا، ھەممە يەردە تەڭ باراۋەرلىك بولىدۇ».
ھەتتا ئىش-پائالىيەتلىرىمىز مەنئىي قىلىنغان بولسىمۇ، جاسارەت بىلەن ئۈنۈملۈك ۋەز قىلالايمىز (13-ئابزاسقا قاراڭ)
13. (1) گىدېئون نېمىگە ئىشەنگەن؟ (2) ئاقساقاللار گىدېئوننى قانداق ئۈلگە قىلالايدۇ؟ (رەسىمگە ھەم قاراڭ)
13 يەھۋانىڭ ئىرادىسىنى جاسارەت بىلەن ئورۇنلاڭ. گىدېئون قورقۇش ۋە خەتەرگە قارىماي، يەھۋاغا ئىتائەتچان بولغان (ھاكىم. 9:17). يەھۋا كاپالەت بەرگەندىن كېيىن، گىدېئون خۇدانىڭ خەلقىنى قوغدىغاندا، يەھۋانىڭ ئۆزىنى قوللاپ-قۇۋۋەتلەيدىغانلىقىغا قەتئىي ئىشەنگەن. ئىش-پائالىيەتلىرىمىز چەكلەنگەن رايونلاردا ياشايدىغان ئاقساقاللار گىدېئوننى ئۈلگە قىلغان. ئۇلار قولغا ئېلىنىش، سوراق قىلىنىش، ئىش ئورنىدىن ئايرىلىپ قېلىش ياكى زوراۋانلىققا ئۇچراش خەتەرلىرىگە قارىماي، جاسارەت بىلەن ئىبادەت يىغىلىشلىرى ۋە ۋەز خىزمىتىگە يېتەكچىلىك قىلىدۇ c. چوڭ بالايىئاپەت مەزگىلىدە كۆرسەتمىلەرگە بويسۇنۇش خەتەرلىك بولسىمۇ، ئاقساقاللار جاسارەت بىلەن كۆرسەتمىلەرگە بويسۇنۇشى كېرەك. مەسىلەن، ھۆكۈم خەۋىرى ۋە ماگوگدىن بولغان گوگنىڭ ھۇجۇمىدىن ئامان قېلىش ئۈچۈن نېمە قىلىشىمىز كېرەكلىكى ھەققىدە كۆرسەتمىلەر بېرىلىشى مۇمكىن.—ھەزەك. 38:18؛ ۋەھىي. 16:21.
چىدامچانلىقىڭىز سىناققا دۇچ كەلگەندە
14. گىدېئوننىڭ چىدامچانلىقى قانداق سىنالغان؟
14 گىدېئون ھاكىملىق ۋەزىپىسىنى ئورۇنلاش ئۈچۈن جاپالىق ئىشلىشى كېرەك ئىدى. كېچىدە جەڭ بولۇۋاتقاندا مىدىيانلىقلار قېچىپ كەتكەندە، گىدېئون ئۇلارنى جەزرەئەل جىلغىسىدىن تاكى ئىئوردان دەرياسىغىچە قوغلىغان. بەلكىم، ئاشۇ جايلار چاتقاللىقلار بىلەن قورشالغان (ھاكىم. 7:22). گىدېئون ئىئوردان دەرياسىغا كەلگەندە توختاپ قالغانمۇ؟ ياق! گەرچە ھېرىپ قالغان بولسىمۇ، ئۇ 300 كىشى بىلەن دەريادىن ئۆتۈپ، قوغلاشنى داۋاملاشتۇرغان. ئاخىرىدا، ئۇلار مىدىيانلىقلارغا يېتىشىۋېلىپ، ئۇلارنى مەغلۇپ قىلغان.—ھاكىم. 8:4–12.
15. قاچان ئاقساقاللارنىڭ چىدامچانلىقى سىنىلىشى مۇمكىن؟
15 بىر ئاقساقال بەزىدە جامائەت ۋە ئۆز ئائىلىسىدىن خەۋەر ئېلىپ، جىسمانىي، روھىي ياكى ھېس-تۇيغۇ جەھەتتە ھېرىپ-چارچاش ھېس قىلىشى مۇمكىن. بۇنداق ۋەزىيەتلەردە ئاقساقاللار گىدېئوننى قانداق ئۈلگە قىلالايدۇ؟
كۆيۈمچان ئاقساقاللار قوللاپ-قۇۋۋەتلەشكە ئېھتىياجلىق نۇرغۇن قېرىنداشلارغا تەسەللى بېرىپ كېلىۋاتىدۇ (16، 17-ئابزاسلارغا قاراڭ)
16، 17. گىدېئوننىڭ چىدامچان بولۇشىغا نېمە ياردەم بەرگەن ۋە ئاقساقاللار نېمىگە ئىشەنسە بولىدۇ؟ (يەشايا 40:28–31) (رەسىمگە ھەم قاراڭ)
16 يەھۋانىڭ سىزنى كۈچلەندۈرىدىغانلىقىغا ئىشىنىڭ. گىدېئون يەھۋانىڭ ئۇنىڭغا كۈچ-قۇۋۋەت بېرىدىغانلىقىغا ئىشەنگەن. ئۇ ئۈمىدسىزلەنمىگەن (ھاكىم. 6:14، 34) بىر قېتىم، تۆگىگە مىنىپ قاچقان ئىككى مىدىيان پادىشاھىنى گىدېئون ۋە ئۇنىڭ ئادەملىرى پىيادە قوغلىغان بولۇشى مۇمكىن (ھاكىم. 8:12، 21). شۇنداقتىمۇ، خۇدانىڭ ياردىمى بىلەن قەتئىي ئىرادىلىك ئىسرائىللار جەڭدە غەلىبە قىلغان. خۇددى شۇنىڭدەك، ئاقساقاللارمۇ يەھۋاغا تايىنالايدۇ، چۈنكى، «ئۇ ھېچقاچان چارچىمايدۇ ياكى ھېرىپ ھالىدىن كەتمەيدۇ». ئاقساقاللار مۇھتاج بولغاندا، ئۇ ئۇلارغا كۈچ بېرىدۇ.—يەشايا 40:28–31-نى ئوقۇڭ.
17 دوختۇرخانا بىلەن ئالاقىلىشىش كومىتېتىنىڭ بىر ئەزاسى بولغان مەتىيۇ ئىسىملىك ئاقساقالنىڭ كەچۈرمىشىنى كۆرۈپ باقايلى. ئۇنىڭ چىدامچان بولۇشىغا نېمە ياردەم بەرگەن؟ مەتىيۇ مۇنداق دەيدۇ: «مەن فىلىپىلىكلەر 4:13-ئايەتنىڭ ھەقىقەت ئىكەنلىكىنى بېشىمدىن ئۆتكۈزدۈم. مەن نۇرغۇن قېتىم ئىنتايىن ھېرىپ-چارچاپ، ۋەزىپەمنى داۋاملاشتۇرالمايدىغاندەك ھېس قىلغاندا، خۇداغا توختىماي دۇئا قىلىپ، داۋاملىق قېرىنداشلىرىمغا ياردەم بېرەلىشىم ئۈچۈن، ماڭا جىسمانىي ۋە روھىي جەھەتتىن كۈچ بېرىشنى ئۆتۈندۈم. شۇ پەيتلەردە، خۇدانىڭ روھى ماڭا كۈچ-قۇۋۋەت بېرىپ، چىدامچان بولۇشىمغا ياردەم بەردى». گىدېئونغا ئوخشاش ساداقەتمەن ئاقساقاللار جان كۆيدۈرۈپ، پادىلارنى باققاندا، يەنە توسالغۇلارغا دۇچ كېلىشى مۇمكىن. ئەلۋەتتە، ئۇلار كىچىك پېئىل بولۇشى ۋە ھەردائىم ئۆزلىرى ياخشى كۆرگەن ھەممىلا ئىشنى قىلالمايدىغانلىقىنى تونۇپ يېتىشى كېرەك. شۇندىلا، ئۇلار ئۆزلىرىنىڭ ياردەم سوراپ قىلغان دۇئالىرىنى يەھۋانىڭ ئاڭلايدىغانلىقى ۋە چىدامچان بولۇشى ئۈچۈن كۈچ-قۇۋۋەت بېرىدىغانلىقىغا ئىشىنەلەيدۇ.—زەبۇر 116:1؛ فىلىپى. 2:13.
18. تەكرارلىساق، ئاقساقاللار گىدېئوننىڭ ئۈلگىسىدىن نېمىلەرنى ئۆگىنەلەيدۇ؟
18 ئاقساقاللار گىدېئوننىڭ ئۈلگىسىدىن نۇرغۇنلىغان نەرسىلەرنى ئۆگىنەلەيدۇ. ئۇلار مەيلى قانچە كۆپ خىزمەت قىلسۇن، باشقىلار ماختىسۇن ياكى تەنقىدلىسۇن، چوقۇم كىچىك پېئىل بولۇشى كېرەك. ئۇلار چوقۇم ئىتائەتچانلىقىنى ۋە جاسارىتىنى كۆرسىتىشى لازىم. بولۇپمۇ، بۇ دۇنيانىڭ ئاخىرلىشىش ۋاقتى ئاز قالغان ئىكەن، تېخىمۇ شۇنداق قىلىشى كېرەك. ئۇلار ھەرقانداق توسالغۇلارغا دۇچ كېلىشتىن قەتئىينەزەر، خۇدا ئۇلارنى كۈچلەندۈرىدىغانلىقىغا قەتئىي ئىشىنىشى لازىم. شەك-شۈبھىسىزكى، «بۇنداق كىشىلەرنى قەدىرلەڭلار» دېگەن نەسىھەت سۆزىگە قۇلاق سېلىپ، تىرىشچان پادىچىلارنى قەدىرلەيمىز.—فىلىپى. 2:29.
21-ناخشا رەھىمدىل بولغان بەختلىك
a ئىسرائىل خەلقى تارىخىدىكى ئىنتايىن مۈشكۈل زاماندا، يەھۋا ئۇلارغا پادىچىلىق قىلىپ قوغداش ئۈچۈن گىدېئوننى تەيىنلىگەن. گىدېئون بۇ ۋەزىپىنى 40 يىل سادىقلىق بىلەن ئورۇنلىغان. بىراق، ئۇ نۇرغۇن قىيىنچىلىقلارغا دۇچ كەلگەن. ئۇنىڭ ئۈلگىسى بۈگۈنكى كۈندە ئاقساقاللارغا قانداق ياردەم بېرەلەيدىغانلىقىنى مۇھاكىمە قىلىمىز.
b كىچىك پېئىللىق ۋە كەمتەرلىك بىر-بىرى بىلەن زىچ باغلىنىشلىق. ئەگەر بىز كەمتەر بولساق، ئۆزىمىز توغرىسىدا كۆپ ئويلىمايمىز ۋە بەزى ئىشلار قولىمىزدىن كەلمەيدىغانلىقىنى چۈشىنىمىز. ئەگەر كىچىك پېئىل بولساق، باشقىلارنى ھۆرمەتلەيمىز ۋە ئۇلارنى ئۆزىمىزدىن مۇھىمراق دەپ قارايمىز (فىلىپى. 2:3). كىچىك پېئىل كىشى ھەم كەمتەر كىشى.
c «كۈزىتىش مۇنارى» 2019-يىل، ئىيۇل سانى، 10، 11-بەتلەردىكى «پائالىيىتىمىز مەنئىي قىلىنغاندىمۇ، داۋاملىق يەھۋاغا ئىبادەت قىلايلى!» ناملىق ماقالىنىڭ 10–13-ئابزاسلىرىغا قاراڭ.
