27-تەتقىق ماقالىسى
نېمە ئۈچۈن يەھۋادىن ئەيمىنىشىمىز كېرەك؟
«يەھۋا ئۆزىدىن ئەيمىنىدىغانلارنى يېقىن دوست تۇتار».—زەبۇر 25:14.
49-ناخشا يەھۋا — بىزنىڭ پاناھگاھىمىز
بۇ ماقالىدە a
1، 2. زەبۇر 25:14-ئايەتكە ئاساسلانغاندا، يەھۋا بىلەن يېقىن دوست بولۇشنى خالىساق، چوقۇم نېمىنى قىلىشىمىز كېرەك؟
سىزنىڭچە، باشقىلار بىلەن يېقىن دوستلۇقنى ساقلىماقچى بولسىڭىز، چوقۇم قايسى پەزىلەتلەر بولۇشى زۆرۈر؟ بەلكىم، ياخشى دوستلار بىر-بىرىنى ياخشى كۆرۈشى ۋە قوللاپ-قۇۋۋەتلىشى كېرەك دەپ جاۋاب بېرىسىز. ياكى، ياخشى دوستلۇق مۇناسىۋەتتە بولۇش بىلەن ئەيمىنىشنىڭ ھېچبىر مۇناسىۋىتى يوق، ئۇ مۇھىم رول ئوينىمايدۇ دەپ قارىغانسىز. بىراق، بۇ ماقالىنىڭ ئاساسىي ئايىتىدە دېيىلگەندەك، يەھۋا بىلەن يېقىن دوست بولۇش ئۈچۈن چوقۇم ئۇنىڭدىن ئەيمىنىش كېرەك.—زەبۇر 25:14-نى ئوقۇڭ.
2 مەيلى بىز يەھۋاغا قانچىلىك ئۇزۇن ۋاقىت خىزمەت قىلايلى، ھەممىمىز ئۇنى داۋاملىق چىن كۆڭلىمىزدىن چوڭقۇر ھۆرمەتلىشىمىز لازىم. بىراق، يەھۋادىن ئەيمىنىش دېگەن نېمە؟ يەھۋادىن ئەيمىنىشنى ئۆگىنىش ئۈچۈن نېمە قىلالايمىز؟ ئوبادىيا، باش روھانىي بولغان يەھوياداھ ۋە يەھوئاش پادىشاھلارنىڭ مىسالىدىن خۇدادىن ئەيمىنىش توغرۇلۇق نېمىلەرنى ئۆگىنەلەيمىز؟
خۇدادىن ئەيمىنىش دېگەن نېمە؟
3. قورقۇنچ بىزنى قانداق قوغدايدىغانلىقى ۋە قانداق تەسىر قىلىدىغانلىقىنى چۈشەندۈرۈڭ.
3 ئەگەر ئۆزىمىزنىڭ مەلۇم بىر زىيانكەشلىككە ئۇچرايدىغانلىقىمىزنى بىلسەك، قورقۇنچ ھېس قىلىشىمىز مۇمكىن. شۇنداق قورقۇنچنىڭ بولۇشى ياخشى، ئۇ بىزنى دانالىق بىلەن ئىش قىلىشقا ئۈندەيدۇ. يىقىلىپ چۈشۈشتىن قورقۇش بىزنى قىيا تاشنىڭ گىرۋىكىگە بەك يېقىن مېڭىشتىن توسۇپ قالىدۇ. يارىلىنىپ قېلىشتىن قورقۇش بىزنى خەتەرلىك ئەھۋالدىن قېچىشقا ھەرىكەت قىلدۇرىدۇ. يېقىن دوستلۇقىمىزنىڭ بۇزۇلۇشىدىن قورقۇش بىزنى ئۆزىمىز ياخشى كۆرىدىغان كىشىلەرگە قوپال سۆزلەرنى ياكى ئىشلارنى قىلىشتىن توسىدۇ.
4. شەيتان كىشىلەرنىڭ يەھۋادىن قانداق ئۇسۇلدا قورقۇشىنى خالايدۇ؟
4 شەيتان كىشىلەرنىڭ يەھۋا خۇدادىن ناتوغرا ئۇسۇلدا قورقۇشىنى خالايدۇ. ئۇ بىزنىڭ يەھۋانى ھەرقاچان غەزەپلىنىدىغان، جازالايدىغان ۋە ئۇنى رازى قىلىش قىيىن دەپ ئىشىنىشىمىزنى خالايدۇ. شەيتان ئۆتمۈشتە ئېلىفاز ئارقىلىق شۇنداق ئوي-پىكىرنى تەشۋىق قىلغان (ئايۇپ 4:18، 19). شەيتان بىزنىڭ يەھۋادىن شۇنداق ناتوغرا ئۇسۇلدا قورقۇپ، ئۇنىڭغا خىزمەت قىلىشنى توختىتىشىمىزنى خالايدۇ. بۇ تۇزاققا چۈشمەسلىك ئۈچۈن خۇدادىن ئەيمىنىپ، توغرا ئۇسۇلدا قورقۇشنى ئۆگىنىشىمىز كېرەك.
5. خۇدادىن ئەيمىنىش نېمىنى بىلدۈرىدۇ؟
5 خۇدادىن ئەيمىنىش ئىچىدە قورقىدىغان ئادەم ئۇنى چىن قەلبىدىن ياخشى كۆرىدۇ ۋە ھەرقانداق نەرسىنىڭ ئۇنىڭ بىلەن بولغان دوستلۇقىغا زىيان يەتكۈزۈشىنى خالىمايدۇ. ئەيسا مەسىھ، خۇدادىن دەل شۇنداق ئەيمىنگەن ئىدى (ئىبرانىي. 5:7). ئۇ يەھۋادىن قورقۇپ، ۋەھىمىگە چۈشمىگەن (يەشايا 11:2، 3). ئەكسىچە، ئۇ چىن قەلبىدىن ئۇنى سۆيگەچ، ئۇنىڭغا بويسۇنۇشنى خالىغان (يۇھاننا 14:21، 31). خۇددى ئەيسادەك، بىزمۇ يەھۋانى چوڭقۇر ھۆرمەتلەپ، ئۇنىڭدىن ئەيمىنىمىز. چۈنكى، ئۇ سۆيگۈ-مۇھەببەتلىك، ئادىل، دانا ۋە كۈچ-قۇدرەتلىك خۇدادۇر. بىز يەنە شۇنى بىلىمىزكى، يەھۋا بىزنى سۆيىدۇ ۋە بىزگە تەلىم بەرگەندە، ئۇنىڭغا قانداق ئىنكاس قايتۇرىدىغانلىقىمىزغا كۆڭۈل بۆلىدۇ. ئەگەر يەھۋاغا ئىتائەت قىلمىساق، ئۇنى رەنجىتىمىز، ئەكسىچە ئىتائەت قىلساق، ئۇنى خۇشال قىلىمىز.—زەبۇر 78:41؛ پەند. نە 27:11.
خۇدادىن ئەيمىنىشنى ئۆگىنىش
6. يەھۋادىن ئەيمىنىشنى ئۆگىنىشنىڭ بىر يولى قايسى؟ (زەبۇر 34:11)
6 بىز توغۇلۇپلا، يەھۋادىن ئەيمىنىشنى بىلمەيمىز، چوقۇم ئۇنىڭدىن ئەيمىنىشنى ئۆگىنىشىمىز لازىم (زەبۇر 34:11-نى ئوقۇڭ). بۇنىڭ بىر ئۇسۇلى — خۇدا ياراتقان مەۋجۇداتلارنى كۈزىتىپ تەكشۈرۈش. ياراتقۇچىنىڭ ئەقىل-پاراسىتى، كۈچ-قۇدرىتى ۋە بىزگە بولغان چوڭقۇر مۇھەببىتىنى يارىتىلغان مەۋجۇداتلاردىن قانچە كۆپ كۆرگەنسېرى، ئۇنىڭغا بولغان ھۆرمىتىمىز ۋە سۆيگۈ-مۇھەببىتىمىز شۇنچە چوڭقۇرلىشىدۇ (رىملىقلار 1:20). ئادرىئان ئىسىملىك قېرىنداش مۇنداق دەيدۇ: «يەھۋا ياراتقان مەۋجۇداتلاردا ئاشكارا بولغان دانالىق مېنى بەكمۇ ھەيران قالدۇردى ۋە ئۇنىڭ مەن ئۈچۈن نېمە ئەڭ ياخشى ئىكەنلىكىنى بىلىدىغانلىقىنى تونۇپ يېتىشىمگە ياردەم بەردى». ئۇ چوڭقۇر ئويلىنىپ، شۇنداق يەكۈن چىقارغان: «ماڭا ھاياتلىق بەرگەن يەھۋا بىلەن بولغان دوستلۇقنى بۇزىدىغان ھەرقانداق ئىشنى قىلىشنى خالىمايمەن». بۇ ھەپتە يەھۋا ياراتقان مەلۇم بىر نەرسە ھەققىدە ئويلىنىشقا ۋاقىت چىقىرىڭ. شۇنداق قىلسىڭىز، يەھۋاغا بولغان ھۆرمىتىڭىز ۋە مۇھەببىتىڭىز چوڭقۇرلىشىدۇ.—زەبۇر 111:2، 3.
7. يەھۋا خۇدادىن ئەيمىنىپ قورقۇشنى ئۆگىنىشىمىزگە دۇئا قانداق ياردەم بېرىدۇ؟
7 خۇدادىن ئەيمىنىشنى ئۆگىنىشنىڭ يەنە بىر ئۇسۇلى — دائىم دۇئا قىلىش. قانچە كۆپ دۇئا قىلساق، يەھۋا بىلەن تېخىمۇ ياخشىراق تونۇشىمىز. ھەر قېتىم ئۇنىڭدىن بىر سىناققا بەرداشلىق بېرىش ئۈچۈن كۈچ سورىغىنىمىزدا، ئۇنىڭ كىشىنى ئەيمەندۈرىدىغان كۈچ-قۇدرىتى ئېسىمىزگە كېلىدۇ. ئوغلىنى بىز ئۈچۈن سوۋغات سۈپىتىدە بەرگىنىگە مىننەتدارلىق بىلدۈرگىنىمىزدە، ئۆزىمىزگە يەھۋانىڭ سۆيگۈ-مۇھەببىتىنى ئەسلىتىمىز. يەھۋادىن قىيىنچىلىقىمىزغا ياردەم بېرىشنى ئۆتۈنگەندە، ئۇنىڭ نەقەدەر دانالىقىنى ئەسكە ئالىمىز. شۇنداق دۇئالار بىزنىڭ يەھۋاغا بولغان ھۆرمىتىمىزنى چوڭقۇرلاشتۇرىدۇ. ئۇنىڭدىن باشقا، ئۇنىڭ بىلەن بولغان دوستلىقىمىزغا زىيان يەتكۈزىدىغان ھەرقانداق ئىشنى قىلماسلىق ئىرادىمىز كۈچىيىدۇ.
8. داۋاملىق خۇدادىن ئەيمىنىپ ياشىشىمىز ئۈچۈن نېمە قىلالايمىز؟
8 بىزنىڭ داۋاملىق خۇدادىن ئەيمىنىپ ياشىشىمىزغا، مۇقەددەس كىتابتىكى ياخشى ۋە يامان كىشىلەرنىڭ مىساللىرىنى تەتقىق قىلىپ ئۆگىنىش ياردەم بېرىدۇ. ئاۋۋال، يەھۋانىڭ ئىككى سادىق خىزمەتچىسى پادىشاھ ئاخابنىڭ ئائىلىسىدىكى خىزمەتچى ئوبادىيا ۋە باش روھانىي يەھوياداھنىڭ مىساللىرىنى كۆرۈپ چىقايلى. كېيىن، دەسلەپتە يەھۋاغا خىزمەت قىلىپ، كېيىنرەك خىزمەت قىلىشنى توختاتقان يەھۇدا پادىشاھى يەھوئاشتىن نېمىلەرنى ئۆگىنەلەيدىغانلىقىمىزنى كۆرىمىز.
خۇدادىن ئەيمىنىدىغان ئوبادىيادەك جاسارەتلىك بولۇڭ
9. يەھۋادىن ئەيمىنىش ئوبادىياگە قانداق ياردەم بەرگەن؟ (1-پادىشاھلار 18:3، 12)
9 مۇقەددەس كىتاب ئوبادىيانى b تۇنجى قېتىم تىلغا ئالغاندا، مۇنداق سۆزلەر بىلەن تەسۋىرلىگەن: «ئوبادىيا يەھۋادىن تولىمۇ ئەيمىنەتتى» (1-پادىشاھلار 18:3، 12-نى ئوقۇڭ). خۇدادىن ئەيمىنىش ئوبادىياگە قانداق ياردەم بەرگەن؟ بىرىنچىدىن، بۇ ئۇنى سەمىمىي ۋە ئىشەنچىلىك قىلغان. شۇڭا، پادىشاھ ئۇنى خان جەمەتىگە باشقۇرغۇچى قىلغان (نەھەم. 7:2-نى سېلىشتۇرۇڭ). خۇدادىن ئەيمىنىش ئوبادىيانى تولۇپ تاشقان جاسارەتكە ئىگە قىلغان. بۇ ئۇنىڭ ئۈچۈن زۆرۈر بىر پەزىلەت بولغان. چۈنكى، ئۇ رەزىل پادىشاھ ئاخابنىڭ زاماندا ياشىغان. ئاخابنىڭ «قىلغان يامانلىقلىرى يەھۋانىڭ نەزىرىدە ئۇنىڭدىن ئىلگىرى ئۆتكەن ھەممە پادىشاھلاردىنمۇ ئېشىپ كەتكەن ئىدى» (1-پادىشاھ. 16:30). ئۇنىڭ بائالغا چوقۇنىدىغان ئايالى ئىزەبەل يەھۋاغا ئىنتايىن ئۆچ بولۇپ، ئۇ شىمالىي پادىشاھلىقتىكى ھەقىقىي ئىبادەت قىلغۇچىلارنى يوقىتىشقا ھەرىكەت قىلغان. ئۇ ھەتتا نۇرغۇنلىغان خۇدانىڭ پەيغەمبەرلەرنى ئۆلتۈرگەن (1-پادىشاھ. 18:4). شۇڭا، ناھايىتى ئېنىقكى، ئوبادىيا ئىنتايىن قىيىن بىر زاماندا يەھۋاغا ئىبادەت قىلغان.
10. ئوبادىيا تولۇپ تاشقان جاسارىتىنى قانداق كۆرسەتكەن؟
10 ئوبادىيا تولۇپ تاشقان جاسارىتىنى قانداق كۆرسەتكەن؟ ئىزەبەل خۇدانىڭ پەيغەمبەرلىرىنى قوغلاپ، ئۇلارنى ئۆلتۈرمەكچى بولغاندا، ئۇ 100 پەيغەمبەرنى ئۆڭكۈرگە يوشۇرۇپ، ئۇلارغا نان ۋە سۇ تەمىنلەپ بەرگەن (1-پادىشاھ. 18:13، 14). ئەگەر ئۇنىڭ ئىشلىرى ئاشكارا بولۇپ قالغان بولسا، ئىزەبەل بۇ جاسارەتلىك كىشى ئوبادىيانى ئۆلتۈرۈۋەتكەن بولاتتى. ئەلۋەتتە، ئوبادىيا ئۆلۈمدىن قورققان بولۇشى مۇمكىن. بىراق، ئۇ يەھۋانى ۋە ئۇنىڭغا خىزمەت قىلغانلارنى ئۆزىنىڭ ھاياتىدىنمۇ بەكرەك سۆيگەن.
ئىش-پائالىيىتىمىز چەكلەنگەن بولسىمۇ، بىر بۇرادەر باتۇرلۇق بىلەن باشقا گۇۋاھچىلارغا روھىي ئوزۇقلۇقلارنى يەتكۈزۈپ بېرىۋاتىدۇ (11-ئابزاسقا قاراڭ) c
11. يەھۋانىڭ بۈگۈنكى كۈندىكى خىزمەتچىلىرى ئوبادىياغا ئوخشاش بولۇش ئۈچۈن نېمە قىلىۋاتىدۇ؟ (رەسىمگە ھەم قاراڭ)
11 بۈگۈنكى كۈندە نۇرغۇنلىغان يەھۋا گۇۋاھچىلىرى ئىش-پائالىيەتلىرىمىز مەنئىي قىلىنغان دۆلەتلەردە ياشاۋاتىدۇ. ئۇلار ئۆزلىرى ياشاۋاتقان جايلاردىكى ھۆكۈمەتلەرگە ھۆرمەت كۆرسىتىدۇ. بىراق، ئوبادىياغا ئوخشاش، بۇ قەدىرلىك قېرىنداشلار يەھۋاغا تەۋە بولغان نەرسىنى ئۇنىڭغا بېرىدۇ، يەنى چىن قەلبىدىن ئىبادەت قىلىدۇ (مەتتا 22:21). ئۇلار ئىنسانلارغا ئەمەس، خۇداغا ئىتائەت قىلىش ئارقىلىق ئۆزلىرىنىڭ ئۇنىڭدىن ئەيمىنىپ قورقىدىغانلىقىنى ئىپادىلەيدۇ (ئەلچى. 5:29). ئۇلار ئېھتىياتچانلىق بىلەن، داۋاملىق يوشۇرۇن خۇش خەۋەرنى ۋەز قىلىدۇ ۋە ئىبادەت يىغىلىشلىرىنى ئۆتكۈزىدۇ (مەتتا 10:16، 28). ئۇلار قېرىنداشلىرىنىڭ زۆرۈر روھىي ئوزۇقلۇقلارغا ئېرىشىشىگە ياردەم بېرىدۇ. ئىش-پائالىيەتلىرىمىز بىر مەزگىل چەكلەنگەن ئافرىقىدىكى بىر دۆلەتتە ياشىغان ھېنرىنىڭ مىسالىنى كۆرۈپ باقايلى. شۇ مەزگىلدە، ھېنرى پىدائىي خىزمەتكە قاتنىشىپ، گۇۋاھچىلارغا نەشرىي ماتېرىياللارنى يەتكۈزگەنىدى. ئۇ مۇنداق يازغان: «مەن تارتىنچاق ئىدىم، شۇڭا يەھۋاغا بولغان چوڭقۇر ھۆرمىتىم ماڭا زۆرۈر جاسارەتنى ئاتا قىلغانلىقىغا ئىشىنىمەن». ئۆزىڭىزنى ھېنرىنىڭ ئورنىغا قويۇپ، جاسارەتكە تولغانلىقىڭىزنى كۆز ئالدىڭىزغا كەلتۈرۈپ بېقىڭ. ئەگەر يەھۋادىن ئەيمىنىشنى ئۆگەنسىڭىز، سىزمۇ جاسارەتلىك بولالايسىز.
خۇدادىن ئەيمىنىدىغان باش روھانىي يەھوياداھدەك سادىق بولۇڭ
12. باش روھانىي يەھوياداھ ۋە ئايالى يەھوشابات يەھۋاغا بولغان كۈچلۈك ساداقەتمەنلىكىنى قانداق كۆرسەتكەن؟
12 باش روھانىي يەھوياداھ يەھۋادىن ئەيمەنگەن. بۇ ئۇنى خۇداغا سادىق بولۇپ، ھەق ئىبادەتنى ئىلگىرى سۈرۈشكە دەۋەت قىلغان. ئىزەبەلنىڭ قىزى ئاتاليا يەھۇدا پادىشاھلىقىنىڭ تەختىنى تارتىۋالۋاقچى بولغاندا، يەھوياداھنىڭ خۇدادىن ئەيىمنىدىغانلىقى ئېنىق كۆرۈنگەن. شۇ چاغدا، كىشىلەر ئاتاليادىن قورققان ئىدى. چۈنكى، ئۇ رەھىمسىز بولۇپ، ئاچكۆزلۈك بىلەن ھوقۇقنى قولىغا كەلتۈرۈش ئۈچۈن، ھەتتا پۈتۈن خان جەمەتىنى، يەنى ئۆزىنىڭ نەۋرىلىرىنى ئۆلتۈرمەكچى بولغان (2-تارىخ. 22:10، 11). شۇلارنىڭ ئارىسىدىكى بىرى يەھوئاش ئامان قالغان، چۈنكى يەھوياداھنىڭ ئايالى يەھوشابات ئۇنى قۇتقۇزۇپ قالغان. ئۇ ۋە ئۇنىڭ ئېرى بالىنى يوشۇرۇپ قويۇپ ئۇنىڭدىن خەۋەر ئالغان. مۇشۇ ئارقىلىق يەھوياداھ ۋە يەھوشابات داۋۇتنىڭ تەختىگە ۋارىسلىق قىلىدىغان پادىشاھنى قوغداپ قالغان. يەھوياداھ يەھۋاغا سادىق بولغاچ، ئۇ ئاتاليادىن قورقۇپ، ۋەھىمىگە چۈشمىگەن.—پەند. نە 29:25.
13. يەھوئاش يەتتە ياشقا كىرگەندە، يەھوياداھ ساداقەتمەنلىكىنى يەنە بىر قېتىم قانداق كۆرسەتكەن؟
13 يەھوئاش يەتتە ياشقا كىرگەندە، يەھوياداھ يەنە بىر قېتىم يەھۋاغا بولغان ساداقىتىنى كۆرسەتكەن. ئۇ بىر پىلان تۈزگەن. ئەگەر پىلانى ئوڭۇشلۇق بولسا، يەھوئاش داۋۇتنىڭ تەختىگە ۋارىسلىق قىلاتتى. ئەگەر پىلان مەغلۇپ بولسا، يەھوياداھ جەزمەن ھاياتىدىن ئايرىلاتتى. بىراق، يەھۋانىڭ بەرىكەتلىشى بىلەن بۇ پىلان ئوڭۇشلۇق بولغان. يەھوياداھ يېتەكچىلەر ۋە لاۋىيلارنىڭ قوللىشى بىلەن يەھوئاشنى پادىشاھ تىكلەپ، ئاتاليانى ئۆلتۈرگەن (2-تارىخ. 23:1–5، 11، 12، 15؛ 24:1). يەھوياداھ يەنە «داۋاملىق يەھۋانىڭ خەلقى بولسۇن دەپ، يەھۋا بىلەن پادىشاھ ۋە خەلق ئارىسىدا بىر ئەھدە تۈزدى» (2-پادىشاھ. 11:17). يەھوياداھ «ھېچبىر ناپاك كىشى كىرەلمەسلىكى ئۈچۈن يەھۋانىڭ ئۆيىنىڭ دەرۋازىلىرىغا دەرۋازىۋەنلەرنى تۇرغۇزدى».—2-تارىخ. 23:19.
14. يەھۋانى ھۆرمەتلىگىنى ئۈچۈن، يەھوياداھ قانداق شان-شەرەپكە ئېرىشكەن؟
14 يەھۋا ئىلگىرى: «مېنى ھۆرمەت قىلغانلارنى، مەنمۇ ھۆرمەت قىلىمەن» دېگەن. ھەقىقەتەن، ئۇ يەھوياداھنى مۇكاپاتلىغان (1-سام. 2:30). مەسىلەن، خۇدا باش روھانىينىڭ قىلغان ئىشلىرىنى مۇقەددەس يازمىلارغا يازدۇرغان، شۇڭا بىز ئۈزۈندىلەردىن يەھوياداھ ھەققىدە ئۆگىنەلەيمىز (رىملىقلار 15:4). يەھوياداھ ۋاپات بولغاندا، ئالاھىدە شان-شەرەپكە ئېرىشكەن. مۇقەددەس كىتاب مۇنداق دەيدۇ: «ئۇنى داۋۇتنىڭ شەھىرىدە پادىشاھلار دەپنە قىلىنىدىغان جايغا كۆمۈشتى، چۈنكى ئۇ ئىسرائىلدا خۇدا ۋە ئۇنىڭ ئۆيى ئۈچۈن ياخشى ئىشلارنى قىلغانىدى».—2-تارىخ. 24:15، 16.
باش روھانىي يەھوياداھقا ئوخشاش، خۇدادىن ئەيمىنىپ قورقۇش بىزنى قېرىنداشلىرىمىزغا سادىقلىق بىلەن ياردەم قىلىشقا ئۈندىسۇن (15-ئابزاسقا قاراڭ) d
15. يەھوياداھ ھەققىدىكى ئۈزۈندىلەردىن نېمىلەرنى ئۆگىنەلەيمىز؟ (رەسىمگە ھەم قاراڭ)
15 يەھوياداھ ھەققىدىكى ئۈزۈندە ھەممىمىزنىڭ خۇدادىن ئەيمىنىشنى ئۆگىنىشىمىزگە ياردەم بېرەلەيدۇ. جامائەت ئاقساقاللىرى ھوشيارلىقىنى ساقلاش ۋە خۇدانىڭ پادىلىرىنى ساداقەتمەنلىك بىلەن قوغداش ئارقىلىق يەھوياداھنى ئۈلگە قىلالايدۇ (ئەلچى. 20:28). ياشىنىپ قالغانلار خۇداغا ساداقەتمەنلىكىنى ساقلاپ، يەھوياداھنى ئۈلگە قىلالايدۇ. يەھۋا ئۇلارنى ئۆز مەقسەتلىرىنى ئەمەلگە ئاشۇرۇشتا ئىشلىتەلەيدۇ. ئۇ ئۇلارنى چەتكە قاقمايدۇ. ياشلار يەھۋانىڭ يەھوياداھقا قانداق مۇئامىلە قىلغانلىقىغا دىققەت قىلىپ، ساداقەتمەن ياشانغانلارغا، بولۇپمۇ ئۇزۇن يىل ساداقەتمەنلىك بىلەن يەھۋاغا خىزمەت قىلغانلارغا ھۆرمەت ۋە ۋاپادارلىق كۆرسىتەلەيدۇ. (پەند. نە 16:31). خۇلاسە قىلساق، ھەممىمىز يەھوياداھنى قوللىغان يېتەكچىلەر ۋە لاۋىيلاردىن ئۈلگە ئالالايمىز. ئۇنداقتا، يېتەكچىلىكنى ئۆز ئۈستىگە ئالغانلارغا بويسۇنۇش ئارقىلىق، ساداقەتمەنلىك بىلەن ئۇلارنى قوللاپ-قۇۋۋەتلەيلى.—ئىبرانىي. 13:17.
پادىشاھ يەھوئاشقا ئوخشاپ قالماڭ
16. نېمە يەھوئاشنىڭ رەزىل پادىشاھ بولغانلىقىنى كۆرسىتىدۇ؟
16 يەھوياداھ، پادىشاھ يەھوئاشنىڭ ياخشى ئادەم بولۇشىغا ياردەم بەرگەن (2-پادىشاھ. 12:2). نەتىجىدە، پادىشاھ ياش ۋاقتىدا يەھۋانى مەمنۇن قىلماقچى بولغان. بىراق، يەھوياداھ ئۆلگەندىن كېيىن، يەھوئاش ھەقىقەتتىن چەتنىگەن شاھزادىلەرنىڭ سۆزىگە قۇلاق سالغان. ئاقىۋىتى قانداق بولغان؟ ئۇ ۋە ئۇنىڭ پۇقرالىرى ئىلاھلارغا ئۈچۈن تىكلەنگەن تۈۋرۈكلەرگە ۋە بۇتلارغا چوقۇنۇشقا باشلىغان (2-تارىخ. 24:4، 17، 18). گەرچە يەھۋا بۇنىڭدىن قاتتىق رەنجىگەن بولسىمۇ، ئۇ ئۇلارنى يولىدىن قايتۇرۇش ئۈچۈن پەيغەمبەرلەرنى ئەۋەتىپ تۇرغان ئىدى. ئەمما، ئۇلار قۇلاق سېلىشنى رەت قىلغان. ئۇلار يەھوياداھنىڭ ئوغلى زەكەرىيانىڭ سۆزىنىمۇ ئاڭلىمىغان، ئۇ يەھۋانىڭ پەيغەمبىرى ۋە روھانىي بولۇپلا قالماي، يەھوئاشنىڭ نەۋرە تۇغقىنى ئىدى. ئۇ ئەسلىدە زەكەرىيانىڭ ئائىلىسىدىكىلەرنىڭ ئۆزى ئۈچۈن قىلغان ياخشىلىقلىرىغا مىننەتدار بولۇشى كېرەك ئىدى، ئەكسىچە زەكەرىيانى ئۆلتۈرۈۋەتكەن.—2-تارىخ. 22:11؛ 24:19–22.
17. يەھوئاشنىڭ ئاقىۋىتى قانداق بولغان؟
17 يەھوئاش داۋاملىق يەھۋادىن ئەيمىنىپ ياشاشنى خالىمىغاچ، يامان ئاقىۋەتكە قالغان. يەھۋا شۇنداق دېگەن: «مېنى مەنسىتمىگەنلەرنى، مەنمۇ شەرمەندە قىلىمەن» (1-سام. 2:30). كېيىن، سۈرىيەنىڭ كىچىك بىر قوشۇنى يەھوئاشنىڭ ناھايىتى چوڭ قوشۇنىنى مەغلۇپ قىلىپ، ئۇنى ئېغىر يارىلاندۇرغان. سۈرىيەلىكلەر كەتكەندىن كېيىن، يەھوئاش زەكەرىيانى ئۆلتۈرگەنلىكى ئۈچۈن ئۆز خىزمەتچىلىرى تەرىپىدىن ئۆلتۈرۈلگەن. كىشىلەر ئۇنى ئىنتايىن رەزىل پادىشاھ دەپ قارىغاچ، ھەتتا ئۇنى پادىشاھلارنىڭ ئارىسىغا دەپنە قىلمىغان.—2-تارىخ. 24:23–25.
18. يەرەمىيا 17:7، 8-ئايەتلەرگە ئاساسلانغاندا، يەھوئاشقا ئوخشاپ قېلىشتىن قانداق ساقلىنالايمىز؟
18 پادىشاھ يەھوئاشنىڭ مىسالىدىن قانداق ساۋاق ئالالايمىز؟ ئۇ يېنىدا تىرەپ تۇرىدىغان تىرەك ياغاچقا تايىنىدىغان يىلتىزى تېيىز دەرەخقە ئوخشاش بولغان. يېنىدا تىرەك ياغاچ يەھوياداھ يوق بولغاندا، ھەقىقەتتىن يۈز ئۆرگۈزىدىغان شامال چىققاندا، يەھوئاش يىلتىزىدىن قومۇرۇپ، يەھۋاغا ساداقەتسىزلىك قىلغان. بۇ مىسال بىزگە شۇنى ئېنىق كۆرسىتىپ بېرىدۇكى، يەھۋادىن ئەيمىنىشىمىز ھەرگىزمۇ ئائىلە ئەزالىرىمىز ياكى جامائەتتە باشقىلارنىڭ بىز ئۈچۈن ياخشى ئۈلگە قالدۇرۇشىغا باغلىق ئەمەس. بىز خۇدا بىلەن يېقىن مۇناسىۋەتتە بولۇش ئۈچۈن، چوقۇم ئۇنىڭغا بولغان سۆيگۈ-مۇھەببىتىمىزنى ۋە ھۆرمىتىمىزنى تېخىمۇ كۈچەيتىشىمىز، دائىم تەتقىق قىلىپ ئۆگىنىش، چوڭقۇر ئويلىنىش ۋە دۇئا قىلىش ئارقىلىق ئەيمىنىش ئىچىدە خۇداغا سادىق قېلىشىمىز كېرەك.—يەرەمىيا 17:7، 8-نى ئوقۇڭ؛ كولوسى. 2:6، 7.
19. يەھۋا بىزدىن نېمىنى تەلەپ قىلىدۇ؟
19 يەھۋا بىزدىن كۆپ نەرسىنى تەلەپ قىلمايدۇ. ۋەز 12:13-ئايەتتە ئۇنىڭ بىزدىن نېمە تەلەپ قىلىدىغانلىقى خۇلاسە قىلىنغان: «ھەق خۇدادىن قورققىن ۋە ئۇنىڭ بۇيرۇقلىرىغا ئەمەل قىلغىن. چۈنكى، ئىنساننىڭ بارچە مەجبۇرىيىتى بۇدۇر». بىز خۇدادىن قورقساق، كەلگۈسىدە قانداق سىناقلارغا دۇچ كەلمەيلى، ئوبادىيا ۋە يەھوياداھقا ئوخشاش ساداقەتمەنلىكىمىزدە چىڭ تۇرالايمىز. ھېچقانداق نەرسە يەھۋا بىلەن بولغان دوستلىقىمىزغا زىيان يەتكۈزەلمەيدۇ.
152-ناخشا كۈچىمىز، ئۈمىدىمىز ۋە يار-يۆلىگىمىز
a مۇقەددەس كىتابتا ئىشلىتىلگەن «ئەيمىنىش» سۆزى كەڭ مەنىدە ئىشلىتىلىدىغان سۆزدۇر. مەزمۇنغا ئاساسەن يەنە ئەيمىنىش سۆزىنى قورقۇش، ھېيىقىش ياكى ھۆرمەت كۆرسىتىش دېگەن مەنىدىمۇ قوللىنىشقا بولىدۇ. بۇ ماقالە بىزنىڭ خۇدادىن ئەيمىنىشنى ئۆگىنىشىمىزگە ياردەم بېرىدۇ. شۇنداق ئەيمىنىش بىزنى جاسارەت ۋە سادىقلىق بىلەن ئاسماندىكى ئاتىمىزغا خىزمەت قىلىشقا دەۋەت قىلىدۇ.
b بۇ ئوبادىيا، نەچچە ئەسىرلەردىن كېيىن ياشىغان، مۇقەددەس يازمىلارنىڭ ئوبادىيا دېگەن كىتابىنى يازغان ئوبادىيا ئىسىملىك پەيغەمبەر ئەمەس.
c سۈرەتلەردە: بۇ سەھنىلەشتۈرۈلگەن كۆرۈنۈشتە، بىر بۇرادەر ئىش-پائالىيىتىمىز چەكلەنگەن مەزگىلدە روھىي ئوزۇقلۇقلارنى يەتكۈزۈپ بېرىۋاتىدۇ.
d سۈرەتلەردە: بىر ياش قېرىنداش ياشتا چوڭ قېرىنداشتىن تېلېفوندا گۇۋاھلىق بېرىشنى ئۆگىنىۋاتىدۇ؛ يېشى چوڭراق بۇرادەر ئاممىۋىي ئورۇنلاردا جاسارەت بىلەن گۇۋاھلىق بېرىشتە ئۈلگە بولۇۋاتىدۇ؛ تەجرىبىلىك بۇرادەر باشقىلارغا ئىبادەت يىغىلىشى زالىنى قانداق ئاسراشنى ئۆگىتىۋاتىدۇ.
