30-تەتقىق ماقالىسى
سۆيگۈ-مۇھەببىتىڭىزنى داۋاملىق كۈچەيتىڭ
«ھەممە نەرسىدە مۇھەببەت بىلەن ئۆسۈپ يېتىلەيلى»—ئەفەس. 4:15.
138-ناخشا يەھۋا — سېنىڭ ئىسىمىڭ
بۇ ماقالىدە a
1. مۇقەددەس كىتابنى تەتقىق قىلىشقا باشلىغاندا، قايسى ھەقىقەتلەرنى ئۆگەندىڭىز؟
مۇقەددەس كىتابنى تەتقىق قىلىپ ئۆگىنىشنى باشلىغان ۋاقىتىڭىز ئېسىڭىزدىمۇ؟ خۇدانىڭ ئىسىمى بارلىقىنى بىلگىنىڭىزدە، ھەيران قالغان بولۇشىڭىز مۇمكىن. بەلكىم، سىز خۇدانىڭ كىشىلەرنى دوزاخ ئوتىدا ئازابلىمايدىغانلىقىنى بىلگىنىڭىزدە، كۆڭلىڭىز ئورنىغا چۈشكەن. ئۆلۈپ كەتكەن يېقىنلىرىڭىزنى قايتا كۆرۈش ۋە ئۇلار بىلەن يەر يۈزى جەننەتتە ياشاش ئۈمىدى ھەققىدە ئۆگەنگىنىڭىزدە، ئىنتايىن ھاياجانلانغان.
2. مۇقەددەس كىتابتىكى ھەقىقەتلەرنى ئۆگەنگەندىن كېيىن يەنە قانداق ئىلگىرىلەشلەرنى قىلدىڭىز؟ (ئەفەسلىكلەر 5:1، 2)
2 خۇدانىڭ سۆزىنى قانچە كۆپ تەتقىق قىلغانسېرى، يەھۋاغا بولغان سۆيگۈ-مۇھەببىتىڭىز شۇنچە چوڭقۇرلاشتى. ئاشۇ مۇھەببەت سىزنى ئۆگەنگەنلىرىڭىزنى ھاياتىڭىزدا ئەمەلىي قوللىنىشقا دەۋەت قىلدى. سىز مۇقەددەس كىتاب پرىنسىپلىرىغا ئاساسەن تېخىمۇ ياخشىراق قارارلارنى چىقاردىڭىز. خۇدانى خۇرسەن قىلىشنى خالىغاچقا، كۆز قاراشلىرىڭىز ۋە ئىش-ھەرىكەتلىرىڭىزنى ئۆزگەرتتىڭىز. خۇددى بىر بالا ئۆزىنىڭ كۆيۈمچان ئاتا-ئانىسىنى ئۈلگە قىلغانغا ئوخشاش، سىزمۇ ئاسماندىكى ئاتىمىزنى ئۈلگە قىلىشقا باشلىدىڭىز.—ئەفەسلىكلەر 5:1، 2-نى ئوقۇڭ.
3. ئۆز-ئۆزىمىزدىن قانداق سوئاللارنى سوراپ كۆرسەك بولىدۇ؟
3 ئۆز-ئۆزىمىزدىن مۇنداق سوراپ كۆرسەك بولىدۇ: «مېنىڭ يەھۋاغا بولغان مۇھەببىتىم دەسلەپتە مەسىھ ئەگەشكۈچىسى بولغان ۋاقىتتىكىگە قارىغاندا كۈچلۈكمۇ؟ مەن سۇغا چۆمۈلدۈرۈلگەندىن بۇيان، ئوي-پىكىرىم ۋە يۈرۈش-تۇرۇشلىرىمدا، بولۇپمۇ قېرىنداشلىرىمغا سۆيگۈ-مۇھەببەت كۆرسىتىشتە يەھۋانى ئۈلگە قىلىمەنمۇ؟» ئەگەر دەسلەپكى مۇھەببىتىڭىز مەلۇم دەرىجىدە سوۋۇپ كەتكەن بولسا، ئۇنىڭدىن ئۈمىدسىزلەنمەڭ. شۇنداق ئىشلار بىرىنچى ئەسىردىكى مەسىھ ئەگەشكۈچىلىرىدىمۇ يۈز بەرگەن. ئەيسا ئۇلاردىن ۋاز كەچمىگەن ئىدى. ئۇ بىزدىنمۇ ۋاز كەچمەيدۇ (ۋەھىي. 2:4، 7). ئۇ شۇنى بىلىدۇكى، بىز ھەقىقەتنى تۇنجى قېتىم ئۆگەنگەن چاغدىكى سۆيگۈ-مۇھەببەتنى قايتىدىن ھېس قىلىشنى ئۆگىنەلەيمىز.
4. بۇ ماقالىدە نېمىنى مۇھاكىمە قىلىمىز؟
4 بۇ ماقالىدە، يەھۋاغا ۋە باشقىلارغا بولغان مۇھەببىتىمىزنى قانداق قىلىپ داۋاملىق كۈچەيتەلەيدىغانلىقىمىزنى مۇھاكىمە قىلىمىز. ئاندىن كېيىن، سۆيگۈ-مۇھەببىتىمىزنى كۈچـەيتسـەك، قانـداق بـەزى بەرىكەتـلەرگە ئېرىشىدىغانلىقىمىزنى ئۆگىنىمىز.
يەھۋاغا بولغان مۇھەببىتىڭىزنى كۈچەيتىڭ
5، 6. ئەلچى پاۋلۇس ۋەز خىزمىتىدە قانداق قارشىلىقلارغا دۇچ كەلگەن ۋە نېمە ئۇنى داۋاملىق يەھۋاغا خىزمەت قىلىشقا دەۋەت قىلغان؟
5 ئەلچى پاۋلۇس يەھۋاغا خىزمەت قىلىپ ھاياتىدا قانائەت تاپقان. ئەمما، ئۇنىڭ نۇرغۇن قىيىنچىلىقلارنى يېڭىشىگە توغرا كەلگەن. پاۋلۇس دائىم ئۇزۇن سەپەرگە چىققان ۋە ئاشۇ زامانلاردا سەپەر قىلىش ئاسان ئەمەس ئىدى. ئۇ سەپەرلىرىدە، بەزىدە «دەريالاردا خەتەرلەرگە، بۇلاڭچىلارغا ئۇچراپ خەتەرلەرگە» دۇچ كەلگەن. ئۇ يەنە ئارىلاپ-ئارىلاپ قارشى تۇرغۇچىلارنىڭ ئۇرۇپ-سوقۇشىغا ئۇچرىغان (2-كورىنت. 11:23–27). ئېتىقادچى قېرىنداشلار، پاۋلۇسنىڭ ئۇلارغا ياردەم بېرىش ئۈچۈن كۆرسەتكەن سەمىمىي تىرىشچانلىقلىرىغا ھەردائىم مىننەتدارلىق بىلدۈرمىگەن ئىدى.—2-كورىنت. 10:10؛ فىلىپى. 4:15.
6 پاۋلۇسنىڭ داۋاملىق يەھۋاغا خىزمەت قىلىشىغا نېمە ياردەم قىلغان؟ ئۇ يەھۋانىڭ پەزىلەتلىرى ھەققىدە مۇقەددەس يازمىلاردىن ۋە ئۆز كەچۈرمىشلىرىدىن نۇرغۇن نەرسىلەرنى ئۆگەنگەن. پاۋلۇس ئۆزىنى يەھۋا خۇدانىڭ ياخشى كۆرىدىغانلىقىغا ئىشەنگەن (رىملىقلار 8:38، 39؛ ئەفەس. 2:4، 5). ئۇنىڭمۇ يەھۋاغا بولغان مۇھەببىتى ئىنتايىن كۈچەيگەن. پاۋلۇس داۋاملىق «مۇقەددەس كىشىلەرگە خىزمەت قىلىپ»، ئۆزىنىڭ يەھۋاغا بولغان سۆيگۈسىنى كۆرسەتكەن.—ئىبرانىي. 6:10.
7. يەھۋاغا بولغان سۆيگۈ-مۇھەببىتىمىزنى كۈچەيتىشنىڭ بىر يولى قايسى؟
7 بىز ئەستايىدىللىق بىلەن خۇدا سۆزىنى تەتقىق قىلىپ ئۆگىنىش ئارقىلىق، ئۇنىڭغا بولغان سۆيگۈمىزنى كۈچەيتەلەيمىز. مۇقەددەس كىتابنى ئوقۇغىنىڭىزدا، ھەر بىر بۆلەك مەزمۇننىڭ يەھۋا ھەققىدە نېمىلەرنى ئاشكارا قىلىدىغانلىقىنى چۈشىنىشكە تىرىشىڭ. ئۆزىڭىزدىن شۇنداق سوراپ كۆرۈڭ: «بۇ ئۈزۈندە، يەھۋانىڭ ماڭا بولغان مۇھەببىتىنى قانداق كۆرسىتىپ بېرىدۇ؟ ماڭا يەھۋانى سۆيۈش ئۈچۈن قانداق سەۋەبلەر بارلىقىنى كۆرسىتىپ بېرىدۇ؟»
8. دۇئا خۇداغا بولغان سۆيگۈ-مۇھەببىتىمىزنىڭ كۈچىيىشىگە قانداق ياردەم بېرەلەيدۇ؟
8 يەھۋاغا بولغان سۆيگۈ-مۇھەببىتىمىزنى كۈچەيتىشنىڭ يەنە بىر ئۇسۇلى — دائىم دۇئادا ئۇنىڭغا ئىچ باغرىمىزنى تۆكۈپ بېرىش (زەبۇر 25:4، 5). يەھۋا بىزنىڭ دۇئالىرىمىزغا جاۋاب قايتۇرىدۇ (1-يۇھاننا 3:21، 22). ئاسىيادا ياشايدىغان بىر خانقىز ئىسىملىك قېرىنداش مۇنداق دەيدۇ: «مېنىڭ يەھۋاغا بولغان سۆيگۈ-مۇھەببىتىم دەسلەپتە ئۆگەنگەن بىلىمگە ئاساسلانغان ئىدى. كېيىنچە، مەن ئۇنىڭ دۇئالىرىمغا قانداق جاۋاب قايتۇرغانلىقىنى كۆرگەندە، ئۇنىڭغا بولغان سۆيگۈ-مۇھەببىتىم تېخىمۇ كۈچەيدى. بۇ مېنىڭ ئۇنى خۇرسەن قىلىدىغان ئىشلارنى قىلىش ئارزۇ-ئىستىكىمنى ئاشۇردى» b.
باشقىلارغا بولغان مۇھەببىتىڭىزنى كۈچەيتىڭ
9. تىموتىي ئۆزىنىڭ سۆيگۈ-مۇھەببەت كۆرسىتىشتە ئىلگىرىلەۋاتقانلىقىنى قانداق كۆرسەتكەن؟
9 مەسىھ ئەگەشكۈچىسى بولۇپ بىرقانچە يىلدىن كېيىن، پاۋلۇس تىموتىي ئىسىملىك ياش يىگىت بىلەن تونۇشقان. تىموتىي يەھۋا خۇدانى ۋە ئىنسانلارنى ياخشى كۆرەتتى. پاۋلۇس فىلىپىلىكلەر شۇنداق دېگەن: «يېنىمدا ھال-ئەھۋالىڭلارغا ئۇنىڭدەك چىن قەلبىدىن كۆڭۈل بۆلىدىغان باشقا بىرى يوق» (فىلىپى. 2:20). مۇشۇ يەردە پاۋلۇس تىموتىينىڭ تەشكىللەش ياكى ئاممىۋىي نۇتۇق ئېيتىش قابىلىيەتلىرى ھەققىدە سۆز قىلمىغان. ئەكسىچە، پاۋلۇس تىموتىينىڭ قېرىنداشلىرىغا بولغان سۆيگۈسىدىن ئىنتايىن تەسىرلەنگەن. شەك-شۈبھىسىزكى، تىموتىي زىيارەت قىلغان جامائەتتىكى قېرىنداشلار ئۇنىڭ كېلىشىنى تەقەززالىق بىلەن كۈتكەن.—1-كورىنت. 4:17.
10. ئاننا ۋە يولدىشى ئېتىقادچى قېرىنداشلىرىغا بولغان سۆيگۈ-مۇھەببىتىنى قانداق ئىپادىلىگەن؟
10 بىزمۇ ئېتىقادچى قېرىنداشلىرىمىزغا ياردەم بېرىشنىڭ يوللىرىنى ئىزدەيمىز (ئىبرانىي. 13:16). ئالدىنقى ماقالىدە تىلغا ئېلىپ ئۆتكەن ئاننانىڭ كەچۈرمىشلىرىنى ئەسلەپ كۆرەيلى. كۈچلۈك قارا بوراندىن كېيىن ئۇ ۋە يولدىشى بىر گۇۋاھچىنىڭ ئائىلىسىنى يوقلاپ بارغان ۋە ئۇلارنىڭ ئۆيىنىڭ ئۆگزىسى كۈچلۈك بوران-چاپقۇندا ۋەيران بولغانلىقىنى كۆرگەن. بۇ ئائىلىدىكى كىشىلەرنىڭ پاكىز كىيىملىرى قالمىغان ئىدى. ئاننا مۇنداق دەيدۇ: «ئۇلارنىڭ كىيىملىرىنى ئېلىپ بېرىپ يۇيدۇق، دەزماللاپ، چىرايلىق قاتلاپ، ئۇلارغا قايتۇرۇپ بەردۇق. بۇ بىز ئۈچۈن قىيىن ئىش ئەمەس ئىدى. شۇنداق قىلغاچ، ئۇلار بىلەن يېقىن دوست بولۇپ كەتتۇق. دوستلىقىمىز ھازىرغىچە داۋام قىلىۋاتىدۇ». ئاننا ۋە يولدىشىنىڭ قېرىنداشلارغا بولغان سۆيگۈ-مۇھەببىتى ئۇلارنى ئەمەلىي ياردەم بېرىشكە ئۈندىگەن.—1-يۇھاننا 3:17، 18.
11. (1) سۆيگۈ-مۇھەببەت كۆرسىتىش ئۈچۈن كۆرسەتكەن تىرىشچانلىقىمىز باشقىلارغا قانداق تەسىر قىلىشى مۇمكىن؟ (2) پەندى-نەسىھەت 19:17-ئايەتكە ئاساسلانغاندا، سۆيگۈ-مۇھەببەت كۆرسەتسەك، يەھۋا قانداق جاۋاب قايتۇرىدۇ؟
11 ئەگەر باشقىلارغا سۆيگۈ-مۇھەببەت ۋە مېھرىبانلىق بىلەن مۇئامىلە قىلسىڭىز، ئۇلار سىزنىڭ يەھۋانى ئۈلگە قىلىشقا تىرىشىۋاتقانلىقىڭىزنى كۆرەلەيدۇ. ئۇلار مېھرىبانلىقىمىز ئۈچۈن مىننەتدار بولغانلىقىنى بىز بىلمەسلىكىمىز مۇمكىن. يۇقىرىدا تىلغا ئېلىنغان خانقىز ئۇنىڭغا ياردەم قىلغانلارنى ئەسلىگەندە كۆڭلى سۆيىنىدۇ. ئۇ مۇنداق دەيدۇ: «مېنى ۋەز خىزمەتكە بىرگە ئېلىپ چىققان كۆيۈمچان قېرىنداشلار ئۈچۈن بەكمۇ مىننەتدارمەن. ئۇلار مېنى ماشىنىسىغا ئېلىۋالاتتى. چاي ئىچىشكە ياكى تاماققا تەكلىپ قىلاتتى ۋە ئۆيۈمگە بىخەتەر ئەكېلىپ قوياتتى. ھازىر شۇنى تونۇپ يەتتىمكى، ئۇلار مەن ئۈچۈن كۆپ ئىشلارنى قىلغان. مەن ئۇلارنى سۆيگۈ-مۇھەببىتىنى ھېس قىلدىم». ئەلۋەتتە، ھەممىلا كىشى بىزنىڭ ئۇلارغا ئۈچۈن قىلغان ئىشلىرىمىزغا رەھمەت ئېيتماسلىقى مۇمكىن. خانقىز ئۆزىگە ياردەم بەرگەنلەر ھەققىدە مۇنداق دەيدۇ: «گەرچە ئۇلارنىڭ ماڭا قىلغان بارچە ياخشىلىقلىرى ئۈچۈن جاۋاب قايتۇرۇشنى خالىساممۇ، ئۇلارنىڭ قەيەردە تۇرىدىغانلىقىنى بىلمەيمەن. بىراق، يەھۋا ئۇلارنىڭ ياخشىلىقلىرىغا جاۋاب قايتۇرىدۇ. يەھۋا مەن ئۈچۈن ئۇلارغا جاۋاب قايتۇرۇشى توغرۇلۇق دۇئا قىلىمەن». خانقىزنىڭ ئېيتقانلىرى ھەقىقەتەن توغرا. يەھۋا باشقىلارغا قىلغان كىچىككىنە ياخشىلىقىمىزغا ھەم دىققەت قىلىدۇ. ئۇ ئۇنى قىممەتلىك قۇربانلىق سۈپىتىدە كۆرىدۇ ۋە ئۆزىنىڭ قايتۇرۇشقا تېگىشلىك قەرزى دەپ قارايدۇ.—پەندى-نەسىھەت 19:17-نى ئوقۇڭ.
بىر كىشى يەھۋاغا خىزمەت قىلىشتا ئالغا ئىلگىرىلىسە، باشقىلارغا ياردەم بېرىشنىڭ يوللىرىنى ئىزدەيدۇ (12-ئابزاسقا قاراڭ)
12. بۇرادەرلەر جامائەتكە بولغان سۆيگۈ-مۇھەببىتىنى قانداق كۆرسىتەلەيدۇ؟ (رەسىملەرگە ھەم قاراڭ)
12 ئەگەر سىز بۇرادەر بولسىڭىز، باشقىلارغا سۆيگۈ-مۇھەببەت كۆرسىتىپ، ئۇلارغا ياردەم قولۇڭىزنى سۇنۇش ئۈچۈن نېمە قىلالايسىز؟ جوردان ئىسىملىك بۇرادەر بىر ئاقساقالدىن ئۆزىنىڭ جامائەتكە تېخىمۇ كۆپرەك ياردەم بېرىش ئۈچۈن نېمە قىلالايدىغانلىقىنى سورىغان. ئاقساقال ئۇنىڭ ئاللىقاچان ئىلگىرىلەشلەرنى قىلغانلىقىنى ماختىغان. ئاندىن، قانداق قىلىپ تېخىمۇ كۆپ ئىشلارنى قىلالايدىغانلىقى توغرىسىدا ئۇنىڭغا مەسلىھەت بەرگەن. مەسىلەن، ئۇ جوردانغا ئىبادەت يىغىلىشىغا بالدۇرراق كېلىپ باشقىلارغا سالام بېرىش، يىغىلىشلارغا قاتنىشىش، دائىم ئۆز توپىدىكىلەر بىلەن ۋەز خىزمەتكە چىقىش ۋە باشقىلارغا ئەمەلىي ياردەم بېرىشنىڭ يوللىرىنى ئىزدەشنى تەۋسىيە قىلغان. جوردان شۇ مەسلىھەتنى ئەمەلىي قوللىنىپ، يېڭى ماھارەتلەرنى ئۆگەنگەندىن باشقا، ئۇنىڭ قېرىنداشلىرىغا بولغان مېھىر-مۇھەببىتى كۈچەيگەن. جوردان شۇنى ئېنىق چۈشەنگەنكى، باشقىلارغا ياردەم بېرىشنى بىر بۇرادەر ياردەمچى خىزمەتچى بولغاندا باشلىمايدۇ، ئەكسىچە داۋاملاشتۇرىدۇ.—1-تىموت. 3:8–10، 13.
13. سۆيگۈ-مۇھەببەت كرىستىئان ئىسىملىك بۇرادەرنى قايتا ئاقساقال بولۇپ خىزمەت قىلىشقا قانداق دەۋەت قىلغان؟
13 ئىلگىرى ياردەمچى خىزمەتچى ياكى ئاقساقال بولۇپ خىزمەت قىلغان بولسىڭىزچۇ؟ يەھۋا ھەرگىز ئۆتمۈشتە قىلغان ئىشلىرىڭىزنى ۋە شۇنداق قىلىشقا سىزنى دەۋەت قىلغان سۆيگىڭىزنى ئۇنتۇمايدۇ (1-كورىنت. 15:58). ئۇ سىزنىڭ داۋاملىق كۆرسىتىۋاتقان سۆيگۈ-مۇھەببىتىڭىزنى كۆرۈپ تۇرىدۇ. كرىستىئان ئىسىملىك بۇرادەر ئاقساقال بولۇش ۋەزىپىسىدىن ئېلىنغاندا، بەكمۇ ئۈمىدسىزلەنگەن. بىراق، ئۇ مۇنداق دەيدۇ: «مەيلى ئاقساقال بولاي ياكى بولماي، يەھۋاغا پۈتۈن كۈچۈم بىلەن قولۇمدىن كېلىشىچە خىزمەت قىلىشنى قارار قىلدىم». ۋاقتى كەلگەندە، كرىستىئان قايتا ئاقساقال بولۇپ تەيىنلەنگەن. ئۇ شۇنى ئېتىراپ قىلغان: «مەن بۇ ۋەزىپىگە قايتا تەيىنلەنگەندە، بىر ئاز ئەنسىرىدىم. بىراق، ئەگەر يەھۋا مېھىر-شەپقەت كۆرسىتىپ، مېنى قايتا ئاقساقال بولۇپ خىزمەت قىلىشقا تەيىنلىگەن بولسا، ئۇنىڭغا بولغان قېرىنداشلىرىمغا بولغان سۆيگۈ-مۇھەببىتىم سەۋەبلىك، بۇ ۋەزىپىنى ئۈستۈمگە ئېلىشنى قەتئىي قارا قىلدىم».
14. گرۇزىيەدە ياشايدىغان قېرىنداشنىڭ سۆزلىرىدىن نېمىنى ئۆگەندىڭىز؟
14 يەھـۋانىڭ خىزمەتـچىلىرى يەنـە باشـقىلارغا سۆيگۈ-مۇھەببەت كۆرسىتىدۇ (مەتتا 22:37–39). مەسىلەن، گرۇزىيەدە ياشايدىغان ئېلېنا ئىسىملىك بىر قېرىنداش مۇنداق دەيدۇ: «يەھۋاغا بولغان مۇھەببىتىم مېنى ۋەز قىلىشقا ئۈندىگەن ئىدى. ئەمما، ئاسماندىكى ئاتامغا بولغان مۇھەببىتىم چوڭقۇرلاشقانسېرى، ئىنسانلارغا بولغان سۆيگۈ-مۇھەببىتىممۇ كۈچەيدى. مەن ئۇلارنىڭ قانداق قىيىنچىلىقلارغا دۇچ كەلگەنلىكى ۋە قايسى ماۋزۇ ئۇلارنىڭ قەلبىگە تەسىر قىلىدىغانلىقى ھەققىدە تەسەۋۋۇر قىلىشقا تىرىشتىم. مۇشۇ ئۇسۇلدا، ئۇلار ھەققىدە قانچە كۆپ ئويلانغانسېرى، مېنىڭ ئۇلارغا ياردەم بېرىش ئىستىكىم شۇنچە كۈچەيدى».—رىملىقلار 10:13–15.
باشقىلارغا سۆيگۈ-مۇھەببەت كۆرسەتسەك، يەھۋا بىزنى مۇكاپاتلايدۇ
سۆيگۈ-مۇھەببەت كۆرسىتىش ئۈچۈن قىلغان ھەر بىر ئىش باشقا كۆپلىگەن كىشىلەرگە بەرىكەت ئېلىپ كېلەلەيدۇ (15، 16-ئابزاسلارغا قاراڭ)
15، 16. سەھنىلەشتۈرۈلگەن كۆرۈنۈشتە تەسۋىرلەنگەندەك، باشقىلارغا مېھىر-مۇھەببەت كۆرسىتىش قانداق بەرىكەتلەرگە ئېرىشتۈرىدۇ؟
15 قېرىنداشلىرىمىزغا سۆيگۈ-مۇھەببىتىمىزنى ئىپادىلىگەندە، بۇنىڭ پايدىسىنى پەقەتلا ئۇلار ئەمەس، باشقىلارمۇ كۆرىدۇ. 19-COVID ۋابا كېسىلى باشلىغاندىن كېيىن، پاۋلو ئىسىملىك بىر بۇرادەر ۋە ئۇنىڭ ئايالى كۆپلىگەن ياشانغان قېرىنداشلارغا ۋەز قىلىش ئۈچۈن ئېلېكترونلۇق ئۈسكىنىلەرنى قانداق ئىشلىتىشنى ئۆگەتكەن. بىر قېرىنداشقا ئىشلىتىشنى ئۆگىنىش دەسلەپتە تەسكە توختىغان بولسىمۇ، ئاخىرىدا ئۆگىنىۋالغان. ئۇ بۇنى ئىشلىتىپ، تۇغقانلىرىنى مەسىھنى خاتىرىلەش يىغىلىشىغا تەكلىپ قىلغان. ئۇ ۋە ئۇرۇق-تۇغقانلىرىدىن 60 كىشى ۋىدىئولۇق ئۇلىنىش ئارقىلىق شۇ يىغىلىشقا قاتناشقان. شۇ قېرىنداش ۋە ئۇرۇق-تۇغقانلىرى پاۋلو ۋە ئايالنىڭ كۆرسەتكەن تىرىشچانلىقىنىڭ پايدىسىنى كۆرگەن. كېيىنرەك، شۇ قېرىنداش پاۋلوغا مۇنداق يازغان: «بىزگە ئوخشاش ياشانغانلارغا ئۆگەتكىنىڭلار ئۈچۈن ساڭا كۆپ رەھمەت. مەن يەھۋانىڭ غەمخورلۇقى ۋە سىلەرنىڭ بەل قويۋەتمەي كۆرسەتكەن تىرىشچانلىقىڭلارنى ھەرگىز ئۇنتۇپ قالمايمەن».
16 مۇشۇنىڭغا ئوخشاش ئىش-ۋەقەلەر پاۋلوغا مۇھىم بىر نەرسىنى ئۆگەتكەن. ئۇ دائىم ئۆزىگە شۇنى ئەسلىتىپ تۇرغان، يەنى بىلىم ياكى تەبىئىي قابىلىيەتلەردىن سۆيگۈ-مۇھەببەت مۇھىمراق! ئۇ ئەسلەپ مۇنداق دەيدۇ: «مەن ئىلگىرى رايونغا مەسئۇل ئاقساقال ئىدىم. بۈگۈن شۇنى تونۇپ يەتتىمكى، قېرىنداشلار مەن ئېيتقان نۇتۇقلارنى ئۇنتۇپ قالغان بولۇشى مۇمكىن. ئەمما، ئۇلار ئۈچۈن قىلغان ياخشى ئىشلارنى ئەسلىيەلەيدۇ».
17. بىز سۆيگۈ-مۇھەببەت كۆرسەتكەندە، يەنە كىملەر پايدىسىنى كۆرىدۇ؟
17 بىز باشقىلارغا سۆيگۈ-مۇھەببەت كۆرسەتكەندە، ئۆزىمىزمۇ ئويلىمىغان ئۇسۇلدا ئۇنىڭ پايدىسىنى كۆرىمىز. يېڭى زېلاندىيەدە ياشايدىغان يوناتان بۇنى ئۆز بېشىدىن ئۆتكۈزگەن. ھاۋا ئىسسىق بىر شەنبە كۈنى، ئۇ يول بويىدا بىر پىدائىي ۋەز ئېيتقۇچىنىڭ ۋەز قىلىۋاتقانلىقىنى كۆرگەن. يوناتان شەنبە كۈنلىرى چۈشتىن كېيىن ئاشۇ پىدائىي ۋەز ئېيتقۇچى بىلەن بىرگە خىزمەت قىلىشنى قارار قىلغان. ئۇ دەسلەپتە ئۆزىنىڭ قىلغان ياخشىلىقى قانداق پايدا-مەنپەئەت ئېلىپ كېلىدىغانلىقىنى بىلمىگەن ئىدى. يوناتان مۇنداق دەيدۇ: «شۇ ۋاقىتلاردا، مەن ۋەز خىزمەتنى ياخشى كۆرمەيتتىم. ئەمما، شۇ پىدائىي ۋەز ئېيتقۇچىنىڭ تەلىم بېرىش ئۇسۇلىنى ئاڭلاپ، خىزمىتىنىڭ ئۈنۈملۈك بولغانلىقىنى كۆردۈم. بۇ ۋەز خىزمەتكە بولغان كۈچلۈك قىزغىنلىقىمنى ئويغاتتى. مەن يەنە روھىي جەھەتتىن ئۆسۈپ-يېتىلىشىم، ۋەز خىزمەتتە خۇشاللىق تېپىشىم ۋە يەھۋا بىلەن يېقىنلىشىشىمغا ياردەم بېرىدىغان ياخشى دوستقا ئېرىشتىم».
18. يەھۋا ھەممىمىزنىڭ نېمە قىلىشىنى خالايدۇ؟
18 يەھۋا ھەممىمىزنىڭ ئۇنىڭغا ۋە باشقىلارغا بولغان سۆيگۈ-مۇھەببىتىنىڭ كۈچىيىشىنى خالايدۇ. ئۆگىنىپ ئۆتكىنىمىزدەك، ئۇنىڭ سۆزىنى ئوقۇش، ئوقۇغانلىرىمىز ئۈستىدە چوڭقۇر ئويلىنىش ۋە دائىم دۇئا قىلىپ، ئۇنىڭ بىلەن پاراڭلىشىش ئارقىلىق يەھۋاغا بولغان مۇھەببىتىمىزنى كۈچەيتەلەيمىز. بىز يەنە ئەمەلىي ئىش-ھەرىكەتلىرىمىز بىلەن قېرىنداشلىرىمىزغا بولغان مۇھەببىتىمىزنى كۈچەيتەلەيمىز. سۆيگۈ-مۇھەببىتىمىز كۈچەيگەنسېرى، يەھۋاغا ۋە قېرىنداشلىرىمىزغا تېخىمۇ يېقىنلىشىشىمىز. ئۇلار بىلەن بولغان دوستلۇقتىن مەڭگۈ ھۇزۇر ئالىمىز!
25-ناخشا ھەقىقىي شاگىرت بولۇشنىڭ بەلگىسى
a مەيلى ھەقىقەتكە تېخى يېڭىلا كەلگەن ياكى ئۇزۇن يىللاردىن بۇيان يەھۋاغا خىزمەت قىلىۋاتقان بولايلى، ھەممىمىز داۋاملىق ئالغا ئىلگىرىلىيەلەيمىز. ھازىر يەھۋاغا ۋە باشقىلارغا بولغان سۆيگۈ-مۇھەببىتىمىزنى كۈچەيتىش ۋە شۇنداق قىلىشنىڭ مۇھىم بىر يولى ھەققىدە مۇھاكىمە قىلىمىز. مۇشۇ ئۆگەنمەكچى بولغان مەزمۇنلار ئۈستىدە چوڭقۇر ئويلانغىنىڭىزدا، ئاللىقاچان قانداق ئىلگىرىلىگەنلىكىڭىزنى ۋە كېلەچەكتە قانداق ئىلگىرىلىمەكچى بولغانلىقىڭىز ئۈستىدە ئويلىنىپ كۆرۈڭ.
b بەزى ئىسىملار ئۆزگەرتىلگەن.
