31-تەتقىق ماقالىسى
«مەھكەم ۋە تەۋرەنمەي تۇرۇڭلار»
«ئەزىز قېرىنداشلىرىم، مەھكەم ۋە تەۋرەنمەي تۇرۇڭلار»—1-كورىنت. 15:58.
32-ناخشا تەۋرەنمەي چىڭ تۇرايلى!
بۇ ماقالىدە a
1، 2. قايسى مەنىدە مەسىھ ئەگەشكۈچىسىنى ئېگىز بىناغا ئوخشىتىشقا بولىدۇ؟ (1-كورىنتلىقلار 15:58)
1978-يىلى، ياپونىيەنىڭ توكيو شەھىرىدە 60 قەۋەتلىك ئېگىز بىر بىنا ئاستا-ئاستا ئاسمانغا كۆتۈرۈلدى. بىنانى كۆرگەنلەر دائىم يەر تەۋرەيدىغان بۇ شەھەردە شۇ بىنانىڭ قانداق مەھكەم تۇرۇشى ھەققىدە ئويلانغان. بىنانىڭ مەھكەم تۇرالىشىنىڭ سىرى بارمۇ؟ ئېنژىنىرلار بىنانى مۇستەھكەم، ئەمما يەر تەۋرەشكە بەرداشلىق بېرەلىگۈدەك ئەۋرىشىمچان ھالەتتە لاھىيىلىگەن. مەسىھ ئەگەشكۈچىلىرىنىمۇ ئاشۇ ئېگىز بىناغا ئوخشىتىشقا بولىدۇ. نېمە ئۈچۈن مۇنداق دەيمىز؟
2 مەسىھ ئەگەشكۈچىسى چوقۇم مەزمۇت، مەھكەم بولۇش بىلەن ئەۋرىشىمچان بولۇش ئوتتۇرىسىدىكى تەڭپۇڭلۇقنى ساقلىشى كېرەك. ئۇ يەھۋانىڭ قانۇنلىرى ۋە ئۆلچەملىرىگە ئەمەل قىلىشتا چوقۇم مەھكەم ۋە تەۋرەنمەس بولۇشى لازىم (1-كورىنتلىقلار 15:58-نى ئوقۇڭ). ئۇ «ئىتائەت قىلىشقا تەييار» ۋە مۇرەسسە قىلمايدىغان بولۇشى لازىم. يەنە بىر جەھەتتىن، ۋەزىيەت شۇنىڭغا يول قويسا ياكى تەلەپ قىلسا، ئۇ «غەرەز ئۇقىدىغان» ۋە ئەۋرىشىمچان بولۇشى كېرەك (ياقۇپ 3:17). شۇنداق تەڭپۇڭ كۆز قاراشنى ساقلاشنى ئۆگەنگەن مەسىھ ئەگەشكۈچىسى ھەددىدىن زىيادە قاتتىق قول ياكى ھەممە نەرسىگە پەرۋاسىزلىق قىلىشتىن ساقلىنىدۇ. بۇ ماقالىدە، قاچان چوقۇم تەۋرەنمەي مەھكەم تۇرۇشىمىز كېرەكلىكىنى مۇھاكىمە قىلىمىز. ئۇنىڭدىن باشقا، شەيتاننىڭ قايسى بەش خىل ئۇسۇلنى قوللىنىپ، مەھكەم تۇرۇش ئىرادىمىزنى ئاجىزلاشتۇرۇشقا ھەرىكەت قىلىدىغانلىقىنى ئۆگىنىمىز.
مەھكەم تۇرۇش ئۈچۈن نېمە قىلالايمىز؟
3. ئەلچىلەر 15:28، 29-ئايەتلەردە، ئەڭ ئالىي قانۇن چىقارغۇچى قايسى قانۇنلارنى تىلغا ئالغان؟
3 ئەڭ ئالىي قانۇن چىقارغۇچى سۈپىتىدە يەھۋا داۋاملىق تۈردە ئۆز خەلقىگە ناھايىتى ئېنىق قانۇنلارنى يەتكۈزگەن (يەشايا 33:22). مەسىلەن، بىرىنچى ئەسىردىكى يېتەكچى كېڭەش مەسىھ ئەگەشكۈچىلىرىگە ئۈچ ئىشتا مەھكەم تۇرۇشى لازىملىقىنى كۆرسىتىپ بەرگەن: (1) بۇتپەرەسلىكنى رەت قىلىش، (2) يەھۋانىڭ قاننى مۇقەددەس دەپ ھۆرمەتلەش بۇيرۇغىغا بويسۇنۇش، (3) مۇقەددەس كىتابنىڭ يۇقىرى ئەخلاقىي ئۆلچەملىرىگە ئەمەل قىلىش (ئەلچىلەر 15:28، 29-نى ئوقۇڭ). بۈگۈنكى كۈندە مەسىھ ئەگەشكۈچىلىرى بۇ ئۈچ ئىشتا مەھكەم تۇرالىشى ئۈچۈن نېمە قىلالايدۇ؟
4. پەقەتلا يەھۋاغا ئىبادەت قىلىش ئۈچۈن نېمە قىلىمىز؟ (ۋەھىيلەر 4:11)
4 بىز بۇتپەرەسلىكنى رەت قىلىپ، پەقەت يەھۋاغا ئىبادەت قىلىمىز. ئۇ ئىسرائىل خەلقىگە پەقەتلا ئۇنىڭغا ئىبادەت قىلىشنى بۇيرىغان ئىدى (تەكرار. قا 5:6–10). ئەيسا مەسىھمۇ شەيتاننىڭ ئازدۇرۇشىغا دۇچ كەلگەندە، چوقۇم يەھۋاغا ئىبادەت قىلىشىمىز كېرەكلىكىنى ئېنىق كۆرسەتكەن (مەتتا 4:8–10). شۇڭلاشقا، بىز بۇتلارغا چوقۇنمايمىز. دىنىي رەھبەرلەر، سىياسىي ھۆكۈمرانلار، تەنتەربىيە ياكى كىنو چولپانلىرى دېگەندەك ئىنسانلارنى خۇدالارغا ئوخشاش كۆرۈپ، ئۇلارغا چوقۇنمايمىز. پەقەت خۇدايىمىز يەھۋا تەرەپتە تۇرۇپ، ھەممە نەرسىلەرنىڭ ياراتقۇچىسى بولغان ئۇنىڭغىلا ئىبادەت قىلىمىز.—ۋەھىيلەر 4:11-نى ئوقۇڭ.
5. بىز نېمە ئۈچۈن يەھۋانىڭ ھايات ۋە قاننىڭ مۇقەددەسلىكى توغرىسىدىكى قانۇنغا بويسۇنىمىز؟
5 بىز ياراتقۇچى يەھۋا چۈشۈرگەن ھايات ۋە قاننىڭ مۇقەددەسلىكى توغرىسىدىكى قانۇنىغا بويسۇنىمىز. نېمە ئۈچۈن؟ چۈنكى، يەھۋانىڭ كۆزىدە، قان ھاياتقا ۋەكىللىك قىلىدۇ ۋە بۇ ئۇنىڭدىن كەلگەن قىممەتلىك سوۋغات (لاۋى. 17:14). يەھۋا تۇنجى قېتىم ئىنسانلارغا ھايۋانلارنىڭ گۆشىنى يېيىشكە رۇخسەت قىلغاندا، ئۇلارغا قاننى يېمەسلىكنى بۇيرىغان (يارىت. 9:4). مۇسا پەيغەمبەر ئارقىلىق ئىسرائىل خەلقىگە قانۇنلارنى چۈشەرگەندە، شۇ بۇيرۇقنى قايتا تەكرارلىغان (لاۋى. 17:10). خۇدا بىرىنچى ئەسىردىكى يېتەكچى كېڭەش ئارقىلىق مەسىھ ئەگەشكۈچىلىرىنى قاندىن ساقلىنىشقا بۇيرۇغان (ئەلچى. 15:28، 29). بىز تىببىي داۋالاشقا مۇناسىۋەتلىك قارارلارنى چىقارغاندا، بۇ بۇيرۇققا قەتئىي ئەمەل قىلىمىز b.
6. يەھۋانىڭ يۇقىرى ئەخلاق ئۆلچەملىرى بىلەن ياشاش ئۈچۈن قانداق تىرىشچانلىق كۆرسىتىمىز؟
6 بىز يەھۋانىڭ يۇقىرى ئەخلاقىي ئۆلچەملىرىگە قەتئىي ئەمەل قىلىمىز (ئىبرانىي. 13:4). جانلىق تىلنى ئىشلىتىپ، ئەلچى پاۋلۇس بىزگە تەننىڭ ئەزالىرىنى ئۆلتۈرۈش، يەنى تەننىڭ خاتا ئارزۇ-ھەۋەسلىرىنى يوق قىلىش ئۈچۈن مەسلىھەت بەرگەن. بىز جىنسىي ئەخلاقسىزلىق قىلىشقا باشلايدىغان ھەرقانداق ئىشلارنى قىلىشتىن ياكى كۆرۈشتىن ساقلىنىمىز (كولوسى. 3:5؛ ئايۇپ 31:1). ئېزىقتۇرۇشقا دۇچ كەلگەندە، خۇدا بىلەن بولغان دوستلىقىمىزغا زىيان يەتكۈزىدىغان ھەرقانداق ئوي-پىكىر ياكى ئىش-ھەرىكەتنى دەرھال رەت قىلىمىز.
7. قەتئىي ئىرادىلىك بولۇش ئۈچۈن نېمە قىلالايمىز ۋە نېمە ئۈچۈن؟
7 يەھۋا بىزنىڭ ئۇنىڭغا ‹چىن كۆڭلىمىزدىن ئىتائەت قىلىشىمىزنى› خالايدۇ (رىملىقلار 6:17). ئۇنىڭ كۆرسەتمىلىرى ھەردائىم بىز ئۈچۈن پايدىلىق. بىز ئۇنىڭ قانۇنلىرىنى ئۆزگەرتەلمەيمىز (يەشايا 48:17، 18؛ 1-كورىنت. 6:9، 10). بىز يەھۋانىڭ يۈرىكىنى خۇرسەن قىلىش ۋە زەبۇر يازغۇچىسىغا ئوخشاش كۆز قاراشنى ئىپادىلەش ئۈچۈن قولىمىزدىن كېلىشىچە تىرىشىمىز: «مەن ھەمىشە قانۇن-قائىدىلىرىڭگە ئاخىرغىچە چىن قەلبىمدىن ئىتائەت قىلىشنى قارار قىلدىم» (زەبۇر 119:112). بىراق، شەيتان مەھكەم تۇرۇش ئىرادىمىزنى ئاجىزلاشتۇرۇش ئۈچۈن تىرىشىدۇ. ئۇنداقتا، ئۇ مەقسىتىگە يېتىش ئۈچۈن قانداق ئۇسۇللارنى قوللىنىدۇ؟
شەيتان مەھكەم تۇرۇش ئىرادىمىزدىن ئاجىزلاشتۇرۇش ئۈچۈن نېمە قىلىشقا تىرىشىدۇ؟
8. شەيتان زىيانكەشلىك ئۇسۇللىرىنى قوللىنىپ، مەھكەم تۇرۇش ئىرادىمىزنى ئاجىزلاشتۇرۇش ئۈچۈن نېمە قىلىدۇ؟
8 زىيانكەشلىك. ئىبلىس جىسمانىي ۋە ھېسسىي جەھەتتىن ھۇجۇم قىلىش ئۇسۇلىنى قوللىنىپ، ئىرادىمىزنى ئاجىزلاشتۇرىدۇ. ئۇنىڭ مەقسىتى — بىزنى يۇتۇۋېتىش، يەنى يەھۋا بىلەن بولغان مۇناسىۋىتىمىزنى بۇزۇش (1-پېتر. 5:8). بىرىنچى ئەسىردىكى مەسىھ ئەگەشكۈچىلىرى مەھكەم تۇرۇش ئىرادىسى قەتئىي بولغاچ، تەھدىتكە ئۇچرىغان، تاياق يېگەن ۋە ئۆلتۈرۈلگەن (ئەلچى. 5:27، 28، 40؛ 7:54–60). شەيتان بۈگۈنكى كۈندىمۇ زىيانكەشلىك قىلىشنى داۋاملاشتۇرىۋاتىدۇ. بۇنى روسىيە ۋە باشقا دۆلەتلەردىكى قېرىنداشلىرىمىزغا قىلىنغان رەھىمسىز مۇئامىلىلەردىن كۆرەلەيمىز. ئۇنىڭدىن باشقا، دۇنيانىڭ ھەرقايسى جايلىرىدا قارشى چىققۇچىلار ھەر تۈرلۈك يوللار بىلەن قېرىنداشلىرىمىزغا زىيانكەشلىك قىلىۋاتىدۇ.
9. يوشۇرۇن بېسىملاردىن پەخەس بولۇشنىڭ لازىملىقىنى مىسال بىلەن چۈشەندۈرۈڭ.
9 يوشۇرۇن بېسىم قىلىش. شەيتان ئوچۇق ئاشكارا ھۇجۇم قىلىشتىن باشقا يەنە ھىيلە-مىكىرلەرنى ئىشلىتىدۇ (ئەفەس. 6:11). چوڭ بىر ئوپېراتسىيە ئۈچۈن دوختۇرخانىدا ياتقان بوب ئىسىملىك بىر بۇرادەرنىڭ مىسالىنى ئالايلى. ئۇ ھەرقانداق ئەھۋال ئاستىدا ئۆزىنىڭ قان سېلىشنى قوبۇل قىلمايدىغانلىقىنى دوختۇرلارغا ئېنىق بىلدۈرگەن. تاشقى كېسەللىكلەر دوختۇرى ئۇنىڭ قارارىنى ھۆرمەتلەشكە قوشۇلغان. بىراق، ئوپېراسىيىدىن بىر كۈن بۇرۇن بوبنىڭ ئائىلىسىدىكىلەر ئۆيگە قايتقاندىن كېيىن، ناركوز قىلىدىغان دوختۇر بوبنى كۆرۈشكە كەلگەن. ئۇ بوبقا قان سېلىنمايدىغانلىقى، شۇنداقتىمۇ زۆرۈر بولسا، ئۇلار قان سېلىشقا تەييار ئىكەنلىكىنى ئېيتقان. ئېھتىمال، دوختۇر ئائىلىسىدىكىلەر ئۇنىڭ يېنىدا بولمىغاندا، ئۇ كۆز قارىشىنى ئۆزگەرتىدۇ دەپ ئويلىغان. لېكىن، بوپ قارارىدا مەھكەم تۇرۇپ، ئۆزىنىڭ ھەرقانداق ئەھۋال ئاستىدا قان سېلىشنى قوبۇل قىلمايدىغانلىقىنى ئېيتقان.
10. نېمە ئۈچۈن ئىنسانلارنىڭ كۆز قارىشى خەتەرلىك؟ (1-كورىنتلىقلار 3:19، 20)
10 ئىنسانلارنىڭ دۇنيا قارىشى. ئەگەر ئىشلارغا ئىنسانىي نۇقىتىئىنەزەر بىلەن قارىساق، يەھۋانىڭ قانۇنلىرىغا سەل قاراشقا باشلىشىمىز مۇمكىن (1-كورىنتلىقلار 3:19، 20-نى ئوقۇڭ). بۇ دۇنيانىڭ دانالىقى ھەمىشە ئىنسانلارنىڭ خۇداغا ئىتائەتسىزلىك قىلىشىغا تەسىر قىلىدۇ. پېرگام ۋە تىئاتىرادىكى ئاز بىر قىسىم مەسىھ ئەگەشكۈچىلىرى ئاشۇ شەھەرلەردە كۆپ ئۇچرايدىغان بۇتپەرەسلىك ۋە ئەخلاقسىز كۆز قاراشلارنى قوبۇل قىلغان. ھەر ئىككى جامائەت جىنسىي ئەخلاقسىزلىققا يول قويغانلىقى ئۈچۈن، ئەيسا ئۇلارغا كۈچلۈك نەسىھەت بەرگەن (ۋەھىي. 2:14، 20). بىز بۈگۈن خاتا كۆز قاراشلارنى قوبۇل قىلىش بېسىمىغا دۇچ كېلىمىز. ئائىلە ئەزالىرىمىز ياكى تونۇش-بىلىشلىرىمىز بىزنى ئۆز ھېس-تۇيغۇلىرىمىزغا قۇلاق سېلىپ، يەھۋانىڭ قانۇنىنى بۇزۇشقا دەۋەت قىلىدۇ. مەسىلەن، ئۇلار بىزگە ئەخلاقىي پاكلىقنى ساقلاشنىڭ مۇھىم ئەمەسلىكىنى، مۇقەددەس كىتابتىكى ئەخلاقىي ئۆلچەملەرنىڭ ئاللىبۇرۇن كونىراپ ۋاقتى ئۆتكەنلىكىنى ئېيتىشى مۇمكىن.
11. بىز مەھكەم تۇرۇش ئۈچۈن چوقۇم نېمىدىن ساقلىنىشىمىز كېرەك؟
11 بـەزى چاغـلاردا، بىز يەھـۋانىڭ بەرگـەن كۆرسەتمىلىرىنى ئانچە ئېنىق ئەمەس دەپ ئويلىشىمىز، ھەتتا يېزىلغانلارنىڭ سىرتىدىكى ئىشلارنى قىلىشقا ئېزىقتۇرۇلىشىمىز مۇمكىن (1-كورىنت. 4:6). ئەيسانىڭ زامانىدىكى دىنىي ئۇستازلار شۇنداق گۇناھ ئۆتكۈزگەن ئىدى. ئۇلار خۇدادىن كەلگەن قانۇنغا ئىنسانلارنىڭ قائىدە-تۈزۈملىرىنى قوشۇش ئارقىلىق ئاددىي كىشىلەرنىڭ ئۈستىگە ئېغىر يۈكنى يۈكلىگەن (مەتتا 23:4). يەھۋا ئۆز سۆزى ۋە تەشكىلاتى ئارقىلىق بىزگە ئېنىق يول-يورۇقنى كۆرسىتىپ بېرىدۇ. بىزنىڭ ئۇ بەرگەن كۆرسەتمىگە ھەرقانداق نەرسىنى قوشۇشقا ھەققىمىز يوق (پەند. نە 3:5–7). شۇڭا، مۇقەددەس كىتابتا يېزىلغان نەرسىلەرنىڭ سىرتىغا چىقىپ كەتمەيمىز ياكى شەخسەن ئۆزلىرى قارار چىقىرىدىغان ئىشلار توغرۇلۇق قائىدە-تۈزۈم چىقارمايمىز.
12. شەيتان قۇرۇق گەپ-سۆزلەرنى قانداق ئىشلىتىدۇ؟
12 يالغان گەپ-سۆزلەر. شەيتان ئادەملەرنى قايمۇقتۇرۇپ، ئارىسىدا بۆلۈنۈش پەيدا قىلىش ئۈچۈن «بىھۇدە قۇرۇق گەپ-سۆزلەر» ۋە «بۇ دۇنيانىڭ يۈزەكى كۆز قاراشلىرىغا ئاساسلانغان» قائىدە-تۈزۈملەرنى قوللىنىدۇ (كولوسى. 2:8). بىرىنچى ئەسىردە، بۇلار ئىنسانلارنىڭ دۇنيا كۆز قارىشىغا ئاساسلانغان پەلسەپەلەر، مۇقەددەس كىتابقا ئاساسلانمىغان يەھۇدىيلارنىڭ تەلىماتلىرى ۋە مەسىھ ئەگەشكۈچىلىرى مۇسا پەيغەمبەرگە چۈشۈرۈلگەن قانۇنىغا ئەمەل قىلىش كېرەك دەپ ئۆگىتىلگەن تەلىملەرنى ئۆز ئىچىگە ئالغان. ئۇلار بىھۇدە قۇرۇق گەپلەر، چۈنكى ئۇلار كىشىلەرنىڭ دىققىتىنى ھەقىقىي دانالىقنىڭ مەنبەسى بولغان يەھۋادىن يىراقلاشتۇرغان ئىدى. بۈگۈنكى كۈندە شەيتان ئاخبارات ۋە ئىجتىمائىي ئالاقە تورلىرىدىن پايدىلىنىپ، سىياسىي رەھبەرلەر تەشۋىق قىلىدىغان ئاساسسىز يالغان سۆزلەرنى ۋە خەۋەرلەرنى تارقىتىدۇ. بۇنى تاجسىمان ۋىرۇس تارقالغاندا c ئېنىق كۆردۇق. كىشىلەرنى قايمۇقتۇرىدىغان سۆزلەرگە قۇلاق سالىدىغانلار ئورۇنسىز غەم-ئەندىشىلەرنى قىلغان. ئەمما، تەشكىلاتىمىزنىڭ كۆرسەتمىلىرىگە قۇلاق سالغان يەھۋا گۇۋاھچىلىرى ئارتۇقچە غەم-تەشۋىشلەردىن ساقلىنالىغان.—مەتتا 24:45.
13. نېمە ئۈچۈن دىققىتىمىزنىڭ چېچىلىشىدىن پەخەس بولۇشىمىز كېرەك؟
13 دىققەت چېچىلىش. بىز چوقۇم دىققىتىمىزنى تېخىمۇ مۇھىم ئىشلارغا قارىتىشىمىز كېرەك (فىلىپى. 1:9، 10). دىققىتىمىزنى چاچىدىغان ئىشلار بەك كۆپ ۋاقتىمىزنى ۋە زېھىنىمىزنى خورىتىدۇ. ئادەتتە تۇرمۇشىمىزدىكى ئىشلار، مەسىلەن يەپ-ئىچىش، كۆڭۈل ئېچىش ۋە پۇل تېپىش ھاياتىمىزدا ئەڭ مۇھىم ئورۇندا بولسا، دىققىتىمىز چېچىلىپ كېتىشى مۇمكىن (لۇقا 21:34، 35). ئۇنىڭدىن باشقا، ھەر كۈنى جەمئىيەتتە بولۇۋاتقان تالاش-تارتىشلار ۋە سىياسىي مەسىلىلەر توغرۇلۇق خەۋەرلەرنى ئاڭلاپ تۇرىمىز ياكى ئوقۇيمىز. بىز چوقۇم ئاشۇ تالاش-تارتىشقا ئارىلىشىپ قېلىشتىن ئۆزىمىزنى تارتىشىمىز كېرەك. بولمىسا، ئوي-پىكىرىمىز ياكى قەلبىمىزدە مەلۇم بىر تەرەپنى قوللاشقا باشلىشىمىز مۇمكىن. شەيتان يۇقىرىدا تىلغا ئېلىنغان ھەممە ئۇسۇللارنى ئىشلىتىدۇ، ئۇنىڭ مەقسىتى توغرا ئىش قىلىش ئىرادىمىزنى ئاجىزلاشتۇرۇش. ئۇنداقتا، ئۇنىڭ تۈرلۈك ئۇسۇللار بىلەن قىلغان ھۇجۇملىرىغا قارشى قەتئىي مەھكەم تۇرۇش ئۈچۈن نېمە قىلالايدىغانلىقىمىزنى كۆرۈپ باقايلى.
مەھكەم تۇرالىشىمىز ئۈچۈن نېمە قىلالايمىز؟
مەھكەم تۇرۇش ئۈچۈن، ئۆزىڭىزنى يەھۋاغا بېغىشلاپ، چۆمۈلدۈرۈلگەنلىكىڭىز ھەققىدە ئويلىنىڭ، خۇدانىڭ سۆزىنى تەتقىق قىلىپ، ئۇنىڭ ئۈستىدە چوڭقۇر ئويلىنىڭ، تەۋرەنمەس كۆڭۈلنى يېتىلدۈرۈڭ ۋە يەھۋاغا ئىشەنچ قىلىڭ (14–18-ئابزاسلارغا قاراڭ)
14. بىزنىڭ يەھۋا تەرەپتە تۇرۇشىمىزغا ياردەم بېرىدىغان بىر نەرسە نېمە؟
14 نېمە ئۈچۈن ئۆزىڭىزنى يەھۋاغا بېغىشلاپ، چۆمۈلدۈرۈلۈشتىن ئۆتكەنلىكىڭىز ھەققىدە چوڭقۇر ئويلىنىڭ. سىز يەھۋا تەرەپتە تۇرۇشنى خالىغاچ، ئاشۇ قەدەملەرنى باسقان. ئۆزىڭىزنىڭ ھەقىقەتنى تاپقانلىقىغا قايىل بولۇشىڭىزغا نېمە ياردەم بەرگەنلىكى ھەققىدە قايتا ئويلىنىپ كۆرۈڭ. سىز يەھۋا توغرۇلۇق توغرا بىلىمگە ئىگە بولۇپ، ئاسماندىكى ئاتىڭىزغا بولغان ھۆرمىتىڭىز ۋە مۇھەببىتىڭىزنىڭ چوڭقۇرلاشقان. ئىمان-ئېتىقادىڭىز كۈچەيگەنسېرى، سىز توۋا قىلىشقا ھەرىكەت قىلغان. يەھۋا ئۆچ كۆرىدىغان ئىشلارنى قىلىشقا توختىتىپ، ئۇنى خۇرسەن قىلىدىغان ئىشلارنى قىلىشقا باشلىغان. خۇدانىڭ سىزنى كەچۈرگەنلىكىنى تونۇپ يەتكىنىڭىزدە، ئۆزىڭىزنى خاتىرجەم ھېس قىلغان (زەبۇر 32:1، 2). ئىبادەت يىغىلىشلىرىغا قاتنىشىپ، سىز ئۆگەنگەن ئاجايىپ ھەقىقەتلەرنى باشقىلار بىلەن ئورتاقلىشىشقا باشلىغان. ھازىر بولسا، ئۆزىنى يەھۋاغا بېغىشلىغان ۋە چۆمۈلدۈرۈلۈشتىن ئۆتكەن مەسىھ ئەگەشكۈچىسى سۈپىتىدە، ھاياتلىق يولىدا مېڭىۋاتىسىز ۋە داۋاملىق مۇشۇ يولدا مېڭىش ئۈچۈن پۈتۈن كۈچىڭىز بىلەن تىرىشىۋاتىسىز.—مەتتا 7:13، 14.
15. نېمە ئۈچۈن تەتقىق قىلىپ ئۆگىنىش ۋە چوڭقۇر ئويلىنىش پايدىلىق؟
15 خۇدا سۆزىنى تەتقىق قىلىڭ ۋە ئۆگەنگەنلىرىڭىز ھەققىدە چوڭقۇر ئويلىنىڭ. خۇددى چوڭقۇر يىلتىز تارتقان دەرەخ، مۇستەھكەم تۇرالىغانغا ئوخشاش، خۇدانىڭ سۆزىگە بولغان ئىشەنچىمىز چوڭقۇر يىلتىز تارتسا، بىزمۇ مەھكەم تۇرالايمىز. دەرەخنىڭ ئۆسۈشىگە ئەگىشىپ، ئۇنىڭ يىلتىزى بارغانسېرى چوڭقۇرلايدۇ ۋە ئەتراپىغا كېڭىيىدۇ. بىز تەتقىق قىلىپ ئۆگەنگەندە ۋە چوڭقۇر ئويلانغاندا، ئېتىقادىمىز كۈچىيىپ، خۇدانىڭ يوللىرىنىڭ ئەڭ ياخشى ئىكەنلىكىگە تېخىمۇ ئىشەنچىمىز (كولوسى. 2:6، 7). يەھۋا ئۆتمۈشتىكى خىزمەتچىلىرىگە قانداق يول-يورۇقلارنى، مەسلىھەتلەرنى بەرگەنلىكى ۋە ئۇلارنى قوغدىغانلىقى ھەققىدە ئويلىنىڭ. مەسىلەن، ھەزەكىيال تەسۋىرىي كۆرۈنۈشتە، بىر پەرىشتە ئېھتىياتچانلىق بىلەن ئىبادەتخانىنى ئۆلچەۋاتقانلىقىنى كۆرگەن. ئاشۇ ئاجايىپ كۆرۈنۈش ھەزەكىيالنىڭ ئىمان-ئېتىقادىنى كۈچەيتكەن ۋە يەھۋانىڭ پاك ئىبادەت ئۆلچەم-قائىدىلەرگە قانداق بويسۇنۇش ھەققىدە بىزگە ئەمەلىي كۆرسەتمىلەرنى بېرىدۇ d (ھەزەك. 40:1–4؛ 43:10–12). خۇدانىڭ سۆزىنى چوڭقۇرراق تەتقىق قىلىش ۋە تەپەككۈر قىلىشقا ۋاقىت چىقارساق، بىزمۇ چوقۇم پايدىسىنى كۆرىمىز.
16. تەۋرەنمەس كۆڭۈل بوبنى قانداق قوغدىغان؟ (زەبۇر 112:7)
16 كۆڭلىڭىز تەۋرەنمەس مەھكەم بولسۇن. داۋۇت پادىشاھ يەھۋاغا بولغان تەۋرەنمەس سۆيگۈسىنى ئىپادىلىگەندە، مۇنداق جاكارلىغان: «ئەي خۇدا، مېنىڭ كۆڭلۈم تەۋرەنمەس» (زەبۇر 57:7). بىزمۇ يەھۋاغا ئىشەنچ قىلىپ، قەلبىمىزنى تەۋرەنمەس، مۇستەھكەم قىلالايمىز (زەبۇر 112:7-نى ئوقۇڭ). يۇقىرىدا تىلغا ئالغان بوبقا نېمە ياردەم بەرگەنلىكىنى كۆرۈپ باقايلى. زۆرۈر تېپىلغاندا، دوختۇر ئۇنىڭغا قان سېلىشقا تەييار ئىكەنلىكىنى بىلدۈرگەندىن كېيىن، ئۇ دەرھال دوختۇرغا، ئەگەر ھەرقانداق بىر ۋەزىيەتتە قان سالماقچى بولسا، شۇ ھامان ئۆزىنىڭ دوختۇرخانىدىن چىقىپ كېتىدىغانلىقىنى ئېيتقان. كېيىن، بوب مۇنداق دېگەن: «مەن قىلچىمۇ ئىككىلەنمىدىم ۋە ئەنسىرىمىدىم».
ئەگەر كۈچلۈك ئىمان-ئېتىقادنى يېتىلدۈرسەك، مەيلى قانداق سىناقلارغا دۇچ كېلىشىمىزدىن قەتئىينەزەر، قەتئىي مەھكەم تۇرالايمىز (17-ئابزاسقا قاراڭ)
17. بوبنىڭ مىسالىدىن نېمىلەرنى ئۆگىنەلەيمىز؟ (رەسىمگە ھەم قاراڭ)
17 بوب تەۋرەنمەي مەھكەم تۇرغان، چۈنكى ئۇ دوختۇرخانىغا كېلىشتىن بۇرۇنلا مەھكەم تۇرۇشنى قەتئىي قارار قىلغان ئىدى. بىرىنچىدىن، ئۇ يەھۋا خۇدانى خۇرسەن قىلىشنى ئارزۇ قىلغان. ئىككىنچىدىن، ئۇ ئېھتىياتچانلىق بىلەن، مۇقەددەس كىتاب ۋە ئۇنىڭغا ئاساسلانغان نەشرىي ماتېرىياللاردىن ھايات ۋە قاننىڭ مۇقەددەسلىكى ھەققىدە تەتقىق قىلغان. ئۈچىنچىدىن، ئۇ يەھۋانىڭ قانۇنلىرىغا بويسۇنسا، يەھۋا ئۇنى مۇكاپاتلايدىغانلىقىغا ئىشەنگەن. بىزمۇ قانداق سىناقلارغا دۇچ كېلىشىدىن قەتئىينەزەر، كۆڭلىمىزنى تەۋرەنمەس مەھكەم قىلالايمىز.
باراق ۋە ئۇنىڭ ئادەملىرى سىسېرانىڭ ئەسكىرىنى جاسارەت بىلەن قوغلاۋاتىدۇ (18-ئابزاسىغا قاراڭ)
18. باراقنىڭ مىسالى بىزنى يەھۋاغا ئىشىنىش توغرۇلۇق نېمىنى ئۆگىتىدۇ؟ (رەسىمگە ھەم قاراڭ)
18 يەھۋاغا ئىشەنچ قىلىڭ. باراق يەھۋانىڭ كۆرسەتمىلىرىگە ئىشەنچ قىلىپ، قانداق مۇۋەپپەقىيەتكە ئېرىشكەنلىكى ھەققىدە ئويلاپ كۆرەيلى. گەرچە پۈتكۈل ئىسرائىل زېمىنىدىن بىر قالغان ياكى نەيزە تاپقىلى بولمىسىمۇ، يەھۋا ئۇلارنى تولۇق قوراللانغان قانان قوشۇنلىرىنىڭ باشلىقى سىسېراغا قارشى ئۇرۇش قىلىشقا بۇيرىغان (ھاكىم. 5:8). ئايال پەيغەمبەر دېبورا باراققا تاغلاردىن تۈزلەڭلىككە چۈشۈپ، سىسېرا ۋە ئۇنىڭ 900 جەڭ ھارۋۇسى بىلەن ئۇرۇش قىلىشنى ئېيتقان. گەرچە ھارۋىلار تەكشى، تۈزلەڭ يەردە كۆپ ئەۋزەللىككە ئىگە بولسىمۇ، باراق ئاشۇ كۆرسەتمىگە بويسۇنغان. ئەسكەرلەر تابۇر تېغىدىن چۈشكەندە، يەھۋا ئاسماندىن قاتتىق يامغۇر ياغدۇرغان. شۇنىڭ بىلەن، سىسېرانىڭ ھارۋىلىرى پاتقاققا پېتىپ قېلىپ، يەھۋا باراقنى غەلىبىگە ئېرىشتۈرگەن (ھاكىم. 4:1–7، 10، 13–16). شۇنىڭغا ئوخشاش، بىزمۇ يەھۋاغا ۋە ئۇنىڭغا ۋەكىللىك قىلىدىغان تەشكىلاتى بەرگەن يوليورۇقلارغا ئىشەنسەك، يەھۋا بىزنىمۇ غەلىبىگە ئېرىشتۈرىدۇ (تەكرار. قا 31:6).
تەۋرەنمەي مەھكەم تۇرۇش ئۈچۈن قەتئىي بەل باغلاڭ
19. نېمە ئۈچۈن قەتئىي تەۋرەنمەي تۇرۇشنى خالايسىز؟
19 بۇ دۇنيادا ياشاۋاتقىنىمىزدا، تەۋرەنمەي مەھكەم تۇرۇش ئۈچۈن داۋاملىق كۈرەش قىلىشىمىز كېرەك (1-تىموت. 6:11، 12؛ 2-پېتر. 3:17). زىيانكەشلىك، يوشۇرۇن بېسىملار، ئىنسانلارنىڭ كۆز قاراشلىرى، قۇرۇق گەپ-سۆزلەر ۋە دىققىتىمىزنى چاچىدىغان ئىشلارنىڭ مەھكەم تۇرۇش ئىرادىمىزنى تەۋرىتىشىگە قەتئىي يول قويمايلى (ئەفەس. 4:14). ئەكسىچە، داۋاملىق مەھكەم تۇرۇپ، يەھۋاغا قەتئىي سادىق قالايلى ۋە بۇيرۇقلىرىغا بويسۇنايلى. شۇنىڭ بىلەن بىرگە، غەرەز ئۇقىدىغان كىشى بولۇشىمىز كېرەك. كېيىنكى ماقالىدە، غەرەز ئۇقىدىغان بولۇشتا ياراتقۇچى يەھۋا ۋە ئەيسا مەسىھنىڭ قانداق ئۈلگە قالدۇرغانلىقى ھەققىدە مۇھاكىمە قىلىمىز.
154-ناخشا ئاخىرغىچە بەرداشلىق بېرىمىز
a ئادەم-ئاتا ۋە ھاۋا-ئانىنىڭ زامانىدىن باشلاپ، شەيتان ئىنسانلارنىڭ نېمە توغرا، نېمە خاتالىقىنى ئۆزى قارار قىلىشى توغرىسىدا ئۆزىنىڭ كۆز قاراشلىرىنى تەشۋىق قىلىپ كەلمەكتە. ئۇنىڭ نىيىتى بولسا، يەھۋانىڭ قانۇنىغا ۋە ئۇنىڭ تەشكىلاتىدىن كەلگەن يوليورۇقلارغا قارىتا ئۆزىنىڭ ئاشۇ ناتوغرا كۆز قاراشلىرىنى بىزگە سىڭدۈرۈش. بۇ ماقالە، شەيتاننىڭ دۇنياسىنىڭ ئۆز بېشىمچىلىق روھىدىن ساقلىنىش ۋە يەھۋا تەرەپتە تۇرۇش ئىرادىمىزنى كۈچەيتىشىمىزگە ياردەم بېرىدۇ.
b مەسىھ ئەگەشكۈچىلىرى خۇدانىڭ قان توغرىسىدىكى بۇيرۇقىغا قانداق بويسۇنالايدىغانلىقى ھەققىدە كۆپرەك بىلمەكچى بولسىڭىز، «مەڭگۈ شاد-خۇرام ياشاڭ!» ناملىق كىتابنىڭ 39-دەرسىگە قاراڭ.
c jw.org تور بېكىتىمىزدىكى «يالغان مەلۇماتلاردساقلاڭ» (باشقا تىلدا) ناملىق ماقالىگە قاراڭ.
d كۆپرەك تەپسىلاتلارنى بىلىش ئۈچۈن «پاك ئىبادەت» كىتابىنىڭ (باشقا تىلدا) 13 ۋە 14-بابلىرىغا قاراڭ.