22-تەتقىق ماقالىسى
دانالىق ھاياتىڭىزدا يولباشچى بولسۇن!
«يەھۋا ئۆزى دانالىق بەرگۈچىدۇر».—پەند. نە 2:6.
6-ناخشا خۇدا خىزمەتچىسىنىڭ دۇئاسى
بۇ ماقالىدە a
1. نېمە ئۈچۈن ھەممىمىز خۇدادىن كېلىدىغان ئەقىل-پاراسەتكە موھتاج؟ (پەندى-نەسىھەت 4:7)
سىز ئىلگىرى مۇھىم بىر قارارنى چىقىرىشقا توغرا كەلگەن بولسا، شەك-شۈبھىسىزكى ئەقىل-پاراسەت سوراپ، دۇئا قىلدىڭىز. چۈنكى، سىز يولباشچىلىققا موھتاجلىقىڭىزنى بىلىسىز (ياقۇپ 1:5). سۇلايمان پادىشاھ دانالىققا ئېرىشىشنىڭ ھەممىدىن مۇھىملىقى، شۇڭا ئەقىل-پاراسەتكە ئېرىشىش ئۈچۈن تىرىشىش لازىملىقىنى يازغان (پەندى-نەسىھەت 4:7-نى ئوقۇڭ). ئەلۋەتتە، سۇلايمان بۇ يەردە ئىنسانلارنىڭ دانالىقى ئەمەس، بەلكى يەھۋادىن كېلىدىغان دانالىق ھەققىدە سۆز قىلغان (پەند. نە 2:6). ئەمما، ياراتقۇچىدىن كېلىدىغان ئەقىل-پاراسەت بۈگۈنكى كۈندە بىز دۇچ كېلىۋاتقان تۈرلۈك قىيىنچىلىقلارنى ھەل قىلىشقا ياردەم بېرەمدۇ؟ ئەلۋەتتە، بۇ ماقالىدە قانداق ياردەم بېرىدىغانلىقىنى بىر-بىرلەپ كۆرۈپ چىقىمىز.
2. ھەقىقىي دانالىققا ئېرىشىشنىڭ بىر يول قايسى؟
2 ھەقىقىي دانالىققا ئېرىشىشىمىزنىڭ بىر يولى، دانالىقى بىلەن ھۆرمەتكە سازاۋەر بولغان ئىككى كىشىنىڭ تەلىملىرىنى چوڭقۇر تەتقىق قىلىپ ئۆگىنىش ۋە ئۇنى ئەمەلىي قوللىنىشتۇر. بىرىنچى، سۇلايمان ھەققىدە مۇلاھىزە قىلىمىز. مۇقەددەس كىتابتا مۇنداق دېيىلگەن: «خۇدا سۇلايمانغا زىيادە كۆپ دانالىق، ئەقىل-ئىدراك ۋە دېڭىز ساھىلىدىكى قۇمدەك چەكسىز ھېكمەتكە تولغان يۈرەكنى ئاتا قىلدى» (1-پادىشاھ. 4:29). ئىككىنچى، ئىنسانىيەت تارىخىدىكى ئەڭ دانا كىشى ئەيسا توغرۇلۇق مۇلاھىزە قىلىمىز (مەتتا 12:42). ئەيسا ھەققىدە: «يەھۋانىڭ روھى ئۇنىڭ ئۈستىگە چۈشۈپ، ئۇنىڭدا دانالىق ۋە ئەقىل-ئىدراكنىڭ روھى، . . . بولىدۇ» دەپ بېشارەت بېرىلگەن.—يەشايا 11:2.
3. بۇ ماقالىدە نېمىلەرنى مۇھاكىمە قىلىمىز؟
3 خۇدا بەرگەن ئەقىل-پاراسەتنى ئىشلىتىپ، سۇلايمان ۋە ئەيسا ھەر ئىككىسى ھەممىمىز قىزىقىدىغان مۇھىم ئىشلار ھەققىدە ئەمەلىي مەسلىھەتلەرنى بەرگەن. بۇ ماقالىدە، بىز پۇل، ئىش ۋە ئۆزىمىزگە قارىتا تەڭپۇڭ كۆزقاراشتا بولۇشىمىزغا ياردەم بېرىدىغان بەزى نەسىھەتلەرنى مۇھاكىمە قىلىمىز.
پۇلغا بولغان تەڭپۇڭ كۆزقاراش
4. سۇلايمان بىلەن ئەيسانىڭ تۇرمۇش شارائىتى قانداق پەرق بار ئىدى؟
4 سۇلايماننىڭ ھەيران قالارلىق كۆپ بايلىقى بار ئىدى، ئۇ ھەشەمەتلىك تۇرمۇش كەچۈرگەن (1-پادىشاھ. 10:7، 14، 15). ئەكسىچە، ئەيسانىڭ مال-مۈلكى ئاز، ئۆزىنىڭ ئۆيىمۇ يوق ئىدى (مەتتا 8:20). شۇنداقتىمۇ، ھەر ئىككىلىسى مال-دۇنياغا تەڭپۇڭ كۆز قاراشتا بولغان، چۈنكى ئۇلاردا يەھۋادىن كەلگەن دانالىق بار ئىدى.
5. سۇلايمان پۇلغا قارىتا قانداق تەڭپۇڭ كۆزقاراشتا بولغان؟
5 سۇلايمان پۇل «قوغدايدۇ» دېگەن (ۋەز 7:12). پۇلىمىز بولسا، زۆرۈر تۇرمۇش لازىمەتلىكلىرىنى، بەلكىم ئارزۇ قىلغان بەزى نەرسىلەرنى سېتىۋالالايمىز. بىراق، سۇلايمان شۇنچە باي بولسىمۇ، پۇلدىنمۇ مۇھىم نەرسىلەرنىڭ بارلىقىنى چۈشەنگەن. مەسىلەن، ئۇ «ياخشى نام زور بايلىقتىن ئەۋزەلدۇر» دەپ يازغان (پەند. نە 22:1). سۇلايمان يەنە پۇلنى سۆيىدىغان كىشىلەرنىڭ ئۆزىدە بارىغا قانائەت قىلمايدىغانلىقىنى كۆرۈپ يەتكەن (ۋەز 5:10، 12). ئۇ بىزنى ئىشەنچىمىزنى پۇلغا باغلىماسلىققا ئاگاھلاندۇرغان، چۈنكى پۇلىمىز تېزلا يوق بولۇپ كېتىشى مۇمكىن.—پەند. نە 23:4، 5.
مال-دۇنياغا بولغان كۆز قارىشىمىز خۇدا پادىشاھلىقىنى ھاياتىمىزدا بىرىنچى ئورۇنغا قويۇشقا توسالغۇ بولامدۇ؟ (6، 7-ئابزاسلارغا قاراڭ) d
6. ئەيسا مال-دۇنياغا قارىتا قانداق تەڭپۇڭ كۆزقاراشتا بولغان؟ (مەتتە 6:31–33)
6 ئەيسا مال-دۇنياغا تەڭپۇڭ كۆزقاراشتا بولغان. ئۇ يېمەك-ئىچمەكلىكلەردىن ھۇزۇرلانغان (لۇقا 19:2، 6، 7). ئۇ بىر قېتىم مۆجىزە كۆرسىتىپ، سۇنى ناھايىتى ياخشى سۈپەتلىك شارابقا ئايلاندۇرغان (يۇھاننا 2:10، 11). ئۇ ئۆلۈپ كېتىدىغان كۈنى ئېسىل سۈپەتلىك توننى كىيگەن (يۇھاننا 19:23، 24). ئەمما، ئەيسا مال-دۇنيانىڭ ھاياتىدا ئەڭ مۇھىم ئورۇندا تۇرۇشىغا يول بەرمىگەن. ئۇ ئەگەشكۈچىلىرىگە: «سىلەر ھەم خۇدانىڭ، ھەم بايلىقنىڭ قۇلى بولالمايسىلەر»،— دېگەن ئىدى (مەتتا 6:24). ئەيسا يەنە، ئەگەر بىز ئەڭ ئاۋۋال خۇدا پادىشاھلىقىنى بىرىنچى ئورۇنغا قويساق، يەھۋا چوقۇم تۇرمۇشتا ئېھتىياجلىق نەرسىلىرىمىزنى تەمىنلەپ بېرىدىغانلىقىنى ئېيتقان.—مەتتا 6:31–33-نى ئوقۇڭ.
7. بىر بۇرادەر پۇلغا تەڭپۇڭ قاراشتا بولۇپ، قانداق بەرىكەتلەرگە ئېرىشكەن؟
7 نۇرغۇن قېرىنداشلىرىمىز پۇل توغرۇلۇق خۇدادىن كەلگەن ئەقىل-پاراسەتنى ئەمەلىي قوللىنىشنىڭ پايدىسىنى كۆرگەن. يالغۇز ياشايدىغان دانىيال ئىسىملىك بۇرادەرنىڭ مىسالىنى كۆرۈپ باقايلى. ئۇ: «ئۆسمۈرلۈك چاغلىرىمدا، مەن يەھۋاغا خىزمەت قىلىشنى ھاياتىمدا ئەڭ مۇھىم ئورۇنغا قويۇشنى قارار قىلدىم»،— دەيدۇ. دانىيال ئاددىي-ساددا ھايات كەچۈرگەچ، ئۆز ۋاقتى ۋە قابىلىيىتىنى ئاپەتتىن قۇتقۇزۇش ۋە بەيتەل ئىشلىرىغا ياردەم بېرىشكە سەرپ قىلالىغان. ئۇ يەنە: «سەمىمىيلىك بىلەن ئېيتتالايمەنكى، مەن بۇ يولنى تاللاشنى قارار قىلغىنىم ئۈچۈن ئەزەلدىن پۇشايمان قىلىپ باقمىدىم. ئەلۋەتتە، ئەگەر مەن پۇل تېپىشنى ھاياتىمدا ئەڭ مۇھىم ئورۇنغا قويغان بولسام، كۆپ پۇل تاپقان بولاتتىم. ئەمما، ئاجايىپ ياخشى دوستلارنى تاپالمايتتىم. ئەگەر پۇل تېپىشقا دىققىتىمنى قاراتقان بولسام، ھازىرقىدەك خۇشاللىق تاپالمايتتىم. چۈنكى، مەن يەھۋاغا خىزمەت قىلىشنى بىرىنچى ئورۇنغا قويغاچ، ھازىرقىدەك زور خۇشاللىققا ئېرىشەلىدىم. يەھۋا مېنى پۇل بىلەن ئېرىشكىلى بولمايدىغان ئاجايىپ زور بەرىكەتلەرگە ئېرىشتۈردى». ئېنىقكى، بىز دىققىتىمىزنى پۇلغا ئەمەس، بەلكى خۇدانىڭ خىزمىتىنى قىلىشقا قاراتساق، ئۇنىڭ پايدىسىنى كۆرىمىز.
ئىش-ئەمگەككە قارىتا تەڭپۇڭ كۆزقاراش
8. سۇلايماننىڭ ئىش-ئەمگەككە تەڭپۇڭ كۆزقاراشتا بولغانلىقىنى قانداق بىلىمىز؟ (ۋەز 5:18، 19)
8 سۇلايمان بىزنىڭ جاپالىق ئەمگەك قىلىپ ئېرىشەلەيدىغان ھۇزۇر-ھالاۋىتىمىزنى خۇدانىڭ ئىلتىپاتى دەپ ئاتىغان (ۋەز 5:18، 19-نى ئوقۇڭ). ئۇ مۇنداق دەپ يازغان: «كېلەر ھەربىر مېھنەتتىن پايدا» (پەند. نە 14:23).سۇلايمان ئاشۇ سۆزلەرنىڭ ھەقىقەت ئىكەنلىكىنى بىلگەن ئىدى. ئۇ ئىشچان كىشى بولغان! ئۇ ئۆيلەرنى، ئۈزۈمزارلىقلارنى سالغان، باغلارنى ۋە سۇ كۆلچەكلىرىنى ياسىغان. يەنە شەھەرلەرنى بەرپا قىلغان (1-پادىشاھ. 9:19؛ ۋەز 2:4–6).شۇلار جاپالىق ئىشلار ئىدى ۋە سۇلايمان چوقۇم ئۆزى قىلغان ئىشلاردىن خۇشاللىق تاپقان. ئۇ پەقەتلا شۇ ئىشلارنىڭ ئۇنى خۇشال قىلىشى بىلەن چەكلىنىپ قالماي، يەنە يەھۋا ئۈچۈن نۇرغۇن ئىشلارنى قىلغان. مەسىلەن، ئۇ يەھۋاغا ئىبادەت قىلىدىغان ھەيۋەتلىك ئىبادەتخانا قۇرۇلۇشىنى تاماملاشقا باش بولۇپ، يەتتە يىل ئۆزى يېتەكچىلىك قىلغان (1-پادىشاھ. 6:38؛ 9:1). سۇلايمان نۇرغۇنلىغان ئىشلارنى قىلىپ كۆرگەندىن كېيىن، بىر كىشىنىڭ خۇداغا خىزمەت قىلىشتىن مۇھىم ئىشى بولمايدىغانلىقىنى تونۇپ يەتكەن. شۇنىڭ بىلەن، ئۇ مۇنداق دەپ يازغان: «بۇ ئېيتىلغان ھەممە سۆزلەرنىڭ خۇلاسىسى شۇ: ھەق خۇدادىن قورققىن ۋە ئۇنىڭ بۇيرۇقلىرىغا ئەمەل قىل. چۈنكى، ئىنساننىڭ بارچە مەجبۇرىيىتى بۇدۇر».—ۋەز 12:13.
9. ئەيسا ياغاچچىلىق ھۈنىرىنى ئەڭ مۇھىم ئورۇنغا قويۇشتىن قانداق ساقلانغان؟
9 ئەيسا ئىشچان ئىدى. ئۇ ياش ۋاقتىدا، ياغاچچى بولۇپ ئىشلىگەن (ماركۇس 6:3). شەك-شۈبھىسىزكى، ئاتا-ئانىسى چوڭ بىر ئائىلە كىشىلىرىنىڭ ئېھتىياجىنى قامداش ئۈچۈن تىرىشىۋاتقاندا، ئەيسانىڭ قىلغان ياردىمى ئۈچۈن مىننەتدار بولغان. ئەيسا مۇكەممەل ئادەم بولغاچ، ياغاچچىلىق ھۈنىرىنى ئەڭ ياخشى قىلغان، بەلكىم نۇرغۇن ئادەملەر ئۇ ياسىغان نەرسىلەرنى خالىغان بولۇشى مۇمكىن! بەلكىم، ئەيسا ئۆز ئىش-ئەمگىكىنىڭ ھۇزۇر-ھالاۋىتىنى كۆرگەن. ئەمما، ئۇ ئۆز ھۈنىرىنى تىرىشىپ قىلغان بولسىمۇ، دائىم خۇداغا خىزمەت قىلىشقا ۋاقىت ئاجراتقان ئىدى (يۇھاننا 7:15). كېيىن، ئەيسا پۈتۈن كۈن ۋەز ئېيتىش بىلەن مەشغۇل بولۇپ، ئەتراپىدىكى ئاڭلىغۇچىلارغا مۇنداق نەسىھەت بەرگەن: «ۋاقتىنچە بولىدىغان تاماق ئۈچۈن ئەمەس، ئىنسان ئوغلى بېرىدىغان مەڭگۈلۈك ھاياتلىققا ئېرىشتۈرىدىغان تاماق ئۈچۈن تىرىشىپ ئىشلەڭلار!» (يۇھاننا 6:27). ئەيسا تاغدىكى ۋەز-نەسىھىتىدە مۇنداق دېگەن: «ئاسماندا ئۆزۈڭلارغا خەزىنە توپلاڭلار».—مەتتا 6:20.
ئىش-ئەمگەك ۋە ئىبادەت پائالىيەتلىرىمىزگە قارىتا تەڭپۇڭ كۆزقاراشنى قانداق ساقلىيالايمىز؟ (10، 11-ئابزاسلارغا قاراڭ) e
10. ئىش ئورنىمىزدا، ئىشچان خىزمەتچى بولساق، قانداق قىيىنچىلىق تۇغۇلۇشى مۇمكىن؟
10 خۇدادىن كېلىدىغان ئەقىل-پاراسەت تىرىكچىلىك قىلىدىغان ئىش-ئەمگىكىمىزگە تەڭپۇڭ كۆزقاراشتا بولۇشىمىزغا ياردەم بېرىدۇ. مەسىھ ئەگەشكۈچىلىرى سۈپىتىدە، بىزگە تىرىشىپ ياخشى ئىشلەش ھەققىدە نەسىھەت بېرىلگەن (ئەفەس. 4:28). ئىشقا ئالدىغان خوجايىن ھەمىشە سەمىمىيلىكىمىز ۋە ئىشچانلىقىمىزغا دىققەت قىلىدۇ ۋە قىلغان ئىشلىرىمىزدىن سۆيۈنگەنلىكىنى ئېيتىدۇ. بەلكىم، توغرا نىيەت-مەقسەت بىلەن، يەنى خوجايىنلىرىمىزدا يەھۋا گۇۋاھچىلىرىغا قارىتا ياخشى تەسىراتلارنى قالدۇرۇشنى ئۈمىد قىلىپ، تېخىمۇ ئۇزۇنراق ۋاقىت ئىشلەشكە باشلايمىز. لېكىن، بىز ئۇزۇن ئۆتمەي ئائىلىدىكىلەر بىلەن ۋاقىت ئۆتكۈزۈشكە ۋە يەھۋاغا خىزمەت قىلىشقا كۆپرەك ۋاقىت ئاجرىتىشقا سەل قاراشقا باشلىغانلىقىمىزنى ھېس قىلىشىمىز مۇمكىن. شۇنداق ئەھۋالدا، ئۆزگەرتىشلەرنى قىلىڭ. شۇندىلا تېخىمۇ مۇھىمراق ئىشلارنى قىلىش ئۈچۈن ۋاقتىڭىز بولىدۇ.
11. بىر بۇرادەر ئىش-ئەمگەككە تەڭپۇڭ كۆزقاراشتا بولۇش ھەققىدە نېمىلەرنى ئۆگەنگەن؟
11 ۋىليام ئىسىملىك ياش بۇرادەر ئىش-ئەمگەككە تەڭپۇڭ كۆزقاراشنى ساقلاشنىڭ پايدىسىنى ئۆز كۆزى بىلەن كۆرگەن. ۋىليام ئىلگىرى ئۆزىنى ئىشقا ياللىغان بىر ئاقساقالنىڭ ئۈلگىسىدىن ئۆگەنگەن. ئۇ مۇنداق دەيدۇ: «[بۇ قېرىنداش] ئىش-ئەمگەككە تەڭپۇڭ كۆزقاراشنى ساقلىغان ياخشى ئۈلگە. ئۇ تىرىشىپ جاپالىق ئىشلەيدۇ، قىلغان ئىشلىرىنىڭ سۈپىتى ياخشى بولغاچ، خېرىدارلىرى بىلەن ياخشى مۇناسىۋەت ئورناتقان. ئەمما، ھەر كۈنى ئىشتىن چۈشكەندە، ئۇ ئىشىنى شۇ يەردە قالدۇرۇپ، ۋاقتىنى ۋە كۈچىنى ئائىلىسىگە ۋە يەھۋاغا ئاجرىتىشقا ئەھمىيەت بېرىدۇ. مېنىڭچە، ئۇ مەن تونۇيدىغانلار ئارىسىدىكى ئەڭ خۇشال كىشىلەردىن بىرى b!»
ئۆز-ئۆزىڭىزگە تەڭپۇڭ كۆزقاراشتا بولۇڭ
12. سۇلايمان ئۆز-ئۆزىگە بولغان تەڭپۇڭ كۆزقاراشنى قانداق كۆرسەتكەن ۋە كېيىن ئۇنى قانداق يوقىتىپ قويغان؟
12 سۇلايمان يەھۋانىڭ ساداقەتمەن خىزمەتچىسى بولغاندا، ئۆزىگە تەڭپۇڭ كۆزقاراشتا بولغان ئىدى. ياش ۋاقتىدا، ئۇ ئۆزىنىڭ چەكلىمىسىنى كىچىك پېئىللىق بىلەن ئېتىراپ قىلغان ۋە يەھۋادىن يول كۆرسىتىپ بېرىشنى ئۆتۈنگەن (1-پادىشاھ. 3:7–9). سۇلايمان پادىشاھ بولغان دەسلەپكى مەزگىلدە، مەغرۇرلۇقنىڭ خەۋپ-خەتىرىنىمۇ بىلگەن. ئۇ: «تەككەببۇرلۇق ھالاكەتتىن ئاۋۋال كېلەر، ھاكاۋۇرلۇق يىقىلىپ چۈشۈشتىن ئاۋۋال كېلەر»،— دەپ يازغانىدى (پەند. نە 16:18). بەك ئەپسۇس، سۇلايمان كېيىنچە ئۆزىنىڭ نەسىھەت سۆزلىرىگە ئۆزى ئەمەل قىلمىغان. بىر مەزگىل پادىشاھ بولغاندىن كېيىن، ئۇ ھاكاۋۇرلىشىپ، خۇدانىڭ تەلەپلىرىگە سەل قاراپ، بويسۇنماسلىققا باشلىغان ئىدى. مەسىلەن، بىر قانۇندا ئىسرائىلغا پادىشاھ بولغۇچى ھەققىدە، «ئۇ كۆپ خوتۇن ئالمىسۇن. شۇنداق بولغاندا، ئۇنىڭ قەلبى ئېغىپ كەتمەيدۇ»،— دېيىلگەن ئىدى (تەكرار. قا 17:17). سۇلايمان بۇ قانۇننى كۆزگە ئىلماي، 700 خوتۇن ۋە 300 توقال ئالغان ئىدى. ئۇلارنىڭ كۆپىنچىسى غەيرى ئىلاھلارغا چوقۇناتتى! (1-پادىشاھ. 11:1–3). بەلكىم، سۇلايمان ھەممە ئىشلار مېنىڭ قولۇمدا، دەپ ئۆز-ئۆزىگە بەك ئىشەنگەن بولۇشى مۇمكىن. قانداق بولۇشىدىن قەتئىينەزەر، ۋاقىتنىڭ ئۆتۈشىگە ئەگىشىپ، سۇلايمان يەھۋاغا ئىتائەتسىزلىك قىلىشنىڭ يامان ئاقىۋىتىنى كۆرگەن.—1-پادىشاھ. 11:9–13.
13. ئەيسانىڭ كەمتەرلىكى ھەققىدە چوڭقۇر مۇلاھىزە قىلساق، نېمىلەرنى ئۆگىنەلەيمىز؟
13 ئەيسا ئۆزىگە بولغان تەڭپۇڭ كۆزقاراشنى ۋە كەمتەرلىكنى ساقلىغان. ئۇ يەر يۈزىگە كېلىشتىن بۇرۇن، يەھۋانىڭ خىزمىتىدە بولغاندا، ئاجايىپ ئىشلارنى قىلغان ئىدى. «ئاسمانلاردا ۋە يەر يۈزىدە بار بولغان ... ھەممىسى ئۇ [ئەيسا] ئارقىلىق يارىتىلغان» (كولوسى. 1:16). ئەيسا سۇغا چۆمۈلدۈرۈلگەندە، ناھايىتى ئېنىقكى ئۆز ئاتىسى بىلەن بىللە بولغاندا قىلغان ئىشلارنى ئەسلىگەن (مەتتا 3:16؛ يۇھاننا 17:5). ئەمما، شۇ ئىشلارنى ئەسلىگەندە، ئەيسا مەغرۇرلانمىغان. ھەتتا ئۆزىنى باشقىلاردىن ياخشىراق دەپ ئويلىغانلىقىنى كۆرسىتىدىغان ئىش-ھەرىكەتلەرنى قىلمىغان. ئۇ ئۆزىنىڭ يەر يۈزىگە كېلىشى ھەققىدە شاگىرتلىرىغا مۇنداق دېگەن: «ئىنسان ئوغلى ئۆزىگە خىزمەت قىلدۇرۇش ئۈچۈن ئەمەس، بەلكى ئۆزى خىزمەت قىلىپ، جېنىنى نۇرغۇنلار ئۈچۈن تۆلەم سۈپىتىدە بېرىشكە كەلدى» (مەتتا 20:28). ئۇ يەنە ئۆزلىكىدىن ھېچبىر ئىشنى قىلالمايدىغانلىقىنى ئېتىراپ قىلغان (يۇھاننا 5:19). ئەيسا نەقەدەر كەمتەر كىشى بولغان-ھە! ئەيسا بىزنىڭ ئەگىشىشىمىز ئۈچۈن ئەڭ ئېسىل ئۈلگە قالدۇرغان.
14. بىز ئۆز-ئۆزىمىزگە توغرا كۆزقاراشتا بولۇش ھەققىدە ئەيسادىن نېمىلەرنى ئۆگىنەلەيمىز؟
14 ئەيسا ئەگەشكۈچىلىرىگە ئۆزلىرىگە قارىتا توغرا قاراشتا بولۇشنى ئۆگەتكەن. ئەيسا بىر قېتىم ئۇلارغا: «لېكىن، سىلەرنىڭ بېشىڭلاردىكى چېچىڭلارنىڭ ھەممىسى سانالغاندۇر»،— دېگەن (مەتتا 10:30). بولۇپمۇ، ئۆز-ئۆزىمىزگە سەلبىي قاراشتا بولساق، بۇ سۆزلەر كۆڭلىمىزگە تەسەللى بېرىدۇ. ئاسماندىكى ئاتىمىز بىزگە كۆڭۈل بۆلىدۇ، ئۇنىڭ نەزەرىدە بىز ئىنتايىن قەدىر-قىممەتلىك. ئەگەر يەھۋا بىزنىڭ ئۇنىڭغا ئىبادەت قىلىشىمىزغا يول قويسا، ئۇ بىزنى يېڭى دۇنيادا مەڭگۈ ياشاشقا لايىق دەپ قارايدۇ. بىز ھەرگىزمۇ ئۇنى خاتا ھۆكۈم چىقىرىدۇ دەپ ئويلىماسلىقىمىز لازىم.
ئۆزۈمىزگە قارىتا توغرا كۆزقاراشتا بولمىساق، قانداق بەرىكەتلەرنى قولدىن بېرىپ قويىشىمىز مۇمكىن؟ (15-ئابزاسقا قاراڭ) f
15. (1) «كۈزىتىش مۇنارى» بىزنى قانداق تەڭپۇڭ قاراشنى يېتىلدۈرۈشكە دەۋەت قىلغان؟ (2) 24-بەتتىكى سۈرەتتە كۆرسىتىلگەندەك، ئەگەر ئۆزىمىز ھەققىدە بەك كۆپ ئويلانساق، قانداق بەرىكەتلەرنى قولدىن بېرىپ قويىمىز؟
15 تەخمىنەن 15يىل ئىلگىرى، «كۈزىتىش مۇنارى» ژۇرنىلىدا، ئۆز-ئۆزىمىزگە تەڭپۇڭ كۆزقاراشتا بولۇشىمىز كېرەكلىكى تەكىتلەنگەن ئىدى: «ئېنىقكى، بىز ئۆز-ئۆزىمىز ھەققىدە بەك كۆپ ئويلىماسلىقىمىز كېرەك، بولمىسا تەكەببۇر بولۇپ كېتىمىز. شۇنداقتىمۇ، ئۆزىمىز ھەققىدە ئىنتايىن ئاز ئويلىماسلىقىمىز لازىم، بولمىسا چۈشكۈنلۈككە چۈشۈپ كېتىمىز. ئەكسىچە، مەقسىتىمىز بولسا ئۆزىمىزگە بولغان مۇۋاپىق كۆزقاراشنى يېتىلدۈرۈپ، ئۆزىمىزنىڭ ئارتۇقچىلىقى ۋە كەمچىلىكىنى چۈشىنىدىغان بولۇشتۇر. بىر ئېتىقادچى قېرىنداش مۇنداق دەيدۇ: ‹مەن بەك يامان كىشى ئەمەس، ئەمما كىشىلەر ئارىسىدا ياخشى دەپ ئاتالغان كىشىمۇ ئەمەس. باشقا كىشىلەرگە ئوخشاشلا، مېنىڭ ياخشى تەرەپلىرىم ۋە ناچار تەرەپلىرىم بار c›». بىز بۇنىڭدىن نېمە ئۈچۈن ئۆز-ئۆزىمىزگە تەڭپۇڭ كۆزقاراشتا بولۇشنىڭ مۇھىملىقىنى ئېنىق كۆرۈۋالالايمىز، شۇنداق ئەمەسمۇ؟
16. نېمە ئۈچۈن يەھۋا بىزگە دانا كۆرسەتمىلەرنى بېرىدۇ؟
16 يەھۋا ئۆز سۆزى ئارقىلىق، بىزگە دانا كۆرسەتمىلەرنى بېرىدۇ. ئۇنىڭ بىزگە بولغان مۇھەببىتى چوڭقۇر ۋە ئۇ بىزنىڭ خۇشال بولۇشىمىزنى خالايدۇ (يەشايا 48:17، 18). ئەڭ دانا قارار بولسا — ھاياتىمىزدا ياراتقۇچىمىز يەھۋاغا خىزمەت قىلىشنى بىرىنچى ئورۇنغا قويۇپ، ئۇنى خۇرسەن قىلىش ۋە ئۆزىمىزمۇ ھەقىقىي خۇشال-خۇراملىققا ئېرىشىشتۇر. شۇنداق قىلغىنىمىزدا، پۇل، ئىش ياكى ئۆز-ئۆزىمىزگە ھەددىدىن زىيادە دىققەت قاراتمايمىز. شۇنداقلا، نۇرغۇن قىيىنچىلىقلارغا يولۇقۇشتىن ساقلىنىپ قالىمىز. ھەربىرىمىز دانا كىشى بولۇشقا بەل باغلاپ، يەھۋانىڭ كۆڭلىنى خۇشال قىلايلى!—پەند. نە 23:15.
37-ناخشا مۇقەددەس كىتاب — خۇدانىڭ ئىلھامى بىلەن يېزىلغان
a سۇلايمان بىلەن ئەيسا پەيغەمبەرلەر ئىنتايىن دانا كىشىلەر بولغان ئىدى. يەھۋا خۇدا ئۆزى ئۇلارغا دانالىق ئاتا قىلغان. پۇل، ئىش ۋە ئۆزىمىزگە قارىتا تەڭپۇڭ قاراشتا بولۇش ھەققىدە پادىشاھ سۇلايمان ۋە ئەيسا مەسىھنىڭ مۇقەددەس يازمىلاردا يېزىلغان نەسىھەت سۆزلىرىدىن نېمىلەرنى ئۆگىنەلەيدىغانلىقىمىزنى كۆرىمىز. بىز يەنە بەزى ئېتىقادچى قېرىنداشلىرىمىزنىڭ مۇقەددەس كىتابتىن ئۆگەنگەن نەسىھەتلەرگە دانالىق بىلەن قولاق سېلىپ، قانداق پايدىغا ئېرىشكەنلىكىنى كۆرىمىز.
b «كۈزىتىش مۇنارى»، 2015-يىل، 1-فېۋرال سانىدىكى «جاپالىق ئىش-ئەمگەكتىن كېلىدىغان ھۇزۇر-ھالاۋەت» (باشقا تىلدا) ناملىق ماقالىنى ئوقۇڭ.
c «كۈزىتىش مۇنارى»، 2005-يىل، 1-ئاۋغۇست سانىدىكى «مۇقەددەس كىتاب خۇشاللىق تېپىشىڭىزغا ياردەم بېرەلەيدۇ» (باشقا تىلدا) ناملىق ماقالىنى قاراڭ.
d سۈرەتتە: جون بىلەن توم بىر جامائەتتىكى ئىككى ياش بۇرادەر. جون نۇرغۇن ۋاقىتنى ماشىنىسىنى ئاسراشقا سەرپ قىلىدۇ. توم ماشىنىسىنى ئىشلىتىپ، باشقىلارنىڭ ۋەز خىزمىتىگە قاتنىشىشىغا ۋە جامائەت يىغىلىشلىرىغا بېرىشىغا ياردەم بېرىدۇ.
e سۈرەتتە: جون ئىش ۋاقتىدىن سىرت ۋاقىت قوشۇپ ئىشلەيدۇ. ئۇ خوجايىنىنى ئۈمىدسىزلەندۈرۈشنى خالىمايدۇ. شۇڭا، خوجايىنى ئۇنىڭدىن كېچىپ ئىشتىن چۈشۈشنى تەلەپ قىلغاندا، جون ماقۇل بولىدۇ. شۇ كۈنى كەچتە، ياردەمچى خىزمەتچى بولغان توم بىر ئاقساقالغا ھەمراھ بولۇپ پادىلارنى يوقلايدۇ. ئىلگىرى توم خوجايىنىغا ئۆزىنىڭ يەھۋاغا ئىبادەت قىلىش بىلەن مۇناسىۋەتلىك ئىش-پائالىيەتلىرى ئۈچۈن ھەپتە بىر نەچچە ئاخشام ۋاقىت چىقارغانلىقتىن، شۇ كۈنلىرى كەچتە ئىشلىيەلمەيدىغانلىقىنى چۈشەندۈرگەن.
f سۈرەتتە: جون ئۆز-ئۆزى ھەققىدە بەك كۆپ ئويلايدۇ. توم ھاياتىدا يەھۋانى ئەڭ مۇھىم ئورۇنغا قويىدۇ. نەتىجىدە، ئۇ چوڭ يىغىلىش زالىنى يېڭىلاشقا ياردەم بەرگەندە، نۇرغۇن يېڭى دوستلارنى تاپتى.
