20-تەتقىق ماقالىسى
دۇئالىرىمىزنىڭ سۈپىتىنى ياخشىلايلى
«كۆڭلۈڭلارنى ئۇنىڭغا تۆكۈڭلار».—زەبۇر 62:8.
22-ناخشا يەھۋا مېنىڭ پادىچىمدۇر
بۇ ماقالىدە a
بىز ھەر دائىم دۇئادا يەھۋاغا يېقىنلىشالايمىز ۋە ھاياتىمىزنىڭ ھەر بىر ساھەسىدە ئۇنىڭدىن كۆرسەتمە سورىيالايمىز (1-ئابزاسقا قاراڭ)
1. يەھۋا ئۆزىگە ئىبادەت قىلغۇچىلارنى نېمە قىلىشقا چاقىرىدۇ؟ (رەسىمگە ھەم قاراڭ)
بىز تەسەللى ۋە كۆرسەتمىلەرگە مۇھتاج بولغاندا، كىمدىن ياردەم سورىيالايمىز؟ سوئالنىڭ جاۋابى ئېنىق، بىز يەھۋا خۇداغا دۇئا قىلالايمىز. يەھۋا بىزنى دەل شۇنداق قىلىشقا چاقىرىدۇ. مۇقەددەس كىتاب بىزگە: «توختىماي دۇئا قىلىڭلار»،— دەيدۇ. شۇڭا بىلىمىزكى، ياراتقۇچىمىز ھەر دائىم ئۇنىڭغا دۇئا قىلىشىمىزنى خالايدۇ (1-سالونىكا. 5:17). بىز دۇئادا بىمالال ئۇنىڭغا يېقىنلىشالايمىز ۋە ھاياتىمىزنىڭ ھەر ساھەسىدە ئۇنىڭدىن كۆرسەتمىلەرنى سورىيالايمىز (پەند. نە 3:5، 6). خۇدايىمىز يەھۋا سېخىي بولغاچ، بىزنىڭ قانچە قېتىم ياكى قانچە ئۇزۇن ۋاقىت دۇئا قىلىشىمىزغا چەك قويمايدۇ.
2. بۇ ماقالىدە، نېمىلەرنى مۇھاكىمە قىلىمىز؟
2 بىز چىن قەلبىمىزدىن يەھۋاغا مىننەتدار. چۈنكى، ئۇ بىزنى دۇئا قىلىش شان-شەرىپىگە ئىگە قىلدى. بىراق، قىلىشقا تېگىشلىك ئىشلىرىمىز كۆپ بولغاچ، دۇئا قىلىش ئۈچۈن ۋاقىت چىقىرىشتا قىيىنىلىشىمىز مۇمكىن. بەلكىم، ئۆزىمىز ھەم دۇئالىرىمىزنىڭ سۈپىتىنى ياخشىلاشنىڭ زۆرۈرلىكىنى ھېس قىلدۇق. خۇداغا شۈكرى، بىز مۇقەددەس كىتابتىن نۇرغۇن تەسەللى ۋە كۆرسەتمىلەرنى بېرىدىغان ئايەتلەرنى تاپالايمىز. بۇ ماقالىدە، دۇئا قىلىشقا ۋاقىت چىقىرىش توغرىسىدا ئەيسا مەسىھنىڭ ئۈلگىسىدىن نېمىلەرنى ئۆگىنەلەيدىغانلىقىمىزنى مۇھاكىمە قىلىمىز. ئۇنىڭدىن باشقا، دۇئالىرىمىزنىڭ سۈپىتىنى قانداق ياخشىلاش ۋە دۇئالىرىمىزدا تىلغا ئېلىشقا تېگىشلىك بەش مۇھىم مەزمۇن ھەققىدە ئۆگىنىمىز.
ئەيسا دۇئا قىلىش ئۈچۈن ۋاقىت چىقارغان
3. ئەيسا دۇئا ھەققىدە نېمىنى چۈشەنگەن؟
3 يەھۋا دۇئالىرىمىزنى ئىنتايىن قەدىرلەيدىغانلىقىنى ئەيسا چۈشەنگەنىدى. ئۇ يەر يۈزىگە كېلىشتىن ئۇزۇن زامان ئىلگىرى، ئاتىسى سادىق ئەر-ئايال خىزمەتچىلىرىنىڭ دۇئاسىغا جاۋاب بەرگەنلىكىنى كۆرگەن. مەسىلەن، ھاننا، داۋۇت ۋە ئىلياس پەيغەمبەرلەرنىڭ چىن قەلبىدىن قىلغان دۇئالىرىغا ئاتىسى جاۋاب بەرگەندە، ئەيسا ئۇنىڭ يېنىدا ئىدى (1-سام. 1:10، 11، 20؛ 1-پادىشاھ. 19:4–6؛ زەبۇر 32:5). شۇڭا، ئەيسا ئۆز شاگىرتلىرىغا دائىم ئىشەنچ بىلەن دۇئا قىلىشنى ئۆگەتكەن.—مەتتا 7:7–11.
4. ئەيسانىڭ دۇئالىرىدىن نېمىلەرنى ئۆگىنىمىز؟
4 ئەيسا ئۆزى يەھۋا خۇداغا دۇئا قىلىش ئارقىلىق شاگىرتلىرىغا ئۈلگە قالدۇرغان. ۋەز خىزمىتى جەريانىدا، ئەيسا دائىم دۇئا قىلغان. ئۇ دۇئا قىلىش ئۈچۈن ۋاقىت چىقىرىشى كېرەك ئىدى. چۈنكى، ئۇ ھەر دائىم ئالدىراش ۋە ئەتراپىدا نۇرغۇن كىشىلەر ئۇنىڭغا ئەگىشىپ يۈرەتتى (ماركۇس 6:31، 45، 46). ئۇ يالغۇز قېلىپ، دۇئا قىلالىشى ئۈچۈن تاڭ سەھەردە ئورنىدىن تۇرغان (ماركۇس 1:35). كەم دېگەندە بىر قېتىم، ئۇ مۇھىم قارار چىقىرىشتىن ئاۋۋال، كېچىچە دۇئا قىلغان (لۇقا 6:12، 13). ھەزرىتى ئەيسا ئۆلۈشتىن بۇرۇنقى كېچىسى، پۈتۈن دىققىتىنى ئۆزىنىڭ يەر يۈزىدىكى ۋەزىپىسىنىڭ ئەڭ قىيىن قىسىمىنى ئورۇنلاشقا قاراتقاچ، قايتا-قايتا، تەكرار دۇئا قىلغان.—مەتتا 26:39، 42، 44.
5. دۇئا قىلغاندا، ئەيسانى قانداق ئۈلگە قىلالايمىز؟
5 ئەيسانىڭ ئۈلگىسى بىزگە ھەرقانچە ئالدىراش بولساقمۇ، دۇئا قىلىشقا ۋاقىت ئاجرىتىشىمىز كېرەكلىكىنى ئۆگىتىدۇ. ئەيساغا ئوخشاش بىز دۇئا قىلىش ئۈچۈن ۋاقىت ئاجرىتىشىمىز كېرەك. بۇنىڭ ئۈچۈن، بەلكىم بىراز ئەتىگەن تۇرۇشقا ياكى سەل كەچرەك يېتىشقا توغرا كېلىدۇ. شۇنداق قىلساق، يەھۋانىڭ بۇ ئالاھىدە سوۋغىسى ئۈچۈن مىننەتدار ئىكەنلىكىمىزنى كۆرسىتىمىز. لىنى ئىسىملىك بىر قېرىنداش تۇنجى قېتىم دۇئا قىلىش ئىمتىيازى ھەققىدە ئۆگەنگەندە، ئۇ ئىنتايىن ھاياجانلانغان ۋە مىننەتدار بولغان. ئۇ ئەسلەپ، مۇنداق دەيدۇ: «مەن يەھۋا بىلەن خالىغان ۋاقىتتا پاراڭلىشالايدىغانلىقىمنى بىلگەندە، بۇ ماڭا يەھۋانى يېقىن دوستۇم دەپ قاراشقا ۋە دۇئالىرىمنى ياخشىلاش ئۈچۈن تىرىشىشقا ياردەم بەردى». شەك-شۈبھىسىزكى، كۆپىنچىمىز مۇشۇنىڭغا ئوخشاش ھېس-تۇيغۇدا بولىمىز. شۇڭا، دۇئالىرىمىزدا تىلغا ئېلىش زۆرۈر بولغان بەش مۇھىم مەزمۇن ھەققىدە كۆرۈپ باقايلى.
دۇئادا تىلغا ئېلىش زۆرۈر بولغان بەش مۇھىم مەزمۇن
6. ۋەھىيلەر 4:10، 11-ئايەتلەر، يەھۋانى نېمىگە لايىق دەيدۇ؟
6 يەھۋانى مەدھىيىلەڭ. بىزنى ئەيمەندۈرىدىغان ئاجايىپ بىر كۆرۈنۈشتە، ئەلچى يۇھاننا ئاسماندا يەھۋاغا ئىبادەت قىلىۋاتقان 24 ئاقساقالنى كۆرگەن. ئۇلار خۇدانى مەدھىيىلەپ شۇنداق دېيىشكەن: «سەن شان-شەرەپ، ئۇلۇغلۇق ۋە كۈچ-قۇدرەتكە لايىقسەن» (ۋەھىيلەر 4:10، 11-نى ئوقۇڭ). سادىق پەرىشتىلەرنىڭمۇ يەھۋانى مەدھىيىلەش ۋە ئۇلۇغلاش ئۈچۈن نۇرغۇن سەۋەبلىرى بار. ئۇلار ئاسماندا ياراتقۇچى بىلەن بىللە ۋە ئۇنى ياخشىراق تونۇيدۇ. ئۇلار يەھۋانىڭ قىلىۋاتقان ئىشلىرىنى كۆرگەندە، ئۇنىڭ پەزىلەتلىرىنى ئۆگىنىدۇ. يەھۋانىڭ قانداق ھەرىكەت قىلىدىغانلىقىنى كۈزەتكىنىدە، بۇ ئۇلارنى ئۇنى مەدھىيىلەشكە دەۋەت قىلىدۇ.—ئايۇپ 38:4–7.
7. نېمە ئۈچۈن يەھۋانى مەدھىيىلەيمىز؟
7 بىزمۇ چوقۇم دۇئالىرىمىزدا يەھۋا خۇدانى مەدھىيىلىشىمىز كېرەك. بىز ئۇنى چىن قەلبىمىزدىن سۆيىدىغانلىقىمىزنى ۋە نېمە ئۈچۈن ئۇنى ھۆرمەتلەيدىغانلىقىمىزنى ئېيتىش ئارقىلىق ئۇنى مەدھىيىلەيمىز. مۇقەددەس كىتابنى ئوقۇغاندا ۋە تەتقىق قىلغاندا، يەھۋانىڭ سىزنى ئۆزىگە ئالاھىدە جەلپ قىلىدىغان پەزىلەتلىرىنى بايقاشقا تىرىشىڭ (ئايۇپ 37:23؛ رىملىقلار 11:33). ئاندىن يەھۋاغا، ئاشۇ پەزىلەتلىرى ھەققىدە قانداق ھېس-تۇيغۇدا بولىدىغانلىقىڭىزنى ئېيتىڭ. بىزگە ۋە بارلىق ئېتىقادچى قېرىنداشلىرىمىزغا ياردەم بېرىۋاتقانلىقى ئۈچۈن يەھۋانى مەدھىيىلەڭ. ئۇ بىزگە داۋاملىق غەمخورلۇق قىلىۋاتىدۇ ۋە قوغداۋاتىدۇ.—1-سام. 1:27؛ 2:1، 2.
8. يەھۋا خۇداغا مىننەتدارلىقىمىزنى بىلدۈرۈشنىڭ قانداق نۇرغۇن سەۋەبلىرى بار؟ (1-سالونىكالىقلار 5:18)
8 يەھۋا خۇداغا مىننەتدارلىق بىلدۈرۈڭ. دۇئالىرىمىزدا يەھۋاغا مىننەتدارلىق بىلدۈرۈشىمىزنىڭ نۇرغۇن سەۋەبلىرى بار (1-سالونىكالىقلار 5:18-نى ئوقۇڭ). بىز ئىگە بولغان ھەرقانداق ياخشى نەرسىلەر ئۈچۈن، ئۇنىڭغا رەھمەت ئېيتالايمىز (ياقۇپ 1:17). ئەمەلىيەتتە، بارلىق ياخشى ھەدىيەلەر ئۇنىڭدىن كەلگەن. مەسىلەن، يەرنىڭ گۈزەللىكى، مەۋجۇداتلارنىڭ ئاجايىپ يارىتىلغانلىقى ئۈچۈن مىننەتدارلىق بىلدۈرەلەيمىز. يەنە ھاياتىمىز، ئائىلىمىز، دوستلىرىمىز ۋە ئۈمىدىمىز ئۈچۈن رەھمەت ئېيتالايمىز. ئۇنىڭدىن باشقا، يەھۋا بىلەن دوستلۇق ئورنىتىش ۋە ئۇنىڭدىن بەھرىمەن بولۇش پۇرسىتىنى بەرگىنى ئۈچۈن رەھمەت ئېيتىشنى خالايمىز.
9. نېمە ئۈچۈن يەھۋاغا مىننەتدار بولۇشنى ئۆگىنىمىشىمىز كېرەك؟
9 بىز شەخسەن يەھۋاغا مىننەتدارلىقىمىزنى بىلدۈرۈشنىڭ سەۋەبلىرى ھەققىدە ئويلىنىشقا ئالاھىدە ۋاقىت چىقارساق بولىدۇ. بۇ دۇنيادا مىننەتدارسىز كىشىلەر كۆپىيىپ كەتتى. بىز شۇلارنىڭ ئارىسىدا ياشاۋاتىمىز. كىشىلەر ھەمىشە ئۆزىدە بار نەرسىلەرگە مىننەتدارلىق بىلدۈرۈشنىڭ ئورنىغا، ئەكسىچە ئۆزى ئېھتىياجلىق نەرسىلەرگە كۆڭۈل بۆلىدۇ. ئەگەر بىز ئۇنداق كۆز قاراشنىڭ تەسىرىگە ئۇچرىساق، دۇئالىرىمىز پەقەت ئۆزىمىز ئېرىشمەكچى بولغان نەرسىلەرنىڭ تىزىملىكىگە ئايلىنىپ قېلىشى مۇمكىن. شۇنداق ئىش يۈز بېرىشىنىڭ ئالدىنى ئېلىش ئۈچۈن، يەھۋانىڭ بىز ئۈچۈن قىلغان بارلىق ئىشلىرىغا مىننەتدار بولۇشنى داۋاملىق ئۆگىنىشىمىز لازىم.—لۇقا 6:45.
يەھۋاغا بولغان مىننەتدارلىقىمىزنى بىلدۈرۈش بەرداشلىق بېرىشىمىزگە ياردەم بېرەلەيدۇ (10-ئابزاسقا قاراڭ)
10. مىننەتدارلىق ھېس-تۇيغۇسى بىر قېرىندىشىمىزنىڭ بەرداشلىق بېرىشىگە قانداق ياردەم بەرگەن؟ (رەسىمگە ھەم قاراڭ)
10 مىننەتدارلىق بىزنىڭ قىيىنچىلىقلارغا بەرداشلىق بېرىشىمىزگە ياردەم بېرەلەيدۇ. «كۈزىتىش مۇنارى»، 2015-يىل، 15-يانۋار سانىدىكى كيۇڭ-سۇك ئىسىملىك قېرىنداشنىڭ مىسالىنى كۆرۈپ باقايلى. ئۇنىڭغا ئۆپكە راكىنىڭ ئاخىرقى باسقۇچى دەپ دىئاگنوز قويۇلغان. ئۇ ئۆزىنىڭ ھېس-تۇيغۇلىرى ھەققىدە شۇنى ئېتىراپ قىلغان: «بۇ سالامەتلىك مەسىلەم مېنى قاتتىق ئۈمىدسىزلەندۈرگەن. مەن ھەممە نەرسىنى يوقىتىپ قويغاندەك ھېس قىلىپ، ئىنتايىن قورقۇپ كەتتىم». مۇشۇ ئەھۋالدا، ئۇنىڭ بەرداشلىق بېرىشىگە نېمە ياردەم قىلغان؟ ھەر كۈنى كېچىسى، ئۇخلاشتىن بۇرۇن ئۆينىڭ ئۆگزىسىگە چىقىپ، ئۆزى مىننەتدار بولغان بەش نەرسىنى تىلغا ئېلىپ، يۇقىرى ئاۋازدا دۇئا قىلغانلىقىنى ئېيتقان. بۇ ئۇنىڭ غەم-ئەندىشىسىنى ئازايتىشىغا ياردەم بەرگەن ۋە ئۇنى يەھۋاغا بولغان سۆيگۈسىنى ئىپادىلەشكە دەۋەت قىلغان. ئۇ يەھۋانىڭ سادىق خىزمەتچىلىرى سىناققا دۇچ كەلگەندە، ئۇلارنى قانداق قوللاپ-قۇۋۋەتلەيدىغانلىقىنى باشتىن كەچۈرگەن ۋە ھاياتىمىزدا سىناقلارغا قارىغاندا، بەرىكەتلەرنىڭ كۆپرەك بولىدىغانلىقىنى ھېس قىلغان. قېرىندىشىمىز كيۇڭ-سۇكقا ئوخشاش، بىر سىناقنى باشتىن كەچۈرۈۋاتقان بولساقمۇ، خۇداغا مىننەتدار بولۇشىمىز ئۈچۈن نۇرغۇن سەۋەبلىرىمىز بار. ئۇنىڭغا دۇئادا مىننەتدارلىقىمىزنى بىلدۈرۈش بىزنىڭ سەۋر-تاقەت قىلىشىمىز ۋە خۇشاللىقىمىزنى يوقاتماسلىقىمىزغا ياردەم بېرەلەيدۇ.
11. نېمە ئۈچۈن ئەيسا ئاسمانغا قايتىپ كەتكەندىن كېيىن، ئۇنىڭ شاگىرتلىرى جاسارەتكە مۇھتاج بولغان؟
11 ۋەز خىزمىتىدە يەھۋادىن جاسارەت بېرىشنى سوراڭ. ئاسمانغا قايتىشتىن سەل ئاۋۋال، ئەيسا مەسىھ ئۆز شاگىرتلىرىغا يېرۇسالىمدا، پۈتۈن يەھۇدىيە، سامارىيە ۋە دۇنيانىڭ باشقا يىراق جايلىرىدا، ئۇنىڭ ئۈچۈن گۇۋاھلىق بېرىشى كېرەكلىكىنى ئەسكەرتكەن (ئەلچى. 1:8؛ لۇقا 24:46–48). شۇنىڭدىن ئۇزاق ئۆتمەي، يەھۇدىي دىنىي رەھبەرلىرى ئەلچى پېترۇس ۋە يۇھاننانى يەھۇدىيلارنىڭ ئالىي سوتىنىڭ ئالدىغا ئېلىپ كېلىپ، بۇ ساداقەتمەن كىشىلەرنى ۋەز ئېيتىشنى توختىتىشقا بۇيرىغان، ھەتتا ئۇلارغا تەھدىت سالغان (ئەلچى. 4:18، 21). پېترۇس بىلەن يۇھاننا بۇنىڭغا قانداق ئىنكاس قايتۇرغان؟
12. ئەلچىلەر 4:29، 31-ئايەتلەر، شاگىرتلارنىڭ نېمە ئىش قىلغانلىقىنى ئېيتىدۇ؟
12 يەھۇدىي دىنىي رەھبەرلىرىنىڭ تەھدىتىگە پېترۇس ۋە يۇھاننا مۇنداق جاۋاب قايتۇرغان: «خۇدانىڭ نەزىرىدە، خۇداغا ئەمەس، سىلەرگە بويسۇنۇش توغرا بولامدۇ؟ بۇنىڭغا ئۆزۈڭلار بىر نېمە دەڭلار! لېكىن، بىز كۆرگەن ۋە ئاڭلىغانلىرىمىزنى ئېيتماي تۇرالمايمىز» (ئەلچى. 4:19، 20). پېترۇس بىلەن يۇھاننا قويۇپ بېرىلگەندىن كېيىن، شاگىرتلار يەھۋاغا، ئۇنىڭ ئىرادىسىنى ئورۇنلاش ئۈچۈن يۇقىرى ئاۋازدا دۇئا قىلىپ، مۇنداق دېگەن: «سۆزلىرىڭنى يۈرەكلىك يەتكۈزۈش ئۈچۈن خىزمەتچىلىرىڭگە جاسارەت بەرگىن». يەھۋا ئۇلارنىڭ بۇ سەمىمىي دۇئاسىغا جاۋاب قايتۇرغان.—ئەلچىلەر 4:29، 31-نى ئوقۇڭ.
13. جىن-خۇكنىڭ مىسالىدىن نېمىلەرنى ئۆگىنەلەيمىز؟
13 ھەتتا ھۆكۈمەتلەر بىزدىن ۋەز ئېيتىشنى توختىتىشنى تەلەپ قىلسا، بىز بىرىنچى ئەسىردىكى شاگىرتلارنى ئۈلگە قىلىپ، ۋەز ئېيتىشنى داۋاملاشتۇرىمىز. بىتەرەپلىكنى ساقلىغىنى ئۈچۈن تۈرمىگە تاشلانغان جىن-خۇك ئىسىملىك بۇرادەرنىڭ مىسالىنى كۆرۈپ باقايلى. تۈرمىدە، ئۇ يالغۇز سولاپ قويۇلغان بىر قىسىم مەھبۇسلاردىن خەۋەر ئېلىشقا تەيىنلەنگەن. ئەمما، ئۇ ئۇلار بىلەن پەقەت بەلگىلەنگەن ۋەزىپىسىگە مۇناسىۋەتلىك ئىشلار توغرىسىدا پاراڭلىشالايتتى. مۇقەددەس كىتاب توغرىسىدا پاراڭلىشىشقا بولماتتى. ئۇ ھەر بىر پۇرسەتتە ھەقىقەتنى سۆزلەش ئۈچۈن جاسارەت ۋە پەم-پاراسەت سوراپ دۇئا قىلغان (ئەلچى. 5:29). ئۇ مۇنداق دەيدۇ: «يەھۋا دۇئالىرىمغا جاۋاب بېرىپ، كامىرلارنىڭ ئىشىكلىرى ئالدىدىلا بەش مىنۇتلۇق، قىسقا مۇقەددەس كىتاب تەتقىقىنى باشلاش ئۈچۈن ماڭا جاسارەت ۋە ئەقىل-پاراسەت بەردى. ئاندىن كەچتە ئەتىسى مەھبۇسلارغا بېرىش ئۈچۈن خەتلەرنى يازدىم». يەھۋا ۋەز خىزمىتىمىزنى ئورۇنلاشقا ياردەم قىلىدىغانلىقىغا بىزمۇ ئىشىنەلەيمىز. جىن-خۇكقا ئوخشاش، جاسارەت ۋە ئەقىل-پاراسەت سوراپ، دۇئا قىلالايمىز.
14. قىيىنچىلىقلارغا بەرداشلىق بەرگەندە بىزگە نېمە ياردەم بېرەلەيدۇ؟ (زەبۇر 37:3، 5)
14 قىيىنچىلىقلاردا بەرداشلىق بېرىشىڭىز ئۈچۈن يەھۋادىن ياردەم سوراڭ. نۇرغۇنلىرىمىز تەن-سالامەتلىكىمىز ناچار ياكى ھېس-تۇيغۇلىرىمىز تۇراقسىز بولۇش، يېقىنلىرىمىزدىن ئايرىلىش، تۇرمۇشىمىز شارائىتىمىز قىيىن بولۇش، زىيانكەشلىك ياكى باشقا قىيىنچىلىقلارغا بەرداشلىق بېرىپ كېلىۋاتىمىز. تارقىلىشچان كېسەللىكلەر ۋە ئۇرۇشلارغا ئوخشاش نۇرغۇنلىغان ئىشلار قىيىنچىلىقلارغا بەرداشلىق بېرىشىمىزنى تېخىمۇ قىيىنلاشتۇرۇۋاتىدۇ. يەھۋاغا ئىچ-باغرىڭىزنى تۆكۈپ بېرىڭ. خۇددى يېقىن دوستىڭىزغا ئېيتقاندەك، ئۆزىڭىزنىڭ ھال-ئەھۋالىنى، ھېس-تۇيغۇلىرىنى سۆزلەپ بېرىڭ. شۇنىڭغا ئىشىنىڭكى، يەھۋا سىزگە يار-يۆلەك بولىدۇ.—زەبۇر 37:3، 5-نى ئوقۇڭ.
15. قىيىنچىلىقلارغا بەرداشلىق بېرىشىمىزگە دۇئا قانداق ياردەم بېرەلەيدۇ؟ مىسال كەلتۈرۈڭ.
15 داۋاملىق دۇئا قىلىش قىيىنچىلىقلارغا بەرداشلىق بېرىشىمىزگە ياردەم بېرىدۇ (رىملىقلار 12:12). يەھۋا ئۆزىگە ئىبادەت قىلغۇچىلارنىڭ نېمىلەرنى باشتىن كەچۈرىدىغانلىقىنى بىلىدۇ ۋە ئۇلارنىڭ ياردەم ئۈچۈن قىلغان نالە-پەريادلىرىنى ئاڭلايدۇ (زەبۇر 145:18، 19). 29 ياشتىكى كرىستى ئىسىملىك بىر پىدائىي ۋەز ئېيتقۇچى بۇ سۆزنىڭ ھەقىقەت ئىكەنلىكىنى باشتىن ئۆتكۈزگەن. ئۇ كۈتۈلمىگەندە ئېغىر ئاغرىققا گىرىپتار بولغان. نەتىجىدە، ئۇ چۈشكۈنلۈككە پېتىپ قالغان. كېيىنرەك، ئاپىسىغا كېسىلىنىڭ ئاخىرقى باسقۇچى دەپ دىئاگنوز قويۇلغانلىقىنى بىلگەن. كرىستى مۇنداق دەيدۇ: «مەن ھەر كۈنى مۇھتاج بولىدىغان كۈچ-قۇۋۋەتنى سوراپ، يەھۋاغا دۇئا قىلدىم. ئىبادەت يىغىلىشلىرىغا قاتنىشىش، شەخسىي تەتقىق قىلىش ئارقىلىق روھىي ئىش-پائالىيەتلەر بىلەن مەشغۇل بولۇش ئادىتىنى قەتئىي داۋاملاشتۇرۇشقا تىرىشتىم. ئاشۇ ئېغىر كۈنلەردە بەرداشلىق بېرىشىمگە دۇئا ياردەم بەردى. يەھۋانىڭ ھەمىشە ماڭا يېقىن تۇرغانلىقىنى بىلەتتىم. بۇنى بىلىش مەن ئۈچۈن تەسەللى بولدى. گەرچە سالامەتلىكىم دەرھاللا ئەسلىگە كېلىپ، قىيىنچىلىقلىرىم ھەل قىلىنمىسىمۇ، يەھۋا دۇئالىرىمغا قۇلاق سېلىپ، ماڭا تىنچ-خاتىرجەملىك ئاتا قىلدى». بىز چوقۇم شۇنى ئۇنتۇماسلىقىمىز كېرەككى، «خۇداغا ۋاپادار ئىنسانلارنى بېشىغا كەلگەن سىناقلاردىن قانداق قۇتۇلدۇرۇشنى، . . . يەھۋا بىلىدۇ».—2-پېتر. 2:9.
ئازدۇرۇلۇشقا قارشى تۇرۇش ئۈچۈن (1) يەھۋادىن ياردەم سوراپ دۇئا قىلىڭ، (2) دۇئالىرىڭىزغا ماس ئەمەلىي ھەرىكەت قىلىڭ، (3) يەھۋا بىلەن بولغان مۇناسىۋىتىڭىزنى كۈچەيتىڭ (16، 17-ئابزاسلارغا قاراڭ)
16. نېمىشقا بىز ئازدۇرۇلۇشقا قارشى تۇرۇش ئۈچۈن، يەھۋانىڭ ياردىمىگە مۇھتاج؟
16 ئازدۇرۇلۇشقا قارشى تۇرۇش ئۈچۈن يەھۋادىن ياردەم سوراڭ. بىز نامۇكەممەل بولغاچ، ھەمىشە ئازدۇرۇلۇشقا قارشى داۋاملىق كۈرەش قىلىشىمىزغا توغرا كېلىدۇ. شەيتان پۈتۈن كۈچى بىلەن، بۇ كۈرەشنى تېخىمۇ قىيىنلاشتۇرۇشقا تىرىشىۋاتىدۇ. ئۇ ئەخلاقسىز ئويۇن-تاماشىلار ئارقىلىق ئوي-پىكىرىمىزنى چىرىكلەشتۈرۈشكە تىرىشىدۇ. شۇنداق ئويۇن-تاماشىلار ئەقلىمىزنى ناپاك ئوي-خىياللارغا تولدۇرىدۇ. ئاشۇ ناپاك ئوي-خىياللار بىزنى يەھۋانىڭ ئالدىدا ناپاك قىلىدۇ، ھەتتا ئېغىر گۇناھلارنى ئۆتكۈزۈشكە باشلىيالايدۇ.—ماركۇس 7:21–23؛ ياقۇپ 1:14، 15.
17. ئازدۇرۇلۇشتىن ساقلىنىش ئۈچۈن دۇئا قىلغاندىن كېيىن، چوقۇم نېمە ئىش قىلىشىمىز كېرەك؟ (رەسىمگە ھەم قاراڭ)
17 خاتا ئىش قىلىشقا مايىل بولغاندا، ئاشۇ ئېزىقتۇرۇشنى يەڭمەكچى بولساق، يەھۋانىڭ ياردىمىگە مۇھتاج بولىمىز. ئەيسانىڭ ئۈلگىلىك دۇئاسىدا مۇنداق سۆزلەر بار: «ئازدۇرۇلۇشىمىزغا يول قويمىغىن، بىزنى ياۋۇزنىڭ قولىدىن قۇتقۇزغايسەن» (مەتتا 6:13). يەھۋا بىزگە ياردەم بېرىشنى خالايدۇ. ئەمما، بىز ئۇنىڭدىن ياردەم سورىشىمىز كېرەك. يەنە دۇئالىرىمىزغا ماس ھەرىكەت قىلىشىمىز كېرەك. بىز بەزى ئەمەلىي قەدەملەرنى باسساق، شەيتاننىڭ بۇ دۇنياسىدا كەڭ ئومۇملاشقان ئوي-پىكىر ۋە ئىدىيىلەرنى ئوقۇش ياكى ئاڭلاشتىن ئۆزىمىزنى ئېلىپ قېچىش ئۈچۈن، قولىمىزدىن كېلىشىچە تىرىشچانلىق كۆرسىتەلەيمىز (زەبۇر 97:10). مۇقەددەس كىتابنى ئوقۇش ۋە تەتقىق قىلىپ ئۆگىنىش ئارقىلىق زېھىنىمىزنى پايدىلىق، ساغلام ئوي-پىكىر بىلەن تولدۇرالايمىز. ئىبادەت يىغىلىشلىرىغا قاتنىشىش ۋە ۋەز خىزمىتىگە چىقىش ھەم ئوي-پىكىرىمىزنى قوغدايدۇ. ئۇنىڭدىن باشقا، يەھۋا بىز كۆتۈرەلمىگۈدەك سىناقلارغا بىزنى دۇچار قىلمايدىغانلىقى ھەققىدە ۋەدە بېرىدۇ.—1-كورىنت. 10:12، 13.
18. ھەممىمىز نېمە ھەققىدە دۇئا قىلىشىمىز كېرەك؟
18 ئاخىرقى زاماننىڭ بۇ قىيىن كۈنلىرىدە، يەھۋاغا سادىق قېلىش ئۈچۈن ھەربىرىمىز بولۇپمۇ ھازىر كۆپرەك دۇئا قىلىشىمىز كېرەك. چىن قەلبىمىزدىن دۇئا قىلىش ئۈچۈن، ھەر كۈنى ۋاقىت چىقىرايلى. يەھۋا ئىچ باغرىمىزنى ئۇنىڭغا تۆكۈشىمىزنى خالايدۇ (زەبۇر 62:8). يەھۋانى مەدھىيىلەپ، ئۇنىڭ قىلغان بارلىق ئىشلىرى ئۈچۈن مىننەتدارلىق بىلدۈرۈڭ. ۋەز خىزمەتتە جاسارەتلىك بولۇش ئۈچۈن ئۇنىڭدىن ياردەم سوراڭ. ھەرقانداق قىيىنچىلىققا بەرداشلىق بېرىش ۋە دۇچ كەلگەن ھەرقانداق ئازدۇرۇلۇشقا قارشى تۇرۇش ئۈچۈن ياردەم سوراڭ. ھېچكىم ياكى ھېچنەرسىنىڭ يەھۋاغا داۋاملىق دۇئا قىلىشىڭىزغا توسقۇنلۇق قىلىشىغا يول بەرمەڭ. بىراق، دۇئالىرىمىزغا يەھۋا قانداق جاۋاب قايتۇرىدۇ؟ بۇ مۇھىم سوئالغا كېيىنكى ماقالىدە جاۋاب تاپىمىز.
6-ناخشا خۇدا خىزمەتچىسىنىڭ دۇئاسى
a بىز دۇئالىرىمىزنىڭ خۇددى يېقىن دوستىمىزغا يازغان يۈرەك سۆزلىرىمىزدەك بولۇشىنى ئۈمىد قىلىمىز. شۇنداقتىمۇ، دۇئا قىلىش ئۈچۈن ۋاقىت چىقىرىش ھەمىشە ئاسان ئەمەس. ھەتتا نېمە توغرۇلۇق دۇئا قىلىشنى بىلمەي، دۇئا قىلىش قىيىندەك ھېس قىلىشىمىز مۇمكىن. بۇ ماقالىدە، مۇشۇ ئىككى مۇھىم مەسىلە ئۈستىدە مۇھاكىمە قىلىمىز.
