23-تەتقىق ماقالىسى
«ياھنىڭ يالقۇنلۇق ئوتى» ئۆچمىسۇن! ئۆچۈرمەڭ
«[سۆيگۈ] يالقۇنى لاۋۇلداپ كۆيۈۋاتقان ئوت، ياھنىڭ يالقۇنلۇق ئوتى».—شېئىر. ش 8:6.
36-ناخشا «خۇدا قوشقاننى ئىنسان ئايرىمىسۇن»
بۇ ماقالىدە a
1. مۇقەددەس كىتاب ھەقىقىي مۇھەببەتنى قانداق تەسۋىرلەيدۇ؟
مۇھەببەت «يالقۇنى لاۋۇلداپ كۆيۈۋاتقان ئوت. ياھنىڭ يالقۇنلۇق ئوتى. ھەيۋەتلىك ئاققان سۇلار ئۆچۈرەلمەس مۇھەببەتنى، دەريالارمۇ يوق قىلالماس ئۇنى» b (شېئىر. ش 8:6، 7). بۇ، ھەقىقىي مۇھەببەتنىڭ نەقەدەر گۈزەل تەسۋىرى،-ھە! مۇشۇ سۆزلەر ئەر-ئاياللارنى خاتىرجەم قىلىدىغان ھەقىقەتنى ئۆز ئىچىگە ئالىدۇ: بىر-بىرىڭلارغا ئۆچمەس سۆيگۈ-مۇھەببەت كۆرسىتەلەيسىلەر.
2. ئەر-ئايال ئارىسىدىكى مۇھەببەتنىڭ سوۋۇپ قالماسلىقى ئۈچۈن نېمە قىلىشى كېرەك؟
2 بىر جۈپ ئەر-ئايال ھاياتلا بولىدىكەن، ئۇلار بىر-بىرىگە بولغان سۆيگۈسىنى داۋاملاشتۇرۇش ئۈچۈن تىرىشچانلىق كۆرسىتىشكە توغرا كېلىدۇ. مەسىلەن، گۈلخاننىڭ ئۆچۈپ قالماي داۋاملىق كۆيۈشى ئۈچۈن، ئۇنىڭغا ئوتۇن سېلىشنى توختىتىپ قويماسلىق كېرەك. ئەگەر بىرى ئۇنىڭغا كۆڭۈل بۆلمىسە، ئوت ئاستا-ئاستا ئۆچۈپ قالىدۇ. خۇددى شۇنىڭدەك، ئەر-ئايال ئوتتۇرىسىدىكى مۇھەببەتنىڭ يالقۇنلۇق ئوتىمۇ كۈچلۈك ساقلىنىشى ئۈچۈن، ئۇلار سۆيگۈ رىشتىسىنى مۇستەھكەملىشى كېرەك. بەزى چاغلاردا، بىر جۈپلەر ئارىسىدىكى مۇھەببەتنىڭ سوۋۇپ قالغانلىقىنى ھېس قىلىدۇ. بۇنىڭغا، ئۇلار دۇچ كەلگەن ئىقتىسادىي قىيىنچىلىق، تەن ساغلاملىق مەسىلىسى ياكى بالىلارنى چوڭ قىلىش غەم-ئەندىشىلىرى سەۋەب بولۇشى مۇمكىن. ئەگەر توي قىلغان بولسىڭىز، نىكاھىڭىزدا «ياھنىڭ يالقۇنلۇق ئوتى» ئۆچمەسلىكى ئۈچۈن نېمە قىلالايسىز؟ بۇ ماقالىدە، نىكاھ رىشتىسىنى مۇستەھكەملەپ، بەختلىك تۇرمۇشتىن ھۇزۇر ئېلىشنىڭ ئۈچ يولىنى كۆرۈپ چىقىمىز c.
يەھۋا بىلەن بولغان مۇناسىۋىتىڭلارنى كۈچەيتىڭلار
يۈسۈپ بىلەن مەريەمگە ئوخشاش، نىكاھلىق ئەر-ئايال يەھۋا بىلەن يېقىن دوست بولۇشى كېرەك (3-ئابزاسقا قاراڭ)
3. نېمە ئۈچۈن يەھۋا بىلەن يېقىن دوست بولغان ئەر-ئاياللار ئارىسىدىكى مۇھەببەت سوۋۇپ قالمايدۇ؟ (ۋەز 4:12) (رەسىمگە ھەم قاراڭ)
3 «ياھنىڭ يالقۇنلۇق ئوتى»نى داۋاملىق ئۆچۈرمەي ساقلاش ئۈچۈن ئەر-ئايال ھەر ئىككىسى يەھۋا خۇدا بىلەن مۇناسىۋەتنى كۈچلۈك ساقلاشقا تىرىشىشى كېرەك. بۇ ئۇلارنىڭ نىكاھ رىشتىسىنى ساقلاشقا قانداق ياردەم بېرىدۇ؟ ئەر-ئايال ئاسماندىكى ياراتقۇچىسى بىلەن بولغان دوستلۇق مۇناسىۋىتىنى قەدىرلىسە، ئۇلار ئۇنىڭ نەسىھىتىنى ئەمەلىي قوللىنىشقا تەييار بولىدۇ. بۇ ئۇلارنىڭ ئارىسىدىكى مۇھەببەتنىڭ سوۋۇپ كېتىشىگە سەۋەب بولىدىغان قىيىنچىلىقلاردىن ساقلىنىشىغا ۋە ئۇلارنى يېڭىشىغا ياردەم بېرىدۇ (ۋەز 4:12-نى ئوقۇڭ). يەھۋا بىلەن يېقىن دوستلۇق ئورناتقان كىشىلەر ئۇنى ئۈلگە قىلىش ئۈچۈن قولدىن كېلىشىچە تىرىشچانلىق كۆرسىتىپ، مېھرىبان، سەۋرچان ۋە كەچۈرۈمچان بولۇشقا تىرىشىدۇ (ئەفەس. 4:32–5:1). بۇ پەزىلەتلەرنى نامايان قىلغاندا، ئەر-ئايال ئارىسىدىكى مۇھەببەت رىشتىسى تېخىمۇ كۈچىيىدۇ. توي قىلغىنىغا 25 يىلدىن ئاشقان لېنا ئىسىملىك قېرىنداش مۇنداق دەيدۇ: «يەھۋا بىلەن يېقىن مۇناسىۋەتتە بولغان كىشىنى سۆيۈش ۋە ھۆرمەتلەش ئاسان».
4. نېمە ئۈچۈن يەھۋا يۈسۈپ بىلەن مەريەمنى مەسىھنىڭ ئاتا-ئانىسى بولۇشقا تاللىغان؟
4 مۇقەددەس كىتابتىن بىر مىسالنى كۆرۈپ باقايلى. مەسىھنىڭ كەلگۈسىدىكى ئاتا-ئانىسىنى تاللىغاندا، يەھۋا نېمە ئۈچۈن داۋۇتنىڭ نۇرغۇنلىغان ئەۋلادلىرى ئارىسىدىن يۈسۈپ بىلەن مەريەمنى تاللىغان؟ چۈنكى، ئۇلار ھەر ئىككىسى يەھۋا بىلەن يېقىن مۇناسىۋەتتە بولغان. يەھۋا، ئۇلارنىڭ نىكاھىدا ياراتقۇچىسىنى بىرىنچى ئورۇنغا قويىدىغانلىقىنى بىلەتتى. توي قىلغان ئەر-ئاياللار يۈسۈپ ۋە مەريەمنىڭ ئۈلگىسىدىن نېمىلەرنى ئۆگىنەلەيسىلەر؟
5. ئەرلەر يۈسۈپنىڭ ئۈلگىسىدىن نېمىلەرنى ئۆگىنەلەيدۇ؟
5 يۈسۈپ، يەھۋانىڭ كۆرسەتمىسىنى ئەمەلىي قوللىنىشقا تەييار بولغان ۋە بۇ ئۇنى ياخشىراق ئەرگە ئايلاندۇرغان. كەم دېگەندە ئۈچ قېتىم، ئۇ خۇدادىن ئائىلىسىگە مۇناسىۋەتلىك كۆرسەتمىلەرنى قوبۇل قىلغان. ھەر قېتىم چوڭ ئۆزگىرىشلەرنى قىلىشقا توغرا كەلگەندە، ئۇ دەرھال شۇ كۆرسەتمىلەرگە بويسۇنغان (مەتتا 1:20، 24؛ 2:13–15، 19–21). يۈسۈپنىڭ ئاشۇ ئىش-ھەرىكەتلىرى، مەريەمنىڭ ئۇنىڭغا بولغان مۇھەببىتى ۋە ھۆرمىتىنى چوڭقۇرلاشتۇرغانلىقىنى تەسەۋۋۇر قىلىپ كۆرۈڭ. ئەرلەر، سىلەر ئۆز ئائىلەڭلارغا غەمخورلۇق قىلىشتا، مۇقەددەس كىتابتىكى نەسىھەتكە قۇلاق سېلىش ئارقىلىق يۈسۈپنى ئۈلگە قىلالايسىلەر d. بۇ نەسىھەتكە قۇلاق سالغىنىڭلاردا، بەزى ئۆزگەرتىشلەرنى قىلىشقا توغرا كەلسىمۇ، ئايالىڭلارغا بولغان مۇھەببىتىڭىزنى نامايان قىلىپ، نىكاھ رىشتىڭلارنى كۈچەيتىڭلار. ۋاناۋاتۇ ياشايدىغان، توي قىلغىنىغا 20 يىلدىن ئاشقان بىر قېرىنداش مۇنداق دەيدۇ: «ئېرىم، يەھۋانىڭ كۆرسەتمىسىنى ئىزدىگەندە ۋە ئۇنى ئەمەلىي قوللانغاندا، مەن ئۇنى تېخىمۇ ھۆرمەتلەيمەن. ئۆزۈمنى بىخەتەر ھېس قىلىمەن ۋە ئۇنىڭ قارارلىرىنى قوللاپ-قۇۋۋەتلەيمەن».
6. ئاياللار مەريەمنىڭ ئۈلگىسىدىن نېمىلەرنى ئۆگىنەلەيدۇ؟
6 مەريەم ھەم يەھۋا بىلەن يېقىن دوستلۇق مۇناسىۋەت ئورناتقان. بىراق، ئۇنىڭ ئىمان-ئېتىقادى يولدىشىغا باغلىنىپ قالمىغان. ئۇ مۇقەددەس يازمىلارنى ياخشى بىلگەن. يەنە چوڭقۇر ئويلىنىش ئۈچۈن ۋاقىت چىقارغان (لۇقا 2:19، 51). شەك-شۈبھىسىزكى، مەريەمنىڭ دوستلۇق مۇناسىۋىتى ئۇنى ئېسىل پەزىلەتلىك ئايالغا ئايلاندۇرغان. بۈگۈنكى كۈندە كۆپلىگەن ئاياللار مەريەمگە ئوخشاش بولۇشقا تىرىشىدۇ. مەسىلەن، ئېمىكو ئىسىملىك قېرىنداش مۇنداق دەيدۇ: «تۇرمۇشقا چىقمىغان ۋاقتىمدا، روھىي ئىشلار بىلەن مەشغۇل بولۇش ئادىتىم بار ئىدى. ئەمما، توي قىلغاندىن كېيىن، يولدىشىم باش بولۇپ، دۇئا قىلىپ، ئىبادەتكە يېتەكچىلىك قىلغاچ، ئىمان-ئېتىقادىم ئۇنىڭغا باغلىنىپ قالغانلىقىنى ھېس قىلدىم. مەن يەھۋا بىلەن بولغان دوستلۇق مۇناسىۋىتىمنى كۈچلۈك ساقلاش ئۈچۈن ئۆزۈم يۈكىنى ئۆزۈم كۆتۈرۈش كېرەكلىكىنى كۆرۈپ يەتتىم. شۇڭا، شەخسەن ئۆزۈم خۇداغا دۇئا قىلىش، مۇقەددەس يازمىلارنى ئوقۇش ۋە چوڭقۇر ئويلىنىش ئۈچۈن ۋاقىت چىقاردىم» (گالاتىيا. 6:5). ئاياللار، يەھۋا بىلەن بولغان دوستلۇق مۇناسىۋەتنى داۋاملىق كۈچەيتسەڭلار، ئېرىڭلارنىڭ سىلەرنى ماختىشى ۋە سۆيۈشىگە تېخىمۇ كۆپ سەۋەبلەر بولىدۇ.—پەند. نە 31:30.
7. ئەر-ئاياللار، مەريەم ۋە يۈسۈپنىڭ ئۈلگىسىدىن نېمىلەرنى ئۆگىنەلەيدۇ؟
7 يەھۋا بىلەن بولغان دوستلۇق مۇناسىۋەتنى كۈچلۈك ساقلاش ئۈچۈن، يۈسۈپ بىلەن مەريەم بىرلىكتە تىرىشچانلىق كۆرسەتكەن. ئۇلار ئائىلە ئەزالىرى بىرلىكتە يەھۋاغا ئىبادەت قىلىشنىڭ مۇھىملىقىنى چۈشەنگەن (لۇقا 2:22–24، 41؛ 4:16). بۇنداق قىلىش قىيىنغا توختىتىشى مۇمكىن، بولۇپمۇ ئائىلە ئەزالىرى كۆپەيگەندە تېخىمۇ شۇنداق. بىراق، ئۇلار داۋاملىق بىرلىكتە يەھۋاغا ئىبادەت قىلغان. بۈگۈنكى كۈندىكى ئەر-ئاياللار ئۈچۈن، ئۇلار ھەقىقەتەن ياخشى ئۈلگە قالدۇرغان! ئەگەر يۈسۈپ ۋە مەريەمگە ئوخشاش، سىلەرنىڭ بالىلىرىڭلار بولسا، بەلكىم يىغىلىشلارغا قاتنىشىش ياكى ئائىلىۋى ئىبادەت ئۆتكۈزۈش ئۈچۈن ۋاقىت ئورۇنلاشتۇرۇشڭلار ئاسان ئەمەس، ھەتتا ئەر-ئايال بىرلىكتە تەتقىق قىلىپ ئۆگىنىش ياكى دۇئا قىلىشقا ۋاقىت چىقىرىش تېخىمۇ قىيىن بولۇشى مۇمكىن. بىراق، ئېسىڭلاردا بولسۇنكى، بىرلىكتە يەھۋاغا دۇئا قىلغىنىڭلاردا، ئۇنىڭغا ۋە ئۆزئارا بىر-بىرىڭلارغا بولغان مۇھەببەت تېخىمۇ كۈچىيىدۇ. شۇڭا، ئىبادەتنى ھاياتىڭلاردا بىرىنچى ئورۇنغا قويۇڭلار.
8. نىكاھدا قىيىنچىلىقلارغا دۇچ كەلگەن ئەر-ئايال ئائىلىۋى ئىبادەتنىڭ پايدىسىنى كۆرۈش ئۈچۈن نېمە قىلالايدۇ؟
8 ئەگەر نىكاھىڭلاردا قىيىنچىلىقلار پەيدا بولسا، نېمە قىلالايسىلەر؟ قارىماققا، بىرلىكتە ئائىلىۋى ئىبادەت ئۆتكۈزۈش مۇمكىن ئەمەستەك كۆرۈنىدۇ. شۇنداق ئەھۋالدا بولساڭلار، ھەر ئىككىڭلار ياقتۇرىدىغان ماۋزۇدا، خۇشال-خۇراملىق ئىچىدە قىسقا مۇھاكىمە ئېلىپ بېرىڭلار. مۇشۇ قەدەم ئاراڭلاردىكى مۇھەببەت رىشتىسىنى ۋە بىرلىكتە يەھۋاغا ئىبادەت قىلىش ئارزۇ-ئىستىكىڭلارنى كۈچەيتەلەيدۇ.
بىرلىكتە ۋاقىت ئۆتكۈزۈڭلار
9. نېمە ئۈچۈن ئەر-ئايال بىرگە ۋاقىت ئۆتكۈزۈشى كېرەك؟
9 ئەر-ئاياللار، سىلەر بىرگە ۋاقىت ئۆتكۈزۈش ئارقىلىق ئاراڭلاردىكى سۆيگۈ-مۇھەببەت ئوتىنى ئۆچۈرمەي ساقلىيالايسىلەر. شۇنداق قىلساڭلار، بىر-بىرىڭلارنىڭ نېمە ئويلاۋاتقان ۋە ھېس قىلىۋاتقانلىقىنى بىلىپ تۇرۇشۇڭلارغا ياردەم بېرەلەيسىلەر (يارىت. 2:24). 15 يىل بۇرۇن توي قىلغان لىلىيا ۋە رۇسلان، تۇرمۇش قۇرۇپ ئۇزۇن ئۆتمەي نېمىنى بايقىغانلىقىغا دىققەت قىلىپ باقايلى. لىلىيا مۇنداق دەيدۇ: «بىز ئۆزىمىز ئويلىغاندەك كۆپرەك ۋاقىت بىرگە بولالمىغانلىقىمىزنى ھېس قىلىپ يەتتۇق. كۈنلىرىمىز پۇل تېپىش، ئائىلىدىكى ئىشلار ۋە كېيىنرەك بالىلىرىمىزغا كۆڭۈل بۆلۈش بىلەن ئالدىراش بولۇپ كەتتى. ئەر-ئايال بىرلىكتە ۋاقىت ئۆتكۈزۈش ئۈچۈن ۋاقىت چىقارمىساق، بىر-بىرىمىزدىن يىراقلىشىپ كېتىدىغانلىقىمىزنى بايقىدۇق».
10. ئەفەسلىكلەر 5:15، 16-ئايەتلەردىكى پرىنسىپنى، ئەر-ئاياللار قانداق قوللىنالايدۇ؟
10 قانداق قىلغاندا، ئەر-ئايال بىرگە ۋاقىت ئۆتكۈزەلەيدۇ؟ بىر-بىرىڭلارغا ھەمراھ بولۇش ئۈچۈن ۋاقىت چىقىرىڭلار (ئەفەسلىكلەر 5:15، 16-نى ئوقۇڭ). نىگېرىيىدە ياشايدىغان ئۇزوندۇ ئىسىملىك بۇرادەر مۇنداق دەيدۇ: «قىلماقچى بولغان ئىش-پائالىيەتلىرىمنى پىلانلىغاندا، ئايالىمغا ھەمراھ بولىدىغان ۋاقىتنىمۇ پىلانىمغا يېزىپ قويىمەن. بۇ ۋاقىتنى ئەڭ مۇھىم ئورۇنغا قويدۇم» (فىلىپى. 1:10). مولدوۋادا جامائەتلەرنى زىيارەت قىلىدىغان ئاقساقالنىڭ ئايالى ئاناستاسىيا ۋاقتىدىن قانداق پايدىلانغانلىقىنى كۆرۈپ باقايلى. ئۇ شۇنداق دەيدۇ: «ئېرىم ئۆز مەسئۇلىيىتىنى ئورۇنلاش ئۈچۈن ئالدىراش بولغاندا، مەن ئۆزۈمنىڭ ئىشلىرىنى قىلىشقا تىرىشتىم. شۇنداق بولغاندا، بىز كېيىن بىرگە ۋاقىت ئۆتكۈزەلەيتتۇق». ئەگەر بىر-بىرىڭلارغا ھەمراھ بولۇش ئۈچۈن ۋاقىت چىقىرىش ئاسانغا چۈشمىسە، نېمە قىلساڭلار بولىدۇ؟
ئەر-ئاياللار، سىلەر قانداق ئىشلارنى بىرلىكتە قىلالايسىلەر؟ (11، 12-ئابزاسلارغا قاراڭ)
11. ئاكىلا بىلەن پرىسكىلا بىرلىكتە نېمە ئىشلارنى قىلغان؟
11 ئەر-ئاياللار، كۆپلىگەن مەسىھنىڭ دەسلەپكى ئەگەشكۈچىلىرى ياخشى كۆرگەن بىر جۈپ، ئاكىلا بىلەن پرىسكىلانىڭ ئۈلگىسىدىن ئۆگىنەلەيدۇ (رىملىقلار 16:3، 4). گەرچە ئۇلارنىڭ نىكاھى توغرىسىدا، مۇقەددەس كىتابتا كۆپلىگەن تەپسىلاتلار يېزىلمىغان بولسىمۇ، ئەمما ئۇلارنىڭ بىللە ئىشلىگەنلىكى، ۋەز ئېيتقانلىقى ۋە باشقىلارغا ياردەم قولىنى سۇنغانلىقى تىلغا ئېلىنغان (ئەلچى. 18:2، 3، 24–26). مۇقەددەس كىتابتا ھەر قېتىم ئاكىلا بىلەن پرىسكىلا تىلغا ئېلىنغاندا، ئۇلار دائىم بىللە تەسۋىرلەنگەن.
12. ئەر-ئايال بىرگە كۆپرەك ۋاقىت ئۆتكۈزۈش ئۈچۈن نېمە قىلالايدۇ؟ (رەسىمگە ھەم قاراڭ)
12 ئەر-ئاياللار، ئاكىلا بىلەن پرىسكىلانى قانداق ئۈلگە قىلالايدۇ؟ چوقۇم ئۆز جورىڭىز بىلەن بىرلىكتە قىلىشقا تېگىشلىك ئىشلار ھەققىدە ئويلاپ كۆرۈڭ. بەزى ئىشلارنى ئۆز ئالدىڭىزغا ئەمەس، بەلكى بىرلىكتە قىلىڭلار. مەسىلەن، ئاكىلا بىلەن پرىسكىلا بىرلىكتە ۋەز قىلغان. سىلەرمۇ شۇنداق قىلىش ئۈچۈن پىلان تۈزىۋاتامسىلەر؟ ئاكىلا بىلەن پرىسكىلا بىرگە ئىشلىگەن. سىز ۋە جورىڭىز ئوخشاش ئىش ئورنىدا ئىشلىمەسلىكىڭلار مۇمكىن. ئەمما، ئائىلىدىكى ئىشلارنى بىللە قىلالامسىلەر؟ (ۋەز 4:9). بىر-بىرىڭلارغا ياردەم بەرسەڭلار، ئۆزۈڭلارنى بىر كوماندىدەك ھېس قىلىپ، ئۆزئارا پاراڭلىشىش ئۈچۈن پۇرسىتىڭلار بولىدۇ. روبېرت بىلەن لىندانىڭ توي قىلغىنىغا 50 يىلدىن ئاشقان. روبېرت مۇنداق دەيدۇ: «راستىنى ئېيتقاندا، بىرلىكتە كۆڭۈل ئېچىش ئۈچۈن كۆپ ۋاقىت چىقىرالمايمىز. بىراق، مەن قاچا-قومۇچلارنى يۇيغاندا، ئايالىم ئۇلارنى سۈرتۈپ قۇرۇتىدۇ. سىرتتا ئوت-چۆپلەرنى يۇلغاندا، ئۇ مەن بىلەن بىرگە ئىشلەيدۇ. شۇ چاغلاردا، ئۆزۈمنى ئىنتايىن خۇشال ھېس قىلىمەن. بىرلىكتە ئىشلەش بىزنى بىر-بىرىمىزگە يېقىنلاشتۇرىدۇ. ئارىمىزدىكى سۆيگۈ-مۇھەببەت رىشتىسىنى داۋاملىق كۈچىيىدۇ».
13. ھەقىقىي ئىناق-ئىجىل ئۆتۈش ئۈچۈن ئەر-ئايال چوقۇم نېمە قىلىشى كېرەك؟
13 بىراق ئېسىڭلاردا بولسۇنكى، پەقەت بىللە ياشاش ھەرگىزمۇ دائىم بىر-بىرىڭلارغا يېقىنلىشالايسىلەر دېگەننى بىلدۈرمەيدۇ. برازىلىيىدە ياشايدىغان بىر ئايال مۇنداق دەيدۇ: «بۈگۈنكى كۈندە ئادەمنىڭ دىققىتىنى چاچىدىغان نۇرغۇن ئىشلار بار.پەقەت بىر ئۆيدە ياشىغىنىمىز ئۈچۈنلا، بىرلىكتە ۋاقىت ئۆتكۈزۈۋاتىمىز دەپ ئويلاشنىڭ تۇزىقىغا چۈشۈپ قالىدىغانلىقىمىزنى بايقىدىم. بىرگە بولۇشتىنمۇ كۆپرەك ئىشلارنى قىلىشنىڭ زۆرۈرلىكىنى چۈشەندىم. مەنمۇ ئۆز ئېرىمگە كۆپرەك كۆڭۈل بۆلۈشۈم كېرەك». برونو بىلەن ئۇنىڭ ئايالى تايىز بىر-بىرىگە كۆڭۈل بۆلۈش ئۈچۈن نېمىلەرنى قىلغانلىقىغا دىققەت قىلىپ باقايلى. برونو مۇنداق دەيدۇ: «بىز بىرگە بوش ۋاقتىمىزنى ئۆتكۈزگەندە، تېلېفونلىرىمىزنى بىر چەتكە تاشلاپ قويۇپ، بىرگە بولغان شۇ پەيتلەردىن خۇشاللىق تاپىمىز».
14. ئەگەر ئەر-ئايال بىرگە ۋاقىت ئۆتكۈزۈشتىن خۇشاللىق تاپالمىسا، نېمە قىلسا بولىدۇ؟
14 بىراق، سىلەر بىرلىكتە ۋاقىت ئۆتكۈزۈشنى خالىماسلىقىڭلار مۇمكىن. بەلكىم، قىزىقىشىڭلار ئوخشىمايدۇ ياكى بىر-بىرىڭلارنى تېرىكتۈرۈپ قويۇسىلەر. شۇنداق ۋەزىيەتتە، نېمە قىلساڭلار بولىدۇ؟ يۇقىرىدا تىلغا ئېلىپ ئۆتكەن گۈلخان ھەققىدىكى مىسالنى ئويلاپ كۆرۈڭلار. گۈلخان دەرھال لاۋۇلداپ كۆيۈشكە باشلىمايدۇ. ئۇنىڭغا ئاستا-ئاستا، چوڭراق ئوتۇن پارچىلىرىنى سېلىش ئارقىلىق ئوتنى ئۇلغايتىش كېرەك. خۇددى شۇنىڭغا ئوخشاش، ھەر كۈنى بىرنەچچە مىنۇت بىرلىكتە ۋاقىت ئۆتكۈزۈشكە تىرىشىپ بېقىڭلار. ئاراڭلاردا كېلىشمەسلىك پەيدا قىلدىغان ئىشنى ئەمەس، ھەر ئىككىڭلار ياقتۇرىدىغان ئىشنى قىلىڭلار (ياقۇپ 3:18). كىچىك ئىشتىن باشلاش ئارقىلىق بىر-بىرىڭلارغا بولغان مۇھەببەت ئوتىنى قايتىدىن ئۇلغايتالىشىڭلار مۇمكىن.
بىر-بىرىڭلارغا ھۆرمەت كۆرسىتىڭلار
15. ئەر-ئايال مۇھەببەت ئوتىنى ئۆچۈرمەي ساقلاشنى خالىسا، نېمە ئۈچۈن ئۆزئارا ھۆرمەت كۆرسىتىش ئىنتايىن مۇھىم؟
15 نىكاھتا ھۆرمەت كۆرسىتىش ئىنتايىن مۇھىم. ھۆرمەت خۇددى ئوكسىگېنغا ئوخشاش، گۈلخاننىڭ لاۋۇلداپ يېنىپ تۇرۇشىغا ياردەم بېرىدۇ. ئوكسىگېن بولمىسا، ئوت تېزلا ئۆچۈپ قالىدۇ. شۇنىڭغا ئوخشاش، ئەر-ئايال ئارىسىدا ھۆرمەت بولمىسا، سۆيگۈ-مۇھەببەتمۇ تېزلا سوۋۇپ كېتىدۇ. يەنە بىر جەھەتتىن، بىر-بىرىنى ھۆرمەتلەشكە تىرىشىدىغان ئەر-ئايال ئارىسىدىكى مۇھەببەت ئوتىنى ئۆچۈرمەي ساقلاش ئۈچۈن داۋاملىق كۈچ چىقىرىدۇ. ئېسىڭىزدە بولسۇنكى، بەلكىم سىز ئۆزىڭىز ھەمراھىمغا ھۆرمەت كۆرسەتتىم دەپ ئويلايسىز، مۇھىم بۇ ئەمەس، بەلكى ھەمراھىڭىزنىڭ ھۆرمەتنى ھېس قىلىش ياكى قىلماسلىقى. پېنى بىلەن ئارېتنىڭ توي قىلغىنىغا 25 يىلدىن ئاشقان. پېنى مۇنداق دەيدۇ: «ئۆزئارا ھۆرمەت قىلىش ئۆيىمىزدە ئىللىق مۇھىتنى يارىتىدۇ. بىز ئۆز ئوي-پىكرىمىزنى بىر-بىرىمىزگە ئەركىن-ئازادە ئېيتالايمىز. چۈنكى، بىر-بىرىمىزنىڭ كۆز قاراشلىرىنى ھۆرمەتلەيمىز». ئۇنداقتا، ھەمرايىڭىز ئۇنى ھەقىقىي ھۆرمەتلەيدىغانلىقىڭىزنى ھېس قىلالىشى ئۈچۈن نېمە قىلالايسىز؟ ئىبراھىم ۋە سارەنىڭ مىسالىنى كۆرۈپ باقايلى.
ئايالىنىڭ سۆزلىرىنى كۆڭۈل قويۇپ ئاڭلاش ئارقىلىق، ئەر ئۆز ئايالىنىڭ ھېس-تۇيغۇلىرىنى ھۆرمەتلەيدىغانلىقىنى كۆرسىتەلەيدۇ (16-ئابزاسقا قاراڭ)
16. ئەرلەر ئىبراھىمنىڭ مىسالىدىن نېمىلەرنى ئۆگىنەلەيدۇ؟ (1-پېترۇس 3:7) (رەسىمگە ھەم قاراڭ)
16 ئىبراھىم سارەگە ھۆرمەت بىلەن مۇئامىلە قىلغان. ئۇ سارەنىڭ پىكىرىنى ئويلىشىپ، ھېس-تۇيغۇلىرىنى ھۆرمەتلىگەن. بىر قېتىم، سارەنىڭ كۆڭلى ئاغرىپ، ئۆز ھېس-تۇيغۇلىرىنى ئىبراھىمغا ئېيتقان. ھەتتا، ئۇ ئىبراھىمنى ئەيىبلىگەن. بۇنىڭغا ئىبراھىم ئاچچىقلىنىپ، جاۋاب قايتۇرغانمۇ؟ ياق. ئۇ سارەنىڭ ئىتائەتچان ۋە ئۆزىنى قوللايدىغانلىقىنى بىلەتتى. ئىبراھىم سارەنىڭ سۆزلىرىنى ئاڭلاپ، مەسىلىنى ھەل قىلماقچى بولغان (يارىت. 16:5، 6). بۇنىڭدىن نېمىنى ئۆگىنەلەيمىز؟ ئەرلەر، ئائىلىدە سىلەرنىڭ قارار چىقىرىش ھوقۇقىڭلار بار (1-كورىنت. 11:3). بولۇپمۇ، چىقارغان قارار ئايالىڭىزغا تەسىر قىلسا، قارار چىقىرىشتىن ئىلگىرى ئۇنىڭ ئوي-پىكرىنى ئويلاپ كۆرۈش ئەڭ ئاقىلانە ئىش قىلغانلىق بولىدۇ (1-كورىنت. 13:4، 5). باشقا ۋاقىتلاردا، ئايالىڭىز بېسىم ھېس قىلىشى ياكى ئۆز ھېس-تۇيغۇلىرىنى ئىپادىلىشى زۆرۈر بولۇشى مۇمكىن. شۇنداق چاغلاردا، ئەستايىدىللىق بىلەن ئۇنىڭغا سۆزىگە قۇلاق سېلىپ، ھېس-تۇيغۇلىرىغا ھۆرمەت كۆرسىتەمسىز؟ (1-پېترۇس 3:7-نى ئوقۇڭ) ئانجېلا بىلەن دىمىترىينىڭ توي قىلغىنىغا 30 يىل بولغان. ئېرىنىڭ ھۆرمىتىنى ھېس قىلغان ئانجېلا مۇنداق دەيدۇ: «مەن خاپا بولغاندا ياكى سۆزلەشمەكچى بولغاندا، دىمىترىي سۆزلىرىمنى ئاڭلاشقا ھەر ۋاقىت تەييار تۇرىدۇ. گەرچە ھېس-تۇيغۇلىرىم ئىنتايىن نازۇك بولسىمۇ، ئۇ ماڭا سەۋرچانلىق بىلەن مۇئامىلە قىلىدۇ».
17. ئاياللار سارەنىڭ ئۈلگىسىدىن نېمىلەرنى ئۆگىنەلەيدۇ؟
17 سارە ئىبراھىمنىڭ چىقارغان قارارلىرىنى قوللاپ-قۇۋۋەتلەش ئارقىلىق ئۆز ھۆرمىتىنى كۆرسەتكەن (يارىت. 12:5). بىر قېتىم كۈتمىگەن مېھمانلار كەلگەندە، ئىبراھىم مېھماندوستلۇق كۆرسىتىشنى قارار قىلغان. ئۇ سارەدىن قولىدىكى ئىشىنى تاشلاپ، دەرھال كۆپ نان يېقىشنى تەلەپ قىلغان (يارىت. 18:6). سارە دەرھال ئىبراھىمنىڭ قارارىنى قوللىغان. ئاياللار، ئېرىڭىزنىڭ قارارلىرىنى قوللاش ئارقىلىق سارەنى ئۈلگە قىلالايسىز. شۇنداق قىلسىڭىز، نىكاھىڭلارنى كۈچەيتىسىز (1-پېترۇس 3:5، 6-نى ئوقۇڭ). ئالدىنقى ئابزاستا تىلغا ئالغان دىمىترىي، ئايالنىڭ ھۆرمىتىنى ھېس قىلغان. ئۇ مۇنداق دەيدۇ: «ھەتتا كۆز قارىشىمىز پەرقلىق بولغان ھالەتتىمۇ، ئۇنىڭ قارارىمنى قوللاش ئۈچۈن كۆرسەتكەن تىرىشچانلىقىغا مىننەتدارمەن. قارارىمنىڭ نەتىجىسى ياخشى بولمىغان ھالەتتىمۇ، ئۇ مېنى ئەيىبلىمەيدۇ». سىزنى ھۆرمەتلەيدىغان ئادەمنى سۆيۈش ھەقىقەتەن بەك ئاسان!
18. ئەر-خۇتۇن مۇھەببەت ئوتىنى ئۆچۈرمەي ساقلاشقا تىرىشسا، نەتىجىسى قانداق بولىدۇ؟
18 شەيتان بۈگۈنكى كۈندە توي قىلغان مەسىھ ئەگەشكۈچىلىرى ئارىسىدىكى مۇھەببەت ئوتىنى ئۆچۈرۈش ئۈچۈن ھۇجۇم قىلىۋاتىدۇ. ئۇ ئەر-خۇتۇن ئارىسىدىكى سۆيگۈ-مۇھەببەت يوقالسا، ئۇلارنىڭ يەھۋادىن يىراقلىشىشقا باشلايدىغانلىقىنى بىلىدۇ. ئەمما، ھەقىقىي مۇھەببەت ئوتىنى ئۆچۈرگىلى بولمايدۇ! شۇڭا، نىكاھىڭلاردىكى سۆيگۈ-مۇھەببەت، خۇددى سۇلايمان شېئىرلارنىڭ شېئىردا تەسۋىرلىگەن سۆيگۈ-مۇھەببەتكە ئوخشاش بولسۇن. ھاياتىڭلاردا يەھۋانى بىرىنچى ئورۇنغا قويۇش ئۈچۈن قەتئىي بەل باغلاڭلار. بىر-بىرىڭلار ھەمراھ بولۇش ئۈچۈن ۋاقىت چىقىرىڭلار، بىر-بىرىڭلارنىڭ ھېس-تۇيغۇلىرى ۋە ئېھتىياجىغا ھۆرمەت كۆرسىتىڭلار. شۇنداق قىلساڭلار، نىكاھىڭلار ھەقىقىي مۇھەببەتنىڭ مەنبەسى يەھۋاغا شان-شەرەپ كېلىدۇ ۋە ئاراڭلاردىكى مۇھەببەت خۇددى يالقۇنلاپ كۆيۈۋاتقان ئوتقا مەڭگۈ ئۆچمەي كۆيۈپ تۇرىدۇ.
50-ناخشا خۇدانىڭ سۆيگۈ-مۇھەببەت ئۈلگىسى
a يەھۋا ئىنسانلارغا نىكاھ سوۋغىسىنى بەرگەن. شۇڭا، ئەر-ئايال ئۆزگىچە مۇھەببەت رىشتىسىدىن بەھرىمەن بولالايدۇ. بەزى چاغلاردا، مۇھەببەت سوۋۇپ قېلىشى مۇمكىن. ئەگەر توي قىلغان بولسىڭىز، بۇ ماقالە مۇھەببەت ئوتىنى ئۆچۈرمەي، داۋاملىق بەخت-سائادەتلىك نىكاھتىن ھۇزۇر ئېلىشىڭىزغا ياردەم بېرىدۇ.
b ئۈزلۈكسىز ۋە ئۆزگەرمەس ھەقىقىي مۇھەببەت «ياھنىڭ يالقۇنلۇق ئوتى» دەپ ئاتىلىدۇ، چۈنكى يەھۋا شۇنداق مۇھەببەتنىڭ مەنبەسىدۇر.
c ئەگەر جۈپتىڭىز يەھۋا گۇۋاھچىسى بولمىغان تەغدىردىمۇ، مۇشۇ مەسلىھەتلەرگە قۇلاق سالسىڭىز، ئاراڭلاردىكى نىكاھ رىشتىسىنى كۈچەيتىشىڭلار ئۈچۈن ياردىمى بولۇشى مۇمكىن.
d مەسىلەن، «®JW Library» كۈتۈپخانىسىدا ۋە jw.org تور بېكىتىدە«ئائىلىلەر ئۈچۈن ياردەم» ناملىق بىر قاتار ماقالىلەردىكى ئەمەلىي مەسلىھەتلەر ئۈستىدە ئويلىنىپ كۆرۈڭ.
