48-تەتقىق ماقالىسى
ساداقەتمەنلىكىڭىز سىنالغاندا، سەگەك تۇرۇڭ
«ھەر ئىشتا ئويغاق تۇرغىن».—2-تىموت. 4:5.
43-ناخشا ھوشيار تۇر، چىڭ تۇر ۋە قەيسەر بول!
بۇ ماقالىدە a
1. «ئويغاق» تۇرۇش دېگەن ئىبارە نېمىنى بىلدۈرىدۇ؟ (2-تىموتىي 4:5)
كۆڭلىمىزنى رەنجىتىدىغان بەزى ئىشلار يۈز بەرگەندە، يەھۋا ۋە ئۇنىڭ تەشكىلاتىغا بولغان ساداقەتمەنلىكىمىز سىنىلىدۇ. شۇنداق قىيىنچىلىقلارنى قانداق يېڭەلەيمىز؟ بىز «ئويغاق» ياكى سەگەك تۇرۇپ، ئىمان-ئېتىقادىمىزدا چىڭ تۇرۇشىمىز لازىم (2-تىموتىي 4:5-نى ئوقۇڭ). بىز تىنچ-خاتىرجەملىكنى ساقلاش، سوغۇق قانلىق بىلەن چوڭقۇر ئويلىنىش ۋە ئىشلارغا يەھۋانىڭ كۆزقارىشى بىلەن قاراش ئارقىلىق ئويغاق ياكى سەگەك تۇرالايمىز. شۇنداق قىلغىنىمىزدا، ھېس-تۇيغۇلىرىمىز ئوي-پىكىرلىرىمىزگە تەسىر قىلىشىغا يول بەرمەيمىز.
2. بۇ ماقالىدە نېمىلەرنى مۇھاكىمە قىلىمىز؟
2 ئالدىنقى ماقالىدە، بىز دۇچ كېلىدىغان جامائەتنىڭ سىرتىدىن كېلىدىغان ئۈچ قىيىنچىلىق ھەققىدە مۇھاكىمە قىلغان ئىدۇق. بۇ ماقالىدە، يەھۋاغا بولغان ساداقىتىمىزنى سىنايدىغان جامائەتنىڭ ئىچىدە دۇچ كېلىدىغان ئۈچ قىيىنچىلىقنى كۆرۈپ ئۆتىمىز. (1) قېرىنداشلىرىمىزنىڭ ناچار مۇئامىلىسىگە ئۇچرىغاندەك ھېس قىلغاندا، (2) نەسىھەت بېرىپ، بىزنى تۈزەتكەندە، (3) تەشكىلاتتىكى يېڭى ئۆزگىرىشلەرنى قوبۇل قىلىش قىيىنغا توختىغاندا. مۇشۇنداق قىيىنچىلىقلارغا دۇچ كەلگەندە، ئويغاق ياكى ھوشىيار تۇرۇپ، يەھۋا ۋە ئۇنىڭ تەشكىلاتىغا قەتئىي سادىق قېلىش ئۈچۈن نېمىلەرنى قىلالايمىز؟
قېرىنداشلىرىمىزنىڭ ناچار مۇئامىلىسىگە ئۇچرىغاندەك ھېس قىلغاندا
3. ئېتىقادچى قېرىندىشىمىز بىزگە ياخشى مۇئامىلە قىلمىغاندەك ھېس قىلساق، قانداق ئىنكاس قايتۇرۇشىمىز مۇمكىن؟
3 جامائەتتىكى قېرىنداشلىرىڭىز سىزگە ياخشى مۇئامىلە قىلمىغاندەك، بەلكىم مەسئۇلىيەتنى ئۈستىگە ئالغان بۇرادەر، يەنى ئاقساقال شۇنداق قىلغاندەك ھېس قىلغان ۋاقتىڭىز بولغانمۇ؟ ئەلۋەتتە، بۇرادەرنىڭ كۆڭلىڭىزنى ئاغرىتىش نىيىتى يوق (رىملىقلار 3:23؛ ياقۇپ 3:2). شۇنداقتىمۇ، ئۇنىڭ ئىش-ھەرىكەتلىرى كۆڭلىڭىزنى بىئارام قىلغان بولۇشى ۋە شۇ ئىشنى ئويلاپ ئۇخلىيالمىغان بولۇشىڭىز مۇمكىن. سىز ھەتتا: «ئۇ بۇرادەر مۇشۇنداق قىلسا بولامدۇ؟ بۇ راستىنلا خۇدانىڭ تەشكىلاتىمۇ؟»— دەپ ئويلىغان بولۇشىڭىز مۇمكىن. شەيتان دەل بىزنىڭ شۇنداق ئويلىشىمىزنى خالايدۇ (2-كورىنت. 2:11). بۇنداق سەلبىي ئوي-پىكىردە بولۇش بىزنى يەھۋا ۋە ئۇنىڭ تەشكىلاتىدىن ئايرىۋېتىشى مۇمكىن. ئۇنداقتا، ئېتىقادچى قېرىندىشىمىزنى بىزگە ناچار مۇئامىلە قىلغاندەك ھېس قىلساق، ئويغاق ياكى سەگەك تۇرۇش ھەمدە شەيتان خالىغاندەك ئوي-پىكىردە بولۇشتىن ساقلىنىش ئۈچۈن نېمە قىلساق بولىدۇ؟
4. يۈسۈپ ناچار مۇئامىلىگە ئۇچرىغاندا، سەگەك تۇرۇش ئۈچۈن نېمە قىلغان؟ ئۇنىڭ ئۈلگىسىدىن نېمىنى ئۆگىنەلەيمىز؟ (يارىتىلىش 50:19–21)
4 ئاداۋەت ساقلاپ رەنجىپ يۈرمەڭ. يۈسۈپ ياش ۋاقتىدا، چوڭ ئاكىلىرى ئۇنىڭغا يامانلىق قىلغان. ئۇلار ئۇنى ئۆچ كۆرۈپ، ھەتتا بەزىلىرى ئۇنى ئۆلتۈرمەكچى بولغان ئىدى (يارىت. 37:4، 18–22). ئاخىرىدا، ئۇلار ئۇنى قۇللۇققا سېتىۋەتكەن. نەتىجىدە، يۈسۈپ تەخمىنەن 13 يىل داۋاملاشقان ئېغىر سىناقلارغا دۇچ كەلگەن ئىدى. يۈسۈپ بەلكىم، يەھۋا ئۇنى ياخشى كۆرمەيدۇ ۋە ياردەمگە مۇھتاج بولغاندا، ئۇنى تاشلاۋەتتى دەپ ئويلىشى مۇمكىن ئىدى. ئەمما، يۈسۈپ ئۆچ-ئاداۋەت ساقلاپ، رەنجىپ يۈرمىگەن. ئەكسىچە، ئۇ تىنچ-خاتىرجەملىكنى ساقلاش ئارقىلىق سەگەك تۇرغان. ئۇ قېرىنداشلىرىدىن ئۆچ ئېلىش پۇرسىتىگە ئېرىشكەندە، ئۆچ ئېلىشنىڭ ئورنىغا، ئۇلارغا مېھىر-مۇھەببەت كۆرسىتىپ، ئۇلارنى كەچۈرگەن ئىدى (يارىت. 45:4، 5). يۈسۈپ شۇنداق يول تۇتقان، سەۋەبى ئۇ چوڭقۇر ئويلانغان ئىدى. ئۇ دىققىتىنى ئۆز قىيىنچىلىقلىرىغا ئەمەس، يەھۋانىڭ مەقسىتى ئۈستىدە ئويلىنىشقا قاراتقان (يارىتىلىش 50:19–21-نى ئوقۇڭ). بۇنىڭدىن نېمىنى ئۆگىنەلەيمىز؟ ئەگەر سىزگە ياخشى مۇئامىلە قىلمىغان بولسا، يەھۋاغا ئۆچمەنلىك ساقلىماڭ ياكى ئۇ سىزنى تاشلاپ كەتتى دەپ ئويلىماڭ. ئەكسىچە، ئۇ سىناققا بەرداشلىق بېرىشىڭىزگە قانداق ياردەم قىلىۋاتقانلىقى ھەققىدە ئويلاڭ. بۇنىڭدىن باشقا، باشقىلار سىزگە ياخشى مۇئامىلە قىلمىغاندا، ئۇلارنىڭ نامۇكەممەللىكىنى سۆيگۈ-مۇھەببەت بىلەن يېپىشقا تىرىشىڭ.—1-پېتر. 4:8.
5. مىكېئاس ئۆزىنى ناچار مۇئامىلىگە ئۇچرىغاندەك ھېس قىلغاندا، سەگەك تۇرۇش ئۈچۈن نېمە قىلغان؟
5 جەنۇبىي ئامېرىكىدىكى مىكېئاس b ئىسىملىك ئاقساقالنىڭ كەچۈرمىشلىرىنى كۆرۈپ باقايلى. ئۇ، يەھۋانىڭ تەشكىلاتىدا مەسئۇلىيەتنى ئۈستىگە ئالغان بەزى قېرىنداشلار ئۇنىڭغا ياخشى مۇئامىلە قىلمىغاندەك ھېس قىلغان ۋاقىتنى ئەسلەپ، مۇنداق دېگەن: «مەن ئەزەلدىن بۇنداق بېسىم ھېس قىلىپ باقمىغان ئىدىم. مەن قورقۇپ كەتتىم. كېچىسى ئۇخلىيالمىدىم، ئامالسىزلىقتىن يىغلاپ، ياشلارنى تۆكتۈم». شۇنداقتىمۇ، مىكېئاس سەگەك تۇرۇپ، ھېس-تۇيغۇسىنى كونترول قىلىشقا تىرىشقان. ئۇ دائىم دۇئا قىلىپ، يەھۋادىن ئۇنىڭغا مۇقەددەس روھ ۋە بەرداشلىق بېرىشى ئۈچۈن كۈچ-قۇۋۋەت بېرىشنى ئۆتۈنگەن. ئۇ يەنە نەشىرى ماتېرىياللىرىمىزدىن ئۆزىگە ياردەم بېرەلەيدىغان مەلۇماتلارنى ئىزدىگەن. بۇنىڭدىن نېمىنى ئۆگەندىڭىز؟ بىر قېرىنداش سىزگە ناچار مۇئامىلە قىلغاندەك ھېس قىلسىڭىز، تىنچ-خاتىرجەملىكنى ساقلاڭ ھەمدە ئۆزىڭىزدە پەيدا بولغان سەلبىي ھېس-تۇيغۇلارنى تىزگىنلەشكە تىرىشىڭ. بەلكىم، سىز شۇ كىشىنىڭ شۇنداق سۆزلەرنى ياكى ئىش-ھەرىكەتلەرنى قىلىشىغا قانداق ئەھۋال سەۋەبچى بولغانلىقىنى بىلمەسلىكىڭىز مۇمكىن. شۇڭا، دۇئا قىلىپ، يەھۋا بىلەن پاراڭلىشىڭ ۋە ئۇنىڭدىن ياردەم سوراپ، ئۆزىڭىزنى باشقىلارنىڭ ئورنىغا قويۇپ، ئىشلارغا قاراشقا تىرىشىڭ. بۇنداق قىلىش قېرىندىشىڭىزنىڭ سىزگە ھېچبىر يامانلىق قىلىش نىيىتىنىڭ بولمىغانلىقى ھەققىدە چوڭقۇر ئويلىنىپ، ئۇنى كەچۈرۈۋېتىشىڭىزگە ياردەم بېرىشى مۇمكىن (پەند. نە 19:11). ئېسىڭىزدە بولسۇنكى، يەھۋا سىزنىڭ ۋەزىيىتىڭىزنى ئوبدان بىلىدۇ ۋە بەرداشلىق بېرەلىشىڭىز ئۈچۈن كۈچ بېرىدۇ.—2-تارىخ. 16:9؛ ۋەز 5:8.
يەھۋا نەسىھەت بېرىپ، بىزنى تۈزەتكەندە
6. يەھۋانىڭ تەربىيىلەپ تۈزىتىشىنى بىزگە بولغان سۆيگۈ-مۇھەببەتنىڭ ئىپادىسى دەپ قاراش نېمە ئۈچۈن بەك مۇھىم؟ (ئىبرانىيلار 12:5، 6، 11)
6 يەھۋا بىزنى تۈزەتكەندە، كۆڭلىمىزنى بەك يېرىم ھېس قىلىشىمىز مۇمكىن. ئەمما، بىز دىققىتىمىزنى پەقەت ئاغرىققا قاراتساق، ياراتقۇچىنىڭ تەربىيىسىنى ئادىل ئەمەس ياكى بىز ئۈچۈن ماس كەلمەيدۇ دەپ ئويلاشقا باشلىشىمىز مۇمكىن. نەتىجىدە، ئالاھىدە بىر نەرسىنى، يەنى يەھۋانىڭ تەربىيىسىنى بىزگە بولغان سۆيگۈ-مۇھەببىتىنىڭ ئىپادىسى دەپ قاراشنى قولدىن بېرىپ قويۇشىمىز مۇمكىن (ئىبرانىيلار 12:5، 6، 11-نى ئوقۇڭ). ئەگەر ھېس-تۇيغۇلىرىمىزنىڭ بىزنى كونترول قىلىشىغا يول قويساق، شەيتاننىڭ ھېس-تۇيغۇلىرىمىزدىن پايدىلىنىپ كېتىشىگە پۇرسەت بېرىپ قويىمىز. ئۇ بىزنىڭ تۈزىتىشنى رەت قىلىشىمىزنى، تېخىمۇ يامان يېرى، يەھۋا ۋە جامائەتتىن يىراقلىشىشىمىزنى خالايدۇ. ئەگەر سىزنى تۈزىتىش ئۈچۈن نەسىھەت بېرىلگەن بولسا، سەگەك تۇرۇش ئۈچۈن نېمە قىلالايسىز؟
پېترۇس كەمتەرلىك بىلەن نەسىھەتنى ۋە تۈزىتىشنى قوبۇل قىلغاچ، يەھۋا ئۇنى تېخىمۇ كۆپ ئىشلاردا قوللانغان (7-ئابزاسقا قاراڭ)
7. (1) رەسىمدە كۆرسىتىلگەندەك، پېترۇس تۈزىتىشنى قوبۇل قىلغاندىن كېيىن، يەھۋا ئۇنى قانداق ئىشلەتكەن؟ (2) پېترۇسنىڭ مىسالىدىن نېمىنى ئۆگەندىڭىز؟
7 تۈزىتىشـنى قوبـۇل قىـلىڭ ۋە زۆرۈر ئۆزگەرتىشلەرنى قىلىڭ. بىرقانچە قېتىم، ئەيسا پېترۇسنى باشقا ئەلچىلەرنىڭ ئالدىدا تۈزەتكەن (ماركۇس 8:33؛ لۇقا 22:31–34). بەلكىم، پېترۇس شۇ چاغدا باشقىلارنىڭ ئالدىدا بەكمۇ خىجىل بولغان! شۇنداق بولسىمۇ، پېترۇس ئەيساغا سادىق بولۇپ قالغان. ئۇ تۈزىتىشنى قوبۇل قىلىپ، ئۆز خاتالىقلىرىدىن ساۋاق ئالغان ئىدى. نەتىجىدە، يەھۋا پېترۇسنىڭ ساداقەتمەنلىكىنى مۇكاپاتلىغان ۋە ئۇنىڭغا جامائەتتە مۇھىم مەسئۇلىيەتلەرنى تاپشۇرغان (يۇھاننا 21:15–17؛ ئەلچى. 10:24–33؛ 1-پېتر. 1:1). پېترۇسنىڭ مىسالىدىن نېمىنى ئۆگىنەلەيمىز؟ بىز دىققىتىمىزنى قانچىلىك خىجىللىق ھېس قىلىشىمىزغا قاراتماي، ئەكسىچە تۈزىتىشنى قوبۇل قىلىپ، زۆرۈر ئۆزگەرتىشلەرنى قىلساق، بۇ ئۆزىمىز ئۈچۈنلا ئەمەس، باشقىلار ئۈچۈنمۇ پايدىلىق. شۇنداق قىلساق، يەھۋا بىزنى ئۆز خىزمىتىدە تېخىمۇ كۆپرەك قوللىنىدۇ ۋە قېرىنداشلىرىمىز بۇنىڭ پايدىسىنى كۆرىدۇ.
8، 9. تۈزىتىش ئۈچۈن تەربىيە بېرىلگەندە، بېرناردو دەسلەپتە ئۆزىنى قانداق ھېس قىلغان، بىراق ئۇنىڭ ئۆز ئوي-پىكىرىنى تۈزىتىشىگە نېمە ياردەم بەرگەن؟
8 موزامبىكتا ياشايدىغان بېرناردو ئىسىملىك بۇرادەرگە نېمە بولغانلىقىنى كۆرۈپ باقايلى. ئۇ ئاقساقال سۈپىتىدە خىزمەت قىلىشتىن توختىتىلغان. بېرناردو دەسلەپتە ئۆزىنى قانداق ھېس قىلغان؟ ئۇ مۇنداق دېگەن: «مەن بېرىلگەن تەربىيىنى ياقتۇرمىغاچ، رەنجىپ يۈردۈم». ئۇ جامائەتتىكى باشقىلارنىڭ ئۇنىڭغا قانداق قارايدىغانلىقىغا كۆڭۈل بۆلگەن ئىدى. ئۇ شۇنى ئېتىراپ قىلغان: «ماڭا بېرىلگەن تەربىيىگە توغرا كۆزقاراشتا بولۇش ھەمدە يەھۋا ۋە ئۇنىڭ تەشكىلاتىغا قايتا ئىشىنىش ئۈچۈن بىرقانچە ئاي ۋاقىت كەتتى». بېرناردونىڭ ئۆز كۆزقارىشىنى ئۆزگەرتىشىگە نېمە ياردەم بەرگەن؟
9 بېرناردو ئۆزىنىڭ ئوي-پىكىرىنى تۈزەتكەن. ئۇ چۈشەندۈرۈپ مۇنداق دېگەن: «مەن ئاقساقال بولۇپ خىزمەت قىلغاندا، ئىبرانىيلار 12:7-ئايەتنى ئىشلىتىپ، باشقىلارنىڭ يەھۋانىڭ تۈزىتىشىگە توغرا كۆزقاراشتا بولۇشى ئۈچۈن ياردەم قىلغان ئىدىم. ھازىر مەن ئۆز-ئۆزۈمدىن: «بۇ ئايەتتىكى نەسىھەت سۆزىنى كىم ئەمەلىي قوللىنىشى كېرەك؟»— دەپ سورىدىم. يەھۋانىڭ بارلىق خىزمەتچىلىرى، ئەلۋەتتە شۇلارنىڭ ئارىسىدا مەنمۇ بار». ئاندىن كېيىن، بېرناردو يەنە باشقا ئۆزگەرتىشلەرنى قىلىپ، يەھۋا ۋە ئۇنىڭ تەشكىلاتىغا بولغان ئىشەنچىسىنى قايتىدىن تىكلىگەن. ئۇ كۆپرەك مۇقەددەس كىتاب ئوقۇش ۋە مۇلاھىزە قىلىپ چوڭقۇرراق ئويلىنىش ئۈچۈن تېخىمۇ كۆپ ۋاقىت چىقارغان. گەرچە ئۇ قېرىنداشلارنىڭ ئۇنىڭغا قانداق قارىشىدىن ئەنسىرىگەن بولسىمۇ، ئەمما ئۇلار بىلەن بىللە ۋەز خىزمەتكە چىقىپ، جامائەت يىغىلىشلىرىغا قاتناشقان. ۋاقتى كەلگەندە، بېرناردو قايتا ئاقساقال بولۇپ تەيىنلەنگەن. بېرناردوغا ئوخشاش، تۈزىتىش ئۈچۈن سىزگىمۇ تەربىيە بېرىلگەن بولسا، دىققىتىڭىزنى قانچىلىك خىجىللىق ھېس قىلىشقا قاراتماي، نەسىھەتنى قوبۇل قىلىپ، زۆرۈر ئۆزگەرتىشلەرنى قىلىشقا تىرىشىڭ c (پەند. نە 8:33؛ 22:4). ئەگەر شۇنداق قىلسىڭىز، يەھۋاغا ۋە ئۇنىڭ تەشكىلاتىغا سادىقلىق بىلەن مەھكەم يېپىشىسىز ۋە ئۇنىڭ سىزنى مۇكاپاتلايدىغانلىقىغا قەتئىي ئىشىنىسىز.
تەشكىلاتتىكى يېڭى ئۆزگىرىشلەرنى قوبۇل قىلىش قىيىنغا توختىغاندا
10. تەشكىللەش ئىشىدا يولغا قويۇلغان قانداق ئۆزگىرىش بەزى ئىسرائىللارنىڭ ساداقەتمەنلىكىنى سىنىغان بولۇشى مۇمكىن؟
10 تەشكىلاتتىكى يېڭى ئۆزگىرىشلەر بىزنىڭ ساداقەتمەنلىكىمىزنى سىنىشى مۇمكىن. ئەگەر ئېھتىيات قىلمىساق، ھەتتا ئۇلارنىڭ بىزنى يەھۋادىن ئايرىۋېتىشكە يول قويىمىز. مەسىلەن، مۇسا پەيغەمبەر ئارقىلىق چۈشۈرۈلگەن قانۇندىكى بىر تەشكىللەش ئىشىنىڭ بەزى ئىسرائىللارغا قانداق تەسىر كۆرسەتكەنلىكىنى كۆرۈپ باقايلى. قانۇن يولغا قويۇلۇشتىن بۇرۇن، ئائىلە باشلىقلىرى روھانىيلار قىلىدىغان ئىشنى قىلغان. ئۇلار قۇربانلىق سۇپىسىنى ياساپ، ئائىلىسىدىكىلەرگە ۋاكالىتەن يەھۋاغا قۇربانلىق سۇنغان (يارىت. 8:20، 21؛ 12:7؛ 26:25؛ 35:1، 6، 7؛ ئايۇپ 1:5). بىراق، قانۇن يولغا قويۇلغاندىن كېيىن، ئەمدى ئائىلە باشلىقلىرىنىڭ ئاشۇ ئىشلارنى قىلىشقا يول قويۇلمىغان ئىدى. يەھۋا قۇربانلىقلارنى سۇنۇشقا ھارۇننىڭ ئائىلىسىدىن روھانىيلارنى تەيىنلىگەن. ئەگەر ھارۇننىڭ ئەۋلادلىرىدىن بولمىغان بىر ئائىلە باشلىقى روھانىيلىق ۋەزىپىسىنى ئۆتۈشكە باشلىسا، ئۇنداق كىشى ئۆلتۈرۈلەتتى d (لاۋى. 17:3–6، 8، 9). بەلكىم، بۇ ئۆزگىرىش كوراھ، داتان، ئابىرام ۋە باشقا 250 كىشىنىڭ مۇسا ۋە ھارۇننىڭ ھوقۇقىغا قارشى ئىسىيان كۆتەرگەنلىكىنىڭ سەۋەبلىرىدىن بىرى بولغانمۇ؟ (سانلار 16:1–3). بۇنىڭغا ئېنىق بىر نېمە دېيەلمەيمىز. مەيلى قانداق بولغان بولۇشىدىن قەتئىينەزەر، كوراھ ۋە ئۇنىڭ بىلەن بىللە بولغانلار يەھۋاغا سادىق بولۇپ قالالمىغان. ئەگەر تەشكىلاتتىكى ئۆزگىرىشلەر ساداقەتمەنلىكىڭىزنى سىنىسا، نېمە قىلسىڭىز بولىدۇ؟
كوھاتلىقلار يېڭى ۋەزىپىنى قوبۇل قىلىپ، ناخشىچىلار، دەرۋازا قاراۋۇللىرى ياكى ئامبارلاردا خىزمەتچى بولۇشقا تەييار بولۇشقان (11-ئابزاسقا قاراڭ)
11. بەزى كوھاتى لاۋىيلارنىڭ مىسالىدىن نېمىلەرنى ئۆگىنىمىز؟
11 تەشكىلاتتىكى ئۆزگىرىشلەرنى پۈتۈن كۈچ بىلەن قوللاپ-قۇۋۋەتلەڭ. چۆلدىكى سەپەر جەريانىدا، كوھاتىلىقلارغا بەك ئالاھىدە ۋەزىپىگە تاپشۇرۇلغان ئىدى. ھەر قېتىم ئىسرائىللار قارارگاھ چېدىرلىرىنى كۆچۈرگەندە، بەزى كوھاتىلىقلار ئەھدە ساندۇقىنى بارچە خەلقنىڭ ئالدىدا كۆتۈرۈپ ماڭاتتى (سانلار 3:29، 31؛ 10:33؛ يەشۇئا 3:2–4). بۇ نېمە دېگەن ئالاھىدە ئىمتىياز! ئەمما، ئىسرائىللار ۋەدە قىلىنغان زېمىنغا ماكانلاشقاندا، ئىشلاردا زور ئۆزگىرىشلەر بولغان. ئەمدى ساندۇقنى دائىم يۆتكەشنىڭ ھاجىتى قالمىغان. شۇڭا، سۇلايمان پادىشاھ بولۇپ ھۆكۈمرانلىق قىلغانغا قەدەر، بەزى كوھاتىلىقلار ناخشىچىلار، بەزىلىرى دەرۋازا قاراۋۇللىرى، يەنە بەزىلىرى ئامبارلارغا قارايدىغان خىزمەتچىلەر سۈپىتىدە تەيىنلەنگەن (1-تارىخ. 6:31–33؛ 26:1، 24). ئىلگىرى ئالاھىدە بىر ۋەزىپىنى ئورۇنلىغانلىقى سەۋەبلىك، كوھاتلىقلارنىڭ نارازىلىق بىلدۈرگەنلىكى ياكى تېخىمۇ مۇھىمراق خىزمەتنى تەلەپ قىلىنغانلىقى ھەققىدە ھېچبىر سۆزلەر يېزىلمىغان. بىز بۇنىڭدىن نېمىنى ئۆگىنەلەيمىز؟ بىزگە تاپشۇرۇلغان ۋەزىپىگە تەسىر قىلىشىغا قارىماي، يەھۋا تەشكىلاتىدىكى بارلىق ئۆزگىرىشلەرنى چىن دىلىڭىزدىن قوللاپ-قۇۋۋەتلەڭ. سىزگە تاپشۇرۇلغان ھەر قانداق ۋەزىپىدىن خۇرسەن بولۇڭ. ئېسىڭىزدە بولسۇنكى، يەھۋانىڭ ئالدىدا سىزنى قەدىر-قىممەتلىك قىلىدىغىنى قىلىۋاتقان ۋەزىپىڭىز ئەمەس. يەھۋا ئىتائەتچانلىقىڭىزنى ھەرقانداق ۋەزىپىدىن بەكرەك قەدىرلەيدۇ.—1-سام. 15:22.
12. زەينا بەيتەلدىن ئايرىلىپ، ساھەدە ۋەز قىلىشقا تەيىنلەنگەندە ئۆزىنى قانداق ھېس قىلغان؟
12 ئوتتۇرا شەرقتە ياشايدىغان زەينا ئىسىملىك قېرىنداشنىڭ مىسالىغا قاراپ باقايلى. ئۇنىڭ ۋەزىپىسى ئۆزگىرىپ، ئۆزى قەدىرلىگەن شان-شەرەپلىك خىزمەتتىن ئايرىلغان. ئۇ بەيتەلدە 23 يىلدىن كۆپرەك خىزمەت قىلغاندىن كېيىن، قايتا ساھەدە ۋەز قىلىش خىزمىتىگە تەيىنلەنگەن. ئۇ: «خىزمىتىمنىڭ ئۆزگۈرۈشى مېنى بەك چۆچۈتتى. ئۆزۈمنى كارغا كەلمەيدىغاندەك ھېس قىلدىم ۋە ئۆز-ئۆزۈمدىن: «نېمە ئىشنى خاتا قىلدىم؟»— دەپ سوراپ تۇراتتىم. بەك ئەپسۇس، جامائەتتىكى بەزى قېرىنداش ئۇنىڭ يارىسى ئۈستىگە تۇز چېچىپ، شۇنداق دېگەن: «ئەگەر ھەقىقەتەن ياخشى بولغان بولساڭ، تەشكىلات سېنى بەيتەلدە قالدۇراتتى». زەينانىڭ كۆڭلى بىر مەزگىل ئىنتايىن يېرىم بولغان ۋە ھەر كۈنى كەچتە يىغلىغان. ئەمما، ئۇ: «مەن ئەزەلدىن تەشكىلاتتىن ياكى يەھۋانىڭ سۆيگۈسىدىن گۇمانلىنىشقا يول بەرمىدىم»،— دەيدۇ. زەينا سەگەك تۇرۇش ئۈچۈن نېمە قىلغان؟
13. زەينا سەلبىي ھېس-تۇيغۇلىرىنى يېڭىش ئۈچۈن نېمە قىلغان؟
13 زەينا ئۆزىنىڭ سەلبىي ھېس-تۇيغۇلىرىنى يېڭەلىگەن ئىدى. قانداق يەڭگەن؟ ئۇ ئۆزى دۇچ كەلگەن قىيىنچىلىققا مۇناسىۋەتلىك ماقالىلەرنى ئوقۇغان. «كۈزىتىش مۇنارى» (باشقا تىلدا)، 2001-يىل، 1-فېۋرال سانىدىكى «ئۈمىدسىزلىككە تاقابىل تۇرالايسىز!» ناملىق ماقالە ئۇنىڭغا كۆپ ياردەم بەرگەن. ئۇ ماقالىدە مۇقەددەس كىتابنى قەلەمگە ئالغان ماركۇسنىڭ ۋەزىپىسى ئۆزگەرگەندە، ئۇنىڭ قانداق ھېس-تۇيغۇ بىلەن كۈرەش قىلغانلىقىنى چۈشەندۈرۈلگەن ئىدى. زەينا ئەسلەپ مۇنداق دېگەن: «ماركۇسنىڭ مىسالى ئۈمىدسىزلىكنى يېڭىشىمغا ياردەم بەرگەن شىپالىق دورا». زەينا يەنە دوستلىرى بىلەن يېقىن ئالاقىنى ساقلىغان. ئۇ ئۆزىنى باشقىلاردىن قاچۇرمىغان، ئۇنىڭدىن باشقا، ئۇ ئۆز-ئۆزىدىن ئاغرىنمىغان. ئۇ يەھۋانىڭ ئۆز روھى ئارقىلىق يېتەكلەۋاتقان تەشكىلات ۋە مەسئۇلىيەتنى ئۆز ئۈستىگە ئالغان قېرىنداشلارنى ئىشلىتىپ، ئۇنىڭغا كۆڭۈل بۆلىدىغانلىقىنى چۈشەنگەن. ئەمما، ئۇ خۇدانىڭ تەشكىلاتى ئۈچۈن ئەڭ مۇھىم بولغىنى، چوقۇم يەھۋانىڭ خىزمىتىنى ئەڭ ياخشى قىلىش ئىكەنلىكىنى تونۇپ يەتكەن.
14. تەشكىلاتنىڭ قايسى ئۆزگەرتىشلىرىگە ماسلىشىش ۋىلادو ئۈچۈن قىيىن بولغان ۋە ئۇنىڭغا نېمە ياردەم قىلغان؟
14 سلوۋېنىيىدە ياشايدىغان 73 ياشلىق ئاقساقال ۋىلادو، ئۆز جامائىتى باشقا بىر جامائەت بىلەن بىرلەشتۈرۈلۈپ، ئۇ بېرىۋاتقان ئىبادەت زالى تاقالغاندا، بۇ ئۇنىڭغا بەك قىيىن كەلگەن. ئۇ مۇنداق دەيدۇ: «مەن نېمە ئۈچۈن بۇنداق چىرايلىق ئىبادەت زالىنىڭ تاقىلىدىغانلىقىنى چۈشەنمىدىم. زالنى يېقىندا رېمونت قىلغان ئىدۇق، شۇڭا قاتتىق ئازابلاندىم. مەن ياغاچچى، بەزى يېڭى جاھازىلارنى ئۆزۈم ياسىغان ئىدىم. شۇنداقلا، تەشكىلات تەلەپ قىلغان نۇرغۇنلىغان يېڭى ئۆزگەرتىشلەر بىزدەك ياشانغان ۋەز ئېيتقۇچىلار ئۈچۈن ئاسان بولمىغان». ۋىلادونىڭ يول-يورۇقنى قوللاپ-قۇۋۋەتلىشىگە نېمە ياردەم بەرگەن؟ ئۇ چۈشەندۈرۈپ مۇنداق دەيدۇ: «يەھۋانىڭ تەشكىلاتىدىكى يېڭى ئۆزگىرىشلەرگە ماسلىشىش ھەمىشە بەرىكەتكە ئېرىشتۈرىدۇ. بۇنداق تاۋلاشلار بىزنى كېلەچەكتىكى ھەتتا تېخىمۇ چوڭ ئۆزگىرىشلەرگە تەييارلىماقتا». جامائەتنى بىرلەشتۈرۈش ياكى ۋەزىپىڭىزنى ئۆزگەرتىشكە ئوخشاش ئۆزگىرىشلەرگە ماسلىشىش سىز ئۈچۈن قىيىن كېلىۋاتامدۇ؟ يەھۋانىڭ ھېس-تۇيغۇلىرىڭىزنى چۈشىنىدىغانلىقىغا ئىشىنىڭ. سىز شۇنىڭدەك ئۆزگىرىشلەرنى قوللاپ، يەھۋا ۋە ئۇ ئىشلىتىۋاتقان تەشكىلاتقا سادىقلىق بىلەن چىڭ يېپىشىپ تۇرسىڭىز، چوقۇم بەرىكەتكە ئېرىشىسىز.—زەبۇر 18:25.
ھەممە ئىشتا سەگەك تۇرۇڭ
15. جامائەت ئىچىدىن كېلىدىغان قىيىنچىلىقلارغا دۇچ كەلگەندە، سەگەك تۇرۇش ئۈچۈن نېمە قىلالايمىز؟
15 بۇ زاماننىڭ ئاخىرلىشىشىغا ئاز قالغانسېرى، جامائەتنىڭ ئىچىدىن كېلىدىغان قىيىنچىلىقلارغا دۇچ كېلىشىمىز ۋە بۇ قىيىنچىلىقلار يەھۋاغا بولغان سادىقلىقىمىزنى سىنىشى مۇمكىن. شۇڭا، بىز چوقۇم سەگەك تۇرۇشىمىز كېرەك. ئەگەر ئۆزىڭىزنى ئېتىقادچى قېرىندىشىڭىزنىڭ ناچار مۇئامىلىسىگە ئۇچرىغاندەك ھېس قىلسىڭىز، ئاداۋەت ساقلاپ رەنجىپ يۈرمەڭ. ئەگەر تۈزىتىش ئۈچۈن تەربىيە بېرىلسە، دىققىتىڭىزنى خىجىل بولۇشقا قاراتماي، نەسىھەتنى قوبۇل قىلىڭ ۋە زۆرۈر ئۆزگەرتىشلەرنى قىلىڭ. يەھۋانىڭ تەشكىلاتى سىزگە شەخسەن تەسىر قىلىدىغان ئۆزگەرتىشلەرنى قىلغاندا، ئۇلارنى چىن دىلىڭىزدىن قوبۇل قىلىڭ ۋە يول-يورۇققا بويسۇنۇڭ.
16. يەھۋا ۋە ئۇنىڭ تەشكىلاتىغا بولغان ئىشەنچىڭىزنى قانداق ساقلاپ قالالايسىز؟
16 ساداقەتمەنلىكىڭىز سىناققا دۇچ كەلگەندە، يەھۋا ۋە ئۇنىڭ تەشكىلاتىغا بولغان ئىشەنچىڭىزنى ساقلاپ قالالايسىز. ئەمما، بۇنىڭ ئۈچۈن ھەردائىم سەگەك ياكى ھوشىيار تۇرۇشىڭىز كېرەك، يەنى تىنچ-خاتىرجەملىكنى ساقلاش، سوغۇق قانلىق بىلەن چوڭقۇر ئويلىنىش ۋە ئىشلارغا يەھۋانىڭ كۆزقارىشى بىلەن قاراش كېرەك. سىز دۇچ كەلگەن قىيىنچىلىقلارغا ئوخشىشىپ كېتىدىغان قىيىنچىلىقلارغا دۇچ كەلگەن مۇقەددەس كىتابتىكى شەخسلەرنىڭ مىساللىرىنى ئوقۇپ، ئۇلارنىڭ قىيىنچىلىقلارغا قانداق تاقابىل تۇرالىغانلىقى ھەققىدە چوڭقۇر ئويلىنىپ، تەتقىق قىلىشقا بەل باغلاڭ. يەھۋادىن ياردەم تىلەپ دۇئا قىلىڭ. ھەرگىزمۇ جامائەتتىن ئايرىلماڭ. قانداق ئىش يۈز بېرىشىدىن قەتئىينەزەر، شەيتان سىزنى يەھۋا ياكى ئۇنىڭ تەشكىلاتىدىن ئايرىۋېتەلمەيدۇ.—ياقۇپ 4:7.
29-ناخشا ساداقەتمەنلىكنى ساقلاپ يۈرۈش
a بەزىدە يەھۋا ۋە ئۇنىڭ تەشكىلاتىغا بولغان ساداقەتمەنلىكىمىزنى ساقلاش بىز ئۈچۈن قىيىن بولۇشى مۇمكىن، بولۇپمۇ جامائەتتە كۆڭلىمىزنى ئاغرىتىدىغان بەزى ئىشلار يۈز بەرگەندە شۇنداق بولىدۇ. ھازىر ئۈچ قىيىنچىلىق، يەھۋا ۋە ئۇنىڭ تەشكىلاتىغا سادىق بولۇش ئۈچۈن نېمىلەرنى قىلالايدىغانلىقىمىز ھەققىدە مۇھاكىمە قىلىمىز.
b بەزى ئىسىملار ئۆزگەرتىلگەن.
c «كۈزىتىش مۇنارى» (باشقا تىلدا)، 2009-يىل، 15-ئاۋغۇست سانى، 30-بەتتىكى «سىز ئىلگىرى خىزمەت قىلغانمۇ؟ قايتا خىزمەت قىلالامسىز؟» ناملىق ماقالىدىن تېخىمۇ پايدىلىق مەسلىھەتلەرنى تاپالىشىڭىز مۇمكىن.
d قانۇندا ئائىلە باشلىقلىرى بىر جانىۋارنى گۆش ئۈچۈن بوغۇزلىماقچى بولغان بولسا، ئۇنى مۇقەددەس جايغا ئېلىپ بېرىشى تەلەپ قىلىنغان. مۇقەددەس جايدىن بەك يىراقتا ياشايدىغان ئائىلە باشلىقلىرى بۇنىڭ سىرتىدا ئىدى.—تەكرار. قا 12:21.