تەرجىمىھال
«يەھۋاغا خىزمەت قىلغۇم كەلدى»
بىز سۇرىنامنىڭ يامغۇرلۇق ئورمانلىرى ئىچىگە جايلاشقان گرانبورى يېزىسىنى زىيارەت قىلىپ بارغان ئىدۇق. ئۇ جايدىكى كىچىك بىر توپ كىشىلەر بىلەن خوشلاشقاندىن كېيىن، بىز بىر كېمىگە ئولتۇرۇپ، تاپاناخونى دەرياسىدا ئۈزۈپ كەتتۇق. كېيىنرەك، تېيىز دەريا ئېقىنلىرىدىن ئۆتكەندە، كېمە ماتورى چاقپىلىكى تاشقا ئۇرۇلدى. كېمىمىز سۇغا چۆكۈپ كەتتى. بىزمۇ سۇغا چۈشۈپ كەتتۇق. يۈرىكىم گۈپىلدەپ سوقۇپ كەتتى. مەن رايۇنغا مەسئۇل ئاقساقال سۈپىتىدە، نۇرغۇن يىل كېمىدە كۆپ قېتىم سەپەر قىلغان بولساممۇ، سۇ ئۈزۈشنى بىلمەيتتىم!
داۋاملىق نېمە بولغانلىقىنى ئېيتىپ بېرىشتىن بۇرۇن، تولۇق ۋاقىتلىق خىزمىتىمنى قانداق باشلىغانلىقىمنى ئېيتىپ بېرەي.
مەن 1942-يىلى كۇراتساۋ دېگەن كارىب دېڭىزىدىكى گۈزەل ئاراللاردىن بىرىدە تۇغۇلدۇم. دادام ئەسلى سۇرىنامدىن ئىدى. بىراق، ئۇ بۇ ئارالغا ئىشلەش ئۈچۈن كۆچۈپ بارغانىدى. دادام مەن تۇغۇلۇشتىن ئىككى يىل بۇرۇن يەھۋا گۇۋاھچىسى بولغان. ئۇ كۇراتساۋتا بىرىنچى سۇغا چۆمۈلدۈرۈلگەن يەھۋا گۇۋاھچىلاردىن بىرى ئىدى a. بىز دائىم ئۆگىنىشنى خالىمىساقمۇ، ئۇ ھەر ھەپتە بىز بىلەن مۇقەددەس كىتابنى ئۆگەنگەن. مەن 14 ياشقا كىرگەندە، دادام ياشىنىپ قالغان ئاپىسىغا قاراش ئۈچۈن ئائىلىمىز بىلەن سۇرىنامغا كۆچۈپ كەتتۇق.
ياخشى دوستلارنىڭ ياردىمى
سۇرىنامدا، مەن يەھۋاغا چىن يۈرەكتىن خىزمەت قىلىۋاتقان جامائەتتىكى ياشلار بىلەن ئارىلىشىشقا باشلىدىم. ئۇلار مەندىن بىرنەچچە ياش چوڭ ئىدى ۋە پىدائىي ۋەز ئېيتقۇچى بولۇپ خىزمەت قىلاتتى. ئۇلار خىزمەتتە بولغان ۋەقەلەر توغرۇلۇق ئېيتىپ بەرگەندە، كۆزلىرى خۇشاللىققا تولاتتى. جامائەت يىغىلىشلىرىدىن كېيىن، دوستلىرىم بىلەن بەزىدە تالادا يۇلتۇزلۇق ئاسمانلارغا قاراپ، روھىي ماۋزۇلار توغرۇلۇق پاراڭلىشىپ ئولتۇراتتۇق. شۇ دوستلىرىم ھاياتىمنى قانداق ئۆتكۈزۈشنى تونۇپ يېتىشىمگە ياردەم بەردى؛ مېنىڭ يەھۋاغا خىزمەت قىلغۇم كەلدى. شۇنىڭ بىلەن، 16 يېشىمدا، سۇغا چۆمۈلدۈرۈلدۈم. كېيىنرەك، 18 ياشتا پىدائىي ۋەز ئېيتىش خىزمىتىنى باشلىدىم.
مۇھىم ساۋاق ئالدىم
پارامارىبودا پىدائىي ۋەز ئېيتىپ يۈرگەن ۋاقىت
پىدائىي ۋەز ئېيتقۇچى بولۇپ خىزمەت قىلىپ يۈرگەندە كۆپ نەرسىلەرنى ئۆگەندىم. بۇ ماڭا تولۇق ۋاقىتلىق خىزمىتىمدە كۆپ ياردەم بەردى. مەسىلەن، باشقىلارغا تەلىم بېرىشنىڭ قانچىلىك مۇھىم ئىكەنلىكىنى چۈشەندىم. پىدائىي ۋەز ئېيتىشنى باشلىغاندا، مىسسىئونېر بولۇپ خىزمەت قىلغان ۋىليام ۋان سېل بۇرادەر مېنى ئۆز قانىتى ئاستىغا ئالدى b. ئۇ ماڭا جامائەتتىكى ۋەزىپىلەرنى قانداق ئورۇنداش كېرەكلىكىنى ئۆگەتتى. شۇ ۋاقىتتا كۆپ نەرسىلەرنى ئۆگىنىشىم كېرەكلىكىنى چۈشەنمەپتىمكەنمەن. كېيىنكى يىلى مېنى مەخسۇس پىدائىي ۋەز ئېيتقۇچى سۈپىتىدە تەيىنلىدى. مەن باشقا جامائەتلەردىن يىراق سۇرىنام يامغۇرلۇق ئورمانلىرى ئىچىدىكى كىچىك توپقا ياردەم بېرىشكە باشلىدىم. ئۆز ۋاقتىدا ۋىليامدەك بۇرادەرلەرنىڭ بەرگەن تەلىم-تەربىيىلىرى ئۈچۈن كۆپ مىننەتدارمەن! شۇ ۋاقىتتىن باشلاپ، ئۇلارنى ئۈلگە قىلىپ، باشقىلارغا تەلىم بېرىشكە تىرىشتىم.
ئىككىنچى ئۆگەنگەن مۇھىم نەرسە، ئاددىي ھايات كەچۈرۈشنىڭ ئەۋزەللىكى ۋە ھەممە ئىشلارنى ياخشى پىلانلاش. ھەر ئاينىڭ بېشىدا شېرىكىم ئىككىمىز كېيىنكى بىرنەچچە ھەپتىلىك ئېھتىياجلىرىمىزنى، مەسىلەن يېمەك-ئىچمەك ۋە باشقىمۇ كېرەكلىك نەرسىلەرنى تەييارلاپ قوياتتۇق. كېيىن، ئىككىمىزنىڭ بىرى پايتەخت شەھەرگە ئۇزۇن سەپەر قىلىپ، كېرەكلىك نەرسىلەرنىڭ ھەممىسىنى ئېلىپ كېلەتتۇق. بىر ئايلىق پۇلىمىزنى بىر ئايغا يەتكۈزۈش ئۈچۈن ھەممە چىقىملارنى ساناپ، ياخشى پىلان قۇرۇشىمىز كېرەك ئىدى. بىز يامغۇرلۇق ئورماندا نەرسە-كېرەكلىرىمىز تۈگەپ قالسا، ساناقلىقلا كىشىلەر ياردەم بېرەلەيتتى. ياش ۋاقىتتا ئۆگەنگەن ئاددىي ھايات كەچۈرۈش، ھەممىنى ئالدىن ياخشى پىلانلاش ھاياتىمدا پۈتۈن دىققىتىمنى يەھۋانىڭ خىزمىتىگە ئاغدۇرۇشقا ياردەم بەردى.
ئۈچىنچى ئۆگەنگەن نەرسە، ئادەملەرگە ئانا تىلىدا تەلىم بېرىشنىڭ مۇھىملىقىنى چۈشەندىم. سۇرىنامدا مەن گوللاند، ئىنگلىز، پاپىئامېنتو ۋە شرانانتونگو (باشقا نامى شرانان) تىللىرىدا سۆزلەپ چوڭ بولدۇم. بىراق، يامغۇرلۇق ئورماندا كىشىلەرگە ئانا تىلىدا خۇش خەۋەرنى يەتكۈزسەك، ئۇلارنىڭ ياخشىراق تىڭشايدىغانلىقىنى كۆردۈم. مەن ئۈچۈن ساراماكان تىلىغا ئوخشاش بەزى يەرلىك تىللاردا سۆزلەش قىيىن بولغان ئىدى. چۈنكى ئۇلار يۇقىرى-تۆۋەن ئاھاڭلاردا سۆزلەيتتى. بىراق، مېنىڭ تىرىشچانلىقىم بىكارغا كەتمىدى. يىللارنىڭ ئۆتۈشىگە ئەگىشىپ، ئۇلارنىڭ ئانا تىلىدا سۆزلەپ، كۆپ ئادەملەرنىڭ ھەقىقەتنى بىلىشىگە ياردەم بەردىم.
تىل ئۆگىنىپ يۈرگەندە، خىجالەت بولۇپ قالغان چاغلار بولغانىدى. مەسىلەن، بىر قېتىم، ساراماكان تىلىدا سۆزلەيدىغان مۇقەددەس كىتابنى ئۆگىنىپ يۈرگەن ئايالنىڭ قورسىقى ئاغرىۋاتقان ئىكەن. ئۇنىڭدىن ھازىر سالامەتلىكىڭىز قانداقراق دەپ سورىماقچى بولدۇم، ئەمما، بۇنىڭ ئورنىغا، ئۇنىڭدىن: «سىز ھامىلدارمۇ؟»— دەپ سوراپتىمەن. شۇنداق، بۇ سوئالىم ئۇنى خىجىل قىلىپ قويغانىدى. بۇنىڭدەك خاتالىقلارغا قارىماي، ۋەز خىزمىتىدە دائىم ئادەملەر بىلەن ئۇلارنىڭ ئانا تىلىدا سۆزلىشىشكە تىرىشاتتىم.
قوشۇمچە ۋەزىپىلەرنى قىلاتتىم
1970-يىلى، مەن رايونغا مەسئۇل ئاقساقال بولدۇم. شۇ يىلى مەن يامغۇرلۇق ئورمانلاردىكى كىچىك توپلارغا بېرىپ، «يەھۋا گۇۋاھچىلىرىنىڭ باش ئىدارىسىنى زىيارەت قىلىش» پروگراممىسىنى تونۇشتۇردۇم. ئۇلارنىڭ قېشىغا يېتىپ بېرىش ئۈچۈن، بىز بۇرادەرلەر بىلەن يامغۇرلۇق ئورمانلاردىكى دەريالاردا ئۇزۇن نېپىز ياغاچ كېمە بىلەن سەپەر قىلاتتۇق. كېمىمىزدە گېنېراتور، بېنزىن، ماي چىراقلار ۋە سۈرەتلەرنى كۆرسىتىشكە ياردەم بېرىدىغان ئۈسكىنە-جابدۇقلار بار ئىدى. كۆزلىگەن يەرگە يەتكەندە، بارلىق نەرسىلەرنى سۈرەتلەرنى كۆرسىتىدىغان جايغا ئاپىراتتۇق. ئاشۇ سەپەرلەرنى ئەسلىسەم، يىراقتا ياشايدىغان شۇ ئادەملەرنىڭ بۇ پروگراممىنى شۇنچىلىك ياخشى كۆرۈپ كۆرگەنلىكى ئېسىمدىن چىقمايدۇ. مەن باشقىلارنىڭ يەھۋا خۇدا ۋە ئۇنىڭ يەر يۈزىدىكى تەشكىلاتى ھەققىدە ئۆگىنىشىگە ياردەم بەرگىنىمدىن ئىنتايىن خۇشال ئىدىم. يەھۋانىڭ خىزمىتىنى قىلىش ئۈچۈن بەرگەن قۇربانلىقلارغا قارىغاندا، ئېرىشكەن بەرىكەتلىرىم تېخىمۇ كۆپرەك بولدى.
ئۈچ قات ئارغامچىنى ئۆرۈش
1971-يىل، سېنتەبىردە ئېسېل ئىككىمىز توي قىلدۇق
بويتاق ياشاشنىڭ خىزمىتىم ئۈچۈن ياخشى ئىكەنلىكىنى چۈشەنسەممۇ، ئۆمۈرلۈك ھەمراھقا مۇھتاج ئىكەنلىكىمنى ھېس قىلدىم. شۇڭا، يەھۋاغا دۇئا قىلىپ، يامغۇرلۇق ئورماندا ماڭا ھەمراھ بولۇپ، خۇشاللىق بىلەن خىزمەت قىلىشقا تەييار بولىدىغان ئايالنى سورىدىم. تەخمىنەن بىر يىلدىن كېيىن، ئېسېل ئىسىملىك مەخسۇس پىدائىي ۋەز ئېيتقۇچى قېرىنداش بىلەن ئۇچرىشىپ يۈردۈم. ئۇ قۇربانلىقلارنى بېرىشكە تەييار ئىدى. ئۇ كىچىكىدىن ئەلچى پاۋلۇسقا ھەۋەس قىلىپ، ئۇنى ئۈلگە قىلىپ، ۋەز خىزمەتنى پۈتۈن ۋۇجۇدى بىلەن قىلىشنى خالىغانىدى. بىز 1971-يىلى سېنتەبىر ئېيىدا توي قىلىپ، ئەر-ئايال سۈپىتىدە جامائەتلەرنى زىيارەت قىلىشقا باشلىدۇق.
ئېسېل ئانچە باي ئەمەس ئائىلىدە چوڭ بولغانىدى. شۇڭا، ئۇ يامغۇرلۇق ئورماندا جامائەتلەرنى زىيارەت قىلىشقا چاپسان كۆنۈپ كەتتى. مەسىلەن، يامغۇرلۇق ئورمانغا بېرىشقا تەييارلىق قىلغاندا، بىز كۆپ نەرسىلەرنى ئالمايتتۇق. كىيىم-كېچەكلەرنى دەريادا يۇياتتۇق، ئۆزىمىزمۇ شۇ يەردە يۇيۇناتتۇق. يەنە ئۆي ئىگىلىرى مېھماندوستلۇق كۆرسىتىپ، تاماقلارنى تەييارلىسا، تاللىماي ھەممىنى يەۋېرەتتۇق. ئۇلار ئادەتتە ئورمانلاردىن ئوۋلىغان كەسلەنچۈكلەر، دەريالاردىن تۇتقان ئۆتكۈر چىشلىق گۆشخور بېلىقلارنى پىشۇراتتى. تەخسىلەر بولمىغاندا، بانان يوپۇرماقلىرىنى قوللىناتتۇق. قوشۇق بولمىغاندا، قولىمىز بىلەن يەتتۇق. بىز ئېسېل ئىككىمىز يەھۋاغا خىزمەت قىلغاندا، بىرلىكتە قۇربانلىقلارنى بېرىپ، مەھكەم ئۈچ قات ئۆرۈلگەن ئارغامچا كەبى بولۇپ كەتتۇق (ۋەز 4:12). باشتىن ئۆتكۈزگەن شۇ ئاجايىپ كەچۈرمىشلەرنى ھېچنېمە بىلەن سېلىشتۇرالمايمىز!
مەن باشتا تىلغا ئالغان ۋەقە، ئورماندىكى يىراق بىر جايدىن قايتىش سەپىرىدە يۈز بەرگەنىدى. كېمىمىز شىددەتلىك ئېقىنغا كىرىپ كەتكەندىن كېيىن، قىسقىغىنە ۋاقىتقا سۇ ئاستىغا كىرىپ كەتتى. بىراق تېزلا سۇ يۈزىگە كۆتۈرۈلدى. خۇداغا شۈكۈر، سۇغا چۆكتۈرمەيدىغان كىيىملەرنى كىيىۋالغان ئىدۇق، كېمىدىن چۈشۈپ كەتمىدۇق. بىراق، كېمە سۇغا توشۇپ كەتكەنىدى. بىز كېمىدىكى يېمەكلىكلەرنى سېلىۋالغان قاچىلاردىن تاماقلارنى تۆكۈۋېتىپ، قۇرۇق قاچىلار بىلەن كېمىدىكى سۇنى چىقىرىپ تاشلىدۇق.
يېمەكلىكلىرىمىزنى تۆكۈۋەتكەچ، دەريانى بويلاپ، بېلىق تۇتۇشقا باشلىدۇق. بىراق، ھېچنېمە تۇتالمىدۇق. شۇڭا، بىز يەھۋاغا دۇئا قىلىپ، شۇ كۈن ئۈچۈن تاماقىمىزنى بېرىشنى سورىدۇق. دۇئا قىلىپ بولۇشىمىزغا، بىر بۇرادەر يوغان بىر بېلىقنى تۇتۇۋالدى. شۇ كۈنى كەچ، بىز بەش كىشى بېلىق بىلەن قورساق تويغۇزۇپ، خۇشال بولدۇق.
يولداش، دادا ۋە رايونغا مەسئۇل ئاقساقال
رايونغا مەسئۇل ئاقساقال بولۇپ، بەش يىل خىزمەت قىلغاندىن كېيىن، بىز كۈتمىگەن بەرىكەتكە ئېرىشتۇق. ئېسېل ھامىلدار بولۇپ، بىز ئەمدى ئاتا-ئانا بولىدىغان بولدۇق. بۇ خەۋەرنى ئاڭلاپ ئىنتايىن خۇشال بولدۇم، شۇنداقتىمۇ بۇ تۇرمۇشىمىزغا قانداق تەسىر قىلىدىغانلىقىنى بىلمەيتتىم. ئېسېل ئىككىمىز قولىمىزدىن كېلىشىچە تولۇق ۋاقىتلىق خىزمەتنى داۋاملاشتۇرۇشنى خالايتتۇق. 1976-يىلى ئوغلىمىز ئېسىنيال تۇغۇلدى. ئىككى يېرىم يىلدىن كېيىن ئىككىنچى ئوغلىمىز جوۋاننى تۇغۇلدى.
شەرقىي سۇرىنامدىكى گودو خولوغا يېقىن تاپاناخونى دەرياسىدا سۇغا چۆمۈلدۈرۈش، 1983-يىل
شۇ چاغدا، سۇرىنامدا رايونغا مەسئۇل ئاقساقالغا ئېھتىياج بولغاچ، بەيتەل كومىتېتى مېنى داۋاملىق رايونغا مەسئۇل ئاقساقال بولۇپ خىزمەت قىلىشقا تەيىنلىدى. زىيارەت خىزمىتىنىمۇ قىلدۇق ۋە بالىلىرىمىزنىمۇ تەربىيىلەپ چوڭ قىلدۇق. ئوغۇللىرىمىز كىچىك ۋاقىتتا، پەقەت بىرنەچچە جامائەتلەرنى زىيارەت قىلىپ يۈردۈم. ئادەتتە ئايدا بىر-ئىككى ھەپتە جامائەتنى زىيارەت قىلسام، قالغان ۋاقىتلاردا ئۆز جامائىتىمىزدە پىدائىي ۋەز ئېيتقۇچى بولۇپ خىزمەت قىلاتتىم. ئۆيىمىزگە يېقىن جامائەتلەرنى زىيارەت قىلغاندا، بىز بىر ئائىلە باراتتۇق. بىراق، يامغۇرلۇق ئورمانلاردىكى جامائەتلەرگە ۋە چوڭ يىغىلىشلارغا ئۆزۈم يالغۇز باراتتىم.
رايونغا مەسئۇل ئاقساقال بولۇپ، يىراق جايلاردىكى جامائەتلەرنى زىيارەت قىلىپ يۈرگەندە كېمە بىلەن سەپەر قىلاتتىم
بارلىق مەسئۇلىيەتلىرىمنى ئورۇنلاش ئۈچۈن ياخشى پىلان تۈزۈشۈم كېرەك ئىدى. ھەر ھەپتىدە ئائىلىۋى ئۆگىنىش ئۆتكۈزۈشكە تىرىشتىم. يامغۇرلۇق ئورمانلاردىكى جامائەتلەرگە بارغاندا، ئېسېل ئۆزى بالىلار بىلەن ئۆگىنىشنى ئۆتكۈزەتتى. مۇمكىنقەدەر ئىشلارنى بىز بىر ئائىلە كىشىلىرى بىللە قىلاتتۇق. ئېسېل ئىككىمىز بالىلار بىلەن بىللە كۆڭۈل ئاچاتتۇق، ئويۇنلار ئويناتتۇق ياكى ئۆيۈمىزنىڭ ئەتراپىدىكى جايلارنى ئايلىناتتۇق. جامائەتتىكى تاپشۇرۇقلارغا تەييارلىق قىلغاچ، دائىم كېيىنرەك ئۇخلايتتىم. ئېسېل پەندى-نەسىھەت 31:15-ئايەتتىكى ئايالغا ئوخشاش، تاڭ ئاتماستا ئورنىدىن تۇراتتى. بالىلىرىمىز مەكتەپكە مېڭىشتىن ئاۋۋال، بىز ھەممىمىز بىللە ناشتا قىلىپ، كۈندىلىك ئايەتنى ئوقۇيتتۇق. خۇدا تاپشۇرغان مەسئۇلىيەتلەرنى ئادا قىلىشىمغا ياردەم بېرىدىغان پىداكار ئايالىمنىڭ بولغىنى ئۈچۈن يەھۋاغا چىن قەلبىمدىن مىننەتدارمەن!
بالىلىرىمىزنىڭ يەھۋا خۇدانى ۋە ۋەز خىزمەتنى ياخشى كۆرۈشنى ئۆگىنىشى ئۈچۈن كۆپ كۈچ چىقاردۇق. بىز ئۇلارنىڭ تولۇق ۋاقىتلىق خىزمەتنى قىلىشىنى خالايتتۇق. لېكىن، ئۇلار بۇنى بىز خالىغىنىمىز ئۈچۈن ئەمەس، بەلكى ئۆزلىرى ئىختىيار قىلغىنى ئۈچۈن قىلىشى كېرەك ئىدى. بىز دائىم ئۇلارغا تولۇق ۋاقىتلىق خىزمەتنىڭ كۆپ خۇشاللىقلارنى ئەكېلىدىغانلىقىنى ئېيتاتتۇق. قىيىنچىلىقلارنى تىلغا ئېلىشتىن ئۆزىمىزنى قاچۇرمايتتۇق، ئەمما يەھۋانىڭ بىزگە قانداق ياردەم بېرىۋاتقانلىقىنى ۋە ئائىلىمىزنى بەرىكەتلەۋاتقانلىقىنى كۆپرەك تەكىتلەيتتۇق. بىز يەنە بالىلىرىمىزنىڭ يەھۋانى بىرىنچى ئورۇنغا قويىدىغان قېرىنداشلار بىلەن ۋاقىت ئۆتكۈزۈپ، دوستلارنى تۇتۇشىغا پۇرسەت يارىتىپ بېرەتتۇق.
ياراتقۇچى يەھۋا ئائىلەمنى بېقىش ئۈچۈن كېرەكلىك ھەممە نەرسىنى بەرگەن. ئەلۋەتتە، مەنمۇ ئۆزۈم قىلىشقا تېگىشلىك ئىشلارنى قىلىشقا تىرىشتىم. يامغۇرلۇق ئورماندا بويتاق مەخسۇس پىدائىي ۋەز ئېيتقۇچى بولۇپ خىزمەت قىلغاندا، پۇلنى قانداق پىلانلىق خەجلەشنى ئۆگەنگەن ئىدىم. شۇنداق ھالەتتىمۇ، بەزىدە كېرەك نەرسىلەرنى سېتىۋېلىشقا پۇلىمىز يەتمەي قالاتتى. شۇنداق ۋاقىتلاردا يەھۋانىڭ بىزگە ياردەم قىلغانلىقىغا ئىشىنىمەن. مەسىلەن، 1980-يىلنىڭ ئاخىرىدا ۋە 1990-يىلنىڭ بېشىدا، سۇرىنامدا توپىلاڭ كۆتۈرۈلدى. شۇ يىللاردا، ھەتتا كۈندىلىك تۇرمۇشقا كېرەكلىك نەرسىلەرنى تېپىش قىيىن بولغان. شۇنداقتىمۇ، يەھۋا بىزگە تەمىنلەپ بەردى.—مەتتا 6:32.
ھاياتىم توغرۇلۇق ئويلىسام . . .
ئوڭدىن سولغا: ئايالىم ئېسېل بىلەن
چوڭ ئوغلۇم ئېسېنيال ئايالى بىلەن
ئوغلىمىز جوۋاننى ئايالى بىلەن
ئۆتكەن ئۆمۈرۈم ھەققىدە ئەسلىسەم، يەھۋا ھەردائىم بىزگە غەمخورلۇق قىلىپ، خۇشاللىق ۋە قانائەت تېپىشىمىزغا ياردەم بېرىپ كەلگەن. بىز ئۈچۈن بالىلىرىمىز چوڭ بەرىكەت، ئۇلارنى يەھۋانى سۆيىدىغان كىشىلەر قىلىپ تەربىيىلەپ يېتىشتۈرەلىگەنلىكىمىز ئۈچۈن ئىنتايىن خۇشالمەن. ئۇلار تولۇق ۋاقىتلىق خىزمەتنى قىلىشنى تاللىشىنى خالايتتۇق. ئېسېنيال بىلەن جوۋاننى تەشكىلاتىمىزنىڭ مەكتەپلىرىدە تەلىم-تەربىيە ئالغان، ھازىر بولسا، ئۇلار ئاياللىرى بىلەن بىرلىكتە سۇرىنامدىكى بەيتەلدە خىزمەت قىلىۋاتىدۇ.
ھازىر ئېسېل ئىككىمىز ياشىنىپ قالغان بولساقمۇ، مەخسۇس پىدائىي ۋەز ئېيتقۇچى بولۇپ خىزمەت قىلىۋاتىمىز. سۇ ئۈزۈشنى ئۆگىنىشكە ۋاقتىم بولمىدى، بىراق پۇشايمان قىلمايمەن. كەينىمگە قارىسام، ياش چېغىمدا تولۇق ۋاقىتلىق خىزمەتنى قىلىشنى تاللىغىنىم، ئەڭ دانا قارار بولغان.
b ۋىليام ۋان سېل بۇرادەرنىڭ تەرجىمىھالى «ئويغىنىش!» (باشقا تىلدا) ژۇرنىلى، 1999-يىل، 8-ئۆكتەبىر سانىدىكى «مەن كۈتكەن نەرسىدىن ئارتۇق بولدى» دېگەن ماقالىدە بار.
