46-تەتقىق ماقالىسى
يەھۋا خۇشاللىق بىلەن بەرداشلىق بېرىشىمىزگە ياردەم بېرىدۇ
«يەھۋا سىلەرگە ئىلتىپات كۆرسىتىشنى سەۋر-تاقەت بىلەن كۈتىۋاتىدۇ، ئۇ سىلەرگە رەھىم-شەپقەت كۆرسىتىش ئۈچۈن ئورنىدىن تۇرىدۇ».—يەشايا 30:18.
152-ناخشا كۈچىمىز، ئۈمىدىمىز ۋە يار-يۆلىكىمىز
بۇ ماقالىدە a
1، 2. (1) بىز قايسى سوئاللارنى مۇھاكىمە قىلىمىز؟ (2) يەھۋا بىزگە ياردەم بېرىشكە تەشنا ئىكەنلىكىنى نېمە كۆرسىتىدۇ؟
يەھۋا بىزنىڭ ھاياتىمىزدىكى تۈرلۈك قىيىنچىلىقلارنى يېڭىشىمىزگە ۋە خۇشاللىق بىلەن ئۇنىڭغا مۇقەددەس خىزمەتنى قىلىشىمىزغا ياردەم بېرەلەيدۇ. ئۇ بىزگە ياردەم بېرىش ئۈچۈن نېمىلەرنى قىلىدۇ ۋە يەھۋا تەمىنلەيدىغان ياردەمدىن قانداق تولۇق پايدىلىنالايمىز؟ بۇ ماقالىدە مۇشۇ سوئاللارغا جاۋاب تاپىمىز. بىراق، بۇ سوئاللارغا جاۋاب تېپىشتىن ئىلگىرى، بىز ئاۋۋال مۇنۇ سوئال ھەققىدە ئويلاپ باقايلى: يەھۋا ھەقىقەتەن بىزگە ياردەم بېرىشكە تەشنامۇ؟
2 ئەلچى پاۋلۇسنىڭ ئىبرانىيلارغا يازغان خېتىدە قوللانغان بىر سۆزى بۇ سوئالغا جاۋاب تېپىشىمىزغا ياردەم بېرەلەيدۇ. پاۋلۇس مۇنداق دەپ يازغان ئىدى: «يەھۋا مېنىڭ ياردەمچىمدۇر، مەن قورقمايمەن. ئىنسان ماڭا نېمە قىلالىسۇن؟» (ئىبرانىي. 13:6). مۇقەددەس كىتابنىڭ بىر پايدىلىنىش ئىزاھاتىدا مۇنداق دېيىلگەن: «بۇ ئايەتتە ئىشلىتىلگەن «ياردەمچى» دېگەن سۆز، ياردەم سوراپ يالۋۇرغان كىشىگە ياردەم بېرىشكە ئالدىرىغان ئادەمنى كۆرسىتىدۇ». يەھۋانىڭ ئازاب-ئوقۇبەت چېكىۋاتقان بىرىگە ياردەم بېرىش ئۈچۈن ئالدىراۋاتقانلىقىنى تەسەۋۋۇر قىلىپ كۆرۈڭ. مۇشۇ تەسۋىرلەشنىڭ، يەھۋانىڭ ياردەمچىمىز بولۇشقا تەشنا ئىكەنلىكىنى تەكىتلەيدىغانلىقىغا چوقۇم قوشۇلىسىز. يەھۋا بىز بىلەن بولسا، سىناقلىرىمىزغا خۇشاللىق بىلەن بەرداشلىق بېرەلەيمىز.
3. يەھۋا قايسى ئۈچ يول بىلەن، سىناقلارغا خۇشاللىق بىلەن بەرداشلىق بېرىشىمىزگە ياردەم بېرىدۇ؟
3 سىناقلارغا خۇشاللىق بىلەن بەرداشلىق بېرىشىمىزگە يەھۋا قايسى بەزى يوللار بىلەن ياردەم بېرىدۇ؟ بۇ سوئالغا جاۋاب بېرىش ئۈچۈن يەشايا كىتابىدىكى بەزى ئۈزۈندىلەرنى ئوقۇپ باقايلى. نېمە ئۈچۈن؟ چۈنكى، يەشايا يازغان نۇرغۇن بېشارەتلەر بۈگۈنكى كۈندىكى خۇدا خىزمەتچىلىرىگىمۇ ماس كېلىدۇ. ئۇنىڭدىن باشقا، يەشايا دائىم يەھۋانى بىز ئاسان چۈشىنەلەيدىغان سۆزلەر بىلەن تەسۋىرلىگەن. مەسىلەن، يەشايا 30-بابنى ئالايلى. بۇ يەردە، يەشايا يەھۋانىڭ ئۆز خەلقىگە، يەنى بىزگە قانداق ياردەم بېرىدىغانلىقىنى، كاللىمىزدا جانلىق تەسۋىرلەرنى پەيدا قىلىدىغان تىل بىلەن تەسۋىرلىگەن. (1) يەھۋا دۇئالىرىمىزغا دىققەت بىلەن قۇلاق سېلىپ، بىزگە جاۋاب بېرىدۇ. (2) ئۇ بىزگە يول-يورۇق بېرىدۇ. (3) ھازىر ۋە كېلەچەكتە بىزگە بەرىكەت بېرىدۇ. ئۇنداقتا، ھازىر يەھۋا بىزگە ياردەم بېرىدىغان بۇ ئۈچ يولنى تەپسىلىيرەك كۆرۈپ باقايلى.
يەھۋا بىزنى تىڭشايدۇ
4. (1) يەھۋا يەشايا پەيغەمبەرنىڭ زامانىدىكى ئىسرائىللارنى قانداق سۆزلەر بىلەن تەسۋىرلىگەن ۋە ئۇ ئاخىرىدا نېمە ئىشنىڭ يۈز بېرىشىگە يول قويغان؟ (2) يەھۋا ساداقەتمەن خىزمەتچىلىرى ئۈچۈن قانداق ئۈمىد بەرگەن؟ (يەشايا 30:18، 19)
4 يەشايا 30-بابنىڭ باشلىنىشىدا، يەھۋا ئىسرائىللارنى گۇناھ ئۈستىگە گۇناھ ئۆتكۈزىدىغان جاھىل ئوغۇللار دەپ تەسۋىرلىگەن. ئۇ سۆزنى داۋاملاشتۇرۇپ، شۇنداق دېگەن: «بۇ ئاسىي بىر خەلق، . . . يەھۋانىڭ قانۇنىغا قۇلاق سېلىشنى خالىمايدىغان ئوغۇللاردۇر» (يەشايا 30:1، 9). يەشايا پەيغەمبەر، خەلق قۇلاق سېلىشنى رەت قىلغىنى ئۈچۈن، يەھۋا ئۇلارنىڭ ئازاب-ئوقۇبەتلەرنى چېكىشىگە يول قويىدىغانلىقىنى بېشارەت قىلغان (يەشايا 30:5، 17؛ يەرەم. 25:8–11). ئۇلار ھەقىقەتەن بابىلونلۇقلار تەرىپىدىن ئەسىرگە ئېلىنغان. شۇنداقتىمۇ، ئىسرائىللار ئارىسىدا بەزى ساداقەتمەن كىشىلەر بار ئىدى ۋە يەشايا ئۇلارغا ئۈمىد بېرىدىغان بىر خەۋەرنى يەتكۈزگەن. ئۇ يەھۋانىڭ بىر كۈنى ئۇلارنى يېرۇسالىمغا قايتۇرىدىغانلىقىنى ئېيتقان (يەشايا 30:18، 19-نى ئوقۇڭ). ئاشۇ بېشارەت ھەقىقەتەن ئەمەلگە ئاشقان. يەھۋا ئۇلارنى ئەسىرلىكتىن قۇتقۇزغان. بىراق، ئۇلار دەرھال قۇتقۇزۇلمىغان. «يەھۋا سىلەرگە ئىلتىپات كۆرسىتىشنى سەۋر-تاقەت بىلەن كۈتىۋاتىدۇ» دېگەن سۆزلەر، ئۇ ساداقەتمەن خىزمەتچىلىرىنى قۇتقۇزۇشتىن ئاۋۋال مەلۇم بىر ۋاقىت ئۆتۈشى كېرەكلىكىنى كۆرسىتىدۇ. ئەمەلىيەتتە، ئىسرائىللارنىڭ يېرۇسالىمغا قايتىشىغا رۇخسەت قىلىنىشتىن بۇرۇن، ئۇلار بابىلوندا 70 يىل ئەسىرلىكتە بولغان (يەشايا 10:21؛ يەرەم. 29:10). خەلق ئۆز يۇرتىغا قايتىپ كەلگەندىن كېيىن، ئۇلارنىڭ سۈرگۈندە تۆككەن قايغۇ-ھەسرەت ياشلىرىنىڭ ئورنىنى، شاد-خۇراملىق ياشلىرى ئالغان.
5. يەشايا 30:19-ئايەتتىكى سۆزلەر بىزنى نېمىگە ئىشەندۈرىدۇ؟
5 بۈگۈنكى كۈندە، بىز مۇنۇ سۆزلەردىن تەسەللى ئالالايمىز: «ئۇ ياردەم سوراپ قىلغان يىغا-زارىڭنى ئاڭلاپ، ساڭا جەزمەن رەھىم-شەپقەت كۆرسىتىدۇ» (يەشايا 30:19). يەشايا بىزنى، يەھۋانىڭ ئىلتىجالىرىمىزغا قۇلاق سېلىپ، دۇئالىرىمىزغا دەرھال جاۋاب قايتۇرىدىغانلىقىغا ئىشەندۈرىدۇ. ئۇ يەنە مۇنداق سۆزلەرنى يازغان: «ئۇ ئاۋازىڭنى ئاڭلىغان ھامان ساڭا جاۋاب قايتۇرىدۇ». كىشىگە تەسەللى بېرىدىغان بۇ سۆزلەر، ئاسماندىكى ئاتىمىزنىڭ ئۆزىدىن ياردەم سورىغانلارغا ياردەم بېرىشىگە تەييار ئىكەنلىكىنى ئېسىمىزگە سالىدۇ. بۇنى بىلىش قىيىنچىلىقلىرىمىزغا خۇشاللىق بىلەن بەرداشلىق بېرىشىمىزگە ياردەم بېرىدۇ.
6. يەشايانىڭ سۆزى، يەھۋا ھەربىر خىزمەتچىسىنىڭ دۇئاسىغا قۇلاق سالىدىغانلىقىنى قانداق كۆرسىتىدۇ؟
6 مۇشۇ ئايەتلەردىن دۇئالىرىمىز ھەققىدە نېمىنى ئۆگىنەلەيمىز؟ يەھۋا ھەربىرىمىزنىڭ دۇئاسىنى دىققەت بىلەن تىڭشايدۇ. نېمە ئۈچۈن بۇنىڭغا ئىشىنەلەيمىز؟ يەشايا 30-بابنىڭ ئالدىنقى بۆلىكىدە، «سىلەر» دېگەن كۆپلۈك ئالماش ئىشلىتىلگەن. چۈنكى، يەھۋا ئۆز خەلقىنى بىر توپ كىشىلەر سۈپىتىدە تىلغا ئالغان. بىراق، 19-ئايەتتە «سەن» دېگەن بىرلىك ئالماش ئىشلىتىلگەن. دېمەك، بۇ يەردە شەخسەن بىر كىشىگە قارىتا سۆز قىلغان. يەشايا مۇنداق سۆزلەرنى يازغان: «سەن ئارتۇق يىغلىمايسەن»، «ساڭا جەزمەن رەھىم-شەپقەت كۆرسىتىدۇ»، «ساڭا جاۋاب قايتۇرىدۇ». مېھىر-مۇھەببەتلىك ئاتا سۈپىتىدە، يەھۋا روھى چۈشكەن ئوغلى ياكى قىزىدىن، «سەن ئاكىلىرىڭ ياكى ھەدىلىرىڭدەك كۈچلۈك بولۇشۇڭ كېرەك» دەپ تەلەپ قىلمايدۇ. ئەكسىنچە، ئۇ ھەربىرىمىزگە غەمخورلۇق قىلىپ، ھەربىرىمىزنىڭ دۇئاسىغا قۇلاق سالىدۇ.—زەبۇر 116:1؛ يەشايا 57:15.
يەشايانىڭ «ئۇنىڭغا [يەھۋاغا] ئارام بەرمەڭلار» دېگەن سۆزلىرى نېمىنى بىلدۈرىدۇ؟ (7-ئابزاسقا قاراڭ)
7. يەشايا ۋە ئەيسا پەيغەمبەرلەر قايتا-قايتا دۇئا قىلىشنىڭ زۆرۈرلىكىنى قانداق تەكىتلىگەن؟
7 بىز خۇداغا دۇئا قىلىپ، ئۆزىمىزگە تەسىر قىلىۋاتقان بەزى ئىشلار ھەققىدە ئۇنىڭغا ئېيتساق، يەھۋا ئاۋۋال بەرداشلىق بېرىشىمىز ئۈچۈن زۆرۈر بولغان كۈچنى بېرىشى مۇمكىن. ئەگەر دۇچ كەلگەن سىناق، ئۆزىمىز ئۈمىد قىلغاندەك دەرھال ئاخىرلاشمىسا، بىز يەھۋادىن قايتا-قايتا بەرداشلىق بېرىش ئۈچۈن كۈچ سورىساق بولىدۇ. ئۇ بىزنى شۇنداق قىلىشقا ئۈندەيدۇ. بىز بۇنى، يەشايانىڭ: «ئۇنىڭغا [يەھۋاغا] ئارام بەرمەڭلار»،— دېگەن سۆزىدىن كۆرىمىز (يەشايا 62:7). بۇنى قانداق قىلالايمىز؟ يەھۋاغا قايتا-قايتا، قەتئىي دۇئا قىلىشىمىز كېرەك. شۇنداق قىلغىنىمىزدا، بىز يەھۋانىڭ ئارام ئېلىشىغا يول قويمىغاندەك بولىمىز. يەشايانىڭ بۇ سۆزلىرى، لۇقا 11:8–10، 13-ئايەتلەردىكى ئەيسانىڭ دۇئا ھەققىدە ئېيتقان تەمسىلىنى ئېسىمىزگە سالىدۇ. ئەيسا بىزنى خىجىل بولماي، مۇقەددەس روھنى سوراپ، قايتا-قايتا يالۋۇرۇشقا ۋە داۋاملىق ئۆتۈنۈشكە دەۋەت قىلىدۇ. بىز يەنە يەھۋادىن، توغرا قارارلارنى چىقىرىشىمىزغا ياردەم بېرىدىغان كۆرسەتمىلەرنى بېرىشنى ئۆتۈنسەك بولىدۇ.
يەھۋا بىزنى يېتەكلەيدۇ
8. يەشايا 30:20، 21-ئايەتلەردىكى سۆزلەر، قەدىمقى زاماندا قانداق ئەمەلگە ئاشقان؟
8 يەشايا 30:20، 21-نى ئوقۇڭ. بابىلونلۇقلار يېرۇسالىمنى بىر يېرىم يىل قورشاۋغا ئالغاندا، ئىسرائىللار تارتقان ئازاب-ئوقۇبەتلەر، ئۇلار ئۈچۈن نان ۋە سۇدەك تونۇش بولۇپ كەتكەن. ئەمما، 20 ۋە 21-ئايەتلەرگە قارايدىغان بولساق، ئىسرائىللار توۋا قىلىپ، ئۆز يۈرۈش-تۇرۇشلىرىنى ئۆزگەرتسە، يەھۋا ئۇلارنى قۇتقۇزىدىغانلىقىنى ۋەدە قىلغان. يەشايا يەھۋانى ئۇلارنىڭ «ئۇلۇغ ئۇستازى» دەپ ئاتىغان. ئۇ ئۇلارغا، يەھۋا قوبۇل قىلىدىغان ئۇسۇلدا ئىبادەت قىلىشنى ئۆگىتىدىغانلىقىنى ۋەدە قىلغان. ئىسرائىللار سۈرگۈندىن ئازاد قىلىنغاندا، بۇ سۆزلەر ئەمەلگە ئاشۇرۇلغان. يەھۋا ئۇلارنىڭ ئۇلۇغ ئۇستازى ئىكەنلىكىنى ئىسپاتلانغان ۋە ئۇنىڭ يېتەكچىلىكى ئاستىدا ئىسرائىللار پاك ئىبادەتنى مۇۋەپپەقىيەتلىك ئەسلىگە كەلتۈرگەن. بۈگۈنكى كۈندە بىز يەھۋادەك ئۇلۇغ ئۇستازىمىزنىڭ بولغانلىقىدىن ئۆزىمىزنى ئىنتايىن بەختلىك ھېس قىلىمىز.
9. بۈگۈنكى كۈندە يەھۋادىن كېلىدىغان يول-يورۇقنى قوبۇل قىلىشنىڭ بىر يولى قايسى؟
9 يەشايا داۋاملىق تەسۋىرىي سۆزلەرنى ئىشلىتىپ، بىزنى يەھۋا ئىككى يول بىلەن ئۆگىتىۋاتقان ئوقۇغۇچىلاردەك تەسۋىرلىگەن. بىرىنچى يولىنى ئېيتىپ، يەشايا مۇنداق دېگەن: «سىلەر ئۇلۇغ ئۇستازىڭلارنى ئۆز كۆزۈڭ بىلەن كۆرىسىلەر». مۇشۇ تەسۋىردە، يەشايا ئۇستازنىڭ ئوقۇغۇچىلىرىنىڭ ئالدىدا تۇرىدىغانلىقىنى ئېيتقان. بۈگۈنكى كۈندە ئاشۇ ئۇستازدىن تەلىم ئېلىش بىز ئۈچۈن ئاجايىپ شان-شەرەپ! يەھۋا بىزگە قانداق تەلىم بېرىدۇ؟ ئۇ بۇنىڭ ئۈچۈن ئۆز تەشكىلاتىنى قوللىنىدۇ. بىز يەھۋانىڭ تەشكىلاتىدىن كەلگەن ئېنىق يول-يورۇقلارنى قوبۇل قىلغىنىمىز ئۈچۈن ئىنتايىن مىننەتدارمىز! جامائەت يىغىلىشلىرى، چوڭ يىغىلىشلار، شۇنداقلا نەشىر ماتېرىياللار، ئىنتېرنېت تېلېۋىزىيە پروگراممىلىرى ۋە باشقا نۇرغۇن يوللار ئارقىلىق بېرىلگەن كۆرسەتمىلەر دۇچ كەلگەن قىيىنچىلىقلىرىمىزغا خۇشاللىق بىلەن بەرداشلىق بېرىشىمىزگە ياردەم بېرىدۇ.
10. ئارقىمىزدىن كەلگەن ئاۋازنى قايسى يول بىلەن ئاڭلايمىز؟
10 يەشايا يەھۋانىڭ بىزگە تەلىم بېرىدىغان يەنە بىر يولىنى تەسۋىرلەپ مۇنداق يازغان: «ئۆز قۇلاقلىرىڭلار بىلەن ئارقاڭلاردىن كەلگەن بىر سۆزنى ئاڭلايسىلەر». پەيغەمبەر بۇ يەردە يەھۋانى ئۆز ئوقۇغۇچىلىرىنىڭ ئارقىسىدىن يۈرۈپ، ئۇلارغا قايسى يول بىلەن مېڭىشنى كۆرسىتىپ، يول-يورۇقلارنى بېرىدىغان غەمخور ئۇستاز سۈپىتىدە تەسۋىرلىگەن. بۈگۈنكى كۈندە بىز ئارقىمىزدىن كېلىدىغان خۇدانىڭ ئاۋازىنى ئاڭلايمىز. قانداق؟ خۇدانىڭ مۇقەددەس روھى بىلەن ئىلھاملاندۇرۇلۇپ يېزىلغان سۆزى بولغان مۇقەددەس كىتاب ئۇزۇن زامانلار ئىلگىرى يېزىلغان. ئاشۇ ۋاقىتلار ئاللىقاچان ئۆتۈپ كەتتى، يەنى ئارقىمىزدىن قالدى. شۇڭا، مۇقەددەس كىتابنى ئوقۇغىنىمىزدا، بىز ئارقىمىزدىن كېلىۋاتقان خۇدانىڭ ئاۋازىنى ئاڭلىغان بولىمىز.—يەشايا 51:4.
11. خۇشاللىق بىلەن بەرداشلىق بېرىشىمىز ئۈچۈن قايسى قەدەملەرنى بېسىشىمىز كېرەك ۋە نېمە ئۈچۈن؟
11 يەھۋانىڭ تەشكىلاتى ۋە ئۇنىڭ سۆزى ئارقىلىق بېرىلگەن يول-يورۇقلاردىن تولۇق پايدىلىنىش ئۈچۈن نېمە قىلالايمىز؟ دىققەت قىلسىڭىز، يەشايا ئىككى نەرسىنى كۆرسەتكەن. بىرىنچى، «مانا يول». ئىككىنچى، «بۇ يولدا مېڭىڭلار» (يەشايا 30:21). يولنى بىلىش يېتەرلىك ئەمەس. چوقۇم شۇ يولدا مېڭىشىمىز لازىم. يەھۋانىڭ سۆزى ۋە ئۇنىڭ تەشكىلاتىنىڭ چۈشەندۈرۈشلىرى بىزگە يەھۋانىڭ بىزدىن نېمىنى تەلەپ قىلىدىغانلىقىنى ئۆگىتىدۇ. بىز يەنە ئۆگەنگەنلىرىمىزدىن قانداق پايدىلىنىشنىمۇ ئۆگىنىمىز. يەھۋاغا خىزمەت قىلغاندا خۇشاللىق بىلەن بەرداشلىق بېرىش ئۈچۈن، بىز ھەر ئىككىلا قەدەمنى بېسىشىمىز كېرەك. شۇنداق قىلغىنىمىزدا، يەھۋانىڭ بىزنى بەرىكەتلەيدىغانلىقىغا ئىشىنەلەيمىز.
يەھۋا بىزنى بەرىكەتلەيدۇ
12. يەشايا 30:23–26-ئايەتلەرگە ئاساسلانغاندا، يەھۋا ئۆز خەلقىنى قانداق بەرىكەتلەيدۇ؟
12 يەشايا 30:23–26-نى ئوقۇڭ. بۇ بېشارەت، بابىلوندىكى سۈرگۈندىن كېيىن ئۆز يۇرتىغا قايتقان ئىسرائىللار ئۈچۈن قانداق ئەمەلگە ئاشقان؟ يەھۋا ئۇلارنىڭ ھايات كەچۈرۈشى ۋە داۋاملىق ئۇنىڭغا ئىبادەت قىلىشى ئۈچۈن نۇرغۇن نەرسىلەرنى بەرگەن. يەھۋا ئۆز خەلقىنى مول جىسمانىي ئوزۇقلۇقلار بىلەن تەمىنلىگەن. بىراق ئەڭ مۇھىمى، ئۇ ئۇلارنىڭ ئۆزىگە يېقىنلىشىشى ۋە ئاستا-ئاستا پاك ئىبادەتنى قايتا باشلىشى ئۈچۈن كېرەكلىك ھەممە نەرسىنى بەرگەن. خۇدانىڭ خەلقى شۇ ۋاقىتتا بەھرىمەن بولغان روھىي ئوزۇقلۇقلار ئىلگىرىكى ھەرقانداق ۋاقىتتىكىگە قارىغاندا ئىنتايىن كۆپ بولغان. 26-ئايەتتە كۆرسىتىلگەندەك، يەھۋا ئۇلارغا ئۆز سۆزىنى چۈشىنىشىگە ياردەم بېرىش ئۈچۈن، تېخىمۇ كۆپ روھىي يورۇقلۇقنى بەرگەن (يەشايا 60:2). يەھۋانىڭ بەرىكەتلىرى خىزمەتچىلىرىنىڭ خۇشاللىق بىلەن داۋاملىق ئۇنىڭغا خىزمەت قىلىشىغا ۋە «كۆڭلى شاد-خۇراملىققا تولغىنى ئۈچۈن» كۈچ-مەدەتكە ئېرىشىشىگە ياردەم بەرگەن.—يەشايا 65:14.
13. پاك ئىبادەتنى ئەسلىگە كەلتۈرۈش ھەققىدىكى بېشارەت بۈگۈنكى كۈندە قانداق ئەمەلگە ئېشىۋاتىدۇ؟
13 پاك ئىبادەتنى ئەسلىگە كەلتۈرۈش توغرىسىدىكى بېشارەت بۈگۈنكى كۈندە بىزگە ماس كېلەمدۇ؟ ئەلۋەتتە ماس كېلىدۇ! 1919-يىلدىن بۇيان، مىليونلىغان كىشىلەر بۇ دۇنيانىڭ ساختا دىن ئىمپېرىيىسى بولغان بۈيۈك بابىلوننىڭ قۇللۇقىدىن ئازاد بولدى. ئۇلار قەدىمقى ئىسرائىللارغا ۋەدە قىلىنغان زېمىندىنمۇ ياخشىراق بىر زېمىنغا، يەنى روھىي جەننەتكە ئېلىپ كېلىندى (يەشايا 51:3؛ 66:8). ئاشۇ روھىي جەننەت نېمىنى بىلدۈرىدۇ؟
14. روھىي جەننەت دېگەن نېمە؟ بۈگۈنكى كۈندە ئۇ يەرگە كىملەر ماكانلاشتى؟ (سۆز-ئىبارە مەنسىگە قاراڭ)
14 1919-يىلدىن باشلاپ، مەسىھ قىلىنغان ئەيسانىڭ ئەگەشكۈچىلىرى روھىي جەننەتتە ياشاۋاتىدۇ b. ۋاقىتنىڭ ئۆتۈشىگە ئەگىشىپ، يەر يۈزىدە ياشاش ئۈمىدى بارلار، يەنى «باشقا قويلارمۇ» بۇ روھىي جەننەتتە ماكانلاشتى ۋە يەھۋانىڭ مول بەرىكەتلىرىدىن ھۇزۇرلىنىۋاتىدۇ.—يۇھاننا 10:16؛ يەشايا 25:6؛ 65:13.
15. روھىي جەننەت قەيەرگە جايلاشقان؟
15 بۈگۈنكى كۈندە روھىي زېمىن ياكى جەننەت قەيەرگە جايلاشقان؟ يەھۋاغا ئىبادەت قىلغۇچىلار دۇنيانىڭ ھەر قايسى جايلىرىدا ياشايدۇ. شۇڭلاشقا، ئۇلار ياشايدىغان روھىي جەننەت دۇنيانىڭ ھەممىلا جايلىرىدا بار. بۈگۈنكى كۈندە بىز قەيەردە ياشىمايلى، پاك ئىبادەتنى قىزغىنلىق بىلەن قوللاپ-قۇۋۋەتلىسەك، روھىي جەننەتنىڭ بىر قىسىمى بولالايمىز.
ھەربىرىمىز روھىي جەننەتنىڭ گۈزەللىكىگە ئۆز ھەسسىمىزنى قانداق قوشالايمىز؟ (16، 17-ئابزاسلارغا قاراڭ)
16. قانداق قىلغاندا، روھىي جەننەتنىڭ گۈزەللىكىنى داۋاملىق كۆرەلەيمىز؟
16 روھىي جەننەتتە قېلىش ئۈچۈن، بىز چوقۇم دۇنيانىڭ جاي-جايلىرىدىكى يەھۋا گۇۋاھچىلىرىنىڭ جامائىتى ئۈچۈن داۋاملىق چوڭقۇر مىننەتدارلىق بىلدۈرۈشىمىز كېرەك. بۇنى قانداق قىلالايمىز؟ ئاشۇ جەننەتكە ماكانلاشقان قېرىنداشلىرىمىزنىڭ نامۇكەممەل تەرەپلىرىگە ئەمەس، ئۇلارنىڭ ياخشى تەرەپلىرىگە دىققەت ئاغدۇرۇش ئارقىلىق! (يۇھاننا 17:20، 21). بۇنداق قىلىش نېمە ئۈچۈن مۇھىم؟ مۇنداق بىر سېلىشتۇرۇشنى تەسەۋۋۇر قىلىپ كۆرۈڭ. بىز گۈزەل باغچىدا ياكى بىر باغدا ھەر تۈرلۈك دەل-دەرەخلەرنى كۆرۈپ ھۇزۇرلىنىشنى خالايمىز. خۇددى شۇنىڭغا ئوخشاش، بۈگۈنكى كۈندىكى جامائەتلەردە ھۆكۈم سۈرۈۋاتقان روھىي جەننەت ھەر تۈرلۈك دەل-دەرەخلەرگە ئوخشاش قېرىنداشلار بىلەن تولغان (يەشايا 44:4؛ 61:3). بىز دىققىتىمىزنى يېنىمىزدا تۇرغان يالغۇز دەرەخنىڭ كەمچىلىك تەرىپىنى تېپىشقا ئەمەس، بۈك-باراقسان ئورمانلىقنىڭ چىرايلىق تەرىپىگە ئاغدۇرۇشنى داۋاملاشتۇرۇشىمىز ئىنتايىن مۇھىم. بىز پەقەت ئۆزىمىز ۋە ئەتراپىمىزدىكىلەرنىڭ نامۇكەممەللىكىگە دىققەت ئاغدۇرۇپ، پۈتكۈل دۇنيادىكى ئېتىقادچىلار جامائىتىنىڭ گۈزەللىكىنى كۆرمەي قېلىشتىن ساقلىنىشىمىز كېرەك.
17. جامائەتنىڭ ئىناق-ئىتتىپاقلىقىغا ھەربىرىمىز ئۆز ھەسسىمىزنى قانداق قوشالايمىز؟
17 جامائەتنىڭ ئىناق-ئىتتىپاقلىقىنى ساقلاشقا ھەربىرىمىز قانداق تۆھپە قوشالايمىز؟ تىنچلىقپەرۋەر كىشى بولۇش ئارقىلىق! (مەتتا 5:9؛ رىملىقلار 12:18). ھەر قېتىم جامائەتتە باشقىلار بىلەن تىنچ-ئىناقلىقنى ئىلگىرى سۈرۈشكە تەشەببۇسكارلىق بىلەن كۈچ چىقارغىنىمىزدا، روھىي جەننەتنىڭ گۈزەللىكىگە تۆھپە قوشىمىز. يەھۋا روھىي جەننەتتە ماكانلاشقان ھەربىر كىشىنى پاك ئىبادەتكە ئۆزى جەلپ قىلغانلىقىنى ئەستە ساقلىشىمىز كېرەك (يۇھاننا 6:44). ئۆزى قەدىرلىگەن خىزمەتچىلىرىنىڭ ئۆزئارا تىنچلىقنى، ئىناق-ئىتتىپاقلىقنى كۈچەيتىش ئۈچۈن جاپالىق تىرىشىۋاتقانلىقىنى كۆرگەندە، يەھۋانىڭ كۆڭلى قانچىلىك خۇرسەن بولىدىغانلىقىنى تەسەۋۋۇر قىلىپ كۆرۈڭ!—يەشايا 26:3؛ ھاگاي 2:7.
18. بىز دائىم نېمىلەر ھەققىدە چوڭقۇر ئويلىنىشىمىز كېرەك ۋە نېمە ئۈچۈن؟
18 خۇدانىڭ خىزمەتچىلىرى سۈپىتىدە، بىز ئېرىشكەن بەرىكەتلەردىن قانداق تولۇق پايدىلىنالايمىز؟ بۇنىڭ ئۈچۈن، خۇدانىڭ سۆزى ۋە ئۇنىڭغا ئاساسلانغان نەشىر ماتېرىياللىرىمىزنى تەتقىق قىلىپ ئۆگەنگەندە، چوڭقۇر ئويلانساق بولىدۇ. شۇنداق تەتقىق قىلىپ ئۆگىنىش ۋە چوڭقۇر ئويلىنىش مەسىھ ئەگەشكۈچىلىرىگە خاس پەزىلەتلەرنى يېتىلدۈرۈشىمىزگە ۋە جامائەتتىكى قېرىنداشلىرىمىزغا چىن قەلبىمىزدىن سۆيگۈ-مۇھەببەت كۆرسىتىشكە ياردەم بېرىدۇ (رىملىقلار 12:10). ھازىر ئېرىشكەن بەرىكەتلىرىمىز ئۈستىدە چوڭقۇر ئويلانغىنىمىزدا، يەھۋا بىلەن بولغان مۇناسىۋىتىمىز تېخىمۇ كۈچىيىدۇ. يەھۋانىڭ كېلەچەكتە بىزنى ئېرىشتۈرىدىغان بەرىكەتلىرى ھەققىدە ئويلانغىنىمىزدا، بىزنىڭ ئۇنىڭغا مەڭگۈ خىزمەت قىلىش ئۈمىدىمىز تېخىمۇ مۇستەھكەم بولىدۇ. بۇلارنىڭ ھەممىسى ھازىر يەھۋاغا خۇشاللىق بىلەن خىزمەت قىلىشىمىزغا ياردەم بېرىدۇ.
داۋاملىق بەرداشلىق بېرىشكە قەتئىي بەل باغلاڭ
19. (1) يەشايا 30:18-ئايەتكە ئاساسلانغاندا، بىز نېمىگە ئىشىنەلەيمىز؟ (2) سىناقلارغا خۇشاللىق بىلەن بەرداشلىق بېرىشىمىزگە نېمە ياردەم بېرىدۇ؟
19 بۇ رەزىل دۇنيا ئاخىرلىشىدىغان پەيتتە، يەھۋا بىز ئۈچۈن «ئورنىدىن تۇرىدۇ» (يەشايا 30:18). شۇنىڭغا قەتئىي ئىشىنىمىزكى، يەھۋا — ئادالەتلىك خۇدادۇر. ئۇ شەيتاننىڭ دۇنياسىنىڭ بەلگىلەنگەن ۋاقىتتىن بىر كۈن ئۇزۇنراق مەۋجۇت بولۇشىغا ھەرگىز يول قويمايدۇ (يەشايا 25:9). بىز يەھۋانىڭ قۇتقۇزىدىغان كۈنىنى سەۋر-تاقەت بىلەن كۈتىۋاتىمىز. مۇشۇ ۋاقىتتا، بىز داۋاملىق دۇئا قىلىش ئىمتىيازىنى قەدىرلەپ، خۇدانىڭ سۆزىنى تەتقىق قىلىپ، ئۇنى ئەمەلىي قوللىنىشنى ۋە بەرىكەتلىرىمىز ھەققىدە چوڭقۇر ئويلىنىشنى داۋاملاشتۇرۇشنى قەتئىي قارار قىلدۇق. شۇنداق قىلغىنىمىزدا، يەھۋا تۇرمۇشىمىزدىكى تۈرلۈك قىيىنچىلىقلارغا داۋاملىق بەرداشلىق بېرىپ، خۇشاللىق بىلەن ئۇنىڭغا ئىبادەت قىلىشىمىزغا ياردەم بېرىدۇ.
54-ناخشا ئىماندا چىڭ تۇرايلى!
a بىز يەھۋانىڭ ئۆزىگە ئىبادەت قىلغۇچىلارغا ھاياتتىكى تۈرلۈك قىيىنچىلىقلارغا خۇشاللىق بىلەن بەرداشلىق بېرىشىگە، قايسى ئۈچ يول بىلەن ياردەم بېرىدىغانلىقىنى كۆرىمىز. بىز شۇ ياردەم ھەققىدە كۆپرەك ئۆگىنىش ئۈچۈن، يەشايا كىتابىنىڭ 30-بابىنى مۇھاكىمە قىلىمىز. بۇ باب بىزگە، يەھۋاغا دۇئا قىلىش، ئۇنىڭ سۆزىنى تەتقىق قىلىش، ھازىر ۋە كېلەچەكتىكى بەرىكەتلىرى ھەققىدە چوڭقۇر ئويلىنىشنىڭ مۇھىملىقىنى ئەسكەرتىدۇ.
b سۆز-ئىبارە مەنىسى: «روھىي جەننەت» دېگەن سۆز، يەھۋاغا ئىناق-ئىتتىپاقلىق ئىچىدە ئىبادەت قىلىدىغان بىخەتەر مۇھىتنى كۆرسىتىدۇ. بۇ مۇھىتتا، ھەرقانداق دىنىي يالغانچىلىقتىن خالى مول روھىي ئوزۇقلۇقىمىز ۋە خۇدا پادىشاھلىقى ھەققىدە خۇش خەۋەرنى ۋەز قىلىشتەك كۆڭلىمىزنى قانائەت تاپقۇزىدىغان خىزمىتىمىز بار. بىز يەھۋا بىلەن بولغان يېقىن مۇناسىۋەتتىن خۇشاللىق تاپىمىز ۋە سۆيۈملۈك قېرىنداشلىرىمىز بىلەن تىنچ-خاتىرجەم ياشايمىز. ئۇلار تۇرمۇشتىكى تۈرلۈك قىيىنچىلىقلارغا خۇشاللىق بىلەن بەرداشلىق بېرىشىمىزگە ياردەم بېرىدۇ. يەھۋاغا توغرا ئۇسۇلدا ئىبادەت قىلىشنى باشلىغاندا ۋە ئۇنى پۈتۈن كۈچىمىز بىلەن ئۈلگە قىلغان ۋاقتىمىزدا، بىز روھىي جەننەتكە كىرىمىز.
