45-تەتقىق ماقالىسى
يەھۋا ۋەز خىزمىتىمىزگە قانداق ياردەم بېرىدۇ؟
«ئۇلار . . . ئارىلىرىدا بىر پەيغەمبەر بولغانلىقىنى چوقۇم بىلىپ قېلىشىدۇ».—ھەزەك. 2:5.
47-ناخشا خۇش خەۋەرنى جاكارلا!
بۇ ماقالىدە a
1. نېمىگە دۇچ كېلىشىمىز مۇمكىن ۋە نېمىگە ئىشىنەلەيمىز؟
بىز ۋەز خىزمىتىمىزدە قارشىلىقلارغا دۇچ كېلىشىمىز مۇمكىن. بەلكىم، كېلەچەكتە تېخىمۇ كۆپ قارشىلىققا دۇچ كېلىمىز (دانىيال 11:44؛ 2-تىموت. 3:12؛ ۋەھىي. 16:21). شۇنداقتىمۇ، بىز ياردەمگە مۇھتاج بولغاندا، يەھۋانىڭ بىزگە ياردەم بېرىدىغانلىقىغا ئىشىنەلەيمىز. نېمە ئۈچۈن؟ چۈنكى، يەھۋا خىزمەتچىلىرىنىڭ ئۆز ۋەزىپىسىنى ئورۇنلىشىغا ھەردائىم ياردەم بېرىپ كەلگەن. مىسال ئۈچۈن، بابىلونغا سۈرگۈن قىلىنغان يەھۇدىيلارغا ۋەز قىلغان ھەزەكىيال پەيغەمبەرنىڭ ھاياتىدىكى بەزى ئىش-ۋەقەلەرنى كۆرۈپ باقايلى.
2. ھەزەكىيال ۋەز قىلغان جايلاردىكى كىشىلەرنى يەھۋا قانداق تەسۋىرلىگەن ۋە بىز بۇ ماقالىدە نېمىلەرنى مۇھاكىمە قىلىمىز؟ (ھەزەكىيال 2:3–6)
2 ھەزەكىيال ۋەز قىلغان جايلاردا قانداق كىشىلەر بار ئىدى؟ يەھۋا ئۇلارنى «يۈزى قېلىن»، «يۈرەكلىرى قېتىپ كەتكەن»، «ئاسىي» دەپ تەسۋىرلىگەن. ئۇلار خۇددى تىكەنلەردەك زىيانلىق ۋە چايانلاردەك خەتەرلىك ئىدى. شۇڭا، يەھۋا بىرنەچچە قېتىم ھەزەكىيالغا: «ئۇلاردىن قورقمىغىن!»،— دېگەن (ھەزەكىيال 2:3–6-نى ئوقۇڭ). ھەزەكىيال ۋەز ئېيتىش ۋەزىپىسىنى ئورۇنلىغان، چۈنكى (1) ئۇ يەھۋا تەرىپىدىن ئەۋەتىلگەن، (2) خۇدانىڭ روھى ئۇنى كۈچلەندۈرگەن، (3) ئۇ خۇدا سۆزى بىلەن ئوزۇقلانغان. بۇ ئۈچ ئىشنى قىلىش ھەزەكىيالغا قانداق ياردەم بەرگەن؟ بۈگۈنكى كۈندە ئۇلار بىزگە قانداق ياردەم بېرىدۇ؟
ھەزەكىيال يەھۋا تەرىپىدىن ئەۋەتىلگەن
3. بەلكىم، قايسى سۆزلەر ھەزەكىيالنى كۈچلەندۈرگەن ۋە ھەزەكىيالنى قوللايدىغانلىقىغا، يەھۋا ئۇنى قانداق ئىشەندۈرگەن؟
3 يەھۋا خۇدا ھەزەكىيالغا: «سېنى ئەۋەتىۋاتىمەن»،— دېگەن (ھەزەك. 2:3، 4). ئاشۇ سۆزلەر چوقۇم ھەزەكىيالنى كۈچلەندۈرگەن. نېمە ئۈچۈن؟ شەك-شۈبھىسىزكى، ئۇ يەھۋانىڭ مۇسا ۋە يەشايانى پەيغەمبەرلەر سۈپىتىدە تەيىنلىگەندە، ئوخشاش سۆزلەرنى قىلغانلىقىنى ئېسىگە ئالغان (چىق. 3:10؛ يەشايا 6:8). ھەزەكىيال يەنە ئاشۇ ئىككى پەيغەمبەرنىڭ قىيىن ۋەزىپىلەرنى ئورۇنلىشىغا، يەھۋانىڭ قانداق ياردەم بەرگەنلىكىنى بىلەتتى. شۇڭا، يەھۋا ھەزەكىيالغا ئىككى قېتىم: «سېنى ئەۋەتىمەن» دېگەندە، يەھۋانىڭ قوللاپ-قۇۋۋەتلەيدىغانلىقىغا ئۇنىڭ ئىشىنىشىگە يېتەرلىك سەۋەبى بولغان. بۇنىڭدىن باشقا، ھەزەكىيال كىتابىدا: «يەھۋانىڭ سۆزى ماڭا كەلدى»،— دېگەن سۆزلەرنىڭ كۆپ قېتىم ئۇچرايدىغانلىقىنى كۆرىمىز (ھەزەك. 3:16). شۇنىڭدەك يەنە، «يەھۋانىڭ سۆزى ماڭا يەنە كەلدى»،— دېگەن بايانلار قايتا-قايتا ئۇچرايدۇ (ھەزەك. 6:1). شەك-شۈبھىسىزكى، ھەزەكىيال ئۆزىنىڭ يەھۋا تەرىپىدىن ئەۋەتىلگەنلىكىگە ئىشەنگەن. ھەزەكىيالنىڭ دادىسى بىر روھانىي بولغان. بەلكىم، ئۇ ھەزەكىيالغا، يەھۋانىڭ ھەردائىم ئۆز پەيغەمبەرلىرىگە ياردەم بېرىمەن دەپ ئېيتقانلىقىنى ئۆگەتكەن. يەھۋا ئىسھاق، ياقۇپ ۋە يەرەمىيا پەيغەمبەرلەرگە: «مەن سەن بىلەن بولىمەن»،— دېگەن سۆزنى قىلغان.—يارىت. 26:24؛ 28:15؛ يەرەم. 1:8.
4. قايسى تەسەللى بېرىدىغان ئوي-پىكىرلەر ھەزەكىيالنى كۈچلەندۈرگەن؟
4 كۆپ ساندىكى ئىسرائىللار ھەزەكىيالنىڭ سۆزلىرىگە قانداق ئىنكاس قايتۇرغان؟ يەھۋا مۇنداق دېگەن: «ئىسرائىل جەمەتى ساڭا قۇلاق سالمايدۇ، چۈنكى ئۇلار ماڭا قۇلاق سېلىشنى خالىمايدۇ» (ھەزەك. 3:7). ھەزەكىيالنى رەت قىلىش ئارقىلىق كىشىلەر يەھۋانى رەت قىلغان. بۇ ھەزەكىيالنىڭ مەغلۇپ بولغان بىر پەيغەمبەر ئىكەنلىكىنى بىلدۈرمىگەن. چۈنكى، يەھۋانى سۆزلىرى پەيغەمبەرنى بۇنىڭغا ئىشەندۈرگەن. يەھۋا يەنە ھەزەكىيالنى، ئۇ يەتكۈزگەن خەۋەر ئەمەلگە ئاشقاندا، كىشىلەر «ئارىلىرىدا بىر پەيغەمبەرنىڭ بولغانلىقىنى چوقۇم بىلىپ» قالىدىغانلىقىغا ئىشەندۈرگەن (ھەزەك. 2:5؛ 33:33). شەك-شۈبھىسىزكى، ئاشۇ تەسەللى بېرىدىغان ئوي-پىكىرلەر، ھەزەكىيالنىڭ ئۆز ۋەزىپىسىنى ئورۇنلىشى ئۈچۈن كېرەكلىك كۈچنى بەرگەن.
بۈگۈنكى كۈندە يەھۋا تەرىپىدىن ئەۋەتىلگەنلەر
بىزمۇ ھەزەكىيالغا ئوخشاش، بىپەرۋالىق ياكى قارشىلىققا دۇچ كېلىشىمىز مۇمكىن، لېكىن شۇنى بىلىمىزكى، يەھۋا بىز بىلەن بىللە (5، 6-ئابزاسلارغا قاراڭ)
5. يەشايا 44:8-ئايەتتىكى سۆزلەر بىزگە قانداق كۈچ ۋە جاسارەت بېرىدۇ؟
5 بىزمۇ يەھۋا تەرىپىدىن ئەۋەتىلگەنلىكىمىزنى بىلگەچ، كۈچ ۋە جاسارەتكە تولىمىز. ئۇ بىزنى «گۇۋاھچىلىرىم» دەپ ئاتاپ شان-شەرەپكە مۇيەسسەر قىلىدۇ (يەشايا 43:10). بۇ بىز ئۈچۈن چوڭ شان-شەرەپ! خۇددى يەھۋا ھەزەكىيالغا:«سەن قورقمىغىن»،— دېگەندەك، بىزگىمۇ: «سىلەر قورقماڭلار»،— دەيدۇ. نېمە ئۈچۈن بىزگە قارشى چىققۇچىلاردىن قورقماسلىقىمىز كېرەك؟ خۇددى ھەزەكىيالغا ئوخشاش، بىزنى يەھۋا ئەۋەتكەن ۋە ئۇ بىزگە يار-يۆلەك بولىدۇ.—يەشايا 44:8-نى ئوقۇڭ.
6. (1) يەھۋا قوللاپ-قۇۋۋەتلەيدىغانلىقىغا بىزنى قانداق ئىشەندۈرىدۇ؟ (2) نېمە بىزگە تەسەللى ۋە كۈچ بېرىدۇ؟
6 يەھۋا بىزگە يار-يۆلەك بولىدىغانلىقىغا بىزنى ئىشەندۈرىدۇ. مەسىلەن، يەھۋا ئىلگىرى شۇنداق دېگەن: «سۇلاردىن كېچىپ ئۆتكىنىڭدە، مەن سەن بىلەن بولىمەن. دەريالاردىن ئۆتكىنىڭدە، سۇغا غەرق بولمايسەن. ئوتتىن ئۆتۈپ يۈرگىنىڭدە، كۆيۈپ كەتمەيسەن ۋە ئۈستۈڭگە ئوت تۇتۇشۇپ كەتمەيدۇ» (يەشايا 43:2). ۋەز خىزمىتىگە قاتناشقىنىمىزدا، بىز بەزىدە سۇلاردەك دولقۇنلىغان توسقۇنلۇقلارغا ۋە كۆيۈپ تۇرغان ئوتتەك سىناقلارغا دۇچ كېلىمىز. ھەتتا شۇنداق بولسىمۇ، يەھۋانىڭ ياردىمى بىلەن بىز داۋاملىق ۋەز قىلالايمىز (يەشايا 41:13). خۇددى ھەزەكىيالنىڭ كۈنىدىكىدەك، بۈگۈنكى كۈندىمۇ كۆپىنچە كىشىلەر بىز يەتكۈزگەن خەۋەرنى رەت قىلىدۇ. شۇنى ئەستىن چىقارمايلىكى، ئۇلارنىڭ رەت قىلىشى ھەرگىزمۇ بىز يەھۋانىڭ مەغلۇپ بولغان گۇۋاھچىسى ئىكەنلىكىمىزنى بىلدۈرمەيدۇ. بىز داۋاملىق يەھۋانىڭ خەۋىرىنى سادىقلىق بىلەن يەتكۈزگەندە، ئۇنىڭ خۇشال بولىدىغانلىقىنى بىلىمىز. بۇ بىزگە تەسەللى ۋە كۈچ بېرىدۇ! ئەلچى پاۋلۇس مۇنداق دېگەن: «ھەر بىرى ئۆز ئەمگىكىگە يارىشا، مۇكاپاتقا ئېرىشىدۇ» (1-كورىنت. 3:8؛ 4:1، 2). ئۇزۇن مەزگىل پىدائىي ۋەز ئېيتقۇچى بولغان قېرىنداش مۇنداق دەيدۇ: «يەھۋانىڭ تىرىشچانلىقىمىزنى مۇكاپاتلايدىغانلىقىنى بىلىش مېنى شاد-خۇراملىققا چۆمدۈرىدۇ».
خۇدانىڭ روھى ھەزەكىيالغا كۈچ بەرگەن
ھەزەكىيال يەھۋانىڭ ئاسماندىكى ھارۋۇسى توغرۇلۇق ۋەھىي كۆرگەن. بۇ ئۇنى يەھۋانىڭ ئۇنىڭغا تاپشۇرغان خىزمەتنى ئورۇنلىشىغا چوقۇم ياردەم بېرىدىغانلىقىغا ئىشەندۈردى (7-ئابزاسىغا قاراڭ)
7. ھەر قېتىم ھەزەكىيال كۆرگەن كۆرۈنۈش ھەققىدە چوڭقۇر ئويلانغاندا، بۇ ئۇنىڭغا قانداق تەسىر قىلغان؟ (مۇقاۋىدىكى رەسىمگە قاراڭ)
7 ھەزەكىيال يەھۋانىڭ روھى قانچىلىك كۈچ-قۇدرەتلىك ئىكەنلىكىنى كۆرگەن. ھەزەكىيال ئاجايىپ كۆرۈنۈشتە، مۇقەددەس روھنىڭ پەرىشتىلەرگە ۋە ئاسماندىكى غايەت زور جەڭ ھارۋۇسىغا قانداق ياردەم بەرگەنلىكىنى كۆرگەن (ھەزەك. 1:20، 21). ھەزەكىيال بۇنىڭغا قانداق ئىنكاس قايتۇرغان؟ ئۇ نېمە ئىش يۈز بەرگەنلىكىنى يازغان. «مەن ئۇنى كۆرگەندە يەرگە يىقىلدىم». ھەزەكىيال ھاياجاندىن يەرگە يىقىلغان (ھەزەك. 1:28). كېيىن، ھەزەكىيال ھەر قېتىم ئۆزى كۆرگەن كۆرۈنۈش ھەققىدە ئويلانغاندا، خۇدانىڭ روھى ئۇنىڭغا ئۆز ۋەزىپىسىنى ئورۇنلاشقا ياردەم بېرىدىغانلىقىغا بولغان ئىشەنچىسى كۈچەيگەن.
8، 9. (1) يەھۋا ھەزەكىيالغا ئورنىڭدىن تۇر دەپ بۇيرۇق بەرگەندە، نېمە ئىش يۈز بەرگەن؟ (2) ۋەز قىلىش قىيىن جايدا، يەھۋا ھەزەكىيالنى كۈچلەندۈرۈش ئۈچۈن يەنە نېمە قىلغان؟
8 يەھۋا ھەزەكىيالغا مۇنداق بۇيرۇق قىلغان: «ئەي ئىنسان ئوغلى، ئورنىڭدىن تۇرغىن، مەن ساڭا سۆز قىلاي». يەھۋا ھەزەكىيالغا: «ئورنىڭدىن تۇرغىن»،— دېگەندە، ھەزەكىيال كۈچكە تولغان. ئۇ مۇنداق يازغان: «خۇدانىڭ روھى ئىچىمگە كىرىپ، مېنى پۇتلىرىمدا ئۆرە تۇرغۇزدى» (ھەزەك. 2:1، 2). كېيىنرەك، ئۇ ئۆز ۋەزىپىسىنى ئورۇنلاش داۋامىدا، خۇدانىڭ «قولى»، يەنى مۇقەددەس روھى ھەزەكىيالنى يېتەكلىگەن (ھەزەك. 3:22؛ 8:1؛ 33:22؛ 37:1؛ 40:1). خۇدانىڭ مۇقەددەس روھى ھەزەكىيالنى ئۆز ۋەزىپىسىنى، يەنى ئۇ ۋەز قىلغان جايلاردىكى «جاھىل ۋە تاش يۈرەك» كىشىلەرگە ۋەز قىلىش ۋەزىپىسىنى ئورۇندىشى ئۈچۈن كۈچلەندۈرگەن (ھەزەك. 3:7). يەھۋا ھەزەكىيالغا مۇنداق دېگەن: «مانا! مەن سېنىڭ يۈزۈڭنى دەل ئۇلارنىڭ يۈزىدەك قېلىن ۋە سېنىڭ پېشانەڭنى دەل ئۇلارنىڭ پېشانىلىرىدەك قاتتىق قىلدىم. مانا، سېنىڭ پېشانەڭنى چاقماق تېشىدىن قاتتىقراق ئالماستەك قىلدىم. ئۇلاردىن قورمىغىن ياكى يۈزلىرىنىڭ ئىپادىلىرىدىن ۋەھىمىگە چۈشمىگىن» (ھەزەك. 3:8، 9). ئەمەلىيەتتە، يەھۋا ھەزەكىيالغا مۇنداق دېگەن: «ئادەملەرنىڭ جاھىللىقى سېنى ئۈمىدسىزلەندۈرمىسۇن. مەن سېنى كۈچلەندۈرىمەن».
9 ئۇنىڭدىن كېيىن، خۇدانىڭ روھى ھەزەكىيالنىڭ ۋەز خىزمىتىنى ئورۇنلىشىغا ياردەم بەرگەن. ھەزەكىيال مۇنداق يازغان: «يەھۋانىڭ كۈچلۈك قولى ئۈستۈمگە كەلدى». بۇ پەيغەمبەرنىڭ ئۆزى يەتكۈزىدىغان خەۋەرنى چۈشىنىشىگە ۋە ئۆزىنىڭ بۇ ۋەزىپىنى ئورۇندىيالايدىغانلىقىغا ئىشەنچىسىنى تۇرغۇزۇشىغا بىر ھەپتە ۋاقىت كەتكەن (ھەزەك. 3:14، 15). شۇنىڭدىن كېيىن، يەھۋا ئۇنىڭغا، روھ ئىچىگە كىرگەن تۈزلەڭلىككە بېرىشنى ئېيتقان (ھەزەك. 3:23، 24). ھەزەكىيال ۋەز خىزمىتىنى باشلاشقا تەييار بولغان.
خۇدانىڭ روھى بۈگۈنكى كۈندە بىزگە كۈچ بېرىدۇ
بۈگۈنكى كۈندە بىزنىڭ خىزمىتىمىزنى ئورۇندىشىمىزغا نېمە ياردەم بېرىۋاتىدۇ؟ (10-ئابزاسقا قاراڭ)
10. ۋەز خىزمىتىنى قىلىشىمىزغا نېمە ياردەم بېرىدۇ ۋە نېمە ئۈچۈن؟
10 ۋەز خىزمىتىنى قىلىشىمىز ئۈچۈن بىزگە نېمە ياردەم بېرىدۇ؟ بۇ سوئالغا جاۋاب بېرىش ئۈچۈن، ھەزەكىيال پەيغەمبەرگە نېمە ئىش بولغانلىقىغا دىققەت قىلىپ باقايلى. ئۇ ۋەز قىلىشنى رەسمىي باشلاشتىن بۇرۇن، خۇدانىڭ روھى ئۇنىڭغا ئېھتىياجلىق كۈچنى بەرگەن. خۇددى ھەزەكىيالنىڭ ۋەزىيىتىگە ئوخشاش، بۈگۈنكى كۈندە ۋەز خىزمىتىنى قىلىشىمىزغا پەقەت خۇدانىڭ روھى ياردەم بېرەلەيدۇ. نېمە ئۈچۈن؟ چۈنكى، ۋەز خىزمىتىمىزنى توختىتىش ئۈچۈن شەيتان بىزگە قارشى جەڭ قىلىدۇ (ۋەھىي. 12:17). نۇرغۇن كىشىلەر: «شەيتان بەك كۈچلۈك، بىز ئۇنىڭغا قارشى جەڭ قىلالمايمىز»،— دەپ ئويلايدۇ. بىراق، بىز گۇۋاھلىق بېرىش خىزمىتىمىز ئارقىلىق شەيتان ئۈستىدىن غەلبە قىلىۋاتىمىز (ۋەھىي. 12:9–11). بۇنى قانداق قىلىۋاتىمىز؟ بىز ۋەز خىزمىتىگە قاتنىشىش ئارقىلىق شەيتاننىڭ تەھدىتلىرىدىن قورقمايدىغانلىقىمىزنى كۆرسىتىمىز. ھەر قېتىم ۋەز ئېيتقىنىمىزدا، شەيتان بىر قېتىم مەغلۇپ بولىدۇ. ئۇنداقتا، شەيتاننىڭ قارشىلىقلىرىغا قارىماي، ۋەز ئېيتىشنى داۋاملاشتۇرالىغانلىقىمىزدىن قانداق خۇلاسە چىقىرىشقا بولىدۇ؟ خۇلاسىمىز شۇكى، مۇقەددەس روھ بىزگە كۈچ بېرىدۇ ۋە بىز يەھۋانىڭ قوبۇل قىلىشىغا ئېرىشىمىز.—مەتتا 5:10–12؛ 1-پېتر. 4:14.
11. خۇدانىڭ روھى بىز ئۈچۈن نېمە قىلىدۇ؟ بىز ئۇنىڭغا ئېرىشىش ئۈچۈن نېمە قىلالايمىز؟
11 ھەزەكىيالغا ۋەز قىلىش ئۈچۈن يەھۋانىڭ كۈچ بەرگەنلىكى ھەققىدە ئويلانغىنىمىزدا، يەنە نېمىلەرنى ئۆگىنىمىز؟ مۇقەددەس روھ ۋەز خىزمىتىمىزدە دۇچ كەلگەن ھەرقانداق قىيىنچىلىقلارنى يېڭىشىمىز ئۈچۈن، بىزگە يېتەرلىك كۈچ بېرەلەيدۇ (2-كورىنت. 4:7–9). ئۇنداقتا، خۇدانىڭ مۇقەددەس روھىغا داۋاملىق ئېرىشەلىشىمىز ئۈچۈن نېمە قىلالايمىز؟ بۇنىڭ ئۈچۈن، بىز ھەردائىم دۇئا قىلىشىمىز كېرەك. ئەيسا ئۆز شاگىرتلىرىغا مۇنداق تەلىم بەرگەن: «داۋاملىق سوراڭلار، . . . داۋاملىق ئىزدەڭلار، . . . داۋاملىق ئىشىكنى قېقىڭلار». يەھۋا ئۆزىدىن سورىغانلارغا، مۇقەددەس روھىنى بېرىدۇ.—لۇقا 11:9، 13؛ ئەلچى. 1:14؛ 2:4.
ھەزەكىيال خۇدانىڭ سۆزى بىلەن ئوزۇقلانغان
12. ھەزەكىيال 2:9–3:3-ئايەتلەرگە ئاساسلانغاندا، ئورام يازما قەيەردىن كەلگەن ۋە ئۇنىڭدا نېمە يېزىلغان؟
12 خۇدانىڭ روھى ھەزەكىيالغا ۋەز قىلىش ئۈچۈن جاسارەت بەرگەن بولسا، خۇدانىڭ سۆزلىرى ئۇنى ئوزۇقلاندۇرۇپ، ئۇنىڭ ئىمانىنى كۈچەيتكەن. كۆرۈنۈشتە، ھەزەكىيال ئورام يازمىنى تۇتۇپ تۇرغان بىر قولنى كۆرگەن (ھەزەكىيال 2:9–3:3-نى ئوقۇڭ). بۇ ئورام يازما قەيەردىن كەلگەن؟ ئۇنىڭدا نېمە يېزىلغان؟ ئۇ ھەزەكىيالنى قانداق ئوزۇقلاندۇرغان؟ بىرلىكتە كۆرۈپ باقايلى. بۇ ئورام يازما خۇدانىڭ تەختىدىن كەلگەن. يەھۋا بەلكىم ھەزەكىيال ئىلگىرى كۆرگەن تۆت پەرىشتىنىڭ بىرىنى ئىشلىتىپ، بۇ يازمىنى ئۇنىڭغا بەرگەن (ھەزەك. 1:8؛ 10:7، 20). بۇ ئورام يازمىدا خۇدانىڭ سۆزلىرى، يەنى سۈرگۈندە يۈرگەن ئىسىيانچى خەلققە يەتكۈزۈلىدىغان ھۆكۈم خەۋىرى، بار ئىدى (ھەزەك. 2:7). ئاشۇ خەۋەر ئۇ يازمىنىڭ ئىچى ۋە سىرتىغا يېزىلغان.
13. يەھۋا ھەزەكىيالنى ئورام يازمىنى نېمە قىلىشقا بۇيرىغان ۋە ئۇ نېمە ئۈچۈن تاتلىق بولغان؟
13 يەھۋا ئۆز پەيغەمبىرىگە: «بۇ ئورام يازمىنى يېگىن ۋە قورسىقىڭنى تويغۇزغىن»،— دېگەن. ھەزەكىيال بۇ بۇيرۇققا ئىتائەت قىلىپ، پۈتۈن ئورام يازمىنى تولۇق يەۋەتكەن. كۆرۈنۈشنىڭ بۇ قىسىمى نېمىنى بىلدۈرىدۇ؟ ھەزەكىيال ئۆزى جاكارلايدىغان خەۋەرنى تولۇق چۈشىنىشى زۆرۈر ئىدى. ئۇ شۇ خەۋەرگە ئۆزى ئىشىنىشى كېرەك ئىدى، شۇنداق بولغاندا، بۇ ئۇنى ۋەز قىلىشقا ئۈندەيتتى. ئاندىن كېيىن، ھەيران قالارلىق بىر ئىش يۈز بەرگەن. ھەزەكىيال ئاشۇ يازمىنىڭ «خۇددى ھەسەلدەك تاتلىق» ئىكەنلىكىنى بايقىغان (ھەزەك. 3:3). نېمە ئۈچۈن؟ چۈنكى ھەزەكىيال ئۈچۈن، يەھۋاغا ۋەكىللىك قىلىش شان-شەرىپى ئىنتايىن تاتلىق ياكى خۇشال قىلارلىق كەچۈرمىش بولغان (زەبۇر 19:8–11). يەھۋانىڭ ئۆزىنى پەيغەمبەر بولۇشقا تاللىغانلىقىدىن، ھەزەكىيال مىننەتدار بولغان ئىدى.
14. ھەزەكىيالنىڭ تاپشۇرۇلغان ۋەزىپىنى ئورۇنلاشقا تەييار بولۇشىغا نېمە ياردەم بەرگەن؟
14 يەھۋا كېيىنرەك ھەزەكىيالغا مۇنداق دېگەن: «مەن ساڭا ئېيتقان ھەممە سۆزلىرىمنى كۆڭۈل قويۇپ ئاڭلىغىن ۋە قەلبىڭدە ساقلا» (ھەزەك. 3:10). شۇنداق يول-يورۇق ئارقىلىق، يەھۋا ھەزەكىيالغا يازمىلاردا يېزىلغان سۆزلەرنى يادقا ئېلىپ، ئۇلار ئۈستىدە چوڭقۇر ئويلىنىشنى ئېيتقان. ھەزەكىيال شۇنداق قىلغىنىدا، ئۇنىڭ ئىمان-ئېتىقادى تېخىمۇ كۈچەيگەن. ئۇ يەنە كىشىلەرگە يەتكۈزىدىغان كۈچلۈك خەۋەرنى بەرگەن (ھەزەك. 3:11). ھەزەكىيال خۇدادىن كەلگەن خەۋەرنى تولۇق چۈشىنىپ، ئۇنىڭغا ئىشەنگەندە، تاپشۇرۇلغان ۋەزىپىنى باشلاشقا ۋە ئاخىرغىچە تولۇق ئورۇنلاشقا تەييار بولغان.—زەبۇر 19:14-نى سېلىشتۇرۇڭ.
بۈگۈنكى كۈندە خۇدانىڭ سۆزى بىلەن ئوزۇقلىنىمىز
15. ۋەز خىزمەتنى ئاخىرغىچە داۋاملاشتۇرۇش ئۈچۈن نېمىنى قەلبىمىزدە ساقلىۋېلىشىمىز كېرەك؟
15 ۋەز خىزمىتىمىزنى ئاخىرغىچە تاماملاش ئۈچۈن، بىز خۇدانىڭ سۆزىدىن داۋاملىق ئوزۇقلىنىشقا مۇھتاج. خۇدانىڭ بىزگە قىلغان سۆزلىرىنى پۈتۈنلەي قەلبىمىزدە ساقلىۋېلىشىمىز كېرەك. بۈگۈنكى كۈندە يەھۋا ئۆز سۆزى بولغان مۇقەددەس كىتاب ئارقىلىق بىزگە سۆزلەيدۇ. خۇدا سۆزىنىڭ ئوي-پىكىرىمىزگە، ھېس-تۇيغۇلىرىمىزغا ۋە ئىش-ھەرىكەتلىرىمىزگە داۋاملىق تەسىر قىلىشىغا قانداق جەزم قىلالايمىز؟
16. چوقۇم خۇدا سۆزىنى نېمە قىلىشىمىز كېرەك ۋە ئۇنى قەلبىمىزگە قانداق سىڭدۈرەلەيمىز؟
16 خۇددى بىز يېمەكلىكلەرنى يەپ، ئۇلارنى ھەزىم قىلىپ جىسمانىي جەھەتتىن ئوزۇقلانغاندەك، خۇدانىڭ سۆزىنى تەتقىق قىلىپ ئۆگىنىش ۋە ئۇنىڭ ئۈستىدە چوڭقۇر ئويلىنىش ئارقىلىق روھىي جەھەتتىن ئوزۇقلىنالايمىز. ئورام يازما ھەققىدىكى ۋەقەنى ئەستىن چىقارمايلى. خۇدانىڭ سۆزىگە كەلسەك، يەھۋا قورسىقىمىزنى ئۇنىڭ سۆزى بىلەن تويغۇزۇپ، ئۇنى ھەزىم قىلىشىمىزنى خالايدۇ. دۇئا قىلىش، مۇقەددەس كىتابنى ئوقۇش ۋە ئوقۇغانلىرىمىز ئۈستىدە چوڭقۇر ئويلىنىش ئارقىلىق شۇنداق قىلالايمىز. ئاۋۋال، خۇدانىڭ كۆزقاراشلىرىنى قوبۇل قىلىشقا قەلبىمىزنى تەييارلاش ئۈچۈن دۇئا قىلىمىز. كېيىن، مۇقەددەس كىتابتىكى بىر ئۈزۈندىنى ئوقۇيمىز. ئاندىن كېيىن، بىر ئاز توختاپ، ئوقۇغانلىرىمىز ئۈستىدە چوڭقۇر ئويلىنىمىز. بۇنىڭ نەتىجىسى قانداق بولىدۇ؟ قانچە كۆپرەك چوڭقۇر ئويلانغانسېرى، خۇدا سۆزىنى شۇنچە كۆپرەك ھەزىم قىلىمىز، يەنى چۈشىنىمىز. بۇ ئىمان-ئېتىقادىمىزنى كۈچەيتىدۇ.
17. مۇقەددەس كىتابتىن ئوقۇغانلىرىمىز ئۈستىدە چوڭقۇر ئويلىنىش نېمە ئۈچۈن مۇھىم؟
17 مۇقەددەس كىتابنى ئوقۇش ۋە ئۇنىڭ ئۈستىدە چوڭقۇر ئويلىنىش نېمە ئۈچۈن شۇنچە مۇھىم؟ چۈنكى، بۇنداق قىلىش بىزنىڭ ھازىر پادىشاھلىق خۇش خەۋىرىنى ۋەز قىلىشىمىزغا ۋە كېلەچەكتە ھۆكۈم خەۋىرىنى جاكارلىشىمىزغا كېرەكلىك كۈچنى بېرىدۇ. ئۇنىڭدىن باشقا، بىز يەھۋانىڭ ئېسىل پەزىلەتلىرى ھەققىدە چوڭقۇر ئويلانغىنىمىزدا، ئۇنىڭ بىلەن بولغان مۇناسىۋىتىمىز تېخىمۇ كۈچىيىدۇ. نەتىجىدە، بىز ھەقىقىي تاتلىق ياكى خۇشال قىلارلىق كۆڭۈل خاتىرجەملىكى ۋە قانائەتكە ئېرىشىمىز.—زەبۇر 119:103.
ئاخىرغىچە ۋەز خىزمىتىنى تاماملاشقا تەييار بولۇڭ
18. رايونىمىزدىكى كىشىلەر نېمىنى ئېتىراپ قىلىشى كېرەك ۋە نېمە ئۈچۈن؟
18 ئەلۋەتتە، بىز ھەزەكىيالغا ئوخشاش پەيغەمبەر ئەمەس. شۇنداقتىمۇ، بىز يەھۋانىڭ كۆڭلى قانائەت تاپقىچە، ئۇنىڭ سۆزلىرىدە يېزىلىپ ساقلانغان خەۋەرنى ۋەز قىلىش خىزمىتى تولۇق تاماملانغىچە، داۋاملىق ۋەز قىلىشنى قارار قىلدۇق. ھۆكۈم قىلىش ۋاقتى كەلگەندە، بىز ۋەز قىلىۋاتقان رايونلاردىكى كىشىلەرنىڭ ھېچقانداق بىر ئاگاھلاندۇرۇشنى ئاڭلىمىدۇق ياكى خۇدا بىزگە كۆڭۈل بۆلمىدى دېيىشىگە ھېچقانداق ئاساسى بولمايدۇ (ھەزەك. 3:19؛ 18:23). ئەكسىچە، ئۇلار بىز يەتكۈزگەن خەۋەرنىڭ خۇدادىن كەلگەنلىكىنى ئېتىراپ قىلىشى كېرەك.
19. نېمە بىزگە ۋەز قىلىشقا كۈچ بېرىدۇ؟
19 نېمە بىزگە ۋەز قىلىش ۋەزىپىمىزنى ئورۇنداش ئۈچۈن كۈچ بېرىدۇ؟ ھەزەكىيالغا ياردەم بەرگەن ئۈچ ئىش بىزگىمۇ ياردەم بېرىدۇ. بىز داۋاملىق ۋەز خىزمىتىنى داۋاملاشتۇرىمىز. چۈنكى، بىز خۇدا تەرىپىدىن ئەۋەتىلگەنلىكىمىزنى، خۇدانىڭ مۇقەددەس روھى بىزنى كۈچلەندۈرىدىغانلىقىنى ۋە خۇدا سۆزى بىزنى ئوزۇقلاندۇرىدىغانلىقىنى بىلىمىز. يەھۋانىڭ ياردىمى بىلەن، ۋەز قىلىش خىزمىتىنى «ئاخىرغىچە» تاماملاشقا تەييارمىز.—مەتتا 24:13.
45-ناخشا ئالغا باس!
a ھەزەكىيال پەيغەمبەرنىڭ ۋەز خىزمىتىنى قىلىشىغا ياردەم بەرگەن ئۈچ ئىشنى كۆرۈپ ئۆتىمىز. بىز يەھۋانىڭ ھەزەكىيال پەيغەمبەرگە قانداق ياردەم بەرگىنىنى كۆرگىنىمىزدە، يەھۋانىڭ بىزنىڭمۇ ۋەز خىزمىتىنى قىلىشىمىزغا ياردەم بېرىدىغانلىقىغا بولغان ئىشەنچىمىز كۈچىيىدۇ.
