47-تەتقىق ماقالىسى
ھېچنەرسە سىزنى يەھۋادىن ئايرىمىسۇن!
«مەن ساڭا ئىشىنىمەن، ئەي يەھۋا».—زەبۇر 31:14.
32-ناخشا تەۋرەنمەي چىڭ تۇرايلى!
بۇ ماقالىدە a
1. يەھۋا بىزنىڭ ئۇنىڭغا يېقىنلىشىشىمىزنى خالايدىغانلىقىنى قانداق بىلىمىز؟
يەھۋا بىزنى ئۆزىگە يېقىنلىشىشقا تەكلىپ قىلىدۇ (ياقۇپ 4:8). ئۇ بىزنىڭ خۇدايىمىز، ئاتىمىز ۋە دوستىمىز بولۇشنى خالايدۇ. ئۇ دۇئالىرىمىزغا جاۋاب بېرىدۇ ۋە قىيىنچىلىققا دۇچ كەلگەن ۋاقتىمىزدا ياردەم قىلىدۇ. ئۇ ئۆز تەشكىلاتى ئارقىلىق بىزگە تەلىم بېرىدۇ ۋە بىزنى قوغدايدۇ. ئۇنداقتا، يەھۋاغا يېقىنلىشىش ئۈچۈن بىز چوقۇم نېمە قىلىشىمىز كېرەك؟
2. يەھۋاغا يېقىنلىشىش ئۈچۈن نېمە قىلالايمىز؟
2 بىز دۇئا قىلىش، خۇدا سۆزىنى ئوقۇش ۋە ئۇنىڭ ئۈستىدە چوڭقۇر ئويلىنىش ئارقىلىق يەھۋاغا يېقىنلىشالايمىز. شۇنداق قىلغىنىمىزدا، ئۇنىڭغا بولغان سۆيگۈ-مۇھەببىتىمىز كۈچىيىدۇ ۋە مىننەتدارلىقىمىز تېخىمۇ چوڭقۇرلىشىدۇ. ئۇنىڭغا بويسۇنۇشقا ۋە ئۇنى مەدھىيىلەشكە پۈتۈن كۈچىمىز بىلەن تىرىشىمىز، چۈنكى ئۇ بۇنىڭغا لايىقتۇر (ۋەھىي. 4:11). بىز يەھۋانى قانچە يېقىن تونۇغانسېرى، ئۇنىڭغا ۋە بىزنى ياردەم بىلەن تەمىنلەيدىغان ئۇنىڭ تەشكىلاتىغا بولغان ئىشەنچىمىز شۇنچە كۈچىيىدۇ.
3. ئىبلىس بىزنى يەھۋادىن ئايرىۋېتىش ئۈچۈن نېمە قىلىدۇ، بىراق خۇدايىمىز ۋە ئۇنىڭ تەشكىلاتىنى تاشلاپ كەتمەسلىكىمىزگە نېمە ياردەم بېرىدۇ؟ (زەبۇر 31:13، 14)
3 بولۇپمۇ، بىز قىيىنچىلىقلارغا دۇچ كەلگەندە، ئىبلىس بىزنى يەھۋادىن ئايرىۋېتىشكە ئۇرۇنىدۇ. ئۇ بۇنى قانداق قىلىدۇ؟ ئۇ ئاستا-ئاستا، بىزنىڭ يەھۋاغا ۋە ئۇنىڭ تەشكىلاتىغا بولغان ئىشەنچىمىزنى ئاجىزلاشتۇرىدۇ. بىراق، بىز ئۇنىڭ بۇنداق ھۇجۇملىرىدىن ئۆزىمىزنى قوغدىيالايمىز. ئىشەنچىمىز كۈچلۈك بولسا، يەھۋاغا بولغان ئىشەنچىمىزدە تەۋرەنمىسەك، بىز خۇدايىمىز ۋە ئۇنىڭ تەشكىلاتىنى تاشلىمايمىز.—زەبۇر 31:13، 14-نى ئوقۇڭ.
4. بۇ ماقالىدە نېمىلەرنى مۇھاكىمە قىلىمىز؟
4 بۇ ماقالىدە، جامائەتنىڭ سىرتىدىن كېلىدىغان ئۈچ قىيىنچىلىقنى مۇھاكىمە قىلىمىز. ھەربىرى بىزنىڭ يەھۋاغا ۋە ئۇنىڭ تەشكىلاتىغا بولغان ئىشەنچىمىزنى ئاجىزلاشتۇرۇشى مۇمكىن. قانداق قىلىپ بۇ قىيىنچىلىقلار بىزنى يەھۋادىن ئايرىۋېتەلەيدۇ؟ شەيتاننىڭ قارشىلىقلىرىغا تاقابىل تۇرۇش ئۈچۈن نېمە قىلالايمىز؟
قىيىنچىلىقلارنى باشتىن ئۆتكۈزگىنىمىزدە
5. قىيىنچىلىقلار يەھۋا ۋە ئۇنىڭ تەشكىلاتىغا بولغان ئىشەنچىڭىزنى قانداق ئاجىزلاشتۇرالايدۇ؟
5 بەزى ۋاقىتلاردا، بىز ئائىلىدىكىلەرنىڭ قارشى تۇرۇشى ياكى ئىش ئورنىمىزدىن ئايرىلىپ قېلىشقا ئوخشاش قىيىنچىلىقلارغا دۇچ كېلىمىز. بۇنداق قىيىنچىلىقلار قانداق قىلىپ بىزنىڭ يەھۋانىڭ تەشكىلاتىغا بولغان ئىشەنچىمىزنى ئاجىزلاشتۇرىدۇ ۋە بىزنى ئۇنىڭدىن ئايرىۋېتەلەيدۇ؟ بىز ئۇزۇن مەزگىل قىيىنچىلىقلارنى باشتىن ئۆتكۈزگىنىمىزدە، ئۈمىدسىز ھېس قىلىشىمىز ياكى چۈشكۈنلۈككە چۈشۈپ كېتىشىمىز مۇمكىن. بۇنداق پۇرسەتلەردىن پايدىلىنىپ، شەيتان بىزنى يەھۋانىڭ بىزگە بولغان سۆيگۈ-مۇھەببىتىدىن گۇمانلاندۇرۇشقا ئۇرۇنىدۇ. ئىبلىس بىزنىڭ، ئۇچراۋاتقان ئازاب-ئوقۇبەتلىرىمىزگە يەھۋا ۋە ئۇنىڭ تەشكىلاتى سەۋەبچى دەپ ئويلىشىمىزنى خالايدۇ. قەدىمدە مىسىردىكى بەزى ئىسرائىللار شۇنىڭغا ئوخشاش ئىشقا دۇچ كەلگەن. ئۇلار دەسلەپتە يەھۋانىڭ ئۇلارنى قۇللۇقتىن قۇتقۇزۇش ئۈچۈن مۇسا بىلەن ھارۇننى تاللىغانلىقىغا ئىشەنگەن (چىق. 4:29–31). بىراق، كېيىنرەك فىرئەۋن ئىسرائىللارنىڭ تۇرمۇشىنى قىيىنلاشتۇرغاندا، ئۇلار ئاشۇ قىيىنچىلىقلارغا مۇسا بىلەن ھارۇن سەۋەبچى دەپ ئەيىبلەپ، مۇنداق دېگەن: «سىلەر سەۋەبلىك فىرئەۋن ۋە ئۇنىڭ خىزمەتكارلىرى بىزنى ئۆچ كۆردى ۋە بىزنى ئۆلتۈرۈشى ئۈچۈن ئۇلارنىڭ قولىغا قىلىچ تۇتقۇزدۇڭلار» (چىق. 5:19–21). بەك ئەپسۇس، ئۇلار خۇدانىڭ سادىق خىزمەتچىلىرىنى ئەيىبلىگەن. ئەگەر سىز ئۇزۇن بىر مەزگىل قىيىنچىلىقلارنى باشتىن كەچۈرسىڭىز، يەھۋا ۋە ئۇنىڭ تەشكىلاتىغا بولغان ئىشەنچىڭىزنى كۈچلۈك ساقلاش ئۈچۈن نېمە قىلالايسىز؟
6. قىيىنچىلىقلارغا تاقابىل تۇرۇش توغرىسىدا ھاباققۇق پەيغەمبەرنىڭ مىسالىدىن نېمىنى ئۆگىنىمىز؟ (ھاباققۇق 3:17–19)
6 ئىچ باغرىڭىزنى دۇئادا يەھۋاغا تۆكۈپ، ئۇنىڭدىن ياردەم سوراڭ. ھاباققۇق پەيغەمبەر نۇرغۇن قىيىنچىلىقلارغا دۇچ كەلگەن. بىر ۋاقىتقا كەلگەندە، ئۇ قارىماققا يەھۋانىڭ ئۆزىگە غەمخورلۇق قىلىدىغانلىقىدىن گۇمانلانغان. شۇڭا، ئۇ ئۆز ھېس-تۇيغۇلىرىنى دۇئادا يەھۋاغا تۆكۈپ بەرگەن. ئۇ شۇنداق دەيدۇ: «ئەي يەھۋا، قاچانغىچە ياردەم سوراپ نالە-پەرياد قىلىمەن، بىراق سەن قۇلاق سالمايسەن؟ . . . نېمە ئۈچۈن زورلۇق-زومبۇلۇققا چىداپ تۇرىسەن؟» (ھاباق. 1:2، 3). يەھۋا ئۆز سادىق خىزمەتچىسىنىڭ چىن قەلبىدىن قىلغان دۇئاسىغا جاۋاب قايتۇرغان (ھاباق. 2:2، 3). يەھۋانىڭ قۇتقۇزۇش ئۈچۈن قىلغان ئىش-ھەرىكەتلىرى ھەققىدە چوڭقۇر ئويلانغاندىن كېيىن، ھاباققۇق قايتا شاد-خۇراملىققا چۆمگەن. ئۇ يەھۋانىڭ ئۇنىڭغا غەمخورلۇق قىلىدىغانلىقىغا ھەر قانداق سىناقلارغا بەرداشلىق بېرىش ئۈچۈن ياردەم بېرەلەيدىغانلىقىغا ئىشەنگەنىدى (ھاباققۇق 3:17–19-نى ئوقۇڭ). سىز قىيىنچىلىقلارغا دۇچ كەلگەندە، يەھۋاغا دۇئا قىلىپ، ئۆزىڭىزنىڭ نېمىلەرنى ھېس قىلىۋاتقانلىقىنى ئېيتىپ بېرىڭ ۋە ئۇنىڭ ياردىمىگە تايىنىڭ. شۇنداق قىلغىنىڭىزدا، يەھۋا سىزگە بەرداشلىق بېرىشىڭىز ئۈچۈن كېرەكلىك كۈچنى بېرىدىغانلىقىغا ئىشىنەلەيسىز. ئۇنىڭ يار-يۆلەك بولۇۋاتقانلىقىنى ھېس قىلغىنىڭىزدا، ئۇنىڭغا بولغان ئىمان-ئېتىقادىڭىز تېخىمۇ كۈچىيىدۇ.
7. شىرلېينىڭ تۇققانلىرى ئۇنى نېمىگە قايىل قىلماقچى بولغان ۋە نېمە ئۇنى يەھۋاغا بولغان ئىشەنچىسىنى يوقۇتۇشتىن قوغداپ قالغان؟
7 داۋاملىق يەھۋاغا يېقىن ياشىشىڭىزغا ياردەم بېرىدىغان ئىشلارنى قىلىڭ. پاپۇئا-يېڭى گۋىنېيىىسىدە ياشايدىغان شىرلېي ئىسىملىك قېرىنداش قىيىنچىلىقلارغا ئۇچرىغاندا شۇنداق قىلغانىدى. بۇ ئۇنىڭغا قانداق ياردەم بەرگەنلىكىنى كۆرۈپ باقايلى b. شىرلېينىڭ ئائىلىسى نامرات بولۇپ، بەزىدە يېتەرلىك يېمەك-ئىچمەككە ئېرىشىشى قىيىن ئىدى. بىر تۇققىنى ئۇنىڭ يەھۋاغا بولغان ئىشەنچىسىنى ئاجىزلاشتۇرماقچى بولغان. ئۇ قېرىنداشقا مۇنداق دېگەن: «سەن خۇدانىڭ مۇقەددەس روھى ساڭا ياردەم بېرىدۇ دېگەن ئىدىڭ، قېنى ئاشۇ ياردەم؟» ئۇ يەنە: «ئائىلەڭ تېخىغىچە نامرات. سەن ۋاقتىڭنى ۋەز قىلىمەن دەپ ئىسراپ قىلىۋاتىسەن»،— دېگەن. شىرلېي شۇنى ئېتىراپ قىلىپ، مۇنداق دەيدۇ: «مەن ئۆز ئۆزۈمدىن: «خۇدا ماڭا ھەقىقەتەن كۆڭۈل بۆلەمدۇ؟»— دەپ سورىدىم. شۇڭا، دەرھال يەھۋاغا دۇئا قىلىپ، ئۇنىڭغا ئويلىغانلىرىمنىڭ ھەممىسىنى ئېيتتىم. داۋاملىق مۇقەددەس كىتاب ۋە بىزنىڭ نەشىر ماتېرىياللىرىمىزنى ئوقۇدۇم. ۋەز قىلىشنى ۋە جامائەت يىغىلىشلىرىغا قاتنىشىشنى داۋاملاشتۇردۇم». ئۇزۇن ئۆتمەي، ئۇ يەھۋانىڭ ئۆز ئائىلىسىدىكىلەرگە غەمخورلۇق قىلىۋاتقانلىقىنى ھېس قىلىشقا باشلىغان. ئۇنىڭ ئائىلىسى ئاچ قالمىغان، ئۇلار خۇشال-خۇرام ئىدى. شىرلېي مۇنداق دەيدۇ: «مەن يەھۋانىڭ دۇئالىرىمغا جاۋاب بېرىۋاتقانلىقىنى ھېس قىلدىم» (1-تىموت. 6:6–8). ئەگەر داۋاملىق يەھۋاغا يېقىن ياشىشىڭىزغا ياردەم بېرىدىغان ئىشلارنى قىلسىڭىز، قىيىنچىلىقلارنىڭ ياكى گۇمانلارنىڭ سىزنى يەھۋادىن ئايرىۋېتىشىگە يول قويمايسىز.
مەسئۇلىيەتنى ئۆز ئۈستىگە ئالغان بۇرادەرلەر ئادالەتسىز مۇئامىلىگە ئۇچرىغاندا
8. يەھۋانىڭ تەشكىلاتىدىكى مەسئۇلىيەتنى ئۆز ئۈستىگە ئالغان قېرىنداشلارغا نېمە بولۇشى مۇمكىن؟
8 تۈرلۈك تاراتقۇلار ۋە ئىجتىمائىي ئالاقە ۋاسىتىلىرى ئارقىلىق دۈشمەنلىرىمىز يەھۋانىڭ تەشكىلاتىدىكى مەسئۇلىيەتنى ئۆز ئۈستىگە ئالغان قېرىنداشلار ھەققىدە يالغان ياكى خاتا خەۋەرلەرنى تارقىتىدۇ (زەبۇر 31:13). بەزى قېرىنداشلار قولغا ئېلىنىپ، جىنايەتچىلەر دەپ ئەيىبلەنمەكتە. ئەلچى پاۋلۇس ناھەق ئەيىبلىنىپ قولغا ئېلىنغاندا، بىرىنچى ئەسىردىكى مەسىھ ئەگەشكۈچىلىرىمۇ ئوخشاش ۋەزىيەتكە دۇچ كەلگەن. ئۇلار بۇنىڭغا قانداق ئىنكاس قايتۇرغان؟
9. ئەلچى پاۋلۇس تۈرمىگە تاشلانغاندا، بەزى ئېتىقادچىلار قانداق ئىنكاس قايتۇرغان؟
9 ئەلچى پاۋلۇس رىمدا تۈرمىگە تاشلانغاندا، بىرىنچى ئەسىردىكى بەزى قېرىنداشلار ئۇنى قوللاپ-قۇۋۋەتلەشنى توختاتقان (2-تىموت. 1:8، 15). نېمە ئۈچۈن؟ كۆپچىلىك ئۇنى جىنايەتچى دەپ قارىغاچقا، ئۇلار پاۋلۇستىن نومۇس قىلغانمۇ ياكى ئۆزلىرىنىڭمۇ زىيانكەشلىككە ئۇچرىشىدىن قورققانمۇ؟ (2-تىموت. 2:8، 9) ئۇلارنىڭ سەۋەبى نېمە بولۇشىدىن قەتئىينەزەر، پاۋلۇسنىڭ شۇ ۋەزىيەتتە ئۆزىنى قانداق ھېس قىلغانلىقىنى تەسەۋۋۇر قىلىپ كۆرۈڭ. ئۇ نۇرغۇن جاپا-مۇشەققەتلەرگە بەرداشلىق بەرگەن (ئەلچى. 20:18–21؛ 2-كورىنت. 1:8). ئۇ ھەتتا ھاياتىنى ئۇلار ئۈچۈن خەتەرگە تەۋەككۈل قىلغان. بىز ھەرگىزمۇ پاۋلۇس ياردەمگە ئېھتىياجلىق ۋاقىتتا ئۇنى تاشلىۋەتكەن كىشىلەرگە ئوخشاپ قالمايلى. مەسئۇلىيەتنى ئۆز ئۈستىگە ئالغان قېرىنداشلار زىيانكەشلىككە ئۇچرىغاندا، بىز چوقۇم نېمىنى ئەستە ساقلىشىمىز كېرەك؟
10. مەسئۇلىيەتنى ئۈستىگە ئالغان بۇرادەرلەر زىيانكەشلىككە دۇچ كەلگەندە، بىز نېمىنى ئەستە ساقلىشىمىز كېرەك ۋە نېمە ئۈچۈن؟
10 زىيانكەشلىككە نېمە ئۈچۈن ئۇچرىغانلىقىمىزنى ۋە ئۇنىڭغا كىم سەۋەبچى ئىكەنلىكىنى ئېسىڭىزدە ساقلاڭ. 2-تىموتىي 3:12-ئايەت مۇنداق دەيدۇ: «مەسىھ ئەيسادا ئىخلاسمەن ھايات كەچۈرۈشكە ئىرادە تىكلىگەنلەرنىڭ ھەممىسى زىيانكەشلىككە ئۇچرايدۇ». شۇڭا، شەيتان مەسئۇلىيەتنى ئۆز ئۈستىگە ئالغان بۇرادەرلەرنى ھۇجۇم قىلىش نىشانى قىلغانلىقىدىن ھەيران قالماسلىقىمىز كېرەك. ئۇنىڭ قارا نىيىتى بولسا، ئۇلارنىڭ ساداقەتمەنلىكىنى بۇزۇش ۋە بىزنى قورقۇتۇش.—1-پېتر. 5:8.
گەرچە ئەلچى پاۋلۇس تۈرمىگە تاشلانغان بولسىمۇ، ئونىسىفورۇس باتۇرلۇق بىلەن ئۇنى قوللاپ-قۇۋۋەتلىگەن. سۈرەتتە كۆرسىتىلگەندەك، بۈگۈنكى كۈندە قېرىنداشلىرىمىز تۈرمىدىكى ئېتىقادچىلارنى قوللاپ-قۇۋۋەتلەيدۇ (11، 12-ئابزاسلارغا قاراڭ)
11. ئونىسىفورۇسنىڭ مىسالىدىن نېمىلەرنى ئۆگىنىمىز؟ (2-تىموتىي 1:16–18)
11 قېرىنداشلىرىڭىزنى قوللاپ-قۇۋۋەتلەشنى داۋاملاشتۇرۇڭ ۋە ئۇلارغا سادىقلىق بىلەن يېقىن تۇرۇڭ (2-تىموتىي 1:16–18-نى ئوقۇڭ). پاۋلۇس تۈرمىگە تاشلانغاندا، بىرىنچى ئەسىردىكى ئونىسىفورۇس ئىسىملىك بىر ئېتىقادچى باشقىچە ئىنكاس قايتۇرغان. ئۇ پاۋلۇسنىڭ كىشەنلەنگەنلىكىدىن نومۇس قىلمىغان. ئەكسىنچە، ئونىسىفورۇس پاۋلۇسنى ئىزدىگەن ۋە ئۇنى تاپقاندا، قوللاپ-قۇۋۋەتلەشنىڭ ئەمەلىي يوللىرىنى ئىزدىگەن. شۇنداق قىلىش ئارقىلىق، ئونىسىفورۇس ئۆزىنىڭ ھاياتىنى خەتەرگە تەۋەككۈل قىلغان. بىز بۇنىڭدىن نېمىنى ئۆگىنەلەيمىز؟ بىز ئىنساندىن قورقۇش بىزنى ۋەھىمىگە سېلىپ قويماسلىقى ياكى زىيانكەشلىككە ئۇچرىغان قېرىنداشلىرىمىزغا ياردەم بېرىشتىن توسۇپ قويۇشىغا يول بەرمەسلىكىمىز كېرەك. ئەكسىنچە، ئۇلارنى قوغداپ، قولىمىزدىن كەلگەننىڭ ھەممىسىنى قىلايلى (پەند. نە 17:17). ئۇلار بىزنىڭ سۆيگۈ-مۇھەببىتىمىزگە ۋە قوللاپ-قۇۋۋەتلىشىمىزگە مۇھتاج.
12. روسىيەدىكى قېرىنداشلىرىمىزدىن نېمىلەرنى ئۆگىنىمىز؟
12 روسىيەدىكى ئېتىقادچىلار تۈرمىدىكى قەدىرلىك قېرىنداشلىرىمىزغا قانداق ياردەم بەرگەنلىكىنى ئويلاپ كۆرەيلى. بەزىلىرى سوتقا تارتىلغاندا، نۇرغۇنلىغان قېرىنداشلار سوت مەھكىمىسىگە كېلىپ، ئۇلارنى قوللاپ-قۇۋۋەتلىگەن. بىز بۇنىڭدىن نېمىنى ئۆگىنىمىز؟ مەسئۇلىيەتنى ئۈستىگە ئالغان بۇرادەرلەر تۆھمەتكە ئۇچرىسا، قولغا ئېلىنسا ياكى زىيانكەشلىككە ئۇچرىسا، ھەرگىزمۇ قورقماڭ. ئۇلار ئۈچۈن دۇئا قىلىڭ، ئۇلارنىڭ ئائىلىسىدىكى ئۇرۇق-تۇغقانلىرىغا غەمخورلۇق قىلىڭ ۋە ئۇلارنى قوللاپ-قۇۋۋەتلەيدىغان باشقا يوللارنى ئىزدەڭ.—ئەلچى. 12:5؛ 2-كورىنت. 1:10، 11.
مەسخىرىگە ئۇچرىغاندا
13. مەسخىرە قىلىش يەھۋا ۋە ئۇنىڭ تەشكىلاتىغا بولغان ئىشەنچىمىزنى قانداق ئاجىزلاشتۇرالايدۇ؟
13 يەھۋا گۇۋاھچىسى ئەمەس ئۇرۇق-تۇغقانلىرىمىز، خىزمەتداشلىرىمىز ياكى ساۋاقداشلىرىمىز بىزنىڭ ۋەز ئېيتقانلىقىمىزنى ياكى يەھۋانىڭ يۇقىرى ئەخلاق ئۆلچەملىرى بىلەن ياشىغانلىقىمىزنى مەسخىرە قىلىشى مۇمكىن (1-پېتر. 4:4). بەلكىم، ئۇلار سىزگە: «مەن سىزنى ياخشى كۆرىمەن، بىراق سىلەرنىڭ دىنىي قائىدە-قانۇنلىرىڭلار ھەددىدىن زىيادە ئېغىر. بۇ تەلەپلەرگە يېتىش قىيىن»،— دەيدۇ. بەزىلەر بىزنىڭ جامائەتتىن چىقىرىلغانلارغا قىلىدىغان مۇئامىلىمىزنى تەنقىدلەپ، مۇنداق دېيىشىدۇ: «قانداقمۇ سىلەر ئۆزۈڭلارنى مېھىر-مۇھەببەتلىك ئادەم دەپ ئېيتالايسىلەر؟» كىشىلەرنىڭ مۇشۇنىڭغا ئوخشاش سۆزلىرى، ئوي-پىكىرىمىزگە گۇمان ئۇرۇقىنى چاچىدۇ. بىز ئۆزىمىزدىن شۇنداق سوئاللارنى سوراشقا باشلىشىمىز مۇمكىن: «يەھۋا مەندىن بەك كۆپ نەرسىنى تەلەپ قىلامدۇ؟ ئۇنىڭ تەشكىلاتى چەكلەيدىغان ئىشلار شۇنچە كۆپمۇ؟» ئەگەر سىز مۇشۇنداق ئەھۋالغا دۇچ كەلسىڭىز، يەھۋا ۋە ئۇنىڭ تەشكىلاتىغا يېقىن تۇرۇش ئۈچۈن نېمە قىلالايسىز؟
ئايۇپ ئۆزىنى مەسخىرە قىلغان ساختا دوستلىرىنىڭ يالغانچىلىقلىرىغا ئىشىنىشنى رەت قىلغان ۋە يەھۋاغا بولغان ساداقەتمەنلىكىنى ساقلاشقا قەتئىي بەل باغلىغان (14-ئابزاسقا قاراڭ)
14. باشقىلار يەھۋانىڭ ئۆلچەملىرى بويىچە ياشىغانلىقىمىزنى مەسخىرە قىلغاندا، قانداق ئىنكاس قايتۇرۇشىمىز كېرەك؟ (زەبۇر 119:50–52)
14 يەھۋانىڭ ئۆلچەملىرىگە ماس ياشاش ئۈچۈن قەتئىي بەل باغلاڭ. ئايۇپ مەسخىرىگە ئۇچرىشىغا قارىماي، يەھۋانىڭ ئۆلچەملىرىگە ماس ياشىغان ئىدى. ئۆزلىرىنى ئايۇپنىڭ دوستلىرى دەيدىغانلاردىن بىرى، ھەتتا ئايۇپنى ناتوغرا كۆزقاراشتا بولۇشقا قايىل قىلماقچى بولغان. ئۇنىڭ ئېيتىشىچە، ئايۇپ خۇدانىڭ ئۆلچەملىرىگە ماس ياشىسا ياكى ياشىمىسا، بۇ خۇدا ئۈچۈن مۇھىم ئەمەس ئىدى (ئايۇپ 4:17، 18؛ 22:3). بىراق، ئايۇپ شۇنداق يالغانچىلىقلارغا ئىشىنىشنى رەت قىلغان. ئۇ يەھۋانىڭ توغرا ۋە ناتوغرا ئۈچۈن بەلگىلىگەن ئۆلچەملەرنىڭ توغرا ئىكەنلىكىنى بىلگەن ۋە ئۇلارغا ماس ياشاشقا بەل باغلىغان. ئۇ ئۆزىنىڭ ساداقەتمەنلىكىنى باشقىلارنىڭ بۇزۇشىغا يول قويمىغان (ئايۇپ 27:5، 6). بۇنىڭدىن نېمىنى ئۆگىنىمىز؟ مەسخىرىنىڭ يەھۋانىڭ ئۆلچەملىرىگە قارىتا گۇمانىڭىزنى قوزغىشىغا يول قويماڭ. ئۆزىڭىزنىڭ ھايات كەچۈرمىشلىرى ھەققىدە قايتا ئويلىنىپ كۆرۈڭ. يەھۋانىڭ ئۆلچەملىرىنىڭ توغرىلىقىنى ۋە ئۇلارنىڭ سىزگە پايدىلىق ئىكەنلىكىنى قايتا-قايتا كۆردىڭىزمۇ؟ ئاشۇ ئۆلچەملەر بىلەن ئىش قىلىدىغان تەشكىلاتنى قوللاشقا بەل باغلاڭ. شۇنداق قىلغىنىڭىزدا، كىشىلەر مەيلى قانچىلىك مەسخىرە قىلىشىدىن قەتئىينەزەر، سىز يەھۋاغا خىزمەت قىلىشنى ھەرگىز توختاتمايسىز.—زەبۇر 119:50–52-نى ئوقۇڭ.
15. برىجىت نېمە ئۈچۈن مەسخىرىگە ئۇچرىغان؟
15 ھىندىستاندىكى برىجىت ئىسىملىك قېرىنداشنىڭ كەچۈرمىشلىرىنى كۆرۈپ باقايلى. ئائىلىسىدىكىلەر ئۇنىڭ ئىمان-ئېتىقادىنى مەسخىرە قىلغان. 1997-يىلى سۇغا چۆمۈلدۈرۈلۈپ ئۇزۇن ئۆتمەي، ئۇنىڭ ئېتىقادچى بولمىغان يولدىشى ئىش ئورنىدىن ئايرىلىپ قالغان. شۇنىڭ بىلەن، يولدىشى ئائىلىسىدىكىلەرنىڭ ئۆز ئاتا-ئانىسى بىلەن بىللە ياشىشى ئۈچۈن، باشقا شەھەرگە كۆچۈپ بېرىشنى قارار قىلغان. بىراق، برىجىت تېخىمۇ كۈچلۈك سىناقلارغا دۇچ كەلگەن. چۈنكى، ئۇنىڭ يولدىشى ئىشسىز قالغان. برىجىت ئائىلىنى تەمىنلەش ئۈچۈن تولۇق ۋاقىت ئىشلەشكە مەجبۇر بولغان. ئۇنىڭدىن باشقا، ئۇنىڭ ئۈچۈن ئەڭ يېقىن جامائەت 350 كىلومېتر يىراقلىقتا ئىدى. ئەپسۇسلىنارلىقى، ئېرىنىڭ ئائىلىسىدىكىلىرى ئۇنىڭ ئىمان-ئېتىقادىغا قارشى چىققان. قاتتىق قارشىلىق قىلغاچ، برىجىت ئائىلىسىدىكىلەر بىلەن يەنە كۆچۈشكە مەجبۇر بولغان. كېيىن، يولدىشى ئۆلۈپ كەتكەن. ئۇنىڭدىن كېيىن، 12 ياشتىكى بىر قىزى راك كېسىلى بىلەن ئۆلۈپ كەتكەن. برىجىتنىڭ ئۇرۇق-تۇغقانلىرى مۇشۇ ئىشلار ئۈچۈن ئۇنى ئەيىبلەپ، يارىسىنىڭ ئۈستىگە تۇز چاچقان. ئۇلار ئەگەر ئۇ يەھۋا گۇۋاھچىسى بولمىغان بولسا، شۇ پاجىئەلەر بولمايتتى دېيىشكەن. شۇنداقتىمۇ، برىجىت يەھۋاغا داۋاملىق ئىشىنىپ، يەھۋانىڭ تەشكىلاتىغا يېقىن ياشىغان.
16. برىجىت يەھۋاغا ۋە ئۇنىڭ تەشكىلاتىغا سادىق قالغىنى ئۈچۈن قانداق بەرىكەتلەرگە ئېرىشكەن؟
16 برىجىت جامائەتتىن بەك يىراق جايدا ياشىغاچقا، رايونلۇق مەسئۇل ئاقساقال ئۇنى ئۆزى ياشاۋاتقان جايدا ۋەز ئېيتىشقا ۋە ئۆيىدە ئىبادەت يىغىلىشىنى ئۆتكۈزۈشكە ئىلھاملاندۇرغان. دەسلەپتە، ئۇ بۇنىڭدىن بېسىم ھېس قىلغان. ئەمما، بېرىلگەن يول-يورۇققا بويسۇنغان. ئۇ باشقىلارغا خۇش خەۋەر ئېيتقان، ئۆيىدە ئىبادەت يىغىلىشنى ئۆتكۈزگەن. قىزلىرى بىلەن ئائىلىۋى ئىبادەت ئۆتكۈزۈشكە ۋاقىت چىقارغان. بۇنىڭ نەتىجىسى قانداق بولغان؟ برىجىت نۇرغۇن كىشىلەر بىلەن مۇقەددەس كىتابنى تەتقىق قىلىشنى باشلىغان ۋە نۇرغۇنلىرى سۇغا چۆمدۈرۈلۈشتىن ئۆتكەن. ئۇ 2005-يىلى پىدائىي ۋەز ئېيتقۇچى بولۇپ خىزمەت قىلىشنى باشلىغان. ئۇنىڭ يەھۋاغا ۋە ئۇنىڭ تەشكىلاتىغا بولغان ئىشەنچىسى مۇكاپاتلانغان. ئۇنىڭ قىزلىرى يەھۋاغا سادىقلىق بىلەن خىزمەت قىلىۋاتىدۇ. ھازىر ئۇ ياشىغان ئاشۇ رايوندا ئىككى جامائەت بار. برىجىت، يەھۋانىڭ ئۇنىڭغا جاپا-مۇشەققەتلەرگە تاقابىل تۇرۇش ۋە ئائىلىسىدىكىلەرنىڭ مەسخىرىسىگە بەرداشلىق بېرىش ئۈچۈن كۈچ بەرگەنلىكىگە ئىشىنىدۇ.
يەھۋاغا ۋە ئۇنىڭ تەشكىلاتىغا سادىق بولۇپ قېلىڭ
17. بىز نېمە قىلىشقا قەتئىي بەل باغلىشىمىز كېرەك؟
17 شەيتان، بىز قىيىنچىلىقلارغا دۇچ كەلگىنىمىزدە، يەھۋا بىزگە ياردەم بەرمەيدۇ ۋە ئۇنىڭ تەشكىلاتىنى قوللاش ھاياتىمىزنى تېخىمۇ قىيىنلاشتۇرىۋېتىدۇ دەپ ئىشىنىشىمىزنى خالايدۇ. مەسئۇلىيەتنى ئۈستىگە ئالغان بۇرادەرلەر تۆھمەت ۋە زىيانكەشلىككە ئۇچرىغاندا ياكى تۈرمىگە تاشلانغاندا، شەيتان بىزنىڭ قورقۇپ كېتىشىمىزنى خالايدۇ. ئۇ يەنە مەسخىرە قىلىش ئارقىلىق، يەھۋانىڭ ئۆلچەملىرىگە ۋە ئۇنىڭ تەشكىلاتىغا بولغان ئىشەنچىمىزنى ئاجىزلاشتۇرماقچى. ئەمما، بىز ئۇنىڭ ھىيلە-مىكىرلىرىنى ئوبدان بىلىمىز ۋە ئۇنىڭغا ئالدانمايمىز (2-كورىنت. 2:11). شۇڭا، شەيتاننىڭ يالغانچىلىقىنى رەت قىلىپ، داۋاملىق يەھۋاغا ۋە ئۇنىڭ تەشكىلاتىغا سادىق قېلىشقا قەتئىي بەل باغلايلى. ئېسىڭىزدە بولسۇنكى، يەھۋا ھەرگىزمۇ سىزنى تاشلىمايدۇ (زەبۇر 28:7). ھېچنەرسە سىزنى يەھۋادىن ئايرىمىسۇن!—رىملىقلار 8:35–39.
18. كېيىنكى ماقالىدە نېمىنى مۇھاكىمە قىلىمىز؟
18 بۇ ماقالىدە، بىز جامائەتنىڭ سىرتىدىن كېلىدىغان قىيىنچىلىقلار توغرىسىدا مۇھاكىمە قىلدۇق. ئەمما، بىزنىڭ يەھۋا ۋە ئۇنىڭ تەشكىلاتىغا بولغان ئىشەنچىمىزنى جامائەت ئىچىدىن كېلىدىغان قىيىنچىلىقلارمۇ سىنايدۇ. بىز شۇنداق قىيىنچىلىقلارغا مۇۋەپپەقىيەتلىك ھالدا تاقابىل تۇرۇش ئۈچۈن نېمە قىلالايمىز؟ كېيىنكى ماقالىدە، بۇ ھەققىدە مۇھاكىمە قىلىمىز.
54-ناخشا ئىماندا چىڭ تۇرايلى!
a زاماننىڭ ئاخىرقى كۈنلىرىدە ساداقەتمەنلىكىمىزنى ساقلاپ قېلىش ئۈچۈن، بىز چوقۇم داۋاملىق يەھۋا بىلەن ۋە ئۇنىڭ تەشكىلاتىغا ئىشىنىشىمىز كېرەك. ئىبلىس ھەرخىل سىناقلارنى ئىشلىتىپ، بىزنىڭ ئىشەنچىمىزنى يوقاتماقچى. ھازىر شەيتان دائىم ئىشلىتىدىغان ئۈچ نەرسىنى كۆرۈپ چىقىمىز ۋە ئۇنىڭ قارشىلىقلىرىغا باش ئەگمەي، يەھۋا ۋە ئۇنىڭ تەشكىلاتىغا داۋاملىق سادىق قېلىش ئۈچۈن نېمە قىلالايدىغانلىقىمىزنى مۇھاكىمە قىلىمىز.
b بەزى ئىسىملار ئۆزگەرتىلگەن.
