1-تەتقىق ماقالىسى
«يەھۋانى ئىزدىگەنلەرنىڭ ھېچبىر ياخشى نەرسىسى كەم بولماس»
2022-يىللىق ئايىتىمىز: «يەھۋانى ئىزدىگەنلەرنىڭ ھېچبىر ياخشى نەرسىسى كەم بولماس». —زەبۇر 34:10.
22-ناخشا يەھۋا — مېنىڭ پادىچىمدۇر
بۇ ماقالىدە a
داۋۇت قىيىنچىلىقلارغا دۇچ كەلگەن چاغلاردىمۇ، ئۇنىڭ ھېچ بىر نەرسىسى كەم بولمىغان (1–3-ئابزاسلارغا قاراڭ) b
1. داۋۇت قانداق ئېغىر ئەھۋالغا چۈشۈپ قالغان؟
داۋۇت ھاياتىنى ساقلاپ قېلىش ئۈچۈن قېچىپ يۈرەتتى. سەۋەبى، ئىسرائىلنىڭ كۈچلۈك پادىشاھى سائۇل ئۇنى ئۆلتۈرۈشنى قارار قىلغان ئىدى. داۋۇت يېمەك-ئىچمەككە ئېھتىياجلىق بولغاندا، نوب شەھىرىدە توختاپ، ئۇ يەردە بەش نان بېرىشنى سورىغان (1-سام. 21:1، 3). كېيىن، ئۇ ۋە ئۇنىڭغا ئەگەشكەن كىشىلەر بىر ئۆڭكۈردە پاناھلانغان (1-سام. 22:1). قانداقلارچە داۋۇت بۇنداق ئەھۋالغا چۈشۈپ قالغان؟
2. سائۇل ئۆز-ئۆزىنى قانداق خەتەرلىك ۋەزىيەتكە دۇچار قىلغان؟ (1-سامۇئىل 23:16، 17)
2 سائۇل داۋۇتقا ھەسەت قىلغان، چۈنكى نۇرغۇن كىشىلەر داۋۇتنى جەڭلەردە غەلبىلەرنى قولغا كەلتۈرگىنى ئۈچۈن ماختاپ، ئۇنى ياخشى كۆرگەن. سائۇل يەنە ئۆزىنىڭ يەھۋاغا ئىتائەتسىزلىك قىلغانلىقى سەۋەبلىك، يەھۋانىڭ ئۇنى رەت قىلىپ، داۋۇتنى تەختتە ئولتۇرۇشقا تاللىغانلىقىنىمۇ بىلەتتى (1-سامۇئىل 23:16، 17-نى ئوقۇڭ). شۇ چاغدا، سائۇل يەنىلا ئىسرائىلنىڭ پادىشاھى بولۇپ، ئۇنىڭ چوڭ قوشۇنى ۋە ئۇنى قوللايدىغان نۇرغۇن ئادەملىرى بار ئىدى. شۇڭا، داۋۇت ئۆز جېنىنى ساقلاپ قېلىش ئۈچۈن قېچىپ كەتكەن. سائۇل ھەقىقەتەن خۇدا تاللىغان داۋۇتنى پادىشاھ بولۇشتىن توسۇپ قالالايمەن،— دەپ ئويلىغانمۇ؟ (يەشايا 55:11). مۇقەددەس كىتابتا، بۇ ھەققىدە بىر نەرسە يېزىلمىغان. ئەمما، بىز بىر ئىشنى جەزىملەشتۈرەلەيمىزكى: سائۇل ئۆز-ئۆزىنى خەتەرلىك بىر ۋەزىيەتكە دۇچار قىلغان. خۇداغا قارشى چىققان كىشى چوقۇم مەغلۇپ بولماي قالمايدۇ!
3. داۋۇت قىيىن ۋەزىيەتتە ئۆزىنى قانداق ھېس قىلغان؟
3 داۋۇت كەمتەر بىر ئادەم بولغان. ئۇ ئىسرائىللارغا پادىشاھ بولۇشنى ئۆزى تاللىمىغان، بەلكى بۇ ۋەزىپىنى يەھۋا ئۆزى ئۇنىڭغا تاپشۇرغان (1-سام. 16:1، 12، 13). سائۇل داۋۇتنى ئۆزىنىڭ ئەشەددىي دۈشمىنى قاتارىدا كۆرگەن. ئەمما، داۋۇت شۇنداق خەتەرلىك ۋەزىيەتكە چۈشۈپ قالغىنى ئۈچۈن يەھۋانى ئەيىبلىمىگەن. ئۇ يەنە يەيدىغانغا يېتەرلىك تامىقى بولماي قالغىنى ۋە ئۆڭكۈردە پاناھلىنىپ قونغىنى ئۈچۈن ئاغرىنمىغان. ئەكسىچە، ئۇ ئۆڭكۈردە يوشۇرۇنۇپ يۈرگەن چاغلاردا، نۇرغۇنلىغان گۈزەل مەدھىيە ناخشىلىرىنى يازغان. شۇ ناخىشلارنىڭ ئارىسىدا، بۇ ماقالىنىڭ ئاساسىي ئايىتى: «يەھۋانى ئىزدىگەنلەرنىڭ ھېچبىر ياخشى نەرسىسى كەم بولماس»،— دېگەن سۆز-جۈمىلىمۇ بولغان.—زەبۇر 34:10؛ [ي.د].
4. قايسى سوئاللارنى مۇھاكىمە قىلىمىز ۋە شۇلارنىڭ جاۋابىنى بىلىش نېمە ئۈچۈن مۇھىم؟
4 بۈگۈنكى كۈندە يەھۋانىڭ كۆپلىگەن خىزمەتچىلىرى يېمەك-ئىچمەك ۋە تۇرمۇش لازىمەتلىكلىرى كەم بولۇشتەك قىيىنچىلىقنى باشتىن ئۆتكۈزىۋاتىدۇ. بولۇپمۇ، يېقىنقى تارقىلىشچان ۋىرۇس مەزگىلىدە تېخىمۇ شۇنداق بولدى. چوڭ بالايىئاپەتنىڭ يېقىنلاپ كېلىشىگە ئەگىشىپ، تېخىمۇ قىيىن كۈنلەرگە دۇچ كېلىدىغانلىقىمىزنى بىلىمىز (مەتتا 24:21). شۇنى ئەستە تۇتقان ھالدا، تۆۋەندىكى تۆت سوئالغا جاۋاب تاپىمىز: قايسى جەھەتتىن داۋۇتنىڭ ياخشى نەرسىسى كەم بولمىغان؟ نېمە ئۈچۈن قانائەتچان بولۇشنى ئۆگىنىشىمىز كېرەك؟ يەھۋانىڭ بىزگە غەمخورلۇق قىلىدىغانلىقىغا نېمە ئۈچۈن ئىشىنەلەيمىز؟ كەلگۈسىگە قانداق تەييار بولالايمىز؟
مېنىڭ ھېچنەرسەم كەم ئەمەس
5، 6. داۋۇت خۇدانىڭ خىزمەتچىلىرىنىڭ «ھېچبىر ياخشى نەرسىسى كەم بولماس»،— دېگەندە، نېمە كۆزدە تۇتقانلىقىنى چۈشىنىشىمىزگە، زەبۇر 23:1–6-ئايەتلەر قانداق ياردەم بېرىدۇ؟
5 داۋۇت يەھۋانىڭ خىزمەتچىلىرىنىڭ «ھېچبىر ياخشى نەرسىسى كەم بولماس»، دېگەن سۆزلەرنى قىلغاندا، ئۇ نېمىنى كۆزدە تۇتقان؟ بۇ سۇئالغا جاۋاب تېپىشقا، زەبۇر 23-بابتىكى سۆزلەرنى مۇھاكىمە قىلىش ياردەم بېرىدۇ (زەبۇر 23:1–6-نى ئوقۇڭ). داۋۇت بۇ زەبۇرنى مونۇ سۆزلەر بىلەن باشلىغان: «يەھۋا پادىچىمدۇر، ھېچ نەرسىگە مۇھتاجىم يوقتۇر». بۇ زەبۇرنىڭ كېيىنكى ئايەتلىرىدە، يەھۋانى ئۆزىنىڭ پادىچىسى سۈپىتىدە قوبۇل قىلغانلارنىڭ مول بەرىكەتلەردىن ھۇزۇر ئالىدىغانلىقى تىلغا ئېلىنغان. يەھۋا ئۇنى «ھەققانىيەت يولىدا» مېڭىشقا باشلايدۇ. ئۇ ياخشى-يامان پەيتلەردە داۋۇتنى ساداقەتمەنلىك بىلەن قوللاپ-قۇۋۋەتلەيدۇ. يەھۋانىڭ ياپ-يېشىل يايلاقلىرىدا ياشىغاندا، داۋۇت ئۆزىنىڭ قىيىنچىلىقلارغا دۇچ كېلىدىغانلىقىنى چۈشەنگەن. بەزىدە، ئۇ ئۆزىنى «ئۆلۈم سايە تاشلاپ تۇرغان جىلغىلاردىن» ئۆتكەندەك ئۈمىدسىز ھېس قىلغان ۋە ئۇنىڭ كۆپ دۈشمەنلىرى بولغان. بىراق، يەھۋا ئۇنىڭ پادىچىسى بولغاچ، داۋۇت ھېچقانداق «خەتەرلەردىن» قورقمىغان.
6 دېمەك، بىرىنچى سوئالىمىزغا جاۋاب تاپتۇق: داۋۇتنىڭ قايسى جەھەتتىن ياخشى نەرسىسى كەم بولمىغان؟ روھىي جەھەتتىن ئېيتقاندا، يەھۋا بىلەن يېقىن مۇناسىۋەتنى ساقلىشى ئۈچۈن، داۋۇتنىڭ زۆرۈر بولغان ھەممە نەرسىلىرى بار ئىدى. ئۇنىڭ خۇشاللىق تېپىشى ماددىي نەرسىلىرىنىڭ كۆپ بولۇشىغا باغلىق بولمىغان. يەھۋا تەمىنلەپ بەرگەن نەرسىلەرگە داۋۇت قانائەت قىلغان. ئۇنىڭ ئۈچۈن ئەڭ مۇھىمى: يەھۋانىڭ بەرىكىتى ۋە ھىمايىسى بولغان.
7. لۇقا 21:20–24-ئايەتلەرگە ئاساسلانغاندا، بىرىنچى ئەسىردە يەھۇدىيىدە ياشىغان مەسىھ ئەگەشكۈچىلىرى قانداق ۋەزىيەتكە دۇچ كەلگەن؟
7 داۋۇتنىڭ سۆزلىرى بىزنىڭ ماددىي نەرسىلەرگە مۇۋاپىق كۆزقاراشتا بولۇشنىڭ مۇھىملىقىنى كۆرۈپ يېتىشىمىزگە ياردەم بېرىدۇ. ئۆزۈمىزدە بار بولغان ماددىي نەرسىلەرنىڭ ھۇزۇر-ھالاۋىتىنى كۆرسەك، بۇ خاتا ئەمەس. ئەمما، ئۇلارنى ھاياتىمىزدا ئەڭ مۇھىم ئورۇنغا قويماسلىقىمىز كېرەك. بىرىنچى ئەسىردە، يەھۇدىيىدە ياشايدىغان مەسىھ ئەگەشكۈچىلىرى بۇ مۇھىم ھەقىقەتنى چۈشەنگەن (لۇقا 21:20–24-نى ئوقۇڭ). ئەيسا، يېرۇسالىم شەھىرىنىڭ دۈشمەن قوشۇنلىرى تەرىپىدىن قورشاۋغا ئېلىنغانلىقىنى كۆرگىنىڭلاردا، تاغلارغا قېچىڭلار،— دەپ نەسىھەت بەرگەن. شۇنداق ئىش يۈز بەرگەندە، ئۇلار شەھەردىن قېچىپ كەتسە، ھاياتى ئامان قالاتتى. ئەمما، ئۇلار كۆپ نەرسىلىرىنى تاشلاپ كېتىشكە توغرا كېلەتتى. بىر نەچچە يىل ئىلگىرى، «كۈزىتىش مۇنارى» ژۇرنىلىدا مۇنداق يېزىلغان: «ئۇلار ئېتىزلىرى، ئۆيلىرى، ھەتتا توپلىغان مال-دۇنيالىرىنى تاشلاپ كەتكەن. ئۇلار يەھۋانىڭ قوغدايدىغانلىقىغا ۋە ئېھتىياجلىرىنى تەمىنلەپ بېرىدىغانلىقىغا ئىشەنگەن. شۇڭا، ئۇلار يەھۋاغا ئىبادەت قىلىشنى بىرىنچى ئورۇنغا قويۇپ، ھەممە نەرسىدىن مۇھىم كۆرگەن».
8. بىرىنچى ئەسىردىكى يەھۇدىيىدىكى مەسىھ ئەگەشكۈچىلىرىنىڭ مىسالىدىن قانداق مۇھىم ساۋاققا ئېرىشەلەيمىز؟
8 يەھۇدىيىدە ياشايدىغان بىرىنچى ئەسىردىكى مەسىھ ئەگەشكۈچىلىرىدىن قانداق ساۋاق ئالالايمىز؟ يۇقىرىدا تىلغا ئالغان «كۈزىتىش مۇنارى» شۇنداق دەيدۇ: «ماددىي نەرسىلەرگە قانداق كۆزقاراشتا بولۇش، بىز ئۈچۈن سىناق بولۇشى مۇمكىن؛ شۇڭا، ئۆز-ئۆزىمىزنى تەكشۈرۈپ، «مەن ئۈچۈن ماددىي نەرسىلەر ئەڭ مۇھىممۇ ياكى خۇدادىن كېلىدىغان قۇتقۇزۇلۇشمۇ؟»،— دەپ سوراپ كۆرسەك بولىدۇ. مۇشۇ زاماننىڭ ئاخىرى يېقىنلاشقانسېرى، قىيىنچىلىقلارغا ۋە قۇربانلىقلارنى بېرىشىمىزگە توغرا كېلىشى مۇمكىن، بىزمۇ يەھۇدىيىدىن قېچىپ كەتكەن مەسىھ ئەگەشكۈچىلىرىگە ئوخشاش ھەرقانداق قۇربانلىقلارنى بېرىشكە تەييار تۇرۇشىمىز كېرەك».
9. ئەلچى پاۋلۇسنىڭ ئىبرانىيلارغا بەرگەن نەسىھەت-سۆزلىرى، بىزنى نېمە قىلىشقا ئىلھاملاندۇرىدۇ؟
9 ئاشۇ مەسىھ ئەگەشكۈچىلىرى ھەممە نەرسىلىرىنى تاشلاپ، ئۆز تۇرمۇشىنى قايتىدىن باشلىشىنىڭ قانچىلىك قىيىن بولغانلىقىنى تەسەۋۋۇر قىلالامسىز؟ ئۇلار تۇرمۇشقا كېرەكلىك ماددىي ئېھتىياجلىرىنى، يەھۋانىڭ تەمىنلەپ بېرىدىغانلىقىغا ئىشىنىشى كېرەك ئىدى. ئەمما، ئۇلار ياردەمسىز قالمىغان. رىملىقلار يېرۇسالىمنى قورشىۋېلىشتىن بەش يىل بۇرۇن، ئەلچى پاۋلۇس ئىبرانىيلارغا بەزى قىممەتلىك نەسىھەتلەرنى بەرگەن: «پۇلپەرەسلىكتىن خالىي ياشاڭلار. بارىغا شۈكۈر-قانائەت قىلىڭلار. چۈنكى، خۇدا ئۆزى شۇنداق دەيدۇ: «سەندىن ئاسلا ئايرىلمەيمەن، سېنى ئەسلا تاشلىمايمەن». شۇنىڭ ئۈچۈن، بىز جاسارەت بىلەن شۇنداق ئېيتالايمىز: «يەھۋا مېنىيڭ ياردەمچىمدۇر، مەن قورقماسمەن. ئىنسان ماڭا نېمە قىلالىسۇن؟» (ئىبرانىي. 13:5، 6). شەك-شۈبھىسىزكى، پاۋلۇسنىڭ نەسىھەت-سۆزلىرىگە قۇلاق سالغانلار ئاددىي-ساددا ياشاشقا ئاسانلا ئادەتلەنگەن. ئۇلار تۇرمۇشتىكى ماددىي ئېھتىياجلىرىنى، يەھۋانىڭ تەمىنلەپ بېرىدىغانلىقىغا ئىشەنگەن. پاۋلۇسنىڭ بۇ سۆزلىرى، ئېھتىياجلىرىمىزنى يەھۋانىڭ تەمىنلەپ بېرىدىغانلىقىغا بولغان ئىشەنچىمىزنى كۈچەيتەلەيدۇ.
بارىغا قانائەت قىلىمىز
10. پاۋلۇس ئۆزىنىڭ قانداق سىرىنى بىزگە ئېيتىپ بەرگەن؟
10 پاۋلۇسنىڭ تىموتىيغا بەرگەن نەسىھىتى بۈگۈنكى كۈندە بىز ئۈچۈنمۇ پايدىلىق. ئۇ مۇنداق دەپ يازغانىدى: «شۇڭا، يېمەك-ئىچمەك، كىيىم-كېچەك ۋە باش تىققىدەك يېرىمىز بولسا، شۇلار بىلەن قانائەت قىلايلى» (1-تىموت. 6:8). بۇ بىزنىڭ ياخشى تاماقلاردىن، چىرايلىق ئۆيدىن ھۇزۇر-ھالاۋەت كۆرۈشىمىزگە ۋە بەزىدە يېڭى كىيىم-كېچەكلەرنى سېتىۋېلىشقا بولمايدۇ،— دېگەننى بىلدۈرەمدۇ؟ پاۋلۇس ئەسلى شۇنداق دېمەكچى ئەمەس ئىدى. پاۋلۇس ئۆزىنىڭ سىرى ھەققىدە ئېيتىپ، بىز ئۆزۈمىزدە بار ماددىي نەرسىلەرگە قانائەت قىلىشىمىز كېرەك،— دېگەن (فىلىپى. 4:12). ئەڭ قىممەتلىك بايلىقىمىز — ماددىي نەرسىلىرىمىز ئەمەس، بەلكى يەھۋا بىلەن بولغان دوستلۇق مۇناسىۋىتىمىز.—ھاباق. 3:17، 18.
ئىسرائىللار 40 يىل چۆلدە يۈرگەندە، ھېچبىر نەرسىسى كەم بولمىغان. ھازىر بىز ئۆزۈمىزدە بار نەرسىلەرگە قانائەت قىلالايمىزمۇ؟ (11-ئابزاسقا قاراڭ) c
11. مۇسانىڭ ئىسرائىللارغا قىلغان سۆزىدىن قانائەتچان بولۇش توغرىسىدا نېمىنى ئۆگىنەلەيمىز؟
11 ئۆزىمىزنىڭ ماددىي ئېھتىياجلىرىغا بولغان كۆزقارىشى بىلەن يەھۋانىڭ كۆزقارىشى ئارىسىدا پەرق بولۇشى مۇمكىن. ئىسرائىللار 40 يىل چۆلدە يۈرگەندىن كېيىن، مۇسانىڭ ئۇلارغا نېمە دېگەنلىكى ھەققىدە ئويلىنىپ كۆرەيلى: «تەڭرىلار يەھۋا قىلغان بارچە ئىشلىرىڭلارغا بەرىكەت بەردى. سەن بۇ چوڭ چۆل-باياۋاندا يۈرگىنىڭىزدە، ئۇ سىلەرنى كۈزۈتۈپ تۇردى. 40 يىلدىن بويان يەھۋا خۇدايىڭلار سىلەر بىلەن بولدى، ھېچ نەرسەڭلار كەم بولمىدى» (تەكرار. قا 2:7). 40 يىل جەريانىدا، يەھۋا ئىسرائىللارغا ماننانى تەمىنلەپ بەرگەن. ئۇلارنىڭ مىسىردىن چىققاندا كىيگەن كىيىم-كېچەكلىرى يىرتىلىپ كەتمەسلىكىگە، يەھۋا كاپالەتلىك قىلغان (تەكرار. قا 8:3، 4). گەرچە بەزىلەر يەھۋانىڭ تەمىنلەپ بەرگەنلىرىنى يېتەرلىك ئەمەس،— دەپ ئويلىغان بولسىمۇ، مۇسا ئىسرائىللارنى ئەسكەرتىپ، ئۇلاردا ئېھتىياجلىق ھەممە نەرسىلىرى بارلىقىنى، ئۇلارنىڭ ئېسىگە سالغان. ئەگەر بارىغا رازى بولۇشنى ئۆگەنسەك، ھەتتا يەھۋا تەمىنلىگەن ئاددىي نەرسىلەرنىمۇ قەدىرلەيمىز ۋە ئۇلارنى خۇدادىن كەلگەن بەرىكەت دەپ قاراپ، مىننەتدار بولساق، يەھۋا خۇشال بولىدۇ.
يەھۋانىڭ سىزگە غەمخورلۇق قىلىدىغانلىقىغا ئىشىنىڭ
12. داۋۇت ئۆزىگە ئەمەس، يەھۋاغا تايانغانلىقىنى قانداق كۆرسەتكەن؟
12 داۋۇت يەھۋانىڭ سادىق ئىكەنلىكىنى ۋە ئۇنى سۆيگەن كىشىلەرگە چوڭقۇر كۆڭۈل بۆلىدىغانلىقىنى بىلگەن. داۋۇت 34-زەبۇرنى يازغاندا، ھاياتى خەۋپ-خەتەر ئاستىدا بولسىمۇ، خۇدانىڭ پەرىشتىسىنىڭ ئۆزىنى قوغداۋاتقانلىقىنى ئىمان كۆزى بىلەن كۆرگەن (زەبۇر 34:7). بەلكىم، داۋۇت يەھۋانىڭ پەرىشتىسىنى دۈشمەنلەرنىڭ كېلىشىنى كۈزىتىپ، دالادا چېدىر تىككەن بىر جەڭچىگە ئوخشاتقان. داۋۇت باتۇر بىر جەڭچى بولغان ۋە يەھۋا ئۇنى پادىشاھ قىلىدىغانلىقىنى ۋەدە قىلغان. شۇنداقتىمۇ، داۋۇت دۈشمەننى مەغلۇپ قىلىشتا، ئۆزىنىڭ تاش ئاتىدىغان قابىلىيىتى ياكى قىلىچىغا تايانمىغان (1-سام. 16:13؛ 24:12). داۋۇت يەھۋاغا تايىنىپ، ئىخلاسمەنلەرنى قوغدايدىغان پەرىشتىسىگە ئىشەنچ قىلغان. ئەلۋەتتە، بىز بۈگۈن مۆجىزىلىك يول بىلەن ھىمايە قىلىنىشنى ئۈمىد قىلمايمىز. ئەمما شۇنى بىلىمىزكى، يەھۋاغا ئىشەنچ باغلىغانلار، ھەتتا ئۆلۈپ كەتسىمۇ، مەڭگۈلۈك ھاياتقا ئېرىشىدۇ.
چوڭ بالايىئاپەت مەزگىلىدە، ماگوگدىن بولغان گوگنىڭ قوشۇنلىرى ئۆيلىرىمىزدە بىزگە ھۇجۇم قىلىشى مۇمكىن. بىراق، شۇنىڭغا ئىشىنىمىزكى، ئەيسا ۋە ئۇنىڭ پەرىشتىلىرى ئۇلارنىڭ نېمە قىلىۋاتقانلىقىنى كۆرىدۇ ۋە بىزنى قوغدايدۇ (13-ئابزاسىغا قاراڭ)
13. ماگوگدىن بولغان گوگ ھۇجۇم قىلغاندا، نېمە ئۈچۈن بىز ئاجىزدەك كۆرۈنىمىز؟ ئۇنداقتا، نېمە ئۈچۈن قورقماسلىقىمىز كېرەك؟ (مۇقاۋىدىكى رەسىمگە قاراڭ).
13 بىزنى قوغداشقا يەھۋانىڭ قادىر ئىكەنلىكىگە بولغان ئىشەنچىمىز يېقىن كەلگۈسىدە سىناققا دۇچ كېلىدۇ. ماگوگدىن بولغان گوگ، يەنى دۆلەتلەر ئىتتىپاقى خۇدا خەلقىگە ھۇجۇم قىلغاندا، ھاياتىمىز خەتەر ئىچىدە قالغاندەك ئويلىشىمىز مۇمكىن. ئەمما، يەھۋانىڭ بىزنى قوغدىيالايدىغانلىقىغا ۋە چوقۇم قۇتقۇزىدىغانلىقىغا ئىشىنىشىمىز كېرەك. دۆلەتلەرگە نىسبەتەن، قارىماققا بىز ھېچقانداق ھىمايە قىلغۇچىسى يوق قويلارغا ئوخشاش كۆرۈنىمىز (ھەزەكەرىيا 38:10—12). قوللىرىمىزدا قورال-ياراقلىرىمىز يوق ۋە جەڭ قىلىشنىمۇ ئۆگەنمەيمىز. شۇڭا، دۆلەتلەر ئاسانلا بىزگە ھۇجۇم قىلالايمىز دەپ قارايدۇ. بىز ئىمان كۆزلىرىمىز بىلەن كۆرگەنلەرنى، ئۇلار كۆرەلمەيدۇ. بىز پەرىشتىلەرنىڭ خۇدا خەلقىنىڭ ئەتراپىغا چېدىر تىكىپ، ئۇلارنى قوغداشقا تەييار بولغانلىقىنى كۆرۈمىز. ئەمما، دۆلەتلەر روھىي جەھەتتىن قارغۇ بولغاچ، ئۇلار بىز كۆرگەنلەرنى كۆرەلمەيدۇ. ئاسماندىكى قوشۇنلار بىز ئۈچۈن جەڭ قىلغاندا، ئۇلار بەكمۇ ھەيران قالىدۇ!—ۋەھىي. 19:11، 14، 15.
كەلگۈسى ئۈچۈن تەييارلىق قىلىڭ
14. كەلگۈسىگە تەييارلىق قىلىش ئۈچۈن ئەڭ ئاۋۋال نېمە قىلىشىمىز كېرەك؟
14 كەلگۈسىگە تەييارلىنىش ئۈچۈن ھازىر نېمە قىلالايمىز؟ ئەڭ ئاۋۋال، بىز ماددىي نەرسىلەرگە توغرا قاراشتا بولۇشىمىز ۋە بىر كۈنى ئۆزۈمىزدە بار بولغان بارلىق نەرسىلەرنى تاشلاپ كېتىشىمىز كېرەكلىكىنى تونۇپ يېتىشىمىز كېرەك. بىز يەنە قانائەتچان بولۇشىمىز ۋە يەھۋا بىلەن بولغان مۇناسىۋىتىمىزدىن ئەڭ زور خۇشاللىق تېپىشىمىز كېرەك. ياراتقۇچىمىزنى قانچە ياخشىراق تونۇغانسېرى، ماگوگدىن بولغان گوگ ھۇجۇم قىلغاندا، ياراتقۇچىمىزنىڭ بىزنى قوغداشقا قادىر ئىكەنلىكىگە بولغان ئىشەنچىمىز شۇنچە قەتئىي بولىدۇ.
15. ئىلگىرىكى قايسى تەجرىبىلىرى، داۋۇتقا يەھۋانىڭ ئۇنى ھەرگىز ئۈمىدسىزلەندۈرمەيدىغانلىقىنى ئۆگەتكەن؟
15 داۋۇتقا يەنە نېمىلەرنىڭ ياردەم قىلغانلىقى ۋە ئۇنىڭ مىسالى، بىزگە سىناقلارغا تەييارلىق قىلىشىمىزغا قانداق ياردەم بېرەلەيدىغانلىقىنى مۇلاھىزە قىلىپ باقايلى. داۋۇت: «يەھۋانىڭ ياخشىلىقىنى تېتىغىن ۋە كۆرگىن. ئۇنىڭدا پاناھ تاپقان كىشى بەختلىكتۇر» (زەبۇر 34:8). بۇ سۆزلەر داۋۇتنىڭ يەھۋانىڭ قوللاپ-قۇۋۋەتلىشىگە نېمە ئۈچۈن تايىنىدىغانلىقىنى بىلگەنلىكىنى چۈشەندۈرۈپ بېرىدۇ. داۋۇت دائىم يەھۋاغا تايانغانىدى. ئۇمۇ داۋۇتنى ھەرگىز ئۈمىدسىزلەندۈرمىگەن. ياش ۋاقتىدا داۋۇت فىلىستىيىلىك غايەت يوغان جەڭچى غولىياتقا قارشى جەڭگە چۈشكەندە، شۇنداق دېگەن: «مانا بۈگۈن پەرۋەردىگار سېنى مېنىڭ قولۇمغا تاپشۇرىدۇ» (1-سام. 17:46). داۋۇت كېيىن پادىشاھ سائۇلغا خىزمەت قىلىۋاتقاندا، سائۇل بىرقانچە قېتىم ئۇنى ئۆلتۈرمەكچى بولغان. لېكىن، يەھۋا داۋۇتقا يار بولۇپ، ھەمىشە ئۇنىڭ بىلەن بولغان (1-سام. 18:12). داۋۇت ئىلگىرى يەھۋانىڭ ياردىمىنى باشتىن كەچۈرگەچكە، ئۇ ئۆزىنىڭ ھازىرقى سىناقلىرىدىمۇ، ئۇنىڭغا تايىنىشى كېرەكلىكىنى بىلگەن.
16. قانداق ئەمەلىي يوللار بىلەن يەھۋانىڭ ياخشىلىقىنى تېتىپ كۆرەلەيمىز؟
16 بىز ھازىر يەھۋانىڭ يولباشچىلىقىغا كۆپرەك تايىنىشنى ئۆگەنسەك، ئۇنىڭ كەلگۈسىدە بىزنى قۇتقۇزالايدىغانلىقىغا تېخىمۇ ئىشىنىمىز. يەھۋاغا تايىنىپ، خوجايىنىمىزدىن دەم ئېلىشنى سوراش ئىمان ۋە ئىرادە تەلەپ قىلىدۇ. شۇنداق قىلساق، چوڭ يىغىلىشلارغا قاتىنشالايمىز ياكى خىزمەت قىلىش كۈنلىرىمىزنى مۇۋاپىق تەڭشەشنى سورىساق، بارلىق جامائەت يىغىلىشلىرىمىزغا قاتنىشالايمىز ھەمدە ۋەز خىزمەتكە تېخىمۇ كۆپ ۋاقىت سەرپ قىلالايمىز. خوجايىن تەلىپىمىزنى رەت قىلىپ، خىزمىتىمىزدىن ئايەرە.ىلىپ قالدۇق دەپ پەرەز قىلايلى. يەھۋانىڭ بىزدىن ھەرگىز ئايەرە.ىلمايدىغانلىقى، بىزنى تاشلىمايدىغانلىقى ۋە زۆرۈر بولغان ماددىي ئېھتىياجلىرىمىزنى ھەمىشە تەمىنلەپ بېرىدىغانلىقىغا ئىشىنىمىزمۇ؟ (ئىبرانىي. 13:5) يەھۋا، ئۇ ساداقەتمەن خۇدادۇر. پۈتۈن كۈن تولۇق ۋاقىت خىزمەت قىلىۋاتقان نۇرغۇنلىغان قېرىنداشلار ياردەمگە ئەڭ ئېھتىياجلىق بولغاندا، يەھۋانىڭ ئۇلارغا قانداق ياردەم بەرگەنلىكى ھەققىدە باشتىن ئۆتكۈزگەن كەچۈرمىشلەرنى سۆزلەپ بېرەلەيدۇ.
17. 2022-يىللىق ئايەت قايسى؟ نېمە ئۈچۈن بۇ ئايەت مۇۋاپىق تاللانغان؟
17 يەھۋا بىز بىلەن بىللە، شۇڭا ئالدىمىزدا كېلىدىغان كۈنلەردىن قورقۇشىمىزنىڭ ھاجىتى يوق. ھاياتىمىزدا ئۇنىڭ پادىشاھلىقىنى بىرىنچى ئورۇنغا قويساقلا، ياراتقۇچىمىز يەھۋا بىزنى ھەرگىز تاشلىمايدۇ. ئالدىمىزدىكى قىيىن كۈنلەرگە ھازىر تەييار بولۇش ۋە يەھۋانىڭ بىزنى ھەرگىزمۇ تاشلىۋەتمەيدىغانلىقىغا بولغان ئىشەنچىمىزنى كۈچەيتىش ئۈچۈن، يېتەكچى كېڭەش 2022-يىللىق ئايەتكە زەبۇر 34:10-ئايەتنى تاللىدى: «يەھۋانى ئىزدىگەنلەرنىڭ ھېچبىر ياخشى نەرسىسى كەم بولماس».
23-ناخشا يەھۋا بىزنىڭ كۈچىمىز
a 2022-يىلى ئۈچۈن زەبۇر 34:10-ئايەتتىن ئېلىنغان مۇنۇ سۆزلەر يىللىق ئايەت سۈپىتىدە تاللاندى: «يەھۋانى ئىزدىگەنلەرنىڭ ھېچبىر ياخشى نەرسىسى كەم بولماس». كۆپلىگەن سادىق خىزمەتكارلىرى ماددىي جەھەتتىن باي ئەمەس. ئۇنداقتا، نېمە ئۈچۈن ئۇلارنىڭ «ياخشى نەرسىسى كەم ئەمەس»،— دەيمىز؟ بۇ ئايەتنىڭ مەنىسىنى چۈشىنىش قانداق قىلىپ كەلگۈسىدىكى قىيىن كۈنلەرگە تەييار بولۇشىمىزغا ياردەم بېرەلەيدۇ؟
b سۈرەتتە: داۋۇت ھەتتا پادىشاھ سائۇلدىن قېچىپ، ئۆڭكۈردە يوشۇرۇنۇپ يۈرگەندە، يەھۋا تەمىنلەپ بەرگەن ماددىي نەرسىلەر ئۈچۈن مىننەتدارلىق بىلدۈرگەن.
c سۈرەتتە: ئىسرائىللار مىسىردىن چىقىپ كەتكەندىن كېيىن، پەرۋەردىگار ئۇلارغا ماننانى يېمەكلىك ئۈچۈن بەرگەن ۋە ئۇلارنىڭ كىيىم-كېچەكلىرى يىرتىلىپ كەتمىگەن.
