«جەننەتتە كۆرۈشىمىز!»
«بەرھەق، مەن بۈگۈن ساڭا ئېيتىمەنكى، سەن مېنىڭ بىلەن بىللە جەننەتتە بولىسەن».—لۇقا 23:43.
ناخشىلار: 19، 55
1، 2. ئادەملەر جەننەت توغرىسىدا نېمە ئويلايدۇ؟
ھەرقايسى دۆلەتتىن كەلگەن قېرىنداشلار كورېيىنىڭ سېئول شەھىرىگە چوڭ يىغىلىش ئۈچۈن جەم بولدى. چوڭ يىغىلىشنىڭ يەرلىك گۇۋاھچىلار مېھمانلارنى قورشاۋالدى. بۇ كىشىنى ھاياجانلاندۇرىدىغان بىر پەيت بولغانىدى. قېرىنداشلارنىڭ ھەممىسى بىر-بىرى بىلەن خوشلىشىپ: «جەننەتتە كۆرۈشىمىز!»— دېيىشتى. سىزنىڭچە، ئۇلار قانداق جەننەت توغرىسىدا ئېيتقان؟
2 بۈگۈنكى كۈندە ئادەملەرنىڭ جەننەت توغرىسىدا ھەر تۈرلۈك ئوي-پىكىرلىرى بار. بەزىلەر جەننەت پەقەت خام خىيال دەپ قارىسا، باشقىلار «خۇشاللىق قەيەردە بولسا، جەننەت شۇ يەردە» دەيدۇ. يەنە بەزىلەر چىرايلىق دەل-رەخلەر، گۈزەل باغ ۋە يۇۋاش ھايۋاناتلار بار يەرنى جەننەت دەپ ئاتايدۇ. قانداق ئويلايسىز، جەننەت دېگەن نېمە؟ سىز ئۇنى كۈتۈۋاتامسىز؟
3. مۇقەددەس كىتابتا جەننەت توغرۇلۇق بىرىنچى قېتىم قايسى ئايەتتە يېزىلغان؟
3 مۇقەددەس كىتابتا ئۆتمۈشتە بولغان ۋە كېلەچەكتە بولىدىغان جەننەت تىلغا ئېلىنغان. مۇقەددەس يازمىلاردا، جەننەت توغرۇلۇق بىرىنچى قېتىم يارىتىلىش 2:8-ئايەتتە يېزىلغان. ئىبرانىي يازمىلاردا جەننەت «ئېرەم»، دەپ ئاتىلىدۇ. «ئېرەم»، دېگەن سۆز «لەززەتلىنىش، راھەتلىنىش» دېگەننى بىلدۈرىدۇ ۋە ئېرەم بېغى ھەقىقەتەن راھەتلىنىپ ياشايدىغان جاي بولغان. بۇ گۈزەل باغدا مول ئوزۇق-تۈلۈكلەر بولغان ۋە ئادەملەر بىلەن ھايۋاناتلار ئىناق ياشىغان.—يارىتىلىش 1:29—31.
4. نېمە ئۈچۈن ئېرەم بېغىنى جەننەت دەپ ئېيتالايمىز؟
4 «باغ» دېگەن ئىبرانىيچە سۆز، گرېك تىلىغا پارەدېيسوس دەپ تەرجىمە قىلىنغان. بىر كىتابتا ئېيتىلغاندەك، گرېك تىلىدا سۆزلەيدىغان ئادەم پارەدېيسوس دېگەن سۆزنى ئاڭلىغاندا، ئېگىز دەل-دەخلەر ۋە ھەرخىل مېۋە-چىۋىلەرنى بېرىدىغان دەخلەرنى ۋە ئۇنى سوغۇرىدىغان ئەينەكتەك سۈزۈك دەريا ئېقىنلىرىنى ھەمدە شۇ سولار بويىدا ئوتلاپ يۈرگەن بۇغا، جەرەن ۋە قويلارغا تولغان گۇزەل باغ مەنزىرىسىنى تەسەۋۋۇر قىلالايتتى. («Cyclopaedia by M’Clintock and Strong»).—يارىتىلىش 2:15، 16 سېلىشتۇرۇڭ.
5، 6. ئادەم-ئاتا بىلەن ھاۋا-ئانا جەننەتتە ياشاش پۇرسىتىدىن نېمە ئۈچۈن ئايرىلغان؟ بەزىلىرى نېمە ھەققىدە ئويلىنىدۇ؟
5 يەھۋا خۇدا ئادەم-ئاتا بىلەن ھاۋا-ئانىنى ئاجايىپ باغ ياكى جەننەتكە ئورۇنلاشتۇرغان. ئەمما، ئۇلار يەھۋاغا ئىتائەت قىلمىغانلىقتىن، ئۆزلىرىمۇ، ئەۋلاتلىرىمۇ جەننەتتە ياشاش پۇرسىتىدىن ئايرىلىپ قالغان (يارىتىلىش 3:23، 24). ھەتتا شۇ جەننەتتە ھېچكىم ياشىمىسىمۇ، ئۇ توپان سۈيى كەلگىچە شۇ پېتى بويىچە تۇرغان بولۇشى مۇمكىن.
6 بەزىلەر بەلكىم «يەردە قايتىدىن جەننەت بولامدۇ؟»— دەپ ئويلايدۇ. دەلىل-ئىسپاتلار نېمىنى كۆرسىتىدۇ؟ جەننەتتە يېقىنلىرىڭىز بىلەن ياشاشنى ئۈمىد قىلسىڭىز، ئۈمىدىڭىزگە قانداق ئاساس بار؟ كېلەچەكتە جەننەت بولىدىغانلىقىغا نېمە ئۈچۈن ئىشىنىدىغانلىقىڭىزنى چۈشەندۈرۈپ بېرەلەمسىز؟
جەننەت يەردە بولىدۇ
7، 8. (1) خۇدا ئىبراھىمغا قانداق ۋەدە بەردى؟ (2) خۇدانىڭ ۋەدىسىنى ئاڭلىغاندا ئىبراھىم نېمىنى چۈشەنگەن؟
7 جەننەت توغرىسىدا قويۇلغان سوئاللارنىڭ جاۋابلىرىنى مۇقەددەس كىتابتىن تېپىشقا بولىدۇ. چۈنكى، مۇقەددەس كىتاب — ئەڭ دەسلەپتىكى جەننەتنى ياراتقان يەھۋا خۇدادىن كەلگەن كىتاب. يەھۋا ئۆز دوستى ئىبراھىمغا ئېيتقان سۆزلەرنى كۆرۈپ چىقايلى. خۇدا ئىبراھىمنىڭ ئەۋلاتلىرىنى دېڭىز بويىدىكى قۇمدەك كۆپ قىلىمەن، دەپ ۋەدە قىلغان. يەھۋا يەنە: «سېنىڭ نەسلىڭ ئارقىلىق يەر يۈزىدىكى بارچە مىللەتلەر بەرىكەتلىنىدۇ، چۈنكى سەن مېنىڭ سۆزلىرىمگە قۇلاق سالدىڭ»،— دېگەن (يارىتىلىش 22:17، 18). كېيىن، يەھۋا بۇ ۋەدىنى ئىبراھىمنىڭ ئوغلىغا ئاندىن نەۋرىسىگە قايتا-قايتا ئېيتقان.—يارىتىلىش 26:4؛ 28:14-نى ئوقۇڭ.
8 مۇقەددەس كىتابتا ئىبراھىمنىڭ ئىنسانلار ئاسماندىكى جەننەتتە ياشايدۇ، دەپ ئويلىغانلىقى يېزىلمىغان. شۇڭا، خۇدا «يەر يۈزىدىكى بارلىق مىللەتلەر» بەرىكەتكە ئېرىشىدىغانلىقىنى ۋەدە قىلغاندا، ئىبراھىم بۇ ۋەدە يەردە ئەمەلگە ئاشىدىغانلىقىنى چۈشەنگەن. بۇ جەننەتنىڭ يەردە بولىدىغانلىقىنىڭ مۇقەددەس كىتابتىكى يالغۇز ئىسپاتىمۇ؟
9، 10. كېلەچەكتە جەننەت بولىدىغانلىقىنى قانداق ۋەدىلەر ئىسپاتلايدۇ؟
9 ئىبراھىمنىڭ ئەۋلادىدىن بولغان داۋۇت كېلەچەك ھەققىدە مۇنداق يازغان: «رەزىللەر يوق بولار» (زەبۇر 37:1، 2، 10)، لېكىن «يەر يۈزىگە ۋارىسلىق قىلار كەمتەر كىشىلەر، تىنچ-خاتىرجەملىك ئىچىدە، خۇشال-خۇرام ھايات كەچۈرەر». داۋۇت يەنە مۇنداق دېگەن: «ھەققانىيلار يەر يۈزىگە ئىگە بولار، ئۇلار يەردە مەڭگۈ ياشار» (زەبۇر 37:11، 29؛ 2-سامۇئىل 23:2). ئويلاپ كۆرۈڭ، بۇ ۋەدىلەر خۇدانىڭ نىيىتىنى ئورۇنلىغۇسى كەلگەن ئادەملەرگە قانداق تەسىر قىلغان؟ ئۇلار كەلگۈسىدە يەردە پەقەت ھەققانىي ئادەملەر ياشايدۇ ۋە يەر يۈزى قايتىدىن ئېرەم بېغىغا ئوخشاش جەننەتكە ئايلىنىدۇ، دەپ ئۈمىد قىلغان.
ئەمەلگە ئاشقان پەيغەمبەرلىك سۆزلەر كېلەچەكتە يەردە جەننەت بولىدىغانلىقىنى ئىسپاتلايدۇ
10 ۋاقىتنىڭ ئۆتۈشىگە ئەگىشىپ، خۇداغا خىزمەت قىلىۋاتىمىز دېگەن ئىسرائىللار يەھۋا خۇدانى ۋە ھەق ئىبادەتنى رەت قىلغان. شۇنىڭ ئۈچۈن، يەھۋا بابىللىقلارنىڭ ئۆز خەلقىنى يېڭىۋېلىشىغا، زېمىننى ۋەيران قىلىشىغا ۋە نۇرغۇن ئىسرائىللارنى قۇللۇققا ئېلىپ كېتىشىگە يول قويغان (2-تارىخنامە 36:15—21؛ يەرەمىيا 4:22—27). لېكىن، خۇدانىڭ پەيغەمبەرلىرى ئىسرائىل خەلقى 70 يىلدىن كېيىن، قۇللۇقتىن قايتىپ كېلىدىغانلىقىنى ئېيتقان. بۇ پەيغەمبەرلىك سۆزلەر ئەمەلگە ئاشتى. بىراق، بۇ سۆزلەر بىز ئۈچۈنمۇ مۇھىم. كېلىڭلار، جەننەتنىڭ يەردە بولىدىغانلىقىنى ئىسپاتلايدىغان بىرنەچچە بېشارەتنى كۆرۈپ چىقايلى.
11. يەشايا 11:6—9-ئايەتلەردىكى سۆزلەر بىرىنچى قېتىم قاچان ئەمەلگە ئاشقان، ئەمما يەنە قانداق سوئال پەيدا بولۇشى مۇمكىن؟
11 يەشايا 11:6—9-نى ئوقۇڭ. خۇدا يەشايا پەيغەمبەر ئارقىلىق ئىسرائىللار ئۆز يۇرتىغا قايتىپ كەلگەندە، خاتىرجەم ياشايدىغانلىقىنى ئالدىن-ئالا ئېيتقان. ھېچكىم ياۋايى ھايۋانلاردىن ياكى ئادەملەردىن قورقمايتتى. ياشلارمۇ، ياشانغانلارمۇ ئۆزلىرىنى بىخەتەر ھېس قىلالايتتى. بۇ ئېرەم بېغىدا بولغان تىنچ-خاتىرجەملىكنى ئەسلەتمەمدۇ؟ (يەشايا 51:3). شۇنىڭ بىلەن، يەشايا پەقەت ئىسرائىل زېمىنى ئەمەس، پۈتۈن يەر يۈزى «يەھۋا ھەققىدىكى بىلىمگە تولدۇرۇلىدۇ»،— دەپ بېشارەت ئېيتقان. بۇ سۆزلەر قاچان ئورۇنلىنىدۇ؟ بۇنىڭ كەلگۈسىدە ئەمەلگە ئاشىدىغانلىقى ئېنىق.
12. (1) قۇللۇقتىن قايتىپ كەلگەن ئىسرائىللار قانداق بەرىكەتلەرگە ئېرىشتى؟ (2) يەشايا 35:5—10-ئايەتلەردىكى سۆزلەر كېلەچەكتە ئەمەلگە ئاشىدىغانلىقى نېمىدىن كۆرۈنىدۇ؟
12 يەشايا 35:5—10-نى ئوقۇڭ. يەشايا پەيغەمبەر ئىسرائىللار بابىلدىن قايتقاندا، ئادەملەر ياكى ياۋايى ھايۋاناتلار ئۇلارغا ھۇجۇم قىلمايدىغانلىقىنى يەنە بىر قېتىم ئېيتقان. سۇ مول بولغانلىقتىن، يەر مول ھوسۇل بەرگەن. ئۆز ۋاقتىدا ئېرەم بېغىدىمۇ دەل شۇنداق بولغان (يارىتىلىش 2:10—14؛ يەرەمىيا 31:12). بۇ پەيغەمبەرلىك سۆزلەر پەقەت شۇ چاغدا ئەمەلگە ئاشقانمۇ؟ يەشايانىڭ سۆزلىرىگە بويىچە، قارىغۇلار، ئاقساق-توكۇلار ۋە گاس-گاچىلار ساقىيىشى كېرەك ئىدى. لېكىن، بۇ سۆزلەر بابىلوندىن قايتىپ كەلگەن ئىسرائىللارنىڭ كۈنىدە ئەمەلگە ئاشمىغان. دېمەك، خۇدا ئاغرىقلارنى كېلەچەكتە ساقايتىدۇ.
13، 14. ئىسرائىللار بابىلدىن قايتقاندا، يەشايا 65:21—23-ئايەتلەردىكى سۆزلەر قانداق ئەمەلگە ئاشقان؟ بۇ سۆزلەر كېلەچەكتە قانداق ئورۇنلىنىدۇ؟ (ماقالىنىڭ بېشىدىكى رەسىمگە قاراڭ)
13 يەشايا 65:21—23-نى ئوقۇڭ. يەھۇدىيلار ئۆز يۇرتىغا قايتقاندا، راھەت ئۆيلىرى، تېرىيدىغان ئېتىزلىرى ۋە چىرايلىق ئۈزۈمزارلىقلىرى بولمىغان. لېكىن، خۇدا ئۇلارغا بەرىكەت تۆككەنلىكتىن، ۋاقىت ئۆتۈپ ئۇلارنىڭ ئەھۋالى ياخشىلانغانىدى. ئۇلار ئۆزلىرى سالغان ئۆيلەردە تۇرۇپ، ئۆزلىرى ئۆستۈرگەن مېۋىلەرنى يېگەندە، قانچىلىك خۇشال-خۇرام بولغانلىقىنى تەسەۋۋۇر قىلىپ كۆرۈڭە!
14 پەيغەمبەرلىك سۆزلىرىگە ئاساسەن، ئۆمرۈمىز «دەرەخنىڭ ئۆمرىدەك بولىدۇ». بەزى دەرەخلەر مىڭلىغان يىللار ياشايدۇ. شۇنداق ئۇزاق ياشاش ئۈچۈن ياخشى سالامەتلىك كېرەك. ئادەملەر يەشايا پەيغەمبەر ئېيتقاندەك خېيىم-خەتەرسىز ۋە چىرايلىق مۇھىتتا ياشىسا، بۇ ھەقىقىي جەننەت بولاتتى. بۇ پەيغەمبەرلىك سۆزلەر ھەرگىزمۇ خام خىيال ئەمەس، چوقۇم ئەمەلگە ئاشىدۇ!
ئەيسانىڭ جەننەت توغرىسىدا بەرگەن ۋەدىسى قانداق ئورۇنلىنىدۇ؟ (15، 16-ئابزاسلارغا قاراڭ)
15. يەشايا كىتابىدا، قانداق بەرىكەتلەرگە ئېرىشىدىغانلىقىمىز ئېيتىلغان؟
15 كەلتۈرۈلگەن ۋەدىلەر كېلەچەكتە جەننەت بولىدىغانلىقىنى قانداق ئىسپاتلايدىغانلىقىنى ئويلاپ بېقىڭ. پۈتكۈل يەر يۈزىدىكى ئادەملەر خۇدانىڭ بەرىكىتىگە ئېرىشىدۇ. ھېچكىم ياۋايى ھايۋاناتلاردىن ياكى رەزىل ئادەملەردىن قورقمايدۇ. قارىغۇ، ئاقساق-توكۇ ۋە گاس-گاچىلار ساقىيىپ كېتىدۇ. ئادەملەر ئۆزلىرى سالغان ئۆيلەردە تۇرۇپ، ئۆزلىرى ئۆستۈرگەن مېۋىلەرنى يەپ، ھالاۋىتىنى كۆرىدۇ. ئۇلار دەرەخلەردىنمۇ ئۇزاق ياشايدۇ. دەرھەقىقەت، مۇقەددەس كىتابتا يېقىن ئارىدا شۇنداق جەننەت بولىدىغانلىقى ھەققىدە ئىسپاتلار كۆپ. بىراق، بەزى ئادەملەر بۇ پەيغەمبەرلىك سۆزلەرنىڭ جەننەتنىڭ يەردە بولىدىغانلىقىنى بىلدۈرمەيدىغانلىقىنى ئېيتىشى مۇمكىن. ئۇلارغا نېمە ئېيتساق بولىدۇ؟ يەردىكى جەننەتنى تاقەتسىزلىك بىلەن كۈتۈشكە قانداق ئاساس بار؟ تارىختىكى ئەڭ ئۇلۇغ كىشى ئەيسا بىزگە تەۋرەنمەس ئاساس بەرگەن.
سەن جەننەتتە بولۇسەن!
16، 17. ئەيسا جەننەت توغرىسىدا قاچان ئېيتقان؟
16 ئەيسا ئەيىبسىز بولسىمۇ، سوتلىنىپ، تۈۋرۈك ياغاچقا مىخلانغان. ئىككى تەرىپىدە يەھۇدىي جىنايەتچىلەر مىخلانغان ئىدى. ئۇلارنىڭ بىرى ئەيسانىڭ پادىشاھ ئىكەنلىكىنى ئېتىراپ قىلىپ: «ئەي ئەيسا، پادىشاھ بولغىنىڭدا مېنى ئەسلىگەيسەن»،— دېگەنىدى (لۇقا 23:39—42). ئەيسا شۇ جىنايەتچىگە بەرگەن ۋەدە سىزنىڭ كېلەچىكىڭىز بىلەن باغلىنىشلىق. ئەيسانىڭ بۇ ۋەدىسى لۇقا 23:43-ئايەتتە كەلتۈرۈلگەن. بۇ ئايەتنى قانداق تەرجىمە قىلىش كېرەكلىكى ھەققىدە ھەر تۈرلۈك ئوي-پىكىرلەر بار. مۇقەددەس كىتابنىڭ «ھازىرقى زامان ئۇيغۇر تىلى تەرجىمىسىدە» بۇ ئايەت مۇنداق دەپ تەرجىمە قىلىنغان: «بىلىپ قويكى، بۈگۈن سەن مەن بىلەن بىللە جەننەتتە بولىسەن». ئەمما ئەيسا «بۈگۈن» دېگەن سۆزى بىلەن نېمە ئېيتماقچى بولغان؟
17 كۆپ زامانىۋىي تىللاردا جۈملىنىڭ مەنىسىنى توغرا يەتكۈزۈش ياكى ئېنىقلاش ئۈچۈن، پەشكە ئوخشاش تىنىش بەلگۈلىرى قوللىنىلىدۇ ياكى جۈملىنىڭ تۈزۈلۈشى ئۆزگەرتىلىدۇ. لېكىن، ئەڭ قەدىمقى گرېك قوليازمىلاردا تىنىش بەلگۈلىرى دائىم ئىشلىتىلمىگەن. شۇنىڭ ئۈچۈن، مۇنداق سوئاللار پەيدا بولۇشى مۇمكىن: «ئەيسا «بىلىپ قويكى، بۈگۈن سەن مەن بىلەن بىللە جەننەتتە بولۇسەن» دەپ ئېيتماقچى بولغانمۇ ياكى «ساڭا ھەقنى بۈگۈن ئېيتىمەنكى، سەن مېنىڭ بىلەن بىللە جەننەتتە بولۇسەن» دەپ ئېيتماقچى بولغانمۇ؟» تەرجىمانلار ئەيسانىڭ «بۈگۈن» دېگەن سۆزىنى قانداق چۈشەنسە، شۇنىڭغا ماس جۈملىنىڭ تۈزۈلىشنى ئۆزگەرتىدۇ ياكى تىنىش بەلگۈلىرىنى قويىدۇ. شۇنىڭ ئۈچۈن ھەر تۈرلۈك تەرجىمىلەر بىر-بىرىگە ئوخشىمايدۇ.
18، 19. ئەيسانىڭ نېمە دېمەكچى بولغانلىقىنى چۈشىنىشكە نېمە ياردەم بېرىدۇ؟
18 ئەيسا ئەگەشكۈچىلىرىگە ئۆزىنىڭ ئۆلۈمى ھەققىدە نېمە ئېيتقانلىقىنى ئېسىمىزگە ئالايلى. ئۇ: «ئىنسان ئوغلىمۇ ئۈچ كېچە-كۈندۈز يەرنىڭ باغرىدا بولىدۇ»،— دېگەن. ئۇ يەنە: «ئىنسان ئوغلىغا ساتقۇنلۇق قىلىپ، ئۇنى ئادەملەرنىڭ قولىغا تۇتۇپ بېرىدۇ ۋە ئۇلار ئۇنى ئۆلتۈرىدۇ ۋە ئۈچىنچى كۈنى تىرىلدۈرۈلىدۇ»،— دېگەن (مەتتا 12:40؛ 16:21؛ 17:22، 23؛ ماركۇس 10:34). ئەلچى پېترۇس بۇنىڭ يۈز بەرگەنلىكىنى تەستىقلىغان (ئەلچىلەر 10:39، 40). شۇنىڭ ئۈچۈن، ئەيسا بىلەن قېشىدىكى جىنايەتچى شۇ ئۆلگەن كۈنى جەننەتتە بولمىغان. مۇقەددەس كىتابتا ئەيسانىڭ «قەبرىدە» بولغانلىقى ۋە ئۈچىنچى كۈنى خۇدا ئۇنى تىرىلدۈرگەنلىكى يېزىلغان.—ئەلچىلەر 2:31، 32 a. (ئىزاھاتقا قاراڭ).
19 ئەيسا جىنايەتچىگە ۋەدە بەرگەندە، «ساڭا ھەقنى بۈگۈن ئېيتىمەنكى» دېگەن سۆزلەر بىلەن باشلىغانىدى. مۇسا پەيغەمبەرنىڭ كۈنلىرىدىمۇ سۆزنى شۇنداق باشلاش ئادەتتىكى ئەھۋال بولغان. مۇسا بىر كۈنى مۇنداق دېگەن: «بۈگۈن ساڭا بۇيرۇغان بۇ سۆزلەر چوقۇم قەلبىڭلاردا بولسۇن».—تەكرار قانۇن 6:6؛ 7:11؛ 8:1، 19؛ 30:15.
20. ئەيسانىڭ سۆزلىرىنى توغرا چۈشەنگەنلىكىمىزگە قانداق دەلىللەر بار؟
20 ئوتتۇرا شەرىقتە ياشىغان مۇقەددەس كىتاب تەرجىمانى مۇنداق دېگەن: «تەكىتلەش ئۈچۈن «بۈگۈن»، دېگەن سۆزنى ئۇرغۇ بىلەن: «بەرھەق، مەن بۈگۈن ساڭا ئېيتىمەنكى، سەن مېنىڭ بىلەن بىللە جەننەتتە بولىسەن»،— دەپ ئوقۇلۇشى كېرەك». بۇ ۋەدە شۇ كۈنى بېرىلگەن، كېيىن ئورۇنلىنىشى كېرەك ئىدى. شۇنداقلا بۇ تەرجىماننىڭ ئېيتىشىچە، «بۈگۈن»، دەپ سۆزلەش شۇ رايوندىكىلەرنىڭ سۆزلەش ئالاھىدىلىكى ئىدى ھەم «ۋەدىنىڭ بەلگۈلۈك كۈنى بېرىلگەنلىكىنى ۋە جەزمەن ئەمەلگە ئاشىدىغانلىقىنى» بىلدۈرىدۇ. بەشىنچى ئەسىردىكى سۈرىيە تىلى تەرجىمىسىدە، بۇ ئايەت مۇنداق تەرجىمە قىلىنغان: «ئامىن، بۈگۈن مەن ساڭا ئېيتىمەن، سەن مېنىڭ بىلەن بىللە ئېرەم بېغىدا بولىسەن». بۇ ۋەدە ھەممىمىزگە ئىلھام بېرىدىغانلىقى شەك-شۈبھىسىزدۇر.
21. جىنايەتچى ئاسماندا ھۆكۈمرانلىق قىلىش ئۈچۈن تاللانمىغانلىقىغا قانداق دەلىل-ئىسپاتلار بار؟
21 ئەيسا جىنايەتچىگە جەننەت توغرىسىدا ئېيتقاندا، ئاسماندىكى جەننەت ھەققىدە ئېيتمىغان. بۇنى قەيەردىن بىلىمىز؟ بۇنىڭ بىر سەۋەبى، بۇ جىنايەتچى ئەيسا ئۆز شاگىرتلىرى بىلەن پادىشاھلىق ھەققىدە ئەھدە تۈزگەنلىكىنى بىلمىگەن (لۇقا 22:29). ئۇ ھەتتا چۆمۈلدۈرۈلۈش مۇراسىمىدىن ئۆتمىگەن ئىدى (يۇھاننا 3:3—6، 12). شۇڭا، ئەيسا ۋەدە بەرگەندە، جىنايەتچى پەقەت يەردىكى جەننەتتىن خەۋەردار بولغان بولۇشى مۇمكىن. يىللار ئۆتۈپلا، ئەلچى پاۋلۇس «جەننەتكە ئېلىپ» كېتىلگەن بىر كىشىنى ۋەھىيدە كۆرگەنلىكىنى ئېيتقان (2-كورىنتلىقلار 12:1—4). پاۋلۇس ۋە باشقا ئەلچىلەر ئاسماندا ئەيسا بىلەن بىللە ھۆكۈمرانلىق قىلىشقا تاللانغان بولسىمۇ، پاۋلۇس كېلەچەكتىكى جەننەت ھەققىدە ئېيتقان b (ئىزاھاتقا قاراڭ). بۇ جەننەت يەردە بولامدۇ؟ سىز ئۇنىڭدا ياشىيالامسىز؟
كېلەچەكتە بىزنى نېمە كۈتىدۇ؟
22، 23. سىزدە قانداق ئۈمىد بار؟
22 ئېسىڭىزدە بولسا، داۋۇت «ھەققانىيلار يەر يۈزىگە ئىگە بولار» دەپ يازغاندا، بىر ۋاقىت ھەققىدە ئېيتقان (زەبۇر 37:29؛ 2-پېترۇس 3:13). ئۇ ھەممە ئادەملەر خۇدانىڭ ھەققانىي پرىنسىپلىرىغا ئىتائەت قىلىدىغان ۋاقىت توغرۇلۇق ئېيتقان. يەشايا 65:22-ئايەتتە: «خەلقىمنىڭ ئۆمرى دەرەخنىڭ ئۆمرىدەك بولىدۇ»، — دەپ ۋەدە بېرىلگەن. دېمەك، يېڭى دۇنيادا يەھۋاغا خىزمەت قىلىدىغان ئادەملەر نەچچە مىڭ يىللاپ ئۇزۇن ياشايدۇ. بۇ مۇمكىنمۇ؟ ھەئە، مۇمكىن! چۈنكى، ۋەھىيلەر 21:1—4-ئايەتلەرگە ئاساسلانغاندا، خۇدا ئىنسانىيەتنى بەرىكەتلەيدۇ. بۇ بەرىكەتلەرنىڭ بىرى — ئۆلۈم بولمايدۇ.
23 مۇقەددەس كىتاب جەننەت توغرۇلۇق نېمىنى ئۆگىتىدىغانلىقى ئېنىق. ئادەم ئاتا بىلەن ھاۋا ئانا جەننەتتە مەڭگۈ ياشاش پۇرسىتىنى يوقىتىپ قويغانىدى، ئەمما كېلەچەكتە قايتىدىن جەننەت بولىدۇ. خۇدا ۋەدە بەرگەندەك، ئۇ ھەممە ئادەملەرگە بەرىكەت بېرىدۇ. داۋۇت ھەققانىي ۋە كىچىك پېئىل ئادەملەر يەرگە ئىگە بولۇپ، مەڭگۈ ياشايدىغانلىقىنى ئېيتقان. يەشايا يازغان پەيغەمبەرلىك سۆزلەر جەننەتتە ياشايدىغان كۈننى تاقەتسىزلىك بىلەن كۈتۈشكە ياردەم بېرىدۇ. شۇ ۋاقىت قاچان كېلىدۇ؟ ئەيسانىڭ جىنايەتچىگە بەرگەن ۋەدىسى ئورۇنلانغاندا. سىزمۇ شۇ جەننەتتە ياشىيالايسىز. شۇ چاغدا، كورىيىدىكى چوڭ يىغىلىشتا: «جەننەتتە كۆرۈشىمىز!» دېگەن قېرىنداشلارنىڭ تىلىكى ئورۇنلىنىدۇ.
a مارۋىن پېيت پروفېسسورنىڭ ئېيتىشىچە، كۆپلىگەن ئالىملار ئەيسا «بۈگۈن» دېگەندە، ئۆلگەن كۈنى ياكى 24 سائەتنىڭ ئىچىدە جەننەتكە بارىدىغانلىقىنى دېمەكچى بولغان دەپ ئىشىنىدۇ. پېيت پروفېسسور ئۇلار مۇقەددەس كىتابتىكى باشقا دەلىللەرگە قايىل بولمايدىغانلىقىنى ئېيتقان. مەسىلەن، مۇقەددەس كىتابتا ئەيسا ئۆلگەندىن كېيىن قەبرىدە بولغانلىقى، ئاندىن ئاسمانغا كۆتۈرۈلگەنلىكى يېزىلغان.—مەتتا 12:40؛ ئەلچىلەر 2:31؛ رىملىقلار 10:7.
b مۇشۇ ژۇرنالنىڭ باشقا تىلىدىكى سانىنىڭ «ئوقۇرمەنلەرنىڭ سوئاللىرى» سەھىپىسىگە قاراڭ.
