ياشلار، سىلەر بەختلىك ھايات كەچۈرەلەيسىلەر
«سەن كۆرسىتىپ بېرىسەن ھاياتلىق يولىنى ماڭا».—زەبۇر 16:11.
ناخشىلار: 41، 6
1، 2. تونىنىڭ مىسالىدىن ھاياتنى ئۆزگەرتىشكە مۇمكىن ئىكەنلىكى قانداق كۆرۈنىدۇ؟
تونى دادىسىز چوڭ بولغانىدى. چوڭ سىنىپتا ئوقۇغاندا، ئۇ ئوقۇشقا قىزىقمىغان. ئۇ ھەتتا ئوقۇشنى تاشلىماقچى بولغان. دەم ئېلىش كۈنلىرى تونى كىنوغا بارغان ياكى دوستلىرى بىلەن ۋاقىت ئۆتكۈزگەن. ئۇ زوراۋان بولمىغان ۋە نەشە چەكمىگەن. شۇنداق بولسىمۇ، ئۇنىڭ ھاياتىدا ھېچقانداق مەقسىتى بولمىغان. ئۇ خۇدانىڭ بارلىقىغا ئىشەنمىگەن. بىر كۈنى تونى ئىككى يەھۋا گۇۋاھچىسىنى ئۇچرىتىپ، ئۇلارغا ئۆزىنىڭ گۇمانى ھەققىدە ئېيتقان. ئۇلار تونىغا، «مەۋجۇدات ئۆزىدىن-ئۆزى پەيدا بولدىمۇ؟» ۋە «مەۋجۇداتنىڭ مەنبەسى — بەش مۇھىم سوئال» (ئىنگىلىزچە) ناملىق كىتابچىلارنى بەرگەن.
2 تونى گۇۋاھچىلار بىلەن ئىككىنچى قېتىم ئۇچراشقاندا، ئۇنىڭ ئوي-پىكىرى تۈپ يىلتىزى بىلەن ئۆزگەرگەن. ئۇ كىتابچىلارنى كۆپ قېتىم ئوقۇغانكى، ھەتتا ئۇلارنىڭ ۋاراقلىرى قاتلىشىپ پۇرلىشپ كەتكەن. ئۇ گۇۋاھچىلارغا: «خۇدا بار ئىكەن!»— دېگەن. ئۇ مۇقەددەس كىتابنى ئۆگىنىشكە باشلاپ، ئاستا-ئاستا ھاياتىنى ئۆزگەرتىشكە باشلىغان. تونى مەكتەپتە ناچار ئوقاتتى، لېكىن كېيىن ئەڭ ياخشى ئوقۇغۇچىلارنىڭ قاتارىغا قوشۇلغان. مەكتەپنىڭ مۇدىرى ھەيران قالغان. ئۇ تونىغا: «كۆز قاراشلىرىڭ ئۆزگىرىپ كەتتى، ئوقۇش نەتىجىلىرىڭمۇ ياخشىلاندى. بۇنىڭ سەۋەبى يەھۋا گۇۋاھچىلىرى بىلەن ئارىلاشقانلىقىڭمۇ؟»— دېگەن. تونى «ھەئە» دەپ، مۇدىر بىلەن ئۆگەنلىرىنى ئورتاقلىشىپ گۇۋاھلىق بەرگەن. تونى مەكتەپنى پۈتۈرۈپ، ھازىر پىدائىي ۋەز ئېيتقۇچى ۋە ياردەمچى خىزمەتچى بولۇپ خىزمەت قىلىۋاتىدۇ. ئۇ كۆيۈمچان ئاتىسى يەھۋانى تاپقانلىقىدىن ئىنتايىن خۇشال!—زەبۇر 68:5.
يەھۋاغا بويسۇنۇپ، ئۇتۇق قازىنىڭ
3. يەھۋا ياشلارغا قانداق نەسىھەت بېرىدۇ؟
3 تونىنىڭ مىسالى، يەھۋا ياشلارغا غەمخورلۇق قىلىدىغانلىقىنى كۆرسىتىدۇ. خۇدا سىزنىڭ مۇۋەپپەقىيەت قازىنىپ، مەنىلىك ھايات كەچۈرۈشىڭىزنى خالايدۇ. شۇڭا، سىزگە «ياش ۋاقتىڭدا ئۇلۇغ ياراتقۇچىڭنى يادىڭدا چىڭ تۇتقىن» دېگەن نەسىھەتنى بېرىدۇ (ۋەز 12:1). بۇ ئاسان ئەمەس، بىراق مۇمكىن. خۇدانىڭ ياردىمى بىلەن سىز ياش چېغىڭىزدىمۇ ۋە چوڭ بولغاندىمۇ مەنىلىك ھايات كەچۈرەلەيسىز. بۇنى ياخشىراق چۈشىنىش ئۈچۈن، ئىسرائىللارنىڭ ۋەدە قىلىنغان زېمىننى ئىگەللىشىگە ۋە داۋۇتنىڭ يوغان جەڭچى جولياتنى يېڭىۋېلىشىغا نېمە ياردەم بەرگەنلىكىنى كۆرۈپ چىقايلى.
4، 5. ئىسرائىللارنىڭ قانانلىقلارنى ۋە داۋۇتنىڭ جولياتنى يېڭىۋالغانلىقىدىن قانداق مۇھىم ساۋاققا ئىگە بولالايمىز؟ (ماقالىنىڭ بېشىدىكى رەسىملەرگە قاراڭ)
4 ئىسرائىل خەلقى ۋەدە قىلىنغان زېمىننىڭ بوسۇغىسىدا تۇرغاندا، يەھۋا ئۇلارغا قانداق يول-يورۇق بەرگەن؟ ئۇلارغا جەڭ قىلىشنى ئۆگىنىپ، ياخشى جەڭچلەر بولۇشنى ئېيتتىمۇ؟ ياق. (تەكرار قانۇن 28:1، 2). يەھۋا ئۇلاردىن ئۇنىڭغا بويسۇنۇشنى ۋە تايىنىشنىلا تەلەپ قىلغان (يەشۇئا 1:7—9). بۇ نەسىھەت ئىنسانلارغا بىر ئەقىلسىزلىقتەك كۆرۈنۈشى مۇمكىن، ئەمما ئىسرائىللار ئۈچۈن ئەڭ ياخشى نەسىھەت بولغان. يەھۋا قايتا-قايتا ئۆز خەلقىنىڭ قانانلىقلارنى يېڭىۋېلىشىغا ياردەم بەرگەن (يەشۇئا 24:11—13). خۇداغا بويسۇنۇش ئۈچۈن ئېتىقاد كېرەك، شۇنداق ئېتىقاد دائىم مۇۋەپپەقىيەتكە ئېرىشتۈرىدۇ. بۇ — ۋاقىت ئۆتسىمۇ ئۆزگەرمەيدىغان ھەقىقەت. ئۇ ھازىرنىڭ ئۆزىدىمۇ كۈچكە ئىگە.
5 جوليات كۈچلۈك بىر جەڭچى بولغان. ئۇنىڭ بويى تەخمىنەن ئۈچ مېترچە بولۇپ، ئۇ خەتەرلىك قوراللار بىلەن جەڭگە تەييارلانغانىدى (1-سامۇئىل 17:4—7). ئەمما، داۋۇتتا بولسا، پەقەت ئىككى نەرسە — تاش ئاتىدىغان سالغا بىلەن يەھۋاغا بولغان ئېتىقاد بار ئىدى. ئېتىقادى يوق ئادەم داۋۇتنى ئەقىلسىز دەپ ئويلىشى مۇمكىن. بىراق، ئەمەلىيەتتە ئەقىلسىز بولغىنى جوليات ئىدى.—1-سامۇئىل 17:48—51.
6. بۇ ماقالىدە، بىز نېمىنى مۇھاكىمە قىلىمىز؟
6 ئىلگىرىكى ماقالىدە، بىزنى خۇشال-خۇرام قىلىدىغان ۋە ھاياتىمىزنى مەنىلىك قىلىدىغان تۆت نەرسىنى مۇھاكىمە قىلغان ئىدۇق. ئۇلار: روھىي ئېھتىياجىمىزنى قانائەتلەندۈرۈش، خۇدانى ياخشى كۆرىدىغان كىشىلەر بىلەن دوست بولۇش، ئەھمىيەتلىك مەقسەتلەرنى قويۇش ۋە خۇدا بەرگەن ئەركىنلىكنى قەدىرلەش. بۇ ماقالىدە، بۇلارنىڭ پايدىسىنى كۆرۈش ئۈچۈن يەنە نېمە قىلالايدىغانلىقىمىزنى كۆرۈپ چىقىمىز. كېلىڭلار، بۇنىڭ ئۈچۈن زەبۇرنىڭ 16-بابىدىكى قائىدە-پرىنسىپلارغا دىققەت قىلايلى.
روھىي ئېھتىياجىڭىزنى قانائەتلەندۈرۈڭ
7. (1) روھىي ئادەمنى قانداق تەسۋىرلەيسىز؟ (2) داۋۇتنىڭ نېسىۋىسى نېمە بولغان ۋە ئۇ ئۇنىڭغا قانداق تەسىر قىلغان؟
7 روھىي ئادەم خۇداغا ئىشىنىدۇ ۋە ھەممىگە خۇدانىڭ كۆز قارىشى بىلەن قاراشقا تىرىشىدۇ. ئۇ يەھۋادىن يول-يورۇق ئىزدەپ، ئۇنىڭغا بويسۇنۇپ ياشاشقا بەل باغلىغان (1-كورىنتلىقلار 2:12، 13). بۇ تەرەپتىن داۋۇت ياخشى ئۈلگە كۆرسەتكەن. ئۇ : «پەرۋەردىگار ئۆزى مېنىڭ نېسىۋەم»،— دېگەن (زەبۇر 16:5). داۋۇت خۇدا بىلەن بولغان يېقىن مۇناسىۋىتىنى «نېسىۋەم» دەپ ئاتاپ، ئۇنىڭ ئۈچۈن مىننەتدار بولغان ۋە خۇدانى باشپاناھ قىلغان (زەبۇر 16:1). شۇ سەۋەبتىن، ئۇ «قەلبىم شاد-خۇرام، پۈتۈن ۋۇجۇدۇم شادلىققا تولغان» دەپ ئېيتالىغان. داۋۇتنى ئەڭ شاد-خۇرام قىلغان نەرسە — يەھۋا بىلەن بولغان دوستلىقى ئىدى.—زەبۇر 16:9، 11-نى ئوقۇڭ.
8. قانداق نەرسىلەر ھەقىقىي مەنلىك ھايات كەچۈرۈشىڭىزگە ياردەم بېرەلەيدۇ؟
8 باي بولۇشنى نىيەت قىلغان ياكى ھۇزۇر-ھالاۋەت قوغلاشقان ئادەملەر داۋۇت ئېرىشكەندەك شاد-خۇراملىققا ھەرگىزمۇ ئېرىشەلمەيدۇ (1-تىموتىي 6:9، 10). كانادادا ياشايدىغان بىر قېرىنداش مۇنداق دېگەن: «ھەقىقىي قانائەت ئېرىشكەن نەرسىلەرگە ئەمەس، ھەر بىر ياخشى ھەدىيىنى ئاتا قىلىدىغان خۇدايىمىز يەھۋاغا بەرگەن نەرسىلىرىمىزگە باغلىق» (ياقۇپ 1:17). ئەگەر سىز يەھۋاغا بولغان ئېتىقادىڭىزنى كۈچەيتسىڭىز ۋە ئۇنىڭغا خىزمەت قىلسىڭىز، ھاياتىڭىز ھەقىقەتەن مەنىلىك ئۆتىدۇ. ئېتىقادىڭىزنى قانداق مۇستەھكەملىيەلەيسىز؟ يەھۋا بىلەن ۋاقىت ئۆتكۈزۈش ئارقىلىق. بۇنىڭ ئۈچۈن ئۇنىڭ سۆزىنى ئوقۇشىڭىز، خۇدا ياراتقان نەرسىلەرنى دىققەت بىلەن كۆزىتىشىڭىز، ئۇنىڭ پەزىلەتلىرى ۋە سىزگە كۆرسەتكەن مېھىر-مۇھەببىتى ھەققىدە چوڭقۇر ئويلىنىشىڭىز كېرەك.—رىملىقلار 1:20؛ 5:8.
9. خۇدا سۆزىنىڭ بىزگە تەسىر قىلىشىغا قانداق يول بېرەلەيمىز؟
9 بەزىدە خۇدا مېھىر-مۇھەببىتىنى كۆيۈمچان ئاتىغا ئوخشاش بىزنى تۈزىتىش ئارقىلىق كۆرسىتىدۇ. داۋۇت تۈزىتىش ئۈچۈن مىننەتدارلىقىنى بىلدۈرۈپ: «ماڭا نەسىھەت بەرگەن يەھۋانى مەدھىيىلەيمەن. ھەتتا كېچىدە تۈزىتەر مېنى قەلبىمدىكى ئوي-پىكىرلىرىم»، — دېگەن (زەبۇر 16:7). داۋۇت خۇدانىڭ ئوي-پىكىرى ھەققىدە مۇلاھىزە قىلغان ۋە ئۇنىڭ كۆز قارىشىنى قوبۇل قىلغان. ئۇ خۇدانىڭ ئوي-پىكىرلىرى ئۇنىڭغا تەسىر قىلىشىغا، يەنى ياخشى ئادەم بولۇشىغا ۋە ئۆزگىرىشىگە يول بەرگەن. شۇنداق قىلسىڭىز، خۇداغا بولغان مېھىر-مۇھەببىتىڭىز ۋە ئۇنى خۇرسەن قىلىش ئارزۇيىڭىز تېخىمۇ كۈچىيىپ، روھىي جەھەتتىن يېتىلگەن ئادەم بولالايسىز. كرىستىن ئىسىملىك قېرىندىشىمىز مۇنداق دېگەن: «شەخسىي ئۆگىنىشتە ئوقۇغانلىرىم ھەققىدە ئويلىغىنىمدا، يەھۋا بۇنى مەن ئۈچۈن يېزىپ قويغاندەك ھېس قىلىمەن!»
10. يەشايا 26:3-ئايەتتىن بىلگىنىمىزدەك، روھىي ئادەم بولۇش سىزگە قانداق ياردەم بېرىدۇ؟
10 روھىي ئادەم بولسىڭىز، خۇدانىڭ كۆز قارىشى بىلەن بۇ دۇنيا ۋە ئۇنىڭ كېلەچىكىگە قارايسىز. يەھۋا سىزگە ئالاھىدە بىلىم ۋە دانالىق بېرىدۇ. نېمە ئۈچۈن؟ ئۇ سىزنىڭ مۇھىم نەرسىلەرنى ھاياتىڭىزدا بىرىنچى ئورۇنغا قويۇشىڭىزنى، دانا قارارلارنى چىقىرىشىڭىزنى ۋە كېلەچەككە ئىشەنچ بىلەن قارىشىڭىزنى خالايدۇ (يەشايا 26:3-نى ئوقۇڭ). ئامېرىكىدا ياشايدىغان يەشۇئا ئىسىملىك ياش قېرىنداش مۇنداق خۇلاسىگە كەلگەن: بىر كىشى يەھۋا بىلەن يېقىن مۇناسىۋەتتە بولسا، نېمىنىڭ مۇھىم، نېمىنىڭ مۇھىم ئەمەس ئىكەنلىكىنى ئېنىق چۈشىنىدۇ.
ياخشى دوستلارنى تاللاڭ
11. داۋۇت دوستلارنى تاللىغاندا، نېمىگە دىققەت قىلغان؟
11 زەبۇر 16:3-نى ئوقۇڭ. داۋۇت ياخشى دوستلارنى قانداق تېپىشنى بىلگەن. ئۇ يەھۋانى ياخشى كۆرىدىغان ئادەملەر بىلەن دوست بولغان ۋە بۇ ئۇنىڭغا كۆپ خۇشاللىق ئاتا قىلغانىدى. داۋۇت ئۇلارنى «مۇقەددەس بەندىلەر» دەپ ئاتىغان، چۈنكى ئۇلار يەھۋانىڭ ئەخلاقىي ئۆلچەملىرىگە ماس ھايات كەچۈرگەن. يەنە بىر زەبۇر يازغۇچىسى دوستلارنى تاللاش ھەققىدە داۋۇتقا ئوخشاش كۆز قاراشتا بولغان. ئۇ مۇنداق دەپ يازغان: «مەن بارچە سەندىن ئەيمىنىپ قورقىدىغانلار ۋە بۇيرۇقلىرىڭغا ئەمەل قىلىدىغانلارنىڭ دوستىمەن» (زەبۇر 118:63). ئاۋۋالقى ماقالىدە ئوقۇغىنىمىزدەك، سىزمۇ يەھۋانى ياخشى كۆرىدىغان ۋە ئۇنىڭغا بويسۇندىغان دوستلارنى تاپالايسىز. دوستلارنىڭ يېشى ئوخشاش ياشتا بولۇشى شەرت ئەمەس.
12. داۋۇت بىلەن يوناتان نېمە ئۈچۈن ياخشى دوستلار بولالىغان؟
12 داۋۇت پەقەت تەڭتۇشلىرى بىلەن دوست بولمىغان. ئۇنىڭ يېقىن دوستلىرىنىڭ ئارىسىدا كىملەر بولغانلىقىنى بىلەمسىز؟ بەلكىم، يوناتان ئېسىڭىزغا كېلىدىغاندۇ. مۇقەددەس كىتابتا يېزىلغان ئەڭ يېقىن دوستلۇق مۇناسىۋەتلەرنىڭ بىرى داۋۇت بىلەن يوناتاننىڭ دوستلۇقى بولغان. لېكىن، سىز يوناتان داۋۇتتىن تەخمىنەن 30 ياش چوڭ ئىكەنلىكىنى بىلگەنمۇ؟ ئۇلار نېمە ئۈچۈن شۇنداق ياخشى دوست بولغان؟ ئۇلارنىڭ دوستلۇقى خۇداغا بولغان ئېتىقاد ۋە بىر-بىرىگە بولغان ھۆرمەتكە ئاساسلانغان. شۇنداقلا، ئۇلار خۇدانىڭ دۈشمەنلىرى بىلەن جەڭ قىلغاندا كۆرسەتكەن باتۇرلۇقى ۋە بىر-بىرىنىڭ باشقا ياخشى سۈپەتلىرىنى ھەم قەدىرلىگەن.—1-سامۇئىل 13:3؛ 14:13؛ 17:48—50؛ 18:1.
13. كۆپرەك دوستلارنى قانداق قىلىپ تاپالايسىز؟ مىسال كەلتۈرۈڭ.
13 يەھۋاغا ئىشىنىدىغان ۋە ئۇنى ياخشى كۆرىدىغان ئادەملەر بىلەن دوست بولۇپ، بىزمۇ داۋۇت بىلەن يوناتانغا ئوخشاش خۇشال بولالايمىز. خۇداغا كۆپ يىللاردىن بېرى خىزمەت قىلىدىغان كىئېرا: «مەن دۇنيانىڭ جاي-جايلىرىدا تۇرىدىغان، كېلىپ چىقىشى ۋە مەدەنىيىتى ھەرخىل ئادەملەر بىلەن دوست»، دەيدۇ. سىزمۇ شۇنداق دوست بولسىڭىز، مۇقەددەس كىتاب ۋە مۇقەددەس روھ بىزنى دۇنيانىڭ جاي-جايلىرىدىكى ئېتىقادچىلار بىلەن بىر ئائىلە قىلىدىغانلىقىنى كۆرىسىز.
ئەھمىيەتلىك مەقسەتلەرنى قويۇڭ
14. (1) ئەھمىيەتلىك مەقسەتلەرنى قويۇشقا نېمە ياردەم بېرىدۇ؟ (2) بەزى ياشلار مەقسەتلىرى ھەققىدە نېمە دەيدۇ؟
14 زەبۇر 16:8-نى ئوقۇڭ. داۋۇت خۇداغا خىزمەت قىلىشنى ھاياتىدا ئەڭ بىرىنچى ئورۇنغا قويغان. ئەگەر سىزمۇ مەقسەت قويۇشتا داۋۇتتىن ئۈلگە ئېلىپ، يەھۋانىڭ كۆز قارىشىنى يادىڭىزدا تۇتسىڭىز، مەنلىك ھايات كەچۈرۈسىز. ستىۋېن ئىسىملىك ئەر قېرىنداش مۇنداق دېگەن: «مەقسىتىمگە يېتىش ئۈچۈن تىرىشىپ، ئۇنىڭغا قول يەتكۈزگەندە ۋە ياخشى تەرەپكە ئۆزگەرگەنلىكىمنى كۆرگەندە، بەك خۇشال بولىمەن». ھازىر باشقا دۆلەتتە خىزمەت قىلىۋاتقان گېرمانىيىلىك ياش قېرىنداش بولسا: «قېرىغىنىمدا مەن ھاياتىمغا قاراپ، پەقەت ئۆزۈم ئۈچۈن ياشىغانلىقىمنى كۆرۈشنى خالىمايمەن»،— دېگەن. سىز ئۇنىڭ سۆزلىرىگە قوشۇلامسىز؟ ئۇنداقتا، قابىلىيەتلىرىڭىز بىلەن تالانتلىرىڭىزنى خۇداغا شان-شەرەپ كەلتۈرۈش ۋە باشقىلارغا ياردەم بېرىش ئۈچۈن ئىشلىتىڭ (گالاتىيالىقلار 6:10). روھىي مەقسەتلەرنى قويۇپ، ئۇلارغا قول يەتكۈزۈش ئۈچۈن، يەھۋادىن ياردەم سوراڭ. ئۇ دۇئايىڭىزغا جاۋاب بېرىدىغانلىقى سۆزسىز.—1-يۇھاننا 3:22؛ 5:14، 15.
15. قانداق مەقسەتلەرنى قويسىڭىز بولىدۇ؟ (« قانداق ياخشى مەقسەتلەرنى قويۇشقا بولىدۇ؟» ناملىق رامكىغا قاراڭ)
15 قانداق مەقسەتلەرنى قويسىڭىز بولىدۇ؟ مەسىلەن، يىغىلىشلاردا ئۆز سۆزىڭىز بىلەن جاۋاب بېرىش، پىدائىي ۋەز ئېيتقۇچى بولۇش ياكى بەيتەلدە خىزمەت قىلىشنى مەقسەت قىلسىڭىز بولىدۇ. كۆپرەك ئادەملەرگە خۇش خەۋەرنى ئېيتىش ئۈچۈن باشقا تىلنى ئۆگەنسىڭىز بولىدۇ. تولۇق ۋاقىتلىق خىزمەت قىلىدىغان باراك ئىسىملىك يىگىت مۇنداق دەيدۇ: «ھەر كۈنى ئەتىگەندە تۇرۇپ، بار كۈچۈمنى يەھۋاغا بېرىۋاتقانلىقىمنى چۈشەنگەندە، قەلبىمدە ئالاھىدە شاد-خۇراملىق پەيدا بولىدۇ. باشقا ھېچقانداق ئىشتىن شۇنداق خۇشاللىق تاپالمايمەن».
خۇدا بەرگەن ئەركىنلىكنى قەدىرلەڭ
16. داۋۇت يەھۋانىڭ قانۇن-پرىنسىپلىرىغا قانداق كۆز قاراشتا بولغان ۋە نېمە ئۈچۈن؟
16 زەبۇر 16:2، 4-نى ئوقۇڭ. ئالدىنقى ماقالىدىن ئۆگەنگىنىمىزدەك، خۇدانىڭ قانۇن-پرىنسىپلىرىغا ماس ياشىساق، ھەقىقىي ئەركىنلىككە ئېرىشىمىز. بىز ياخشىلىقنى سۆيۈشنى ۋە يامانلىقتىن نەپرەتلىنىشنى ئۆگەندۇق (ئاموس 5:15). داۋۇت ئۇنىڭدا بار ياخشى نەرسىلەرنىڭ ھەممىسى يەھۋادىن كەلگەنلىكىنى چۈشەنگەن. يەھۋا ھەرقاچان ياخشىلىق قىلىدۇ. داۋۇت خۇدادىن ئۈلگە ئېلىش ئۈچۈن كۆپ كۈچ چىقارغان ۋە يەھۋا ياخشى كۆرگەن نەرسىلەرنى ياخشى كۆرگەن. خۇدا ئۆچ كۆرگەن نەرسىلەرنى ئۇمۇ ئۆچ كۆرگەن. ئۇلارنىڭ بىرى — بۇتلارغا سەجدە قىلىش. بۇتلارغا ئىبادەت قىلغان ئادەملەر ئۆز ئىززەت-ھۆرمىتىنى يەرگە ئۇرغان ۋە يەھۋاغا تەئەللۇق شان-شەرەپنى باشقا بىرسىگە ياكى بىرەر نەرسىگە بېرىۋەتكەنگە ئوخشاش بولىدۇ.—يەشايا 2:8، 9؛ ۋەھىيلەر 4:11.
17، 18. (1) داۋۇت ساختا ئىبادەتنىڭ ئاقىۋىتى ھەققىدە نېمە دېگەن؟ (2) بۈگۈنكى كۈندە نېمە سەۋەبتىن ئادەملەرنىڭ «دەرد-ئەلەملىرى كۆپىيىپ كېتەر؟»
17 قەدىمقى زاماندا جىنسىي ئەخلاقسىزلىق ساختا دىننىڭ بىر قىسىمى بولغان (ھوشىيا 4:13، 14). كۆپلىگەن ئادەملەرگە ساختا دىنلارنى ياخشى كۆرگەن، چۈنكى ئۇلار جىنسىي ئەخلاقسىزلىقتىن ھۇزۇر ئالغانىدى. بىراق، شۇنداق ئىبادەت ئۇلار بەختكە ئېرىشتۈرەلىگەنمۇ؟ ئەلۋەتتە، ياق! داۋۇت ساختا ئىلاھلارغا سەجدە قىلغانلار توغرىسىدا «دەرد-ئەلەملىرى كۆپىيىپ كېتەر» دېگەنىدى. ئۇلار شۇ ئىلاھلارغا ھەتتا بالىلىرىنى قۇربانلىق قىلغان! (يەشايا 57:5). يەھۋا ئۇلارنىڭ رەھىمسىزلىكىدىن نەپرەتلەنگەن (يەرەمىيا 7:31). سىز شۇ ۋاقىتتا ياشىغان بولسىڭىز، يەھۋاغا ئىبادەت قىلغان ئاتا-ئانىڭىزغا قانچىلىك مىننەتدار بولاتتىڭىز!
18 بۈگۈنكى كۈندە، كۆپ دىنلار جىنسىي ئەخلاقسىزلىقنى، شۇ جۈملىدىن ئوخشاش جىنىسلىق ئادەملەرنىڭ مۇھەببەتلىشىشىنى، ئادەتتىكىدەك نەرسە دەپ قوبۇل قىلىدۇ. ئەخلاقسىز ھايات كەچۈرىدىغان كىشىلەر ئۆزىنى ئەركىن ھېس قىلىشى مۇمكىن. ئەمما، ئۇلارنىڭ ئەمەلىيەتتە «دەرد-ئەلەملىرى كۆپىيىپ كېتەر» (1-كورىنتلىقلار 6:18، 19). سىز بۇنىڭ بىلەن كېلىشەمسىز؟ ئەزىز ياشلار، ئاسماندىكى ئاتىمىزغا قۇلاق سېلىڭلار. خۇداغا ئىتائەت قىلىش ئۆزۈڭلار ئۈچۈن پايدىلىق ئىكەنلىكىگە كۆز يەتكۈزۈڭلار. جىنسىي ئەخلاقسىزلىقنىڭ ئاقىۋىتى بەك ئېغىر ئىكەنلىكىنى ۋە قىسقىغىنە ھۇزۇرلىنىشنىڭ كۆپ ئازاب-ئوقۇبەتلەرنى ئەكېلىدىغانلىقىنى ئۇنتۇماڭلار (گالاتىيالىقلار 6:8). ماقالىنىڭ بېشىدا تىلغا ئېلىنغان يەشۇئا مۇنداق دەيدۇ: «بىزنىڭ تاللاش ئەركىنلىكىمىز بار. بىراق، ئەركىنلىكىمىزدىن ناتوغرا پايدىلىنىش ھەرگىز قانائەتكە ئېرىشتۈرەلمەيدۇ».
19، 20. يەھۋاغا ئىشىنىدىغان ۋە ئۇنىڭغا ئىتائەت قىلىدىغان ياشلار قانداق بەرىكەتلەرگە ئېرىشىدۇ؟
19 ئەيسا مۇنداق دېگەن: «ئەگەر تەلىمىم بويىچە ئىش كۆرسەڭلار، مېنىڭ ھەقىقىي شاگىرتلىرىم بولىسىلەر. سىلەر ھەقىقەتنى تونۇپ يېتىسىلەر ۋە ھەقىقەت سىلەرنى ئازاد قىلىدۇ» (يۇھاننا 8:31، 32). يەھۋا خۇداغا مىڭ شۈكۈر، ئۇ بىزنى يالغان دىندىن، روھىي قاراڭغۇلۇقتىن ۋە خۇراپاتلىقلاردىن ئازاد قىلغان. كېلەچەكتە بولسا، بىز «خۇدا پەرزەنتلىرى ئىگە بولىدىغان شەرەپلىك ئەركىنلىككە ئىگە بولىمىز» (رىملىقلار 8:21). مەسىھنىڭ سۆزلىرىگە ئەمەل قىلسىڭىز، سىز ھازىرنىڭ ئۆزىدە ئەركىنلىكتىن قانائەت تاپالايسىز. شۇنداق قىلىپ، سىز ‹ھەقىقەتنى تونۇپ يېتسىز›! بۇ دېگىنىمىز پەقەت ھەقىقەتنى بىلىپ قويۇشنىلا ئەمەس، بەلكى ئۇنىڭغا ماس ياشاشنى بىلدۈرىدۇ.
20 ياشلار، خۇدا بەرگەن ئەركىنلىكنى قەدىرلەپ، ئۇنى دانالىق بىلەن ئىشلىتىڭلار. شۇ چاغدا گۈزەل كېلەچەككە يېتەكلەيدىغان قارارلارنى چىقىرالايسىلەر. بىر ياش قېرىنداش مۇنداق دېگەن: «ياش چېغىڭىزدا ئەركىنلىكىڭىزنى دانالىق بىلەن ئىشلىتىش مۇھىم قارارلارنى چىقارغاندا، مەسىلەن، مۇۋاپىق خىزمەت تېپىش ۋە توي قىلىش ياكى يالغۇز ئۆتۈش ھەققىدە ئويلىغاندا ياردەم بېرىدۇ».
21. «ھەقىقىي ھاياتقا» قانداق ئېرىشەلەيسىز؟
21 بۈگۈنكى كۈندە، بۇ دۇنيادا ھايات كەچۈرۈش بەكمۇ ياخشى بولۇپ كۆرۈنسىمۇ، ئۇ ئۇزاققا سوزۇلمايدۇ. ئەتە نېمە بولىدىغانلىقىنى ھېچبىر ئىنسان بىلمەيدۇ (ياقۇپ 4:13، 14). شۇڭا، «ھەقىقىي ھاياتقا»، يەنى مەڭگۈ ھاياتقا ئېرىشىش ئۈچۈن توغرا قارارلارنى چىقىڭ (1-تىموتىي 6:19). يەھۋا ھېچكىمنى ئۇنىڭغا خىزمەت قىلىشقا مەجبۇرلىمايدۇ. بۇ ھەربىر ئادەمنىڭ قارارى. يەھۋانىڭ «نېسىۋەم» بولۇشىنى خالايمەن دېسىڭىز، ئۇنىڭغا كۈندىن-كۈنگە يېقىنلىشىش ئۈچۈن كۈچ چىقىرىڭ ۋە ئۇ بېرىۋاتقان بەرىكەتلەرنى قەدىرلەڭ (زەبۇر 103:5). يەھۋا سىزگە زور خۇشاللىق ۋە مەڭگۈلۈك شاد-خۇراملىقنى سوۋغا قىلىدىغانلىقىغا ئىشەنچىڭىز كامىل بولسۇن!—زەبۇر 16:11.
