ياشلار، ياراتقۇچىڭلار خۇشال-خۇرام بولۇشۇڭلارنى خالايدۇ!
«ئۇ ئېسىل نىممەتلىرى بىلەن سېنى ئۆمۈر بويى قانائەت تاپقۇزار».—زەبۇر 103:5.
ناخشىلار: 11، 4
1، 2. كېلەچەككە باغلىق قارار قوبۇل قىلغاندا ياراتقۇچىڭىزنى تىڭشاش نېمە ئۈچۈن دانالىقتۇر؟ (ماقالىنىڭ بېشىدىكى رەسىملەرگە قاراڭ)
ياش بولسىڭىز، كېلەچەك توغرىسىدا كۆپ مەسلىھەتلەرنى ئاڭلايدىغانسىز. مۇئەللىملەر، تۇغقانلار ياكى باشقا ئادەملەر كۆپ پۇل تېپىشىڭىز ئۈچۈن ئالىي بىلىم يۇرتلىرىدا بىلىم ئېلىشىڭىز كېرەك دەپ ئېيتىشى مۇمكىن. ئەمما، يەھۋا سىزنى تامامەن باشقا يولنى تاللاشقا دەۋەت قىلىدۇ. ئەلۋەتتە، ئۇ سىزنىڭ كېلەچەكتە جان بېقىپ، ئۆزىڭىزنى تەمىنلەش ئۈچۈن مەكتەپتە ياخشى ئوقۇشىڭىزنى خالايدۇ (كولوسىلىقلار 3:23). لېكىن، خۇدا سىزنىڭ ياش چېغىڭىزدا كېلەچىكىڭىزگە تەسىر قىلىدىغان مۇھىم قارارلارنى چىقىرىشىڭىز كېرەكلىكىنىمۇ چۈشىنىدۇ. شۇڭا، ئۇ سىزگە يول-يورۇق كۆرسىتىدىغان پرىنسىپلارنى بېرىدۇ ۋە بۇ دۇنيانىڭ ئاخىرى يېقىنلىشىۋاتقاندا ئۇنى خۇشال قىلىپ ياشىشىڭىزغا ياردەملىشىدۇ.—مەتتا 24:14.
2 يادىڭىزدا بولسۇنكى، يەھۋا خۇدا ھەممىنى بىلىدۇ. ئۇ كېلەچەكتە نېمە بولىدىغانلىقىنى ۋە بۇ دۇنيانىڭ ئاخىرى قاچان كېلىدىغانلىقىنى ئېنىق بىلىدۇ (يەشايا 46:10؛ مەتتا 24:3، 36). يەھۋا سىزنىمۇ ياخشى بىلىدۇ. سىزنى نېمە خۇشال قىلىپ، نېمە خاپا قىلىدىغانلىقى ئۇنىڭغا مەلۇم. ئىنسانلارنىڭ مەسلىھەتلىرى ياخشى بولۇپ كۆرۈنۈشى مۇمكىن. بىراق، ئۇلارنىڭ بەرگەن مەسلىھەتلىرى مۇقەددەس كىتابقا ئاساسلانمىسا، شۇلارنى دانا مەسلىھەتلەر دەپ ئېيتىش قىيىن.—پەندى-نەسىھەت 19:21.
دانالىقنىڭ بىردىنبىر مەنبەسى — يەھۋا خۇدا
3، 4. ئادەم-ئاتا بىلەن ھاۋا ئانىنىڭ يامان مەسلىھەتكە قۇلاق سالغانلىقىنىڭ ئاقىۋىتى قانداق بولغان؟
3 يامان مەسلىھەتلەر قەدىمدىن تارتىپ يىلتىز تارتىپ كۆكلىگەن. ئىنسانلارغا ئەڭ بىرىنچى يامان مەسلىھەتنى شەيتان بەرگەن. ئۇ ئادەم-ئاتا بىلەن ھاۋا-ئانىغا ھايات يولىنى ئۆزلىرى تاللىسا، بەختلىكىرەك بولىدۇ دەپ ئېيتقان (يارىتىلىش 3:1—6). ئەمەلىيەتتە، شەيتان پەقەت ئۆزىنىلا ئويلىغان! ئۇ ئادەم-ئاتا بىلەن ھاۋا-ئانا ھەم ئۇلارنىڭ ئەۋلاتلىرىنىڭ يەھۋاغا ئەمەس، ئۇنىڭغا ئىبادەت قىلىشىنى خالىغان. ئەمما، شەيتان ئىنسانىيەت ئۈچۈن قىلچىمۇ ياخشىلىق قىلمىغان. ئەسلىدە، ئۇلارغا ھەممە نەرسىنى يەھۋا بەرگەن. مەسىلەن، خۇدا ئادەم-ئاتىغا رەپىقە، ھاۋا-ئانىغا ھەمراھ ۋە ھەر ئىككىسىگە بىر-بىرىنى سۆيۈش قابىلىيىتىنى سوۋغات قىلغان. يەھۋا ئۇلارغا چىرايلىق باغ، مۇكەممەل تەن ۋە مەڭگۈ ياشاش ئىمكانىيىتىنى ھەدىيە قىلغان.
4 بەك ئەپسۇسكى، ئادەم-ئاتا بىلەن ھاۋا-ئانا خۇداغا ئىتائەت قىلماي، ھايات بەرگۈچى خۇدا بىلەن بولغان مۇناسىۋىتىنى ئۈزگەن. بۇنىڭ ئاقىۋىتى ئىنتايىن ئېچىنارلىق بولغان. ئۈزۈلگەن گۈلگە ئوخشاش، ئادەم-ئاتا بىلەن ھاۋا-ئانا ئاستا-ئاستا قېرىپ، ئاخىرىدا ئۆلۈپ كەتكەن. ئۇلارنىڭ گۇناھى تۈپەيلىدىن ئەۋلاتلىرى، شۇ جۈملىدىن بىزمۇ، ئازاب چېكىۋاتىمىز (رىملىقلار 5:12). بۈگۈنكى كۈندە، كۆپلىگەن ئادەملەر خۇدانىڭ سۆزىگە قۇلاق سالماي، ئۆز دېگىنىنى قىلىدۇ (ئەفەسلىكلەر 2:1—3). ئەمما، مۇقەددەس كىتابتا ئېيتىلغاندەك، يەھۋاغا قارشى چىققان ئادەمدە «ھېچقانداق دانالىق» يوقتۇر.—پەندى-نەسىھەت 21:30.
5. خۇدا بەزى كىشىلەرنىڭ نېمە قىلىدىغانلىقىنى ئىشەنگەن؟ ئەمەلىيەت نېمىنى ئىسپاتلىدى؟
5 يەھۋا ئادەم-ئاتا بىلەن ھاۋا-ئانىنىڭ ئەۋلاتلىرى ئارىسىدىن، ياشلارنىمۇ ئۆز ئىچىگە ئالغان بەزى كىشىلەرنىڭ چىقىپ، ھەق خۇدانى تونۇپ، ئۇنىڭغا خىزمەت قىلىدىغانلىقىغا ئىشەنگەن (زەبۇر 103:17، 18؛ 110:3). ياشلار يەھۋا ئۈچۈن ئالتۇندەك قىممەت! سىز ئۇلارنىڭ بىرى بولسىڭىز، خۇدا بېرىدىغان بەرىكەتلەردىن خۇشاللىق تېپىپ، بەختلىك ھايات كەچۈرۈۋاتقانلىقىڭىز سۆزسىز (زەبۇر 103:5-نى ئوقۇڭ؛ پەندى-نەسىھەت 10:22). بىز بۇ بەرىكەتلەرنىڭ تۆتىنى كۆرۈپ چىقىمىز: روھىي ئوزۇق، ياخشى دوستلار، ئەھمىيەتلىك مەقسەتلەر ۋە ھەقىقىي ئەركىنلىك.
روھىي ئوزۇق
6. نېمە ئۈچۈن بىز روھىي ئېھتىياجلىرىمىزنى قانائەتلەندۈرۈشىمىز كېرەك ۋە يەھۋا بىزگە قانداق ياردەم بېرىدۇ؟
6 بىز روھىي ئوزۇققا مۇھتاج ئەمەس ھايۋاناتلاردىن پەرق قىلىمىز — بىز ياراتقۇچىمىز ھەققىدە بىلىشكە مۇھتاج (مەتتا 4:4). خۇداغا بويسۇنساق، بىز زېرەكلىك، دانالىق ۋە شاد-خۇراملىققا ئىگە بولىمىز. ھەزرىتى ئەيسا: «ئۆزىنىڭ خۇداغا بولغان مۇھتاجلىقىنى تونۇپ يەتكەنلەر نەقەدەر بەختلىك!»،— دېگەن (مەتتا 5:3). يەھۋا بىزگە مۇقەددەس كىتابنى بەرگەن ۋە ئېتىقادىمىزنى مۇستەھكەملەش ئۈچۈن «سادىق ۋە ئەقىل-پاراسەتلىك قۇل» ئارقىلىق روھىي ئوزۇق بەرمەكتە (مەتتا 24:45). ماتېرىياللىرىمىزنى روھىي ئوزۇقلۇق دەپ ئاتىشىمىزنىڭ سەۋەبى — ئۇلار ئېتىقادىمىزنى ۋە يەھۋا بىلەن بولغان مۇناسىۋىتىمىزنى كۈچەيتىدۇ. بىز مول روھىي ئوزۇقتىن بەھرىلىنىمىز.—يەشايا 65:13، 14.
7. خۇدا بېرىۋاتقان روھىي ئوزۇقلۇق سىزگە قانداق ياردەم بېرىدۇ؟
7 روھىي ئوزۇقلۇق ئارقىلىق سىز دانالىق ۋە پەم-پاراسەتكە ئېرىشىسىز ۋە ئۇلار سىزنى كۆپ ۋەزىيەتتە قوغدايدۇ (پەندى-نەسىھەت 2:10—14-نى ئوقۇڭ). مەسىلەن، دانالىق ۋە پەم-پاراسەت سىزگە ساختا تەلىملەرگە، جۈملىدىن ياراتقۇچى يوق، دېگەن يالغان پىكىرگە، ئىشەنمەسلىككە ياردەم بېرىدۇ. شۇنداقلا، بۇ سۈپەتلەر سىزنى پۇل-مال، بايلىق بەخت-سائادەتكە ئېرىشتۈرىدۇ، دېگەن يالغانچىلىقتىن ھىمايە قىلىدۇ. ئۇلار سىزگە زىيان كەلتۈرىدىغان ھەۋەسلەر بىلەن ئادەتلەردىن نېرى تۇرۇشقا كۈچ بېرىدۇ. ئۇنداقتا، دانالىق ۋە پەم-پاراسەتكە ئىگە بولۇش ئۈچۈن بار كۈچىڭىز بىلەن تىرىشىڭ. شۇ چاغدا يەھۋانىڭ سىزنى ياخشى كۆرۈپ، ئەڭ ياخشىسىنى سىزگە بېرىدىغانلىقىنى كۆرۈپ يېتەلەيسىز.—زەبۇر 34:8؛ يەشايا 48:17، 18.
8. نېمە ئۈچۈن ھازىر خۇداغا يېقىنلىشىشىڭىز كېرەك ۋە بۇ سىزگە كېلەچەكتە قانداق ياردەم بېرىدۇ؟
8 پات-ئارىدا شەيتاننىڭ قول ئاستىدىكى دۇنيا پۈتۈنلەي يوق قىلىنىدۇ. شۇ ۋاقىتتا پەقەت يەھۋا خۇدا بىزنى قوغداپ، بىزگە كېرەكلىك نەرسىلەرنى، شۇنىڭ ئىچىدە يەيدىغان نېنىمىزنى، بېرىدۇ (ھاباققۇق 3:2، 12—19). شۇڭا، ھازىر خۇداغا يېقىنلىشىپ، ئۇنىڭغا بولغان ئېتىقادىڭىزنى مۇستەھكەملىشىڭىز كېرەك (2-پېترۇس 2:9). شۇ چاغدا، قانداق ۋەزىيەتكە دۇچ كېلىشىڭىزدىن قەتئىينەزەر، داۋۇتقا ئوخشاش: «مەن ھەمىشە يەھۋانى يادىمدا تۇتىمەن. ئۇ ئوڭ يېنىمدا تۇرغاچ، ئەسلا تەۋرەنمەيمەن»،— دەپ ئېيتالايسىز.—زەبۇر 16:8.
ئەڭ ياخشى دوستلار
9. (1) يۇھاننا 6:44-ئايەتتە يېزىلغاندەك، يەھۋا نېمە قىلىدۇ؟ (2) يەھۋانى بىلمەيدىغانلار ۋە يەھۋا گۇۋاھچىلىرى بىلەن تونۇشۇش ئوتتۇرىسىدا قانداق پەرق بار؟
9 يەھۋانى بىلمەيدىغان بىرى بىلەن تونۇشتىڭىز دەيلى. سىز ئۇ كىشى ھەققىدە نېمە بىلىسىز؟ بەلكىم، سىزگە ئۇنىڭ ئىسىمى مەلۇم ۋە سىز ئۇنىڭ تاشقى كۆرۈنۈشىنى تەسۋىرلىيەلەيسىز. ئەمما، ھەقىقەتنى بىلىدىغان كىشىنى ئۇچراتقىنىڭىزدا، ئەھۋال تامامەن باشقىچە بولىدۇ. سىز بۇ كىشىنىڭ يەھۋانى ياخشى كۆرىدىغانلىقىنى ۋە يەھۋا ئۇنىڭ قەلبىدە ياخشى بىر پەزىلەتنى كۆرۈپ، ئۆز ئائىلىسىنىڭ ئەزاسى بولۇشقا جەلپ قىلغانلىقىنى بىلىسىز (يۇھاننا 6:44-نى ئوقۇڭ). يەھۋانىڭ خىزمەتچىسىنىڭ كېلىپ چىقىشى ۋە مەدەنىيىتى مەيلى قانداق بولسۇن، سىز ئۇ ھەققىدە كۆپ نەرسىلەرنى بىلىسىز. ئۇنىڭغىمۇ سىز توغرىسىدا كۆپ نەرسە مەلۇم!
يەھۋا سىزنىڭ سادىق دوستلارغا ئىگە بولۇپ، ئەھمىيەتلىك مەقسەتلەرنى نىشان قىلىشىڭىزنى خالايدۇ (9—12-ئابزاسلارغا قاراڭ)
10، 11. يەھۋانىڭ خىزمەتچىلىرىدە قانداق ئورتاق نەرسە بار ۋە بۇ سىزگە قانداق تەسىر قىلىدۇ؟
10 سىز يەھۋا گۇۋاھچىلىرىنىڭ بىرى بىلەن تونۇشقاندا، ئاراڭلاردا ئورتاق نەرسىلەر كۆپ ئىكەنلىكىنى بىلىسىز. مەسىلەن، ئانا تىلىڭىز پەرق قىلىسمۇ، ئىككىڭلار ئارىسىدا ئورتاق بىر تىل بار، يەنى ھەقىقەتنىڭ ‹ساپ بىر تىلدا› سۆزلەيسىلەر (سەفانىيا 3:9). دېمەك، سىز ھەم شۇ كىشى خۇداغا ئىشىنىپ، ئوخشاش ئەخلاقىي ئۆلچەملەر بويىچە ياشايسىلەر ھەم كېلەچەككە بولغان ئۈمىدىڭلارمۇ بىر. شۇ سەۋەبتىن، بىر-بىرىڭلارغا ئىشىنىشكە ۋە مەڭگۈ ئۈزۈلمەيدىغان دوستلۇق رىشتىلىرىنى باغلاشقا ئاساس بار.
11 يەھۋاغا ئىبادەت قىلسىڭىز، سىز سۆزسىز دۇنيانىڭ جاي-جايلىرىدا ياشايدىغان ئەڭ ياخشى دوستلارنى تاپالايسىز. سىز ئۇلارنى تېخى تونۇمىسىڭىزمۇ، ياخشى دوستلىرىڭىز بار ئىكەنلىكىنى بىلىسىز! شۇنداق ئاجايىپ بەرىكەت بىزدىن باشقا كىمدە بار؟
ئەھمىيەتلىك مەقسەتلەر
12. قانداق ئەھمىيەتلىك مەقسەتلەرنى قويۇشقا بولىدۇ؟
12 ۋەز 11:9—12:1نى ئوقۇڭ. سىزنىڭ قانداق مەقسەتلىرىڭىز بار؟ بەلكىم، مۇقەددەس كىتابنى ھەر كۈنى ئوقۇشقا ياكى جامائەتتە ياخشى جاۋاب بېرىش ئۈچۈن مەقسەت قويغانسىز. ياكى بولمىسا، ۋەز خىزمىتىدە مۇقەددەس كىتابتىن ئۈنۈملۈكرەك پايدىلىنىشقا تىرىشىۋاتقانسىز. ياخشى تەرەپكە ئۆزگەرگەنلىكىڭىزنى بايقىسىڭىز ياكى بۇنى باشقىلار بايقىسا، ئۆزىڭىزنى قانداق ھېس قىلىسىز؟ ئەلۋەتتە، بەك خۇشال بولىسىز! نېمە ئۈچۈن؟ سەۋەبى، سىز ئەيسادىن ئۈلگە ئېلىپ، ئۆزىڭىزنىڭ ئەمەس، خۇدانىڭ ئىرادىسىنى ئورۇنلايسىز.—زەبۇر 40:8؛ پەندى-نەسىھەت 27:11.
13. نېمە ئۈچۈن مۇشۇ دۇنيادا مۇۋەپپەقىيەت قازىنىشنى مەقسەت قىلىشنىڭ ئورنىغا، خۇداغا خىزمەت قىلغان ياخشى؟
13 يەھۋاغا خىزمەت قىلىش ھاياتىڭىزدا بىرىنچى ئورۇندا بولسا، سىز خۇشاللىق تېپىپ، مەنلىك ھايات كەچۈرۈسىز. ئەلچى پاۋلۇس مۇنداق نەسىھەت بەرگەن: «مەھكەم ۋە تەۋرەنمەي تۇرۇڭلار. ھەردائىم رەبنىڭ ئىشى بىلەن مەشغۇل بولۇڭلار. شۇنى بىلىڭلاركى، رەببىمىزنىڭ يولىدا قىلغان ئەجىر-مېھنىتىڭلار بىھۇدە كەتمەيدۇ» (1-كورىنتلىقلار 15:58). بىراق، ئادەم مۇشۇ دۇنيادا مۇۋەپپەقىيەتكە ئېرىشىشنى مەقسەت قىلسا، يەنى بايلىقنى ياكى نام-ئاتاقنى كۆزلىسە، ئۇ ھەقىقىي بەختلىك بولالمايدۇ. ھەتتا ئۇ مۇۋەپپەقىيەت قازانسىمۇ، ھاياتى ئەھمىيەتسىز بولىدۇ (لۇقا 9:25). بىز سۇلايمان پادىشاھتىن ساۋاق ئالالايمىز.—رىملىقلار 15:4.
14. سۇلايماننىڭ ۋەقەسىدىن قانداق ساۋاق ئالدىڭىز؟
14 تارىختىكى ئەڭ باي ۋە شان-شەۋكەتلىك كىشى سۇلايمان پادىشاھ بۇنىڭ راستلىقىنى تەكشۈرمەكچى بولغان. ئۇ ئۆز-ئۆزىگە: «ھۇزۇر-ھالاۋەتنى سىناپ باق، ئۇنىڭدىن قانداق پايدا چىقىدىغانلىقىنى كۆرگىن»،— دېگەن (ۋەز 2:1—10). شۇنداق قىلىپ، ئۇ ھەشەمەتلىك سارايلارنى سالغان ۋە ئۈزۈمزارلارنى بەرپا قىلىپ، گۈزەل باغلارنى ياسىغان. شۇلارنىڭ ھەممىسى ئۇنى بەخت-سائادەتكە ئېرىشتۈردىمۇ؟ سۇلايمان قىلغان ئىشلىرىغا قاراپ: «ھەممىسى بىمەنلىك ۋە شامالنىڭ ئارقىسىدىن قوغلىغاندەك ئىش»،— دېگەن. كېيىن: «ھېچقانداق بىر پايدىلىق ئىش يوق ئىكەن» دەپ، خۇلاسە چىقارغانىدى (ۋەز 2:11). سۇلايماننىڭ ۋەقەسىدىن سىزمۇ شۇنداق ساۋاق ئالدىڭىزمۇ؟
15. سىزگە نېمە ئۈچۈن ئېتىقاد كېرەك ۋە زەبۇر 32:8-ئايەتكە ئاساسلانغاندا، ئېتىقادنىڭ قانداق پايدىسى بار؟
15 بەزى ئادەملەر خاتالىق ئۆتكۈزۈپ، بۇرنىغا يېمىگىچە ساۋاق ئالمايدۇ. يەھۋا سىزنىڭ شۇنداق ئەھۋالدا بولۇشىڭىزنى خالىمايدۇ. خۇدا سىزنىڭ ئۇنىڭغا قۇلاق سېلىپ، ئىتائەت قىلىشىڭىزنى خالايدۇ. شۇنداق قىلىش ئۈچۈن ئېتىقاد كېرەك. ئەمما، ئېتىقادىڭىزغا تايىنىپ قارار قىلسىڭىز، بۇنىڭغا ھەرگىز ئۆكۈنمەيسىز. يەھۋا ھەرگىز ‹ئۇنىڭ ئىسىمى ئۈچۈن كۆرسەتكەن مېھىر-مۇھەببىتىڭىزنى› ئۇنتۇمايدۇ (ئىبرانىيلار 6:10). شۇڭا، ئېتىقادىڭىزنى مۇستھەكەملەش ئۈچۈن كۆپ كۈچ چىقىرىڭ. شۇ چاغدا، ھاياتىڭىزدا توغرا قارارلارنى قوبۇل قىلىسىز ۋە ئاسماندىكى ئاتىڭىزنىڭ نېمىنىڭ سىز ئۈچۈن ئەڭ ياخشى ئىكەنلىكىنى بىلىدىغانلىقىنى چۈشىنىسىز.—زەبۇر 32:8-نى ئوقۇڭ.
ھەقىقىي ئەركىنلىك
16. بىز نېمە ئۈچۈن ئەركىنلىكىمىزنى قەدىرلىشىمىز ۋە ئۇنى دانالىق بىلەن ئىشلىتىشىمىز كېرەك؟
16 پاۋلۇس: «يەھۋا روھتۇر. قەيەردە يەھۋانىڭ مۇقەددەس روھى بار بولسا، ئۇ يەردە ئەركىنلىك باردۇر»،— دەپ يازغان (2-كورىنتلىقلار 3:17). يەھۋا ئەركىنلىكنى ياخشى كۆرىدۇ ۋە سىزنىمۇ ئەركىنلىكنى ياخشى كۆرىدىغان قىلىپ ياراتقان. ئەمما، ئۇ ئەركىنلىكىڭىزدىن دانالىق بىلەن پايدىلىنىشىڭىزنى خالايدۇ. شۇ چاغدا بۇ سىزنى قوغدايدۇ. بەلكىم، تەڭتۇشلىرىڭىز شەھۋانىي مەزمۇنلاردىكى نەرسىلەرنى كۆرىدۇ، ئەخلاقسىز ھايات كەچۈرىدۇ ياكى خەتەرلىك تەنتەربىيە تۈرلىرى بىلەن شۇغۇللىنىپ، ھاياتىنى خەتەرگە تەۋەككۈل قىلىدۇ. ياكى بولمىسا، ئۇلار ئىسپىرتلىق ئىچىملىكلەرگە ياكى زەھەرلىك چېكىملىكلەرگە خۇمار بولۇشى مۇمكىن. دەسلەپتە بۇ نەرسىلەر قىزىقارلىق كۆرۈنۈشى مۇمكىن، بىراق نەتىجىدە، ئېغىر كېسەلگە گىرىپتار بولۇش، خۇمار بولۇش، ھەتتا ئۆلۈپ كېتىشتەك يامان ئاقىۋەتكە ئېلىپ كېلىدۇ (گالاتىيالىقلار 6:7، 8). شۇنداق ياشلار ئەركىن ياشاۋاتىمىز دەپ ئويلىسىمۇ، ئەمەلىيەتتە ئۇلار ئەركىن ئەمەس.—تىتۇس 3:3.
17، 18. (1) خۇداغا ئىتائەت قىلىش قانداقلارچە بىزنى ھەقىقىي ئەركىنلىككە ئېرىشتۈرىدۇ؟ (2) نېمە ئۈچۈن ئادەم-ئاتا بىلەن ھاۋا-ئانا بىزگە قارىغاندا كۆپرەك ئەركىنلىككە ئىگە بولغان؟
17 خۇداغا ئىتائەت قىلىش ئۆزىمىز ئۈچۈن كۆپ پايدىلىق. بۇ سالامەتلىكىمىزگە ياخشى تەسىر قىلىدۇ ۋە بىزنى ھەقىقىي ئەركىنلىككە ئېرىشتۈرىدۇ (زەبۇر 19:7—11). ئەركىنلىكىڭىزدىن دانالىق بىلەن پايدىلانسىڭىز، باشقىچە قىلىپ ئېيتقاندا خۇدانىڭ مۇكەممەل قانۇن-پرىنسىپلىرىغا ئەمەل قىلسىڭىز، خۇداغا ۋە ئاتا-ئانىڭىزغا ئىشەنچىلىك ئادەم ئىكەنلىكىڭىزنى كۆرسىتىسىز. ئاتا-ئانىڭىز سىزگە كۆپرەك ئىشىنىپ، كۆپرەك ئەركىنلىك بېرىدۇ. پات-ئارىدا، يەھۋا سادىق خىزمەتچىلىرىنى، يازمىلاردا تىلغا ئېلىنغان «خۇدا پەرزەنتلىرى ئىگە بولىدىغان شەرەپلىك ئەركىنلىككە»، يەنى ھەقىقىي ئەركىنلىككە ئېرىشتۈرىدىغانلىقىنى ۋەدە قىلىدۇ.—رىملىقلار 8:21.
18 ئادەم-ئاتا بىلەن ھاۋا-ئانىدا شۇنداق ئەركىنلىك بولغان. ئېرەم بېغىدا خۇدا ئۇلارغا پەقەت بىر قانۇننى بەرگەن: يەنى ئۇلارنىڭ بىر دەرەخنىڭ مېۋىسىنى يېيىشىنى مەنئىي قىلغانىدى (يارىتىلىش 2:9، 17). سىزنىڭچە، بۇ قانۇن ئادالەتسىز ۋە ئەمەل قىلىش قىيىن بولغانمۇ؟ ئەلۋەتتە، ياق! ئويلاپ بېقىڭ، ئادەملەر قانچىلىك كۆپ قانۇنلارنى چىقىرىپ، ئۇلارغا بويسۇنۇشنى تەلەپ قىلىدۇ. لېكىن، يەھۋا خۇدا ئادەم-ئاتا بىلەن ھاۋا-ئانىغا بىرلا قانۇننى بەرگەن.
19. يەھۋا بىلەن ئەيسا ئەركىن بولۇشىمىز ئۈچۈن بىزگە نېمىلەرنى ئۆگىتىدۇ؟
19 يەھۋا — ناھايىتى دانا خۇدا. ئۇ بىزگە كۆپ قانۇنلارنى بېرىشنىڭ ئورنىغا، مېھىر-مۇھەببەت قانۇنىغا بويسۇنۇشنى سەۋر-تاقەت بىلەن ئۆگىتىدۇ. يەھۋا بىزنى ئۇنىڭ پرىنسىپلىرىغا ئەمەل قىلىش ۋە يامانلىقنى ئۆچ كۆرۈشكە ئۈندەيدۇ (رىملىقلار 12:9). ئەيسا تاغدىكى تەلىمىدە ئادەملەرنىڭ يامان ئىشلارنى قىلىدىغانلىقىنىڭ سەۋەبىنى چۈشەندۈرگەنىدى (مەتتا 5:27، 28). يېڭى دۇنيادا خۇدا پادىشاھلىقىنىڭ پادىشاھى سۈپىتىدە ئەيسا بىزگە ياخشى بىلەن يامانغا ئۆزىگە ئوخشاش كۆز قاراشتا بولۇشنى ئۆگىتىشنى داۋاملاشتۇرىدۇ (ئىبرانىيلار 1:9). بىزنىڭ ئەقىل-ھوشىمىز بىلەن سالامەتلىكىمىز مۇكەممەل بولىدۇ. تەسەۋۋۇر قىلىپ كۆرۈڭە، بىز يەنە يامان ئىشلارنى قىلىشقا ئازدۇرۇلمايمىز ۋە نامۇكەممەللىك سەۋەبلىك ئازاب-ئوقۇبەتلەرنى چەكمەيمىز. شۇ چاغدا، بىز يەھۋا ۋەدە قىلغان «شەرەپلىك ئەركىنلىككە» ئېرىشىپ، ھۇزۇرلىنىمىز!
20. (1) يەھۋا ئەركىنلىكىنى قانداق قوللىنىدۇ؟ (2) سىز ئۇنىڭدىن قانداق ئۈلگە ئالالايسىز؟
20 شۇنداق بولسىمۇ، يېڭى دۇنيادا ئەركىنلىكىمىزنىڭ چەكلىرى بولىدۇ. ئەگەر بىزدە خۇداغا ۋە باشقىلارغا مېھىر-مۇھەببەت بولسا، بىز بۇ چەكلەردىن چىقمايمىز. بىز مېھىر-مۇھەببەت كۆرسەتكەندە، يەھۋادىن ئۈلگە ئالىمىز. يەھۋانىڭ ئەركىنلىكى چەكسىز بولسىمۇ، ئۇ ھەممىنى مېھىر-مۇھەببەت بىلەن قىلىدۇ. ئۇ بىزگىمۇ مېھىر-مۇھەببەت كۆرسىتىدۇ (1-يۇھاننا 4:7، 8). دېمەك، بىز يەھۋادىن ئۈلگە ئالساقلا، ھەقىقىي ئەركىنلىككە ئېرىشەلەيمىز.
21. (1) داۋۇت يەھۋا ھەققىدە نېمە دېگەن؟ (2) كېلەركى ماقالىدە نېمىنى مۇھاكىمە قىلىمىز؟
21 سىز يەھۋانىڭ ھەممە بەرىكەتلىرى ئۈچۈن مىننەتدارمۇ؟ ئۇ سىزگە روھىي ئوزۇقلۇق، ئەڭ ياخشى دوستلار، ئەھمىيەتلىك مەقسەتلەر ۋە كېلەچەكتە ھەقىقىي ئەركىنلىككە ئېرىشىش ئۈمىدىنى ۋە يەنە باشقا ئاجايىپ سوۋغاتلارنى بەردى (زەبۇر 103:5). بەلكىم، سىز داۋۇتنىڭ زەبۇر 16:11-ئايەتتىكى: «سەن كۆرسىتىپ بېرىسەن ھاياتلىق يولىنى ماڭا، تولۇپ تاشقاندۇر ھۇزۇرۇڭ شاد-خۇراملىققا، مەڭگۈلۈك بەخت-سائادەت باردۇر ئوڭ قولۇڭدا»،— دېگەن سۆزلىرىگە قوشۇلىدىغانسىز. كېلەركى ماقالىدە، بىز زەبۇرنىڭ 16-بابىدىكى باشقا قىممەتلىك ھەقىقەتلەرنى ھەم مۇھاكىمە قىلىمىز. بۇ سىزگە ئەڭ ياخشى ھايات يولىدا مېڭىشقا ياردەم بېرىدۇ!
