مىننەتدار بولۇڭلار
سىز ئۆزىڭىزنى مىننەتدار ئادەم دەپ ھېسابلامسىز؟ ھەربىرىمىز بۇ توغرۇلۇق ئويلىشىمىز كېرەك. مۇقەددەس كىتابتا بىزنىڭ زامانىمىزدا نۇرغۇن ئادەملەرنىڭ «ناشۈكۈر» بولىدىغانلىقى ئالدىن-ئالا ئېيتىلغان (2-تىموت. 3:2). بەلكىم، سىز مىننەتدارلىقنى بىلمەيدىغان ئادەملەرنى ئۇچراتقانسىز. ئۇلارنىڭ ئويىچە، ھەممىسى ئۇلار ئۈچۈن بىر ئىش قىلىشى ياكى بىر نەرسە بېرىشى كېرەك ۋە ئۇلار شۇنىڭغا لايىق، رەھمەت ئېيتىشنىڭ ھاجىتى يوق دەپ قارايدۇ. بەلكىم، شۇنداق ئادەملەرنىڭ قېشىدا بولۇشنى ياقتۇرمايدىغانسىز.
لېكىن، يەھۋا خۇدا ئۆز خىزمەتچىلىرىنى: «مىننەتدار بولۇڭلار»،— دەپ چاقىرىدۇ. شۇڭا، بىز ‹ھەممە نەرسە ئۈچۈن شۈكۈر ئېيتىشىمىز› لازىم (كولوسى. 3:15؛ 1-سالونىكا. 5:18). ئەمەلىيەتتە، مىننەتدارلىق روھىنى يېتىلدۈرۈش ئۆزۈمىزگە پايدا ئېلىپ كېلىدۇ. ھازىر بۇنىڭ بىرنەچچە سەۋەبىنى كۆرۈپ چىقىمىز.
مىننەتدارلىق ۋە ئۆزۈمىزگە بولغان ئىجابىي كۆز قاراش
دائىم مىننەتدارلىق بىلدۈرۈشنىڭ بىر مۇھىم سەۋەبى — بۇ ئۆزۈمىزگە ئىجابىي ياكى توغرا كۆز قاراشتا بولۇشقا ياردەم بېرىدۇ. باشقىلارغا رەھمەت ئېيتىدىغان كىشى ئۆزىنى ياخشى ھېس قىلىدۇ ۋە مىننەتدارلىق سۆزلىرىنى ئاڭلىغان كىشىنىڭمۇ كۆڭلى كۆتۈرۈلۈپ قالىدۇ. نېمە ئۈچۈن مىننەتدارلىقنى بىلدۈرۈش بىزنىمۇ، باشقىلارنىمۇ خۇشاللىققا ئېرىشتۈرىدۇ؟ بىر مىسالنى كۆرۈپ چىقايلى. بىرسى سىز ئۈچۈن بىر نەرسىنى قىلىش ئۈچۈن ۋاقىت چىقارسا، دېمەك سىزنى لايىق دەپ قارىغانلىقى سەۋەبلىكتۇر. شۇ كىشى سىزگە كۆڭۈل بۆلىدۇ. سىز ئۇلارنىڭ غەمخورلۇقىنى كۆرگەندە، ئۆزىڭىزنى بەختلىك ھېس قىلىسىز. رۇتمۇ شۇنداق ۋەزىيەتكە دۇچ كەلگەن. بوئاز رۇتقا مەردلىك كۆرسەتكەن. شەك-شۇبھىسىزكى، بوئازنىڭ شۇنداق غەمخورلۇقىدىن رۇت ئۆزىنى ئىنتايىن بەختلىك سەزگەن.—رۇت 2:10—13.
خۇداغا مىننەتدار بولۇش ياكى شۈكۈر ئېيتىش ئالاھىدە مۇھىم. شەك-شۈبھىسىزكى، بەزىدە خۇدا بەرگەن ۋە بېرىۋاتقان روھىي ۋە جىسمانىي سوۋغاتلار ھەققىدە ئويلايسىز (تەكرار. قا 8:17، 18؛ ئەلچى. 14:17). لېكىن، خۇدانىڭ قىلغان ياخشىلىقلىرى توغرۇلۇق يۈزەكى ئويلاپلا قويماي، يېقىنلىرىڭىزغا ۋە سىزگە بەرگەن كۆپ بەرىكەتلەر ئۈستىدىن كۆپرەك چوڭقۇر ئويلاشقا ۋاقىت بۆلۈڭ. يەھۋا خۇدانىڭ مەردلىكى ھەققىدە ئويلىساق، ئۇنىڭغا بولغان مىننەتدارلىقىمىز تېخىمۇ كۈچىيىپ، ئۇ بىزنى قانچىلىك ياخشى كۆرىدىغانلىقى ۋە قەدىرلەيدىغانلىقىنى ھېس قىلىمىز.—1-يۇھاننا 4:9.
لېكىن، يەھۋانىڭ مەردلىكى ۋە بەرىكەتلىرى توغرۇلۇق ئويلىنىپلا قويماي، يەھۋانىڭ ياخشىلىقى ئۈچۈن ئۇنىڭغا مىننەتدارلىقىڭىزنى كۆرسىتىڭ (زەبۇر 100:4، 5). مىننەتدارلىقىنى ئىزھار قىلىدىغان ئادەملەر ئۆزلىرىنى خۇشال ھېس قىلىدۇ.
مىننەتدارلىق دوستلۇق رىشتىلىرىنى مۇستەھكەملەيدۇ
مىننەتدارلىق بىلدۈرۈشنىڭ يەنە بىر سەۋەبى — بۇ دوستلۇق مۇناسىۋەتنى كۈچەيتىدۇ. ھەممىمىز باشقىلارنىڭ بىزنى قەدىرلىشىنى خالايمىز. سىز بىرسىگە چىن يۈرەكتىن رەھمەت ئېيتقاندا، شۇ ئادەم بىلەن تېخىمۇ يېقىن دوستلىشىپ كېتىسىز (رىملىقلار 16:3، 4). شۇنداقلا، مىننەتدار ئادەملەر باشقىلارغا دائىم ياردەم بېرىشكە تەييار. باشقىلار سىزنىڭ ئۇلارغا مېھرىبان ئىكەنلىكىڭىزنى بايقىغاندا، ئۇلارمۇ سىزگە مېھرىبانلىق كۆرسىتىشنى خالايدۇ. دەرھەقىقەت، باشقىلارغا ياردەم بېرىش شاد-خۇراملىققا ئېرىشتۈرىدۇ. ئەيسا دېگەندەك، «بەرمەك ئالماقتىنمۇ زور بەختتۇر».—ئەلچى. 20:35.
كالىفورنىيە ئۇنىۋېرسىتېتىنىڭ پروفېسسورى روبېرت ئېمونسنىڭ ئېيتىشىچە، مىننەتدار بولۇش ئۈچۈن، بىز بىر-بىرىمىزگە مۇھتاج ئىكەنلىكىمىزنى چۈشىنىشىمىز كېرەك. بەزىدە بىز بېرىمىز، باشقا چاغلاردا بولسا بىزگە بېرىلىدۇ. راست، ھاياتىمىز باشقىلارنىڭ بىزنى قوللاپ-قۇۋۋەتلىشىگە ۋە غەمخورلۇق قىلىشىغا باغلىق. مەسىلەن، ئۇلار بىزنى ئېھتىياجلىق ئوزۇق-تۈلۈك بىلەن تەمىنلەيدۇ ياكى تىببىي ياردەم كۆرسىتىدۇ (1-كورىنت. 12:21). مىننەتدار كىشى باشقىلارنىڭ ئۇنىڭ ئۈچۈن قىلغان ياخشىلىقىنى قەدىرلەيدۇ. سىزنىڭ باشقىلارغا مىننەتدارلىق بىلدۈرىدىغان ئادىتىڭىز بارمۇ؟
مىننەتدارلىق ۋە ھاياتقا بولغان كۆز قاراش
مىننەتدارلىق كۆرسىتىشنىڭ يەنە بىر مۇھىم سەۋەبى — بۇ سەلبىي ئەمەس، ئىجابىي نەرسىلەرگە دىققەت ئاغدۇرۇشىڭىزغا ياردەم بېرىدۇ. ئادەمنىڭ ئەقلىنى سۈزگۈچ بىلەن سېلىشتۇرۇشقا بولىدۇ. ئۇ بىزگە ئۆپ-چۆرىمىزدىكى بەزى نەرسىلەرگە دىققەتنى مەركەزلەشتۈرۈپ، باشقىلىرىغا ئېرەن قىلماسلىققا ياردەم بېرىدۇ. مىننەتدار بولسىڭىز، ھاياتتىكى قىيىنچىلىقلارغا ئەمەس، ياخشى نەرسىلەرگە كۆپرەك دىققەت ئاغدۇرالايسىز. قانچە مىننەتدار بولغانسېرى، ياخشى نەرسىلەرگە شۇنچە ياخشى تەرەپنى كۆرىدىغان بولىسىز. شۇنداق قىلىپ، تېخىمۇ مىننەتدار بولالايسىز. بار دىققىتىڭىزنى مىننەتدار بولۇشقا ياردەم بېرىدىغان نەرسىلەرگە قاراتسىڭىز، ئەلچى پاۋلۇسنىڭ «رەببىمىز يولىدا ھەمىشە شاد-خۇرام بولۇڭلار»،— دېگەن سۆزلىرىگە قۇلاق سالالايسىز.—فىلىپى. 4:4.
مىننەتدارلىق سەلبىي ئوي-پىكىرلەردىن نېرى بولۇشقا ياردەم بېرىدۇ. ئوخشاش ۋاقىتنىڭ ئۆزىدە ھەم مىننەتدار بولۇش، ھەم كۆرەلمەسلىك قىلىش، خاپا بولۇش ياكى ئاچچىقلىنىش مۇمكىن ئەمەس. بۇنىڭدىن باشقا، قەلبىدە مىننەتدارلىق بار ئادەملەر مال-دۇنياغا ئانچە قىزىقمايدۇ. ئۇلار كۆپرەك مال-دۇنياغا ئېرىشىشكە تىرىشماي، ئەكسىنچە قولدا بارىغا مىننەتدار بولىدۇ.—فىلىپى. 4:12.
بەرىكەتلىرىڭىز توغرۇلۇق ئويلاڭ
بىز خۇدانىڭ خىزمەتچىلىرى بولغاچقا، شەيتان بىزنىڭ دۇچ كېلىۋاتقان قىيىنچىلىقلار تۈپەيلى قايغۇرۇپ، چۈشكۈنلۈككە چۈشۈشىمىزنى خالايدىغانلىقىنى چۈشىنىمىز. ئۇ سىزنىڭ نارازىلىق روھىنى كۆرسىتىشىڭىزنى خالايدۇ. شۇنداق يامان روھىي كەيپىياتتا بولسىڭىز، ئادەملەرگە خۇش خەۋەرنى يەتكۈزۈش قىيىن بولىدۇ. ئەمەلىيەتتە، مىننەتدارلىق بىلەن مۇقەددەس روھنىڭ مېۋىلىرى ئارىسىدا زىچ باغلىنىش بار. مەسىلەن، يەھۋا بىزگە قىلغان ياخشىلىقىنى كۆرۈپ ۋە ئۇنىڭ كېلەچەك توغرۇلۇق ۋەدىلىرىگە ئىشەنگەندە، قەلبىمىز شاد-خۇراملىققا تولىدۇ.—گالاتىيا. 5:22، 23.
يەھۋا گۇۋاھچىلىرىنىڭ ئارىسىدىكى بىرى بولۇش سۈپىتدە، سىز بەلكىم بۇ ماقالىدە مىننەتدارلىق توغرىسىدا يېزىلغانلارغا قوشۇلىسىز. لېكىن، ھەممىشە مىننەتدار بولۇش ۋە ئىجابىي كۆز قاراشنى ساقلاش ئاسان ئەمەسلىكىنى چۈشىنىسىز. شۇنداق بولسىمۇ، مىننەتدار بولۇش قولۇڭىزدىن كېلىدۇ. بۇنىڭ ئۈچۈن، نېمىلەر ئۈچۈن مىننەتدار ئىكەنلىكىڭىز توغرۇلۇق ئويلاشقا ھەر كۈنى ۋاقىت چىقىرىڭ. شۇنداق قىلسىڭىز، تېخىمۇ مىننەتدار بولۇشنى ئۆگىنىسىز. شۇ چاغدا سىز پەقەت ئۆز قىيىنچىلىقلىرى ھەققىدە ئويلايدىغان كىشىلەرگە قارىغاندا، ئۆزىڭىزنى بەختلىكرەك ھېس قىلالايسىز. خۇدانىڭ ۋە باشقىلارنىڭ سىزنى خۇشال قىلىدىغان ۋە روھىڭىزنى كۆتۈرۈش ئۈچۈن قىلغان ئىشلىرى توغرۇلۇق ئويلىنىڭ. بەلكىم، سىز ھەر كۈنى مىننەتدار بولۇشنىڭ ئىككى-ئۈچ سەۋەبىنى يېزىپ قويسىڭىز بولىدۇ.
تەتقىقاتچىلارنىڭ بايقىشىچە، ئادەملەر باشقىلارغا پات-پات مىننەتدارلىق بىلدۈرسە، مېڭىسىنىڭ ئىشلەش ئىقتىدارىنى ئاشۇرىدىكەن، شۇ ئارقىلىق ھاياتقا ئىجابىي كۆز قاراش بىلەن قاراشقا باشلايدىكەن. مىننەتدار ئادەم بەختلىك ئادەم. شۇڭا، يەھۋا سىزگە تۆككەن بەرىكەتلەر توغرۇلۇق ئويلىنىپ، ياخشى ۋەقەلەرنى ئەستە ساقلاپ قويۇڭ ۋە ھەرقاچان مىننەتدار بولۇڭ. ياخشى ئىشلارغا پەرۋاسىز يۈرمەي، يەھۋاغا «ھەممە نەرسە ئۈچۈن شۈكۈر» ئېيتىڭ. —1-تارىخ. 16:34؛ 1-سالونىكا. 5:18.
