39-تەتقىق ماقالىسى
«زور بىر توپ خالايىق» دېگەن كىملەر؟
«ئاندىن كېيىن قارىسام، ھەر مىللەتلەردىن، قەبىلىلەردىن، خەلقلەردىن ۋە تىللاردىن بولغان ھېچكىم ساناپ بولالمايدىغان زور بىر توپ خالايىق … تەختنىڭ ۋە قوزىنىڭ ئالدىدا تۇرغانلىقىنى كۆردۈم».—ۋەھىي. 7:9.
144-ناخشا ھايات بېرىدىغان خەۋەر
بۇ ماقالىدە a
1. ئەلچى يۇھاننا بىرىنچى ئەسىرنىڭ ئاخىرىدا قانداق قىيىن ئەھۋالغا چۈشۈپ قالغان؟
بىرىنچى ئەسىرنىڭ ئاخىرىدا، ئەلچى يۇھاننا ئىنتايىن قىيىن ئەھۋالغا چۈشكەن ئىدى. شۇ چاغدا، ياشىنىپ قالغان يۇھاننا پاتموس ئارىلىغا سۈرگۈن قىلىنغان. بەلكىم، ئۇ ئاخىرقى ئەلچى بولغان (ۋەھىي. 1:9). ئەلچى يۇھاننا قارشى چىققۇچىلارنىڭ يالغان تەلىملەرنى تارقىتىپ، مەسىھىيلەرنىڭ ئارىسىدا بۆلگۈنچىلىك سېلىۋاتقانلىقىنى بىلگەن. شۇڭا، خۇدا خىزمەتچىلىرىنىڭ ئەمدىلا ئۇچقۇندىغان گۈلخاننىڭ ئوتى ئۆچۈپ قالىدىغاندەك كۆرۈنگەن ئىدى .—يەھۇدا 4؛ ۋەھىي. 2:15، 20؛ 3:1، 17.
ئەلچى يوھاننا ئاق كىيىم كىيگەن، قولىدا خورما شاخلىرىنى تۇتقان «زور بىر توپ خالايىقنى» كۆرگەن (2-ئابزاسىغا قاراڭ)
2. ۋەھىيلەر 7:9—14-ئايەتلەرگە ئاساسەن، يۇھاننا قانداق ۋەھىي كۆرگەن؟ (مۇقاۋىدىكى رەسىمگە قاراڭ)
2 شۇنداق ئېغىر ئەھۋالدا بولغاندا، يۇھاننا بىر ئاجايىپ ۋەھىي كۆرگەنىدى. ۋەھىيدە بىر پەرىشتە باشقا تۆت پەرىشتىگە خۇدانىڭ قۇللىرىنىڭ پىشانىلىرىگە مۆھۈر بېسىلمىغىچە دەھشەتلىك چوڭ بالايىئاپەتنىڭ شاماللىرىنى تۇتۇپ تۇرۇشى كېرەكلىكىنى ئېيتقان (ۋەھىي. 7:1—3). بۇ بىر توپ ئەيسا بىلەن بىللە ئاسماندا ھۆكۈمرانلىق قىلىدىغان 144000دىن تەركىپ تاپقان (لۇقا 12:32؛ ۋەھىي. 7:4). كېيىن، يۇھاننا باشقا بىر زور چوڭ توپنى كۆرۈپ مۇنداق دېگەن: «ئاندىن كېيىن قارىسام، ھەر مىللەتلەردىن، قەبىلىلەردىن، خەلقلەردىن ۋە تىللاردىن بولغان ھېچكىم ساناپ بولالمايدىغان زور بىر توپ خالايىق ئان تون كىيىپ، قوللىرىدا خورما شاخلىرىنى تۇتۇپ، تەختنىڭ ۋە قوزىنىڭ ئالدىدا تۇرغانلىقىنى كۆردۇم» (ۋەھىيلەر 7:9—14-نى ئوقۇڭ). كېلەچەكتە نۇرغۇنلىغان ئادەمنىڭ خۇداغا توغرا يول بىلەن ئىبادەت قىلىدىغانلىقىنى بىلگەندە، يۇھاننانىڭ قانچىلىك خۇشال بولغانلىقىنى كۆز ئالدىڭىزغا كەلتۈرۈپ كۆرۈڭ!
3. (1) يۇھاننا كۆرگەن ۋەھىي نېمە ئۈچۈن ئېتىقادىمىزنى مۇستەھكەملەيدۇ؟ (2) مۇشۇ ماقالىدە نېمىنى مۇھاكىمە قىلىمىز؟
3 بۇ ۋەھىي يۇھاننانىڭ ئېتىقادىنى تېخىمۇ مۇستەھكەملىگەنلىكى شەك-شۈبھىسىز. ۋەھىيدىكى سۆزلەر بۈگۈنكى كۈندە ئورۇنلىنىۋاتقانلىقتىن، بۇ بىزنىڭ ئېتىقادىمىزنى ئۇنىڭدىنمۇ بەكرەك مۇستەھكەملەيدىغانلىقى سۆزسىز! بىز دەھشەتلىك بالايىئاپەتتىن ئامان قېلىپ، يەردە مەڭگۈ ھايات كەچۈرۈش ئۈمىدى بار مىليونلىغان ئادەملەرنىڭ توپلىنىۋاتقانلىقىنى ئۆز كۆزۈمىز بىلەن كۆرۈۋاتىمىز. يەھۋا خۇدا مۇشۇ زور بىر توپ خالايىققا كىملەرنىڭ تەۋە بولىدىغانلىقىنى 80 يىلدىن كۆپرەك ۋاقىت ئىلگىرى ئۆز خەلقىگە ئېچىپ بەرگەن. بۇ زور بىر توپ خالايىقنىڭ ئىككى ئالاھىدىلىكىگە: (1) ئۇنىڭ سانى ۋە (2) ئۇنىڭ ئەزالىرى دۇنيانىڭ جاي-جايلىرىدىن توپلىنىدىغانلىقىغا كۆڭۈل بۆلەيلى. بۇ ئويلار مۇشۇ توپقا تەۋە بولۇشنى ئۈمىد قىلغان ئادەملەرنىڭ ئىشەنچىسىنى مۇستەھكەملەيدۇ.
زور بىر توپ خالايىق قەيەردە ياشايدۇ؟
4. خرىستىئان دىندىكىلەر مۇقەددەس كىتابتىكى قايسى ھەقىقەتنى توغرا چۈشەنمىگەن؟ مۇقەددەس كىتاب تەتقىقاتچىلىرى قانداق كۆز قاراشتا بولغان؟
4 خرىستىئان دۇنياسى خۇداغا بويسۇنىدىغان ئادەملەر يەردە مەڭگۈ ياشايدۇ، دېگەن مۇقەددەس كىتابتىكى ھەقىقەتنى ئۆگەتمەيدۇ (2-كورىنت. 4:3، 4). بۈگۈنكى كۈندە خرىستىئان دىنلارنىڭ كۆپىنچىسى ياخشى ئادەملەر ئۆلگەندىن كېيىن ئاسمانغا كېتىدۇ، دەپ ئۆگىتىدۇ. بىراق، 1879-يىلدىن باشلاپ «كۈزىتىش مۇنارى» ژۇرنىلىنى نەشىر قىلغان مۇقەددەس كىتاب تەتقىقاتچىلىرى باشقىچە كۆز قاراشتا بولغان. ئۇلار خۇدانىڭ يەردە جەننەتنى قايتىدىن ئورنىتىدىغانلىقىنى ۋە مىليونلىغان ئىتائەتچان ئادەملەرنىڭ ئاسماندا ئەمەس، يەر يۈزىدە ياشايدىغانلىقىنى چۈشەنگەن. ئەمما، مۇشۇ زور بىر خالايىققا كىملەر تەۋە بولىدىغانلىقىنى ئېنىق چۈشىنىش ئۈچۈن ۋاقىت كېرەك ئىدى.—مەتتا 6:10.
5. مۇقەددەس كىتاب تەتقىقاتچىلىرى 144000 كىشى ھەققىدە نېمىنى چۈشىنىپ يەتكەن؟
5 مۇقەددەس كىتاب تەتقىقاتچىلىرى يازمىلاردىن بىر توپ ئادەملەرنىڭ «يەردىن سېتىپ ئېلىنىپ»، ئەيسا بىلەن بىرلىكتە ھۆكۈمرانلىق قىلىدىغانلىقىنى چۈشىنىپ يەتكەن (ۋەھىي. 14:3). بۇ توپ خۇداغا بېغىشلانغان ۋە يەردە ساداقەتمەنلىك بىلەن خىزمەت قىلغان 144000 قىزغىن مەسىھىيلەردىن تەركىپ تاپقان. زور بىر توپ خالايىقچۇ؟
6. مۇقەددەس كىتاب تەتقىقاتچىلىرى زور بىر توپ خالايىق ھەققىدە نېمىگە ئىشەنگەن؟
6 يۇھاننا غايىبانە كۆرۈنۈشتە، زور بىر توپ خالايىق «تەختنىڭ ۋە قوزىنىڭ ئالدىدا تۇرغانلىقىنى» كۆرگەنىدى (ۋەھىي. 7:9). مۇقەددەس كىتاب تەتقىقاتچىلىرى مۇشۇ سۆزلەرنىڭ ئاساسىدا زور بىر تۈپ خالايىق ھەم 144000 كىشىگە ئوخشاش ئاسماندا ياشايدۇ، دېگەن يەكۈنگە كەلگەن. ئەگەر بۇ ئىككى توپ تەڭ ئاسماندا ياشايدىغان بولسا، ئۇنداقتا ئۇلار بىر-بىرىدىن قانداق پەرىقلىنىدۇ؟ مۇقەددەس كىتاب تەتقىقاتچىلىرى زور بىر توپ خالايىق يەردە ياشىغان ۋاقتىدا خۇداغا پۈتۈنلەي سادىق ئىتائەت قىلمىغان ئادەملەردىن ئىبارەت بولىدۇ، دەپ ئويلىغان. گەرچە شۇنداق ئادەملەر مۇقەددەس كىتابتىكى ئەخلاقىي ئۆلچەملەر بويىچە ياشىغان بولسىمۇ، بەزىلىرى بەلكىم يەنىلا چېركاۋنىڭ ئەزالىرى بولۇپ قالغان. مۇقەددەس كىتاب تەتقىقاتچىلىرىنىڭ ئويىچە، شۇ ئادەملەر خۇدانى ياخشى كۆرسىمۇ، ئەيسا بىلەن ھۆكۈمرانلىق قىلىش ئۈچۈن مېھىر-مۇھەببىتى يېتەرلىك بولمىغان. شۇڭا، زور بىر توپ خالايىق ئاسماندىكى تەختنىڭ ئالدىدا تۇرۇشقا لايىق بولسىمۇ، تەختتە ئولتۇرۇشقا نالايىق، دەپ ئويلىغان.
7. مۇقەددەس كىتاب تەتقىقاتچىلىرىنىڭ ئويىچە، مەسىھنىڭ ھۆكۈمرانلىقى ۋاقتىدا يەردە كىملەر ياشايدۇ؟ ئۇلار قەدىمدە ياشىغان سادىق ئەر كىشىلەر توغرۇلۇق قانداق ئويدا بولغان؟
7 ئۇنداقتا، كىملەر يەر يۈزىدە ياشايدۇ؟ مۇقەددەس كىتاب تەتقىقاتچىلىرى 144000 ۋە زور بىر توپ خالايىق ئاسمانغا توپلانغاندا، مىليونلىغان ئادەملەر يەردە ياشاش پۇرسىتىگە ۋە خۇدانىڭ بەرىكەتلىرىگە ئېرىشىدۇ، دەپ ئىشەنگەن. ئۇلار شۇ مىليونلىغان ئادەملەرنىڭ مەسىھنىڭ مىڭ يىللىق ھۆكۈمرانلىقىدىن ئىلگىرى يەھۋا خۇداغا خىزمەت قىلىشىنىڭ ھاجىتى يوق، دەپ ئويلىغان. ئۇلار يەنە يەردە ياشايدىغان بۇ زور بىر توپ ئادەملەر يەھۋا توغرۇلۇق بىلىمنى مەسىھنىڭ مىڭ يىللىق ھۆكۈمرانلىقى مەزگىلىدە ئالىدۇ دەپ ئويلىغان ئىدى. ئاندىن يەھۋانىڭ ئۆلچەملىرىگە ئەمەل قىلغانلار مەڭگۈ ياشايدۇ، ئەمەل قىلمىغانلار بولسا ئۆلۈپ كېتىدۇ دېگەن ئوي-پىكىردە بولغان. شۇنداقلا مۇقەددەس كىتاب تەتقىقاتچىلىرىنىڭ ئويىچە، شۇ ۋاقىتتا يەر يۈزىدە «شاھزادىلەر» سۈپىتىدە خىزمەت قىلىدىغانلار، يەنى مەسىھ يەرگە كېلىشىدىن ئاۋۋال ياشىغان ساداقاتمەن ئەر كىشىلەر، مىڭ يىلنىڭ ئاخىرىدا ئاسماندا ياشاش مۇكاپىتىغا ئىگە بولۇشى كېرەك ئىدى.—زەبۇر 45:16.
8. مۇقەددەس كىتاب تەتقىقاتچىلىرى قانداق ئۈچ توپ بار دەپ ئويلىغان؟
8 مۇقەددەس كىتاب تەتقىقاتچىلىرى ئۈچ توپ بار، دەپ چۈشەنگەن: (1) ئەيسا بىلەن ئاسماندا ھۆكۈمرانلىق قىلىدىغان 144000 كىشى؛ (2) ئاسماندا ئەيسانىڭ تەختى ئالدىدا تۇرىدىغان، خۇداغا ئانچە قىزغىن خىزمەت قىلمىغان زور بىر توپ خالايىق ۋە (3) مەسىھنىڭ مىڭ يىللىق ھۆكۈمرانلىقى ۋاقتىدا يەھۋا خۇدا توغرۇلۇق بىلىم ئالىدىغان مىليونلىغان ئادەملەر b. بىراق، ھەقىقەت نۇرى پارلاپ يورۇغانسېرى، يەھۋا خۇدانىڭ ياردىمى بىلەن ئۇلار زور بىر توپ خالايىققا كىملەر كىرىدىغانلىقىنى ئېنىقراق چۈشەنگەن.—پەند. نە 4:18.
ھەقىقەت نۇرى پارلاپ يورۇغانسېرى
1935-يىلى ئۆتكۈزۈلگەن چوڭ يىغىلىشتا يەردە ياشاش ئۈمىدىگە ئىگە بولغان نۇرغۇن ئادەملەر چۆمۈلدۈرۈلگەن (9-ئابزاسقا قاراڭ)
9. (1) زور بىر توپ خالايىق قايسى مەنىدە «تەختنىڭ ۋە قوزىنىڭ ئالدىدا» تۇرىدۇ؟ (2) ۋەھىيلەر 7:9-ئايەت توغرۇلۇق يېڭى چۈشەنچە نېمە ئۈچۈن ئەقىلگە مۇۋاپىق، دەپ ئېيتىشقا بولىدۇ؟
9 يۇھاننانىڭ ۋەھىيسىدىكى زور بىر توپ خالايىققا كىملەر كىرىدىغانلىقى 1935-يىلى ئېنىق بولغان. يەھۋا گۇۋاھچىلىرى «تەختنىڭ ۋە قوزىنىڭ ئالدىدا» تۇرۇش ئۈچۈن زور بىر توپ خالايىقنىڭ ئاسماندا بولۇشىنىڭ ھاجىتى يوق ئىكەنلىكىنى چۈشەنگەن ئىدى. ئۇلار تەختنىڭ ئالدىدا سىمۋوللۇق مەنىدە تۇرىدۇ. زور بىر توپ خالايىق يەردە ياشىسىمۇ، ئۇلار يەھۋانىڭ ھوقۇقىنى ئېتىراپ قىلىش ۋە ئۇنىڭ سۆزلىرىگە قۇلاق سېلىش ئارقىلىق «تەختنىڭ ئالدىدا» تۇرالايدۇ (يەشايا 66:1). «قوزىنىڭ ئالدىدا» تۇرۇش ئۈچۈن ئۇلار ئەيسانىڭ تۆلەم قۇربانلىقىغا ئىشەنچ باغلىغانلىقىنى كۆرسىتىشى كېرەك. شۇنىڭغا ئوخشاش، مەتتا 25:31، 32-ئايەتلەردە «پۈتكۈل مىللەتلەر»، شۇنىڭ ئىچىدە يامانلىق قىلغۇچىلارمۇ ئەيسانىڭ شەرەپلىك تەختى ئالدىغا توپلىنىدىغانلىقى يېزىلغان. پۈتكۈل مىللەتلەر خەلقلەر ئاسماندا ئەمەس، يەردە بولىدىغانلىقى ئېنىق. شۇڭا، 1935-يىلى ئۆزگەرگەن بۇ چۈشەنچە ئەقىلگە مۇۋاپىق. مۇقەددەس كىتابتا زور بىر توپ خالايىق ئاسمانغا ئېلىپ چىقىلىدىغانلىقى توغرۇلۇق ھېچنەرسە يېزىلمىغان. دېمەك، پەقەتلا بىر توپ، يەنى ئەيسا بىلەن بىللە «يەر ئۈستىدىن پادىشاھلىق قىلىدىغان» 144000 كىشى، ئاسماندا مەڭگۈ ياشاش ئۈمىدىگە ئىگە.—ۋەھىي. 5:10.
10. نېمە ئۈچۈن زور بىر توپ خالايىق مەسىھنىڭ مىڭ يىللىق ھۆكۈمرانلىقىدىن ئىلگىرى يەھۋا خۇدا توغرۇلۇق بىلىم ئېلىپ، ئۇنىڭغا ئىبادەت قىلىشى لازىم؟
10 1935-يىلدىن تارتىپ، يەھۋا گۇۋاھچىلىرى يۇھاننا كۆرگەن ۋەھىيدىكى زور بىر توپ خالايىق يەردە مەڭگۈ ياشاش ئۈمىدىگە ئىگە بولغان سادىق مەسىھىيلەردىن ئىبارەت ئىكەنلىكىنى چۈشەنگەن. دەھشەتلىك چوڭ بالايىئاپەتتىن ئامان قېلىش ئۈچۈن، ئۇلار مەسىھنىڭ مىڭ يىللىق ھۆكۈمرانلىقىدىن ئىلگىرى يەھۋا خۇدا توغرۇلۇق بىلىم ئېلىپ، ئۇنىڭغا ئىبادەت قىلىشى لازىم. شۇنىڭدەك، يەنە «يۈز بېرىدىغان بۇ بارلىق ۋەقەلەردىن ئامان-ئېسەن» ئۆتۈش ئۈچۈن، ئۇلار ئەيسانىڭ مىڭ يىللىق ھۆكۈمرانلىقى باشلىنىشتىن ئاۋۋال مۇستەھكەم ئېتىقادى بار ئىكەنلىكىنى كۆرسىتىشى كېرەك.—لۇقا 21:34—36.
11. مۇقەددەس كىتاب تەتقىقاتچىلىرى نېمە ئۈچۈن مىڭ يىللىق ھۆكۈمرانلىقنىڭ ئاخىرىدا بەزىلەر ئاسمانغا ئېلىپ كېتىلىدۇ دەپ ئويلىغان؟
11 مەسىھنىڭ مىڭ يىللىق ھۆكۈمرانلىقىنىڭ ئاخىرىدا يەردىكى بەزى سادىق خىزمەتچىلەر ئاسمانغا ئېلىپ كېتىلىدۇ، دېگەن ئوي-پىكىر توغرۇلۇق نېمە، دەپ ئېيتىشقا بولىدۇ؟ بۇ توغرۇلۇق «كۈزىتىش مۇنارى» 1913-يىل 15-فېۋرال سانىدا يېزىلغان. بۇ ژۇرنالدا شۇنداق سوئال قويۇلغان: «خۇداغا ئانچە قىزغىن خىزمەت قىلمىغان مەسىھ ئەگەشكۈچىلىرى ئاسماندا ياشىسا، قەدىمدە ياشىغان ساداقەتمەن ئەر كىشىلەر نېمە ئۈچۈن يەردە ياشىشى كېرەك؟» شۇنداق ئوي-پىكىردە بولۇشقا: (1) زور بىر توپ خالايىق ئاسماندا ياشايدۇ ۋە (2) زور بىر توپ خالايىق ئانچە قىزغىن ئەمەس مەسىھ ئەگەشكۈچىلىرىدىن تەركىپ تاپقان دېگەن ئىككى ناتوغرا ئوي-پىكىر تەسىر قىلغان.
12، 13. مۇكاپاتقا ئېرىشىش توغرۇلۇق مەسىھ قىلىنغانلار ۋە زور بىر توپ خالايىق نېمىنى چۈشىنىدۇ؟
12 كۆرگىنىمىزدەك، 1935-يىلدىن تارتىپ يەھۋا گۇۋاھچىلىرى يۇھاننا كۆرگەن ۋەھىيدىكى زور بىر توپ خالايىق ئارماگېدوندا ئامان قالىدىغانلار ئىكەنلىكىنى ئېنىق چۈشەنگەن. ئۇلار «دەھشەتلىك بالايىئاپەتنى بېشىدىن ئۆتكۈزۈپ كەلگەنلەردۇر» ۋە يەر يۈزىدە جاراڭلىق ئاۋاز بىلەن: «نىجاتلىقىمىز ئۈچۈن تەختتە ئولتۇرغان خۇدايىمىزغا ھەم قوزىغا قەرزدارمىز»،— دەپ ۋارقىرىشىدۇ (ۋەھىي. 7:10، 14). بۇنىڭدىن باشقا، مۇقەددەس يازمىلاردا ئاسماندىكى ھايات ئۈچۈن تىرىلگەن كىشىلەر قەدىمدە ياشىغان سادىق خىزمەتچىلەردىن ياخشىراق بىر نەرسىگە ئېرىشىدىغانلىقى ئېيتىلغان (ئىبرانىي. 11:40). قېرىنداشلار زور بىر توپ خالايىق توغرۇلۇق ھەقىقەتنى چۈشەنگەندە، يەردە ياشاش ئۈمىدى توغرۇلۇق ۋەز قىلىشنى ۋە ئادەملەرنى يەھۋاغا خىزمەت قىلىشقا قىزغىنلىق بىلەن چاقىرىشنى باشلىغان.
13 زور بىر توپ خالايىق ئۆزلىرىنىڭ يەردە ياشاش ئۈمىدى بار بولغىنى ئۈچۈن بەك خۇشال. ساداقەتمەن خىزمەتچىلىرىنىڭ يەردە ياكى ئاسماندا ياشىشىنى يەھۋا خۇدا ئۆزى قارار قىلىدىغانلىقىنى ئۇلار ياخشى بىلىدۇ. يەھۋانىڭ تۆلەم قۇربانلىقى ئارقىلىق كۆرسەتكەن مېھىر-شەپقىتى تۈپەيلى مۇكاپاتقا ئېرىشىدىغانلىقىنى مەسىھ قىلىنغانلارمۇ ۋە زور بىر توپ خالايىقمۇ چۈشىنىدۇ.—رىملىقلار 3:24.
زور بىر توپ خالايىقنىڭ سانى
14. نېمە ئۈچۈن 1935-يىلى نۇرغۇن كىشىلەر زور بىر توپ خالايىق توغرۇلۇق يېزىلغان ۋەھىيلەرنىڭ قانداق ئورۇندالغانلىقىنى بىلگىسى كەلگەن؟
14 يەھۋا گۇۋاھچىلىرى 1935-يىلى يۇھاننا كۆرگەن ۋەھىينى ئېنىقراق چۈشەنگەندە، يەردە ياشاشنى ئۈمىد قىلىدىغان زور بىر توپ خالايىقنىڭ سانى قانداق كۆپىيدىغانلىقىنى بىلىشنى خالىغان. مەسىلەن، شۇ چاغدا 12 ياشتا بولغان رونالد پاركىن مۇنداق دەيدۇ: «دۇنيا يۈزى بويىچە 56000 ۋەز ئېيتقۇچى بولغان ئىدى ۋە ئۇلارنىڭ تەڭدىن تولىسى مەسىھ قىلىنغانلار بولغان. شۇ چاغدا زور بىر توپ، ئۇنچە چوڭ زور بىر توپ خالايىق بولۇپ كۆرۈنمىگەن ئىدى».
15. زور بىر توپ خالايىقنىڭ سانى قانداق داۋاملىق كۆپەيگەن؟
15 كېيىنكى نەچچە ئون يىللار داۋامىدا، ياتئەل خەلقى ئارىسىدا ۋەز ئېيتقۇچىلار [مىسسىئونېرلار] كۆپلىگەن دۆلەتلەرگە ئەۋەتىلىپ، يەھۋا گۇۋاھچىلىرىنىڭ سانى بارغانسېرى ئۆسكەن. ئاندىن ئۇلار 1968-يىلى «مەڭگۈ ھاياتقا يېتەكلەيدىغان ھەقىقەت»، دېگەن كىتابنىڭ ياردىمى بىلەن ئادەملەرگە مۇقەددەس كىتابتىكى ھەقىقەتنى ئۆگىتىشنى باشلىغان. بۇ كىتابتا ھەقىقەت ئاددىي چۈشەندۈرۈلگەن بولۇپ، كەمتەر ئادەملەرنى جەلپ قىلغان. تۆت يىلنىڭ ئىچىدە 500000دىن كۆپ يېڭى شاگىرتلار چۆمۈلدۈرۈلگەن. لاتىن ئامېرىكىسىدا ۋە باشقا ئەللەردە كاتولىك چېركاۋسىنىڭ تەسىرى كۈچى ئاجىزلىشىۋاتقاندا ۋە شەرقىي ياۋروپا بىلەن ئافرىقىنىڭ بەزى دۆلەتلىرىدە پائالىيىتىمىز رەسمىي تۈردە رۇخسەت قىلىنغاندا، يەنە مىليونلىغان ئادەملەر چۆمۈلدۈرۈلۈش مۇراسىمىدىن ئۆتكەن (يەشايا 60:22). يېقىنقى يىللاردا يەھۋانىڭ تەشكىلاتى ئادەملەرگە مۇقەددەس كىتابتىكى ھەقىقەتنى ئۆگىنىشكە ياردەم بېرىش ئۈچۈن، كۆپلىگەن نەتىجىلىك ۋەز قىلىش قوراللىرىنى نەشىر قىلغان. بۈگۈنكى كۈندە سانى سەككىز مىليوندىن كۆپرەك زور بىر توپ خالايىق توپلىنىۋاتقانلىقىغا گۇمان يوق.
زور بىر توپ خالايىق ھەر مىللەت خەلقىدىن توپلانغان
16. زور بىر توپ خالايىق كىملەردىن توپلانماقتا؟
16 يۇھاننا كۆرگەن ۋەھىينى تەسۋىرلىگەندە، زور بىر توپ خالايىق «ھەر مىللەتلەردىن، قەبىلىلەردىن، خەلقلەردىن ۋە تىللاردىن» چىققان ئادەملەردىن تەركىپ تاپىدىغانلىقىنى يازغان. زەكەرىيا پەيغەمبەرمۇ ئىلگىرى شۇنىڭغا ئوخشاش سۆزلەرنى ئېيتقان: «ئاشۇ كۈنلەردە بارچە مىللەتلەردىن بولغان ھەرخىل تىلدا سۆزلىشىدىغان ئون كىشى بىر يەھۇدىي كىشىنىڭ تونىنىڭ پېشىنى تۇتۇۋېلىپ: ‹بىزمۇ سىلەر بىلەن بارايلى. چۈنكى، بىز خۇدانى سىلەر بىلەن بىللە دەپ ئاڭلىدۇق›،— دېيىشىدۇ».—زەكەرىيا 8:23.
17. ھەرخىل تىللاردا سۆزلەيدىغان ئادەملەرگە ياردەم بېرىش ئۈچۈن گۇۋاھچىلار نېمە قىلىدۇ؟
17 بارلىق خەلقلەردىن ئادەملەرنى توپلاش ئۈچۈن يەھۋا گۇۋاھچىلىرى خۇش خەۋەرنى ھەرقانداق تىللاردا ۋەز قىلىش كېرەكلىكىنى چۈشىنىدۇ. بىز مۇقەددەس كىتابقا ئاساسلانغان ماتېرىياللارنى 130 يىلدىن كۆپرەك ۋاقىت تەرجىمە قىلىپ كەلگەن. لېكىن، بۈگۈنكى كۈندە ماتېرىياللىرىمىز 900دىن ئوشۇق تىللارغا تەرجىمە قىلىنىدۇ، ئېلىپ بېرىلىۋاتقان تەرجىمە ئىشىلىرىنىڭ تارىختا تەڭدىشى يوق! ھەئە، بارچە مىللەتلەردىن زور بىر توپ خالايىق توپلىنىۋاتقانلىقىنى يەھۋا خۇدانىڭ بۈگۈنكى كۈندە قىلىۋاتقان مۆجىزىسى دېسەك خاتالاشمايمىز. مۇقەددەس كىتاب ۋە ئۇنىڭغا ئاساسلانغان ماتېرىياللار كۆپ تىللارغا تەرجىمە قىلىنغانلىقتىن، يەھۋا گۇۋاھچىلىرى ھەرخىل مىللەتتىن بولسىمۇ، ئۇلار يەھۋا خۇداغا بىرلىكتە ئىبادەت قىلماقتا. گۇۋاھچىلارنىڭ قىزغىنلىق بىلەن ۋەز قىلىشى ۋە ئۆزئارا مېھىر-مۇھەببەت كۆرسىتىشى بۇ ھەممىگە مەلۇم. بۇ ئىمان-ئېتىقادىمىزنى مۇستەھكەملەيدۇ، شۇنداق ئەمەسمۇ؟!—مەتتا 24:14؛ يۇھاننا 13:35.
يۇھاننا كۆرگەن ۋەھىينىڭ بىز ئۈچۈن قانداق ئەھمىيىتى بار؟
18. (1) يەشايا 46:10، 11-ئايەتلەردە يېزىلغاندەك، زور بىر توپ خالايىق توغرىسىدىكى پەيغەمبەرلىك سۆزلەرنىڭ ئەمەلگە ئاشۇرۇلغانلىقىغا نېمە ئۈچۈن ھەيران قالمايمىز؟ (2) يەردە ياشاش ئۈمىدى بار بولغانلار نېمە سەۋەبتىن ئۆزلىرىنى بىر نەرسىدىن قۇرۇق قالغاندەك ھېس قىلمايدۇ؟
18 بىز زور بىر توپ خالايىق توغرۇلۇق ۋەھىينى چۈشەنگەنلىكىمىز ئۈچۈن بەك خۇرسەن! يەھۋا خۇدا بۇ پەيغەمبەرلىك سۆزلىرىنى ئاجايىپ تۈردە ئەمەلگە ئاشۇرغانلىقىغا ھېچ ھەيران قالمايمىز (يەشايا 46:10، 11-نى ئوقۇڭ). زور بىر توپ خالايىق يەھۋا ئۇلارغا بەرگەن ئۈمىد ئۈچۈن ئىنتايىن مىننەتدار! ئۇلار خۇدانىڭ روھى بىلەن مەسىھ قىلىنمىغان ئەيسا بىلەن بىللە ئاسماندا ھۆكۈمرانلىق قىلمايدۇ. ئۇلار بۇنىڭ ئۈچۈن ئۆزلىرىنى بىر نەرسىدىن قۇرۇق قالغاندەك ھېس قىلمايدۇ. مۇقەددەس كىتابتا 144000 كىشىنىڭ قاتارىغا تەۋە بولمىغان بولسىمۇ، ئەمما مۇقەددەس روھنىڭ يېتەكچىلىكىدە يۈرگەن كۆپلىگەن خۇدانىڭ سادىق خىزمەتچىلىرى توغرۇلۇق يېزىلغان. ئۇلارنىڭ بىرى — چۆمۈلدۈرگۈچى يەھيا (مەتتا 11:11). يەنە بىرى — داۋۇت پادىشاھ (ئەلچى. 2:34). ئۇلاردىن باشقا يەنە سان-ساناقسىز ئادەملەر يەر يۈزى جەننەتتە ياشاش ئۈچۈن تىرىلىدۇ. تىرىلگەنلەرنىڭ ھەممىسى ۋە زور بىر توپ خالايىق ئۈچۈن، يەھۋاغا سادىق قېلىش ۋە ئۇنىڭ ھۆكۈمرانلىقىنى قوللايدىغانلىقىنى ئىسپاتلاش پۇرسىتى بولىدۇ.
19. يۇھاننا كۆرگەن ۋەھىينىڭ مەنىسىنى چۈشەنسەك، بۇ بىزنى نېمە قىلىشقا دەۋەت قىلىدۇ؟
19 ئىنسانىيەت تارىخىدا بىرىنچى قېتىم بارچە خەلقتىن چىققان مىليونلىغان ئادەملەر خۇداغا بىرلىكتە ئىبادەت قىلىش ئۈچۈن جەم بولغان. مەيلى ئاسماندا ياكى يەردە ياشاش ئۈمىدىگە ئىگە بولايلى، ھەربىرىمىز كۆپرەك ئادەملەرنىڭ «باشقا قويلارنىڭ» ئارىسىغا، يەنى زور بىر توپ خالايىققا قوشۇلۇشىغا ياردەم بېرىش ئۈچۈن بار كۈچىمىزنى چىقىرىشىمىز لازىم (يۇھاننا 10:16). يېقىن-ئارىدا يەھۋا ئالدىن-ئالا ئېيتقاندەك، دەھشەتلىك چوڭ بالايىئاپەت بولىدۇ. شۇ چاغدا، ئۇ ئادەملەرگە ئازاب-ئوقۇبەت ئېلىپ كېلىۋاتقان ھۆكۈمەتلەرنى ۋە دىنلارنى يوق قىلىدۇ. زور بىر توپ خالايىق يەھۋا خۇداغا يەر يۈزىدە مەڭگۈ خىزمەت قىلىش شان-شەرىپىگە ئىگە بولىدۇ.—ۋەھىي 7:14.
55-ناخشا سادىقلار كۆرەر مەڭگۈلۈك ھاياتنى
a بىز يۇھاننانىڭ «زور بىر توپ خالايىق» تۇرغانلىقىنى كۆرگەنلىكى ھەققىدىكى ۋەھىينى مۇھاكىمە قىلىمىز. بۇ شەك-شۈبھىسىزكى، زور بىر توپ خالايىققا تەۋە ئادەملەرنىڭ ئېتىقادىنى مۇستەھكەملەيدۇ.
b «يەھۋا گۇۋاھچىلىرى خۇدا پادىشاھلىقىنى جاكارلايدۇ» (باشقا تىلدا) ناملىق كىتابنىڭ 159—163-بەتلىرىگە قاراڭ.
