12-تەتقىق ماقالىسى
143-ناخشا زۇلمەت دۇنيادىكى نۇر
قاراڭغۇلۇقتىن نېرى تۇرۇپ، يورۇقلۇقتا يۈرۈڭلار
«بۇرۇن بىر چاغلاردا سىلەر قاراڭغۇلۇق ئىدىڭلار، بىراق ھازىر يورۇقلۇق بولدۇڭلار».—ئەفەس. 5:8.
مەكىزى ئىدىيە
ئەفەسلىكلەر 5-بابتا تىلغا ئېلىنغان قاراڭغۇلۇق بىلەن يورۇقلۇق سۆزلىرىدىن نېمىلەرنى ئۆگىنەلەيدىغانلىقىمىزنى بىلىۋالىمىز.
1، 2. (1) قايسى ۋەزىيەت ئاستىدا، پاۋلۇس ئەفەستىكى ئېتىقادداشلىرىغا خەت يازغان؟ (2) بىز قايسى سوئاللارنى مۇھاكىمە قىلىپ چىقىمىز؟
پاۋلۇس رىمدا ئۆيدە نازارەت ئاستىدا بولغاندا، ئۇ ئېتىقادچى قېرىنداشلىرىنى ئىلھاملاندۇرماقچى بولغان. ئۇ ئۇلار بىلەن يۈزمۇ-يۈز كۆرۈشەلمەيتتى. شۇڭا، ئۇ خەت يازغان. شۇ خەتلەرنىڭ بىرى مىلادى 60، 61-يىللىرى ئەفەس شەھىرىدىكى جامائەتكە ئەۋەتىلگەن.—ئەفەس. 1:1؛ 4:1.
2 شۇنىڭدىن ئون يىل ئىلگىرى، پاۋلۇس ئەفەس شەھىرىدە بىر مەزگىل تۇرۇپ، شۇ يەردە خۇش خەۋەرنى يەتكۈزگەن ۋە تەلىم بەرگەن (ئەلچى. 19:1، 8–10؛ 20:20، 21). پاۋلۇس شۇ شەھەردىكى قېرىنداشلارنى ئىنتايىن ياخشى كۆرەتتى ۋە ئۇلارنىڭ يەھۋاغا سادىق بولۇپ قېلىشىغا ياردەم بېرىشنى ئويلىغان. ئەمما، ئۇ نېمە ئۈچۈن مەسىھ قىلىنغان ئېتىقادچىلارغا قاراڭغۇلۇق ۋە يورۇقلۇق ھەققىدە خەت يازغان؟ بارلىق ئەيسانىڭ ئەگەشكۈچىلىرى بۇ نەسىھەت سۆزلىرىدىن قانداق ساۋاق ئالالايدۇ؟ بۇ سوئاللارنىڭ جاۋابىنى بىرلىكتە مۇھاكىمە قىلىپ باقايلى.
قاراڭغۇلۇقتىن يورۇقلۇققا چىقىش
3. ئەلچى پاۋلۇس ئەفەسلىكلەرگە خەت يازغاندا، قانداق ئوخشىتىش سۆزلىرىنى ئىشلەتكەن؟
3 پاۋلۇس ئەفەستىكى ئېتىقادچىلارغا مۇنداق يازغان: «بۇرۇن بىر چاغلاردا سىلەر قاراڭغۇلۇق ئىدىڭلار، بىراق ھازىر يورۇقلۇق بولدۇڭلار» (ئەفەس. 5:8). بۇ يەردە «قاراڭغۇلۇق» ۋە «يورۇقلۇق» دېگەن ئوخشىتىش سۆزلىرىنى ئىشلىتىپ، بىر-بىرىگە پۈتۈنلەي قارشى ئىككى خىل ئەھۋالنى چۈشەندۈرگەن. بىز پاۋلۇسنىڭ نېمە ئۈچۈن ئەفەسلىكلەرگە «بۇرۇن بىر چاغلاردا سىلەر قاراڭغۇلۇق ئىدىڭلار» دېگەنلىكىنى چۈشىنىپ باقايلى.
4. نېمە ئۈچۈن ئەفەسلىكلەرنى دىنىي قاراڭغۇلۇقتا قالغان دېيىشكە بولىدۇ؟
4 دىنىي قاراڭغۇلۇق. ئەفەس شەھىرىدىكى مەسىھ ئەگەشكۈچىلىرى ھەقىقەتنى تونۇشتىن ئىلگىرى يالغان دىنىي كۆز قاراشلار ۋە خۇراپاتلىقلارنىڭ قۇلى بولغان. ئەفەس شەھىرىدە مەشھۇر ئارتېمىس بۇتخانىسى بار ئىدى. قەدىمقى زاماندا كىشىلەر بۇ بۇتخانىنى دۇنيادىكى يەتتە مۆجىزىنىڭ بىرى دەپ قارىغان ۋە ئۇ يەردە بۇتلارغا چوقۇنۇپ، دۇئا قىلىشقان. ھۈنەرۋەنلەر ئارتېمىسنىڭ بۇتخانىسى ۋە ھەيكەللىرىنى ياساش ئارقىلىق سودا-تىجارەت قىلىپ كۆپ پۇل تېپىشقان (ئەلچى. 19:23–27). بۇنىڭدىن باشقا، بۇ شەھەرنىڭ سېھىرۋازلىق بىلەن شۇغۇللىنىشتا داڭقى چىققانىدى.—ئەلچى. 19:19.
5. نېمە ئۈچۈن ئەفەسلىكلەرنى ئەخلاقىي قاراڭغۇلۇقتا قالغان دېيىشكە بولىدۇ؟
5 ئەخلاقىي قاراڭغۇلۇق. ئەفەس خەلقى ئەخلاقسىزلىقتا چېكىدىن ئاشقان بولۇپ، يىرگىنىچلىك ئىشلارنى قىلىش بىلەن داڭقى چىققان. شەھۋانىي پاراڭلار ئادەتتە شەھەر تىياتىرخانىلىرىدا، ھەتتا دىنىي بايراملاردا ئاڭلىنىپ تۇراتتى (ئەفەس. 5:3). ئەفەسلىكلەرنىڭ كۆپىنچىسى «ئار-نومۇسنى ئۇنتۇپ» كەتكەن ئىدى، يەنى بۇ ئىپادىنىڭ ئۇدۇل سۆزمۇ-سۆز مەنىسى «ئاغرىق ئازابىنى ھېس قىلماسلىقنى» بىلدۈرىدۇ (ئەفەس. 4:17–19). ئەفەسلىكلەر ئىلگىرى يەھۋانىڭ توغرا-خاتا ئۆلچەملىرىنى تونۇمىغاندا، ئۇلارنىڭ ۋىجدانى سەزمەس بولۇپ قالغان ياكى ئۇلار يەھۋانىڭ كۆز قاراشلىرىنى نەزەرىگە ئالمىغان ئىدى. شۇڭلاشقا، پاۋلۇس ئۇلارنى «روھىي جەھەتتىن قاراڭغۇلۇقتا قېلىپ، خۇدا سوۋغا قىلغان ھاياتلىقتىن ئايرىلىپ قالدى» دەپ تەسۋىرلىيەلىگەن.
6. نېمە ئۈچۈن پاۋلۇس ئەفەستىكى مەسىھ ئەگەشكۈچىلىرىگە «ھازىر يورۇقلۇق بولدۇڭلار» دېگەن؟
6 ئەفەسلىكلەرنىڭ بەزىلىرى قاراڭغۇلۇقتىن چىقىپ كەتكەن. پاۋلۇس ئۇلار ھەققىدە مۇنداق دەيدۇ: «ھازىر يورۇقلۇق بولدۇڭلار، چۈنكى سىلەر ھەزرىتىمىزگە مەنسۇپ بولدۇڭلار» (ئەفەس. 5:8). ئۇلار ئەمدى مۇقەددەس كىتابتىكى ھەقىقەت نۇرىغا ئەگىشىپ ياشىغان (زەبۇر 119:105). ئەفەسلىكلەر يالغان دىنىي ئۆرپ-ئادەتلەرنى ۋە ئەخلاقسىز قىلمىشلارنى تاشلىغان ئىدى. ئۇلار «خۇدانى ئۈلگە» قىلىپ، پۈتۈن كۈچى بىلەن ئۇنىڭغا خىزمەت قىلغان ۋە ئۇنىڭ كۆڭلىنى خۇرسەن قىلىدىغان ئىشلارنى قىلغان. —ئەفەس. 5:1.
7. نېمە ئۈچۈن بىزنىڭ ۋەزىيىتىمىزنى ئەفەستىكى كۆپىنچە مەسىھ ئەگەشكۈچىلىرىنىڭ ۋەزىيىتىگە ئوخشاپ كېتىدۇ دېيىشكە بولىدۇ؟
7 بىزنىڭ ۋەزىيىتىمىزمۇ دەل شۇنىڭغا ئوخشاپ كېتىدۇ. بىز ھەقىقەتنى بىلىشتىن بۇرۇن دىنىي ۋە ئەخلاقىي جەھەتتىن قاراڭغۇلۇقتا قالغان. بەزىلىرىمىز يالغان دىن بىلەن باغلىنىشى بار بايراملارنى تەبرىكلىگەن. يەنە بەزىلىرىمىز ئەخلاقسىز تۇرمۇش كەچۈرگەن ئىدۇق. ئەمما، بىز يەھۋانىڭ توغرا-خاتا ئۆلچىمىنى بىلگەندىن كېيىن، ھاياتىمىزدا ئۆزگەرتىشلەرنى قىلدۇق. بىز ئۇنىڭ تەلىپىگە ماس ھايات كەچۈرۈشكە باشلىدۇق. نەتىجىدە، بىز نۇرغۇن بەرىكەتلەرگە ئېرىشتۇق (يەشايا 48:17). بىراق، ھازىر بىز قىيىنچىلىقلارغا دۇچ كېلىۋاتىمىز. بىز تاشلاپ چىقىپ كەتكەن قاراڭغۇلۇقتىن يىراق تۇرۇپ، «يورۇقلۇقنىڭ بالىلىرىدەك» يۈرۈشىمىز كېرەك. ئۇنداقتا، بۇنى قانداق قىلالايمىز؟
3.0 by CC Graduate Library, University of Michigan, P.Mich.inv. 6238. Licensed under ,Papyrology Collection Image digitally reproduced with the permission of the
بۈگۈنكى كۈندە ئەمەلىي قوللىنىشقا بولىدىغان ئەلچى پاۋلۇسنىڭ مېھىر-مۇھەببەتلىك مەسلىھىتى (7-ئابزاسقا قاراڭ) b
قاراڭغۇلۇقتىن نېرى تۇرۇش
8. ئەفەسلىكلەر 5:3–5-ئايەتلەرگە ئاساسلانغاندا، ئەفەستىكى ئېتىقادچىلار نېمىلەردىن نېرى تۇرۇشى كېرەك ئىدى؟
8 ئەفەسلىكلەر 5:3–5-نى ئوقۇڭ. ئەفەستىكى ئېتىقادچىلار ئەخلاقىي قاراڭغۇلۇقتىن نېرى تۇرۇش ئۈچۈن يەھۋانى خۇرسەن قىلمايدىغان ئىشلارنى داۋاملىق رەت قىلىشى كېرەك ئىدى. بۇ جىنسىي ئەخلاقسىزلىقنىلا ئەمەس، يەنە شەھۋانىي گەپ-سۆزلەردىنمۇ يىراق تۇرۇشنى ئۆز ئىچىگە ئالغان. ئەفەسلىكلەر شۇنداق ئىشلاردىن يىراق تۇرغاندىلا، «مەسىھنىڭ ۋە خۇدانىڭ پادىشاھلىقىدا مىراسقا ئىگە» بولالايتتى.
9. نېمە ئۈچۈن ئەخلاقسىزلىققا يېتەكلەيدىغان ھەرقانداق ئىشنى قىلىشتىن پەخەس بولۇشىمىز كېرەك؟
9 بىز «قاراڭغۇلۇقنىڭ مېۋىسىز ئىشلىرىغا قايتا شېرىك» بولۇپ قېلىشتىن ساقلىنىش ئۈچۈن داۋاملىق كۈرەش قىلىشىمىز كېرەك (ئەفەس. 5:11). نۇرغۇن مىساللار شۇنى قايتا-قايتا ئىسپاتلىدىكى، بىر ئادەم ناپاك، ئەخلاقسىز ئىشلار ھەققىدىكى پاراڭلار ياكى سۆھبەتلەرنى كۆپ كۆرسە، ئاڭلىسا، ئۇ ئۆزى ئاسانلا خاتا ئىشلارنى قىلىپ قالىدۇ (يارىت. 3:6؛ ياقۇپ 1:14، 15). بىر دۆلەتتە كۆپلىگەن قېرىنداشلار بىر ئىجتىمائىي ئالاقە پروگراممىسى ئارقىلىق سۆھبەتلىشىپ تۇرغان. دەسلەپتە كۆپىنچىلىرى روھىي ئىشلار توغرىسىدا پاراڭلىشىشقا باشلىغان. ئەمما، ۋاقىتنىڭ ئۆتۈشىگە ئەگىشىپ، ئۇلار يەھۋانى خۇرسەن قىلمايدىغان پايدىسىز گەپ-سۆزلەرنى قىلىشقان. ئۇلارنىڭ پاراڭلىرى ئاخىرىدا جىنسىي مۇناسىۋەت ھەققىدە سۆھبەتكە ئايلىنىپ كەتكەن. كېيىن، شۇلاردىن بىرقانچىسى بۇنداق شەھۋانىي سۆھبەتلەرنىڭ ئۆزلىرىنى جىنسىي ئەخلاقسىزلىق قىلىشىغا سەۋەبچى بولغانلىقىنى ئېتىراپ قىلغان.
10. شەيتان قايسى يوللار بىلەن بىزنى ئازدۇرىدۇ؟ (ئەفەسلىكلەر 5:6)
10 شەيتاننىڭ بۇ دۇنياسى بىزنى ئازدۇرۇپ، يەھۋانىڭ نەزىرىدىكى ئەخلاقسىز ۋە ناپاك ئىشلارنى بىزگە ھېچقانداق خاتا ئەمەستەك كۆرستىپ، شۇنىڭغا بىزنى ئىشەندۈرۈشكە ئۇرۇنىدۇ (2-پېتر. 2:19). بىز بۇنىڭدىن ھەيران قالمايمىز! شەيتان ئىبلىس ئۇزۇندىن بۇيان قوللىنىپ كېلىۋاتقان ئۇسۇللاردىن بىرى كىشىلەرنى قايمۇقتۇرۇش. شۇ سەۋەب، كىشىلەر نېمە توغرا، نېمە خاتالىقىنى پەرق قىلالماي قالىدۇ (يەشايا 5:20؛ 2-كورىنت. 4:4). شۇڭلاشقا، بۈگۈنكى كۈندە نۇرغۇنلىغان فىلىملەر، تېلېۋىزور پروگراممىلىرى ۋە تور بەتلەردە يەھۋانىڭ ھەققانىي ئۆلچەم-قائىدىلىرىگە زىت كېلىدىغان ئوي-پىكىرلەرنىڭ تەشۋىق قىلىشىنى ھەرگىزمۇ ئەجەبلىنەرلىك ئەمەس. شەيتان بىزنى ئالداشقا ئۇرۇنۇپ، بۇ دۇنيادا مودا بولۇۋاتقان ناپاك ئىش-ھەرىكەتلەرنى ۋە تۇرمۇش كەچۈرۈش ئۇسۇللىرىنى خاتا دەپ ئويلىماي، بەلكى ئۇلارنى قىزىقارلىق ۋە بىخەتەر دەپ ئويلىشىمىزنى خالايدۇ. —ئەفەسلىكلەر 5:6-نى ئوقۇڭ.
11. ئانجېلانىڭ كەچۈرمىشلىرى ئەفەسلىكلەر 5:7-ئايەتتىكى دانا نەسىھەتكە ئەمەل قىلىش كېرەكلىكىنى قانداق تەكىتلەيدۇ؟ (رەسىمگە ھەم قاراڭ)
11 شەيتان بىزنىڭ يەھۋانىڭ ئۆلچەملىرىگە بويسۇنۇپ ياشىشىمىزنى قىيىنلاشتۇرىدىغان كىشىلەر بىلەن ئالاقە قىلىشىمىزنى خالايدۇ. شۇڭلاشقا، پاۋلۇس ئەفەستىكى قېرىنداشلارنى: «ئۇلارغا شېرىك بولماڭلار» دەپ، خۇدانىڭ نەزىرىدە خاتا سانالغان ئىشلارنى قىلىدىغانلار بىلەن ئارىلاشماسلىققا ئاگاھلاندۇرغان (ئەفەس. 5:7). شۇنى ئۇنتۇپ قالماسلىقىمىز كېرەك: بىز ئالاقىدە بولىدىغان كىشىلەر، پەقەت كۈندىلىك تۇرمۇشىمىزدا ئارىلىشىپ ئۆتىدىغانلاردىن باشقا، يەنە ئىجتىمائىي ئالاقە تورلىرىدا سۆھبەتلىشىدىغانلارنىمۇ ئۆز ئىچىگە ئالىدۇ. دېمەك، بىز قەدىمقى زاماندا ئەفەسلىكلەر دۇچ كەلمىگەن خەتەرگە دۇچ كېلىمىز. ئاسىيادا بىر دۆلەتتە ياشايدىغان ئانجېللا a ئىجتىمائىي ئالاقە تورىنىڭ ئىنتايىن خەتەرلىك ئىكەنلىكىنى تونۇپ يەتكەن. ئۇ مۇنداق دەيدۇ: «بۇ بىر تۇزاققا ئايلىنىپ قېلىپ، ھوشيارلىقىمىزنى ئاستا-ئاستا ئاجىزلاشتۇرىۋېتەلەيدۇ. ئىلگىرى دائىم مۇقەددەس كىتاب پرىنسىپلىرىنى ھۆرمەتلىمەيدىغان كىشىلەر بىلەن «دوست» بولۇشنى ئانچە زىيانلىق ئەمەس دەپ ئويلىدىم. ئاخىرىدا، مەن ھەتتا يەھۋا ياقتۇرمايدىغان تۇرمۇش كەچۈرۈش ئۇسۇلىنى خاتا ئەمەس دەپ ئويلاشقا باشلىدىم». خۇشاللىنارلىق يېرى، كۆيۈمچان ئاقساقاللار ئانجېللانىڭ زۆرۈر ئۆزگەرتىشلەرنى قىلىشىغا ياردەم بەرگەن. ئۇ ھازىر مۇنداق دەيدۇ: «مەن ئوي-پىكىرىمنى ئىجتىمائىي ئالاقە تورلىرىغا ئەمەس، بەلكى يەھۋا ۋە ئۇ ياقتۇرىدىغان ئىشلارغا مەركەزلەشتۈرۈشكە تىرىشىمەن».
دوستلارنى دانالىق بىلەن تاللاش يەھۋا خۇدانىڭ ئۆلچەملىرىگە ئەمەل قىلىشىمىزنى ئاسانلاشتۇرىدۇ (11-ئابزاسقا قاراڭ)
12. يەھۋانىڭ توغرا-خاتا توغرىسىدىكى ئۆلچەملىرىگە بويسۇنۇشىمىزغا نېمە ياردەم بېرىدۇ؟
12 بۇ دۇنيادا نۇرغۇن كىشىلەر ئەخلاقسىز قىلمىشلارنى خاتا ئەمەس دەپ قارايدۇ. بىراق، بىز بۇنداق ناتوغرا كۆز قاراشقا قارىشى كۈرەش قىلىشىمىز كېرەك (ئەفەس. 4:19، 20). چۈنكى، بىز ئاشۇ قىلمىشلارنىڭ خاتالىقىنى ئوبدان بىلىمىز. ئۆز-ئۆزىمىزدىن مۇنداق سوراپ كۆرۈش پايدىلىق: «خىزمەتداشلىرىم، ساۋاقداشلىرىم ياكى يەھۋانىڭ ھەققانىي ئۆلچەملىرىنى ھۆرمەتلىمەيدىغان كىشىلەر بىلەن مۇھىم بولمىغان باردى-كەلدى مۇناسىۋەتلەردە بولۇشتىن ساقلىنىشقا تىرىشىمەنمۇ؟ بەزىلەر ماڭا بۇنداق قىلىش بەكمۇ ئاشۇرۋەتكەنلىك دېسە، جاسارەت بىلەن داۋاملىق يەھۋانىڭ ئۆلچەملىرىنى چىڭ تۇتىمەنمۇ؟» ئۇنىڭدىن باشقا، 2-تىموتىي 2:20–22-ئايەتلەردە كۆرسىتىلگەندەك، بىز جامائەتتە ئېتىقادچىلار ئارىسىدىن دوستلارنى تاللىغاندىمۇ ئېھتىياتچان بولۇشىمىز كېرەك. شۇنى ئۇنتۇپ قالماسلىقىمىز كېرەككى، بەزىلەر بىزنىڭ يەھۋاغا سادىق خىزمەت قىلىشىمىزغا ياردەم قىلالمايدۇ.
«يورۇقلۇقنىڭ بالىلىرىدەك يۈرۈڭلار»
13. «يورۇقلۇقنىڭ بالىلىرىدەك» يۈرۈش نېمىنى بىلدۈرىدۇ؟ (ئەفەسلىكلەر 5:7–9)
13 پاۋلۇس ئەفەستىكى ئېتىقادچىلارنى قاراڭغۇلۇقتىن داۋاملىق نېرى تۇرۇشقا ئاگاھلاندۇرۇپلا قالماي، يەنى ئۇلارنى داۋاملىق «يورۇقلۇقنىڭ بالىلىرىدەك يۈرۈڭلار» دەپ ئىلھاملاندۇرغانىدى (ئەفەسلىكلەر 5:7–9-نى ئوقۇڭ). بۇ نېمىنى بىلدۈرىدۇ؟ ئاددىي قىلىپ ئېيتقاندا، ھەردائىم ئەيسانىڭ ھەقىقىي ئەگەشكۈچىلىرىگە خاس ھايات كەچۈرۈشىمىز كېرەكلىكىنى بىلدۈرىدۇ. مۇشۇ مەقسەتكە يېتىشنىڭ بىر ئۇسۇلى مۇقەددەس كىتابنى ۋە مۇقەددەس كىتابقا ئاساسلانغان نەشرى ماتېرىياللىرىمىزنى داۋاملىق ئەستايىدىللىق بىلەن ئوقۇش ۋە تەتقىق قىلىپ ئۆگىنىشتۇر. بولۇپمۇ، ئەيسا مەسىھنىڭ دۇنيانىڭ نۇرى بولۇشتا قالدۇرغان ئۈلگىسى ۋە بەرگەن تەلىملىرىگە كۆڭۈل قويۇش ئىنتايىن مۇھىم.—يۇھاننا 8:12؛ پەند. نە 6:23.
14. مۇقەددەس روھ بىزگە قانداق ياردەم بېرەلەيدۇ؟
14 بىز «يورۇقلۇقنىڭ بالىلىرىدەك» ياشىشىمىز ئۈچۈن، خۇدانىڭ مۇقەددەس روھىنىڭ ياردىمىگە مۇھتاج. چۈنكى، ئەخلاقسىزلىققا تولغان بۇ دۇنيادا ئۆزىمىزنى پاك تۇتۇش ئاسان ئەمەس (1-سالونىكا. 4:3–5، 7، 8). مۇقەددەس روھ بىزگە بۇ دۇنيانىڭ ئەخلاقسىز ئوي-پىكىرلىرىگە، يەنى بارلىق خۇدانىڭ كۆز قاراشلىرىغا زىت كېلىدىغان پەلسەپىۋى كۆز قاراشلار ۋە تەپەككۈر قىلىش ئۇسۇللىرىغا قارشى تۇرۇشىمىزغا ياردەم بېرىدۇ. مۇقەددەس روھنىڭ ياردىمىدە، بىز «ھەرخىل ياخشىلىق، ھەققانىيلىق ۋە ھەقىقەت» مېۋىسىنى بېرەلەيمىز.—ئەفەس. 5:9.
15. قايسى يوللار بىلەن مۇقەددەس روھقا ئېرىشەلەيمىز؟ (ئەفەسلىكلەر 5:19، 20)
15 مۇقەددەس روھقا ئېرىشىشنىڭ بىر يولى — يەھۋاغا دۇئا قىلىپ سوراش. ئەيسا شۇنداق دېگەن: يەھۋا «ئۆزىدىن سورىغانلارغا مۇقەددەس روھنى بېرىدۇ!» (لۇقا 11:13) ئۇنىڭدىن باشقا، جامائەت ئىبادەت يىغىلىشىدا، بىز بىرلىكتە يەھۋانى مەدھىيىلىگەندە مۇقەددەس روھقا ئېرىشىمىز (ئەفەسلىكلەر 5:19، 20-نى ئوقۇڭ). خۇدانىڭ مۇقەددەس روھى بىزگە ياخشى تەسىر قىلىپ، ئۇنى خۇدانى خۇرسەن قىلىدىغان ئۇسۇلدا ھايات كەچۈرۈشىمىزگە ياردەم بېرىدۇ.
16. بىزنىڭ دانا قارارلارنى چىقىرىشىمىزغا نېمە ياردەم بېرىدۇ؟ (ئەفەسلىكلەر 5:10، 17)
16 بىز مۇھىم قارارلارنى چىقارغاندا، ئاۋۋال «يەھۋانىڭ ئىرادىسى چۈشىنىش ئۈچۈن» تىرىشىشىمىز، ئاندىن كېيىن ئۇنىڭ ئىرادىسىگە مۇۋاپىق ئىش قىلىشىمىز كېرەك (ئەفەسلىكلەر 5:10، 17-نى ئوقۇڭ). بىزنىڭ ۋەزىيىتىمىزگە ماس كېلىدىغان مۇقەددەس كىتاب پرىنسىپلىرىنى ئىزدىگىنىمىزدە، ئەمەلىيەتتە شۇ ئىشقا قارىتا خۇدانىڭ كۆز قارىشى قانداقلىقىنى بىلىشنى خالايدىغانلىقىمىزنى كۆرسىتىمىز. كېيىن، بىز ئاشۇ پرىنسىپلارنى ئەمەلىي قوللانساق، تېخىمۇ ياخشىراق قارار چىقىرالايمىز.
17. ۋاقتىمىزدىن ئۈنۈملۈك پايدىلىنىش ئۈچۈن نېمە قىلالايمىز؟ (ئەفەسلىكلەر 5:15، 16) (رەسىمگە ھەم قاراڭ)
17 پاۋلۇس ئەفەستىكى مەسىھ ئەگەشكۈچىلىرىگە ئۆزلىرىنىڭ ۋاقتىدىن ئۈنۈملۈك پايدىلىنىش توغرۇلۇق نەسىھەت قىلغان (ئەفەسلىكلەر 5:15، 16-نى ئوقۇڭ). دۈشمىنىمىز شەيتان بىزنى بۇ دۇنيانىڭ ئىشلىرى بىلەن ئالدىراش ئۆتۈشكە دەۋەت قىلىدۇ. شۇنداق بولغاندا، بىزنىڭ خۇداغا خىزمەت قىلىشىمىز ئۈچۈن ۋاقتىمىز يەتمەيدۇ (1-يۇھاننا 5:19). ئەگەر بىز ئېھتىيات قىلمىساق، ئاسانلا ماددىي نەرسىلەرنى، ئالىي بىلىم ئېلىشنى ياكى كەسپىمىزدە ئۇتۇق قازىنىشنى، يەھۋاغا خىزمەت قىلىشتىن يۇقىرى ئورۇنغا قويۇشىمىز مۇمكىن. ئەگەر ھەقىقەتەن شۇنداق ئىش يۈز بەرسە، بۇ بىزنىڭ مۇشۇ دۇنيانىڭ كۆز قاراشلىرىنىڭ تەسىرگە ئۇچرىغانلىقىمىزنى كۆرسىتىدۇ. ئەلۋەتتە، بۇ ئىشلارنىڭ ئۆزى ھېچقانداق خاتا ئەمەس، ئەمما ئۇلار ھەرگىزمۇ ھاياتىمىزدا بىرىنچى ئورۇنغا ئۆتۈپ قالماسلىقى كېرەك. بىز داۋاملىق «يورۇقلۇقنىڭ بالىلىرىدەك» يۈرۈشىمىز ئۈچۈن، ۋاقتىدىن توغرا پايدىلىنىپ، دىققىتىمىزنى مۇھىم ئىشلارغا قارىتىشىمىز كېرەك.
ئەفەستىكى ئېتىقادچىلار ۋاقتىدىن ئۈنۈملۈك پايدىلىنىش ھەققىدە ئاگاھلاندۇرۇلغان (17-ئابزاسقا قاراڭ)
18. دونالد ئۆز ۋاقتىدىن ئۈنۈملۈك پايدىلىنىش ئۈچۈن قايسى قەدەملەرنى باسقان؟
18 يەھۋاغا تېخىمۇ كۆپرەك خىزمەت قىلىشنىڭ پۇرسىتىنى چىڭ تۇتۇڭ. جەنۇبىي ئافرىقىدا ياشايدىغان دونالد شۇنداق قىلغان. ئۇ مۇنداق دەيدۇ: «مەن ئۆز تۇرمۇشۇم ھەققىدە ئويلىنىپ، يەھۋادىن ۋەز خىزمەتتە تېخىمۇ ئۈنۈملۈكرەك بولۇشۇمغا ياردەم بېرىشنى ئۆتۈندۈم. مەن ۋەز ئېيتىشقا تېخىمۇ كۆپرەك ۋاقىت چىقىرالايدىغان بىر ئىشنى تېپىش ئۈچۈن دۇئا قىلدىم. يەھۋانىڭ ياردىمىدە مۇۋاپىق بىر ئىشنى تاپتىم. كېيىن، ئايالىم ئىككىمىز تولۇق ۋاقىتلىق خىزمەتنى باشلىدۇق».
19. بىز قانداق قىلساق، «يورۇقلۇقنىڭ بالىلىرىدەك» يۈرەلەيمىز؟
19 پاۋلۇسنىڭ ئەفەسلىكلەر يازغان خېتى، ئۇلارنىڭ يەھۋاغا سادىق بولۇپ قېلىشىغا ياردەم بەرگەن بولۇشى مۇمكىن. پاۋلۇسنىڭ نەسىھەت سۆزلىرى بىزگىمۇ ياردەم بېرەلەيدۇ. ئۆگىنىپ ئۆتكىنىمىزدەك، شۇ نەسىھەت كۆڭۈل ئاچىدىغان ئويۇن-تاماشىلارنى ۋە دوستلارنى تاللىغىنىمىزدا، ئاقىلانە قارار چىقىرىشىمىزغا ياردەم بېرەلەيدۇ. ئۇنىڭدىن باشقا، ئۇ بىزنى مۇقەددەس كىتابنى داۋاملىق چوڭقۇر تەتقىق قىلىپ، ھەقىقەت نۇرىنىڭ يېتەكچىلىكىنى قوبۇل قىلىشقا دەۋەت قىلالايدۇ. پاۋلۇس يەنە خېتىدە، بىزنىڭ ياخشى پەزىلەتلەرنى يېتىلدۈرۈشىمىزگە ياردەم بېرەلەيدىغان مۇقەددەس روھنىڭ مۇھىملىقىنى تەكىتلىگەن. پاۋلۇس يازغان نەسىھەت سۆزلەرگە قۇلاق سالساق، يەھۋانىڭ ئىرادىسىگە مۇۋاپىق قارارلارنى چىقىرالايمىز. بىز بۇ ئىشلارنى قىلىش ئارقىلىق بۇ دۇنيانىڭ قاراڭغۇلۇقىدىن چىقىپ، داۋاملىق يورۇقلۇقتا يۈرەلەيمىز.
قانداق جاۋاب بېرىسىز؟
-
ئەفەسلىكلەر 5:8-ئايەتتە تىلغا ئېلىنغان «قاراڭغۇلۇق» ۋە «يورۇقلۇق» نېمىنى بىلدۈرىدۇ؟
-
قانداق قىلىپ «قاراڭغۇلۇق»تىن نېرى تۇرالايمىز؟
-
قانداق قىلىپ «يورۇقلۇقنىڭ بالىلىرىدەك» يۈرەلەيمىز؟
43-ناخشا ھوشيار تۇر، چىڭ تۇر ۋە قەيسەر بول!
a بەزى ئىسىملار ئۆزگەرتىلگەن.
b رەسىم تەسۋىرى: ئەلچى پاۋلۇسنىڭ ئەفەستىكى ئېتىقادداشلارغا يازغان خېتىنىڭ قەدىمقى قوليازما كۆچۈرمە نۇسخىلىرىدىن بىرى.
