نېمە ئۈچۈن «كۆپ مېۋە بېرىشنى» داۋاملاشتۇرۇشىمىز كېرەك؟
«كۆپ مېۋە بېرىپ، ئۆزۈڭلارنىڭ مېنىڭ شاگىرتلىرىم ئىكەنلىكىڭلارنى ئىسپاتلايسىلەر. بۇ ئاتامغا شان-شەرەپ ئېلىپ كېلىدۇ».—يۇھاننا 15:8.
ناخشىلار: 145، 144
1، 2. (1) ئەيسا ھاياتىنىڭ ئاخىرقى كېچىسى ئەلچىلىرى بىلەن نېمە ھەققىدە سۆزلەشكەن؟ (ماقالىنىڭ بېشىدىكى رەسىمگە قاراڭ) (2) نېمە ئۈچۈن ۋەز قىلىشىمىزنىڭ سەۋەبىنى ئۇنتۇماسلىقىمىز كېرەك؟ (3) بىز بۇ ماقالىدە نېمىنى مۇھاكىمە قىلىمىز؟
ئەيسا ھاياتىنىڭ ئاخىرقى كېچىسى ئەلچىلىرى بىلەن ئۇزاق پاراڭلىشىپ، ئۇلارنى بەك ياخشى كۆرىدىغانلىقىنى ئېيتقان ئىدى. ئۇ يەنە ئالدىنقى ماقالىدە تىلغا ئېلىنغان ئۈزۈم تېلى توغرىسىدا تەمسىلنى كەلتۈرگەن. شۇنداق قىلىپ ئەيسا شاگىرتلىرىنى «كۆپ مېۋە بېرىشكە» دەۋەت قىلغان. ئەيسا ئۇلارنى داۋاملىق سەۋرچانلىق بىلەن كۆپ مېۋە بېرىشكە، يەنى پادىشاھلىق ھەققىدىكى خەۋەرنى ۋەز قىلىشنى داۋاملاشتۇرۇشقا ئىلھاملاندۇرۇشنى خالىغان.—يۇھاننا 15:8.
2 ئەمما، ئەيسا شاگىرتلىرىغا پەقەت نېمە قىلىشنىلا ئەمەس، ئۇنى نېمە ئۈچۈن قىلىش كېرەكلىكىنىمۇ چۈشەندۈرگەن ئىدى. ئۇ ئۇلارغا داۋاملىق ۋەز قىلىشنىڭ بىرنەچچە سەۋەبىنى كەلتۈردى. بىزمۇ ۋەز قىلىشىمىزنىڭ سەۋەبىنى ئۇنتۇماسلىقىمىز كېرەك. بۇ ھەققىدە ئويلىنىش بىزگە «بارچە مىللەتلەرگە» يەتكۈزۈشنى داۋاملاشتۇرۇشقا دەۋەت قىلىدۇ (مەتتا 24:13، 14). بۇ ماقالىدە، ۋەز قىلىشنىڭ مۇقەددەس يازمىلارغا ئاساسلانغان تۆت سەۋەبىنى مۇھاكىمە قىلىمىز. شۇنىڭ بىلەن بىرلىكتە، داۋاملىق مېۋە بېرىشكە ياردەم بېرىدىغان يەھۋانىڭ تۆت سوۋغىسىنى كۆرۈپ چىقىمىز.
يەھۋانى مەدھىيىلەيمىز
3. (1) يۇھاننا 15:8-ئايەتكە ئاساسلانغاندا، ۋەز قىلىشىمىزنىڭ ئەڭ مۇھىم سەۋەبى نېمە؟ (2) ئەيسانىڭ تەمسىلىدىكى ئۈزۈم نېمىنى بىلدۈرىدۇ ۋە بۇ سېلىشتۇرۇش نېمە ئۈچۈن ئورۇنلۇق؟
3 ۋەز قىلىشىمىزنىڭ ئەڭ مۇھىم سەۋەبى — يەھۋانى مەدھىيىلەشنى ۋە ئۇنىڭ ئىسىمىنى مۇقەددەس قىلىشنى خالايمىز (يۇھاننا 15:1، 8-نى ئوقۇڭ). ئۈزۈم تېلى توغرىسىدىكى تەمسىلدە ئەيسا يەھۋانى دېھقان ياكى باغۋەن، ئۆزىنى ئۈزۈم تېلى، شاگىرتلىرىنى بولسا شاخلار بىلەن سېلىشتۇرغان (يۇھاننا 15:5). بۇ تەمسىلدىكى ئۈزۈم ئەيسانىڭ شاگىرتلىرى بېرىدىغان مېۋىنى، يەنى ئۇلارنىڭ ۋەز ئىشىنى بىلدۈرىدۇ. ئەيسا ئەلچىلىرىگە: «كۆپ مېۋە بەرسەڭلار،… ئاتام شۇنىڭ بىلەن ئۇلۇغلىنىدۇ»،— دېگەن. ئۈزۈم تېلى ياخشى ئۈزۈم بەرسە، بۇ دېھقاننىڭ ئابرويى ئاشىدۇ. شۇنىڭغا ئوخشاش، بىز پادىشاھلىق ھەققىدىكى خەۋەرنى بار كۈچىمىز بىلەن ۋەز قىلساق، يەھۋاغا شان-شەرەپ كەلتۈرىمىز.—مەتتا 25:20–23.
4. (1) بىز قانداقلارچە خۇدانىڭ ئىسىمىنى مۇقەددەس قىلالايمىز؟ (2) خۇدانىڭ ئىسىمىنى مۇقەددەس قىلىشقا قاتنىشىش ئىمتىيازىغا قانداق قارايسىز؟
4 خۇدانىڭ ئىسىمى مۇقەددەس. ئۇنى تېخىمۇ مۇقەددەس قىلىش مۇمكىن ئەمەس. ئۇنداقتا، ۋەز قىلىش ئارقىلىق ئۇنىڭ ئىسىمىنى مۇقەددەس قىلىشقا ئۆز ھەسسىمىزنى قانداق قوشىمىز؟ يەشايا پەيغەمبەرنىڭ سۆزلىرىگە دىققەت ئاغدۇرايلى. ئۇ مۇنداق دېگەن: «ئاسماندىكى قوشۇنلارنىڭ سەردارى يەھۋانى مۇقەددەس بىلىڭلار» (يەشايا 8:13). بىز يەھۋانىڭ ئىسىمىنى ھەممە ئىسىملاردىن ئەڭ ئۇلۇغ دەپ بىلگەندە ۋە ئادەملەرگە ئۇنىڭ مۇقەددەسلىكىنى چۈشىنىشكە ياردەم بەرگەندە، ئۇنىڭ ئىسىمىنى مۇقەددەس قىلغان بولىمىز (مەتتا 6:9). مەسىلەن، ئادەملەرگە يەھۋانىڭ گۈزەل پەزىلەتلىرى ۋە ئىنسانىيەتنىڭ جەننەتتە مەڭگۈ ياشىشىغا مۇناسىۋەتلىك نىيىتى توغرۇلۇق تەلىم بەرگەندە، شەيتاننىڭ يەھۋا ھەققىدە ئېيتقان يامان سۆزلىرىنىڭ ھەممىسى يالغان ئىكەنلىكىنى چۈشىنىشكە ياردەم بېرىمىز (يارىتىلىش 3:1—5). ئۇلارغا يەھۋانىڭ «شان-شەرەپ، ئۇلۇغلۇق ۋە كۈچ-قۇدرەتكە» لايىقلىقىنى بىلىشكە ياردەم بەرگەندىمۇ، ئۇنىڭ ئىسىمىنىڭ مۇقەددەس قىلىنىشىغا ھەسسە قوشىمىز (ۋەھىيلەر 4:11). 16 يىلدىن بۇيان، پىدائىي ۋەز ئېيتقۇچى بولۇپ خىزمەت قىلىۋاتقان رۇن ئىسىملىك بۇرادەر مۇنداق دەيدۇ: «پۈتكۈل كائىناتنىڭ ياراتقۇچىسىنىڭ گۇۋاھچىسى بولۇش ئىمتىيازى ئۈچۈن بەك مىننەتدارمەن. بۇ مېنى ۋەز قىلىشنى داۋاملاشتۇرۇشقا دەۋەت قىلىدۇ».
يەھۋانى ھەم ئەيسانى سۆيىمىز
5. (1) يۇھاننا 15:9، 10-ئايەتلەردە ۋەز قىلىشنىڭ قانداق سەۋەبى يېزىلغان؟ (2) ئەيسا شاگىرتلىرىغا سەۋر-تاقەت كېرەكلىكىنى چۈشىنىشكە قانداق ياردەم بەرگەن؟
5 يۇھاننا 15:9، 10-نى ئوقۇڭ. پادىشاھلىق ھەققىدىكى خۇش خەۋەرنى ۋەز قىلىشىمىزنىڭ ئىككىنچى سەۋەبى — بىز يەھۋا بىلەن ئەيسانى سۆيىمىز (ماركۇس 12:30؛ يۇھاننا 14:15). ئەيسا ئۆز شاگىرتلىرىغا: ‹مېنىڭ سۆيگۈ-مۇھەببىتىمدە قېلىڭلار›،— دېگەن. ئەيسا نېمە ئۈچۈن شۇنداق دېگەن؟ چۈنكى، ئۇ شاگىرتلىرىنىڭ ھەقىقىي مەسىھ ئەگەشكۈچىلىرى سۈپىتىدە ياشىشى ئۈچۈن سەۋر-تاقەت كېرەكلىكىنـى بىلـگەن. يۇھاننـا 15:4—10-دا كۆرگىنىمىزدەك، شاگىرتلىرىنىڭ بۇنى چۈشىنىشىگە ياردەم بېرىش ئۈچۈن، ئەيسا «قېلىش» سۆزىنى كۆپ قېتىم قوللانغان.
6. مەسىھنىڭ مېھىر-مۇھەببىتىدە قېلىشنى خالايدىغانلىقىمىزنى قانداق كۆرسىتەلەيمىز؟
6 مەسىھنىڭ مېھىر-مۇھەببىتىدە قېلىشنى ھەم ماقۇللىشىغا ئېرىشىشنى خالايدىغانلىقىمىزنى قانداق كۆرسىتەلەيمىز؟ ئۇنىڭغا بويسۇنۇش ئارقىلىق. ئەيسا ئۆزى قىلغان نەرسىدىن ئارتۇق نەرسە قىلىشىمىزنى تەلەپ قىلمايدۇ. ئۇ: «مەن ئاتامنىڭ ئەمرلىرىگە ئەمەل قىلىپ، سۆيگۈ-مۇھەببىتىدە قالغىنىمدەك»،— دېگەن. ئەيسا بىزگە ياخشى ئۈلگە قالدۇرغان.—يۇھاننا 13:15.
7. ئىتائەتچانلىق بىلەن سۆيگۈ-مۇھەببەت ئارىسىدا قانداق باغلىنىش بار؟
7 ئـەيسـا ئىتـائەتـچـانلىـق بىـلەن سۆيگـۈ-مۇھەببـەتنىڭ زىچ باغلىنىشىنى ئېنىق كۆرسىتىپ: «كىم ئەمرلىرىمنى قوبۇل قىلىپ، ئۇلارغا ئەمەل قىلسا، شۇ مېنى سۆيىدۇ»،— دېگەن (يۇھاننا 14:21). ئەيسانىڭ بۇيرۇقلىرى ئۇنىڭ ئاتىسىدىن كېلىدۇ، شۇڭا بىز ئەيسانىڭ ۋەز قىلىڭلار دېگەن بۇيرۇغىغا قۇلاق سالغاندا، يەھۋانىمۇ ياخشى كۆرىدىغانلىقىمىزنى كۆرسىتىمىز (مەتتا 17:5؛ يۇھاننا 8:28). يەھۋاغا ۋە ئەيساغا بولغان مېھىر-مۇھەببىتىمىزنى كۆرسەتكەندە، ئۇلارنىڭ مېھىر-مۇھەببىتىدە بولىمىز.
ئادەملەرنى ئاگاھلاندۇرىمىز
8، 9. (1) ۋەز قىلىشىمىزنىڭ يەنە بىر سەۋەبى نېمە؟ (2) ھەزەكىيال 3:18، 19 ۋە 18:23-ئايەتلەردىكى يەھۋانىڭ سۆزلىرى بىزنى داۋاملىق ۋەز قىلىشقا قانداق دەۋەت قىلىدۇ؟
8 ۋەز قىلىشىمىزنىڭ ئۈچىنچى سەۋەبى — بىز يەھۋانىڭ يېقىنلىشىۋاتقان كۈنى توغرىسىدا باشقىلارنى ئاگاھلاندۇرۇشنى خالايمىز. مۇقەددەس كىتابتا نۇھنى «ھەققانىيلىقنى جاكارلىغۇچى» دەپ يېزىلغان (2-پېترۇس 2:5-نى ئوقۇڭ). بەلكىم، تېخى توپان سۈيى كەلمىگەندە، نۇھ ئادەملەرنى يېقىنلاپ كېلىۋاتقان بالايىئاپەت ھەققىدە ئاگاھلاندۇرغان. نېمە ئۈچۈن ئۇنداق دېسەك بولىدۇ؟ سەۋەبى، ئەيسا مۇنداق دېگەن: «نۇھ توپان كېلىشتىن ئىلگىرى كېمىگە كىرىپ ئولتۇرغان كۈنگىچە، شۇ زاماننىڭ كىشىلىرى يەپ-ئىچىپ، ئەركەكلەر ئۆيلىنىپ، ئاياللار تۇرمۇشقا چىقىپ يۈرگەن ئىدى. توپان كېلىپ، ئۇلارنىڭ ھەممىسىنى غەرق قىلغۇچە، ئۇلار پەرۋا قىلماي يۈرگەن، كېلەچەكتە ئىنسان ئوغلىنىڭ قايتا ھازىر بولۇشىمۇ شۇنداق بولىدۇ» (مەتتا 24:38، 39). كۆپچىلىك نۇھنىڭ سۆزلىرىگە پىسەنت قىلمىسىمۇ، نۇھ سادىقلىق بىلەن يەھۋانىڭ ئاگاھلاندۇرۇشىنى يەتكۈزگەن.
9 بۈگۈنكى كۈندە، بىز خۇدانىڭ ئىنسانىيەت ئۈچۈن نېمە قىلىدىغانلىقىنى باشقىلارمۇ بىلىشى ئۈچۈن، پادىشاھلىق ھەققىدىكى خەۋەرنى جاكارلايمىز. يەھۋاغا ئوخشاش بىزمۇ ئادەملەرنىڭ بۇ خەۋەرگە قۇلاق سېلىپ، مەڭگۈ ياشىشىنى خالايمىز (ھەزەكىيال 18:23). ئۆيمۇ-ئۆي ۋە ئاممىۋى سورۇنلاردا ۋەز قىلغاندا، بىز مۇمكىنقەدەر كۆپرەك ئادەمنى خۇدا پادىشاھلىقى كېلىپ، بۇ رەزىل دۇنيانى ھالاك قىلىدىغانلىقى ھەققىدە ئاگاھلاندۇرۇشقا تىرىشىمىز.—ھەزەكىيال 3:18، 19؛ دانىيال 2:44؛ ۋەھىيلەر 14:6، 7.
ئىنسانلارنى سۆيىمىز
10. (1) مەتتا 22:39-ئايەتتە، ۋەز قىلىشنىڭ قانداق سەۋەبى يېزىلغان؟ (2) پاۋلۇس بىلەن سىلاس فىلىپىدىكى تۈرمە باشلىقىغا قانداق ياردەم بەرگەن؟
10 ۋەز قىلىشنى داۋاملاشتۇرۇشىمىزنىڭ تۆتىنچى سەۋەبى — بىز ئىنسانلارنى سۆيىمىز (مەتتا 22:39). بۇ سۆيگۈ-مۇھەببەت بىزنى داۋاملىق ۋەز قىلىشقا دەۋەت قىلىدۇ، چۈنكى ۋەزىيىتى ئۆزگەرگەندە، ئادەملەرنىڭ كۆز قارىشىمۇ ئۆزگىرىشى مۇمكىنلىكىنى بىلىمىز. مەسىلەن، فىلىپى شەھىرىدە دۈشمەنلەر پاۋلۇس بىلەن سىلاسنى زىندانغا تاشلىغانىدى. لېكىن، يېرىم كېچىدە يەر تەۋرەپ، زىنداننىڭ ئۇلى سىلكىنىپ، ئىشىكلىرى ئېچىلىپ كەتكەنىدى. شۇڭا، مەھبۇسلارنى قېچىپ كەتتى، دەپ قورققان گۇندىپاي ئۆز-ئۆزىنى ئۆلتۈرۈۋالماقچى بولغان. ئەمما، پاۋلۇس ئۇنى توختىتىپ: «ئۆز جېنىڭغا زىيان يەتكۈزمە!»— دەپ ۋاقىرىغانىدى. كېيىن، گۇندىپاي ئۇنىڭدىن: «قۇتقۇزۇلۇش ئۈچۈن نېمە قىلىشىم كېرەك؟»— دەپ سورىدى. پاۋلۇس بىلەن سىلاس ئۇنىڭغا جاۋابەن شۇنداق دېگەن: ‹ھەزرىتى ئەيساغا ئىشەنگىن، شۇندىلا سەن قۇتقۇزۇلىسەن›.—ئەلچىلەر 16:25–34.
بىز يەھۋانى، ئەيسانى ۋە ئادەملەرنى ياخشى كۆرگەنلىكتىن ۋەز قىلىمىز (5، 10-ئابزاسلارغا قاراڭ)
11، 12. (1) گۇندىپاي بىلەن بولغان ۋەقەدىن ۋەز ئىشى ھەققىدە نېمىنى ئۆگىنىمىز؟ (2) نېمە ئۈچۈن بىز داۋاملىق ۋەز قىلىشنى خالايمىز؟
11 زىندانغا مەسئۇل گۇندىپاي بىلەن بولغان ۋەقەدىن ۋەز ئىشى ھەققىدە نېمىنى ئۆگىنىمىز؟ دىققەت قىلساق، تۈرمە باشلىقىنىڭ كۆز قارىشى پەقەت يەر تەۋرەشتىن كېيىن ئۆزگىرىپ، ئۇ ياردەم سورىغان. شۇنىڭغا ئوخشاش، مۇقەددەس كىتابتىكى خەۋەرنى تىڭشاشنى خالىمايدىغان ئادەملەرنىڭ بەزىلىرى بىرەر پاجىئەگە ئۇچرىغاندا، كۆز قارىشى ئۆزگىرىپ، ياردەم ئىزدىشى مۇمكىن. مەسىلەن، بەلكىم بەزىلەر ئىشىدىن ئايرىلغاندا ياكى ھەمراسى بىلەن ئاجراشقاندا چۈشكۈنلىشىشىدۇ. يەنە باشقىلىرى ئېغىر كېسەلگە گىرىپتار بولغاندا ياكى يېقىنى ئۆلۈپ كەتكەندە قاتتىق قايغۇرىدۇ. شۇنداق چاغلاردا ئادەملەر ھايات توغرىسىدا بۇرۇن ئويلاپ كۆرمىگەن سوئاللارنى قويۇشى مۇمكىن. ئۇلار ھەتتا: «قۇتقۇزۇلۇش ئۈچۈن نېمە قىلىشىمىز كېرەك؟»— دەپ سورايدۇ. شۇنداق ئادەملەر ھاياتىدا بىرىنچى قېتىم بىزنىڭ ئۈمىد ئاتا قىلىدىغان خەۋىرىمىزنى تىڭشاشنى خالىشى مۇمكىن.
12 شۇڭا، ساداقەتمەنلىك بىلەن ۋەز قىلىشنى داۋاملاشتۇرساق، ئادەملەر يەتكۈزگەن خەۋىرىمىزدىن تەسەللىي ئېلىشقا تەييار بولغاندا، بىز يېنىدا بولىمىز (يەشايا 61:1). 38 يىلدىن بۇيان، تولۇق ۋاقىتلىق خىزمەت قىلىۋاتقان شارلوتتا مۇنداق دەيدۇ: «بۈگۈنكى كۈندە ئادەملەر ھاياتنىڭ مەنىسىنى يوقاتقان. ئۇلار خۇش خەۋەرنى ئاڭلاشقا مۇھتاج». يېۋور ئىسىملىك قېرىنداش بولسا، 34 يىل پىدائىي ۋەز ئېيتقۇچى بولۇپ كېلىۋاتىدۇ ۋە ئۇ مۇنداق دەيدۇ: «ھازىر كۆپ ئادەملەر بۇرۇنقىغا قارىغاندا قاتتىق قىينىلىپ يۈرىدۇ. مەن ئۇلارغا ياردەم بېرىشنى خالىغانلىقتىن ۋەز قىلىمەن». دەرھەقىقەت، ئىنسانلارغا بولغان سۆيگۈ-مۇھەببەت — داۋاملىق ۋەز قىلىشنىڭ مۇھىم سەۋەبى.
داۋاملىق ۋەز قىلىشقا ياردەم بېرىدىغان سوغا
13، 14. (1) يۇھاننا 15:11-ئايەتتە قانداق سوۋغات ھەققىدە يېزىلغان؟ (2) ئەيساغا ئوخشاش خۇشاللىق بولۇش ئۈچۈن نېمە قىلالايمىز؟ (3) خۇشاللىق داۋاملىق ۋەز قىلىشىمىزغا قانداق ياردەم بېرىدۇ؟
13 ئۆلۈمىدىن ئاۋۋالقى كېچىدە ئەيسا ئەلچىلىرىگە كۆپ مېۋە بېرىشكە ياردەم بېرىدىغان سوۋغاتلار ھەققىدە ئېيتقان. بۇ نېمە سوۋغاتلار ۋە ئۇلار بىزگە قانداق ياردەم بېرىدۇ؟
14 خۇشاللىققا ئېرىشىمىز. ۋەز ئىشى بىز ئۈچۈن ئېغىر يۈكمۇ؟ ھەرگىز ئۇنداق ئەمەس! ئەيسا ئۈزۈم تېلى ھەققىدىكى تەمسىلىنى ئېيتقاندىن كېيىن، ۋەز ئىشىغا قاتناشقىنىمىزدا ئۇنىڭ خۇشاللىقىغا ئورتاق بولىدىغانلىقىمىزنى ئېيتقانىدى (يۇھاننا 15:11-نى ئوقۇڭ). قانداقلارچە؟ ئېسىڭىزدە بولسا، ئەيسا تەمسىلدە ئۆزىنى ئۈزۈم تېلى، ئەلچىلەرنى شاخلار بىلەن سېلىشتۇرغان. شاخلار ئۈزۈم تېلىدىن ئايرىلمىسا، كېرەكلىك سۇ بىلەن ئوزۇقلۇق ماددىنى قوبۇل قىلىدۇ. بۇنىڭغا ئوخشاش، بىزمۇ ئەيسا بىلەن بىرلىشىپ، ئۇنىڭغا ئەگەشكەندىلا، خۇدانىڭ ئىرادىسىنى ئورۇنلاشتىن كېلىدىغان خۇشاللىققا ئېرىشىمىز (يۇھاننا 4:34؛ 17:13؛ 1-پېترۇس 2:21). 40 يىلدىن كۆپرەك پىدائىي ۋەز ئېيتقۇچى بولۇپ خىزمەت قىلىۋاتقان خاننى مۇنداق دەيدۇ: «ۋەز قىلىشتىن تاپىدىغان خۇشاللىق مېنى يەھۋاغا خىزمەت قىلىشنى داۋاملاشتۇرۇشقا ئۈندەيدۇ». كۆپۈنچە ئادەملەر تىڭشىمىغان ھالەتتىمۇ، خۇشاللىق بىزنىڭ داۋاملىق ۋەز قىلىش ئۈچۈن كۈچ بېرىدۇ.—مەتتا 5:10—12.
15. (1) يۇھاننا 14:27-ئايەتتە قانداق سوۋغات ھەققىدە يېزىلغان؟ (2) تىنچ-ئامانلىق بىزنىڭ ۋەز قىلىشنى داۋاملاشتۇرۇشىمىزغا قانداق ياردەم بېرىدۇ؟
15 تىنچ-خاتىرجەملىككە ئىگە بولىمىز (يۇھاننا 14:27-نى ئوقۇڭ). ئۆلۈمىدىن ئاۋۋالقى كېچىسى ئەيسا ئەلچىلىرىگە: «سىلەرگە تىنچ-ئامانلىقنى قالدۇرىمەن، ئۆز تىنچلىقىمنى سىلەرگە بېرىمەن»،— دېگەنىدى. ئەيسانىڭ تىنچلىقى بىزگە ۋەز قىلىشنى توختاتماسلىققا قانداق ياردەم بېرىدۇ؟ بىز ۋەز ئىشىنى داۋاملاشتۇرغاندا، يەھۋا ۋە ئەيسانىڭ كۆڭلىنى خۇرسەن قىلىدىغانلىقىمىزنى بىلىمىز (زەبۇر 149:4؛ رىملىقلار 5:3، 4؛ كولوسىلىقلار 3:15). 45 يىلدىن بۇيان تولۇق ۋاقىت خىزمەت قىلىپ كېلىۋاتقان ئۇلف مۇنداق دەيدۇ: «ھېرىپ قالىدىغىنىم راست، لېكىن ۋەز ئىشى ھاياتىمنى ھەقىقىي قانائەت ۋە ئەھمىيەتكە ئىگە قىلىدۇ». بىز ھېچقاچان تۈگىمەيدىغان تىنچلىققا ئېرىشكەنلىكىمىزگە ناھايىتى مىننەتدار!
16. (1) يۇھاننا 15:15-ئايەتتە قانداق سوۋغات ھەققىدە يېزىلغان؟ (2) ئەيسا بىلەن دوست بولۇپ قېلىش ئۈچۈن ئەلچىلەر نېمە قىلىشى كېرەك ئىدى؟
16 ئەيسا بىلەن دوست بولىمىز. ئەيسا ئەلچىلىرىنىڭ خۇشال بولۇشىنى خالايدىغانلىقىنى ئېيتقاندىن كېيىن، ئۇلارغا غەرەزسىز مېھىر-مۇھەببەت كۆرسىتىش نېمە سەۋەبتىن مۇھىم ئىكەنلىكىنى چۈشەندۈرگەن (يۇھاننا 15:11—13). كېيىن، ئۇ شاگىرتلىرىغا: «سىلەرنى دوستلار دەپ چاقىردىم»،— دېگەن. ئەيسا بىلەن دوست بولۇش نەقەدەر ئاجايىپ سوۋغات،- ھە! بىراق، ئەلچىلەر بۇ دوستلۇقنى قانداق ساقلىيالايتتى؟ ئەيسا: «بېرىپ، داۋاملىق مېۋە بەرسۇن دەپ سىلەرنى تەيىنلىدىم»،— دېگەن (يۇھاننا 15:14—16-نى ئوقۇڭ). باشقا سۆز بىلەن ئېيتقاندا، ئۇلار ۋەز قىلىشنى توختاتماسلىقى كېرەك ئىدى. بۇنىڭدىن ئىككى يىل بۇرۇن ئەيسا ئەلچىلىرىگە: «كېتىپ بارغىنىڭلاردا، ۋەز قىلىپ مۇنداق دەڭلار: ‹ئاسمانلارنىڭ پادىشاھلىقى يېقىنلاشتى›»،— دېگەن (مەتتا 10:7). شۇ سەۋەبتىن، ئۆلۈمىدىن ئاۋۋالقى كېچىسى ئەيسا شاگىرتلىرىنى ۋەز قىلىشنى داۋاملاشتۇرۇشقا دەۋەت قىلغانىدى (مەتتا 24:13؛ ماركۇس 3:14). ئەلۋەتتە، ئەيسا بۇ تاپشۇرۇقنى ئورۇنداش ئاسان بولمايدىغانلىقىنى بىلگەن. ئەمما، بۇ شاگىرتلىرىنىڭ قولىدىن كەلگەن ۋە ئۇلار ئەيسا بىلەن دوست بولۇپ قالغان. قانداقلارچە؟ ئۇلارغا باشقا بىر سوۋغات ياردەم بەرگەن.
17، 18. (1) يۇھاننا 15:7-ئايەتتە، قانداق سوۋغات ھەققىدە يېزىلغان؟ (2) بۇ سوۋغات ئەيسانىڭ شاگىرتلىرىغا قانداق ياردەم بەردى؟ (3) بۈگۈنكى كۈندە قانداق سوۋغاتلار بىزگە ياردەم بېرىدۇ؟
17 دۇئالىرىمىزغا جاۋاب ئالىمىز. ئەيسا مۇنداق دېگەن: «سىلەر خالىغىنىڭلارنى تىلىسەڭلار، شۇ سىلەرگە بېرىلىدۇ» (يۇھاننا 15:7، 16). ئەيسانىڭ بۇ ۋەدىسى ئەلچىلەرنى مۇستەھكەملىگەنلىكى سۆزسىز a! (ئىزاھاتقا قاراڭ). ئۇلار ئەيسانىڭ پات ئارىدا ئۆلىدىغانلىقىنى تولۇق چۈشەنمىگەن ئىدى. ئەمما، ئەلچىلەر ياردەمسىز قالمايتتى، چۈنكى يەھۋا ئۇلارنىڭ دۇئالىرىغا قۇلاق سېلىپ، ۋەز قىلىشنى داۋاملاشتۇرۇشقا ياردەم بېرىشكە تەييار ئىدى. ئۇ ھەقىقەتەن شۇنداق قىلغان. ئەيسانىڭ ئۆلۈمىدىن كېيىن كۆپ ۋاقىت ئۆتمەي، ئەلچىلەر يەھۋادىن جاسارەت سوراپ يالۋۇرغاندا، يەھۋا ئۇلارنىڭ ئىلتىجالىرىغا قۇلاق سالغانىدى.—ئەلچىلەر 4:29، 31.
ياردەم سوراپ دۇئا قىلغىنىمىزدا، يەھۋانىڭ دۇئالىرىمىزغا جاۋاب بېرىدىغانلىقىغا ئىشەنچىمىز كامىل (18-ئابزاسقا قاراڭ)
18 بۈگۈنكى كۈندىمۇ ئوخشاش. سەۋر-تاقەت بىلەن داۋاملىق ۋەز قىلساق، ئەيسانىڭ دوستى بولۇپ قالىمىز. شۇنداقلا ۋەز قىلىش قىيىن بولغاندا ياردەم سوراپ دۇئا قىلساق، يەھۋا ئۆتۈنۈشىمىزنى ئورۇندايدىغانلىقىغا ئىشەنچىمىز كامىل (فىلىپىلىكلەر 4:13). بىز يەھۋانىڭ دۇئالىرىمىزغا جاۋاب بېرىدىغانلىقى ۋە ئەيسادەك دوستىمىزنىڭ بولغانلىقى ئۈچۈن بەك مىننەتدار! يەھۋانىڭ بۇ سوۋغاتلىرى بىزگە داۋاملىق كۆپ مېۋە بېرىشكە كۈچ بېرىدۇ.—ياقۇپ 1:17.
19. (1) بىز نېمە ئۈچۈن ۋەز قىلىشنى داۋاملاشتۇرىمىز؟ (2) خۇدا تاپشۇرغان ئىشنى ئاخىرىغىچە ئورۇنلاشقا نېمە ياردەم بېرىدۇ؟
19 بۇ ماقالىدە، داۋاملىق ۋەز قىلىشىمىزنىڭ تۆت سەۋەبىنى قاراپ چىقتۇق: يەھۋانى مەدھىيىلەپ، ئىسىمىنىڭ مۇقەددەس قىلىنىشىغا ھەسسىمىزنى قوشىمىز، يەھۋا بىلەن ئەيساغا بولغان سۆيگۈ-مۇھەببىتىمىزنى بىلدۈرىمىز، ئادەملەرنى ئاگاھلاندۇرىمىز ۋە ئۇلارنى سۆيىدىغانلىقىمىزنى كۆرسىتىمىز. بۇنىڭدىن باشقا، تۆت سوۋغاتنى ھەم كۆرۈپ چىقتۇق: خۇشاللىق، تىنچ-ئامانلىق، ئەيسا بىلەن دوست بولۇش ۋە دۇئالىرىمىزغا جاۋاب ئېلىش. بۇ سوۋغاتلار بىزگە خۇدا تاپشۇرغان ئىشنى ئاخىرىغىچە ئورۇنداشقا كۈچ بېرىدۇ. يەھۋا بىزنىڭ داۋاملىق «كۆپ مېۋە» بېرىش ئۈچۈن تىرىشىۋاتقانلىقىمىزنى كۆرگەندە، ئۇ ناھايىتى خۇشال بولىدۇ!
a ئەيسا ئەلچىلىرى بىلەن سۆزلىشىۋاتقاندا، يەھۋا ئۇلارنىڭ دۇئالىرىغا جاۋاب بېرىدىغانلىقىنى بىرنەچچە قېتىم ئەسلەتكەنىدى.—يۇھاننا 14:13؛ 15:7، 16؛ 16:23.
