21-تەتقىق ماقالىسى
خۇدا سىزگە كۈچ بېرىدۇ
«قاچان مەن ئاجىز بولسام، شۇ چاغدا كۈچلۈكمەن».—2-كورىنت. 12:10.
137-ناخشا جاسارەت بەر
بۇ ماقالىدە a
1، 2. كۆپلىگەن گۇۋاھچىلار قانداق قىيىنچىلىقلارغا دۇچ كېلىدۇ؟
ئەلچى پاۋلۇس تىموتىي ۋە باشقا بارلىق مەسىھ ئەگەشكۈچىلىرىنى ئۆزلىرىنىڭ خىزمىتىنى تولۇق تاماملاشقا دەۋەت قىلغان (2-تىموت. 4:5). بىز پاۋلۇسنىڭ بۇ نەسىھەت سۆزىگە كۈچىمىزنىڭ يېتىشىچە قۇلاق سېلىشقا تىرىشساقمۇ، بۇ ئاسانغا توختىمايدۇ. نۇرغۇنلىغان قېرىنداشلار ۋەز قىلىشتىن قورقىدۇ (2-تىموت. 4:2). مەسىلەن، بىزنىڭ ئىش-پائالىيىتىمىز چەكلەنگەن ياكى مەنئىي قىلىنغان دۆلەتلەردە ياشايدىغان قېرىنداشلىرىمىزنى ئويلاپ كۆرەيلى. ئۇلار تۈرمىگە تاشلىنىش خەۋپ-خەتىرىگە قارىماي ۋەز خىزمەت قىلىدۇ.
2 يەھۋانىڭ خەلقى چوقۇم ئۇلارنى ئۈمىدسىزلەندۈرىدىغان تۈرلۈك قىيىنچىلىقلارنى باشتىن ئۆتكۈزىدۇ. مەسىلەن، نۇرغۇنلىرى ئائىلىسىنىڭ زۆرۈر بولغان ئېھتىياجلىرىنى قامداش ئۈچۈن ئەتىگەندىن كەچكىچە ئىشلىشى كېرەك. ئەمما، ھەپتە ئاخىرىغا كەلگەندە، ئۇلار چارچاپ كەتكەچ، ئۆزى خالىغاندەك ئۇزۇنراق ۋاقىت ۋەز خىزمىتىگە قاتنىشالمايدۇ. يەنە بەزىلىرى ناھايىتى ئاز ۋاقىت يەھۋاغا خىزمەت قىلالايدۇ. سەۋەبى، ئۇلارنىڭ كېسىلى ئېغىر ياكى ياشىنىپ قالغان. ھەتتا بەزىلىرى ئۆيلىرىدىن سىرتقا چىقالمايدۇ. يەنە باشقىلار دائىم ئۆزىنى يەھۋانىڭ ئالدىدا قەدىر-قىممىتى يوقتەك ھېس قىلىدۇ. قېرىندىشىمىز مارىيا b مۇنداق دەيدۇ: «مەن ئۈمىدسىزلەنگەندە ئۆزۈمنى تۇتۇۋېلىپ، سەلبىي ھېس تۇيغۇلاردىن ئايرىلىش ئۈچۈن كۆپ كۈچ چىقىرىشىمغا توغرا كېلىدۇ. شۇنداق ھېس-تۇيغۇلاردا بولۇش، ۋەز خىزمەتكە سەرپ قىلىدىغان ۋاقتىمنى ۋە كۈچۈمنى ئالغاچ، ئۆزۈمنى ئەيىبكار سېزىمەن».
3. بۇ ماقالىدە، نېمىنى مۇھاكىمە قىلىمىز؟
3 ۋەزىيىتىمىزنىڭ قانداق بولۇشىدىن قەتئىينەزەر، يەھۋا ھەربىرىمىزنىڭ قىيىنچىلىقلارغا بەرداشلىق بېرىشىمىز ئۈچۈن كۈچ بېرەلەيدۇ ۋە شۇ ۋەزىيەتكە ماس ئۇنىڭغا خىزمەت قىلىشىمىزغا ياردەم بېرەلەيدۇ. ئاۋۋال، بىز يەھۋانىڭ پاۋلۇس ۋە تىموتىيغا قىيىنچىلىقلارغا قارىماستىن ۋەز خىزمىتىنى تاماملىشىغا قانداق ياردەم بەرگەنلىكىنى كۆرۈپ چىقىمىز. ئاندىن كېيىن، ئۇنىڭ بىزگىمۇ قانداق ياردەم بېرىدىغانلىقىنى مۇھاكىمە قىلىمىز.
يەھۋا ۋەز خىزمەتنى داۋاملاشتۇرۇش ئۈچۈن كۈچ بېرىدۇ
4. پاۋلۇس قانداق قىيىنچىلىقلارغا دۇچ كەلگەن؟
4 پاۋلۇس نۇرغۇن قىيىنچىلىقلارغا دۇچ كەلگەن ئىدى. ئۇ بولۇپمۇ تاياق يېگەندە، چالما كېسەك قىلىنغاندا ۋە تۈرمىگە تاشلانغاندا كۈچ-مەدەتكە مۇھتاج بولغان (2-كورىنت. 11:23—25). پاۋلۇس بەزىدە سەلبىي ھېس-تۇيغۇلىرى بىلەن كۈرەش قىلغانلىقىنى ئوچۇق ئېيتىشتىن نومۇس قىلمىغان (رىملىقلار 7:18، 19، 24). يەنە ئۇ تېنىگە سانچىلغان تىكەنگە ئوخشاش بىر ئاغرىققا بەرداشلىق بەرگەن. ئۇ ئاشۇ تىكەننى خۇدانىڭ چىقىرىپ تاشلىشىنى بەك خالىغان ئىدى.—2-كورىنت. 12:7، 8.
پاۋلۇسنىڭ ۋەز خىزمىتىنى داۋاملاشتۇرۇشىغا نېمە ياردەم بەرگەن؟ (5، 6-ئابزاسقا قاراڭ) c
5. پاۋلۇس ئۆزى دۇچ كەلگەن قىيىنچىلىقلارغا قارىماي، نېمە ئىشلارنى قىلالىغان؟
5 خۇدا پاۋلۇسنىڭ شۇنچە قىيىنچىلىقلارغا دۇچ كېلىشىگە قارىماي، ئۇنىڭ ۋەز خىزمىتىنى داۋاملاشتۇرۇشىغا كۈچ بەرگەن. ئۇنداقتا، پاۋلۇسنىڭ نېمە ئىش قىلغانلىقىنى كۆرۈپ چىقايلى. مەسىلەن، ئۇ رىمدا ئۆز ئۆيدە قاماقتا ئولتۇرغىنىدا، يەھۇدىي يېتەكچىلەر ۋە بەلكىم ھۆكۈمەت ئەمەلدارلىرى ئالدىدا قىزغىنلىق بىلەن خۇش خەۋەرنى قوغدىغان (ئەلچى. 28:17؛ فىلىپى. 4:21، 22). ئۇ يەنە ئۇنى نازارەت قىلىدىغان قاراۋۇللارغا ۋەز قىلغان ۋە ئۇنى يوقلاپ كەلگەن بارلىق كىشىلەرگە گۇۋاھلىق بەرگەن (ئەلچى. 28:30، 31؛ فىلىپى. 1:13). شۇ ۋاقىتتا، پاۋلۇس ھەقىقىي مەسىھ ئەگەشكۈچىلىرىگە ياردەم بېرىدىغان خەتلەرنى يازغان. ئاشۇ خەتلەر بۈگۈنكى كۈندىمۇ بىز ئۈچۈن پايدىلىق. بۇنىڭدىن باشقا، پاۋلۇسنىڭ ئۈلگىسى رىمدىكى جامائەتنى كۈچلەندۈرگەچ، «ئۇلار تېخىمۇ جاسارەت بىلەن، قورقماي خۇدا سۆزىنى» يەتكۈزگەن (فىلىپى. 1:14). گەرچە پاۋلۇس بەزىدە ھەممە ئىشلارنى ئۆزى خالىغاندەك ئەركىن قىلالمىسىمۇ، ئۆز ۋەزىيىتىدىن تولۇق پايدىلانغان. ئۇنىڭ بېشىغا كەلگەن جاپا-مۇشەققەتلەر خۇش خەۋەرنىڭ تېخىمۇ كەڭ تارقىلىشىغا تۈرتكە بولغان.—فىلىپى. 1:12.
6. 2-كورىنتلىقلار 12:9، 10-ئايەتلەرگە ئاساسلانغاندا، پاۋلۇسنىڭ ۋەز خىزمەتنى تاماملىشىغا نېمە ياردەم بەرگەن؟
6 پاۋلۇس ئۆزى قىلغان بارلىق ئىشلارنى خۇدانىڭ كۈچىگە تايىنىپ قىلالىغانلىقىنى ئېتىراپ قىلغان. ئۇ ئاجىز بولغاندا، خۇدانىڭ كۈچى مۇكەممەل ئىپادىلىنىدىغانلىقىنى ئېيتقان (2-كورىنتلىقلار 12:9، 10-نى ئوقۇڭ). پاۋلۇسنىڭ زىيانكەشلىكلەرگە، تۈرمىگە چۈشۈشكە ۋە باشقا تۈرلۈك قىيىنچىلىقلارغا قارىماي، ۋەز خىزمەتنى تولۇق تاماملىشىغا، يەھۋا ئۆز مۇقەددەس روھنىڭ ياردىمى بىلەن كۈچ بەرگەن.
تىموتىينىڭ ۋەز خىزمىتىنى داۋاملاشتۇرۇشىغا نېمە ياردەم بەرگەن؟ (7-ئابزاسقا قاراڭ) d
7. تىموتىي ۋەز خىزمىتىنى داۋاملاشتۇرۇش ئۈچۈن قانداق قىيىنچىلىقلارغا بەرداشلىق بېرىشى كېرەك بولغان؟
7 پاۋلۇسنىڭ ياش خىزمەتدىشى تىموتىينىڭمۇ ۋەز خىزمەتتە خۇدانىڭ كۈچىگە تايىنىشىغا توغرا كەلگەن ئىدى. تىموتىي پاۋلۇسنىڭ ئۇزۇنغا سوزۇلغان ۋەز قىلىش سەپەرلىرىدە ئۇنىڭغا ھەمراھ بولغان. ئۇ يەنە يالغۇزمۇ سەپەر قىلغان. پاۋلۇس ئۇنى جامائەتلەرنى زىيارەت قىلىپ، قېرىنداشلارغا ئىلھام بېرىشكە ئەۋەتكەن (1-كورىنت. 4:17). تىموتىي ئۆزىنى بۇنىڭغا لايىق ئەمەستەك ھېس قىلغان. شۇڭا، پاۋلۇس بەلكىم ئۇنىڭغا مۇنداق دېگەن: «ھېچكىم سېنى ياش دەپ سەل قارىمىسۇن» (1-تىموت. 4:12). شۇ ۋاقىتتا، تىموتىينىڭ تېنىگە تىكەندەك سانجىلىدىغان، دائىم ئۇنى بىئارام قىلىدىغان ئاغرىقى بار ئىدى (1-تىموت. 5:23). بىراق، ئۇ ئۆزىنىڭ خۇدانىڭ مۇقەددەس روھىنىڭ ياردىمى ئارقىلىق خۇش خەۋەرنى ۋەز قىلالايدىغانلىقىغا ۋە قېرىنداشلارغا خىزمەت قىلالايدىغانلىقىغا ئىشەنگەن.—2-تىموت. 1:7.
يەھۋا قىيىنچىلىقلارغا قارىماي، ساداقەتمەنلىكنى ساقلاپ قېلىشىمىزغا كۈچ بېرىدۇ
8. بۈگۈنكى كۈندە، يەھۋا ئۆز خەلقىگە قانداق كۈچ بېرىدۇ؟
8 بۈگۈنكى كۈندە، يەھۋا ئادەتتىكى كۈچتىن ئېشىپ چۈشىدىغان كۈچنى ئۆز خەلقىگە بېرىدۇ. شۇڭا، ئۇلار ساداقەتمەنلىك بىلەن ئۇنىڭغا خىزمەت قىلالايدۇ (2-كورىنت. 4:7). يەھۋا ئۆزىگە سادىق قېلىشىمىزنى خالايدۇ. ئۇ شۇنداق قىلىشىمىز ئۈچۈن تۆت يولنى كۆرسىتىپ بەرگەن: دۇئا، مۇقەددەس كىتاب، ئېتىقادچىلار بىلەن مۇناسىۋەت ئورنىتىش ۋە ۋەز خىزمەت.
يەھۋا بىزنى دۇئا ئارقىلىق كۈچلەندۈرىدۇ (9-ئابزاسقا قاراڭ)
9. دۇئا بىزگە قانداق ياردەم بېرەلەيدۇ؟
9 دۇئا ئارقىلىق كۈچكە ئېرىشىڭ. ئەفەسلىكلەر 6:18-ئايەتتە، پاۋلۇس بىزنى، خۇداغا ھەردائىم دۇئا قىلىشقا دەۋەت قىلغان. خۇدا دۇئالىرىمىزنى ئاڭلاپ، بىزگە كۈچ بېرىدۇ. بولىۋىيىدىكى قېرىندىشىمىز جونى ئارقا-ئارقىدىن كەلگەن بىر قاتار قىيىنچىلىقلاردا، يەھۋانىڭ ئۇنىڭغا ياردەم بەرگەنلىكىنى ھېس قىلغان. ئۇنىڭ ئايالى ۋە ئاتا-ئانىسى بىرلا ۋاقىتتا ئېغىر كېسەل بىلەن ئاغرىغان. ئۈچ كىشىنىڭ ئېھتىياجلىرىغا كۆڭۈل بۆلۈش جونىغا بەك قىيىن بولغان. ئاپىسى ئېغىر كېسەل تۈپەيلىدىن ئۆلۈپ كەتكەن. ئايالى ۋە دادىسىنىڭ كېسەلدىن ساقىيىشى ئۈچۈن كۆپ ۋاقىت كەتكەن ئىدى. ئۇ قىيىن ۋاقىتلارنى ئەسلەپ مۇنداق دەيدۇ: «قىيىنچىلىقلاردىن باش كۆتۈرەلمىگەندە، ماڭا ھەردائىم يەھۋاغا دۇئا قىلىش ياردەم بەرگەن، مەن ھېس-تۇيغۇلىرىمنى بىر-بىرلەپ ئۇنىڭغا ئېيتىپ بېرەتتىم». يەھۋا جونىنىڭ قىيىنچىلىقلارغا بەرداشلىق بېرىشى ئۈچۈن كېرەكلىك كۈچنى بەرگەن. بولىۋىيىدىكى بىر ئاقساقال، رونالد ئاپىسىنىڭ راك كېسىلى بولغانلىقىنى بىلگەن. ئاپىسى بىر ئايدىن كېيىن ئۆلۈپ كەتكەن. ئۇنىڭغا شۇ ئېغىر ۋاقىتتا نېمە ياردەم بەرگەن؟ ئۇ: «مەن يەھۋاغا دۇئا قىلغاندا ئىچ-باغرىمنى تۆكۈپ، ھېس-تۇيغۇلىرىمنى ئېيتىپ بېرەتتىم. ئۇنىڭ مېنى ھەرقانداق كىشىدىن، ھەتتا ئۆزۈمدىنمۇ ياخشىراق چۈشىنىدىغانلىقىنى بىلىمەن»، دەيدۇ. بەزىدە قىيىنچىلىقلارغا بەرداشلىق بېرىش قىيىن بولغاچ، نېمە ھەققىدە دۇئا قىلىشنى بىلمەي قالىمىز. بىراق، ئوي-پىكىرلىرىمىز ۋە ھېس-تۇيغۇلىرىمىزنى سۆز بىلەن ئىپادىلەش قىيىنغا توختىسىمۇ، خۇدا بىزنى ئۆزىگە دۇئا قىلىشقا دەۋەت قىلىدۇ.—رىملىقلار 8:26، 27.
يەھۋا بىزنى مۇقەددەس كىتاب ئارقىلىق كۈچلەندۈرىدۇ (10-ئابزاسقا قاراڭ)
10. ئىبرانىيلار 4:12-ئايەتتە كۆرسىتىلگەندەك، نېمە ئۈچۈن مۇقەددەس كىتابنى ئوقۇش ۋە ئۇنىڭ ئۈستىدە چوڭقۇر ئويلىنىش بىز ئۈچۈن بەك مۇھىم؟
10 مۇقەددەس كىتاب ئارقىلىق كۈچكە ئېرىشىڭ. پاۋلۇس مۇقەددەس يازمىلارنى ئوقۇپ، كۈچكە ۋە تەسەللىگە ئېرىشكەن. بىزمۇ شۇنداق قىلالايمىز (رىملىقلار 15:4). خۇدانىڭ سۆزىنى ئوقۇپ، ئوقۇغانلىرىمىز ئۈستىدە چوڭقۇر ئويلانساق، يەھۋا ئۆز روھىنى ئىشلىتىپ، يازمىلارنىڭ بىزگە پايدىلىق ئىكەنلىكىنى چۈشىنىشىمىزگە ياردەم بېرەلەيدۇ (ئىبرانىيلار 4:12-نى ئوقۇڭ). يۇقىرىدا تىلغا ئالغان رونالد: «ھەر كۈنى كەچتە مۇقەددەس كىتابنى ئوقۇشنى ئادەتكە ئايلاندۇرغىنىمدىن بەكمۇ خۇشالمەن. يەھۋانىڭ پەزىلەتلىرى ۋە ئۆز خىزمەتچىلىرىگە كۆرسەتكەن مېھىر-شەپقىتى ھەققىدە كۆپ ئويلىنىمەن. بۇ قايتا كۈچكە تولۇشۇمغا ياردەم بېرىدۇ»،— دەيدۇ.
11. ئازاب چېكىۋاتقان بىر قېرىندىشىمىزغا مۇقەددەس كىتاب قانداق كۈچ بەرگەن؟
11 خۇدانىڭ سۆزلىرى ئۈستىدە چوڭقۇر ئويلىنىش، قىيىنچىلىققا دۇچ كەلگەندە، توغرا كۆزقاراشنى ساقلىشىمىزغا ياردەم بېرىدۇ. ئازاب چېكىۋاتقان بىر تۇل ئايالغا مۇقەددەس كىتابنىڭ قانداق ياردەم بەرگەنلىكىنى كۆرۈپ باقايلى. تۇل ئايالغا بىر ئاقساقال، ئايۇپ كىتابىنى ئوقۇش ئارقىلىق پايدىلىق مەسلىھەتلەرگە ئېرىشەلەيدىغانلىقىنى ئېيتقان. ئۇ ئايال ئوقۇشنى باشلىغاندا، دەسلەپتە ئايۇپنىڭ خاتا ئوي-پىكىر قىلغانلىقىنى دەرھاللا ئەيىبلىگەن. ئۇ ئۆز خىيالىدا ئايوپنى مۇنداق ئاگاھلاندۇرغان: «ئايۇپ! پەقەت ئۆز قىيىنچىلىقلىرىڭ ھەققىدىلا ئويلىما!» بىراق، ئۇ كېيىنرەك ئۆزىنىڭمۇ ئايۇپدەك كۆزقاراشتا ئىكەنلىكىنى تونۇپ يەتكەن. بۇ ئۇنىڭ ئۆز كۆزقارىشىنى ئۆزگەرتىشىگە ياردەم بەرگەن ۋە يولدىشىدىن ئايرىلىش ئازابىغا بەرداشلىق بېرىشىگە كۈچ بەرگەن.
يەھۋا بىزنى ئېتىقادچى قېرىنداشلار ئارقىلىق كۈچلەندۈرىدۇ (12-ئابزاسقا قاراڭ)
12. يەھۋا قېرىنداشلىرىمىز ئارقىلىق بىزگە قانداق كۈچ بېرىدۇ؟
12 قېرىنداشلار بىلەن مۇناسىۋەت ئورنىتىش. خۇدا ئۆز خىزمەتچىلىرىگە ئېتىقادچى قېرىنداشلار ئارقىلىق كۈچ بېرىدۇ. پاۋلۇس قېرىنداشلار بىلەن جەم بولۇپ، ئۆز-ئارا ئىلھام ئېلىشقا تەشنا ئىكەنلىكىنى يازغان (رىملىقلار 1:11، 12). يۇقىرىدا تىلغا ئالغان مارىيا قېرىنداشلار بىلەن ئالاقە قىلىشنى بەكمۇ قەدىرلىگەن. ئۇ: «يەھۋا ھەتتا قىيىنچىلىقلىرىمنى بىلمەيدىغان قېرىنداشلارنى ئىشلىتىپ، ماڭا ياردەم بەرگەن. ئۇلار تەسەللى سۆزلىرىنى ئېيتاتتى ياكى خەتلەرنى ئەۋەتەتتى. مەن دەل شۇنىڭغا مۇھتاج ئىدىم. ئۇنىڭدىن باشقا، ئوخشاش قىيىنچىلىقلارغا دۇچ كەلگەن قېرىنداشلار بىلەن مۇڭدىشىش ۋە ئۇلارنىڭ نېمە قىلغانلىقىنى بىلىش ياردەم بېرىدۇ. يەنە ئاقساقاللار جامائەتتىكى قېرىنداشلارنىڭ مېنى ياخشى كۆرىدىغانلىقىنى دائىم ئېسىمگە سېلىپ تۇرىدۇ»،— دەيدۇ.
13. بىز جامائەت يىغىلىشلىرىدا، بىر-بىرىمىزنى قانداق كۈچلەندۈرەلەيمىز؟
13 بىر-بىرىمىزگە ئىلھام بېرىشنىڭ بىر پۇرسىتى جامائەت يىغىلىشلىرىغا قاتنىشىش. يىغىلىشلارغا قاتناشقاندا، سىز تەشەببۇسكارلىق بىلەن قېرىنداشلارنىڭ تىرىشچانلىقىنى سەمىمىي ماختاپ، ئۇلارنى ياخشى كۆرىدىغانلىقىڭىزنى ئېيتىڭ. شۇ ئارقىلىق قېرىنداشلارغا كۈچ-مەدەت بېرەلەيسىز. مەسىلەن، يىغىلىشتىن بۇرۇن بىر ئاقساقال، پېتىر يولدىشى گۇۋاھچى ئەمەس قېرىنداشقا شۇنداق دېگەن: «يىغىلىشتا سىزنى ئالتە بالىڭىزنى بىلەن كۆرۈش ھەممىمىزگە كۆپ ئىلھام بېرىدۇ. سىلەر دائىم ياخشى جاۋابلارنى تەييارلاپ كېلىسىلەر». بۇ ئاڭلىغان قېرىندىشىمىز كۆز يېشىنى تۇتالماي: «بۈگۈن مېنىڭ مۇشۇ سۆزلەرنى ئاڭلاشقا قانچىلىك مۇھتاج بولغىنىمنى، سىز تەسەۋۋۇر قىلالمايسىز»، دېگەن.
يەھۋا بىزنى ۋەز خىزمىتى ئارقىلىق كۈچلەندۈرىدۇ (14-ئابزاسقا قاراڭ)
14. ۋەز خىزمىتىگە قاتنىشىش بىزگە قانداق ياردەم بېرىدۇ؟
14 ۋەز خىزمەت ئارقىلىق كۈچكە ئېرىشىڭ. مۇقەددەس كىتاب ھەقىقىتىنى باشقىلارغا ئېيتقاندا، ئۇلارنىڭ ياخشى ياكى يامان ئىنكاس قايتۇرۇشىدىن قەتئىينەزەر، بىز ئۆزۈمىزنى روھى كۆتۈرەڭگۈ، جۇشقۇن سېزىمىز (پەند. نە 11:25). قېرىندىشىمىز سىتېيسى ۋەز خىزمەتنىڭ ئۆزىگە قانچىلىك كۈچ بېرىدىغانلىقىنى تونۇپ يەتكەن. ئائىلىسىدىن بىرى جامائەتتىن چىقىرىلغاندا، ئۇنىڭ كۆڭلى بەكمۇ يېرىم بولغان. ئۇ دائىم ئۆز-ئۆزىدىن: «ئائىلە ئەزالىرىمغا ياردەم بېرىشتە نېمىنى يېتەرلىك قىلمىدىم؟»— دەپ سورىغاچ، روھىي چۈشكۈن يۈرگەن. شۇ قىيىن ۋەزىيەتتىن قۇتۇلۇشقا نېمە ئۇنىڭغا ياردەم بەرگەن؟ ۋەز ئېيتىش! ئۇ ۋەز خىزمىتى بىلەن ئالدىراش بولغاندا، دىققىتىنى ئۆز تېررىتورىيىسىدە ياردەمگە مۇھتاج ئادەملەرگە قارىتىشقا باشلىغان. ئۇ: «شۇ ۋاقىتتا، يەھۋا روھىي جەھەتتىن تېز ئۆسكەن بىر مۇقەددەس كىتابنى ئۆگەنكۈچىنى تېپىشىمغا ياردەم بەرگەن. بۇ ماڭا چوڭ ئىلھام بولدى. ۋەز خىزمەت ماڭا كۈچ بەرگەن»،— دەيدۇ.
15. مارىيانىڭ سۆزلىرىدىن نېمىنى ئۆگەندىڭىز؟
15 ئۆز ۋەزىيەتلىرى سەۋەبلىك، بەزىلەر: «مەن ۋەز قىلالمايمەن»،— دەپ ھېس قىلىشىدۇ. سىزمۇ شۇنداق ھېس قىلسىڭىز، يەھۋانىڭ قولۇڭىزدىن كېلىشىچە قىلغىنىڭىزدىن خۇرسەن ئىكەنلىكىنى ئۇنتۇماڭ. مارىيانىڭ مىسالنى يەنە بىر قېتىم كۆرۈپ باقايلى. ئۇ: چەت ئەل تىلىدىكى جامائەتكە كۆچكەن. ئۇ: «مەن پەقەت ئاددىي جاۋابلارنى بېرەلەيتتىم، مۇقەددەس كىتابتىن بىر ئايەتنى ئوقاتتىم ياكى ۋەز خىزمەتتە بىر ۋاراقچىنى بېرەتتىم»،— دېگەن. ئۇ شۇ تىلنى ياخشى سۆزلەيدىغانلار بىلەن ئۆزىنى سېلىشتۇرغاندا، ئۆزىنى پايدىسىزدەك ھېس قىلغان. بىراق، مارىيا ئۆز كۆزقارىشىنى ئۆزگەرتكەن. شۇ تىلنى ياخشى سۆزلىيەلمىسىمۇ، مارىيا ئۆزىنى يەھۋانىڭ ئىشلىتىدىغانلىقىنى تونۇپ يېتىشكە باشلىغان. ئۇ: «مۇقەددەس كىتابتىكى ھەقىقەتلەر شۇنچىلىك ئاددىيكى، ئۇلار كىشىلەرنىڭ ھاياتىنى ئۆزگەرتەلەيدۇ»،— دەيدۇ.
16. ئۆيدىن چىقالمايدىغان، ئەمما ۋەز قىلىشنى خالايدىغانلارنىڭ كۈچكە ئېرىشىشكە نېمە ياردەم بېرەلەيدۇ؟
16 گەرچە ئۆيۈمىزدىن چىقالمىساقمۇ، ۋەز خىزمەتكە قاتنىشىش قىزغىنلىقىمىزنى يەھۋا كۆرىدۇ. شۇڭا، ئۇ بىزنى داۋالاش ئۈچۈن ئۆيۈمىزگە كېلىدىغان دوختۇر ياكى سېسترالارغا ۋەز قىلىشىمىزغا ياردەم بېرەلەيدۇ. ئەگەر بىز ئۆتمۈشتە قىلالىغان ئىشلار بىلەن ھازىر قىلالايدىغان ئىشلىرىمىزنى سېلىشتۇرساق، بەلكىم ئۈمىدسىزلىنىشىمىز مۇمكىن. ئەمما، يەھۋانىڭ ھازىر بىزگە قانداق ياردەم بېرىدىغانلىقىنى چۈشەنسەك، قىيىنچىلىقلارغا خۇشاللىق بىلەن بەرداشلىق بېرىشكە ئېھتىياجلىق كۈچىمىز بولىدۇ.
17. ۋەز 11:6-ئايەتكە ئاساسەن، نېمە ئۈچۈن بىز نەتىجىسىنى دەرھاللا كۆرمىسەكمۇ، ۋەز خىزمەتنى داۋاملاشتۇرۇشىمىز كېرەك؟
17 بىز ھەقىقەت ئۇرۇقلىرىنى چاچقاندا، قايسىسىنىڭ يىلتىز تارتىپ، ئۆسۈشكە باشلايدىغانلىقىنى بىلمەيمىز (ۋەز 11:6-نى ئوقۇڭ). مەسىلەن، باربارا ئىسىملىك سەكسەن ياشتىكى قېرىندىشىمىز دائىم تېلېفون ۋە خەت ئارقىلىق ۋەز قىلىدۇ. ئۇ بىر خېتىگە، «سىز ئۈچۈن خۇدا نېمىلەرنى قىلغان؟» دېگەن ماۋزۇدىكى «كۈزىتىش مۇنارى»، 2014-يىل، مارت سانىنى قوشۇپ ئەۋەتكەن. ئۇ ئۆزى ئەۋەتكەن خەتنىڭ جامائەتتىن چىقىرىلغان بىر جۈپ ئەر-ئايالغا يەتكەنلىكىنى بىلمىگەن. ئۇلار ژۇرنالنى قايتا-قايتا ئوقۇغان. يولدىشى يەھۋا ئۇنىڭغا ئۇدۇل سۆزلەۋاتقاندەك ھېس قىلغان. 27 يىلدىن كېيىن، شۇ بىر جۈپ ئەر-ئايال يىغىلىشقا قاتنىشىشنى باشلىغان ۋە ئاستا-ئاستا قايتا پائال ۋەز ئېيتقۇچىلار بولغان. باربارا يازغان شۇ بىر پارچە خەتنىڭ ياخشى نەتىجىسىنى كۆرگەندە، ئۇنىڭ قانچىلىك ئىلھام ۋە كۈچكە ئېرىشكەنلىكىنى تەسەۋۋۇر قىلىپ كۆرۈڭ.
يەھۋا بىزنى 1) دۇئا، 2) مۇقەددەس كىتاب، 3) ئېتىقادچى قېرىنداشلار ۋە 4) ۋەز قىلىش ئارقىلىق كۈچلەندۈرىدۇ (9، 10، 12، 14-ئابزاسلارغا قاراڭ)
18. خۇدانىڭ كۈچىگە ئېرىشىش ئۈچۈن نېمە قىلالايمىز؟
18 يەھۋا ئۇنىڭ كۈچىگە ئېرىشىشىمىز ئۈچۈن بىزگە يېتەرلىك پۇرسەتلەرنى بېرىدۇ. يەھۋا تۈرلۈك يوللار بىلەن، مەسىلەن دۇئا، مۇقەددەس كىتاب، ئېتىقادچى قېرىنداشلار ۋە ۋەز خىزمەتكە ئارقىلىق بىزگە كۈچ بېرىدۇ. شۇ يوللار بىلەن يەھۋاغا تايانساق، ئۇنىڭ كۈچ-قۇدرىتىگە ۋە بىزگە ياردەم بېرىشكە تەشنا ئىكەنلىكىگە ئىشەنگىنىمىزنى كۆرسىتەلەيمىز. ئاسماندىكى ئاتىمىز كۆڭلى ئۇنىڭغا مايىل بولغانلارغا ئۆز كۈچ-قۇدرىتىنى كۆرسىتىدۇ. شۇڭا، ھەرقاچان ئۇنىڭغا تايىنايلى!—2-تار. 16:9.
17-ناخشا ئالغا باس، يەھۋا گۇۋاھچىلىرى!
a بىز قىيىن كۈنلەردە ياشاۋاتىمىز. ئەمما، خۇدا بىزگە شۇ قىيىنچىلىقلارغا بەرداشلىق بېرىش ئۈچۈن ياردەم بېرىدۇ. ھازىر، پاۋلۇس بىلەن تىموتىينىڭ قىيىنچىلىقلارغا قارىماي يەھۋاغا خىزمەت قىلىشىغا، ئۇنىڭ قانداق ياردەم بەرگەنلىكىنى كۆرۈپ چىقىمىز. بۈگۈنكى كۈندە قىيىنچىلىقلارغا بەرداشلىق بېرىپ، داۋاملىق يەھۋا خۇداغا خىزمەت قىلىشىمىزغا، ئۇنىڭ قانداق ياردەم بېرىدىغانلىقىنىڭ تۆت يولىنى مۇھاكىمە قىلىمىز.
b ئىسىم ئۆزگەرتىلگەن
