Ko Brasil, kuli eci ci panda 1.500 kalupale okuti ka muli akongelo. Amue pokati kalupale aco a sangiwa ocipãla kuenda muli omanu valua okuti, lalimue eteke va lisangele Lolombangi Via Yehova. Omo liaco, o filiale yo Brasil ya sokiya upange woku kunda ulikasi, oco alupale aco a nyuliwe oku upisa kosãi Yenyenye Linene toke ya Cembanima wo 2020. Omo lietateko lio COVID-19, upange woku kunda wa lingiwa pocakati covikanda. Akundi va tunda kueci ci soka 3.000 kakongelo, va panga onepa kupange waco.

Akundi va linga akonomuiso vo internet atiamẽla kolupale va ilikiwila kuenje va sokiya ovikanda ndomo ci likuata lasukila olonungambo violupale luaco. Ndeci, manji umue ukãi ukundi wotembo yosi, wa sonehela ovikanda omanu va tunga volupale lumue luofeka yo Tocantins. Eye wa limbuka okuti ofeka yaco, ndopo ya nyõliwa omo lioku pia kuovisenge. Vukanda waye, eye wa kongelamo ovisimĩlo vi sangiwa kelivulu Liesituluilo 21:5 kuenje wa lombolola ndomo Yehova kovaso yoloneke a ka ‘lingisa ovina viosi viokaliye’ kuenda oku semulũla ovina vĩvi via lingiwa kongongo. Noke yoloneke vimue, ukãi umue wa tumisa kohundi yotembo yosi o audiu yimue poku situlula ndomo a sanjukila oku tanga eci catiamẽla konjila ndomo Suku “a pondola oku mioñolola ovimuenyo vietu.” Noke ukãi waco wa pinga olonumbi vikuavo.

Omunu umue, wa tuma esapulo limue ku manji umue ukai. Esapulo liaco, lia lombolola onima yiwa yupange woku kunda. Ulandu wesapulo liaco u popia ndoco: “Si kuete olondaka vioku situlula onjila ndomo Suku a ku tuma oco o ndi sange. . . . Nda pandula! Ove wa ndi lingisa okuti ndi kolela vali okuti, Suku o ndi sole kuenda eye o kasi oku tata ame kumue lepata liange! Ndi liyevite okuti ndi soliwe. Ndaño sia ku kũlĩhĩle, pole, ove wa panga onepa ketambululo liohutililo yange! Nda pandula lutima wosi!”

Ukulu umue wekongelo o kasi oku vumba vekongelo lio Itamarati ko Petropolis, Rio de Janeiro, wa lombolola eci catiamẽla kovisimĩlo via vamanji va panga onepa kupange woku kunda. Eye hati: “Tua liyeva ndu okuti tuakundi va likasi vana va kasi oku kundila kocikanjo ci kasi ocipãla. Eli esumũlũho limue okuti vamanji valua nda ka va li kuatele, omo liekalo tu sangiwa kuenda omo liovikele viepata.”

Ocili, Yehova wa sumũlũisa upange waco. Tu kuete esumũlũho lioku kuatisa oco olondaka viwa vi kundiwile “komanu vosi va kasi vemẽhi lilu.”—Va Kolosai 1:23.