6 YA KUPUPU 2020
KOFEKA YO CANADA
Ombembua Kotembo Yohali
Manji Jean-Yves lukãi waye Vasthie Mudaheranwa va kasi oku kuatisa omanu va kuatiwa luvei wo coronavirus volupale luo Montreal, vofeka yo Kanada. Manji Mudaheranwa o ndotolo yosipitali yimue volupale luaco kuenda ukãi waye ocifulumela coku tata ava va kuatiwa luvei wo coronavirus. Osimbu omanu vakuavo va sakalala, manji Mudaheranwa lukãi waye va kasi oku pamisa ekolelo liavo ku Yehova loku kuata ‘esanju liovutima’ omo liohuminyo Yaye.—Isaya 65:14.
Manji Mudaheranwa wa popia hati, “lalimue eteke nda muile vana tu talavayela kumosi oku kuata usumba walua ndowu va kuete cilo.” Ukãi waye wa popiavo hati: “Elilongiso liopokolika lia siata oku tu kuatisa calua. Etu tua siata oku sokolola kolondimbukiso viloneke viasulako loku ivaluka okuti Yehova o kasi letu kuenda lalimue eteke a ka tu yanduluka. Ohutililo ya siatavo oku tu kuatisa calua. Osimbu sia endele kupange ndi likutilila kuenje ndi kuata ombembua.”
Manji Mudaheranwas kohongele yimue yekongelo
Manji Mudaheranwa wa lombolola hati, “ame nda citiwa ko Ruanda kuenda nda puluka kuyaki wa pita vofeka yaco. Kulo ko Canada ka tua lamola ocitangi caco kuenje olonjanja vimue tu ivalako okuti tu kasi koloneke viasulako. Ndi popia okuti, sia la sima okuti eteke lia Yehova li kasi calua ocipepi. Uvei wo coronavirus wa siata oku ñuatisa oku limbuka okuti tu kasi koloneke via sulako, loku pamisa ekolelo liange Kembimbiliya kuenda kovitumasuku vialio.”
Afendeli va Yehova koluali luosi va siatavo oku lekisa ekolelo limuamue ndeli lia manji Mudaheranwa lukãi waye kuenda oku kuata ombembua vokuenda kuotembo yilo yovitangi.—Isaya 48:18.