Keteke 16 yosãi ya Susu wo 2021, Embimbiliya li Kola—Epongoluilo Lioluali Luokaliye lia sandekiwa kelimi Liumbundu okuti, li molẽha vovimalẽho tu kuete. Ohongele yoku sandeka Embimbiliya, ya ngalavaliwa kuenje akongelo osi kelimi Liumbundu Vongola, a tala ohongele yaco. Manji Genésio Verdiano, o panga onepa Kocisoko Cakulu vo Filiale, eye wa sandeka Embimbiliya.

Elimi Liumbundu olio lia siata oku vanguiwa calua pokati kalimi o Vongola okuti, ci soka olohuluwa epanduvali komanu olonyitiwe, va vangula elimi liaco. Kuli eci ci pitahãla 6.500 kakundi va vangula Umbundu.

Ovimunga vivali vieci ci soka epandu ka vamanji vakuakupongolola, va talavaya vokuenda kueci ci soka anyamo atãlo oco va malusule Embimbiliya eli. Manji umue o panga onepa kocimunga coku pongolola wa popia hati: “Epongoluilo eli liokaliye, li ka lingisa okuti ovina tu tanga Vovisonehua vi kala ndu okuti, tu vi lete muẽle kuenda opo tu kasi, momo lia leluka oku kuata elomboloko. Olio li ka leluisa onjila yoku longisa vakuetu Ondaka ya Suku kupange woku kunda.”

Manji umue o panga onepa Kocisoko Cakulu vo Filiale wa popia hati: “Tua kũlĩha okuti eci omanu va tanga Embimbiliya velimi liavo muẽle, ovo va pondola oku kuata elomboloko liwa liatiamẽla kocili. Tu ka vetiyiwa calua poku mola ndomo Yehova a talavaya Londaka yaye kelimi Liumbundu oco omanu valua va kũlĩhe ocili.”—2 Va Tesalonike 3:1.