Keteke 7 ya Kupupu 2020 Onganji yi tuala ondaka kombonge kofeka yo Belarus ya likala epingilo lia lingiwa kofeka yo Russia yoku tiula manji Nikolay Makhalichev kuenda ya ecelela okuti manji o yovuiwa vokayike. Manji Makhalichev wa kuata esanju lialua omo a yovuiwa vepuluvi lina okuti co wecelela oku kala kocipito Conjivaluko colofa via Yesu kumue lakamba vaye kofeka yo Belarus.

Ombonge ya kapa vokayike manji Makhalichev keteke 21 ya Kayovo 2020, eci eye a kala oku linga ungende woku tunda ko Rússia oku enda kolfeka yo Belarus oku ka nyula akamba vaye. Akuenje velombe kofeka yo Belarus va kuata manjetu noke yoku kũlĩhisa ovicapa viaye loku limbuka okuti wa kala umue pokati komanu va sandiliyiwa kofeka yo Russia omo lioku sokiya upange wocisoko cimue ovo va tenda okuti “colongangala.

Noke yoloneke vitatu, ombonge ya nõlapo oku kapa manji Makhalichev vokayike osimbu va kala oku nõlapo nda vo tiula ko Russia, kuna a laikele oku sombisiwa omo lialundi vo linga kosãi ya Susu yunyamo 2019. Eyi ya kala onjanja yatete okuti Ombangi yimue ya Yehova ya kapiwa vokayike kofeka yikuavo omo liocihandeleko cimue ca eciwa lo Russia.

Manji Makhalichev osimbu a kala vokayike, wamamako oku pamisa ekolelo liaye. Eye wa tẽla oku longisa Embimbiliya komanu vakuãla kuenda kulandu waye wupange woku kunda wosãi Yelombo wa eca eci ci soka 198 kolowola.

Tua kolela okuti vamanjetu kofeka yo Russia va ka amamako oku tenda Yehova ndocikolo cavo kuenda ocitililo vokuenda kuotembo yaco yovitangi.—Osamo 142:5.