Keteke 26 Yevambi Linene 2023, noke yoku pita ci soka anyamo atãlo vokayike, manji Sergey Klimov wa yovuiwa vokayike ko ko Rússia, volupale luo Astrakã. Eye wa kapiwile vokayike keteke 3 Yevambi 2018 kuenda wa kevelela esombiso vokayike. Keteke 5 ya Kuvala 2029, eye wa sombisiwa loku tumiwa vokayike kamue, kuna a kalako otembo yalua.

Osimbu a kala vokayike, Manji Sergey ka vo ecelele okuti o nyũliwa lukãi waye vokuenda kuolosãi eceya. Handi vali, lalimue eteke a tambuile ovikanda via tumiwile kokuaye. Pole, manji Sergey wa amamako oku pamisa ekolelo liaye poku likutilila kuenda poku tanga Embimbiliya kuenje co kuatisa oku kuata ovisimĩlo via sunguluka.

Olombiali via lundila manji Sergey okuti o tiamẽla ketavo limue liungangala. Pole, vokuenda kuesombiso liaye, manji Sergey lutõi wa likala elundi liaco kuenda wa lombolola esunga lieci a siatela oku kundila esapulo Liembimbiliya komanu vakuavo poku popia hati: “Suku yange Yehova, o Suku yimue ukuacisola kuenda ukuesunga.” Eye wa popiavo hati: “Ca siata oku ndi vetiya oku kuatisa omanu vakuavo, ocisola okuti esuvu lungangala hayoko.”

Tua sanjuka calua omo okuti, manji Sergey kuenda manji Yuliya va kasi vali kumosi. Tu eca olopandu poku mola okuti Yehova, wa siata oku sumũluĩsa onjila manji Sergey a nõlapo yoku amamako lekolelo.—Yehosua 24:14.