2 Yenyenye Linene 2020, * Ombonge Yolupale Luo Berezovsky Vimbo Lio Kemerovo

Anyamo epandu lolosãi epandu vokayike

Sergey Britvin

• Unyamo Woku Citiwa: 1965 (Vimbo Lio Kemerovo)

• Ulandu Womuenyo: Wa talavaya vokuenda kuanyamo alua lomakina yoku votola ovina vi lema calua kuenda wa kala ukuakuendisa akãlu anene. Wa liwekapo oku linga upange waco omo lioku vela. O sole olomapalo viombunje.

• Kunyamo wo 1992 wa kuela la Natalya. Wa fetika oku lilongisa Embimbiliya kunyamo wo 1995 noke yoku lilongisa ohuminyo ya Suku yatiamẽla kepinduko. Noke lianyamo alua, Natalya wa nõlapo oku lilongisa Embimbiliya. Eye wa komõha ekolelo ulume waye a lekisa kuenda apongoloko awa eye a lingile komuenyo.

Vadim Levchuk

• Unyamo Woku Citiwa: 1972 (Vimbo Lio Kemerovo)

• Ulandu Womuenyo: Wa citiwila vepata limue okuti ka va kaile vakuetavo. Wa talavaya koku fẽla ovawe a kuete esilivilo vokuenda 14 kanyamo.

• Kunyamo wo 1992, wa fetika oku lilongisa Embimbiliya. Kunyamo wo 1997 wa kuela la Tatiana. Va kuete omãla vavali. Epata liosi lia sumbila Embimbiliya. Ovo va solevo olomapalo viombunje kuenda vikuavo vi lingiwa voluayela.

Keteke 22 Yevambi Linene yunyamo 2018, Akuenje Velombe Vupange Woku Teyuila (FSB) va tuiyila olonjo ecelãla via vamanji volupale luo Berezovsky. Noke vamanji Britvin la Levchuk va kuatiwa loku konomuisiwa. Ombonge ya Velapo yo Kemerovo ya handeleka okuti vamanji vaco vavali va kapiwa vokayike otembo yimue. Ovo va kala vokayike ci panda unyamo umosi lolosãi epandu. Keteke 25 ya Cembanima yunyamo 2019, vamanji vaco va tumiwa oku kala kolonjo ndolomandekua toke cilo.

Vamanji Britvin kuenda Levchuk, havoko lika va kasi oku liyaka locitangi caco. Pole, vamanji vakuavo vatatu va kasivo oku lundiliwa omo liekolelo liavo vimbo lio Kemerovo. Otembo yosi tu sokolola loku likutililako vamanjetu vosi va kasi volokayike ko Rusia. Va Heveru 13:3 ku tu sapuila okuti: “Ko ka ivaliko vana va kasi vokayike, ndu okuti wa kalivo vokayike kumue lavo kuenda la vana va tatiwa lãvi, momo vu kasi kumue lavo vetimba limuamue.”