Ocipito cocisoko 148 Cosikola Yembimbiliya yo Gileada yo Torre de Vigia, ca kala ndovipito vikuavo, ca litepele lika ceci okuti: Pocitumãlo caco pa kala lika olondonge, alongisi kuenda vamanji va kuata olonepa. Vamanji valua va kuama esokiyo liaco lekuatiso lioku pitiyiwa. Vokuenda kuvei wokoronaviru u kasi oku pita voluali luosi, eliangiliyo eli konepa yespiritu, ocindekaise cimue ci lekisa ndomo ocisoko ca siata oku linga apongoloko omo liovitangi viokaliye.

Ocipito coku malusula osikola ca pita keteke 14 Yelombo yunyamo wo 2020 kocitumãlo coku pindisa Colombangi Via Yehova ko Patterson, New York. Manji Stephen Lett, o panga onepa Kosungu Yolombangi Via Yehova, eye wa kala usongui wocipama caco. Ci soka olondonge 55 ovo va pindisiwa. *

Eci kua kambele olosemana vimue oco Osikola yi malusuiwe, uvei wo COVID-19 wa sapuiwa calua vovingungu viasapulo voluali luosi. Ndomo ca lekisiwa vonepa Ocina Cokaliye vo jw.org, ombala Yolombangi Via Yehova ya kala oku kũlĩhĩsa ocitangi caco kuenje ya eca olonumbi kakongelo ndomo ci likuata lovihandeleko via eciwa lolombiali.

Cimue pokati kocihandeleko caco ceci okuti, ka citava oku liongoluila apa pali omanu valua. Poku konomuisa esunga eli kuenda asunga akuavo, Osungu Yolombangi Via Yehova ya nõlapo okuti ka citava oku laleka omanu vana ka va kasi ko Betele oco va kale kocipito caco. Handi vali, pocitumãlo pa lingiwila ohongele yaco, pa kala lika olondonge. Vamanji ko Betele kuenda olondonge vio Gileada via eca ongangu yiwa poku kuatisa kuenda oku sumbila onjila ya nõliwapo.—Yoano 13:34, 35.

Omo liaco, kualingiwa esokiyo lioku pitiya ulandu waco ku vana va lalekiwa la vamanji va pindisiwa kosikola yo Gileada kuenda kepata lio Betele. Esokiyo liaco, lia kuatisa eci ci pitãhala 10.000 ya vamanji voluali luosi oku kongelamo akamba kuenda epata liavamanji vaco kuenje vosi yavo va kala kohongele yaco.

Osungu Yolombangi Via Yehova yi yongola okuti, olohongele capiãla enene olohongele vi lingiwa olosemana viosi, vi amamako oku tiamẽla kefendelo lietu olonjanja viosi ndaño luvei wo COVID-19. Omo liaco, Osungu Yolombangi Via Yehova, ya eca olonumbi Kolobetele viosi violuali viatiamẽla koku endisa olohonge viekongelo ndomo ci likuata lekalo lio pocitumãlo. Olonjanja vimue eci ci lekisa okuti, akundi va sukila oku liongolola vovimunga vitito ale oku linga olohongele lekuatiso liolotelefone ndeci ovideoconferência. Tua kolela okuti, vamanji voluali luosi va ka amamako oku upa esilivilo kokulia kuespiritu olonjanja viosi vakongelo osi.

Eci ci lekisa okuti lacimue ci pondola oku tateka unene wa Yehova woku tu kuatisa ndocimunga oku yula ovitangi.—Osamo 18:29.