Keteke 7 ya Kupupu 2020, vokuenda kuvei wo coronavirus, Olombangi Via Yehova koluali luosi va linga Ocipito Conjivaluko yolofa via Yesu Kristu. Ndeci, manji Stephen Lett o panga onepa Kosungu Yolombangi Via Yehova wa popia hati: “Ka kuli uvei ale cimue voluali okuti ci tepulula ombili tu kuetele Yehova la Yesu omo liovina va tu lingila, ndaño oku tepulula onjongole yetu yoku linga Ocipito Conjivaluko colofa via Kristu.” Eci ca lekisiwa ndati unyamo ulo?

Ocipama eci oco catete kulala wovipama Ocina Cokaliye, vina vi ka lombolola ndomo vamanjetu voluali luosi va linga Ocipito Conjivaluko vokuenda kuvei wo coronavirus. Vocipama eci catete, tu tala ndomo Ocipito Conjivaluko ca lingiwa kombala Yolombangi Via Yehova kuenda ko Filiale yo Estados Unidos.

Omo lioku pokola konumbi yombiali yokuti ka citava oku liongolola owiñi walua, Osungu Yolombangi Via Yehova ya nõlapo okuti ku lingiwa esokiyo Liocipito Conjivaluko kepata liosi lio Betele. Manji Anthony Morris wa linga ohundo yaco kocitumãlo cimue ko Warwick. Vamanji vosi va panga onepa kepata lio Betele ko Estados Unidos, va yeva ocipama caco volohondo viavo muẽle. Ndaño okuti kua kala omanu vatito va ponduile oku lia kombolo loku nyua kovinyu, pole, omo liocisola ombolo lovinyu ya eciwa kepata liosi lio Betele.

Vamanji ko Betele va tẽlavo oku likongela lakongelo avo lekuatiso lio videoconferência. Handi vali akulu vekongelo okuti va kasi ko Betele va tẽla oku linga ohundo Yocipito Conjivaluko lekuatiso lio videoconferência.

Vamanji valua va panga onepa kepata lio Betele va lombolola okuti, Ocipito eci Conjivaluko, oku ci sokisa levi via pita ale, eci cimue ci likasi. Ndaño okuti ka ca tavele oku kala la vamanji vakuavo, pole, va liyeva okuti va likuete omunga lavamanji voluali luosi, poku ivaluka olonjila vivali viocisola Suku yetu Yehova kuenda Omõlaye wa soliwa Yesu Kristu va lekisa.—Yoano 3:16; Mateo 20:28.