Ocipito Conjivaluko Colofa Via Kristu cunyamo 2020, ca litepele lovipito viosi via lingiwa ale vocisoko cetu. Eyi onjanja yatete okuti Ocipito Conjivaluko ca piyiwa vo televisão kuenda vo radio kalimi osi o vo Afrika.

Eci ca ecelela okuti ci pitahãla 407 kolohulukãi viakundi kuenda omanu vakuavo va lekisa onjongole, va kala Kocipito Conjivaluko. Etendelo liomanu vaco vosi ka lia kũlĩhĩwile, pole, esokiyo liaco lia kuata epondolo lioku pitiya kueci ci soka 150 kolohuluwa viomanu.

Omanu valua va linga Ocipito Conjivaluko lekuatiso lio videoconferência, omo liuveyi wo Covid-19. Pole, akundi vamue va sangiwa pocitumãlo cina okuti, o internet kuenda olotelefone via tĩla calua okuti ka citava oku yevelela, ale oku tapa olovideo. Omo liaco, Osungu Yolombangi Via Yehova ya tava okuti olofiliyale vimue vi pinga kovingungu vio Televisao kuenda vio Radio okuti, vi pitiya Ocipito Conjivaluko londando yime ya pita pokati.

Osimbu handi Ocipito Conjivaluko ka ca lingiwile, olofiliyale vi soka 11 ndeci, Ongola, o Benin, o Camarões, o Costa do Marfim, o Gana, o Malauí, o Moçambique, o República Democrátika do Kongo, o Senegal, o Zâmbia kuenda o Zimbábue, va sandiliya ovitumãlo viupange waco kuenje va linga esokiyo liokuti, ohundo Yocipito Conjivaluko yi pitiyiwa kueci ci pitahãla 36 kovitumãlo oku kongelamo ci soka 16 kolofeka.

Vongola

Ci soka ovingungu epandu vio radio, via tava oku pitiya ohundo Yocipito Conjivaluko kalimi epandu ndeci: o Ibinda, o Kikongo, o Kimbundu, o Nyaneka, o Putu kuenda Umbundu. Ovingungu vio radio ya yevalisa toke kolonepa kuli omanu valua.

Ko República Democratika do Kongo

Ondonge yimue Yembimbiliya ya linga esokiyo lioku linga Ocipito Conjivaluko lika liaye omo okuti, epata liaye lia suvukile Olombangi Via Yehova. Pole, osimbu a kala oku lipongiya oco a linge Ocipito Conjivaluko, isiaye wa tumãlele vohondo yoku lila wo vilikiya loku popia hati: “Ci kasi oku fetika!” Eye wa enda vohondo yaco kuenda wa komõha poku mola okuti epata liosi lia liongolola, oco va tale Ocipito Conjivaluko votelevisão. Ci soka ekũi liomanu vakuepata liaye va kala Kocipito Conjivaluko.

Vimbo limue ocipepi lo Luena, omunu umue okuti Hambangiko ya Yehova wa popia hati: “Asongui vetu vetavo ka va lingile cimue. Pole, ene vu kasi oku amamako oku fendela Suku yene vokuenda kuvei wo Covid-19. Tu likongela kokuene!”

Ko Gana

Ocingungu cimue co televisão ca tava oku pitiya Ocipito Conjivaluko kelimi lio Tvi. Ocingungu caco, ca eca esapulo limue lioku laleka omanu vosi oco va tale Ocipito Conjivaluko. Oco ca lekisavo olovideo losapi hati: Momo Lie Yesu a Fila? Momo Lie Suku a Kasi Oku Ecelela Ohali? Sololola Asumũlũho tu ka Kuata Kovaso Yoloneke.

Ko Senegal

Manji umue ukãi wa popia hati: “Va vangula eci ca tiamẽla ku Yehova vo televisão kuenda vo radio, eci ci komõhisa! Tu kuete esumũlũho lialua kuenda tu yevite esanju. U eye Suku yetu Yehova!”

Manji ukuavo ukãi wa popiavo hati: “Eci nda yeva okuti Ocipito Conjivaluko ci ka pitiyiwa vo televisão nda sokolola ndoco: ‘Eli epuluvi ndi kuete lioku panga onepa kupange woku eca otuikanda tuelaleko lioku enda Kocipito Conjivaluko okuti upange ka tua lingile omo lio Covid-19.’ Vepuvi liaco haico nda sapuilako vana nda siata oku longisa Embimbiliya, vana nda siata oku linga apasu kuenda vana nda kũlĩha oco va tale Ocipito Conjivaluko vo televisão. Ci soka eceya komanu vana ndi longisa Embimbiliya kumue lapata avo va tẽla oku tala ohundo. Umue pokati Kepalume liange ko Ziguinchor okuti wa tala ohundo vo televisão wa ndi pinga oco tu sapele vali catiamẽla kondaka yaco kuenje nda yeva esanju lialua.”

Esokiyo eli lilikasi, umue vali uvangi u lekisa okuti, la Yehova “ovina viosi vi tẽliwa.”—Mateo 19:26.