Unyamo wupange 2020 wa nena esakalalo lialua kovopange espiritu Olombangi Via Yehova voluali luosi. Pole, ovolandu aco a sitululavo ekolelo lia vamanjetu oco vamameko oku pandikisa loku likuata omunga.

Esakalalo liatete lia fetika lefengi lio KOVID-19, okuti lia koka esakalalo lialua komanu voluali luosi. Olombangi Via Yehova via lekisa esakalalo poku liteyuila kefengi. Ovio via sanga olonjila viokaliye vioku linga olohongele viavo viefendelo, oku vetiya pokati kuenda oku kunda olondaka viwa.

Cilo tu tala ovolandu a komohĩsa wunyamo ulo.—Olosapo 15:30.

Vokuenda kunyamo wupange, ocisoko cetu ca sandeka o Tradução do Novo Mundo da Bíblia Sagrada, yosi ale onepa yimue kueci ci soka 36 kalimi. Omo lioku tatekiwa lefengi lio KOVID-19, Ambimbiliya alua a sandekiwa vo Internet vokuenda kuolohongele via lingiwa vo Internet. O Tradução do Novo Mundo cilo ya sandekiwa yosi ale onepa yimue kueci ci soka 193 kalimi.

Keteke 18 Yelombo wo 2020, Osungu Yolombangi Via Yehova ya linga esokiyo liokuti olosãi viosi ku pangiwa ovideo yimue yi lombolola ulandu wefengi vo jw.org kuenda vo JW Library.

Vulandu watete, manji Stephen Lett wa popia okuti, ndaño okuti efengi li koka esakalalo, pole, lieca uvangi wokuti, “tu kasi konepa ya sulako yoloneke via sulako violuali lulo. Ka tu kuete atatãhãi, onepa ya sulako yoloneke via sulako!”

Ndaño lasakalalo koloneke vilo, manji Lett wa popia hati: “Etu tuafendeli va Yehova ka tu sukila oku sakalala.”

Volovideo viulandu wefengi mua kongela ovolandu a pamisa a tunda voluali luosi. Ovolandu aco a lekisa olondunge vi tunda koku pokola kolonumbi vi eciwa Losungu Yolombangi Via Yehova. Kolonepa vimue, asualali va pandiya omunga tu kuete la vamanji kuenda onjila ndomo tu kasi oku liyaka lefengi eli.

Vokuenda kuanyamo afendeli va Yehova va siata oku liongoluila pamosi oco va linge Ondalelo ya Ñala. Unyamo ulo kovitumãlo vialua, ka ca tavele oku liongoluila pamosi. Omo liaco, omunu lomunu kuenda apata va pongiya ombolo yavo lovinyu kuenje va yevelela ohundo Yonjivaluko vo videokonferensia.

Kovitumãlo vimue, ka ca tavele oku linga o videokonferensia. Eci oco ca lipita kolo Betele vi soka 11 vo Afrika. Ovo va linga esokiyo lioku linga Onjivaluko vo televisãu kuenda kovingungu vio Radio. Esokiyo liaco lia ecelela okuti, ci pitãhala 407.000 kakundi va yevelela ohongele yaco oku kongelamo omanu valua va lekisa onjongole.

Osungu Yolombangi Via Yehova ya tava okuti eliangiliyo lia lingiwa Konjivaluko, li kuamiwa lolo filiale oco ku lingiwe olohongele viekongelo vo televisãu kuenda vo radio. Lonjila ndeyi, akundi va kasi kovitumãlo vina okuti olohukũi, va siata oku yevelela olohongele viavo viosemana vo radio kuenda Televisãu. Toke cilo, ci soka 23 kolo filiale, via siata oku kuata eliangiliyo liaco, oku kongelamo vimue vo Afrika, ko Europa, ko Amerika do Norte, kuenda ko Amerika do Sul.

Omo liefengi lio KOVID-19, ka ca lelukile ku vamanji valua oku sanga ovina va sukila. Ci pitãhãla 400 Kovisoko Vioku Kuatisa Vana va Pita Lovilunga, via sokiyiwa voluali luosi oco vi ece ekuatiso kovitumãlo kuna okuti akundi ka va kuete ndomo va landa ovina va sukila. Vokuenda kunyamo wupange 2020, Osungu Yolombangi Via Yehova, ya eca eci ci pitãhala 18 kolohuluwa violondolare oco vi kuatise eci ci pitãhãla 330.000 kakundi.

Eyi ya kala onjanja yatate, vamanji va talela ohongele yofeka vo Internet. Vamanji vapanga onepa Kosungu Yolombangi Via Yehova kuenda oloñuatisi viavo, va ngalavala olovideo viosi viohongele yofeka. Olovideo viaco via ngalavaliwa kueci ci pitãhala 500 kalimi. Ulandu wohongele yofeka wa kapiwa vo jw.org kuenda vo JW Library app, oco akundi kuenda omanu vakuavo va vi talele kolonjo viavo.

Kolofeka vialua ndaño vamanji va kasi ale oku tala ohali omo liefengi, va kasivo oku lambalaliwa calua.

Ko Rusia, akuenje velombe va tuiyila olonjo vialua Violombangi Via Yehova kuenda valua pokati kavo va kapiwa vokayike. Koloneke via sulako, 42 ya vamanji ko Rusia va kapiwa vokayike kuenda vamanji vamue va tipuiwa. Tunde kunyamo 2017 Ombonge ya Velapo yo ko Rusia ya nõlapo oku tuiyila ci pitãhala 1.000 yolonjo via vamanjetu.

Etendelo lialua vali enene Liolombangi Via Yehova vi kasi vokayike, li sangiwa ko Eritreia, okuti toke cilo ci soka 52 ya vamanji va kasi vokayike. Pokati komanu vaco pa sangiwa Paulos Eyasu, Isaac Mogos, kuenda Negede Teklemariam, okuti va kapiwa vokayike tunde keteke 17 Yenyenye Linene, 1994, omo okuti ka va yongola oku enda kuyaki omo liekolelo liavo. Oku kongelamo 26 ya vamanji alume lakãi va kasi vokayike ci pitãhala ekũi kanyamo.

Tu amamako oku likutililako vamanji vosi va kasi vokayike oco vamameko oku lekisa utõi. Tua kũlĩha okuti ovo va kasi oku lekisa ekolelo osimbu va pandikisa kelambalalo liavo.—Esituluilo 2:10.

Vokuenda kunyamo wa pita wupange, Olombangi Via Yehova voluali luosi via lekisa ekolelo liavo ku Yehova poku kuama olonjila via litepa vioku amamako oku kunda, oku kuama olonjila viñi viñi vioku li pamisa pokati kuenda oku pokola lonjanga kolonumbi vi tunda Kosungu Yolombangi Via Yehova kuenda violombiali.

Kovilinga viavo viosi viekolelo, vamanjetu va lekisa ocisola cavo va kuetele Ululiki. Kuenda ekolelo liavo li ka va kuatisa oku pandikisa koloseteko vi keya kovaso yoloneke.—Tiago 1:2, 3.