Ombala yoluali luosi Yolombangi Via Yehova yi kasi oku kuama ciwa ulandu liuveyi wokoronaviru (ya kũlĩhĩwa okuti, COVID-19). Tua kũlĩha okuti eci ci kasi oku tẽlisiwa ocitumasuku Cembimbiliya cokuti efengi eli, ondimbukiso yoloneke via sulako. (Luka 21:11) Eci ku yevala o cisalui cuveyi umue, ca sunguluka oku kuama olonjila viwa oco tu liteyuile etu muẽle kuenda omanu vakuavo. Olosapo 22:3.

Citava okuti tu lipula ndoco: Vamanjetu va kasi kovitumãlo kuli uveyi waco va kasi ndati? Ocisalui co COVID-19 wanena esakalalo lialua kolofiliale kuenda kakongelo yo ko Italia, yo Japão, yo Koreia yo Kombuelo kuenda kolofeka vikuavo. Kolofeka vimue, vamanji va kasi ko Betele ka citava okuti va tunda posamua kuenda ka citavavo oku tambula akombe. Handi vali, ombiali ya handeleka okuti ka citava vali oku liongolola omanu valua, eci ca kisika okuti olohongele vietu vimbo ka vi lingiwa. Eci ca kisikavo oku linga apongoloko kolohongele vietu kuenda kupange woku kunda kovitumãlo vimue. Ndaño lovitangi viaco, vamanjetu va kasi oku amamako oku likolisa pokati kuenda oku lipamisa konepa yespiritu omunu lukuavo.—Yuda 20, 21.

Omo liekalo liaco, vamanji va siata oku nõlapo oku kuama olonumbi vi kuãimo. Atosi aco a pondola oku ku kuatisa kuenda oku kuatisa epata liove eci vu liyaka locisalui cuveyi umue kocitumãlo vu sangiwa.

• Yuvula oku sakalala calua. Ndaño okuti tu sukila oku lunguka lafengi oco tu liteyuile, tu sukila oku lombolola ciwa ondaka yaco oco ka ci kakoke usumba. —Olosapo 14:15; Isaya 30:15.

• Kuama Olonumbi Via Eciwa Lolombiali. Olombiali viopocitumãlo o kasi, pamue va tumbika olonjila vimue oco ci teyuile uhayele womanu. Ca sunguluka oku yeva asapulo oco tu kapeko olonumbi via tumbikiwa lombiali.—Va Roma 13:1.

• Oku Kuata Onjelo Yiwa. Ca sunguluka oku sukula olonjanja vialua eka lonjapau ale ovihemba vi ponda ovipuka lekuatiso lio alcool. Tu sukilavo oku yelisa ciwa ovikuata viosi tu kuata olonjanja vialua okuti vi kasi konjo yetu kuenda Konjango Yusoma. Handi vali, olonoño via handelekavo oco ka tu ka lilami peka, momo ci pondola oku sambuisa uveyi waco. Catiamẽla kuveyi wokoronaviru, Ocisoko Cuhayele Woluali Luosi, ya sandeka olonjila vikuavo omanu va sukila oku kuama.

• Lekisa Ocisola Komanu Vakuavo. Ndaño okuti vosi yetu tua kũlĩha esilivilo lioku enda kolohongele kuenda kupange woku kunda, nda okuti o kasi oku vela, ca sunguluka oku kala konjo oco ku ka sambuiseko omanu vakuavo. Poku ci linga, ci ka situlula ocisola tu kuetele ongongela yetu, kuenje ci ka teyuilavo vamanji kuenda omanu tu lisungue lavo posongo okuti Halombangiko via Yehova. —Mateo 22:39.

• Kuama Olonumbi Viatiamẽla Kapongoloko a Lingiwa Violohongele. Kolofeka vina kuli ocisalui cuveyi waco, citava okuti, ofiliale yi sapuila vamanji okuti olohongele viekongelo, olohongele vimbo kuenda olohongele vikuavo viocisoko ka vi lingiwa vokatembo kamue. Eci oco ci kasi oku lingiwa lolofeka vina okuti, kuli ale uveyi we puka lio COVID-19, ndeci kolonepa vialua yo Italia, yo Japão kuenda ko Koreia yo Kombuelo. Omo liekalo liaco liofeka, vana okuti, vakuka va sukila oku tala olohongele viangalavaliwa, vina akundi va vitalela konjo. Akundi va sukila oku kuama olonjila vioku kunda lekuatiso liotelefone, asapulo ale ovikanda.

Atosi akuãimo a lekisa olonumbi via sunguluka oco tu liteyuile kovoveyi.

• “Vença a Guerra Contra as Doenças” O Despertai! No. 6 2016, kemẽla 4-6

• “Como Ter Uma Saúde Melhor” O Despertai! Yevambi 2015, kemẽla 2-7

• “Você Pode Melhorar Sua Saúde: 4 Passos—Proteja Sua Saúde” O Despertai! Yelombo 2011, kemẽla 7