Ekandu elinga limue, onjongole, ale ocisimĩlo cimue ci lipatãla lovihandeleko via Suku. Mua kongela oku lueya ovihandeleko via Suku poku linga eci ka ca sungulukile kovaso Aye. (1 Yoano 3:4; 5:17) Embimbiliya li lombololavo akandu a lingiwa vuyombeki, ci lomboloka oku siapo oku linga eci ca sunguluka.—Tiago 4:17.

 Valimi atete Embimbiliya lia sonehiwa, olondaka vi tiamisiwila kekandu vi lombolola “oku lueya ondimbukiso yimue” ale ocimãho cimue. Ndeci, ocimunga cimue casualali ko Isareli yosimbu, ca loñolohele calua koku imba ovawe okuti “ka va ponyi” ale volondaka vikuavo, “ka va lueya.” (Olonganji 20:16) Omo liaco, oku linga ekandu ci lombolola oku lueya ocimãho colonumbi via lipua via Suku.

 Omo okuti Suku eye Ululiki, o kuete omoko yoku tumbikila ovihandeleko omanu. (Esituluilo 4:11) Etu tu ka lilombolola kokuaye omo liovilinga vietu.—Va Roma 14:12.

Ci tẽliwa hẽ oku yuvula akandu osi?

 Sio. Momo Embimbiliya li lombolola okuti, “vosi va linga ekandu kuenje va lipumbisa oku kuata ulamba wa Suku.” (Va Roma 3:23; 1 Olosoma 8:46; Ukundi 7:20; 1 Yoano 1:8) Momo lie?

 Omanu vatete, Adama la Eva, kefetikilo va lipuile. Eci ci lomboloka okuti, ovo va lulikiwa tupu va lipua, lesetãhalo lia Suku. (Efetikilo 1:27) Pole, ovo va pumba ekalo liaco omo lioku sinĩla Suku. (Efetikilo 3:5, 6, 17-19) Eci ovo va cita omãla, va sambuisa ekandu kuenda ekambo lioku lipua kocitumbulukila cavo. (Va Roma 5:12) Soma Daviti wo ko Isareli wa popia hati, “nda citiwa leko lioku lueya.”—Osamo 51:5.

Anga hẽ akandu amue a kãla vali enene okuti akuavo a sule?

 Oco. Ndeci, Embimbiliya li popia okuti alume vo ko Sodoma yosimbu va kala “olondingaĩvi kuenda va lingaile akandu alua,” akandu aco ‘aluile enene.’ (Efetikilo 13:13; 18:20) Kũlĩhĩsa ovina vitatu vi situlula nda ekandu lia kãla calua ale sio.

1.   Oku kãla kuekandu. Embimbiliya li tu vetiya oku yuvula akandu a kãla ndeci, evĩho liukahonga, efendelo lioviteka, oku nyana, uholua, ocipululu, oku ponda kuenda umbanda. (1 Va Korindo 6:9-11; Esituluilo 21:8) Embimbiliya li lekisa okuti akandu aco a litepa lakandu ana ka a lingiwa ocipango ndeci, olondaka ale ovilinga vi sumuisa vakuetu. (Olosapo 12:18; Va Efeso 4:31, 32) Pole, Embimbiliya li tu vetiya oco tu yuvule oku pembula akandu ana okuti a pondola oku tu tuala koku lueya ovihandeleko via Suku.—Mateo 5:27, 28.

2.   Esunga liaco. Omanu vamue va linga akandu omo ka va kũlĩhĩle ovihandeleko via Suku. (Ovilinga 17:30; 1 Timoteo 1:13) Embimbiliya li pisa akandu aco. Pole, li lekisavo okuti ca litepa loku sinĩla ovihandeleko via Suku locipango. (Atendelo 15:30, 31) Akandu a kãla a tunda ‘kesino liutima.’—Yeremiya 16:12.

3.   Olonjanja ekandu lia lingiwa. Embimbiliya li lekisa okuti, pokati koku linga ekandu onjanja yimosi lika kuenda oku linga ekandu olonjanja vialua, pali oku litepa. (1 Yoano 3:4-8) Suku o pisa una okuti wa lilongisa eci ca sunguluka, pole, amamako oku ‘linga ekandu ocipango.’—Va Heveru 10:26, 27.

 Omunu wa linga ekandu linene citava okuti o livetela evelo. Ndeci Soma Daviti wa soneha ndoco: “Momo akulueya ange a ndi talisa ohali; ndocitele cimue ci lema, o-o alua okuti si tẽla oku ambata.” (Osamo 38:4) Pole, Embimbiliya lieca elavoko eli: “Olondingaĩvi vi tinduke konjila yavo yĩvi. Kuenda omanu vakuevĩho va siepo ovisimĩlo viavo vĩvi; va tiuke ku Yehova, una o ka va kuatela ohenda, ku Suku yetu, momo eye o ka ecela lutima wosi.”—Isaya 55:7.