Embimbiliya li popia okuti, Suku o yongola oku tu ĩha “ekalo liwa kuenda elavoko limue.” a (Yeremiya 29:11) Esunga limue lieci Suku a ecela Embimbiliya kokuetu lieli liokuti, ‘lelembeleko li tunda Kovisonehua, tu kuata elavoko.’ (Va Roma 15:4) Ndomo tu ka ci kũlĩhĩsa, elungulo liolondunge Liembimbiliya li pondola oku eca kokuetu elavoko, poku tu kuatisa kovitangi vieteke leteke, osimbu olio li tu likuminya oku tu ĩha elavoko li komõhisa lio kovaso yoloneke.

Vocipama cilo

•  Embimbiliya li tu kuatisa ndati oku kuata elavoko?

•  Elavoko lipi Embimbiliya li eca komanu vosi?

•  Ovinimbu Viembimbiliya viatiamẽla kelavoko

 Poku tu sapuila ovina vimue tu sukila oku linga oco tu mioñolole omuenyo wetu, Embimbiliya li tu kuatisa oku kuata elavoko. Kũlĩhĩsa ovindekaise vimue viatiamẽla kondaka eyi.

•   Sandiliya alungulo awa Vembimbiliya. Osamo 119:105 yi popia hati: “Ondaka yove oyo ondiyelo yomãhi yange, kuenda ocinyi conjila yange.” Ocinyi ciwa, ci pondola oku linga ovina vivali. Oco ci tu kuatisa oku mola lonjanga eci ci kasi kovaso yetu kuenda eci ci kasi ocipãla. Cimuamue haico okuti, olonumbi Viembimbiliya vi tu kuatisa oku kuata onima yiwa koku liyaka lovitangi vi kasi kovaso yetu, loku tu ĩha elavoko liwa eteke leteke. Alongiso Embimbiliya a tumbulula ongusu yetu loku “kokela utima oku sanjuka.” (Osamo 19:7, 8) Handi vali, Embimbiliya li eca ocinyi kocipango ci komõhisa ca Suku catiamẽla kovina vi ka pita lomanu kuenda lilu lieve kovaso yoloneke. Elavoko liaco li tu ĩha esanju li kala otembo ka yi pui kuenda onjolela.

•   Ecelela okuti vakuene va ku kuatisa. Poku liyaka locitangi cimue ci kasi ndu okuti ka ci kuete esulilo, tu pondola oku vetiyiwa oku yuvula epata kuenda akamba. Pole, Embimbiliya li popia okuti, tu sukila oku yuvula oku kuata ocituwa caco, momo ci tu vetiya oku linga ovina viuveke loku nõla olonjila ka via sungulukile. (Olosapo 18:1) Omanu vana tu sole, va pondola oku tu kuatisa oku kuata ocituwa ca sunguluka. Ovo va pondolavo oku tu ĩha olonumbi viwa vi lekisa ndomo tu liyaka locitangi cimue. (Olosapo 11:14) Ovo va tu lembeleka loku tu kavuluisa, poku tu ĩha ongusu yoku pandikisa toke eci ovitangi vi pita.—Olosapo 12:25.

•   Likutilila ku Suku. Embimbiliya li popia hati: “Imba ocilemo cove ku Yehova kuenda eye o ka ku kuatisa. Eye lalimue eteke a ka ecelela okuti, ukuesunga o kupuka.” b (Osamo 55:22) Yehova o tukuiwa okuti, “Suku una eca eca elavoko.” (Va Roma 15:13) Ove o pondola oku likutilila kokuaye catiamẽla ‘kasakalalo ove osi,’ loku kuata ekolelo liokuti eye o ku tata. (1 Petulu 5:7) Omo liaco, Embimbiliya li popia hati: “Eye o vu kanguisi, haeye o vu pamisi loku vu talamisi ngõ.”—1 Petulu 5:10.

•   Ecelela okuti oloseteko vi pamisa elavoko liove. Embimbiliya li likuminya hati: “Una o . . . yevelela [Suku] o ka tunga apa pa koka kuenda ka ka sakalaisua omo liusumba wefengi.” (Olosapo 1:33) Ukãi umue o tukuiwa Margaret wo ko Australia, eci ocilunga candunde ovava ca nyõla onjo yaye, wa pumba ovikuata vialua. Pole, eye ka puile elavoko, wa lilongisa ocina cimue ci kuete esilivilo cokuti, ovipako ka vi tumãla otembo yalua. Noke eye wa nõlapo oku tiamisila utima kovina vi kuete esilivilo lia velapo okuti, epata liaye, akamba, ukamba waye la Suku kuenda elavoko lia tukuiwa Vembimbiliya.—Osamo 37:34; Tiago 4:8.

 Embimbiliya li likuminya oku nena ekalo liwa kovaso yoloneke komanu kuenda kongongo. Elavoko liaco, ndopo muẽle li ka tẽlisiwa. Ocili okuti, ovitangi omanu va siata oku liyaka lavio koloneke vilo, vi lekisa okuti tu kasi “koloneke via sulako” violuali lulo. (2 Timoteo 3:1-5) Ndopo muẽle, Suku o ka pokuisa ovina viosi vi kasi oku pita kilu lieve, o ka imũla ekambo liesunga kuenda ohali. Eye o ka ci linga pocakati cuviali umue u tukuiwa okuti, Usoma wa Suku. (Daniele 2:44; Esituluilo 11:15) Yesu wa tukula uviali waco wo kilu eci a popia vohutililo a longisa hati: “Usoma wove wiye. Ocipango cove ci lingiwe palo posi.”—Mateo 6:9, 10.

 Ocipango ca Suku catiamẽla komanu ca situluiwa ciwa Vembimbiliya. Kũlĩha vimue pokati kovitangi Usoma wa Suku u ka imũla:

•   Ka ku ka kala vali onjala. “Osi yi ka eca ovaima a-o.”—Osamo 67:6.

•   Ka ku ka kala vali ovovei. “Layimue onungi yi ka popia yiti: ‘Ndi vela.’”—Isaya 33:24.

•   Ka ku ka kala vali oku fa. Suku “o ka puenya asuẽlẽla osi vovaso [omanu], oku fa ka ku ka kalako vali, ndaño oku lila loku liyula levalo ka vi ka kalako vali. Ovina viatete via pita.”—Esituluilo 21:3, 4.