Embimbiliya ka li lombolola okuti kuli “akandu epanduvali a tuala kolofa.” Pole Embimbiliya li longisa okuti nda omunu wa linga akandu anene eye ka ka popeliwa. Embimbiliya li tukula akandu aco ndeci, evĩho liukahonga, oku fendela oviteka, umbanda, onyeño yalua, ovoholua, okuti “ovilinga vietimba.” Olio liamisako hati: “Vana va lingainga ovina viaco ka va piñala Usoma wa Suku.”—Va Galatia 5:19-21. a

Embimbiliya ka li tukula hẽ ‘ovina epanduvali Ñala a suvuka’?

Ocili. Ndomo ca lekisiwa Vembimbiliya Versão Rei Jaime, elivulu Liolosapo 6:16 li popia ndoco: “Ku li ovina epandu Yehova a suvuka, epanduvali muẽle a nyale.” Pole ulala wakandu a tukuiwa kelivulu Liolosapo 6:17-19 ha oko lika. Omo liaco, ulala waco u lekisa ovina viosi ka via sungulukile, oku kongelamo ovisimĩlo, olondaka kuenda ovilinga. b

Ondaka yokuti “ekandu li tuala kolofa” yi lombolola nye?

Ambimbiliya amue a tukula ondaka yaco kukanda 1 Yoano 5:16. Ndeci Vembimbiliya The New American Bible tu tangamo ndoco: ‘Ka kuli ekandu li koka olofa.’ Ondaka yokuti “ekandu liponda” citava okuti yi pongoluiwavo okuti, “ekandu li tuala kolofa.” Etepiso lipi li kasi pokati kolondaka viokuti “ekandu li tuala kolofa” kuenda “ekandu ka li tuala kolofa”?—1 Yoano 5:16.

Embimbiliya li lekisa okuti akandu osi a tuala kolofa. Omo liaco, tu pondola oku popeliwa kekandu kuenda kolofa lekuatiso liocisembi ca Yesu Kristu. (Va Roma 5:12; 6:23) Pole “ekandu li tuala kolofa”, ekandu lina okuti ka lieceliwa locisembi ca Yesu. Omo liaco, omunu o linga ekandu liaco, omunu una wa nõlapo oku amamako oku linga ekandu kuenda lalimue eteke a ka pongolola ovituwa viaye. Embimbiliya li tukulavo ekandu liaco okuti, ekandu limue “ka ecelua.”—Mateo 12:31; Luka 12:10.