Atavo amue a tukula Mingeli, okuti “Mingeli o Kola,” onduko yimue ya eciwa ku Yesu osimbu handi keyile palo posi kuenda eci a tiukila kilu. a Mingeli wa lihoya la Satana noke yolofa via Mose kuenda wa kuatisa ungelo umue wa ka tuale esapulo lia Suku kuprofeto Daniele. (Daniele 10:13, 21; Yuda 9) Mingeli o kuete omuenyo umue u likuata lelomboloko lionduko yaye liokuti, “Helie wa li Soka la Suku?”, poku teyuila uviali Wa Suku kuenda oku liyaka lovanyali va Suku.—Daniele 12:1; Esituluilo 12:7.

 Kũlĩhĩsa esunga lieci ca sungulukila oku popia okuti Yesu eye Mingeli Ungelo Unene.

•   “Mingeli Ungelo Unene.” (Yuda 9) Onduko yokuti “ungelo unene” yi lomboloka “kesongo kovangelo,” kuenda yi mõleha lika kovinimbu vivali Vembimbiliya. Kovinimbu viaco, ondaka yaco yi tiamisiwila lika komunu umosi, ci lomboloka okuti ungelo umosi lika o kuete onduko yaco. Cimue pokati kovinimbu viaco ci popia okuti Ñala Yesu wa pinduiwa kuava va fa “o loka kilu loku vilikiya lolukandi londaka yungelo unene.” (1 Va Tesalonike 4:16) Yesu o kuete “ondaka yimue yungelo unene” momo eye Mingeli ungelo unene.

•   Mingeli o Songuila olohoka viovangelo. “Mingeli lovangelo vaye va liyaka locinyoha” Satana. (Esituluilo 12:7) Mingeli o kuete unene wa piãla kilu, omo o tukuiwa okuti “umue pokati kolombiali vinene” kuenda “ombiali yinene.” (Daniele 10:13, 21; 12:1) Olonduko viaco, via eciwa ku Mingeli okuti eye “kesongo kolohoka viovangelo,” ndomo ci lekisiwa vo Testamendo Yokaliye ya sonehiwa la David E. Aune.

   Embimbiliya li tukula lika onduko yikuavo yomunu umue o kuete unene woku songuila olohoka viovangelo. Ondaka yaco, yi lekisa “eci Ñala Yesu a situluiwa tunde kilu lovangelo vaye va pama, londalu yulienge, osimbu a nena efetuluinyo.” (2 Va Tesalonike 1:7, 8; Mateo 16:27) Yesu “wa enda kilu kuenje ovangelo, lolombiali kuenda ovonene via pokola kokuaye.” (1 Petulu 3:21, 22) Ka ca sungulukile ku Suku oku nõla Yesu kuenda Mingeli okuti va likuetele ukuse oco va kale asongui vovangelo va kola. Omo liaco, ca sunguluka oku tava okuti olonduko viokuti Yesu kuenda Mingeli vi tiamisiwila komunu umuamue.

•   Mingeli, o ka “katuka” vokuenda ‘kuotembo yimue yohali.’ (Daniele 12:1) Kelivulu lia Daniele ondaka yokuti o ka “katuka,” yi tiamisiwila kosoma yimue yi katuka oco yi tẽlise ocikele cimue ci likasi. (Daniele 11:2-4, 21) Yesu Kristu o tukuiwa okuti “Ndaka ya Suku,” o ka tẽlisa ocikele cimue ci likasi “Ndosoma Yolosoma” oco a kundule ovanyali va Suku kuenda oku teyuila afendeli va Suku. (Esituluilo 19:11-16) Eye o ka ci linga vokuenda kuotembo ‘yohali ya piãla okuti ka ya la pita tunde kefetikilo lioluali toke cilo.’—Mateo 24:21, 42.