Ove o pondola oku kũlĩha Suku poku lilongisa catiamela kokuaye kuenda oku linga ovina viusanjuisa. Suku o yongola oku ‘amẽla kokuove.’ (Tiago 4:8) Embimbiliya li tu sapuila okuti, “eye ka kasi ocipãla letu.”—Ovilinga 17:27.

•  Ceci tu sukila oku linga oco tu kũlĩhe Suku

•  Ovohembi a tiamẽla koku kũlĩha Suku

 Tanga Embimbiliya

•  Ceci Embimbiliya li popia: “Ovina viosi via sonehiwa Vovisonehua vi Kola, vi tunda ku Suku.”—2 Timoteo 3:16.

•  Elomboloko: Suku eye Usovoli Wembimbiliya. Eye wa kapa ovisimĩlo viaye volondunge viasonehi Embimbiliya. Lekuatiso Liembimbiliya, Suku o tu sapuila eci a tu yonguila. Eye o tu situluila ovituwa viaye ndeci, ocisola, esunga kuenda ohenda.—Etundilo 34:6; Esinumuĩlo 32:4.

•  Ceci o sukila oku linga: Tanga Embimbiliya oloneke viosi. (Yehosua 1:8) Sokolola kueci wa tanga, loku lipula ndoco: ‘Ulandu owu u ndongisa nye catiamẽla ku Suku?’—Olosamo 77:12.

   Ndeci, tanga Yeremiya 29:11, kuenje li pula ndoco: ‘Nye Suku a ndi yonguila—ombembua ale ovitangi? Eye o Suku yimue ukuakufetuluinya, ale o yongola okuti ñuata ekalo liwa kovaso yoloneke?’

 Vanja lutate oviluvo

•  Ceci Embimbiliya li popia: “Ovituwa via [Suku] ka vi muiwa vi limbukiwa tunde koku lulikiwa kuoluali, momo vi muiwila kovina via lulikiwa.”—Va Roma 1:20.

•  Elomboloko: Ovina vi letiwe Suku a lulika, vi situlula ndomo eye a tuwa, ndeci upange umue wa pangiwa ciwa ale omakina yimue yatatama, vi situlula u wa vi sovola. Ndocindekaise, onjila ndomo owoño womunu wa pangiwa kuenda epondolo liawo, ci situlula olondunge via Suku. Ocinyi cekumbi kuenda olombungululu vikuavo, vi sitululavo unene waye.—Olosamo 104:24; Isaya 40:26.

•  Ceci o sukila oku linga: Sokiya otembo yoku kũlĩhĩsa kuenda oku lilongisila koviluvo viosi vi kasi voluali. Lipula ndoco, ‘Ovina vi komõhisa tu lete voluali, vi situlula nye catiamẽla ku Suku?’ a Ocili okuti, kuli ovina vialua voluali okuti, ka vi tu situluila cimue catiamẽla Kululiki wetu. Eli olio esunga lieci a tu ĩhila Embimbiliya.

 Tukula onduko ya Suku

•  Ceci Embimbiliya li popia: “Ndu vindikiya omo a kũlĩha onduko yange. Eci a mbilikiya ndu tambulula.”—Olosamo 91:14, 15.

•  Elomboloko: Suku, okuti onduko yaye Yehova, wa kapako calua vana va kũlĩha onduko yaye kuenda va yi tukula lesumbilo. b (Olosamo 83:18; Malakiya 3:16) Suku o li situlula kokuetu, poku tu sapuila onduko yaye. Eye hati: “Ame Yehova, oyo onduko yange.”—Isaya 42:8.

•  Ceci o sukila oku linga: Tukula onduko Yehova olonjanja viosi o vangula catiamẽla kokuaye.

 Vangula la Yehova poku likutilila

•  Ceci Embimbiliya li popia: “Yehova o kasi ocipepi la vosi vo vilikiya.”—Olosamo 145:18.

•  Elomboloko: Yehova amẽla ku vosi va likutilila kokuaye lekolelo. Ohutililo onepa yimue yefendelo yi situlula esumbilo liocili tu kuetele Suku.

•  Ceci o sukila oku linga: Likutilili ku Suku olonjanja viosi. (1 Va Tesalonike 5:17) U sapuila asakalalo ove loku lombolola ndomo o li yevite.—Olosamo 62:8. c

 Pamisa ekolelo liove ku Suku

•  Ceci Embimbiliya li popia: “Oku sanjuisa Suku ka ku tẽliwa te lekolelo.”—Va Heveru 11:6.

•  Elomboloko: Oco tu amẽle ku Suku, tu sukila oku kolela kokuaye. Vembimbiliya, oku kuata ekolelo ka ku lomboloka lika oku tava okuti kuli Suku. Ci lombolokavo oku kolela kokuaye lutima wosi, oku kongelamo olohuminyo viaye kuenda olonumbi viaye. Ekolelo li kuete esilivilo oco tu kuate ukamba wocili.

•  Ceci o sukila oku linga: Ekolelo liocili lia kunãmẽla ku Kũlĩhĩso. (Va Roma 10:17) Omo liaco, lilongisa Embimbiliya kuenda limbuka ove muẽle okuti, o pondola oku kolela ku Suku kuenda kalungulo aye. Olombangi Via Yehova vi sanjukila oku ku longisa Embimbiliya. d

 Linga eci ci sanjuisa Suku

•  Ceci Embimbiliya li popia: “Eci oco ci lomboloka ocisola ca Suku okuti, tu pokola kovihandeleko viaye.”—1 Yoano 5:3.

•  Elomboloko: Yehova o kasi ocipepi la vana va lekisa okuti vo sole, poku likolisilako oku pokola kovihandeleko viaye.

•  Ceci o sukila oku linga: Poku lilongisa Embimbiliya, limbuka eci Suku a sole kuenda eci ka sole. Lipula ndoco: ‘A pongoloko api ndi sukila oku linga oco ndi sanjuise Ululiki wange?’—1 Va Tesalonike 4:1.

 Kuatisiwa leteyuilo lia Suku poku kapako alungulo aye

•  Ceci Embimbiliya li popia: “Seteki oco vu limbuke okuti [Suku] ukuahenda.”—Olosamo 34:8.

•  Elomboloko: Suku o ku laleka oco o limbuke ndomo eye uwa calua. Eci ove o seteka ocisola kuenda ekuatiso liaye, o ka vetiyiwa oku amẽla kokuaye.

•  Ceci o sukila oku linga: Poku tanga Embimbiliya, kapako alungulo a Suku kuenda limbuka onima yi yililako. (Isaya 48:17, 18) Li longisavo ovolandu omuenyo womanu vamue okuti, lekuatiso lia Suku va yula ovitangi, va mioñolola ekalo liomuenyo wavo lowu wapata avo kuenda va sanga esanju liocili. e

 Uhembi: Ka tu pondola oku kũlĩha Suku, momo eye elumbu limue.

 Ocili: Ovina vimue viatiamẽla ku Suku ka ca lelukile oku kuata elomboloko liavio, momo eye Espiritu ka li muiwa. Ndaño ndoco, tu pondola oku kulĩha Suku. Ocili okuti, Embimbiliya li tu sapuila okuti tu sukila oku u kũlĩha, oco tu kuate omuenyo ko pui. (Yoano 17:3) Vupopi umue wa leluka, Embimbiliya li tu sapuila eci catiamẽla Kululiki wetu, poku tu situluila ekalo liaye, ocipango caye catiamẽla komanu kuenda olonumbi viaye. (Isaya 45:18, 19; 1 Timoteo 2:4) Ndomo ca tukuiwa, Embimbiliya li sitululavo onduko ya Suku. (Olosamo 83:18) Ka tu pondola lika oku kũlĩha Suku pole tu pondolavo oku amẽla kokuaye.—Tiago 4:8.